Vājasaneyi Madhyandina Saṃhitā — Chapter 2 (34 mantras)

Vājasaneyi Madhyandina Saṃhitā — Chapter 2

---

Mantras

Mantra	First Words
1	kṛṣṇo’syākhareṣṭho’gnaye tvā
2	adityai vyundanamasi
3	gandharvastvā viśvāvasu
4	vītihotra tvā
5	samidasi sūryastvā
6	ghṛtācyasi juhūrnāmnā
7	agne vājajidvāja
8	askannamadya devebhya
9	agne verhotra
10	mayīdamindra indriya
11	upahūto dyauṣpitopa
12	eta te
13	mano jūtirjuṣatāmājyasya
14	eṣā te
15	agnīṣomayorujjitimanūjjeṣa vājasya
16	vasubhyastvā rudrebhyastvā
17	ya paridhi
18	sa sravabhāgā
19	ghṛtācī stho
20	agne’dabdhāyo’śītama pāhi
21	vedo’si yena
22	sabarhiraṅktā haviṣā
23	kastvā vimuñcati
24	sa varcasā
25	divi viṣṇurvyakrasta
26	svayabhūrasi śreṣṭho
27	agne gṛhapate
28	agne vratapate
29	agnaye kavyavāhanāya
30	ye rūpāṇi
31	atra pitaro
32	namo va
33	ādhatta pitaro
34	ūrja vahantīramṛta

---

Mantra 1 {#mantra-1}

Adhyāya: 2 | Mantra: 1

kṛṣṇo̍’syākhare̱ṣṭho’gnaye̍ tvā̱ juṣṭa̱ṃ prokṣā̍mi̱ vedi̍rasi ba̱rhiṣe̍ tvā̱ juṣṭā̱ṃ prokṣā̍mi ba̱rhira̍si sru̱gbhyastvā̱ juṣṭa̱ṃ prokṣā̍mi

---

Mantra 2 {#mantra-2}

Adhyāya: 2 | Mantra: 2

adi̍tyai̱ vyunda̍namasi̱ viṣṇo̍ stu̱po’syūrṇa̍mmradasaṃ tvā stṛṇāmi svāsa̱sthāṃ de̱vebhyo̱ bhuva̍pataye̱ svāhā̱ bhuva̍napataye̱ svāhā̍ bhū̱tānā̱ṃ pata̍ye̱ svāhā̍

---

Mantra 3 {#mantra-3}

Adhyāya: 2 | Mantra: 3

ga̱ndha̱rvastvā̍ vi̱śvāva̍su̱ḥ pari̍dadhātu̱ viśva̱syāri̍ṣṭayai̱ yaja̍mānasya pari̱dhira̍sya̱gniri̱ḍa ī̍ḍi̱taḥ | indra̍sya bā̱hura̍si̱ dakṣi̍ṇo̱ viśva̱syāri̍ṣṭa̱yai̱ yaja̍mānasya pari̱dhira̍sya̱gniri̱ḍa ī̍ḍi̱taḥ| mi̱trāvaru̍ṇau tvottara̱taḥ pari̍dhattāṃ dhru̱veṇa̱ dharma̍ṇā viśva̱syāri̍ṣṭa̱yai̱ yaja̍mānasya pari̱dhira̍sya̱gniri̱ḍa ī̍ḍi̱taḥ

---

Mantra 4 {#mantra-4}

Adhyāya: 2 | Mantra: 4

vī̱tiho̍traṃ tvā kave dyu̱manta sami̍dhīmahi | agne̍ bṛ̱hanta̍madhva̱re

---

Mantra 5 {#mantra-5}

Adhyāya: 2 | Mantra: 5

sa̱mida̍si sūrya̍stvā pu̱rastā̍t pātu̱ kasyā̍ścida̱bhiśa̍styai | savi̱turbā̱hū stha̱ ūrṇa̍mmradasaṃ tvā stṛṇāmi svāsa̱sthaṃ de̱vebhya̱ ā tvā̱ vasa̍vo ru̱drā ā̍di̱tyāḥ sa̍dantu

---

Mantra 6 {#mantra-6}

Adhyāya: 2 | Mantra: 6

ghṛ̱tācya̍si ju̱hūrnāmnā̱ sedaṃ pri̱yeṇa̱ dhāmnā̍ pri̱ya sada̱ āsī̍da ghṛ̱tācya̍syupa̱bhṛnnāmnā̱ sedaṃ pri̱yeṇa̱ dhāmnā̍ pri̱ya sada̱ āsī̍da ghṛ̱tācya̍si dhru̱vā nāmnā̱ sedaṃ pri̱yeṇa̱ dhāmnā̍ pri̱ya sada̱ āsī̍da pri̱yeṇa̱ dhāmnā̍ pri̱ya sada̱ āsī̍da | dhru̱vā a̍sadannṛ̱tasya̱ yonau̱ tā vi̍ṣṇo pāhi pā̱hi ya̱jñaṃ pā̱hi ya̱jñapa̍tiṃ pā̱hi māṃ ya̍jña̱nya̱m

