hotā̍ yakṣatsa̱midhendra̍mi̱ḍaspa̱de nābhā̍ pṛthi̱vyā adhi̍ |
di̱vo varṣma̱ntsami̍dhyata̱ oji̍ṣṭhaścarṣaṇī̱sahā̱ṃ vetvājya̍sya̱ hota̱ryaja̍
||28.1||hotā̍ yakṣa̱ttanū̱napā̍tamū̱tibhi̱rjetā̍ra̱mapa̍rājitam |
indra̍ṃ de̱va sva̱rvida̍ṃ pa̱thibhi̱rmadhu̍mattamai̱rnarā̱śase̍na̱ teja̍sā̱ vetvājya̍sya̱ hota̱ryaja̍
||28.2||hotā̍ yakṣa̱diḍā̍bhi̱rindra̍mīḍi̱tamā̱juhvā̍na̱mama̍rtyam |
de̱vo de̱vai: savī̍ryo̱ vajra̍hastaḥ puranda̱ro vetvājya̍sya̱ hota̱ryaja̍
||28.3||hotā̱ yakṣadba̱rhiṣīndra̍ṃ niṣadva̱raṃ vṛ̍ṣa̱bhaṃ naryā̍pasam |
vasu̍bhī ru̱drairā̍di̱tyaiḥ su̱yugbhi̍rba̱rhirāsa̍da̱dvetvājya̍sya̱ hota̱ryaja̍
||28.4||hotā̍ yakṣa̱dojo̱ na vī̱rya saho̱ dvāra̱ indra̍mavardhayan |
suprā̱ya̱ṇā a̱sminya̱jñe vi śra̍yantāmṛtā̱vṛdho̱ dvāra̱ indrā̍ya mī̱ḍhuṣe̱ vyantvājya̍sya̱ hota̱ryaja̍
||28.5||hotā̍ yakṣadu̱ṣe indra̍sya dhe̱nū su̱dughe̍ mā̱tarā̍ ma̱hī |
sa̱vā̱tarau̱ na teja̍sā va̱tsamindra̍mavardhatāṃ vī̱tāmājya̍sya̱ hota̱ryaja̍
||28.6||hotā̍ yakṣa̱ddaivyā̱ hotā̍rā bhi̱ṣajā̱ sakhā̍yā ha̱viṣendra̍ṃ bhiṣajyataḥ |
ka̱vī devau̱ prace̍tasā̱vindrā̍ya dhatta indri̱yaṃ vī̱tāmājya̍sya̱ hota̱ryaja̍
||28.7||hotā̍ yakṣatti̱sro de̱vīrna bhe̍ṣa̱jaṃ traya̍stri̱dhāta̍vo̱'pasa̱ iḍā̱ sara̍svatī̱ bhāra̍tī ma̱hīḥ |
indra̍patnīrha̱viṣma̍tī̱rvyantvājya̍sya̱ hota̱ryaja̍
||28.8||hotā̍ yakṣa̱ttvaṣṭā̍ra̱mindra̍ṃ de̱vaṃ bhi̱ṣaja su̱yaja̍ṃ ghṛta̱śriya̍m |
pu̱ru̱rūpa su̱reta̍saṃ ma̱ghona̱mindrā̍ya̱ tvaṣṭā̱ dadha̍dindri̱yāṇi̱ vetvājya̍sya̱ hota̱ryaja̍
||28.9||hotā̍ yakṣa̱dvana̱spati śami̱tāra śa̱takra̍tuṃ dhi̱yo jo̱ṣṭāra̍mindri̱yam |
madhvā̍ sama̱ñjanpa̱thibhi̍: su̱gebhi̱: svadā̍ti ya̱jñaṃ madhu̍nā ghṛ̱tena̱ vetvājya̍sya̱ hota̱ryaja̍
||28.10||hotā̍ yakṣa̱dindra svāhā''jya̍sya̱ svāhā̱ meda̍sa̱: svāhā̍ sto̱kānā svāhā̱ svāhā̍kṛtīnā svāhā̍ ha̱vyasū̍ktīnām |
