a̱gniśca̍ pṛthi̱vī ca̱ sanna̍te̱ te me̱ saṃ na̍matāma̱do vā̱yuścā̱ntari̍kṣaṃ ca̱ sanna̍te̱ te me̱ saṃ na̍matāma̱da ā̍di̱tyaśca dyauśca̱ sanna̍te̱ te me̱ saṃ na̍matāma̱da āpa̍śca̱ varu̍ṇaśca̱ sanna̍te̱ te me̱ saṃ na̍matāma̱daḥ |
sa̱pta sasado̍ aṣṭa̱mī bhū̍ta̱sādha̍nī | sakā̍mā̱m̐2adhva̍naskuru sa̱ṃjñāna̍mastu me̱'munā̍
||26.1||yathe̱māṃ vāca̍ṃ kalyā̱ṇīmā̱vadā̍ni̱ jane̍bhyaḥ |
bra̱hma̱rā̱ja̱nyā̱bhyā śū̱drāya̱ cāryā̍ya ca̱ svāya̱ cāra̍ṇāya ca |
pri̱yo de̱vānā̱ṃ dakṣi̍ṇāyai dā̱turi̱ha bhū̍yāsama̱yaṃ me̱ kāma̱: samṛ̍dhyatā̱mupa̍ mā̱do na̍matu
||26.2||bṛha̍spate̱ ati̱ yada̱ryo arhā̍d dyu̱madvi̱bhāti̱ kratu̍ma̱jjane̍ṣu |
yaddī̱daya̱cchava̍sa ṛtaprajāta̱ tada̱smāsu̱ dravi̍ṇaṃ dhehi ci̱tram |
u̱pa̱yā̱magṛ̍hīto'si̱ bṛha̱spata̍ye tvai̱ṣa te̱ yoni̱rbṛha̱spata̍ye tvā
||26.3||indra̱ goma̍nni̱hā yā̍hi̱ pibā̱ soma śatakrato | vi̱dyadbhi̱rgrāva̍bhiḥ su̱tam |
u̱pa̱yā̱magṛ̍hīto̱'sīndrā̍ya tvā̱ goma̍ta e̱ṣa te̱ yoni̱rindrā̍ya tvā̱ goma̍te
||26.4||indrā yā̍hi vṛtraha̱npibā̱ soma śatakrato | goma̍dbhi̱rgrāva̍bhiḥ su̱tam |
u̱pa̱yā̱magṛ̍hīto̱'sīndrā̍ya tvā̱ goma̍ta e̱ṣa te̱ yoni̱rindrā̍ya tvā̱ goma̍te
||26.5||ṛ̱tāvā̍naṃ vaiśvāna̱ramṛ̱tasya̱ jyoti̍ṣa̱spati̍m | aja̍sraṃ gha̱rmamī̍mahe |
u̱pa̱yā̱magṛ̍hīto'si vaiśvāna̱rāya̍ tvai̱ṣa te̱ yoni̍rvaiśvāna̱rāya̍ tvā
||26.6||vai̱śvā̱na̱rasya̍ suma̱tau syā̍ma̱ rājā̱ hi ka̱ṃ bhuva̍nānāmabhi̱śrīḥ |
i̱to jā̱to viśva̍mi̱daṃ vi ca̍ṣṭe vaiśvāna̱ro ya̍tate̱ sūrye̍ṇa |
u̱pa̱yā̱magṛ̍hīto'si vaiśvāna̱rāya̍ tvai̱ṣa te̱ yoni̍rvaiśvāna̱rāya̍ tvā
||26.7||vai̱śvā̱na̱ro na ū̱taya̱ ā pra yā̍tu parā̱vata̍: | a̱gniru̱kthena̱ vāha̍sā |
u̱pa̱yā̱magṛ̍hīto'si vaiśvāna̱rāya̍ tvai̱ṣa te̱ yoni̍rvaiśvāna̱rāya̍ tvā
||26.8||a̱gnirṛṣi̱: pava̍māna̱: pāñca̍janyaḥ pu̱rohi̍taḥ | tamī̍mahe mahāga̱yam |
u̱pa̱yā̱magṛ̍hīto'sya̱gnaye̍ tvā̱ varca̍sa e̱ṣa te̱ yoni̍ra̱gnaye̍ tvā̱ varca̍se
