tade̱vāgnistadā̍di̱tyastadvā̱yustadu̍ ca̱ndramā̍: |
tade̱va śu̱kraṃ tadbrahma̱ tā āpa̱: sa pra̱jāpa̍tiḥ
||32.1||तदे॒व शु॒क्रं तद्ब्रह्म॒ ता आप॒: स प्र॒जाप॑तिः
sarve̍ nime̱ṣā ja̍jñire vi̱dyuta̱: puru̍ṣā̱dadhi̍ |
nai̍namū̱rdhvaṃ na ti̱ryañca̱ṃ na madhye̱ pari̍ jagrabhat
||32.2||सर्वे॑ निमे॒षा ज॑ज्ञिरे वि॒द्युत॒: पुरु॑षा॒दधि॑ ।
नै॑नमू॒र्ध्वं न ति॒र्यञ्चं॒ न मध्ये॒ परि॑ जग्रभत्
na tasya̍ prati̱mā a̍sti̱ yasya̱ nāma̍ ma̱hadyaśa̍: |
hi̱ra̱ṇya̱ga̱rbha itye̱ṣaḥ mā mā̍ hisī̱ditye̱ṣā yasmā̱nna jā̱ta itye̱ṣa:
||32.3||न तस्य॑ प्रति॒मा अ॑स्ति॒ यस्य॒ नाम॑ म॒हद्यश॑: ।
हि॒र॒ण्य॒ग॒र्भ इत्ये॒षः मा मा॑ हिᳪसी॒दित्ये॒षा यस्मा॒न्न जा॒त इत्ये॒ष:
e̱ṣo ha̍ de̱vaḥ pra̱diśo'nu̱ sarvā̱: pūrvo̍ ha jā̱taḥ sa u̱ garbhe̍ a̱ntaḥ |
sa e̱va jā̱taḥ sa ja̍ni̱ṣyamā̍ṇaḥ pra̱tyaṅ janā̍stiṣṭhati sa̱rvato̍mukhaḥ
||32.4||ए॒षो ह॑ दे॒वः प्र॒दिशोऽनु॒ सर्वा॒: पूर्वो॑ ह जा॒तः स उ॒ गर्भे॑ अ॒न्तः ।
स ए॒व जा॒तः स ज॑नि॒ष्यमा॑णः प्र॒त्यङ् जना॑स्तिष्ठति स॒र्वतो॑मुखः
yasmā̍jjā̱taṃ na pu̱rā kiṃ canai̱va ya ā̍ba̱bhūva̱ bhuva̍nāni̱ viśvā̍ |
pra̱jāpa̍tiḥ pra̱jayā̍ sararā̱ṇastrīṇi̱ jyotīṣi sacate̱ sa ṣo̍ḍa̱śī
||32.5||यस्मा॑ज्जा॒तं न पु॒रा किं चनै॒व य आ॑ब॒भूव॒ भुव॑नानि॒ विश्वा॑ ।
प्र॒जाप॑तिः प्र॒जया॑ सᳪररा॒णस्त्रीणि॒ ज्योती॑ᳪषि सचते॒ स षो॑ड॒शी
yena̱ dyauru̱grā pṛ̍thi̱vī ca̍ dṛ̱ḍhā yena̱ sva̱ stabhi̱taṃ yena̱ nāka̍: |
yo a̱ntari̍kṣe̱ raja̍so vi̱māna̱: kasmai̍ de̱vāya̍ ha̱viṣā̍ vidhema
||32.6||येन॒ द्यौरु॒ग्रा पृ॑थि॒वी च॑ दृ॒ढा येन॒ स्व॒ स्तभि॒तं येन॒ नाक॑: ।
यो अ॒न्तरि॑क्षे॒ रज॑सो वि॒मान॒: कस्मै॑ दे॒वाय॑ ह॒विषा॑ विधेम
yaṃ kranda̍sī̱ ava̍sā tastabhā̱ne a̱bhyaikṣe̍tā̱ṃ mana̍sā̱ reja̍māne |
yatrādhi̱ sūra̱ udi̍to vi̱bhāti̱ kasmai̍ de̱vāya̍ ha̱viṣā̍ vidhema |
āpo̍ ha̱ yadbṛ̍ha̱tīryaści̱dāpa̍:
||32.7||यं क्रन्द॑सी॒ अव॑सा तस्तभा॒ने अ॒भ्यैक्षे॑तां॒ मन॑सा॒ रेज॑माने ।
यत्राधि॒ सूर॒ उदि॑तो वि॒भाति॒ कस्मै॑ दे॒वाय॑ ह॒विषा॑ विधेम ।
आपो॑ ह॒ यद्बृ॑ह॒तीर्यश्चि॒दाप॑:
ve̱nastatpa̍śya̱nnihi̍ta̱ṃ guhā̱ sadyatra̱ viśva̱ṃ bhava̱tyeka̍nīḍam |
tasmi̍nni̱da saṃ ca̱ vi cai̍ti̱ sarva sa ota̱: prota̍śca vi̱bhūḥ pra̱jāsu̍
||32.8||वे॒नस्तत्प॑श्य॒न्निहि॑तं॒ गुहा॒ सद्यत्र॒ विश्वं॒ भव॒त्येक॑नीडम् ।
