Vājasaneyi Madhyandina Saṃhitā — Chapter 23 (65 mantras)

Vājasaneyi Madhyandina Saṃhitā — Chapter 23

hi̱ra̱ṇya̱ga̱rbhaḥ sama̍varta̱tāgre̍ bhū̱tasya̍ jā̱taḥ pati̱reka̍ āsīt |

---

Mantras

Mantra	First Words
1	sa dādhāra
2	upayāmagṛhīto’si prajāpataye
3	ya prāṇato
4	upayāmagṛhīto’si prajāpataye
5	yuñjanti bradhnamaruṣa
6	yuñjantyasya kāmyā
7	yadvāto apo
8	vasavastvāñjantu gāyatreṇa
9	ka svidekākī
10	sūrya ekākī
11	kā svidāsītpūrvacitti
12	dyaurāsītpūrvacittiraśva āsīd
13	vāyuṣṭvā pacatairavatvasitagrīvaśchāgairnyagrodhaścamasai
14	saśito raśminā
15	svaya vājistanva
16	na vā
17	agni paśurāsīttenāyajanta
18	prāṇāya svāhā
19	gaṇānā tvā
20	tā ubhau
21	utsakthyā ava
22	yakāsakau śakuntikā”halagiti
23	yako’sakau śakuntaka
24	mātā ca
25	mātā ca
26	ūrdhvamenāmucchrāpaya girau
27	ūrdhvamenamucchrayatādgirau bhāra
28	yadasyā ahubhedyā
29	yaddevāso lalāmagu
30	yaddhariṇo yavamatti
31	yaddhariṇo yavamatti
32	dadhikrāvṇo akāriṣa
33	gāyatrī triṣṭubjagatyanuṣṭuppaṅktyā
34	dvipadā yāścatuṣpadāstripadā
35	mahānāmnyo revatyo
36	nāryaste patnyo
37	rajatā hariṇī
38	kuvidaṅga yavamanto
39	kastvā chyati
40	ṛtavasta ṛtuthā
41	ardhamāsā parūṣi
42	daivyā adhvaryavastvā
43	dyauste pṛthivyantarikṣa
44	śa te
45	ka svidekākī
46	sūrya ekākī
47	ki svitsūryasama
48	brahma sūryasama
49	pṛcchāmi tvā
50	api teṣu
51	keṣvanta puruṣa
52	pañcasvanta puruṣa
53	kā svidāsītpūrvacitti
54	dyaurāsītpūrvacittiraśva āsīd
55	kā īmare
56	ajāre piśaṅgilā
57	katyasya viṣṭhā
58	ṣaḍasya viṣṭhā
59	ko asya
60	vedāhamasya bhuvanasya
61	pṛcchāmi tvā
62	iya vedi
63	subhū svayambhū
64	hotā yakṣatprajāpati
65	prajāpate na

---

Mantra 1 {#mantra-1}

Adhyāya: 23 | Mantra: 1

sa dā̍dhāra pṛthi̱vīṃ dyāmu̱temāṃ kasmai̍ de̱vāya̍ ha̱viṣā̍ vidhema

---

Mantra 2 {#mantra-2}

Adhyāya: 23 | Mantra: 2

u̱pa̱yā̱magṛ̍hīto’si pra̱jāpa̍taye tvā̱ juṣṭa̍ṃ gṛhṇāmye̱ṣa te̱ yoni̱: sūrya̍ste mahi̱mā | yaste’ha̍ntsaṃvatsa̱re ma̍hi̱mā sa̍mba̱bhūva̱ yaste̍ vā̱yāva̱ntari̍kṣe mahi̱mā sa̍mba̱bhūva̱ yaste̍ di̱vi sūrye̍ mahi̱mā sa̍mba̱bhūva̱ tasmai̍ te mahi̱mne pra̱jāpa̍taye̱ svāhā̍ de̱vebhya̍:

---

Mantra 3 {#mantra-3}

Adhyāya: 23 | Mantra: 3

yaḥ prā̍ṇa̱to ni̍miṣa̱to ma̍hi̱tvaika̱ idrājā̱ jaga̍to ba̱bhūva̍ | ya īśe̍ a̱sya dvi̱pada̱ścatu̍ṣpada̱ḥ kasmai̍ de̱vāya̍ ha̱viṣā̍ vidhema

---

Mantra 4 {#mantra-4}

Adhyāya: 23 | Mantra: 4

u̱pa̱yā̱magṛ̍hīto’si pra̱jāpa̍taye tvā̱ juṣṭa̍ṃ gṛhṇāmye̱ṣa te̱ yoni̍śca̱ndramā̍ste mahi̱mā | yaste̱ rātrau̍ saṃvatsa̱re ma̍hi̱mā sa̍mba̱bhūva̱ yaste̍ pṛthi̱vyāma̱gnau ma̍hi̱mā sa̍mba̱bhūva̱ yaste̱ nakṣa̍treṣu ca̱ndrama̍si mahi̱mā sa̍mba̱bhūva̱ tasmai̍ te mahi̱mne pra̱jāpa̍taye de̱vebhya̱: svāhā̍

---

Mantra 5 {#mantra-5}

Adhyāya: 23 | Mantra: 5

yu̱ñjanti̍ bra̱dhnama̍ru̱ṣaṃ cara̍nta̱ṃ pari̍ ta̱sthuṣa̍: | roca̍nte roca̱nā di̱vi

---

Mantra 6 {#mantra-6}

Adhyāya: 23 | Mantra: 6

yu̱ñjantya̍sya̱ kāmyā̱ harī̱ vipa̍kṣasā̱ rathe̍ | śoṇā̍ dhṛ̱ṣṇū nṛ̱sāha̍sā

---

Mantra 7 {#mantra-7}

Adhyāya: 23 | Mantra: 7

yadvāto̍ a̱po a̍ganīganpri̱yāmindra̍sya ta̱nva̱m | e̱ta sto̍tara̱nena̍ pa̱thā puna̱raśva̱māva̍rtayāsi naḥ

---

Mantra 8 {#mantra-8}

Adhyāya: 23 | Mantra: 8

vasa̍vastvāñjantu gāya̱treṇa̱ chanda̍sā ru̱drāstvā̍ñjantu̱ traiṣṭu̍bhena̱ chanda̍sā ”di̱tyāstvā̍ñjantu̱ jāga̍tena̱ chanda̍sā | bhūrbhuva̱: svarlā̱jī3ñchā̱cī3nyavye̱ gavya̍ e̱tadanna̍matta devā e̱tadanna̍maddhi prajāpate

---

Mantra 9 {#mantra-9}

Adhyāya: 23 | Mantra: 9

kaḥ svi̍dekā̱kī ca̍rati̱ ka u̍ svijjāyate̱ puna̍: | ki svi̍ddhi̱masya̍ bheṣa̱jaṃ kimvā̱vapa̍naṃ ma̱hat

---

Mantra 10 {#mantra-10}

Adhyāya: 23 | Mantra: 10

sūrya̍ ekā̱kī ca̍rati ca̱ndramā̍ jāyate̱ puna̍: | a̱gnirhi̱masya̍ bheṣa̱jaṃ bhūmi̍rā̱vapa̍naṃ ma̱hat

---

Mantra 11 {#mantra-11}

Adhyāya: 23 | Mantra: 11

kā svi̍dāsītpū̱rvaci̍tti̱: ki svi̍dāsīd bṛ̱hadvaya̍: | kā svi̍dāsītpilippi̱lā kā svi̍dāsītpiśaṅgi̱lā

---

Mantra 12 {#mantra-12}

Adhyāya: 23 | Mantra: 12

dyaurā̍sītpū̱rvaci̍tti̱raśva̍ āsīd bṛ̱hadvaya̍: | avi̍rāsītpilippi̱lā rātri̍rāsītpiśaṅgi̱lā

