deva̍ savita̱: prasu̍va ya̱jñaṃ prasu̍va ya̱jñapa̍ti̱ṃ bhagā̍ya |
di̱vyo ga̍ndha̱rvaḥ ke̍tu̱pūḥ keta̍ṃ naḥ punātu vā̱caspati̱rvāja̍ṃ naḥ svadatu̱ svāhā̍
||9.1||dhru̍va̱sada̍ṃ tvā nṛ̱ṣada̍ṃ mana̱:sada̍mupayā̱magṛ̍hīto̱'sīndrā̍ya tvā̱ juṣṭa̍ṃ gṛhṇāmye̱ṣa te̱ yoni̱rindrā̍ya tvā̱ juṣṭa̍tamam |
a̍psu̱ṣada̍ṃ tvā ghṛta̱sada̍ṃ vyoma̱sada̍mupayā̱magṛ̍hīto̱'sīndrā̍ya tvā̱ juṣṭa̍ṃ gṛhṇāmye̱ṣa te̱ yoni̱rindrā̍ya tvā̱ juṣṭa̍tamam |
pṛthi̱vī̱sada̍ṃ tvā'ntarikṣa̱sada̍ṃ divi̱sada̍ṃ deva̱sada̍ṃ nāka̱sada̍mupayā̱magṛ̍hīto̱'sīndrā̍ya tvā̱ juṣṭa̍ṃ gṛhṇāmye̱ṣa te̱ yoni̱rindrā̍ya tvā̱ juṣṭa̍tamam
||9.2||a̱pā rasa̱mudva̍yasa sūrye̱ santa sa̱māhi̍tam | a̱pā rasa̍sya̱ yo rasa̱staṃ vo̍ gṛhṇāmyutta̱mamu̍payā̱magṛ̍hīto̱ sīndrā̍ya tvā̱ juṣṭa̍ṃ gṛhṇāmye̱ṣa te̱ yoni̱rindrā̍ya tvā̱ juṣṭa̍tamam
||9.3||grahā̍ ūrjāhutayo̱ vyanto̱ viprā̍ya ma̱tim | teṣā̱ṃ viśi̍priyāṇāṃ vo̱'hamiṣa̱mūrja sama̍grabhamupayā̱magṛ̍hīto̱'sīndrā̍ya tvā̱ juṣṭa̍ṃ gṛhṇāmye̱ṣa te̱ yoni̱rindrā̍ya tvā̱ juṣṭa̍tamam | sa̱mpṛcau̍ stha̱: saṃ mā̍ bha̱dreṇa̍ pṛṅktaṃ vi̱pṛcau̍ stho̱ vi mā̍ pā̱pmanā̍ pṛṅktam
||9.4||indra̍sya̱ vajro̍'si vāja̱sāstvayā̱yaṃ vāja se̍t | vāja̍sya̱ nu pra̍sa̱ve mā̱tara̍ṃ ma̱hīmadi̍ti̱ṃ nāma̱ vaca̍sā karāmahe |
yasyā̍mi̱daṃ viśva̱ṃ bhuva̍namāvi̱veśa̱ tasyā̍ṃ no de̱vaḥ sa̍vi̱tā dharma̍ sāviṣat
||9.5||a̱psvantara̱mṛta̍ma̱psu bhe̍ṣa̱jama̱pāmu̱ta praśa̍sti̱ṣvaśvā̱ bhava̍ta vā̱jina̍: |
devī̍rāpo̱ yo va̍ ū̱rmiḥ pratū̍rtiḥ ka̱kunmā̍n vāja̱sāstenā̱yaṃ vāja set
||9.6||vāto̍ vā̱ mano̍ vā gandha̱rvāḥ sa̱ptaviśatiḥ | te agre'śva̍mayuñja̱m̐ste a̍smiñja̱vamā da̍dhuḥ
||9.7||vāta̍rahā bhava vājinyu̱jyamā̍na̱ indra̍syeva̱ dakṣi̍ṇaḥ śri̱yaidhi̍ |
yu̱ñjantu̍ tvā ma̱ruto̍ viśva̱veda̍sa̱ ā te̱ tvaṣṭā̍ pa̱tsu ja̱vaṃ da̍dhātu
||9.8||ja̱vo yaste̍ vāji̱nnihi̍to̱ guhā̱ yaḥ śye̱ne parī̍tto̱ aca̍racca̱ vāte̍ |
tena̍ no vāji̱n vala̍vā̱n bale̍na vāja̱jicca̱ bhava̱ sama̍ne ca pārayi̱ṣṇuḥ |
vāji̍no vājajito̱ vāja sari̱ṣyanto̱ bṛha̱spate̍rbhā̱gamava̍jighrata
||9.9||de̱vasyā̱ha sa̍vi̱tuḥ sa̱ve sa̱tyasa̍vaso̱ bṛha̱spate̍rutta̱maṃ nāka ruheyam |
