edama̍ganma deva̱yaja̍naṃ pṛthi̱vyā yatra̍ de̱vāso̱ aju̍ṣanta̱ viśve̍ | ṛ̱ksā̱mābhyā sa̱ṃtara̍nto̱ yaju̍rbhī rā̱yaspoṣe̍ṇa̱ sami̱ṣā ma̍dema | i̱mā āpa̱: śamu̍ me santu de̱vī roṣa̍dhe̱ trāya̍sva̱ svadhi̍te maina hisīḥ
||4.1||एदम॑गन्म देव॒यज॑नं पृथि॒व्या यत्र॑ दे॒वासो॒ अजु॑षन्त॒ विश्वे॑ । ऋ॒क्सा॒माभ्या॑ᳪ सं॒तर॑न्तो॒ यजु॑र्भी रा॒यस्पोषे॑ण॒ समि॒षा म॑देम । इ॒मा आप॒: शमु॑ मे सन्तु दे॒वी रोष॑धे॒ त्राय॑स्व॒ स्वधि॑ते मैन॑ᳪ हिᳪसीः
āpo̍ a̱smānmā̱tara̍: śundhayantu ghṛ̱tena̍ no ghṛta̱pva̱: punantu |
viśva̱j hi ri̱praṃ pra̱vaha̍nti de̱vīrudidā̍bhya̱: śuci̱rā pū̱ta e̍mi |
dī̱kṣā̱ta̱paso̍sta̱nūra̍si̱ tāṃ tvā̍ śi̱vā śa̱gmāṃ pari̍ dadhe bha̱draṃ varṇa̱ṃ puṣya̍n
||4.2||आपो॑ अ॒स्मान्मा॒तर॑: शुन्धयन्तु घृ॒तेन॑ नो घृत॒प्व॒: पुनन्तु ।
विश्व॒j हि रि॒प्रं प्र॒वह॑न्ति दे॒वीरुदिदा॑भ्य॒: शुचि॒रा पू॒त ए॑मि ।
दी॒क्षा॒त॒पसो॑स्त॒नूर॑सि॒ तां त्वा॑ शि॒वाᳪ श॒ग्मां परि॑ दधे भ॒द्रं वर्णं॒ पुष्य॑न्
ma̱hīnā̱ṃ payo̍'si varco̱dā a̍si̱ varco̍ me dehi | vṛ̱trasyā̍si ka̱nīna̍kaścakṣu̱rdā a̍si̱ cakṣu̍rme dehi
||4.3||म॒हीनां॒ पयो॑ऽसि वर्चो॒दा अ॑सि॒ वर्चो॑ मे देहि । वृ॒त्रस्या॑सि क॒नीन॑कश्चक्षु॒र्दा अ॑सि॒ चक्षु॑र्मे देहि
ci̱tpati̍rmā punātu vā̱kpati̍rmā punātu de̱vo mā̍ savi̱tā pu̍nā̱tvacchi̍dreṇa pa̱vitre̍ṇa̱ sūrya̍sya ra̱śmibhi̍: |
tasya̍ te pavitrapate pa̱vitra̍pūtasya̱ yatkā̍maḥ pu̱ne taccha̍keyam
||4.4||चि॒त्पति॑र्मा पुनातु वा॒क्पति॑र्मा पुनातु दे॒वो मा॑ सवि॒ता पु॑ना॒त्वच्छि॑द्रेण प॒वित्रे॑ण॒ सूर्य॑स्य र॒श्मिभि॑: ।
तस्य॑ ते पवित्रपते प॒वित्र॑पूतस्य॒ यत्का॑मः पु॒ने तच्छ॑केयम्
ā vo̍ devāsa īmahe vā̱maṃ pra̍ya̱tya̱dhva̱re | ā vo̍ devāsa ā̱śiṣo̍ ya̱jñiyā̍so havāmahe
||4.5||आ वो॑ देवास ईमहे वा॒मं प्र॑य॒त्य॒ध्व॒रे । आ वो॑ देवास आ॒शिषो॑ य॒ज्ञिया॑सो हवामहे