svāhā̍ de̱vā ā̍jya̱pā ju̍ṣā̱ṇā indra̱ ājya̍sya̱ vyantu̱ hota̱ryaja̍
||28.11||de̱vaṃ ba̱rhirindra sude̱vaṃ de̱vairvī̱rava̍tstī̱rṇaṃ vedyā̍mavardhayat |
vasto̍rvṛ̱taṃ prāktorbhṛ̱ta rā̱yā ba̱rhiṣma̱to'tya̍gādvasu̱vane̍ vasu̱dheya̍sya vetu̱ yaja̍
||28.12||de̱vīrdvāra̱ indra saṅghā̱te vī̱ḍvīryāma̍nnavardhayan |
ā va̱tsena̱ taru̍ṇena kumā̱reṇa̍ ca mīva̱tāpārvā̍ṇa re̱ṇuka̍kāṭaṃ nudantāṃ vasu̱vane̍ vasu̱dheya̍sya vyantu̱ yaja̍
||28.13||de̱vī u̱ṣāsā̱naktendra̍ṃ ya̱jñe pra̍ya̱tya̱hvetām |
daivī̱rviśa̱: prāyā̍siṣṭā suprī̍te̱ sudhi̍te vasu̱vane̍ vasu̱dheya̍sya vītā̱ṃ yaja̍
||28.14||de̱vī joṣṭrī̱ vasu̍dhitī de̱vamindra̍mavardhatām |
ayā̍vya̱nyāghā dveṣāsyānyā va̍kṣa̱dvasu̱ vāryā̍ṇi̱ yaja̍mānāya śikṣi̱te va̍su̱vane̍ vasu̱dheya̍sya vītā̱ṃ yaja̍
||28.15||de̱vī ū̱rjāhu̍tī̱ dughe̱ su̱dughe̱ paya̱sendra̍mavardhatām |
iṣa̱mūrja̍ma̱nyā va̍kṣa̱tsagdhi sapī̍tima̱nyā nave̍na̱ pūrva̱ṃ daya̍māne purā̱ṇena̱ nava̱madhā̍tā̱mūrja̍mū̱rjāhu̍tī ū̱rjaya̍māne̱ vasu̱ vāryā̍ṇi̱ yaja̍mānāya śikṣi̱te va̍su̱vane̍ vasu̱dheya̍sya vītā̱ṃ yaja̍
||28.16||de̱vā daivyā̱ hotā̍rā de̱vamindra̍mavardhatām |
ha̱tāgha̍śasā̱vābhā̍rṣṭā̱ṃ vasu̱ vāryā̍ṇi̱ yaja̍mānāya śikṣi̱tau va̍su̱vane̍ vasu̱dheya̍sya vītā̱ṃ yaja̍
||28.17||de̱vīsti̱srasti̱sro de̱vīḥ pati̱mindra̍mavardhayan |
aspṛ̍kṣa̱dbhāra̍tī̱ diva ru̱drairya̱jña sara̍sva̱tīḍā̍ vasu̍matī gṛ̱hān va̍su̱vane̍ vasu̱dheya̍sya vyantu̱ yaja̍
||28.18||de̱va indro̱ narā̱śasa̍strivarū̱thastri̍bandhu̱ro de̱vamindra̍mavardhayat |
śa̱tena̍ śitipṛ̱ṣṭhānā̱māhi̍taḥ sa̱hasre̍ṇa̱ pra va̍rtate mi̱trāvaru̱ṇeda̍sya ho̱tramarha̍to̱ bṛha̱spati̍ sto̱trama̱śvinādhva̍ryavaṃ vasu̱vane̍ vasu̱dheya̍sya vettu̱ yaja̍
||28.19||de̱vo devai̱rvana̱spati̱rhira̍ṇyaparṇo̱ madhu̍śākhaḥ supippa̱lo de̱vamindra̍mavardhayat |