---

Mantra 13 {#mantra-13}

Adhyāya: 23 | Mantra: 13

vā̱yuṣṭvā̍ paca̱taira̍va̱tvasi̍tagrīva̱śchāgai̍rnya̱grodha̍ścama̱saiḥ śa̍lma̱lirvṛddhyā̍ | e̱ṣa sya rā̱thyo vṛṣā̍ pa̱ḍbhiśca̱turbhi̱reda̍ganbra̱hmā kṛ̍ṣṇaśca no’vatu̱ namo̱’gnaye̍

---

Mantra 14 {#mantra-14}

Adhyāya: 23 | Mantra: 14

saśi̍to ra̱śminā̱ ratha̱: saśi̍to ra̱śminā̱ haya̍: | saśi̍to a̱psva̱psu̱jā bra̱hmā soma̍purogavaḥ

---

Mantra 15 {#mantra-15}

Adhyāya: 23 | Mantra: 15

sva̱yaṃ vā̍jim̐sta̱nva̱ṃ kalpayasva sva̱yaṃ ya̍jasva sva̱yaṃ ju̍ṣasva | ma̱hi̱mā te̱’nyena̱ na sa̱nnaśe̍

---

Mantra 16 {#mantra-16}

Adhyāya: 23 | Mantra: 16

na vā u̍ e̱tanmri̍yase̱ na ri̍ṣyasi de̱vām̐2 ide̍ṣi pa̱thibhi̍: su̱gebhi̍: | yatrāsa̍te su̱kṛto̱ yatra̱ te ya̱yustatra̍ tvā de̱vaḥ sa̍vi̱tā da̍dhātu

---

Mantra 17 {#mantra-17}

Adhyāya: 23 | Mantra: 17

a̱gniḥ pa̱śurā̍sī̱ttenā̍yajanta̱ sa e̱tam̐llo̱kama̍jaya̱dyasmi̍nna̱gniḥ sa te̍ lo̱ko bha̍viṣyati̱ taṃ je̍ṣyasi̱ pibai̱tā a̱paḥ | vā̱yuḥ pa̱śurā̍sī̱ttenā̍yajanta̱ sa e̱tam̐llo̱kama̍jaya̱dyasmi̍nvā̱yuḥ sa te̍ lo̱ko bha̍viṣyati̱ taṃ je̍ṣyasi̱ pibai̱tā a̱paḥ | sūrya̍: pa̱śurā̍sī̱ttenā̍yajanta̱ sa e̱tam̐llo̱kama̍jaya̱dyasmi̱ntsūrya̱: sa te̍ lo̱ko bha̍viṣyati̱ taṃ je̍ṣyasi̱ pibai̱tā a̱paḥ

---

Mantra 18 {#mantra-18}

Adhyāya: 23 | Mantra: 18

prā̱ṇāya̱ svāhā̍ ‘pā̱nāya̱ svāhā̍ vyā̱nāya̱ svāhā̍ | ambe̱ ambi̱ke’mbā̍like̱ na mā̍ nayati̱ kaśca̱na | sasa̍styaśva̱kaḥ subha̍drikāṃ kāmpīlavā̱sinī̍m

---

Mantra 19 {#mantra-19}

Adhyāya: 23 | Mantra: 19

ga̱ṇānā̍ṃ tvā ga̱ṇapa̍ti havāmahe pri̱yāṇā̍ṃ tvā pri̱yapa̍ti havāmahe ni̱dhīnā̍ṃ tvā̍ nidhi̱pati havāmahe vaso mama | āhama̍jāni garbha̱dhamā tvama̍jāsi garbha̱dham

---

Mantra 20 {#mantra-20}

Adhyāya: 23 | Mantra: 20

tā u̱bhau ca̱tura̍: pa̱daḥ sa̱ṃprasā̍rayāva sva̱rge lo̱ke prorṇu̍vāthā̱ṃ vṛṣā̍ vā̱jī re̍to̱dhā reto̍ dadhātu

