svāhā̍ prā̱ṇebhya̱: sādhi̍patikebhyaḥ | pṛ̱thi̱vyai svāhā̱ 'gnaye̱ svāhā̱ 'ntari̍kṣāya̱ svāhā̍ vā̱yave̱ svāhā̍ |
di̱ve svāhā̱ sūryā̍ya̱ svāhā̍
||39.1||दि॒वे स्वाहा॒ सूर्या॑य॒ स्वाहा॑
di̱gbhyaḥ svāhā̍ ca̱ndrāya̱ svāhā̱ nakṣa̍trebhya̱: svāhā̱ 'dbhyaḥ svāhā̱ varu̍ṇāya̱ svāhā̍ |
nābhyai̱ svāhā̍ pū̱tāya̱ svāhā̍
||39.2||दि॒ग्भ्यः स्वाहा॑ च॒न्द्राय॒ स्वाहा॒ नक्ष॑त्रेभ्य॒: स्वाहा॒ ऽद्भ्यः स्वाहा॒ वरु॑णाय॒ स्वाहा॑ ।
नाभ्यै॒ स्वाहा॑ पू॒ताय॒ स्वाहा॑
vā̱ce svāhā̍ prā̱ṇāya̱ svāhā̍ prā̱ṇāya̱ svāhā̍ | cakṣu̍ṣe̱ svāhā̱ cakṣu̍ṣe̱ svāhā̱ śrotrā̍ya̱ svāhā̱
śrotrā̍ya̱ svāhā̍
||39.3||वा॒चे स्वाहा॑ प्रा॒णाय॒ स्वाहा॑ प्रा॒णाय॒ स्वाहा॑ । चक्षु॑षे॒ स्वाहा॒ चक्षु॑षे॒ स्वाहा॒ श्रोत्रा॑य॒ स्वाहा॒
श्रोत्रा॑य॒ स्वाहा॑
mana̍sa̱: kāma̱mākū̍tiṃ vā̱caḥ sa̱tyama̍śīya | pa̱śū̱nā rū̱pamanna̍sya̱ raso̱ yaśa̱: śrīḥ śra̍yatā̱ṃ mayi̱ svāhā̍
||39.4||मन॑स॒: काम॒माकू॑तिं वा॒चः स॒त्यम॑शीय । प॒शू॒नाᳪ रू॒पमन्न॑स्य॒ रसो॒ यश॒: श्रीः श्र॑यतां॒ मयि॒ स्वाहा॑
pra̱jāpa̍tiḥ sambhri̱yamā̍ṇaḥ sa̱mrāṭ sambhṛ̍to vaiśvade̱vaḥ sasa̱nno gha̱rmaḥ pravṛ̍kta̱steja̱ udya̍ta āśvi̱naḥ paya̍syānī̱yamā̍ne pau̱ṣṇo vi̍ṣya̱ndamā̍ne māru̱taḥ klatha̍n |
mai̱traḥ śara̍si santā̱yyamā̍ne vāya̱vyo̱ hri̱yamā̍ṇa āgne̱yo hū̱yamā̍no̱ vāgghu̱taḥ
||39.5||प्र॒जाप॑तिः सम्भ्रि॒यमा॑णः स॒म्राट् सम्भृ॑तो वैश्वदे॒वः स॑ᳪस॒न्नो घ॒र्मः प्रवृ॑क्त॒स्तेज॒ उद्य॑त आश्वि॒नः पय॑स्यानी॒यमा॑ने पौ॒ष्णो वि॑ष्य॒न्दमा॑ने मारु॒तः क्लथ॑न् ।
मै॒त्रः शर॑सि सन्ता॒य्यमा॑ने वाय॒व्यो॒ ह्रि॒यमा॑ण आग्ने॒यो हू॒यमा॑नो॒ वाग्घु॒तः
sa̱vi̱tā pra̍tha̱me'ha̍nna̱gnirdvi̱tīye̍ vā̱yustṛ̱tīya̍ ādi̱tyaśca̍tu̱rthe ca̱ndramā̍: pañca̱ma ṛ̱tuḥ ṣa̱ṣṭhe ma̱ruta̍: sapta̱me bṛha̱spati̍raṣṭa̱me |
