de̱vasya̍ tvā savi̱tuḥ pra̍sa̱ve'śvino̍rbā̱hubhyā̍ṃ pū̱ṣṇo hastā̍bhyām | ā da̍de̱ nāri̍rasi
||37.1||yu̱ñjate̱ mana̍ u̱ta yu̍ñjate̱ dhiyo̱ viprā̱ vipra̍sya bṛha̱to vi̍pa̱ścita̍: |
vi hotrā̍ dadhe vayunā̱videka̱ inma̱hī de̱vasya̍ savi̱tuḥ pari̍ṣṭuti̱: svāhā̍
||37.2||devī̍ dyāvāpṛthivī ma̱khasya̍ vāma̱dya śiro̍ rādhyāsaṃ deva̱yaja̍ne pṛthi̱vyāḥ |
ma̱khāya̍ tvā ma̱khasya̍ tvā śī̱rṣṇe
||37.3||devyo̍ vamryo bhū̱tasya̍ prathama̱jā ma̱khasya̍ vo̱'dya śiro̍ rādhyāsaṃ deva̱yaja̍ne pṛthi̱vyāḥ |
ma̱khāya̍ tvā ma̱khasya̍ tvā śī̱rṣṇe
||37.4||iya̱tyagra̍ āsīnma̱khasya̍ te̱'dya śiro̍ rādhyāsaṃ deva̱yaja̍ne pṛthi̱vyāḥ |
ma̱khāya̍ tvā ma̱khasya̍ tvā śī̱rṣṇe
||37.5||indra̱syauja̍ stha ma̱khasya̍ vo̱'dya śiro̍ rādhyāsaṃ deva̱yaja̍ne pṛthi̱vyāḥ |
ma̱khāya̍ tvā ma̱khasya̍ śī̱rṣṇe | ma̱khāya̍ tvā ma̱khasya̍ tvā śī̱rṣṇe | ma̱khāya̍ tvā ma̱khasya̍ tvā śī̱rṣṇe
||37.6||praitu̱ brahma̍ṇa̱spati̱: pra de̱vye̱tu sū̱nṛtā̍ | acchā̍ vī̱raṃ narya̍ṃ pa̱ṅktirā̍dhasaṃ de̱vā ya̱jñaṃ na̍yantu naḥ |
ma̱khāya̍ tvā ma̱khasya̍ tvā śī̱rṣṇe | ma̱khāya̍ tvā ma̱khasya̍ tvā śī̱rṣṇe | ma̱khāya̍ tvā ma̱khasya̍ tvā śī̱rṣṇe
||37.7||ma̱khasya̱ śiro̍'si | ma̱khāya̍ tvā ma̱khasya̍ tvā śī̱rṣṇe |
ma̱khasya̱ śiro̍'si | ma̱khāya̍ tvā ma̱khasya̍ tvā śī̱rṣṇe |
ma̱khasya̱ śiro̍'si | ma̱khāya̍ tvā ma̱khasya̍ tvā śī̱rṣṇe |
ma̱khāya̍ tvā ma̱khasya̍ tvā śī̱rṣṇe ma̱khāya̍ tvā ma̱khasya̍ tvā śī̱rṣṇe ma̱khāya̍ tvā ma̱khasya̍ tvā śī̱rṣṇe
||37.8||aśva̍sya tvā̱ vṛṣṇa̍: śa̱knā dhū̍payāmi deva̱yaja̍ne pṛthi̱vyāḥ | ma̱khāya̍ tvā ma̱khasya̍ tvā śī̱rṣṇe |
aśva̍sya tvā̱ vṛṣṇa̍: śa̱knā dhū̍payāmi deva̱yaja̍ne pṛthi̱vyāḥ | ma̱khāya̍ tvā ma̱khasya̍ tvā śī̱rṣṇe |
aśva̍sya tvā̱ vṛṣṇa̍: śa̱knā dhū̍payāmi deva̱yaja̍ne pṛthi̱vyāḥ | ma̱khāya̍ tvā ma̱khasya̍ tvā śī̱rṣṇe |
ma̱khāya̍ tvā ma̱khasya̍ tvā śī̱rṣṇe | ma̱khāya̍ tvā ma̱khasya̍ tvā śī̱rṣṇe | ma̱khāya̍ tvā ma̱khasya̍ tvā śī̱rṣṇe