---

Mantra 21 {#mantra-21}

Adhyāya: 23 | Mantra: 21

utsa̍kthyā̱ ava̍ gu̱daṃ dhe̍hi̱ sama̱ñjiṃ cā̍rayā vṛṣan | ya strī̱ṇāṃ jī̍va̱bhoja̍naḥ

---

Mantra 22 {#mantra-22}

Adhyāya: 23 | Mantra: 22

ya̱kāsa̱kau śa̍kunti̱kā”hala̱giti̱ vañca̍ti | āha̍nti ga̱bhe paso̱ niga̍lgalīti̱ dhāra̍kā

---

Mantra 23 {#mantra-23}

Adhyāya: 23 | Mantra: 23

ya̱ko̱’sa̱kau śa̍kunta̱ka ā̱hala̱giti̱ vañca̍ti | viva̍kṣata iva te̱ mukha̱madhva̍ryo̱ mā na̱stvama̱bhi bhā̍ṣathāḥ

---

Mantra 24 {#mantra-24}

Adhyāya: 23 | Mantra: 24

mā̱tā ca̍ te pi̱tā ca̱ te’gra̍ṃ vṛ̱kṣasya̍ rohataḥ | prati̍lā̱mīti̍ te pi̱tā ga̱bhe mu̱ṣṭima̍tasayat

---

Mantra 25 {#mantra-25}

Adhyāya: 23 | Mantra: 25

mā̱tā ca̍ te pi̱tā ca̱ te’gre̍ vṛ̱kṣasya̍ krīḍataḥ | viva̍kṣata iva te̱ mukha̱ṃ brahma̱nmā tvaṃ va̍do ba̱hu

---

Mantra 26 {#mantra-26}

Adhyāya: 23 | Mantra: 26

ū̱rdhvame̍nā̱mucchrā̍paya gi̱rau bhā̱ra hara̍nniva | athā̍syai̱ madhya̍medhatā śī̱te vāte̍ pu̱nanni̍va

---

Mantra 27 {#mantra-27}

Adhyāya: 23 | Mantra: 27

ū̱rdhvame̍na̱mucchra̍yatādgi̱rau bhā̱ra hara̍nniva | athā̍sya̱ madhya̍mejatu śī̱te vāte̍ pu̱nanni̍va

---

Mantra 28 {#mantra-28}

Adhyāya: 23 | Mantra: 28

yada̍syā ahu̱bhedyā̍: kṛ̱dhu sthū̱lamu̱pāta̍sat | mu̱ṣkāvida̍syā ejato gośa̱phe śa̍ku̱lāvi̍va

---

Mantra 29 {#mantra-29}

Adhyāya: 23 | Mantra: 29

yadde̱vāso̍ la̱lāma̍gu̱ṃ pra vi̍ṣṭī̱mina̱māvi̍ṣuḥ | sa̱kthnā de̍diśyate̱ nārī̍ sa̱tyasyā̍kṣi̱bhuvo̱ yathā̍

---

Mantra 30 {#mantra-30}

Adhyāya: 23 | Mantra: 30

yaddha̍ri̱ṇo yava̱matti̱ na pu̱ṣṭaṃ pa̱śu manya̍te | śū̱drā yadarya̍jārā̱ na poṣā̍ya dhanāyati

---

Mantra 31 {#mantra-31}

Adhyāya: 23 | Mantra: 31

yaddha̍ri̱ṇo yava̱matti̱ na pu̱ṣṭaṃ ba̱hu manya̍te | śū̱dro yadaryā̍yai jā̱ro na poṣa̱manu̍ manyate

---

Mantra 32 {#mantra-32}

Adhyāya: 23 | Mantra: 32

da̱dhi̱krāvṇo̍ akāriṣaṃ ji̱ṣṇoraśva̍sya vā̱jina̍: | su̱ra̱bhi no̱ mukhā̍ kara̱tpra ṇa̱ āyūṣi tāriṣat

---

Mantra 33 {#mantra-33}

Adhyāya: 23 | Mantra: 33

gā̱ya̱trī tri̱ṣṭubjaga̍tyanu̱ṣṭuppa̱ṅktyā sa̱ha | bṛ̱ha̱tyuṣṇihā̍ ka̱kupsū̱cībhi̍: śamyantu tvā