mi̱tro na̍va̱me varu̍ṇo daśa̱ma indra̍ ekāda̱śe viśve̍ de̱vā dvā̍da̱śe
||39.6||स॒वि॒ता प्र॑थ॒मेऽह॑न्न॒ग्निर्द्वि॒तीये॑ वा॒युस्तृ॒तीय॑ आदि॒त्यश्च॑तु॒र्थे च॒न्द्रमा॑: पञ्च॒म ऋ॒तुः ष॒ष्ठे म॒रुत॑: सप्त॒मे बृह॒स्पति॑रष्ट॒मे ।
मि॒त्रो न॑व॒मे वरु॑णो दश॒म इन्द्र॑ एकाद॒शे विश्वे॑ दे॒वा द्वा॑द॒शे
u̱graśca̍ bhī̱maśca̱ dhvā̱ntaśca̱ dhuni̍śca |
sā̱sa̱hvām̐ścā̍bhiyu̱gvā ca̍ vi̱kṣipa̱: svāhā̍
||39.7||उ॒ग्रश्च॑ भी॒मश्च॒ ध्वा॒न्तश्च॒ धुनि॑श्च ।
सा॒स॒ह्वाँश्चा॑भियु॒ग्वा च॑ वि॒क्षिप॒: स्वाहा॑
a̱gni hṛda̍yenā̱śani hṛdayā̱greṇa̍ paśu̱pati̍ṃ kṛtsna̱hṛda̍yena bha̱vaṃ ya̱knā |
śa̱rvaṃ mata̍snābhyā̱mīśā̍naṃ ma̱nyunā̍ mahāde̱vama̍ntaḥparśa̱vyeno̱graṃ de̱vaṃ va̍ni̱ṣṭhunā̍ vasiṣṭha̱hanu̱ḥ śiṅgī̍ni ko̱śyābhyā̍m
||39.8||अ॒ग्निᳪ हृद॑येना॒शनि॑ᳪ हृदया॒ग्रेण॑ पशु॒पतिं॑ कृत्स्न॒हृद॑येन भ॒वं य॒क्ना ।
श॒र्वं मत॑स्नाभ्या॒मीशा॑नं म॒न्युना॑ महादे॒वम॑न्तःपर्श॒व्येनो॒ग्रं दे॒वं व॑नि॒ष्ठुना॑ वसिष्ठ॒हनुः॒ शिङ्गी॑नि को॒श्याभ्या॑म्
u̱gram̐llohi̍tena mi̱tra sau̍vratyena ru̱draṃ daurvra̍tye̱nendra̍ṃ prakrī̱ḍena̍ ma̱ruto̱ bale̍na sā̱dhyān pra̱mudā̍ | bha̱vasya̱ kaṇṭhya ru̱drasyā̍ntaḥ pā̱rśvyaṃ ma̍hāde̱vasya̱ yakṛ̍ccha̱rvasya̍ vani̱ṣṭhuḥ pa̍śu̱pate̍: purī̱tat
||39.9||उ॒ग्रँल्लोहि॑तेन मि॒त्रᳪ सौ॑व्रत्येन रु॒द्रं दौर्व्र॑त्ये॒नेन्द्रं॑ प्रक्री॒डेन॑ म॒रुतो॒ बले॑न सा॒ध्यान् प्र॒मुदा॑ । भ॒वस्य॒ कण्ठ्य॑ᳪ रु॒द्रस्या॑न्तः पा॒र्श्व्यं म॑हादे॒वस्य॒ यकृ॑च्छ॒र्वस्य॑ वनि॒ष्ठुः प॑शु॒पते॑: पुरी॒तत्
loma̍bhya̱: svāhā̱ loma̍bhya̱: svāhā̍ tva̱ce svāhā̍ tva̱ce svāhā̱ lohi̍tāya̱ svāhā̱ lohi̍tāya̱ svāhā̱ medo̍bhya̱: svāhā̱ medo̍bhya̱: svāhā̍ |