---

Mantra 7 {#mantra-7}

Adhyāya: 2 | Mantra: 7

agne̍ vājaji̱dvāja̍ṃ tvā sari̱ṣyanta̍ṃ vāja̱jita sammā̍rjmi | namo̍ de̱vebhya̍: sva̱dhā pi̱tṛbhya̍: su̱yame̍ me bhūyāsta̱m

---

Mantra 8 {#mantra-8}

Adhyāya: 2 | Mantra: 8

aska̍nnama̱dya de̱vebhya̱ ājya saṃbhri̍yāsa̱maṅ̍ghraṇā viṣṇo̱ mā tvāva̍kramiṣaṃ vasu̍matīmagne te chā̱yāmupa̍stheṣa̱ṃ viṣṇo̱ sthāna̍masīta indro̍ vī̱rya̱makṛṇodū̱rdhvo̍’dhva̱ra āsthā̍t

---

Mantra 9 {#mantra-9}

Adhyāya: 2 | Mantra: 9

agne̱ verho̱traṃ verdū̱tyamava̍tā̱ṃ tvāṃ dyāvā̍pṛthi̱vī ava̱ tvaṃ dyāvā̍pṛthi̱vī svi̍ṣṭa̱kṛdde̱vebhya indra̱ ājye̍na ha̱viṣā̍ bhū̱tsvāhā̱ saṃ jyoti̍ṣā̱ jyoti̍:

---

Mantra 10 {#mantra-10}

Adhyāya: 2 | Mantra: 10

mayī̱damindra̍ indri̱yaṃ da̍dhātva̱smān rāyo̍ ma̱ghavā̍naḥ sacantām | a̱smāka santvā̱śiṣa̍: sa̱tyā na̍: santvā̱śiṣa̱ upa̍hūtā pṛthi̱vī mā̱topa̱ māṃ pṛ̍thi̱vī mā̱tā hva̍yatāma̱gnirāgnī̍dhrā̱tsvāhā̍

---

Mantra 11 {#mantra-11}

Adhyāya: 2 | Mantra: 11

upa̍hūto̱ dyauṣpi̱topa̱ māṃ dyau̍ṣpi̱tā hva̍yatāma̱gnirāgnī̍dhrā̱tsvāhā̍ | de̱vasya̍ tvā savi̱tuḥ pra̍sa̱ve’śvino̍rbā̱hubhyā̍ṃ pū̱ṣṇo hastā̍bhyām | prati̍gṛhṇāmya̱gneṣṭvā̱sye̱na̱ prāśnā̍mi

---

Mantra 12 {#mantra-12}

Adhyāya: 2 | Mantra: 12

e̱taṃ te̍ deva savitarya̱jñaṃ prāhu̱rbṛha̱spata̍ye bra̱hmaṇe̍ | tena̍ ya̱jñama̍va̱ tena̍ ya̱jñapa̍ti̱ṃ tena̱ māma̍va

---

Mantra 13 {#mantra-13}

Adhyāya: 2 | Mantra: 13

mano̍ jū̱tirju̍ṣatā̱mājya̍sya̱ bṛha̱spati̍rya̱jñami̱maṃ ta̍notvari̍ṣṭaṃ ya̱jña sami̱maṃ da̍dhātu | viśve̍ de̱vāsa̍ i̱ha mā̍dayantā̱mo3mprati̍ṣṭha

---

Mantra 14 {#mantra-14}

Adhyāya: 2 | Mantra: 14

e̱ṣā te̍ agne sa̱mittayā̱ vardha̍sva̱ cā ca̍ pyāyasva | va̱rdhi̱ṣī̱mahi̍ ca va̱yamā ca̍ pyāsiṣīmahi | agne̍ vājaji̱dvāja̍ṃ tvā sasṛ̱vāsa̍ṃ vāja̱jita sammā̍rjmi

---

Mantra 15 {#mantra-15}

Adhyāya: 2 | Mantra: 15

a̱gnīṣoma̍yo̱rujji̍ti̱manūjje̍ṣa̱ṃ vāja̍sya mā prasa̱vena̱ prohā̍mi | a̱gnīṣomau̱ tamapa̍nudatā̱ṃ yo’smāndveṣṭi̱ yaṃ ca̍ va̱yaṃ dvi̱ṣmo vāja̍syainaṃ prasa̱venāpo̍hāmi | i̱ndrā̱gnyorujji̍ti̱manūjje̍ṣa̱ṃ vāja̍sya mā prasa̱vena̱ prohā̍mi | i̱ndrā̱gnī tamapa̍nudatā̱ṃ yo’smāndveṣṭi̱ yaṃ ca̍ va̱yaṃ dvi̱ṣmo vāja̍syainaṃ prasa̱venāpo̍hāmi