||37.9||ṛ̱jave̍ tvā sā̱dhave̍ tvā sukṣi̱tyai tvā̍ | ma̱khāya̍ tvā ma̱khasya̍ tvā śī̱rṣṇe | ma̱khāya̍ tvā ma̱khasya̍ tvā śī̱rṣṇe | ma̱khāya̍ tvā ma̱khasya̍ tvā śī̱rṣṇe
||37.10||ya̱māya̍ tvā ma̱khāya̍ tvā̱ sūrya̍sya tvā̱ tapa̍se | de̱vastvā̍ savi̱tā madhvā̍naktu pṛthi̱vyāḥ saspṛśa̍spāhi | a̱rcira̍si śo̱cira̍si̱ tapo̍'si
||37.11||anā̍dhṛṣṭā pu̱rastā̍da̱gnerādhi̍patya̱ āyu̍rme dāḥ pu̱trava̍tī dakṣiṇa̱ta indra̱syādhi̍patye pra̱jāṃ me̍ dāḥ |
su̱ṣadā̍ pa̱ścādde̱vasya̍ savi̱turādhi̍patye̱ cakṣu̍rme dā āsru̍tiruttara̱to dhā̱turādhi̍patye rā̱yaspoṣa̍ṃ me dāḥ |
vidhṛ̍tiru̱pari̍ṣṭā̱dbṛha̱spate̱rādhi̍patye̱ ojo̍ me dā viśvā̍bhyo mā nā̱ṣṭrābhya̍spāhi mano̱raśvā̍si
||37.12||svāhā̍ ma̱rudbhi̱: pari̍ śrīyasva di̱vaḥ saspṛśa̍spāhi | madhu̱ madhu̱ madhu̍
||37.13||garbho̍ de̱vānā̍ṃ pi̱tā ma̍tī̱nāṃ pati̍: pra̱jānā̍m | saṃ de̱vo de̱vena̍ savi̱trā ga̍ta̱ sasūrye̍ṇa rocate
||37.14||sama̱gnira̱gninā̍ gata̱ saṃ daive̍na savi̱trā sa sūrye̍ṇārociṣṭa |
svāhā̱ sama̱gnistapa̍sā gata̱ saṃ daivye̍na savi̱trā sasūrye̍ṇārūrucata
||37.15||dha̱rtā di̱vo vi bhā̍ti̱ tapa̍saspṛthi̱vyāṃ dha̱rtā de̱vo de̱vānā̱mama̍rtyastapo̱jāḥ |
vāca̍ma̱sme ni ya̍ccha devā̱yuva̍m
||37.16||apa̍śyaṃ go̱pāmani̍padyamāna̱mā ca̱ parā̍ ca pa̱thibhi̱ścara̍ntam |
sa sa̱dhrīcī̱: sa viṣū̍cī̱rvasā̍na̱ ā va̍rīvartti̱ bhuva̍neṣva̱ntaḥ
||37.17||viśvā̍sāṃ bhuvāṃ pate̱ viśva̍sya manasaspate̱ viśva̍sya vacasaspate̱ sarva̍sya vacasaspate |
de̱va̱śruttvaṃ de̍va gharma de̱vo de̱vān pā̱hyatra̱ prāvī̱ranu̍ vāṃ de̱vavī̍taye |
madhu̱ mādhvī̍bhyā̱ṃ madhu̱ mādhū̍cībhyām
||37.18||hṛ̱de tvā̱ mana̍se tvā di̱ve tvā̱ sūryā̍ya tvā |
ū̱rdhvo a̍dhva̱raṃ di̱vi de̱veṣu̍ dhehi
||37.19||pi̱tā no̍'si pi̱tā no̍ bodhi̱ nama̍ste atu̱ mā mā̍ hisīḥ |
tvaṣṭṛ̍mantastvā sapema pu̱trānpa̱śūnmayi̍ dhehi pra̱jāma̱smāsu̍ dhe̱hyari̍ṣṭā̱'ha sa̱ha pa̍tyā bhūyāsam
||37.20||aha̍: ke̱tunā̍ juṣatā su̱jyoti̱rjyoti̍ṣā̱ svāhā̍ |
rātri̍: ke̱tunā̍ juṣatā su̱jyoti̱rjyoti̍ṣā̱ svāhā̍
||37.21||