Vājasaneyi Madhyandina Saṃhitā — Chapter 38 (28 mantras)

Vājasaneyi Madhyandina Saṃhitā — Chapter 38

de̱vasya̍ tvā savi̱tuḥ pra̍sa̱ve’śvino̍rbā̱hubhyā̍ṃ pū̱ṣṇo hastā̍bhyām |

---

Mantras

Mantra	First Words
1	ā dade’dityai
2	iḍa ehyadita
3	adityai rāsnā’sīndrāṇyā
4	aśvibhyā pinvasva
5	yaste stana
6	gāyatra chando’si
7	samudrāya tvā
8	indrāya tvā
9	yamāya tvā’ṅgirasvate
10	viśvā āśā
11	divi dhā
12	aśvinā gharma
13	apātāmaśvinā gharmamanu
14	iṣe pinvasvorje
15	svāhā pūṣṇe
16	svāhā rudrāya
17	abhīma mahimā
18	yā te
19	kṣatrasya tvā
20	catu sraktirnābhirṛtasya
21	gharmaitatte purīṣa
22	acikradadvṛṣā harirmahānmitro
23	sumitriyā na
24	udvaya tamasaspari
25	edho’syedhiṣīmahi samidasi
26	yāvatī dyāvāpṛthivī
27	mayi tyadindriya
28	payaso reta

---

Mantra 1 {#mantra-1}

Adhyāya: 38 | Mantra: 1

ā da̱de’di̍tyai̱ rāsnā̍’si

---

Mantra 2 {#mantra-2}

Adhyāya: 38 | Mantra: 2

iḍa̱ ehyadi̍ta̱ ehi̱ sara̍sva̱ttyehi̍ | asā̱vehyasā̱vehyasā̱vehi̍

---

Mantra 3 {#mantra-3}

Adhyāya: 38 | Mantra: 3

adi̍tyai̱ rāsnā̍’sīndrā̱ṇyā u̱ṣṇīṣa̍: | pū̱ṣā’si̍ gha̱rmāya̍ dīṣva

---

Mantra 4 {#mantra-4}

Adhyāya: 38 | Mantra: 4

a̱śvibhyā̍ṃ pinvasva̱ sara̍svatyai pinva̱svendrā̍ya pinvasva | svāhendra̍va̱t svāhendra̍va̱t svāhendra̍va̱t

---

Mantra 5 {#mantra-5}

Adhyāya: 38 | Mantra: 5

yaste̱ stana̍: śaśa̱yo yo ma̍yo̱bhūryo ra̍tna̱dhā va̍su̱vidyaḥ su̱datra̍: | yena̱ viśvā̱ puṣya̍si̱ vāryā̍ṇi̱ sara̍svati̱ tami̱ha dhāta̍ve’kaḥ | u̱rvantari̍kṣa̱manve̍mi

---

Mantra 6 {#mantra-6}

Adhyāya: 38 | Mantra: 6

gā̱ya̱traṃ chando̍’si̱ trai̍ṣṭubha̱ṃ chando̍’si̱ dyāvā̍pṛthi̱vībhyā̍ṃ tvā̱ pari̍ gṛhṇāmya̱ntari̍kṣe̱ṇopa̍ yacchāmi | indrā̍śvinā̱ madhu̍naḥ sāra̱ghasya̍ gha̱rmaṃ pā̍ta̱ vasa̍vo̱ yaja̍ta̱ vāṭ | svāhā̱ sūrya̍sya ra̱śmaye̍ vṛṣṭi̱vana̍ye

---

Mantra 7 {#mantra-7}

Adhyāya: 38 | Mantra: 7

sa̱mu̱drāya̍ tvā̱ vātā̍ya̱ svāhā̍ sari̱rāya̍ tvā̱ vātā̍ya̱ svāhā̍ | a̱nā̱dhṛ̱ṣyāya̍ tvā̱ vātā̍ya̱ svāhā̍ ‘pratidhṛ̱ṣyāya̍ tvā̱ vātā̍ya̱ svāhā̍ | a̱va̱syave̍ tvā̱ vātā̍ya̱ svāhā̍ ‘śimi̱dāya̍ tvā̱ vātā̍ya̱ svāhā̍

