Vājasaneyi Madhyandina Saṃhitā — Chapter 8 (63 mantras)

Vājasaneyi Madhyandina Saṃhitā — Chapter 8

---

Mantras

Mantra	First Words
1	upayāmagṛhīto’syādityebhyastvā viṣṇa
2	kadā cana
3	kadā cana
4	yajño devānā
5	vivasvannādityaiṣa te
6	vāmamadya savitarvāmamu
7	upayāmagṛhīto’si sāvitro’si
8	upayāmagṛhīto’si suśarmā’si
9	upayāmagṛhīto’si bṛhaspatisutasya
10	agnā3i patnīvantsajūrdevena
11	upayāmagṛhīto’si harirasi
12	yaste aśvasanirbhakṣo
13	devakṛtasyainaso’vayajanamasi manuṣyakṛtasyainaso’vayajanamasi
14	sa varcasā
15	samindra ṇo
16	sa varcasā
17	dhātā rāti
18	sugā vo
19	yā2 ā’vaha
20	vaya hi
21	devā gātuvido
22	yajña yajña
23	māhirbhūrmā pṛdāku
24	agneranīkamapa ā
25	samudre te
26	devīrāpa eṣa
27	avabhṛtha nicumpuṇa
28	ejatu daśamāsyo
29	yasyai te
30	purudasmo viṣurūpa
31	maruto yasya
32	mahī dyau
33	ā tiṣṭha
34	yukṣvā hi
35	indramiddharī vahato’pratidhṛṣṭaśavasam
36	yasmānna jāta
37	indraśca samrāḍvaruṇaśca
38	agne pavasva
39	uttiṣṭhannojasā saha
40	adṛśramasya ketavo
41	udu tya
42	ā jighra
43	iḍe rante
44	vi na
45	vācaspati viśvakarmāṇamūtaye
46	viśvakarman haviṣā
47	upayāmagṛhīto’syagnaye tvā
48	vreśīnā tvā
49	kakubha rūpa
50	uśik tva
51	iha ratiriha
52	satrasya ṛddhirasyaganma
53	yuva tamindrāparvatā
54	parameṣṭhyabhidhīta prajāpatirvāci
55	indraśca marutaśca
56	prohyamāṇa soma
57	viśve devā
58	viśve devāścamaseṣūnnīto
59	sanna sindhuravabhṛthāyodyata
60	devāndivamaganyajñastato mā
61	catustriśattantavo ye
62	yajñasya doho
63	ā pavasva

---

Mantra 1 {#mantra-1}

Adhyāya: 8 | Mantra: 1

u̱pa̱yā̱magṛ̍hīto’syādi̱tyebhya̍stvā | viṣṇa̍ urugāyai̱ṣa te̱ soma̱sta ra̍kṣasva̱ mā tvā̍ dabhan

---

Mantra 2 {#mantra-2}

Adhyāya: 8 | Mantra: 2

ka̱dā ca̱na sta̱rīra̍si̱ nendra̍ saścasi dā̱śuṣe̍ | upo̱pennu ma̍ghava̱n bhūya̱ innu te̱ dāna̍ṃ de̱vasya̍ pṛcyata ādi̱tyebhya̍stvā

---

Mantra 3 {#mantra-3}

Adhyāya: 8 | Mantra: 3

ka̱dā ca̱na pra yu̍cchasyu̱bhe ni pā̍si̱ janma̍nī | turī̍yāditya̱ sava̍naṃ ta indri̱yamāta̍sthāva̱mṛta̍ṃ di̱vyā̱di̱tyebhya̍stvā

---

Mantra 4 {#mantra-4}

Adhyāya: 8 | Mantra: 4

ya̱jño de̱vānā̱ṃ pratye̍ti su̱mnamādi̍tyāso̱ bhava̍tā mṛḍa̱yanta̍: | ā vo̱’rvācī̍ suma̱tirva̍vṛtyāda̱hości̱dyā va̍rivo̱vitta̱rāsa̍dādi̱tyebhya̍stvā