तस्मि॑न्नि॒दᳪ सं च॒ वि चै॑ति॒ सर्व॒ᳪ स ओत॒: प्रोत॑श्च वि॒भूः प्र॒जासु॑
pra tadvo̍ceda̱mṛta̱ṃ nu vi̱dvān ga̍ndha̱rvo dhāma̱ vibhṛ̍ta̱ṃ guhā̱ sat |
trīṇi̍ pa̱dāni̱ nihi̍tā̱ guhā̍sya̱ yastāni̱ veda̱ sa pi̱tuḥ pi̱tā'sa̍t
||32.9||प्र तद्वो॑चेद॒मृतं॒ नु वि॒द्वान् ग॑न्ध॒र्वो धाम॒ विभृ॑तं॒ गुहा॒ सत् ।
त्रीणि॑ प॒दानि॒ निहि॑ता॒ गुहा॑स्य॒ यस्तानि॒ वेद॒ स पि॒तुः पि॒ताऽस॑त्
sa no̱ bandhu̍rjani̱tā sa vi̍dhā̱tā dhāmā̍ni veda̱ bhuva̍nāni̱ viśvā̍ |
yatra̍ de̱vā a̱mṛta̍mānaśā̱nāstṛ̱tīye̱ dhāma̍nna̱dhyaira̍yanta
||32.10||स नो॒ बन्धु॑र्जनि॒ता स वि॑धा॒ता धामा॑नि वेद॒ भुव॑नानि॒ विश्वा॑ ।
यत्र॑ दे॒वा अ॒मृत॑मानशा॒नास्तृ॒तीये॒ धाम॑न्न॒ध्यैर॑यन्त
pa̱rītya̍ bhū̱tāni̍ pa̱rītya̍ lo̱kān pa̱rītya̱ sarvā̍: pra̱diśo̱ diśa̍śca |
u̱pa̱sthāya̍ prathama̱jāmṛ̱tasyā̱tmanā̱''tmāna̍ma̱bhi saṃ vi̍veśa
||32.11||प॒रीत्य॑ भू॒तानि॑ प॒रीत्य॑ लो॒कान् प॒रीत्य॒ सर्वा॑: प्र॒दिशो॒ दिश॑श्च ।
उ॒प॒स्थाय॑ प्रथम॒जामृ॒तस्या॒त्मना॒ऽऽत्मान॑म॒भि सं वि॑वेश
pari̱ dyāvā̍pṛthi̱vī sa̱dya i̱tvā pari̍ lo̱kān pari̱ diśa̱: pari̱ sva̱: |
ṛ̱tasya̱ tantu̱ṃ vita̍taṃ vi̱cṛtya̱ tada̍paśya̱ttada̍bhava̱ttadā̍sīt
||32.12||परि॒ द्यावा॑पृथि॒वी स॒द्य इ॒त्वा परि॑ लो॒कान् परि॒ दिश॒: परि॒ स्व॒: ।
ऋ॒तस्य॒ तन्तुं॒ वित॑तं वि॒चृत्य॒ तद॑पश्य॒त्तद॑भव॒त्तदा॑सीत्
sada̍sa̱spati̱madbhu̍taṃ pri̱yamindra̍sya̱ kāmya̍m | sa̱niṃ me̱dhāma̍yāsiṣasvāhā̍
||32.13||सद॑स॒स्पति॒मद्भु॑तं प्रि॒यमिन्द्र॑स्य॒ काम्य॑म् । स॒निं मे॒धाम॑यासिष॒ᳪस्वाहा॑
yāṃ me̱dhāṃ de̍vaga̱ṇāḥ pi̱tara̍śco̱pāsa̍te |
tayā̱ māma̱dya me̱dhayā'gne̍ me̱dhāvi̍naṃ kuru̱ svāhā̍
||32.14||यां मे॒धां दे॑वग॒णाः पि॒तर॑श्चो॒पास॑ते ।
तया॒ माम॒द्य मे॒धयाऽग्ने॑ मे॒धावि॑नं कुरु॒ स्वाहा॑
me̱dhāṃ me̱ varu̍ṇo dadātu me̱dhāma̱gniḥ pra̱jāpa̍tiḥ |
me̱dhāmindra̍śca vā̱yuśca̍ me̱dhāṃ dhā̱tā da̍dātu me̱ svāhā̍
||32.15||मे॒धां मे॒ वरु॑णो ददातु मे॒धाम॒ग्निः प्र॒जाप॑तिः ।
मे॒धामिन्द्र॑श्च वा॒युश्च॑ मे॒धां धा॒ता द॑दातु मे॒ स्वाहा॑
i̱daṃ me̱ brahma̍ ca kṣa̱traṃ co̱bhe śriya̍maśnutām |
mayi̍ de̱vā da̍dhatu̱ śriya̱mutta̍mā̱ṃ tasyai̍ te̱ svāhā̍
||32.16||इ॒दं मे॒ ब्रह्म॑ च क्ष॒त्रं चो॒भे श्रिय॑मश्नुताम् ।
मयि॑ दे॒वा द॑धतु॒ श्रिय॒मुत्त॑मां॒ तस्यै॑ ते॒ स्वाहा॑