Vājasaneyi Madhyandina Saṃhitā — Chapter 10 (34 mantras)

Vājasaneyi Madhyandina Saṃhitā — Chapter 10

a̱po de̱vā madhu̍matīragṛbhṇa̱nnūrja̍svatī rāja̱svaścitā̍nāḥ |

---

Mantras

Mantra	First Words
1	yābhirmitrāvaruṇāvabhyaṣiñcanyābhirindramanayannatyarātī
2	vṛṣṇa ūrmirasi
3	artheta stha
4	sūryatvacasa stha
5	somasya tviṣirasi
6	pavitre stho
7	sadhamādo dyumninīrāpa
8	kṣatrasyolbamasi kṣatrasya
9	āvirmayā āvitto
10	aveṣṭā dandaśūkā
11	dakṣiṇāmā roha
12	pratīcīmā roha
13	udīcīmā rohānuṣṭup
14	ūrdhvāmā roha
15	somasya tviṣirasi
16	hiraṇyarūpā uṣaso
17	somasya tvā
18	ima devā
19	pra parvatasya
20	prajāpate na
21	indrasya vajro’si
22	mā ta
23	agnaye gṛhapataye
24	hasa śuciṣadvasurantarikṣasaddhotā
25	iyadasyāyurasyāyurmayi dhehi
26	syonā’si suṣadā’si
27	ni ṣasāda
28	abhibhūrasyetāste pañca
29	agni pṛthurdharmaṇaspatirjuṣāṇo
30	savitrā prasavitrā
31	aśvibhyā pacyasva
32	kuvidaṅga yavamanto
33	yuva surāmamaśvinā
34	putramiva pitarāvaśvinobhendrāvathu

---

Mantra 1 {#mantra-1}

Adhyāya: 10 | Mantra: 1

yābhi̍rmi̱trāvaru̍ṇāva̱bhyaṣi̍ñca̱nyābhi̱rindra̱mana̍ya̱nnatyarā̍tīḥ

---

Mantra 2 {#mantra-2}

Adhyāya: 10 | Mantra: 2

vṛṣṇa̍ ū̱rmira̍si rāṣṭra̱dā rā̱ṣṭraṃ me̍ dehi̱ svāhā̱ vṛṣṇa̍ ū̱rmira̍si rāṣṭra̱dā rā̱ṣṭrama̱muṣmai̍ dehi vṛ̍ṣase̱no̱’si rāṣṭra̱dā rā̱ṣṭraṃ me̍ dehi̱ svāhā̍ vṛṣase̱no̱’si rāṣṭra̱dā rā̱ṣṭrama̱muṣmai̍ dehi

---

Mantra 3 {#mantra-3}

Adhyāya: 10 | Mantra: 3

a̱rtheta̍ stha rāṣṭra̱dā rā̱ṣṭraṃ me̍ datta̱ svāhā̱ ‘rtheta̍ stha rāṣṭra̱dā rā̱ṣṭrama̱muṣmai̍ da̱ttauja̍svatī stha rāṣṭra̱dā rā̱ṣṭraṃ me̍ datta̱ svāhauja̍svatī stha rāṣṭra̱dā rā̱ṣṭrama̱muṣmai̍ da̱ttāpa̍: parivā̱hiṇī̍ stha rāṣṭra̱dā rā̱ṣṭraṃ me̍ datta̱ svāhā̍ ‘pa̍: parivā̱hiṇī̍ stha rāṣṭra̱dā rā̱ṣṭrama̱muṣmai̍ dattā̱pāṃ pati̍rasi rāṣṭra̱dā rā̱ṣṭraṃ me̍ dehi̱ svāhā̱ ‘pāṃ pati̍rasi rāṣṭra̱dā rā̱ṣṭrama̱muṣmai̍ dehya̱pāṃ garbho̍’si rāṣṭra̱dā rā̱ṣṭraṃ me̍ dehi̱ svāhā̱ ‘pāṃ garbho̍ si rāṣṭra̱dā rā̱ṣṭrama̱muṣmai̍ dehi̱