de̱vasyā̱ha sa̍vi̱tuḥ sa̱ve sa̱tyasa̍vasa̱ indra̍syotta̱maṃ nāka ruheyam |
de̱vasyā̱ha sa̍vi̱tuḥ sa̱ve sa̱tyapra̍savaso̱ bṛha̱spate̍rutta̱maṃ nāka̍maruham |
de̱vasyā̱ha sa̍vi̱tuḥ sa̱ve sa̱tyapra̍savasa̱ indra̍syotta̱maṃ nāka̍maruham
||9.10||bṛha̍spate̱ vāja̍ṃ jaya̱ bṛha̱spata̍ye̱ vāca̍ṃ vadata̱ bṛha̱spati̱ṃ vāja̍ṃ jāpayata |
indra̱ vāja̍ṃ ja̱yendrā̍ya̱ vāca̍ṃ vada̱tendra̱ṃ vāja̍ṃ jāpayata
||9.11||e̱ṣā va̱: sā sa̱tyā sa̱ṃvāga̍bhū̱dyayā̱ bṛha̱spati̱ṃ vāja̱majī̍japa̱tājī̍japata̱ bṛha̱spati̱ṃ vāja̱ṃ vana̍spatayo̱ vimu̍cyadhvam |
e̱ṣā va̱: sā sa̱tyā sa̱ṃvāga̍bhū̱dyayendra̱ṃ vāja̱majī̍japa̱tājī̍japa̱tendra̱ṃ vāja̱ṃ vana̍spatayo̱ vimu̍cyadhvam
||9.12||de̱vasyā̱ha sa̍vi̱tuḥ sa̱ve sa̱tyapra̍savaso̱ bṛha̱spate̍rvāja̱jito̱ vāja̍ṃ jeṣam |
vāji̍no vājaji̱to'dhva̍na skabhnu̱vanto̱ yoja̍nā̱ mimā̍nā̱: kāṣṭhā̍ṃ gacchata
||9.13||e̱ṣa sya vā̱jī kṣi̍pa̱ṇiṃ tu̍raṇyati grī̱vāyā̍ṃ ba̱ddho a̍pika̱kṣa ā̱sani̍ |
kratu̍ṃ dadhi̱krā anu̍ sasani̍ṣyadatpa̱thāmaṅkāsyanvā̱panī̍paṇa̱t svāhā̍
||9.14||u̱ta smā̍sya̱ druva̍tasturaṇya̱taḥ pa̱rṇaṃ na veranu̍vāti praga̱rdhina̍: |
śye̱nasye̍va̱ dhraja̍to aṅka̱saṃ pari̍ dadhi̱krāvṇa̍: sa̱horjā tari̍trata̱: svāhā̍
||9.15||śaṃ no̍ bhavantu vā̱jino̱ have̍ṣu de̱vatā̍tā mi̱tadra̍vaḥ sva̱rkāḥ |
ja̱mbhaya̱nto'hi̱ṃ vṛka rakṣā̍si̱ sane̍mya̱smadyu̍yava̱nnamī̍vāḥ
||9.16||te no̱ arva̍nto havana̱śruto̱ hava̱ṃ viśve̍ śṛṇvantu vā̱jino̍ mi̱tadra̍vaḥ |
sa̱ha̱sra̱sā me̱dhasā̍tā sani̱ṣyavo̍ ma̱ho ye dhana sami̱theṣu̍ jabhri̱re
||9.17||vāje̍-vāje'vata vājino no̱ dhane̍ṣu viprā amṛtā ṛtajñāḥ |
a̱sya madhva̍: pibata mā̱daya̍dhvaṃ tṛ̱ptā yā̍ta pa̱thibhi̍rdeva̱yānai̍:
||9.18||ā mā̱ vāja̍sya prasa̱vo ja̍gamyā̱deme dyāvā̍pṛthi̱vī vi̱śvarū̍pe |
ā mā̍ gantāṃ pi̱tarā̍ mā̱tarā̱ cā mā̱ somo̍ amṛta̱tvena̍ gamyāt |
vāji̍no vājajito̱ vāja sasṛ̱vāso̱ bṛha̱spate̍rbhā̱gamava̍jighrata nimṛjā̱nāḥ
||9.19||ā̱paye̱ svāhā̍ svā̱paye̱ svāhā̍ 'pi̱jāya̱ svāhā̍ krata̍ve̱ svāhā̱ vasa̍ve̱ svāhā̍ 'ha̱rpata̍ye̱ svāhā̍
'hne̍ mu̱gdhāya̱ svāhā̍ mu̱gdhāya̍ vainaśi̱nāya̱ svāhā̍ vinaśina̍ āntyāya̱nāya̱ svāhā 'ntyā̍ya bhauva̱nāya̱ svāhā̱ bhuva̍nasya̱ pata̍ye̱ svāhā'dhi̍pataye̱ svāhā̍