---

Mantra 5 {#mantra-5}

Adhyāya: 8 | Mantra: 5

viva̍svannādityai̱ṣa te̍ somapī̱thastasmi̍n matsva | śrada̍smai naro̱ vaca̍se dadhātana̱ yadā̍śī̱rdā dampa̍tī vā̱mama̍śnu̱taḥ | pumā̍n pu̱tro jā̍yate vi̱ndate̱ vasvadhā̍ vi̱śvāhā̍ra̱pa e̍dhate gṛ̱he

---

Mantra 6 {#mantra-6}

Adhyāya: 8 | Mantra: 6

vā̱mama̱dya sa̍vitarvā̱mamu̱ śvo di̱ve di̍ve vā̱mama̱smabhya sāvīḥ | vā̱masya̱ hi kṣaya̍sya deva̱ bhūre̍ra̱yā dhi̱yā vā̍ma̱bhāja̍: syāma

---

Mantra 7 {#mantra-7}

Adhyāya: 8 | Mantra: 7

u̱pa̱yā̱magṛ̍hīto’si sāvi̱tro̱’si cano̱dhāśca̍no̱dhā a̍si̱ cano̱ mayi̍ dhehi | jinva̍ ya̱jñaṃ jinva̍ ya̱jñapa̍ti̱ṃ bhagā̍ya de̱vāya̍ tvā savi̱tre

---

Mantra 8 {#mantra-8}

Adhyāya: 8 | Mantra: 8

u̱pa̱yā̱magṛ̍hīto’si su̱śarmā̍’si supratiṣṭhā̱no bṛ̱hadu̍kṣāya̱ nama̍: | viśve̍bhyastvā de̱vebhya̍ e̱ṣa te̱ yoni̱rviśve̍bhyastvā de̱vebhya̍:

---

Mantra 9 {#mantra-9}

Adhyāya: 8 | Mantra: 9

u̱pa̱yā̱magṛ̍hīto’si̱ bṛha̱spati̍sutasya deva soma ta̱ indo̍rindri̱yāva̍ta̱: patnī̍vato̱ grahā̍m̐2 ṛdhyāsam | a̱haṃ pa̱rastā̍da̱hama̱vastā̱dyada̱ntari̍kṣa̱ṃ tadu̍ me pi̱tā’bhū̍t | a̱ha sūrya̍mubha̱yato̍ dadarśā̱haṃ de̱vānā̍ṃ para̱maṃ guhā̱ yat

---

Mantra 10 {#mantra-10}

Adhyāya: 8 | Mantra: 10

agnā3i̱ patnī̍vantsa̱jūrde̱vena̱ tvaṣṭrā̱ soma̍ṃ piba̱ svāhā̍ | pra̱jāpa̍ti̱rvṛṣā̍’si reto̱dhā reto̱ mayi̍ dhehi pra̱jāpa̍teste̱ vṛṣṇo̍ reto̱dhaso̍ reto̱dhāma̍śīya

---

Mantra 11 {#mantra-11}

Adhyāya: 8 | Mantra: 11

u̱pa̱yā̱magṛ̍hīto’si̱ hari̍rasi hāriyoja̱no hari̍bhyāṃ tvā | haryo̍rdhā̱nā stha̍ sa̱haso̍mā̱ indrā̍ya

---

Mantra 12 {#mantra-12}

Adhyāya: 8 | Mantra: 12

yaste̍ aśva̱sani̍rbha̱kṣo yo go̱sani̱stasya̍ ta i̱ṣṭaya̍juṣa stu̱taso̍masya śa̱stoktha̱syopa̍hūta̱syopa̍hūto bhakṣayāmi

---

Mantra 13 {#mantra-13}

Adhyāya: 8 | Mantra: 13

de̱vakṛ̍ta̱syaina̍so’va̱yaja̍namasi manu̱ṣya̱kṛta̱syaina̍so’va̱yaja̍namasi pi̱tṛkṛ̍ta̱syaina̍so’va̱yaja̍namasyā̱tmakṛ̍tasyainaso’va̱yaja̍nama̱syena̍sa enaso’va̱yaja̍namasi | yaccā̱hameno̍ vi̱dvām̐śca̱kāra̱ yaccāvi̍dvā̱m̐stasya̱ sarvasyaina̍so’va̱yaja̍namasi