---

Mantra 16 {#mantra-16}

Adhyāya: 2 | Mantra: 16

vasu̍bhyastvā ru̱drebhya̍stvā ”di̱tyebhya̍stvā̱ saṃjā̍nāthāṃ dyāvāpṛthivī mi̱trāvaru̍ṇau tvā̱ vṛṣṭyā̍vatām | vyantu̱ vayo̱kta rihā̍ṇā ma̱rutā̱ṃ pṛṣatīrgaccha va̱śā pṛśni̍rbhū̱tvā diva̍ṃ gaccha̱ tato̍ no̱ vṛṣṭi̱māva̍ha | ca̱kṣu̱ṣpā a̍gne’si̱ cakṣu̍rme pāhi

---

Mantra 17 {#mantra-17}

Adhyāya: 2 | Mantra: 17

yaṃ pa̍ri̱dhiṃ pa̱ryadha̍tthā̱ agne̍ deva pa̱ṇibhi̍rgu̱hyamā̍naḥ | taṃ ta̍ e̱tamanu̱ joṣa̍ṃ bharāmye̱ṣa nettvada̍pace̱tayā̍tā a̱gneḥ pri̱yaṃ pātho’pī̍tam

---

Mantra 18 {#mantra-18}

Adhyāya: 2 | Mantra: 18

sa̱k sra̱vabhā̍gā sthe̱ṣā bṛ̱hanta̍: prastare̱ṣṭhāḥ pa̍ri̱dheyā̍śca de̱vāḥ | i̱māṃ vāca̍ma̱bhi viśve̍ gṛ̱ṇanta̍ ā̱sadyā̱smin barhiṣi̍ mādayadhva̱ svāhā̱ vāṭ

---

Mantra 19 {#mantra-19}

Adhyāya: 2 | Mantra: 19

ghṛ̱tācī̍ stho̱ dhuryau̍ pāta su̱mne stha̍: su̱mne mā̍ dhattam | yajña̱ nama̍śca ta̱ upa̍ ca ya̱jñasya̍ śi̱ve saṃti̍ṣṭhasva̱ sviṣṭe me̱ saṃti̍ṣṭhasva

---

Mantra 20 {#mantra-20}

Adhyāya: 2 | Mantra: 20

agne̍’dabdhāyo’śītama pā̱hi mā̍ di̱dyoḥ pā̱hi prasi̍tyai pā̱hi duri̍ṣṭayai pā̱hi du̍radma̱nyā a̍vi̱ṣaṃ na̍: pi̱tuṃ kṛ̍ṇu su̱ṣadā̱ yonau̱ svāhā̱ vāḍa̱gnaye̍ saṃve̱śapa̍taye̱ svāhā̱ sara̍svatyai yaśobha̱ginyai̱ svāhā̍

---

Mantra 21 {#mantra-21}

Adhyāya: 2 | Mantra: 21

ve̱do̱’si̱ yena̱ tvaṃ de̍va veda de̱vebhyo̍ ve̱do’bha̍va̱stena̱ mahya̍ṃ ve̱do bhū̍yāḥ | devā̍ gātuvido gā̱tuṃ vi̱ttvā gā̱tumi̍ta | mana̍saspata i̱maṃ de̍va ya̱jña svāhā̱ vāte̍ dhāḥ

---

Mantra 22 {#mantra-22}

Adhyāya: 2 | Mantra: 22

saṃba̱rhira̍ṅktā ha̱viṣā̍ ghṛ̱tena̱ samā̍di̱tyairvasu̍bhi̱: samma̱rudbhi̍: | samindro̍ vi̱śvade̍vebhiraṅktāṃ di̱vyaṃ nabho̍ gacchatu̱ yat svāhā̍

---

Mantra 23 {#mantra-23}

Adhyāya: 2 | Mantra: 23

kastvā̱ vimu̍ñcati̱ sa tvā̱ vimu̍ñcati̱ kasmai̍ tvā̱ vimu̍ñcati̱ tasmai̍ tvā̱ vimu̍ñcati | poṣā̍ya̱ rakṣa̍sāṃ bhā̱go̱’si

---

Mantra 24 {#mantra-24}

Adhyāya: 2 | Mantra: 24

saṃ varca̍sā̱ paya̍sā̱ saṃ ta̱nūbhi̱raga̍nmahi̱ mana̍sā̱ sa śi̱vena̍ | tvaṣṭā̍ su̱datro̱ vida̍dhātu̱ rāyo’nu̍mārṣṭu ta̱nvo yadvili̍ṣṭam