||9.20||āyu̍rya̱jñena̍ kalpatāṃ prā̱ṇo ya̱jñena̍ kalpatā̱ṃ cakṣu̍rya̱jñena̍ kalpatātāṃ śrotra̍ṃ ya̱jñena̍ kalpatā̱ṃ pṛ̱ṣṭhaṃ ya̱jñena̍ kalpatā̱ṃ ya̱jño ya̱jñena̍ kalpatām |
pra̱jāpa̍teḥ pra̱jā a̍bhūma̱ sva̱rdevā aganmā̱mṛtā̍ abhūma
||9.21||a̱sme vo̍ astvindri̱yama̱sme nṛ̱mṇamu̱ta kratu̍ra̱sme varcāsi santu vaḥ | namo̍ mā̱tre pṛ̍thi̱vyai̱ namo̍ mā̱tre pṛ̍thi̱vyā i̱yaṃ te̱ rāḍ ya̱ntā'si̱ yama̍no dhru̱vo̱'si dha̱ruṇa̍: | kṛ̱ṣyai tvā̱ kṣemā̍ya tvā ra̱yyai tvā̱ poṣā̍ya tvā
||9.22||vāja̍sye̱maṃ pra̍sa̱vaḥ su̍ṣu̱ve'gre̱ soma rājā̍na̱moṣa̍dhīṣva̱psu | tā a̱smabhya̱ṃ madhu̍matīrbhavantu va̱ya rā̱ṣṭre jā̍gṛyāma pu̱rohi̍tā̱: svāhā̍
||9.23||vāja̍sye̱māṃ pra̍sa̱vaḥ śi̍śriye̱ diva̍mi̱mā ca̱ viśvā̱ bhuva̍nāni sa̱mrāṭ |
adi̍tsantaṃ dāpayati prajā̱nantsa no̍ ra̱yi sarva̍vīra̱ṃ ni ya̍cchatu̱ svāhā̍
||9.24||vāja̍sya̱ nu pra̍sa̱va ā ba̍bhūve̱mā ca̱ viśvā̱ bhuva̍nāni sa̱rvata̍: |
sane̍mi̱ rājā̱ pari̍ yāti vi̱dvān pra̱jāṃ puṣṭi̍ṃ va̱rdhaya̍māno a̱sme svāhā̍
||9.25||soma rājā̍na̱mava̍se̱'gnima̱nvā̍rabhāmahe | ā̱di̱tyānviṣṇu sūrya̍ṃ bra̱hmāṇa̍ṃ ca̱ bṛha̱spati svāhā̍
||9.26||a̱rya̱maṇa̱ṃ bṛha̱spati̱mindra̱ṃ dānā̍ya codaya | vāca̱ṃ viṣṇu sara̍svatī savi̱tāra̍ṃ ca vā̱jina svāhā̍
||9.27||agne̱ acchā̍ vade̱ha na̱: prati̍ naḥ su̱manā̍ bhava | pra no̍ yaccha sahasraji̱ttva hi dha̍na̱dā asi̱ svāhā̍
||9.28||pra no̍ yacchatvarya̱mā pra pū̱ṣā pra bṛha̱spati̍: | pra vāgde̱vī da̍dātu na̱: svāhā̍
||9.29||de̱vasya̍ tvā savi̱tuḥ pra̍sa̱ve'śvino̍rbā̱hubhyā̍ṃ pū̱ṣṇo hastā̍bhyām |
sara̍svatyai vā̱co ya̱nturya̱ntriye̍ dadhāmi̱ bṛha̱spate̍ṣṭvā̱ sāmrā̍jyenā̱bhi ṣi̍ñcāmyasau
||9.30||a̱gnirekā̍kṣareṇa prā̱ṇamuda̍jaya̱ttamujje̍ṣama̱śvinau̱ dvya̱kṣareṇa dvi̱pado̍ manu̱ṣyānuda̍jayatā̱ṃ tānujje̍ṣa̱ṃ viṣṇu̱strya̱kṣareṇa̱ trīm̐llo̱kānuda̍jaya̱ttānujje̍ṣaṃ
soma̱ścatu̍rakṣareṇa̱ catu̍ṣpadaḥ pa̱śūnuda̍jaya̱ttānujje̍ṣam
||9.31||pū̱ṣā pañcā̍kṣareṇa̱ pañca̱ diśa̱ uda̍jaya̱ttā ujje̍ṣaṃ savi̱tā ṣaḍa̍kṣareṇa̱ ṣaḍṛ̱tūnuda̍jaya̱ttānujje̍ṣaṃ ma̱ruta̍: sa̱ptākṣa̍reṇa sa̱pta grā̱myān pa̱śūnuda̍jaya̱m̐stānujje̍ṣa̱ṃ bṛha̱spati̍ra̱ṣṭākṣa̍reṇa gāya̱trīmuda̍jaya̱ttāmujje̍ṣam
