ṛca̱ṃ vāca̱ṃ pra pa̍dye̱ mano̱ yaju̱: pra pa̍dye̱ sāma̍ prā̱ṇaṃ pra pa̍dye̱ cakṣu̱: śrotra̱ṃ pra pa̍dye |
vāgoja̍: sa̱haujo̱ mayi̍ prāṇāpā̱nau
||36.1||yanme̍ chi̱draṃ cakṣu̍ṣo̱ hṛda̍yasya̱ mana̍so̱ vāti̍tṛṇṇa̱ṃ bṛha̱spati̍rme̱ tadda̍dhātu |
śaṃ no̍ bhavatu̱ bhuva̍nasya̱ yaspati̍:
||36.2||bhūrbhuva̱: sva̱: tatsa̍vi̱turvare̍ṇya̱ṃ bhargo̍ de̱vasya̍ dhīmahi |
dhiyo̱ yo na̍: praco̱dayā̍t
||36.3||kayā̍ naści̱tra ā bhu̍vadū̱tī sa̱dāvṛ̍dha̱: sakhā̍ | kayā̱ śaci̍ṣṭhayā vṛ̱tā
||36.4||kastvā̍ sa̱tyo madā̍nā̱ṃ mahi̍ṣṭho matsa̱dandha̍saḥ | dṛ̱ḍhā ci̍dā̱ruje̱ vasu̍
||36.5||a̱bhī ṣu ṇa̱: sakhī̍nāmavi̱tā ja̍ritṝ̱ṇām | śa̱taṃ bha̍vāsyū̱tibhi̍:
||36.6||kayā̱ tvaṃ na ū̱tyābhi pra ma̍ndase vṛṣan | kayā̍ sto̱tṛbhya̱ ā bha̍ra
||36.7||indro̱ viśva̍sya rājati | śaṃ no̍ astu dvi̱pade̱ śaṃ catu̍ṣpade
||36.8||śaṃ no̍ mi̱tra: śaṃ varu̍ṇa̱: śaṃ no̍ bhavatvarya̱mā |
śaṃ na̱ indro̱ bṛha̱spati̱: śaṃ no̱ viṣṇu̍rurukra̱maḥ
||36.9||śaṃ no̱ vāta̍: pavatā śaṃ na̍stapatu̱ sūrya̍: |
śaṃ na̱: kani̍kradadde̱vaḥ pa̱rjanyo̍ a̱bhi va̍rṣatu
||36.10||ahā̍ni̱ śaṃ bhava̍ntu na̱: śa rātrī̱: prati̍ dhīyatām |
śaṃ na̍ indrā̱gnī bha̍vatā̱mavo̍bhi̱: śaṃ na̱ indrā̱varu̍ṇā rā̱taha̍vyā |
śaṃ na̍ indrāpū̱ṣaṇā̱ vāja̍sātau̱ śamindrā̱somā̍ suvi̱tāya̱ śaṃ yoḥ
||36.11||śaṃ no̍ de̱vīra̱bhiṣṭa̍ya̱ āpo̍ bhavantu pī̱taye̍ |
śaṃ yora̱bhi sra̍vantu naḥ
||36.12||syo̱nā pṛ̍thivi no bhavānṛkṣa̱rā ni̱veśa̍nī |
yacchā̍ na̱: śarma̍ sa̱prathā̍:
||36.13||āpo̱ hi ṣṭhā ma̍yo̱bhuva̱stā na̍ ū̱rje da̍dhātana | ma̱he raṇā̍ya̱ cakṣa̍se
||36.14||yo va̍: śi̱vata̍mo̱ rasa̱stasya̍ bhājayate̱ha na̍: | u̱śa̱tīri̍va mā̱tara̍:
||36.15||tasmā̱ ara̍ṃ gamāma vo̱ yasya̱ kṣayā̍ya̱ jinva̍tha | āpo̍ ja̱naya̍thā ca naḥ
||36.16||dyau: śānti̍ra̱ntari̍kṣa śānti̍: pṛthi̱vī śānti̱rāpa̱: śānti̱roṣa̍dhaya̱: śānti̍: |
vana̱spata̍ya̱: śānti̱rviśve̍ de̱vāḥ śānti̱rbrahma̱ śānti̱: sarva śānti̱: śānti̍re̱va śānti̱: sā mā̱ śānti̍redhi
||36.17||dṛte̱ dṛha̍ mā mi̱trasya̍ mā̱ cakṣu̍ṣā̱ sarvā̍ṇi bhū̱tāni̱ samī̍kṣantām |
mi̱trasyā̱haṃ cakṣu̍ṣā̱ sarvā̍ṇi bhū̱tāni̱ samī̍kṣe |
mi̱trasya̱ cakṣu̍ṣā̱ samī̍kṣāmahe
||36.18||dṛte̱ dṛha̍ mā | jyokte̍ sa̱ndṛśi̍ jīvyāsa̱ṃ jyokte̍ sa̱ndṛśi̍ jīvyāsam
||36.19||nama̍ste̱ hara̍se śo̱ciṣe̱ nama̍ste astva̱rciṣe̍ |
a̱nyām̐ste̍ a̱smatta̍pantu he̱taya̍: pāva̱ko a̱smabhya śi̱vo bha̍va
||36.20||nama̍ste astu vi̱dyute̱ nama̍ste stanayi̱tnave̍ | nama̍ste bhagavannastu̱ yata̱: sva̱: sa̱mīha̍se
||36.21||yato̍-yataḥ sa̱mīha̍se̱ tato̍ no̱ abha̍yaṃ kuru | śaṃ na̍: kuru pra̱jābhyo'bha̍yaṃ naḥ pa̱śubhya̍:
||36.22||su̱mi̱tri̱yā na̱ āpa̱ oṣa̍dhayaḥ santu durmitri̱yāstasmai̍ santu̱ yo'smān dveṣṭi̱ yaṃ ca̍ va̱yaṃ dvi̱ṣmaḥ
||36.23||taccakṣu̍rde̱vahi̍taṃ pu̱rastā̍cchu̱kramucca̍rat | paśye̍ma śa̱rada̍: śa̱taṃ jīve̍ma śa̱rada̍: śa̱ta śṛṇu̍yāma śa̱rada̍: śa̱taṃ pra bra̍vāma śa̱rada̍: śa̱tamadī̍nāḥ syāma śa̱rada̍: śa̱taṃ bhūya̍śca śa̱rada̍: śa̱tāt
||36.24||