diva̱magre̍ṇāspṛkṣa̱dāntari̍kṣaṃ pṛthi̱vīma̍dṛhīdvasu̱vane̍ vasu̱dheya̍sya vetu̱ yaja̍
||28.20||de̱vaṃ ba̱rhirvāri̍tīnāṃ de̱vamindra̍mavardhayat |
svā̱sa̱sthamindre̱ṇāsa̍nnama̱nyā ba̱rhīṣya̱bhya̱bhūdvasu̱vane̍ vasu̱dheya̍sya vetu̱ yaja̍
||28.21||de̱vo a̱gniḥ svi̍ṣṭa̱kṛdde̱vamindra̍mavardhayat |
svi̍ṣṭaṃ ku̱rvantsvi̍ṣṭa̱kṛtsvi̍ṣṭama̱dya ka̍rotu no vasu̱vane̍ vasu̱dheya̍sya vetu̱ yaja̍
||28.22||a̱gnima̱dya hotā̍ramavṛṇītā̱yaṃ yaja̍māna̱: paca̱npaktī̱: paca̍npuro̱ḍāśa̍ṃ ba̱dhnannindrā̍ya̱ chāga̍m |
sū̱pa̱sthā a̱dya de̱vo vana̱spati̍rabhava̱dindrā̍ya̱ chāge̍na | agha̱ttaṃ me̍da̱staḥ prati̍ paca̱tāgra̍bhī̱davī̍vṛdhatpuro̱ḍāśe̍na |
tvāma̱dya ṛ̍ṣe
||28.23||hotā̍ yakṣatsamidhā̱naṃ ma̱hadyaśa̱: susa̍middha̱ṃ vare̍ṇyama̱gnimindra̍ṃ vayo̱dhasa̍m |
gā̱ya̱trīṃ chanda̍ indri̱yaṃ tryavi̱ṃ gāṃ vayo̱ dadha̱dvetvājya̍sya̱ hota̱ryaja̍
||28.24||hotā̍ yakṣa̱ttanū̱napā̍tamu̱dbhida̱ṃ yaṃ garbha̱madi̍tirda̱dhe śuci̱mindra̍ṃ vayo̱dhasa̍m |
u̱ṣṇiha̱ṃ chanda̍ indri̱yaṃ di̍tya̱vāha̱ṃ gāṃ vayo̱ dadha̱dvetvājya̍sya̱ hota̱ryaja̍
||28.25||hotā̍ yakṣadī̱ḍenya̍mīḍi̱taṃ vṛ̍tra̱hanta̍ma̱miḍā̍bhi̱rīḍya̱m̐ saha̱: soma̱mindra̍m̐ vayo̱dhasa̍m |
a̱nu̱ṣṭubha̱ṃ chanda̍ indri̱yaṃ pañcā̍vi̱ṃ gāṃ vayo̱ dadha̱dvetvājya̍sya̱ hota̱ryaja̍
||28.26||hotā̍ yakṣatsuba̱rhiṣa̍ṃ pūṣa̱ṇvanta̱mama̍rtya sīda̍ntaṃ ba̱rhiṣi̍ pri̱ye'mṛtendra̍ṃ vayo̱dhasa̍m |
bṛ̱ha̱tīṃ chanda̍ indri̱yaṃ tri̍va̱tsaṃ gāṃ vayo̱ dadha̱dvetvājya̍sya̱ hota̱ryaja̍
||28.27||hotā̍ yakṣa̱dvyaca̍svatīḥ suprāya̱ṇā ṛ̍tā̱vṛdho̱ dvāro̍ de̱vīrhi̍ra̱ṇyayī̍rbra̱hmāṇa̱mindra̍ṃ vayo̱dhasa̍m |
pa̱ṅktiṃ chanda̍ i̱hendri̱yaṃ tu̍rya̱vāha̱ṃ gāṃ vayo̱ dadha̱dvyantvājya̍sya̱ hota̱ryaja̍