||26.9||ma̱hām̐2 indro̱ vajra̍hastaḥ ṣoḍa̱śī śarma̍ yacchatu | hantu̍ pā̱pmāna̱ṃ yo'smāndveṣṭi̍ ||
u̱pa̱yā̱magṛ̍hīto'si mahe̱ndrāya̍ tvai̱ṣa te̱ yoni̍rmahe̱ndrāya̍ tvā
||26.10||taṃ vo̍ da̱smamṛ̍tī̱ṣaha̱ṃ vaso̍rmandā̱namandha̍saḥ | a̱bhi va̱tsaṃ na svasa̍reṣu dhe̱nava̱ indra̍ṃ gī̱rbhirna̍vāmahe
||26.11||yadvāhi̍ṣṭha̱ṃ tada̱gnaye̍ bṛ̱hada̍rca vibhāvaso | mahi̍ṣīva̱ tvadra̱yistvadvājā̱ udī̍rate
||26.12||ehyū̱ ṣu bravā̍ṇi̱ te'gna̍ i̱ttheta̍rā̱ gira̍: | e̱bhirva̍rdhāsa̱ indu̍bhiḥ
||26.13||ṛ̱tava̍ste ya̱jñaṃ vi ta̍nvantu̱ māsā̱ rakṣa̍ntu te̱ havi̍: |
sa̱ṃva̱tsa̱raste̍ ya̱jñaṃ da̍dhātu naḥ pra̱jāṃ ca̱ pari̍ pātu naḥ
||26.14||u̱pa̱hva̱re gi̍rī̱ṇā sa̍ṅga̱me ca̍ na̱dī̱nā̍m | dhi̱yā vipro̍ ajāyata
||26.15||u̱ccā te̍ jā̱tamandha̍so di̱vi sadbhūmyā da̍de | u̱gra śarma̱ mahi̱ śrava̍:
||26.16||sa na̱ indrā̍ya̱ yajya̍ve̱ varu̍ṇāya ma̱rudbhya̍: | va̱ri̱vo̱vitpari̍ srava
||26.17||e̱nā viśvā̍nya̱rya ā dyu̱mnāni̱ mānu̍ṣāṇām | siṣā̍santo vanāmahe
||26.18||anu̍ vīrai̱ranu̍ puṣyāsma̱ gobhi̱ranvaśvai̱ranu̱ sarve̍ṇa pu̱ṣṭaiḥ |
anu̱ dvipa̱dā'nu̱ catu̍ṣpadā va̱yaṃ de̱vā no̍ ya̱jñamṛ̍tu̱thā na̍yantu
||26.19||agne̱ patnī̍ri̱hā va̍ha de̱vānā̍muśa̱tīrupa̍ | tvaṣṭā̍ra soma̍pītaye
||26.20||a̱bhi ya̱jñaṃ gṛ̍ṇīhi no̱ gnāvo̱ neṣṭa̱: piba̍ ṛ̱tunā̍ |
tva hi ra̍tna̱dhā asi̍
||26.21||dra̱vi̱ṇo̱dāḥ pi̍pīṣati ju̱hota̱ pra ca̍ tiṣṭhata | ne̱ṣṭrādṛ̱tubhi̍riṣyata
||26.22||tavā̱ya soma̱stvamehya̱rvāḍ śa̍śvatta̱ma su̱manā̍ a̱sya pā̍hi |
a̱smin ya̱jñe ba̱rhiṣyā ni̱ṣadyā̍ dadhi̱ṣvemaṃ ja̱ṭhara̱ indu̍mindra
||26.23||a̱meva̍ naḥ suhavā̱ ā hi ganta̍na̱ ni ba̱rhiṣi̍ sadatanā̱ raṇi̍ṣṭana |
athā̍ mandasva jujuṣā̱ṇo andha̍sa̱stvaṣṭa̍rde̱vebhi̱rjani̍bhiḥ su̱madga̍ṇaḥ
||26.24||svādi̍ṣṭhayā̱ madi̍ṣṭhayā̱ pava̍sva soma̱ dhāra̍yā | indrā̍ya̱ pāta̍ve su̱taḥ
||26.25||ra̱kṣo̱hā vi̱śvaca̍rṣaṇira̱bhi yoni̱mayo̍hate | droṇe̍ sa̱dhastha̱māsa̍dat
||26.26||