---

Mantra 14 {#mantra-14}

Adhyāya: 8 | Mantra: 14

saṃ varca̍sā̱ paya̍sā̱ saṃ ta̱nūbhi̱raga̍nmahi̱ mana̍sā̱ sa śi̱vena̍ | tvaṣṭā̍ su̱datro̱ vi da̍dhātu̱ rāyo’nu̍mārṣṭu ta̱nvo yadvili̍ṣṭam

---

Mantra 15 {#mantra-15}

Adhyāya: 8 | Mantra: 15

sami̍ndra ṇo̱ mana̍sā neṣi̱ gobhi̱: sa sū̱ribhi̍rmaghava̱ntsa sva̱styā | saṃ brahma̍ṇā de̱vakṛ̍ta̱ṃ yadasti̱ saṃ de̱vānā suma̱tau ya̱jñiyā̍nā svāhā̍

---

Mantra 16 {#mantra-16}

Adhyāya: 8 | Mantra: 16

saṃ varca̍sā̱ paya̍sā̱ saṃ ta̱nūbhi̱raga̍nmahi̱ mana̍sā̱ sa śi̱vena̍ | tvaṣṭā̍ su̱datro̱ vi da̍dhātu̱ rāyo’nu̍mārṣṭu ta̱nvo yadvili̍ṣṭam

---

Mantra 17 {#mantra-17}

Adhyāya: 8 | Mantra: 17

dhā̱tā rā̱tiḥ sa̍vi̱tedaṃ ju̍ṣantāṃ pra̱jāpa̍tirnidhi̱pā de̱vo a̱gniḥ | tvaṣṭā̱ viṣṇu̍: pra̱jayā̍ sararā̱ṇā yaja̍mānāya̱ dravi̍ṇaṃ dadhāta̱ svāhā̍

---

Mantra 18 {#mantra-18}

Adhyāya: 8 | Mantra: 18

su̱gā vo̍ devā̱: sada̍nā akarma̱ ya ā̍ja̱gmeda sava̍naṃ juṣā̱ṇāḥ | bhara̍māṇā̱ vaha̍mānā ha̱vīṣya̱sme dha̍tta vasavo̱ vasū̍ni̱ svāhā̍

---

Mantra 19 {#mantra-19}

Adhyāya: 8 | Mantra: 19

yām̐2 ā’va̍ha uśa̱to de̍va de̱vām̐stān prera̍ya̱ sve a̍gne sa̱dhasthe̍ | ja̱kṣi̱vāsa̍: papi̱vājsa̍śca̱ viśve’su̍ṃ gha̱rma sva̱rāti̍ṣṭha̱tānu̱ svāhā̍

---

Mantra 20 {#mantra-20}

Adhyāya: 8 | Mantra: 20

va̱ya hi tvā̍ praya̱ti ya̱jñe a̱sminna̍gne̱ hotā̍ra̱mavṛ̍ṇīmahī̱ha | ṛdha̍gayā̱ ṛdha̍gu̱tāśa̍miṣṭhāḥ prajā̱nan ya̱jñamupa̍ yāhi vi̱dvāntsvāhā̍

---

Mantra 21 {#mantra-21}

Adhyāya: 8 | Mantra: 21

devā̍ gātuvido gā̱tuṃ vi̱ttvā gā̱tumi̍ta | mana̍saspata i̱maṃ de̍va ya̱jña svāhā̱ vāte̍ dhāḥ

---

Mantra 22 {#mantra-22}

Adhyāya: 8 | Mantra: 22

yajña̍ ya̱jñaṃ ga̍ccha ya̱jñapati̍ṃ gaccha̱ svāṃ yoni̍ṃ gaccha̱ svāhā̍ | e̱ṣa te̍ ya̱jño ya̍jñapate sa̱hasū̍ktavāka̱: sarva̍vīra̱staṃ ju̍ṣasva̱ svāhā̍