---

Mantra 4 {#mantra-4}

Adhyāya: 10 | Mantra: 4

sūrya̍tvacasa stha rāṣṭra̱dā rā̱ṣṭraṃ me̍ datta̱ svāhā̱ sūrya̍tvacasa stha rāṣṭra̱dā rā̱ṣṭrama̱muṣmai̍ datta sūrya̍varcasa stha rāṣṭra̱dā rā̱ṣṭraṃ me̍ datta̱ svāhā̱ sūrya̍varcasa stha rāṣṭra̱dā rā̱ṣṭrama̱muṣmai̍ datta̱ māndā̍ stha rāṣṭra̱dā rā̱ṣṭraṃ me̍ datta̱ svāhā̱ māndā̍ stha rāṣṭra̱dā rā̱ṣṭrama̱muṣmai̍ datta vraja̱kṣita̍ stha rāṣṭra̱dā rā̱ṣṭraṃ me̍ datta̱ svāhā̍ vraja̱kṣita̍ stha rāṣṭra̱dā rā̱ṣṭrama̱muṣmai̍ datta̱ vāśā̍ stha rāṣṭra̱dā rā̱ṣṭraṃ me̍ datta̱ svāhā̱ vāśā̍ stha rāṣṭra̱dā rā̱ṣṭrama̱muṣmai̍ datta̱ śavi̍ṣṭhā stha rāṣṭra̱dā rā̱ṣṭraṃ me̍ datta̱ svāhā̱ śavi̍ṣṭhā stha rāṣṭra̱dā rā̱ṣṭrama̱muṣmai̍ datta̱ śakva̍rī stha rāṣṭra̱dā rā̱ṣṭraṃ me̍ datta̱ svāhā̱ śakva̍rī stha rāṣṭra̱dā rā̱ṣṭrama̱muṣmai̍ datta jana̱bhṛta̍ stha rāṣṭra̱dā rā̱ṣṭraṃ me̍ datta̱ svāhā̍ jana̱bhṛta̍ stha rāṣṭra̱dā rā̱ṣṭrama̱muṣmai̍ datta viśva̱bhṛta̍ stha rāṣṭra̱dā rā̱ṣṭraṃ me̍ datta̱ svāhā̍ viśva̱bhṛta̍ stha rāṣṭra̱dā rā̱ṣṭrama̱muṣmai̍ da̱ttāpa̍: sva̱rāja̍ stha rāṣṭra̱dā rā̱ṣṭrama̱muṣmai̍ datta | madhu̍matī̱rmadhu̍matībhiḥ pṛcyantā̱ṃ mahi̍ kṣa̱traṃ kṣa̱triyā̍ya vanvā̱nāṃnā̍dhṛṣṭāḥ sīdata sa̱hauja̍so̱ mahi̍ kṣa̱traṃ kṣa̱triyā̍ya̱ dadha̍tīḥ

---

Mantra 5 {#mantra-5}

Adhyāya: 10 | Mantra: 5

soma̍sya̱ tviṣi̍rasi̱ tave̍va me̱ tviṣi̍rbhūyāt | a̱gnaye̱ svāhā̱ somā̍ya̱ svāhā̍ savi̱tre svāhā̱ sara̍svatyai̱ svāhā̍ pū̱ṣṇe svāhā̱ bṛha̱spata̍ye̱ svāhendrā̍ya̱ svāhā̱ ghoṣā̍ya̱ svāhā̱ ślokā̍ya̱ svāhā ‘śā̍ya̱ svāhā̱ bhagā̍ya̱ svāhā̍ ‘rya̱mṇe svāhā̍

---

Mantra 6 {#mantra-6}

Adhyāya: 10 | Mantra: 6

pa̱vitre̍ stho vaiṣṇa̱vyau̱ savi̱turva̍: prasa̱va utpu̍nā̱myacchi̍dreṇa pa̱vitre̍ṇa̱ sūrya̍sya ra̱śmibhi̍: | ani̍bhṛṣṭamasi vā̱co bandhu̍stapo̱jāḥ soma̍sya dā̱trama̍si̱ svāhā̍ rāja̱sva̱:

---

Mantra 7 {#mantra-7}

Adhyāya: 10 | Mantra: 7

sa̱dha̱mādo̍ dyu̱mninī̱rāpa̍ e̱tā anā̍dhṛṣṭā apa̱syo vasā̍nāḥ | pa̱styā̱su cakre̱ varu̍ṇaḥ sa̱dhastha̍ma̱pā śiśu̍rmā̱tṛta̍māsva̱ntaḥ