---

Mantra 8 {#mantra-8}

Adhyāya: 38 | Mantra: 8

indrā̍ya tvā̱ vasu̍mate ru̱drava̍te̱ svāhendrā̍ya tvā”di̱tyava̍te̱ svāhendrā̍ya tvā’bhimāti̱ghne svāhā | sa̱vi̱tre tva̍ ṛbhu̱mate̍ vibhu̱mate̱ vāja̍vate̱ svāhā̱ bṛha̱spata̍ye tvā vi̱śvade̍vyāvate̱ svāhā̍

---

Mantra 9 {#mantra-9}

Adhyāya: 38 | Mantra: 9

ya̱māya̱ tvā’ṅgi̍rasvate pitṛ̱mate̱ svāhā̍ | svāhā̍ gha̱rmāya̱ svāhā̍ gha̱rmaḥ pi̱tre

---

Mantra 10 {#mantra-10}

Adhyāya: 38 | Mantra: 10

viśvā̱ āśā̍ dakṣiṇa̱sadviśvā̍n de̱vānayā̍ḍi̱ha | svāhā̍kṛtasya gha̱rmasya̱ madho̍: pibatamaśvinā

---

Mantra 11 {#mantra-11}

Adhyāya: 38 | Mantra: 11

di̱vi dhā̍ i̱maṃ ya̱jñami̱maṃ ya̱jñaṃ di̱vi dhā̍: | svāhā̱’gnaye̍ ya̱jñiyā̍ya̱ śaṃ yaju̍rbhyaḥ

---

Mantra 12 {#mantra-12}

Adhyāya: 38 | Mantra: 12

aśvi̍nā gha̱rmaṃ pā̍ta hārdvā̍na̱maha̍rdi̱vābhi̍rū̱tibhi̍: | tantrā̱yiṇe̱ namo̱ dyāvā̍pṛthi̱vībhyā̍m

---

Mantra 13 {#mantra-13}

Adhyāya: 38 | Mantra: 13

apā̍tāma̱śvinā̍ gha̱rmamanu̱ dyāvā̍pṛthi̱vī a̍masātām | ihai̱va rā̱taya̍: santu

---

Mantra 14 {#mantra-14}

Adhyāya: 38 | Mantra: 14

i̱ṣe pi̍nvasvo̱rje pi̍nvasva̱ brahma̍ṇe pinvasva kṣa̱trāya̍ pinvasva̱ dyāvā̍pṛthi̱vībhyā̍ṃ pinvasva | dharmā̍si su̱dharmāme̍nya̱sme nṛ̱mṇāni̍ dhāraya̱ brahma̍ dhāraya kṣa̱traṃ dhā̍raya̱ viśa̍ṃ dhāraya

---

Mantra 15 {#mantra-15}

Adhyāya: 38 | Mantra: 15

svāhā̍ pū̱ṣṇe śara̍se̱ svāhā̱ grāva̍bhyaḥ svāhā̍ pratira̱vebhya̍: | svāhā̍ pi̱tṛbhya̍ ū̱rdhvaba̍rhirbhyo gharma̱pāva̍bhya̱: svāhā̱ dyāvā̍pṛthi̱vībhyā svāhā̱ viśve̍bhyo de̱vebhya̍:

---

Mantra 16 {#mantra-16}

Adhyāya: 38 | Mantra: 16

svāhā̍ ru̱drāya̍ ru̱drahū̍taye̱ svāhā̱ saṃ jyoti̍ṣā̱ jyoti̍: | aha̍: ke̱tunā̍ juṣatā su̱jyoti̱rjyoti̍ṣā̱ svāhā̍ | rātri̍: ke̱tunā̍ juṣatā su̱jyoti̱rjyoti̍ṣā̱ svāhā̍ | madhu̍ hu̱tamindra̍tame a̱gnāva̱śyāma̍ te deva̱ gharma̱ nama̍ste astu̱ mā mā̍ hisīḥ

---

Mantra 17 {#mantra-17}

Adhyāya: 38 | Mantra: 17

a̱bhīmaṃ ma̍hi̱mā diva̱ṃ vipro̍ babhūva sa̱prathā̍: | u̱ta śrava̍sā pṛthi̱vī sa sī̍dasva ma̱hām̐2 a̍si̱ roca̍sva deva̱vīta̍maḥ