---

Mantra 34 {#mantra-34}

Adhyāya: 23 | Mantra: 34

dvipa̍dā̱ yāścatu̍ṣpadā̱stripa̍dā̱ yāśca̱ ṣaṭpa̍dāḥ | viccha̍ndā̱ yāśca̱ saccha̍ndāḥ sū̱cībhi̍: śamyantu tvā

---

Mantra 35 {#mantra-35}

Adhyāya: 23 | Mantra: 35

ma̱hānā̍mnyo re̱vatyo̱ viśvā̱ āśā̍: pra̱bhūva̍rīḥ | maighī̍rvi̱dyuto̱ vāca̍: sū̱cībhi̍: śamyantu tvā

---

Mantra 36 {#mantra-36}

Adhyāya: 23 | Mantra: 36

nārya̍ste̱ patnyo̱ loma̱ vici̍nvantu manī̱ṣayā̍ | de̱vānā̱ṃ patnyo̱ diśa̍: sū̱cībhi̍: śamyantu tvā

---

Mantra 37 {#mantra-37}

Adhyāya: 23 | Mantra: 37

ra̱ja̱tā hari̍ṇī̱: sīsā̱ yujo̍ yujyante̱ karma̍bhiḥ | aśva̍sya vā̱jina̍stva̱ci simā̍: śamyantu̱ śamya̍ntīḥ

---

Mantra 38 {#mantra-38}

Adhyāya: 23 | Mantra: 38

ku̱vida̱ṅga yava̍manto̱ yava̍ñci̱dyathā̱ dāntya̍nupū̱rvaṃ vi̱yūya̍ | i̱hehai̍ṣāṃ kṛṇuhi̱ bhoja̍nāni̱ ye ba̱rhiṣo̱ nama̍ ukti̱ṃ yaja̍nti

---

Mantra 39 {#mantra-39}

Adhyāya: 23 | Mantra: 39

kastvā chya̍ti̱ kastvā̱ viśā̍sti̱ kaste̱ gātrā̍ṇi śamyati | ka u̍ te śami̱tā ka̱viḥ

---

Mantra 40 {#mantra-40}

Adhyāya: 23 | Mantra: 40

ṛ̱tava̍sta ṛtu̱thā parva̍ śami̱tāro̱ vi śā̍satu | sa̱ṃva̱tsa̱rasya̱ teja̍sā śa̱mībhi̍: śamyantu tvā

---

Mantra 41 {#mantra-41}

Adhyāya: 23 | Mantra: 41

a̱rdha̱mā̱sāḥ parūṣi te̱ māsā̱ ā cchya̍ntu̱ śamya̍ntaḥ | a̱ho̱rā̱trāṇi̍ ma̱ruto̱ vili̍ṣṭa sūdayantu te

---

Mantra 42 {#mantra-42}

Adhyāya: 23 | Mantra: 42

daivyā̍ adhva̱ryava̱stvā cchya̍ntu̱ vi ca̍ śāsatu | gātrā̍ṇi parva̱śaste̱ simā̍: kṛṇvantu̱ śamya̍ntīḥ

---

Mantra 43 {#mantra-43}

Adhyāya: 23 | Mantra: 43

dyau̍ste pṛthi̱vyantari̍kṣaṃ vā̱yuśchi̱draṃ pṛ̍ṇātu te | sūrya̍ste̱ nakṣa̍traiḥ sa̱ha lo̱kaṃ kṛ̍ṇotu sādhu̱yā

---

Mantra 44 {#mantra-44}

Adhyāya: 23 | Mantra: 44

śaṃ te̱ pare̍bhyo̱ gātre̍bhya̱: śama̱stvava̍rebhyaḥ | śama̱sthabhyo̍ ma̱jjabhya̱: śamva̍stu ta̱nvai tava̍