||9.32||mi̱tro navā̍kṣareṇa tri̱vṛta stoma̱muda̍jaya̱ttamujje̍ṣa̱ṃ varu̍ṇo̱ daśā̍kṣareṇa vi̱rāja̱muda̍jaya̱ttāmujje̍ṣa̱mindra̱ e̱kāda̍śākṣareṇa tri̱ṣṭubha̱muda̍jaya̱ttāmujje̍ṣa̱ṃ
viśve̍ de̱vā dvāda̍śākṣareṇa̱ jaga̍tī̱muda̍jaya̱m̐stāmujje̍ṣam
||9.33||vasa̍va̱strayo̍daśākṣareṇa trayoda̱śa stoma̱muda̍jaya̱m̐stamujje̍ṣaṃ ru̱drāścatu̍rdaśākṣareṇa caturda̱śa stoma̱muda̍jaya̱m̐stamujje̍ṣamādi̱tyāḥ pañca̍daśākṣareṇa pañcada̱śa stoma̱muda̍jaya̱m̐stamujje̍ṣa̱madi̍ti̱: ṣoḍa̍śākṣareṇa ṣoḍa̱śa stoma̱muda̍jaya̱ttamujje̍ṣaṃ pra̱jāpa̍tiḥ sa̱ptada̍śākṣareṇa saptada̱śa stoma̱muda̍jaya̱ttamujje̍ṣam
||9.34||e̱ṣa te̍ nirṛte bhā̱gastaṃ ju̍ṣasva̱ svāhā̱'gnine̍trebhyo de̱vebhya̍: pura̱: sadbhya̱: svāhā̍ ya̱mane̍trebhyo de̱vebhyo̍ dakṣi̱ṇāsadbhya̱: svāhā̍ vi̱śvade̍vanetrebhyo de̱vebhya̍: paścā̱tsadbhya̱: svāhā̍ mi̱trāvaru̍ṇanetrebhyo vā ma̱runne̍trebhyo vā de̱vebhya̍ uttarā̱sadbhya̱: svāhā̱ soma̍netrebhyo de̱vebhya̍ upari̱sadbhyo̱ duva̍svadbhya̱: svāhā̍
||9.35||ye de̱vā a̱gnine̍trāḥ pura̱: sada̱stebhya̱: svāhā̱ ye de̱vā ya̱mane̍trā dakṣi̱ṇāsada̱stebhya̱: svāhā̱ ye de̱vā vi̱śvade̍vanetrāḥ paścā̱tsada̱stebhya̱: svāhā̱ ye de̱vā mi̱trāvaru̍ṇanetrā vā ma̱runne̍trā vottarā̱sada̱stebhya̱: svāhā̱ ye de̱vāḥ soma̍netrā upari̱sado̱ duva̍svanta̱stebhya̱: svāhā̍
||9.36||agne̱ saha̍sva̱ pṛta̍nā a̱bhimā̍tī̱rapā̍sya | du̱ṣṭara̱stara̱nnarā̍tī̱rvarco̍ dhā ya̱jñavā̍hasi
||9.37||de̱vasya̍ tvā savi̱tuḥ pra̍sa̱ve'śvino̍rbā̱hubhyā̍ṃ pū̱ṣṇo hastā̍bhyām | u̱pāśorvī̱rye̱ṇa juhomi ha̱ta rakṣa̱: svāhā̱
rakṣa̍sāṃ tvā ba̱dhāyāba̍dhiṣma̱ rakṣo'ba̍dhiṣmā̱muma̱sau ha̱taḥ
||9.38||sa̱vi̱tā tvā̍ sa̱vānā suva̱tāma̱gnirgṛ̱hapa̍tīnā somo̱ vana̱spatī̍nām |
bṛha̱spati̍rvā̱ca indro̱ jyaiṣṭhyā̍ya ru̱draḥ pa̱śubhyo̍ mi̱traḥ sa̱tyo varu̍ṇo̱ dharma̍patīnām
||9.39||i̱maṃ de̍vā asapa̱tna su̍vadhvaṃ maha̱te kṣa̱trāya̍ maha̱te jyaiṣṭhyā̍ya maha̱te jāna̍rājyā̱yendra̍syendri̱yāya̍ |
i̱mama̱muṣya̍ pu̱trama̱muṣyai̍ pu̱trama̱syai vi̱śa e̱ṣa vo̍'mī̱ rājā̱ somo̱'smāka̍ṃ brāhma̱ṇānā rājā̍
||9.40||