ī̱śā vā̱sya̱mi̱da sarva̱ṃ yatkiṃ ca̱ jaga̍tyā̱ṃ jaga̍t |
tena̍ tya̱ktena̍ bhuñjīthā̱ mā gṛ̍dha̱: kasya̍ svi̱ddhana̍m
||40.1||ku̱rvanne̱veha karmā̍ṇi jijīvi̱ṣeccha̱ta samā̍: |
e̱vaṃ tvayi̱ nānyathe̱to̱'sti̱ na karma̍ lipyate̱ nare̍
||40.2||a̱su̱ryā nāma̍ te lo̱kā a̱ndhena̱ tama̱sāvṛ̍tāḥ |
tām̐ste pretyāpi̍ gacchanti̱ ye ke cā̍tma̱hano̱ janā̍:
||40.3||ane̍ja̱deka̱ṃ mana̍so̱ javī̍yo naina̍dde̱vā ā̍pnuva̱n pūrva̱marśa̍t |
taddhāva̍to̱'nyānatye̍ti̱ tiṣṭha̱ttasmi̍nna̱po mā̍ta̱riśvā̍ dadhāti
||40.4||tade̍jati̱ tannaija̍ti̱ taddū̱re tadva̍nti̱ke |
tada̱ntara̍sya̱ sarva̍sya̱ tadu̱ sarva̍syāsya bāhya̱taḥ
||40.5||yastu sarvā̍ṇi bhū̱tānyā̱tmanne̱vānu̱paśya̍ti |
sa̱rva̱bhū̱teṣu̍ cā̱tmāna̱ṃ tato̱ na vi ci̍kitsati
||40.6||yasmi̱ntsarvā̍ṇi bhū̱tānyātmai̱vābhū̍dvijāna̱taḥ |
tatra̱ ko moha̱: kaḥ śoka̍ eka̱tvama̍nu̱paśya̍taḥ
||40.7||sa parya̍gācchu̱krama̍kā̱yama̍vra̱ṇama̍snāvi̱ra śu̱ddhamapā̍paviddham |
ka̱virma̍nī̱ṣī pa̍ri̱bhūḥ sva̍ya̱mbhūryā̍thātathya̱to'rthā̱n vya̱dadhācchāśva̱tībhya̱: samā̍bhyaḥ
||40.8||a̱ndhaṃ tama̱: pravi̍śanti̱ ye'sa̍ṃbhūtimu̱pāsa̍te |
tato̱ bhūya̍ iva̱ te tamo̱ ya u̱ sambhū̍tyā ra̱tāḥ
||40.9||a̱nyade̱vāhuḥ sa̍mbha̱vāda̱nyadā̍hu̱rasa̍mbhavāt |
iti̍ śuśruma̱ dhīrā̍ṇā̱ṃ ye na̱stadvi̍cacakṣi̱re
||40.10||sambhū̍tiṃ ca vinā̱śaṃ ca̱ yastadvedo̱bhaya sa̱ha |
vi̱nā̱śena̍ mṛ̱tyuṃ tī̱rtvā sambhū̍tyā̱mṛta̍maśnute
||40.11||a̱ndhaṃ tama̱: pravi̍śanti̱ ye'vi̍dyāmu̱pāsa̍te |
tato̱ bhūya̍ iva̱ te tamo̱ ya u̍ vi̱dyāyā ra̱tāḥ
||40.12||a̱nyade̱vāhurvi̱dyāyā̍ a̱nyadā̍hu̱ravi̍dyāyāḥ |
iti̍ śuśruma̱ dhīrā̍ṇā̱ṃ ye na̱stadvi̍cacakṣi̱re
||40.13||vi̱dyāṃ cāvi̍dyāṃ ca̱ yastadvedo̱bhaya sa̱ha |
avi̍dyayā mṛ̱tyuṃ tī̱rtvā vi̱dyayā̱'mṛta̍maśnute
||40.14||vā̱yurani̍lama̱mṛta̱mathe̱daṃ bhasmā̍nta śarī̍ram |
oṃ krato̍ smara | kli̱be sma̍ra | kṛ̱ta sma̍ra
||40.15||agne̱ naya̍ su̱pathā̍ rā̱ye a̱smānviśvā̍ni deva va̱yunā̍ni vi̱dvān |
yu̱yo̱dhyasmajju̍hurā̱ṇameno̱ bhuyi̍ṣṭhāṃ te̱ nama̍ uktiṃ vidhema
||40.16||hi̱ra̱ṇmaye̍na̱ pātre̍ṇa sa̱tyasyāpi̍hita̱ṃ mukha̍m | yo̱'sāvā̍di̱tye puru̍ṣa̱: so'sāva̱ham |
oṃ khaṃ brahma̍
||40.17||