svāhā̍ ya̱jñaṃ mana̍sa̱: svāho̱rora̱ntari̍kṣā̱tsvāhā̱ dyāvā̍pṛthi̱vībhyā̱j svāhā̱ vātā̱dāra̍bhe̱ svāhā̍
||4.6||स्वाहा॑ य॒ज्ञं मन॑स॒: स्वाहो॒रोर॒न्तरि॑क्षा॒त्स्वाहा॒ द्यावा॑पृथि॒वीभ्या॒j स्वाहा॒ वाता॒दार॑भे॒ स्वाहा॑
ākū̍tyai pra̱yuje̱'gnaye̱ svāhā̍ me̱dhāyai̱ mana̍se̱'gnaye̱ svāhā̍ dī̱kṣāyai̱ tapa̍se̱'gnaye̱ svāhā̍ sara̍svatyai pū̱ṣṇe'gnaye̱ svāhā̍ |āpo̍ devīrbṛhatīrviśvaśambhuvo̱ dyāvā̍pṛthivī̱ uro̍ antarikṣa | bṛha̱spata̍ye ha̱viṣā̍ vidhema̱ svāhā̍
||4.7||आकू॑त्यै प्र॒युजे॒ऽग्नये॒ स्वाहा॑ मे॒धायै॒ मन॑से॒ऽग्नये॒ स्वाहा॑ दी॒क्षायै॒ तप॑से॒ऽग्नये॒ स्वाहा॑ सर॑स्वत्यै पू॒ष्णेऽग्नये॒ स्वाहा॑ ।आपो॑ देवीर्बृहतीर्विश्वशम्भुवो॒ द्यावा॑पृथिवी॒ उरो॑ अन्तरिक्ष । बृह॒स्पत॑ये ह॒विषा॑ विधेम॒ स्वाहा॑
viśvo̍ de̱vasya̍ ne̱turmarto̍ vurīta sa̱khyam | viśvo̍ rā̱ya i̍ṣudhyati dyu̱mnaṃ vṛ̍ṇīta pu̱ṣyase̱ svāhā̍
||4.8||विश्वो॑ दे॒वस्य॑ ने॒तुर्मर्तो॑ वुरीत स॒ख्यम् । विश्वो॑ रा॒य इ॑षुध्यति द्यु॒म्नं वृ॑णीत पु॒ष्यसे॒ स्वाहा॑
ṛ̍ksā̱mayo̱ḥ śilpe̍ stha̱ste vā̱māra̍bhe̱ te mā̍ pāta̱māsya ya̱jñasyo̱dṛca̍: |
śarmā̍si̱ śarma̍ me yaccha̱ nama̍ste astu̱ mā mā̍ hisīḥ
||4.9||ऋ॑क्सा॒मयोः॒ शिल्पे॑ स्थ॒स्ते वा॒मार॑भे॒ ते मा॑ पात॒मास्य य॒ज्ञस्यो॒दृच॑: ।
शर्मा॑सि॒ शर्म॑ मे यच्छ॒ नम॑स्ते अस्तु॒ मा मा॑ हिᳪसीः
ūrga̍syāṅgira̱syūrṇa̍mmradā̱ ūrja̱ṃ mayi̍ dhehi |
soma̍sya nī̱vira̍si̱ viṣṇo̱: śarmā̍si̱ śarma̱ yaja̍mānasyendra̍sya̱ yoni̍rasi su̍sa̱syāḥ kṛ̱ṣīskṛ̍dhi |
ucchra̍yasva vanaspata ū̱rdhvo mā̍ pā̱hyaha̍sa̱ āsya ya̱jñasyo̱draca̍:
||4.10||ऊर्ग॑स्याङ्गिर॒स्यूर्ण॑म्म्रदा॒ ऊर्जं॒ मयि॑ धेहि ।
सोम॑स्य नी॒विर॑सि॒ विष्णो॒: शर्मा॑सि॒ शर्म॒ यज॑मानस्येन्द्र॑स्य॒ योनि॑रसि सु॑स॒स्याः कृ॒षीस्कृ॑धि ।
उच्छ्र॑यस्व वनस्पत ऊ॒र्ध्वो मा॑ पा॒ह्यᳪह॑स॒ आस्य य॒ज्ञस्यो॒द्रच॑:
vra̱taṃ kṛ̍ṇutā̱gnirbrahmā̱gnirya̱jño vana̱spati̍rya̱jñiya̍: |