---

Mantra 23 {#mantra-23}

Adhyāya: 8 | Mantra: 23

māhi̍rbhū̱rmā pṛdā̍kuḥ | u̱ru hi rājā̱ varu̍ṇaśca̱kāra̱ sūryā̍ya̱ panthā̱manve̍ta̱vā u̍ | a̱pade̱ pādā̱ prati̍dhātave’karu̱tāpa̍va̱ktā hṛ̍dayā̱vidha̍ścit | namo̱ varu̍ṇāyā̱bhiṣṭhi̍to̱ varu̍ṇasya̱ pāśa̍:

---

Mantra 24 {#mantra-24}

Adhyāya: 8 | Mantra: 24

a̱gneranī̍kama̱pa ā vi̍veśā̱pāṃ napā̍t prati̱rakṣa̍nnasu̱rya̱m | dame̍dame sa̱midha̍ṃ yakṣyagne̱ prati̍ te ji̱hvā ghṛ̱tamucca̍raṇya̱t svāhā̍

---

Mantra 25 {#mantra-25}

Adhyāya: 8 | Mantra: 25

sa̱mu̱dre te̱ hṛda̍yama̱psvantaḥ saṃ tvā̍ viśa̱ntvoṣa̍dhīru̱tāpa̍: | ya̱jñasya̍ tvā yajñapate sū̱ktoktau̍ namovā̱ke vi̍dhema̱ yatsvāhā̍

---

Mantra 26 {#mantra-26}

Adhyāya: 8 | Mantra: 26

devī̍rāpa e̱ṣa vo̱ garbha̱sta suprī̍ta subhṛ̍taṃ bibhṛta | deva̍ somai̱ṣa te̍ lo̱kastasmi̱ñchaṃ ca̱ vakṣva̱ pari̍ ca̱ vakṣva̍

---

Mantra 27 {#mantra-27}

Adhyāya: 8 | Mantra: 27

ava̍bhṛtha nicumpuṇa nice̱rura̍si nicumpu̱ṇaḥ | ava̍ devairde̱vakṛ̍ta̱meno̍’yāsiṣa̱mava̱ martyai̱rmartya̍kṛtaṃ puru̱rāvṇo̍ deva ri̱ṣaspā̍hi | de̱vānā sa̱mida̍si

---

Mantra 28 {#mantra-28}

Adhyāya: 8 | Mantra: 28

eja̍tu̱ daśa̍māsyo̱ garbho̍ ja̱rāyu̍ṇā sa̱ha | yathā̱’yaṃ vā̱yureja̍ti̱ yathā̍ samu̱dra eja̍ti | e̱vā̱yaṃ daśa̍māsyo̱ asra̍jja̱rāyu̍ṇā sa̱ha

---

Mantra 29 {#mantra-29}

Adhyāya: 8 | Mantra: 29

yasyai̍ te ya̱jñiyo̱ garbho̱ yasyai̱ yoni̍rhiraṇyī | aṅgā̱nyahru̍tā̱ yasya̱ taṃ mā̱trā sama̍jīgama svāhā̍

---

Mantra 30 {#mantra-30}

Adhyāya: 8 | Mantra: 30

puruda̱smo viṣu̍rūpa̱ indu̍ra̱ntarma̍hi̱māna̍mānañja̱ dhīra̍: | eka̍padīṃ dvi̱padī̍ṃ tri̱padī̱ṃ catu̱ṣpadīma̱ṣṭāpa̍dī̱ṃ bhuva̱nānu̍ prathantā svāhā̍

---

Mantra 31 {#mantra-31}

Adhyāya: 8 | Mantra: 31

maru̍to̱ yasya̱ hi kṣaye̍ pā̱thā di̱vo vi̍mahasaḥ | sa su̍go̱pāta̍mo̱ jana̍:

---

Mantra 32 {#mantra-32}

Adhyāya: 8 | Mantra: 32

ma̱hī dyauḥ pṛ̍thi̱vī ca̍ na i̱maṃ ya̱jñaṃ mi̍mikṣatām | pi̱pṛ̱tāṃ no̱ bharī̍mabhiḥ