---

Mantra 25 {#mantra-25}

Adhyāya: 2 | Mantra: 25

di̱vi viṣṇu̱rvya̱krasta̱ jāga̍tena̱ chanda̍sā̱ tato̱ nirbha̍kto̱ yo’smāndveṣṭi̱ yaṃ ca̍ va̱yaṃ dvi̱ṣmo’ntari̍kṣe̱ viṣṇu̱rvya̱krasta̱ traiṣṭu̍bhena̱ chanda̍sā̱ tato̱ nirbha̍kto̱ yo’smāndveṣṭi̱ yaṃ ca̍ va̱yaṃ dvi̱ṣmaḥ pṛ̍thi̱vyāṃ viṣṇu̱rvya̱krasta gāya̱treṇa̱ chanda̍sā̱ tato̱ nirbha̍kto̱ yo’smāndveṣṭi̱ yaṃ ca̍ va̱yaṃ dvi̱ṣmo’smādannā̍ da̱syai pra̍ti̱ṣṭhāyā̱ aga̍nma̱ svaḥ saṃ jyoti̍ṣābhūma

---

Mantra 26 {#mantra-26}

Adhyāya: 2 | Mantra: 26

sva̱ya̱ṃbhūra̍si̱ śreṣṭho̍ ra̱śmirva̍rco̱dā a̍si̱ varco̍ me dehi | sūrya̍syā̱vṛta̱manvāva̍rte

---

Mantra 27 {#mantra-27}

Adhyāya: 2 | Mantra: 27

agne̍ gṛhapate sugṛhapa̱tistvayā̍gne̱’haṃ gṛ̱hapa̍tinā bhūyāsa sugṛhapa̱tistvaṃ mayā̍’gne gṛ̱hapa̍tinā bhūyāḥ | a̱sthū̱ri ṇau̱ gārha̍patyāni santu śa̱ta himā̱: sūrya̍syā̱vṛta̱manvāva̍rte

---

Mantra 28 {#mantra-28}

Adhyāya: 2 | Mantra: 28

agne̍ vratapate vra̱tama̍cāriṣa̱ṃ tada̍śaka̱ṃ tanme̍’rādhī̱dama̱haṃ ya e̱vāsmi̱ so̱’smi

---

Mantra 29 {#mantra-29}

Adhyāya: 2 | Mantra: 29

a̱gnaye̍ kavya̱vāha̍nāya̱ svāhā̱ somā̍ya pitṛ̱mate̱ svāhā̍ | apa̍hatā̱ asu̍rā̱ rakṣā̍m̐si vedi̱ṣada̍:

---

Mantra 30 {#mantra-30}

Adhyāya: 2 | Mantra: 30

ye rū̱pāṇi̍ pratimu̱ñcamā̍nā̱ asu̍rā̱ḥ santa̍: sva̱dhayā̱ cara̍nti | pa̱rā̱puro̍ ni̱puro̱ ye bhara̍ntya̱gniṣṭāllo̱kātpraṇu̍dātya̱smāt

---

Mantra 31 {#mantra-31}

Adhyāya: 2 | Mantra: 31

atra̍ pitaro mādayadhvaṃ yathābhā̱gamāvṛ̍ṣāyadhvam | amī̍madanta pi̱taro̍ yathābhā̱gamāvṛ̍ṣāyiṣata

---

Mantra 32 {#mantra-32}

Adhyāya: 2 | Mantra: 32

namo̍ vaḥ pitaro̱ rasā̍ya̱ namo̍ vaḥ pitara̱: śoṣā̍ya̱ namo̍ vaḥ pitaro jī̱vāya̱ namo̍ vaḥ pitaraḥ sva̱dhāyai̱ namo̍ vaḥ pitaro gho̱rāya̱ namo̍ vaḥ pitaro ma̱nyave̱ namo̍ vaḥ pitara̱: pita̍ro̱ namo̍ vo gṛ̱hānna̍: pitaro datta sa̱to va̍: pitaro deṣmai̱tadva̍: pitaro̱ vāsa̱ ādha̍tta

---

Mantra 33 {#mantra-33}

Adhyāya: 2 | Mantra: 33

ādha̍tta pitaro̱ garbha̍ṃ kumā̱raṃ puṣka̍rasrajam | yathe̱ha puru̱ṣo’sa̍t

---

Mantra 34 {#mantra-34}

Adhyāya: 2 | Mantra: 34

ūrja̱ṃ vaha̍ntīra̱mṛta̍ṃ ghṛ̱taṃ paya̍: kī̱lāla̍ṃ pari̱sruta̍m | sva̱dhā stha̍ ta̱rpaya̍ta me pi̱tṝn

---