---

Mantra 8 {#mantra-8}

Adhyāya: 10 | Mantra: 8

kṣa̱trasyolba̍masi kṣa̱trasya̍ ja̱rāyva̍si kṣa̱trasya̱ yoni̍rasi kṣa̱trasya̱ nābhi̍ra̱sīndra̍sya̱ vārtra̍ghnamasi mi̱trasyā̍si̱ varu̍ṇasyāsi̱ tvayā̱’yaṃ vṛ̱traṃ ba̍dhet | dṛ̱bā’si̍ ru̱jā’si̍ kṣu̱mā’si̍ | pā̱taina̱ṃ prāñca̍ṃ pā̱tainaṃ pra̱tyañca̍ṃ pā̱taina̍ṃ ti̱ryañca̍ṃ di̱gbhyaḥ pā̍ta

---

Mantra 9 {#mantra-9}

Adhyāya: 10 | Mantra: 9

ā̱virma̍yā̱ āvi̍tto a̱gnirgṛ̱hapa̍tirāvi̍tta̱ indro̍ vṛ̱ddhaśra̍vā̱ āvi̍ttau mi̱trāvaru̍ṇau dhṛ̱tavra̍tā̱vāvi̍ttaḥ pū̱ṣā vi̱śvave̍dā̱ āvi̍tte̱ dyāvā̍pṛthi̱vī vi̱śvaśa̍mbhuvā̱vāvi̱ttādi̍tiru̱ruśa̍rmā

---

Mantra 10 {#mantra-10}

Adhyāya: 10 | Mantra: 10

ave̍ṣṭā danda̱śūkā̍: prācī̱mā ro̍ha gāya̱trī tvā̍’vatu rathanta̱ra sāma̍ tri̱vṛtstomo̍ vasa̱nta ṛ̱turbrahma̱ dravi̍ṇam

---

Mantra 11 {#mantra-11}

Adhyāya: 10 | Mantra: 11

dakṣi̍ṇā̱mā ro̍ha tri̱ṣṭup tvā̍’vatu bṛ̱hatsāma̍ pañcada̱śa stomo̍ grī̱ṣma ṛ̱tuḥ kṣa̱traṃ dravi̍ṇam

---

Mantra 12 {#mantra-12}

Adhyāya: 10 | Mantra: 12

pra̱tīcī̱mā ro̍ha̱ jaga̍tī tvā’vatu vairū̱pa sāma̍ saptada̱śa stomo̍ va̱rṣā ṛ̱turviḍ dravi̍ṇam

---

Mantra 13 {#mantra-13}

Adhyāya: 10 | Mantra: 13

udī̍cī̱mā ro̍hānu̱ṣṭup tvā̍’vatu vairā̱ja sāmai̍kaviśa stoma̍: śa̱radṛ̱tuḥ phala̱ṃ dravi̍ṇam

---

Mantra 14 {#mantra-14}

Adhyāya: 10 | Mantra: 14

ū̱rdhvāmā ro̍ha pa̱ṅktistvā̍’vatu śākvararaiva̱te sāma̍nī triṇavatrayastriśau̱ stomau̍ hemantaśiśi̱rāvṛ̱tū varco̱ dravi̍ṇa̱ṃ pratya̍sta̱ṃ namu̍ce̱: śira̍:

---

Mantra 15 {#mantra-15}

Adhyāya: 10 | Mantra: 15

soma̍sya̱ tviṣi̍rasi̱ tave̍va me̱ tviṣi̍rbhūyāt | mṛ̱tyoḥ pā̱hyojo̍’si̱ saho̍’sya̱mṛta̍masi

---

Mantra 16 {#mantra-16}

Adhyāya: 10 | Mantra: 16

hira̍ṇyarūpā u̱ṣaso̍ viro̱ka u̱bhāvi̍ndrā̱ udi̍tha̱: sūrya̍śca | ā ro̍hataṃ varuṇa mitra̱ gartta̱ṃ tata̍ścakṣāthā̱madi̍ti̱ṃ diti̍ṃ ca mi̱tro̱’si̱ varu̍ṇo’si