||28.28||hotā̍ yakṣatsu̱peśa̍sā suśi̱lpe bṛ̍ha̱tī u̱bhe nakto̱ṣāsā̱ na da̍rśa̱te viśva̱mindra̍ṃ vayo̱dhasa̍m |
tri̱ṣṭubha̱ṃ chanda̍ i̱hendri̱yaṃ pa̍ṣṭha̱vāha̱ṃ gāṃ vayo̱ dadha̍dvī̱tāmājya̍sya̱ hota̱ryaja̍
||28.29||hotā̍ yakṣa̱tprace̍tasā de̱vānā̍mutta̱maṃ yaśo̱ hotā̍rā daivyā ka̱vī sa̱yujendra̍ṃ vayo̱dhasa̍m |
jaga̍tī̱ṃ chanda̍ indri̱yama̍na̱ḍvāha̱ṃ gāṃ vayo̱ dadha̍dvī̱tāmājya̍sya̱ hota̱ryaja̍
||28.30||hotā̍ yakṣa̱tpeśa̍svatīsti̱sro de̱vīrhi̍ra̱ṇyayī̱rbhāra̍tīrbṛha̱tīrma̱hīḥ pati̱mindra̍ṃ vayo̱dhasa̍m |
vi̱rāja̱ṃ chanda̍ i̱hendri̱yaṃ dhe̱nuṃ gāṃ na vayo̱ dadha̱dvyantvājya̍sya̱ hota̱ryaja̍
||28.31||hotā̍ yakṣatsu̱reta̍sa̱ṃ tvaṣṭā̍raṃ puṣṭi̱vardha̍na rū̱pāṇi̱ bibhra̍ta̱ṃ pṛtha̱k puṣṭi̱mindra̍ṃ vayo̱dhasa̍m |
dvi̱pada̱ṃ chanda̍ indri̱yamu̱kṣāṇa̱ṃ gāṃ na vayo̱ dadha̱dvetvājya̍sya̱ hota̱ryaja̍
||28.32||hotā̍ yakṣa̱dvana̱spati śami̱tāra śa̱takra̍tu hira̍ṇyaparṇamu̱kthina raśa̱nāṃ bibhra̍taṃ va̱śiṃ bhaga̱mindra̍ṃ vayo̱dhasa̍m |
ka̱kubha̱ṃ chanda̍ i̱hendri̱yaṃ va̱śāṃ ve̱hata̱ṃ gāṃ vayo̱ dadha̱dvetvājya̍sya̱ hota̱ryaja̍
||28.33||hotā̍ yakṣa̱tsvāhā̍kṛtīra̱gniṃ gṛ̱hapa̍ti̱ṃ pṛtha̱gvaru̍ṇaṃ bheṣa̱jaṃ ka̱viṃ kṣa̱tramindra̍ṃ vayo̱dhasa̍m |
ati̍cchandasa̱ṃ chanda̍ indri̱yaṃ bṛ̱hadṛ̍ṣa̱bhaṃ gāṃ vayo̱ dadha̱dvyantvājya̍sya̱ hota̱ryaja̍
||28.34||de̱vaṃ ba̱rhirva̍yo̱dhasa̍ṃ de̱vamindra̍mavardhayat |
gā̱ya̱tryā chanda̍sendri̱yaṃ cakṣu̱rindre̱ vayo̱ dadha̍dvasu̱vane̍ vasu̱dheya̍sya vetu̱ yaja̍
||28.35||de̱vīrdvāro̍ vayo̱dhasa śuci̱mindra̍mavardhayan |
u̱ṣṇihā̱ chanda̍sendri̱yaṃ prā̱ṇamindre̱ vayo̱ dadha̍dvasu̱vane̍ vasu̱dheya̍sya vyantu̱ yaja̍
||28.36||de̱vī u̱ṣāsā̱naktā̍ de̱vamindra̍ṃ vayo̱dhasa̍ṃ de̱vī de̱vama̍vardhatām |
a̱nu̱ṣṭubhā̱ chanda̍sendri̱yaṃ bala̱mindre̱ vayo̱ dadha̍dvasu̱vane̍ vasu̱dheya̍sya vītā̱ṃ yaja̍