---

Mantra 45 {#mantra-45}

Adhyāya: 23 | Mantra: 45

kaḥ svi̍dekā̱kī ca̍rati̱ ka u̍ svijjāyate̱ puna̍: | ki svi̍ddhi̱masya̍ bheṣa̱jaṃ kimvā̱vapa̍naṃ ma̱hat

---

Mantra 46 {#mantra-46}

Adhyāya: 23 | Mantra: 46

sūrya̍ ekā̱kī ca̍rati ca̱ndramā̍ jāyate̱ puna̍: | a̱gnirhi̱masya̍ bheṣa̱jaṃ bhūmi̍rā̱vapa̍naṃ ma̱hat

---

Mantra 47 {#mantra-47}

Adhyāya: 23 | Mantra: 47

ki svi̱tsūrya̍sama̱ṃ jyoti̱: ki sa̍mu̱drasa̍ma sara̍: | ki svi̍tpṛthi̱vyai varṣī̍ya̱: kasya̱ mātrā̱ na vi̍dyate

---

Mantra 48 {#mantra-48}

Adhyāya: 23 | Mantra: 48

brahma̱ sūrya̍sama̱ṃ jyoti̱rdyauḥ sa̍mu̱drasa̍ma sara̍: | indra̍: pṛthivyai̱ varṣī̍yā̱n gostu mātrā̱ na vi̍dyate

---

Mantra 49 {#mantra-49}

Adhyāya: 23 | Mantra: 49

pṛ̱cchāmi̍ tvā ci̱taye̍ devasakha̱ yadi̱ tvamatra̱ mana̍sā ja̱gantha̍ | yeṣu̱ viṣṇu̍stri̱ṣu pa̱deṣveṣṭa̱steṣu̱ viśva̱ṃ bhuva̍na̱mā vi̍veśā3

---

Mantra 50 {#mantra-50}

Adhyāya: 23 | Mantra: 50

api̱ teṣu̍ tri̱ṣu pa̱deṣva̍smi̱ yeṣu̱ viśva̱ṃ bhuva̍namā vi̱veśa̍ | sa̱dyaḥ parye̍mi pṛthi̱vīmu̱ta dyāmeke̱nāṅge̍na di̱vo a̱sya pṛ̱ṣṭham

---

Mantra 51 {#mantra-51}

Adhyāya: 23 | Mantra: 51

keṣva̱ntaḥ puru̍ṣa̱ ā vi̍veśa̱ kānya̱ntaḥ puru̍ṣe̱ arpi̍tāni | e̱tadbra̍hma̱nnupa̍ valhāmasi tvā̱ ki svi̍nna̱: prati̍ vocā̱syatra̍

---

Mantra 52 {#mantra-52}

Adhyāya: 23 | Mantra: 52

pa̱ñcasva̱ntaḥ puru̍ṣa̱ ā vi̍veśa̱ tānya̱ntaḥ puru̍ṣe̱ arpi̍tāni | e̱tattvātra̍ pratimanvā̱no a̍smi̱ na mā̱yayā̍ bhava̱syutta̍ro̱ mat

---

Mantra 53 {#mantra-53}

Adhyāya: 23 | Mantra: 53

kā svi̍dāsītpū̱rvaci̍tti̱: ki svi̍dāsīd bṛ̱hadvaya̍: | kā svi̍dāsītpilippi̱lā kā svi̍dāsītpiśaṅgi̱lā

---

Mantra 54 {#mantra-54}

Adhyāya: 23 | Mantra: 54

dyau̍rāsītpū̱rvaci̍tti̱raśva̍ āsīd bṛ̱hadvaya̍: | avi̍rāsītpilippi̱lā rātri̍rāsītpiśaṅgi̱lā

---

Mantra 55 {#mantra-55}

Adhyāya: 23 | Mantra: 55

kā ī̍mare piśaṅgi̱lā kā ī̍ṃ kurupiśaṅgi̱lā | ka ī̍mā̱skanda̍marṣati̱ ka ī̱ṃ panthā̱ṃ vi sa̍rpati