---

Mantra 33 {#mantra-33}

Adhyāya: 8 | Mantra: 33

ā ti̍ṣṭha vṛtraha̱nratha̍ṃ yu̱ktā te̱ brahma̍ṇā̱ harī̍ | a̱rvā̱cīna su te̱ mano̱ grāvā̍ kṛṇotu va̱gnunā̍ | u̱pa̱yā̱magṛ̍hīto̱’sīndrā̍ya tvā ṣoḍa̱śina̍ e̱ṣa te̱ yoni̱rindrā̍ya tvā ṣoḍa̱śine̍

---

Mantra 34 {#mantra-34}

Adhyāya: 8 | Mantra: 34

yu̱kṣvā hi ke̱śinā̱ harī̱ vṛṣa̍ṇā kakṣya̱prā | athā̍ na indra somapā gi̱rāmupa̍śrutiṃ cara | u̱pa̱yā̱magṛ̍hīto̱’sīndrā̍ya tvā ṣoḍa̱śina̍ e̱ṣa te̱ yoni̱rindrā̍ya tvā ṣoḍa̱śine̍

---

Mantra 35 {#mantra-35}

Adhyāya: 8 | Mantra: 35

indra̱middharī̍ vaha̱to’pra̍tidhṛṣṭaśavasam | ṛṣī̍ṇāṃ ca stu̱tīrupa̍ ya̱jñaṃ ca̱ mānu̍ṣāṇām | u̱pa̱yā̱magṛ̍hīto̱ sīndrā̍ya tvā ṣoḍa̱śine̍ e̱ṣa te̱ yoni̱rindrā̍ya tvā ṣoḍa̱śine̍

---

Mantra 36 {#mantra-36}

Adhyāya: 8 | Mantra: 36

yasmā̱nna jā̱taḥ paro̍ a̱nyo asti̱ ya ā̍vi̱veśa̱ bhuva̍nāni̱ viśvā̍ | pra̱jāpa̍tiḥ pra̱jayā̍ sararā̱ṇastrīṇi̱ jyotīṣi sacate̱ sa ṣo̍ḍaśī

---

Mantra 37 {#mantra-37}

Adhyāya: 8 | Mantra: 37

indra̍śca sa̱mrāḍvaru̍ṇaśca̱ rājā tau te bha̱kṣaṃ ca̍kratu̱ragra̍ e̱tam | tayo̍ra̱hamanu̍ bha̱kṣaṃ bha̍kṣayāmi̱ vāgde̱vī ju̍ṣā̱ṇā soma̍sya tṛpyatu sa̱ha prā̱ṇena̱ svāhā̍

---

Mantra 38 {#mantra-38}

Adhyāya: 8 | Mantra: 38

agne̱ pava̍sva̱ svapā̍ a̱sme varca̍: su̱vīrya̍m | dadha̍dra̱yiṃ mayi̱ poṣa̍m | u̱pa̱yā̱magṛ̍hīto’sya̱gnaye̍ tvā̱ varca̍sa e̱ṣa te̱ yoni̍ra̱gnaye̍ tvā̱ varca̍se | agne̍ varcasvi̱nvarca̍svā̱m̐stvaṃ de̱veṣvasi̱ varca̍svāna̱haṃ ma̍nu̱ṣye̍ṣu bhūyāsam

---

Mantra 39 {#mantra-39}

Adhyāya: 8 | Mantra: 39

u̱ttiṣṭha̱nnoja̍sā sa̱ha pī̱tvī śipre̍ avepayaḥ | soma̍mindra ca̱mū su̱tam | u̱pa̱yā̱magṛ̍hīto̱’sīndrā̍ya̱ tvauja̍sa e̱ṣa te̱ yoni̱rindrā̍ya tvaujase | indrau̍jiṣṭhauji̍ṣṭha̱stvaṃ de̱veṣvasyoji̍ṣṭho̱’haṃ ma̍nu̱ṣye̱ṣu bhūyāsam