---

Mantra 17 {#mantra-17}

Adhyāya: 10 | Mantra: 17

soma̍sya tvā dyu̱mnenā̱bhi ṣi̍ñcāmya̱gnerbhrāja̍sā̱ sūrya̍sya̱ varca̱sendra̍syendri̱yeṇa̍ | kṣa̱trāṇā̍ṃ kṣa̱trapa̍tire̱dhyati̍ di̱dyūn pā̍hi

---

Mantra 18 {#mantra-18}

Adhyāya: 10 | Mantra: 18

i̱maṃ de̍vā asapa̱tna su̍vadhvaṃ maha̱te kṣa̱trāya̍ maha̱te jyai̍ṣṭhyāya maha̱te jāna̍rājyā̱yendra̍syendri̱yāya̍ | i̱mama̱muṣya̍ pu̱trama̱muṣyai̍ pu̱tramasyai vi̱śa e̱ṣa vo̍’mī̱ rājā̱ somo̱’smāka̍ṃ brāhma̱ṇānārājā̍

---

Mantra 19 {#mantra-19}

Adhyāya: 10 | Mantra: 19

pra parva̍tasya vṛṣa̱bhasya̍ pṛ̱ṣṭhānnāva̍ścaranti sva̱sica̍ iyā̱nāḥ | tā ā’va̍vṛtrannadha̱rāguda̍ktā̱ ahi̍ṃ bu̱dhnya̱manu̱ rīya̍māṇāḥ | viṣṇo̍rvi̱krama̍ṇamasi̱ viṣṇo̱rvikrā̍ntamasi̱ viṣṇo̍: krā̱ntama̍si

---

Mantra 20 {#mantra-20}

Adhyāya: 10 | Mantra: 20

prajā̍pate̱ na tvade̱tānya̱nyo viśvā̍ rū̱pāṇi̱ pari̱ tā ba̍bhūva | yatkā̍māste juhu̱mastanno̍ astva̱yama̱muṣya̍ pi̱tāsāva̱sya pi̱tā va̱ya syā̍ma̱ pata̍yo rayī̱ṇā svāhā̍ | rudra̱ yatte̱ krivi̱ para̱ṃ nāma̱ tasmi̍nhu̱tama̍syame̱ṣṭama̍si̱ svāhā̍

---

Mantra 21 {#mantra-21}

Adhyāya: 10 | Mantra: 21

indra̍sya̱ vajro̍’si mi̱trāvaru̍ṇayostvā praśā̱stroḥ pra̱śiṣā̍ yunajmi | avya̍thāyai tvā sva̱dhāyai̱ tvā’ri̍ṣṭo̱ arju̍no ma̱rutā̍ṃ prasa̱vena̍ ja̱yāpā̍ma̱ mana̍sā̱ sami̍ndri̱yeṇa̍

---

Mantra 22 {#mantra-22}

Adhyāya: 10 | Mantra: 22

mā ta̍ indra te va̱yaṃ tu̍rāṣā̱ḍayu̍ktāso abra̱hmatā̱ vida̍sāma | tiṣṭhā̱ ratha̱madhi̱ yaṃ va̍jraha̱stā ra̱śmīn de̍va yuvase̱ svaśvā̍n

---

Mantra 23 {#mantra-23}

Adhyāya: 10 | Mantra: 23

a̱gnaye̍ gṛ̱hapa̍taye̱ svāhā̱ somā̍ya̱ vana̱spata̍ye̱ svāhā̍ ma̱rutā̱moja̍se̱ svāhendra̍syendri̱yāya̱ svāhā̍ | pṛthi̍vi māta̱rmā mā̍ hisī̱rmo a̱haṃ tvām

---

Mantra 24 {#mantra-24}

Adhyāya: 10 | Mantra: 24

hasaḥ śu̍ci̱ṣadvasu̍rantarikṣa̱saddhotā̍ vedi̱ṣadati̍thirduroṇa̱sat | nṛ̱ṣadva̍ra̱sadṛ̍ta̱sadvyo̍ma̱sada̱bjā go̱jā ṛ̍ta̱jā a̍dri̱jā ṛ̱taṃ bṛ̱hat

---

Mantra 25 {#mantra-25}

Adhyāya: 10 | Mantra: 25

iya̍da̱syāyu̍ra̱syāyu̱rmayi̍ dhehi̱ yuṅṅa̍si̱ varco̍’si̱ varco̱ mayi̍ dhe̱hyūrga̱syūrja̱ṃ mayi̍ dhehi || indra̍sya vāṃ vīrya̱kṛto̍ bā̱hū a̍bhyu̱pāva̍harāmi