---

Mantra 56 {#mantra-56}

Adhyāya: 23 | Mantra: 56

a̱jāre̍ piśaṅgi̱lā śvā̱vitku̍rupiśaṅgi̱lā | śa̱śa ā̱skanda̍marṣa̱tyahi̱: panthā̱ṃ vi sa̍rpati

---

Mantra 57 {#mantra-57}

Adhyāya: 23 | Mantra: 57

katya̍sya vi̱ṣṭhāḥ katya̱kṣarā̍ṇi̱ kati̱ homā̍saḥ kati̱dhā sami̍ddhaḥ | ya̱jñasya̍ tvā vi̱dathā̍ pṛccha̱matra̱ kati̱ hotā̍ra ṛtu̱śo ya̍janti

---

Mantra 58 {#mantra-58}

Adhyāya: 23 | Mantra: 58

ṣaḍa̍sya vi̱ṣṭhāḥ śa̱tama̱kṣarā̍ṇyaśī̱tirhomā̍: sa̱midho̍ ha ti̱sraḥ | ya̱jñasya̍ te vi̱dathā̱ pra bra̍vīmi sa̱pta hotā̍ra ṛtu̱śo ya̍janti

---

Mantra 59 {#mantra-59}

Adhyāya: 23 | Mantra: 59

ko a̱sya ve̍da̱ bhuva̍nasya̱ nābhi̱ṃ ko dyāvā̍pṛthi̱vī a̱ntari̍kṣam | kaḥ sūrya̍sya veda bṛha̱to ja̱nitra̱ṃ ko ve̍da ca̱ndrama̍saṃ yato̱jāḥ

---

Mantra 60 {#mantra-60}

Adhyāya: 23 | Mantra: 60

vedā̱hama̱sya bhuva̍nasya̱ nābhi̱ṃ veda̱ dyāvā̍pṛthi̱vī a̱ntari̍kṣam | veda̱ sūrya̍sya bṛha̱to ja̱nitra̱matho̍ veda ca̱ndrama̍saṃ yato̱jāḥ

---

Mantra 61 {#mantra-61}

Adhyāya: 23 | Mantra: 61

pṛ̱cchāmi̍ tvā̱ para̱manta̍ṃ pṛthi̱vyāḥ pṛ̱cchāmi̱ yatra̱ bhuva̍nasya̱ nābhi̍: | pṛ̱cchāmi̍ tvā̱ vṛṣṇo̱ aśva̍sya̱ reta̍: pṛ̱cchāmi̍ vā̱caḥ pa̍ra̱maṃ vyo̍ma

---

Mantra 62 {#mantra-62}

Adhyāya: 23 | Mantra: 62

i̱yaṃ vedi̱: paro̱ anta̍: pṛthi̱vyā a̱yaṃ ya̱jño bhuva̍nasya̱ nābhi̍: | a̱ya somo̱ vṛṣṇo̱ aśva̍sya̱ reto̍ bra̱hmāyaṃ vā̱caḥ pa̍ra̱maṃ vyo̍ma

---

Mantra 63 {#mantra-63}

Adhyāya: 23 | Mantra: 63

su̱bhūḥ sva̍ya̱mbhūḥ pra̍tha̱mo’ntarma̍ha̱tya̱rṇa̱ve | da̱dhe ha̱ garbha̍mṛ̱tviya̱ṃ yato̍ jā̱taḥ pra̱jāpa̍tiḥ

---

Mantra 64 {#mantra-64}

Adhyāya: 23 | Mantra: 64

hotā̍ yakṣatpra̱jāpa̍ti soma̍sya mahi̱mnaḥ | ju̱ṣatā̱ṃ piba̍tu̱ soma hota̱ryaja̍

---

Mantra 65 {#mantra-65}

Adhyāya: 23 | Mantra: 65

prajā̍pate̱ na tvade̱tānya̱nyo viśvā̍ rū̱pāṇi̱ pari̱ tā ba̍bhūva | yatkā̍māste juhu̱mastanno̍ astu va̱ya syā̍ma̱ pata̍yo rayī̱ṇām

---