---

Mantra 40 {#mantra-40}

Adhyāya: 8 | Mantra: 40

adṛ̍śramasya ke̱tavo̱ vi ra̱śmayo̱ janā̱m̐2 anu̍ | bhrāja̍nto a̱gnayo̍ yathā | u̱pa̱yā̱magṛ̍hīto’si̱ sūryā̍ya tvā bhrā̱jāyai̱ṣa te̱ yoni̱: sūryā̍ya tvā bhrā̱jāya̍ | sūrya̍ bhrājiṣṭha̱ bhrāji̍ṣṭha̱stvaṃ de̱veṣvasi̱ bhrāji̍ṣṭho̱’haṃ ma̍nu̱ṣye̱ṣu bhūyāsam

---

Mantra 41 {#mantra-41}

Adhyāya: 8 | Mantra: 41

udu̱ tyaṃ jā̱tave̍dasaṃ de̱vaṃ va̍hanti ke̱tava̍: | dṛ̱śe viśvā̍ya̱ sūrya̍m | u̱pa̱yā̱magṛ̍hīto’si̱ sūryā̍ya tvā bhrā̱jāyai̱ṣa te̱ yoni̱: sūryā̍ya tvā bhrā̱jāya̍

---

Mantra 42 {#mantra-42}

Adhyāya: 8 | Mantra: 42

ā ji̍ghra ka̱laśa̍ṃ ma̱hyā tvā̍ viśa̱ntvinda̍vaḥ| puna̍rū̱rjā ni va̍rtasva̱ sā na̍: sa̱hasra̍ṃ dhukṣvo̱rudhā̍rā̱ paya̍svatī̱ puna̱rmā vi̍śatādra̱yiḥ

---

Mantra 43 {#mantra-43}

Adhyāya: 8 | Mantra: 43

iḍe̱ rante̱ havye̱ kāmye̱ candre̱ jyote’di̍te̱ sara̍svati̱ mahi̱ viśru̍ti | e̱tā te̍ aghnye̱ nāmā̍ni de̱vebhyo̍ mā su̱kṛta̍ṃ brūtāt

---

Mantra 44 {#mantra-44}

Adhyāya: 8 | Mantra: 44

vi na̍ indra̱ mṛdho̍ jahi nī̱cā ya̍ccha pṛtanya̱taḥ | yo a̱smām̐2 a̍bhi̱dāsa̱tyadha̍raṃ gamayā̱ tama̍: | u̱pa̱yā̱magṛ̍hīto̱’sīndrā̍ya tvā vi̱mṛdhe̍ e̱ṣa te̱ yoni̱rindrā̍ya tvā vi̱mṛdhe̍

---

Mantra 45 {#mantra-45}

Adhyāya: 8 | Mantra: 45

vā̱caspati̍ṃ vi̱śvaka̍rmāṇamū̱taye̍ mano̱juva̱ṃ vāje̍ a̱dyā hu̍vema | sa no̱ viśvā̍ni̱ hava̍nāni joṣadvi̱śvaśa̍mbhū̱rava̍se sā̱dhuka̍rmā | u̱pa̱yā̱magṛ̍hīto̱’sīndrā̍ya tvā vi̱śvaka̍rmaṇe e̱ṣa te̱ yoni̱rindrā̍ya tvā vi̱śvaka̍rmaṇe

---

Mantra 46 {#mantra-46}

Adhyāya: 8 | Mantra: 46

viśva̍karman ha̱viṣā̱ vardha̍nena trā̱tāra̱mindra̍makṛṇorava̱dhyam | tasmai̱ viśa̱: sama̍namanta pū̱rvīra̱yamu̱gro vi̱havyo̱ yathāsa̍t | u̱pa̱yā̱magṛ̍hīto̱’sīndrā̍ya tvā vi̱śvaka̍rmaṇa e̱ṣa te̱ yoni̱rindrā̍ya tvā vi̱śvaka̍rmaṇe

---

Mantra 47 {#mantra-47}

Adhyāya: 8 | Mantra: 47

u̱pa̱yā̱magṛ̍hīto’sya̱gnaye̍ tvā gāya̱traccha̍ndasaṃ gṛhṇāmīndrā̍ya tvā tri̱ṣṭupcha̍ndasaṃ gṛhṇāmi̱ viśve̍bhyastvā de̱vebhyo̱ jaga̍cchandasaṃ gṛhṇāmyanu̱ṣṭupte̍’bhiga̱raḥ