daivī̱ṃ dhiya̍ṃ manāmahe sumṛḍī̱kāma̱bhiṣṭa̍ye varco̱dhāṃ ya̱jñavā̍hasa sutī̱rthā no̍ asa̱dvaśe̍ |
ye de̱vā mano̍jātā mano̱yujo̱ dakṣa̍kratava̱ste no̍'vantu̱ te na̍: pāntu̱ tebhya̱: svāhā̍
||4.11||व्र॒तं कृ॑णुता॒ग्निर्ब्रह्मा॒ग्निर्य॒ज्ञो वन॒स्पति॑र्य॒ज्ञिय॑: ।
दैवीं॒ धियं॑ मनामहे सुमृडी॒काम॒भिष्ट॑ये वर्चो॒धां य॒ज्ञवा॑हसᳪ सुती॒र्था नो॑ अस॒द्वशे॑ ।
ये दे॒वा मनो॑जाता मनो॒युजो॒ दक्ष॑क्रतव॒स्ते नो॑ऽवन्तु॒ ते न॑: पान्तु॒ तेभ्य॒: स्वाहा॑
śvā̱trāḥ pī̱tā bha̍vata yū̱yamā̍po a̱smāka̍ma̱ntaru̱dare̍ su̱śevā̍:|
tā a̱smabhya̍maya̱kṣmā a̍namī̱vā anā̍gasa̱: svada̍ntu de̱vīra̱mṛtā̍ ṛtā̱vṛdha̍:
||4.12||श्वा॒त्राः पी॒ता भ॑वत यू॒यमा॑पो अ॒स्माक॑म॒न्तरु॒दरे॑ सु॒शेवा॑:।
ता अ॒स्मभ्य॑मय॒क्ष्मा अ॑नमी॒वा अना॑गस॒: स्वद॑न्तु दे॒वीर॒मृता॑ ऋता॒वृध॑:
i̱yaṃ te̍ ya̱jñiyā̍ ta̱nūra̱po mu̍ñcāmi̱ na pra̱jām | a̱jho̱muca̱ḥ svāhā̍kṛtāḥ pṛthi̱vīmā vi̍śata
pṛthi̱vyā sambha̍va
||4.13||इ॒यं ते॑ य॒ज्ञिया॑ त॒नूर॒पो मु॑ञ्चामि॒ न प्र॒जाम् । अ॒jहो॒मुचः॒ स्वाहा॑कृताः पृथि॒वीमा वि॑शत
पृथि॒व्या सम्भ॑व
agne̱ tva su jā̍gṛhi va̱ya su ma̍ndiṣīmahi | rakṣā̍ ṇo̱ apra̍yucchan pra̱budhe̍ na̱: puna̍skṛdhi
||4.14||अग्ने॒ त्वᳪ सु जा॑गृहि व॒यᳪ सु म॑न्दिषीमहि । रक्षा॑ णो॒ अप्र॑युच्छन् प्र॒बुधे॑ न॒: पुन॑स्कृधि
puna̱rmana̱: puna̱rāyu̍rma̱ ā'ga̱n puna̍: prā̱ṇaḥ puna̍rā̱tmā ma̱ ā'ga̱n puna̱ścakṣu̱: puna̱: śrotra̍ṃ ma̱ ā'ga̍n |
vai̱śvā̱na̱ro ada̍bdhastanū̱pā a̱gnirna̍: pātu duri̱tāda̍va̱dyāt
||4.15||पुन॒र्मन॒: पुन॒रायु॑र्म॒ आऽग॒न् पुन॑: प्रा॒णः पुन॑रा॒त्मा म॒ आऽग॒न् पुन॒श्चक्षु॒: पुन॒: श्रोत्रं॑ म॒ आऽग॑न् ।
वै॒श्वा॒न॒रो अद॑ब्धस्तनू॒पा अ॒ग्निर्न॑: पातु दुरि॒ताद॑व॒द्यात्
tvama̍gne vrata̱pā a̍si de̱va ā martye̱ṣvā |tvaṃ ya̱jñeṣvīḍya̍: | rāsveya̍tso̱mā bhūyo̍ bhara de̱vo na̍: savi̱tā vaso̍rdā̱tā vasva̍dāt