---

Mantra 18 {#mantra-18}

Adhyāya: 38 | Mantra: 18

yā te̍ gharma di̱vyā śugyā gā̍ya̱tryā ha̍vi̱rdhāne̍ | sā ta̱ ā pyā̍yatā̱ṃ niṣṭayā̍yatā̱ṃ tasyai̍ te̱ svāhā̍ | yā te̍ gharmā̱ntari̍kṣe̱ śugyā tri̱ṣṭubhyāgnī̍dhre | sā ta̱ ā pyā̍yatā̱ṃ niṣṭayā̍yatā̱ṃ tasyai̍ te̱ svāhā̍ | yā te̍ gharma pṛthi̱vyā śugyā jaga̍tyā sada̱syā̱ | sā ta̱ ā pyā̍yatā̱ṃ niṣṭayā̍yatā̱ṃ tasyai̍ te̱ svāhā̍

---

Mantra 19 {#mantra-19}

Adhyāya: 38 | Mantra: 19

kṣa̱trasya̍ tvā pa̱raspā̍ya̱ brahma̍ṇasta̱nva̱ṃ pāhi | viśa̍stvā̱ dharma̍ṇā va̱yamanu̍ krāmāma suvi̱tāya̱ navya̍se

---

Mantra 20 {#mantra-20}

Adhyāya: 38 | Mantra: 20

catu̍: srakti̱rnābhi̍rṛ̱tasya̍ sa̱prathā̱: sa no̍ vi̱śvāyu̍: sa̱prathā̱: sa na: sa̱rvāyu̍: sa̱prathā̍: | apa̱ dveṣo̱ apa̱ hvaro̱’nyavra̍tasya saścima

---

Mantra 21 {#mantra-21}

Adhyāya: 38 | Mantra: 21

gharmai̱tatte̱ purī̍ṣa̱ṃ tena̱ vardha̍sva̱ cā ca̍ pyāyasva | va̱rdhi̱ṣī̱mahi̍ ca va̱yamā ca̍ pyāsiṣīmahi

---

Mantra 22 {#mantra-22}

Adhyāya: 38 | Mantra: 22

aci̍krada̱dvṛṣā̱ hari̍rma̱hānmi̱tro na̍ darśa̱taḥ | sa sūrye̍ṇa didyutaduda̱dhirni̱dhiḥ

---

Mantra 23 {#mantra-23}

Adhyāya: 38 | Mantra: 23

su̱mi̱tri̱yā na̱ āpa̱ oṣa̍dhayaḥ santu durmitri̱yāstasmai̍ santu̱ yo’smān dveṣṭi̱ yaṃ ca̍ va̱yaṃ dvi̱ṣmaḥ

---

Mantra 24 {#mantra-24}

Adhyāya: 38 | Mantra: 24

udva̱yaṃ tama̍sa̱spari̱ sva: paśya̍nta̱ utta̍ram | de̱vaṃ de̍va̱trā sūrya̱maga̍nma̱ jyoti̍rutta̱mam

---

Mantra 25 {#mantra-25}

Adhyāya: 38 | Mantra: 25

edho̍’syedhiṣī̱mahi̍ sa̱mida̍si̱ tejo̍’si̱ tejo̱ mayi̍ dhehi

---

Mantra 26 {#mantra-26}

Adhyāya: 38 | Mantra: 26

yāva̍tī̱ dyāvā̍pṛthi̱vī yāva̍cca sa̱pta sindha̍vo vitasthi̱re | tava̍ntamindra te̱ graha̍mū̱rjā gṛ̍hṇā̱myakṣi̍ta̱ṃ mayi̍ gṛhṇā̱myakṣi̍tam

---

Mantra 27 {#mantra-27}

Adhyāya: 38 | Mantra: 27

mayi̱ tyadi̍ndri̱yaṃ bṛ̱hanmayi̱ dakṣo̱ mayi̱ kratu̍: | gha̱rmastri̱śugvi rā̍jati vi̱rājā̱ jyoti̍ṣā sa̱ha brahma̍ṇā̱ teja̍sā sa̱ha

---

Mantra 28 {#mantra-28}

Adhyāya: 38 | Mantra: 28

paya̍so̱ reta̱ ābhṛ̍ta̱ṃ tasya̱ doha̍maśīma̱hyutta̍rāmuttarā samā̍m | tviṣa̍: sa̱ṃvṛk kratve̱ dakṣa̍sya te suṣu̱mṇasya̍ te suṣumṇāgnihu̱taḥ | indra̍pītasya pra̱jāpa̍tibhakṣitasya̱ madhu̍mata̱ upa̍hūta̱ upa̍hūtasya bhakṣayāmi

---