---

Mantra 48 {#mantra-48}

Adhyāya: 8 | Mantra: 48

vreśī̍nāṃ tvā̱ patma̱nnā dhū̍nomi kukū̱nanā̍nāṃ tvā̱ patma̱nnā dhū̍nomi bha̱ndanā̍nāṃ tvā̱ patma̱nnā dhū̍nomi ma̱dinta̍mānāṃ tvā̱ patma̱nnā dhū̍nomi ma̱dhunta̍mānāṃ tvā̱ patma̱nnā dhū̍nomi śu̱kraṃ tvā̍ śu̱kra ā dhū̍no̱myahno̍ rū̱pe sūrya̍sya ra̱śmiṣu̍

---

Mantra 49 {#mantra-49}

Adhyāya: 8 | Mantra: 49

kaku̱bha rū̱paṃ vṛ̍ṣa̱bhasya̍ rocate bṛ̱hacchu̱kraḥ śu̱krasya̍ puro̱gāḥ soma̱: soma̍sya puro̱gāḥ | yatte̍ somā̱dā̍bhya̱ṃ nāma̱ jāgṛ̍vi̱ tasmai̍ tvā gṛhṇāmi̱ tasmai̍ te soma̱ somā̍ya̱ svāhā̍

---

Mantra 50 {#mantra-50}

Adhyāya: 8 | Mantra: 50

u̱śik tvaṃ de̍va somā̱gneḥ pri̱yaṃ pātho’pī̍hi va̱śī tvaṃ de̍va so̱mendra̍sya pri̱yaṃ pātho’pī̍hya̱smatsa̍khā̱ tvaṃ de̍va soma̱ viśve̍ṣāṃ de̱vānā̍ṃ pri̱yaṃ pātho’pī̍hi

---

Mantra 51 {#mantra-51}

Adhyāya: 8 | Mantra: 51

i̱ha rati̍ri̱ha ra̍madhvami̱ha dhṛti̍ri̱ha svadhṛ̍ti̱: svāhā̍ | u̱pa̱sṛ̱jan dha̱ruṇa̍ṃ mā̱tre dha̱ruṇo̍ mā̱tara̱ṃ dhaya̍n | rā̱yaspoṣa̍ma̱smāsu̍ dīdhara̱tsvāhā̍

---

Mantra 52 {#mantra-52}

Adhyāya: 8 | Mantra: 52

sa̱trasya̱ ṛddhi̍ra̱syaga̍nma̱ jyoti̍ra̱mṛtā̍ abhūma̱ | diva̍ṃ pṛthi̱vyā adhyā’ru̍hā̱māvi̍dāma de̱vāntsva̱rjyoti̍:

---

Mantra 53 {#mantra-53}

Adhyāya: 8 | Mantra: 53

yu̱vaṃ tami̍ndrāparvatā puro̱yudhā̱ yo na̍: pṛta̱nyādapa̱ taṃ ta̱middha̍ta̱ṃ vajre̍ṇa̱ taṃ ta̱middha̍tam | dū̱re ca̱ttāya̍ chantsa̱dgaha̍na̱ṃ yadina̍kṣat | a̱smāka śatrū̱npari̍ śūra vi̱śvato̍ da̱rmā da̍rṣīṣṭa vi̱śvata̍: | bhūrbhuva̱: sva̱: supra̱jāḥ pra̱jābhi̍: syāma su̱vīrā̍ vīraiḥ su̱poṣā̱: poṣai̍:

---

Mantra 54 {#mantra-54}

Adhyāya: 8 | Mantra: 54

pa̱ra̱me̱ṣṭhya̱bhidhī̍taḥ pra̱jāpa̍tirvā̱ci vyāhṛ̍tāyāmandho̱ acche̍taḥ | sa̍vi̱tā sa̱nyāṃ vi̱śvaka̍rmā dī̱kṣāyā̍ṃ pū̱ṣā so̍ma̱kraya̍ṇyām