||4.16||त्वम॑ग्ने व्रत॒पा अ॑सि दे॒व आ मर्त्ये॒ष्वा ।त्वं य॒ज्ञेष्वीड्य॑: । रास्वेय॑त्सो॒मा भूयो॑ भर दे॒वो न॑: सवि॒ता वसो॑र्दा॒ता वस्व॑दात्
e̱ṣā te̍ śukra ta̱nūre̱tadvarca̱stayā̱ sambha̍va̱ bhrāja̍ṃ gaccha | jūra̍si dhṛ̱tā mana̍sā̱ juṣṭā̱ viṣṇa̍ve
||4.17||ए॒षा ते॑ शुक्र त॒नूरे॒तद्वर्च॒स्तया॒ सम्भ॑व॒ भ्राजं॑ गच्छ । जूर॑सि धृ॒ता मन॑सा॒ जुष्टा॒ विष्ण॑वे
tasyā̍ste sa̱tyasa̍vasaḥ prasa̱ve ta̱nvo̱ ya̱ntrama̍śīya̱ svāhā̍ | śu̱krama̍si ca̱ndrama̍sya̱mṛta̍masi vaiśvade̱vama̍si
||4.18||तस्या॑स्ते स॒त्यस॑वसः प्रस॒वे त॒न्वो॒ य॒न्त्रम॑शीय॒ स्वाहा॑ । शु॒क्रम॑सि च॒न्द्रम॑स्य॒मृत॑मसि वैश्वदे॒वम॑सि
cida̍si ma̱nāsi̱ dhīra̍si̱ dakṣi̍ṇāsi kṣa̱triyā̍si ya̱jñiyā̱syadi̍tirasyubhayataḥśī̱rṣṇī |
sā na̱: suprā̍cī̱ supra̍tīcyedhi mi̱trastvā̍ pa̱di ba̍dhnītāṃ pū̱ṣā'dhva̍naspā̱tvindrā̱yādhya̍kṣāya
||4.19||चिद॑सि म॒नासि॒ धीर॑सि॒ दक्षि॑णासि क्ष॒त्रिया॑सि य॒ज्ञिया॒स्यदि॑तिरस्युभयतःशी॒र्ष्णी ।
सा न॒: सुप्रा॑ची॒ सुप्र॑तीच्येधि मि॒त्रस्त्वा॑ प॒दि ब॑ध्नीतां पू॒षाऽध्व॑नस्पा॒त्विन्द्रा॒याध्य॑क्षाय
anu̍ tvā mā̱tā ma̍nyatā̱manu̍ pi̱tā'nu̱ bhrātā̱ saga̱rbhyo'nu̱ sakhā̱ sayū̍thyaḥ |
sā de̍vi de̱vamacche̱hīndrā̍ya̱ soma ru̱drastvā va̍rttayatu sva̱sti soma̍sakhā̱ puna̱rehi̍
||4.20||अनु॑ त्वा मा॒ता म॑न्यता॒मनु॑ पि॒ताऽनु॒ भ्राता॒ सग॒र्भ्योऽनु॒ सखा॒ सयू॑थ्यः ।
सा दे॑वि दे॒वमच्छे॒हीन्द्रा॑य॒ सोम॑ᳪ रु॒द्रस्त्वा व॑र्त्तयतु स्व॒स्ति सोम॑सखा॒ पुन॒रेहि॑
vasvya̱syadi̍tirasyādi̱tyāsi̍ ru̱drāsi̍ ca̱ndrāsi̍ | bṛha̱spati̍ṣṭvā su̱mne ra̍mṇātu ru̱dro vasu̍bhi̱rā ca̍ke
||4.21||वस्व्य॒स्यदि॑तिरस्यादि॒त्यासि॑ रु॒द्रासि॑ च॒न्द्रासि॑ । बृह॒स्पति॑ष्ट्वा सु॒म्ने र॑म्णातु रु॒द्रो वसु॑भि॒रा च॑के
adi̍tyāstvā mū̱rdhannāji̍gharmi deva̱yaja̍ne pṛthi̱vyā iḍā̍yāspa̱damā̍si ghṛ̱tava̱t svāhā̍ |
a̱sme ra̍masvā̱sme te̱ bandhu̱stve rā yo̱ me rāyo̱ mā va̱ya rā̱yaspoṣe̍ṇa̱ viyau̍ṣma̱ toto̱ rāya̍:
||4.22||अदि॑त्यास्त्वा मू॒र्धन्नाजि॑घर्मि देव॒यज॑ने पृथि॒व्या इडा॑यास्प॒दमा॑सि घृ॒तव॒त् स्वाहा॑ ।
अ॒स्मे र॑मस्वा॒स्मे ते॒ बन्धु॒स्त्वे रा यो॒ मे रायो॒ मा व॒यᳪ रा॒यस्पोषे॑ण॒ वियौ॑ष्म॒ तोतो॒ राय॑:
sama̍khye de̱vyā dhi̱yā saṃ dakṣi̍ṇayo̱ruca̍kṣasā | mā ma̱ āyu̱: pramo̍ṣī̱rmo a̱haṃ tava̍ |
vī̱raṃ vi̍deya̱ tava̍ devi sa̱ṃdṛśi̍
||4.23||सम॑ख्ये दे॒व्या धि॒या सं दक्षि॑णयो॒रुच॑क्षसा । मा म॒ आयु॒: प्रमो॑षी॒र्मो अ॒हं तव॑ ।
वी॒रं वि॑देय॒ तव॑ देवि सं॒दृशि॑
e̱ṣa te̍ gāya̱tro bhā̱ga iti̍ me̱ somā̍ya brūtāde̱ṣa te traiṣṭu̍bho bhā̱ga iti̍ me̱ somā̍ya brūtāde̱ṣa te̱ jāga̍to bhā̱ga iti̍ me̱ somā̍ya brūtācchandonā̱mānā̱j sāmrā̍jyaṃ ga̱ccheti̍ me̱ somā̍ya brūtādāsmā̱ko̱'si śu̱kraste̱ grahyo̍ vi̱cita̍stvā̱ vi ci̍nvantu
||4.24||ए॒ष ते॑ गाय॒त्रो भा॒ग इति॑ मे॒ सोमा॑य ब्रूतादे॒ष ते त्रैष्टु॑भो भा॒ग इति॑ मे॒ सोमा॑य ब्रूतादे॒ष ते॒ जाग॑तो भा॒ग इति॑ मे॒ सोमा॑य ब्रूताच्छन्दोना॒माना॒j साम्रा॑ज्यं ग॒च्छेति॑ मे॒ सोमा॑य ब्रूतादास्मा॒को॒ऽसि शु॒क्रस्ते॒ ग्रह्यो॑ वि॒चित॑स्त्वा॒ वि चि॑न्वन्तु
a̱bhi tyaṃ de̱va sa̍vi̱tāra̍mo̱ṇyo̱: ka̱vikra̍tu̱marcā̍mi sa̱tyasa̍va ratna̱dhāma̱bhi pri̱yaṃ ma̱tiṃ ka̱vim | ū̱rdhvā yasyā̱mati̱rbhā adi̍dyuta̱tsavī̍mani̱ hira̍ṇyapāṇiramimīta su̱kratu̍: kṛ̱pā sva̍: | pra̱jābhya̍stvā pra̱jāstvā̍ 'nu̱prāṇa̍ntu pra̱jāstvama̍nu̱prāṇi̍hi
||4.25||अ॒भि त्यं दे॒वᳪ स॑वि॒तार॑मो॒ण्यो॒: क॒विक्र॑तु॒मर्चा॑मि स॒त्यस॑वᳪ रत्न॒धाम॒भि प्रि॒यं म॒तिं क॒विम् । ऊ॒र्ध्वा यस्या॒मति॒र्भा अदि॑द्युत॒त्सवी॑मनि॒ हिर॑ण्यपाणिरमिमीत सु॒क्रतु॑: कृ॒पा स्व॑: । प्र॒जाभ्य॑स्त्वा प्र॒जास्त्वा॑ ऽनु॒प्राण॑न्तु प्र॒जास्त्वम॑नु॒प्राणि॑हि
śu̱kraṃ tvā̍ śu̱kreṇa̍ krīṇāmi ca̱ndraṃ ca̱ndreṇā̱mṛta̍ma̱mṛte̍na | sa̱gme te̱ gora̱sme te̍ ca̱ndrāṇi̍ tapa̍sasta̱nūra̍si pra̱jāpa̍te̱rvarṇa̍: para̱meṇa̍ krīyase sahasrapo̱ṣaṃ pu̍ṣeyam