māsebhya̱: svāhā̍ māsebhya̱: svāhā̱ snāva̍bhya̱: svāhā̱ snāva̍bhya̱: svāhā̱ 'sthabhya̱: svāhā̱ sthabhya̱: svāhā̍ ma̱jjabhya̱: svāhā̍ ma̱jjabhya̱: svāhā̍ |
reta̍se̱ svāhā̍ pā̱yave̱ svāhā̍
||39.10||लोम॑भ्य॒: स्वाहा॒ लोम॑भ्य॒: स्वाहा॑ त्व॒चे स्वाहा॑ त्व॒चे स्वाहा॒ लोहि॑ताय॒ स्वाहा॒ लोहि॑ताय॒ स्वाहा॒ मेदो॑भ्य॒: स्वाहा॒ मेदो॑भ्य॒: स्वाहा॑ ।
मा॒ᳪसेभ्य॒: स्वाहा॑ मा॒ᳪसेभ्य॒: स्वाहा॒ स्नाव॑भ्य॒: स्वाहा॒ स्नाव॑भ्य॒: स्वाहा॒ ऽस्थभ्य॒: स्वाहा॒ स्थभ्य॒: स्वाहा॑ म॒ज्जभ्य॒: स्वाहा॑ म॒ज्जभ्य॒: स्वाहा॑ ।
रेत॑से॒ स्वाहा॑ पा॒यवे॒ स्वाहा॑
ā̱yā̱sāya̱ svāhā̍ prāyā̱sāya̱ svāhā̍ saṃyā̱sāya̱ svāhā̍ viyā̱sāya̱ svāho̍dyā̱sāya̱ svāhā̍ |
śu̱ce svāhā̱ śoca̍te̱ svāhā̱ śoca̍mānāya̱ svāhā̱ śokā̍ya̱ svāhā̍
||39.11||आ॒या॒साय॒ स्वाहा॑ प्राया॒साय॒ स्वाहा॑ संया॒साय॒ स्वाहा॑ विया॒साय॒ स्वाहो॑द्या॒साय॒ स्वाहा॑ ।
शु॒चे स्वाहा॒ शोच॑ते॒ स्वाहा॒ शोच॑मानाय॒ स्वाहा॒ शोका॑य॒ स्वाहा॑
tapa̍se̱ svāhā̱ tapya̍te̱ svāhā̱ tapya̍mānāya̱ svāhā̍ ta̱ptāya̱ svāhā̍ gha̱rmāya̱ svāhā̍ |
niṣkṛ̍tyai̱ svāhā̱ prāya̍ścittyai̱ svāhā̍ bheṣa̱jāya̱ svāhā̍
||39.12||तप॑से॒ स्वाहा॒ तप्य॑ते॒ स्वाहा॒ तप्य॑मानाय॒ स्वाहा॑ त॒प्ताय॒ स्वाहा॑ घ॒र्माय॒ स्वाहा॑ ।
निष्कृ॑त्यै॒ स्वाहा॒ प्राय॑श्चित्त्यै॒ स्वाहा॑ भेष॒जाय॒ स्वाहा॑
ya̱māya̱ svāhā 'nta̍kāya̱ svāhā̍ mṛ̱tyave̱ svāhā̱ brahma̍ṇe̱ svāhā̍ brahmaha̱tyāyai̱ svāhā̱ viśve̍bhyo de̱vebhya̱: svāhā̱ dyāvā̍pṛthi̱vībhyā svāhā̍
||39.13||य॒माय॒ स्वाहा ऽन्त॑काय॒ स्वाहा॑ मृ॒त्यवे॒ स्वाहा॒ ब्रह्म॑णे॒ स्वाहा॑ ब्रह्मह॒त्यायै॒ स्वाहा॒ विश्वे॑भ्यो दे॒वेभ्य॒: स्वाहा॒ द्यावा॑पृथि॒वीभ्या॒ᳪ स्वाहा॑