---

Mantra 26 {#mantra-26}

Adhyāya: 10 | Mantra: 26

syo̱nā’si̍ su̱ṣadā̍’si kṣa̱trasya̱ yoni̍rasi | syo̱nāmā sī̍da su̱ṣadā̱mā sī̍da kṣa̱trasya̱ yoni̱mā sī̍da

---

Mantra 27 {#mantra-27}

Adhyāya: 10 | Mantra: 27

ni ṣa̍sāda ghṛ̱tavra̍to̱ varu̍ṇaḥ pa̱styāsvā | sāmrā̍jyāya su̱kratu̍:

---

Mantra 28 {#mantra-28}

Adhyāya: 10 | Mantra: 28

a̱bhi̱bhūra̍sye̱tāste̱ pañca̱ diśa̍: kalpantā̱ṃ brahma̱m̐stvaṃ bra̱hmā’si̍ savi̱tā’si̍ sa̱tyapra̍savo̱ varu̍ṇo’si sa̱tyaujā̱ indro̍’si̱ viśau̍jā ru̱dro̱’si su̱śeva̍: | bahu̍kāra̱ śreya̍skara̱ bhūya̍ska̱rendra̍sya̱ vajro̍’si̱ tena̍ me radhya

---

Mantra 29 {#mantra-29}

Adhyāya: 10 | Mantra: 29

a̱gniḥ pṛ̱thurdharma̍ṇa̱spati̍rjuṣā̱ṇo a̱gniḥ pṛ̱thurdharma̍ṇa̱spati̱rājya̍sya vetu̱ svāhā̍ svāhā̍kṛtā̱: sūrya̍sya ra̱śmibhi̍ryatadhva sajā̱tānā̍ṃ madhya̱meṣṭhyā̍ya

---

Mantra 30 {#mantra-30}

Adhyāya: 10 | Mantra: 30

sa̱vi̱trā pra̍savi̱trā sara̍svatyā vā̱cā tvaṣṭrā̍ rū̱paiḥ pū̱ṣṇā pa̱śubhi̱rindre̍ṇā̱sme bṛha̱spati̍nā̱ brahma̍ṇā̱ varu̍ṇe̱nauja̍sā̱’gninā̱ teja̍sā̱ some̍na̱ rājñā̱ viṣṇu̍nā daśa̱myā de̱vata̍yā̱ prasū̍ta̱: pra sa̍rpāmi

---

Mantra 31 {#mantra-31}

Adhyāya: 10 | Mantra: 31

a̱śvibhyā̍ṃ pacyasva̱ sara̍svatyai pacya̱svendrā̍ya su̱trāmṇe̍ pacyasva | vā̱yuḥ pū̱taḥ pa̱vitre̍ṇa pra̱tyaṅksomo̱ ati̍srutaḥ | indra̍sya̱ yujya̱: sakhā̍

---

Mantra 32 {#mantra-32}

Adhyāya: 10 | Mantra: 32

ku̱vida̱ṅga yava̍manto yava̍ṃ ci̱dyathā̱ dāntya̍nupū̱rvaṃ vi̱yūya̍ | i̱hehai̍ṣāṃ kṛṇuhi̱ bhoja̍nāni̱ ye ba̱rhiṣo̱ nama̍ ukti̱ṃ yaja̍nti | u̱pa̱yā̱magṛ̍hīto’sya̱śvibhyā̍ṃ tvā̱ sara̍svatyai̱ tvendrā̍ya tvā su̱trāmṇe̍

---

Mantra 33 {#mantra-33}

Adhyāya: 10 | Mantra: 33

yu̱va su̱rāma̍maśvinā̱ namu̍cāvāsu̱re sacā̍ | vi̱pi̱pā̱nā śu̍bhaspatī̱ indra̱ṃ karma̍svāvatam

---

Mantra 34 {#mantra-34}

Adhyāya: 10 | Mantra: 34

pu̱trami̍va pi̱tarā̍va̱śvino̱bhendrā̱vathu̱: kāvyai̍rdasanā̍bhiḥ | yatsu̱rāma̱ṃ vyapi̍ba̱: śacī̍bhi̱: sara̍svatī tvā maghavannabhiṣṇak

---