||4.26||शु॒क्रं त्वा॑ शु॒क्रेण॑ क्रीणामि च॒न्द्रं च॒न्द्रेणा॒मृत॑म॒मृते॑न । स॒ग्मे ते॒ गोर॒स्मे ते॑ च॒न्द्राणि॑ तप॑सस्त॒नूर॑सि प्र॒जाप॑ते॒र्वर्ण॑: पर॒मेण॑ क्रीयसे सहस्रपो॒षं पु॑षेयम्
mi̱tro na̱ ehi̱ sumi̍tradha̱ indra̍syo̱rumā vi̍śa̱ dakṣi̍ṇamu̱śannu̱śanta syo̱naḥ syo̱nam | svāna̱ bhrājā̍ṅghāre̱ bambhā̍re̱ hasta̱ suha̍sta̱ kṛśā̍nave̱te va̍: soma̱kraya̍ṇā̱stānra̍kṣadhva̱ṃ mā vo̍ dabhan
||4.27||मि॒त्रो न॒ एहि॒ सुमि॑त्रध॒ इन्द्र॑स्यो॒रुमा वि॑श॒ दक्षि॑णमु॒शन्नु॒शन्त॑ᳪ स्यो॒नः स्यो॒नम् । स्वान॒ भ्राजा॑ङ्घारे॒ बम्भा॑रे॒ हस्त॒ सुह॑स्त॒ कृशा॑नवे॒ते व॑: सोम॒क्रय॑णा॒स्तान्र॑क्षध्वं॒ मा वो॑ दभन्
pari̍ māgne̱ duśca̍ritādbādha̱svā mā̱ suca̍rite bhaja | udāyu̍ṣā svā̱yuṣoda̍sthāma̱mṛtā̱m̐2 anu̍
||4.28||परि॑ माग्ने॒ दुश्च॑रिताद्बाध॒स्वा मा॒ सुच॑रिते भज । उदायु॑षा स्वा॒युषोद॑स्थाम॒मृताँ॒२ अनु॑
prati̱ panthā̍mapadmahi svasti̱gāma̍ne̱hasa̍m | yena̱ viśvā̱ḥ pari̱ dviṣo̍ vṛ̱ṇakti̍ vi̱ndate̱ vasu̍
||4.29||प्रति॒ पन्था॑मपद्महि स्वस्ति॒गाम॑ने॒हस॑म् । येन॒ विश्वाः॒ परि॒ द्विषो॑ वृ॒णक्ति॑ वि॒न्दते॒ वसु॑
adi̍tyā̱stvaga̍syadi̍tyai̱ sada̱ āsī̍da | asta̍bhnā̱ddyāṃ vṛ̍ṣa̱bho a̱ntari̍kṣa̱mami̍mīta vari̱māṇa̍ṃ pṛthi̱vyāḥ |
ā'sī̍da̱dviśvā̱ bhuva̍nāni sa̱mrāḍviśvettāni̱ varu̍ṇasya vra̱tāni̍
||4.30||अदि॑त्या॒स्त्वग॑स्यदि॑त्यै॒ सद॒ आसी॑द । अस्त॑भ्ना॒द्द्यां वृ॑ष॒भो अ॒न्तरि॑क्ष॒ममि॑मीत वरि॒माणं॑ पृथि॒व्याः ।
आऽसी॑द॒द्विश्वा॒ भुव॑नानि स॒म्राड्विश्वेत्तानि॒ वरु॑णस्य व्र॒तानि॑
vane̍ṣu̱ vyantari̍kṣaṃ tatāna̱ vāja̱marva̍tsu̱ paya̍ u̱sriyā̍su | hṛ̱tsu kratu̱ṃ varu̍ṇo vi̱kṣva̱gniṃ di̱vi sūrya̍madadhā̱t soma̱madrau̍
||4.31||वने॑षु॒ व्यन्तरि॑क्षं ततान॒ वाज॒मर्व॑त्सु॒ पय॑ उ॒स्रिया॑सु । हृ॒त्सु क्रतुं॒ वरु॑णो वि॒क्ष्व॒ग्निं दि॒वि सूर्य॑मदधा॒त् सोम॒मद्रौ॑