||28.37||de̱vī joṣṭrī̱ vasu̍dhitī de̱vamindra̍ṃ vayo̱dhasa̍ṃ de̱vī de̱vama̍vardhatām |
bṛ̱ha̱tyā chanda̍sendri̱ya śrotra̱mindre̱ vayo̱ dadha̍dvasu̱vane̍ vasu̱dheya̍sya vītā̱ṃ yaja̍
||28.38||de̱vī ū̱rjāhu̍tī̱ dughe̍ su̱du̱ghe̱ paya̱sendra̍ṃ vayo̱dhasa̍ṃ de̱vī de̱vama̍vardhatām |
pa̱ṅktyā chanda̍sendri̱ya śu̱kramindre̱ vayo̱ dadha̍dvasu̱vane̍ vasu̱dheya̍sya vītā̱ṃ yaja̍
||28.39||de̱vā daivyā̱ hotā̍rā de̱vamindra̍ṃ vayo̱dhasa̍ṃ de̱vau de̱vama̍vardhatām |
tri̱ṣṭubhā̱ chanda̍sendri̱yaṃ tviṣi̱mindre̱ vayo̱ dadha̍dvasu̱vane̍ vasu̱dheya̍sya vītā̱ṃ yaja̍
||28.40||de̱vīsti̱srasti̱sro de̱vīrva̍yo̱dhasa̱ṃ pati̱mindra̍mavardhayan |
jaga̍tyā̱ chanda̍sendri̱ya śūṣa̱mindre̱ vayo̱ dadha̍dvasu̱vane̍ vasu̱dheya̍sya vyantu̱ yaja̍
||28.41||de̱vo narā̱śaso̍ de̱vamindra̍ṃ vayo̱dhasa̍ṃ de̱vo de̱vama̍vardhayat |
vi̱rājā̱ chanda̍sendri̱ya ru̱pamindre̱ vayo̱ dadha̍dvasu̱vane̍ vasu̱dheya̍sya vetu̱ yaja̍
||28.42||de̱vo vana̱spati̍rde̱vamindra̍ṃ vayo̱dhasa̍ṃ de̱vo de̱vama̍vardhayat |
dvipa̍dā̱ chanda̍sendri̱yaṃ bhaga̱mindre̱ vayo̱ dadha̍dvasu̱vane̍ vasu̱dheya̍sya vetu̱ yaja̍
||28.43||de̱vaṃ ba̱rhirvāri̍tīnāṃ de̱vamindra̍ṃ vayo̱dhasa̍ṃ de̱vaṃ de̱vama̍vardhayat |
ka̱kubhā̱ chanda̍sendri̱yaṃ yaśa̱ indre̱ vayo̱ dadha̍dvasu̱vane̍ vasu̱dheya̍sya vetu̱ yaja̍
||28.44||de̱vo a̱gniḥ svi̍ṣṭa̱kṛdde̱vamindra̍ṃ vayo̱dhasa̍ṃ de̱vama̍vardhayat |
ati̍cchandasā̱ chanda̍sendri̱yaṃ kṣa̱tramindre̱ vayo̱ dadha̍dvasu̱vane̍ vasu̱dheya̍sya vetu̱ yaja̍
||28.45||a̱gnima̱dya hotā̍ramavṛṇītā̱yaṃ yaja̍māna̱: paca̱npaktī̱: paca̍npuro̱ḍāśa̍ṃ ba̱dhnannindrā̍ya vayo̱dhase̱ chāga̍m |
sū̱pa̱sthā a̱dya de̱vo vana̱spati̍rabhava̱dindrā̍ya vayo̱dhase̱ chāge̍na |
agha̱ttaṃ me̍da̱staḥ prati̍paca̱tāgra̍bhī̱davī̍vṛdhatpuro̱ḍāśe̍na | tvāma̱dya ṛ̍ṣe
||28.46||