---

Mantra 55 {#mantra-55}

Adhyāya: 8 | Mantra: 55

indra̍śca ma̱ruta̍śca kra̱yāyo̱potthi̱to ‘su̍raḥ pa̱ṇyamā̍no mi̱traḥ krī̱to viṣṇu̍: śipivi̱ṣṭa u̱rāvāsa̍nno̱ viṣṇu̍rna̱randhi̍ṣaḥ

---

Mantra 56 {#mantra-56}

Adhyāya: 8 | Mantra: 56

pro̱hyamā̍ṇa̱: soma̱ āga̍to̱ varu̍ṇa āsa̱ndyāmāsa̍nno̱ ‘gnirāgnī̍dhra̱ indro̍ havi̱rdhāne̍ ‘tha̍rvopāvahri̱yamā̍ṇaḥ

---

Mantra 57 {#mantra-57}

Adhyāya: 8 | Mantra: 57

viśve̍ de̱vā aśuṣu̱ nyupto̱ viṣṇu̍rāprīta̱pā ā̍pyā̱yyamā̍no ya̱maḥ sū̱yamā̍ no̱ viṣṇu̍: sambhri̱yamā̍ṇo vā̱yuḥ pū̱yamā̍naḥ śu̱kraḥ pū̱taḥ śu̱kra: kṣī̍ra̱śrīrma̱nthī sa̍ktu̱śrīḥ

---

Mantra 58 {#mantra-58}

Adhyāya: 8 | Mantra: 58

viśve̍ de̱vāśca̍ma̱seṣūnnī̱to ‘su̱rhomā̱yodya̍to ru̱dro hū̱yamā̍no̱ vāto̱’bhyāvṛ̍tto nṛ̱cakṣā̱: prati̍khyāto bha̱kṣo bha̱kṣyamā̍ṇaḥ pi̱taro̍ nārāśasāḥ

---

Mantra 59 {#mantra-59}

Adhyāya: 8 | Mantra: 59

sa̱nnaḥ sindhu̍ravabhṛ̱thāyodya̍taḥ samu̱dro̱’bhyavahri̱yamā̍ṇaḥ sa̍li̱laḥ praplu̍to yayo̱roja̍sā skabhi̱tā rajāsi vī̱rye̍bhirvī̱rata̍mā̱ śavi̍ṣṭhā | yā patye̍te̱ apra̍tītā̱ saho̍bhi̱rviṣṇū̍ aga̱nvaru̍ṇā pū̱rvahū̍tau

---

Mantra 60 {#mantra-60}

Adhyāya: 8 | Mantra: 60

de̱vāndiva̍maganya̱jñastato̍ mā̱ dravi̍ṇamaṣṭu manu̱ṣyā̱na̱ntari̍kṣamaganya̱jñastato̍ mā̱ dravi̍ṇamaṣṭu pi̱tṝnpṛ̍thi̱vīma̍ganya̱jñastato̍ mā̱ dravi̍ṇamaṣṭu̱ yaṃ kaṃ ca̍ lo̱kamaga̍nya̱jñastato̍ me bha̱draṃma̍bhūt

---

Mantra 61 {#mantra-61}

Adhyāya: 8 | Mantra: 61

catu̍striśa̱ttanta̍vo̱ ye vita̍tni̱re ya i̱maṃ ya̱jña sva̱dhayā̱ dada̍nte | teṣā̍ṃ chi̱nna samve̱tadda̍dhāmi̱ svāhā̍ gha̱rmo apye̍tu de̱vān

---

Mantra 62 {#mantra-62}

Adhyāya: 8 | Mantra: 62

ya̱jñasya̱ doho̱ vita̍taḥ puru̱trā so a̍ṣṭa̱dhā diva̍ma̱nvāta̍tāna | sa ya̍jña dhukṣva̱ mahi̍ me pra̱jā yā rā̱yaspoṣa̱ṃ viśva̱māyu̍raśīya̱ svāhā̍

---

Mantra 63 {#mantra-63}

Adhyāya: 8 | Mantra: 63

ā pa̍vasva̱ hira̍ṇyava̱daśva̍vatsoma vī̱rava̍t | vāja̱ṃ goma̍nta̱mā bha̍ra̱ svāhā̍

---