sūrya̍sya̱ cakṣu̱rāro̍hā̱gnera̱kṣṇaḥ ka̱nīna̍kam | yatrai̍traśebhi̱rīya̍se̱ bhrāja̍māno vipa̱ścitā̍
||4.32||सूर्य॑स्य॒ चक्षु॒रारो॑हा॒ग्नेर॒क्ष्णः क॒नीन॑कम् । यत्रै॑त्रशेभि॒रीय॑से॒ भ्राज॑मानो विप॒श्चिता॑
usrā̱veta̍ṃ dhūrṣāhau yu̱jyethā̍mana̱śrū avī̍rahaṇau brahma̱coda̍nau | sva̱sti yaja̍mānasya gṛ̱hān ga̍cchatam
||4.33||उस्रा॒वेतं॑ धूर्षाहौ यु॒ज्येथा॑मन॒श्रू अवी॑रहणौ ब्रह्म॒चोद॑नौ । स्व॒स्ति यज॑मानस्य गृ॒हान् ग॑च्छतम्
bha̱dro me̍'si̱ pracya̍vasva bhuvaspate̱ viśvā̍nya̱bhi dhāmā̍ni | mā tvā̍ paripa̱riṇo̍ vida̱n mā tvā̍ paripa̱nthino̍ vida̱n mā tvā̱ vṛkā̍ aghā̱yavo̍ vidan | śye̱no bhū̱tvā parā̍ pata̱ yaja̍mānasya gṛ̱hān ga̍ccha̱ tannau̍ saskṛ̱tam
||4.34||भ॒द्रो मे॑ऽसि॒ प्रच्य॑वस्व भुवस्पते॒ विश्वा॑न्य॒भि धामा॑नि । मा त्वा॑ परिप॒रिणो॑ विद॒न् मा त्वा॑ परिप॒न्थिनो॑ विद॒न् मा त्वा॒ वृका॑ अघा॒यवो॑ विदन् । श्ये॒नो भू॒त्वा परा॑ पत॒ यज॑मानस्य गृ॒हान् ग॑च्छ॒ तन्नौ॑ सस्कृ॒तम्
namo̍ mi̱trasya̱ varu̍ṇasya̱ cakṣa̍se ma̱ho de̱vāya̱ tadṛ̱ta sa̍paryata | dū̍re̱dṛśe̍ de̱vajā̍tāya ke̱tave̍ di̱vaspu̱trāya̱ sūryā̍ya śasata
||4.35||नमो॑ मि॒त्रस्य॒ वरु॑णस्य॒ चक्ष॑से म॒हो दे॒वाय॒ तदृ॒तᳪ स॑पर्यत । दू॑रे॒दृशे॑ दे॒वजा॑ताय के॒तवे॑ दि॒वस्पु॒त्राय॒ सूर्या॑य शᳪसत
varu̍ṇasyo̱ttambha̍namasi varu̍ṇasya skambha̱sarja̍nī stho varu̍ṇasya ṛta̱sada̍nyasi̱ varu̍ṇasya ṛta̱sada̍namasi
varu̍ṇasya ṛta̱sada̍na̱mā sī̍da
||4.36||वरु॑णस्यो॒त्तम्भ॑नमसि वरु॑णस्य स्कम्भ॒सर्ज॑नी स्थो वरु॑णस्य ऋत॒सद॑न्यसि॒ वरु॑णस्य ऋत॒सद॑नमसि
वरु॑णस्य ऋत॒सद॑न॒मा सी॑द
yā te̱ dhāmā̍ni ha̱viṣā̱ yaja̍nti̱ tā te̱ viśvā̍ pari̱bhūra̍stu ya̱jñam |
ga̱ya̱sfāna̍: pra̱tara̍ṇaḥ su̱vīro'vī̍rahā̱ pra ca̍rā soma̱ duryā̍n
||4.37||या ते॒ धामा॑नि ह॒विषा॒ यज॑न्ति॒ ता ते॒ विश्वा॑ परि॒भूर॑स्तु य॒ज्ञम् ।
ग॒य॒स्फ़ान॑: प्र॒तर॑णः सु॒वीरोऽवी॑रहा॒ प्र च॑रा सोम॒ दुर्या॑न्