Vājasaneyi Madhyandina Saṃhitā — Chapter 18 (77 mantras)

Vājasaneyi Madhyandina Saṃhitā — Chapter 18

---

Mantras

Mantra	First Words
1	vājaśca me
2	prāṇaśca me’pānaśca
3	ojaśca me
4	jyaiṣṭhya ca
5	satya ca
6	ṛta ca
7	yantā ca
8	śa ca
9	ūrk ca
10	rayiśca me
11	vitta ca
12	vrīhayaśca me
13	aśmā ca
14	agniśca ma
15	vasu ca
16	agniśca ma
17	mitraśca ma
18	pṛthivī ca
19	aśuśca me
20	āgrayāṇaśca me
21	srucaśca me
22	agniśca me
23	vrata ca
24	ekā ca
25	catasraśca me’ṣṭau
26	tryaviśca me
27	paṣṭhavāṭ ca
28	vājāya svāhā
29	āyuryajñena kalpatā
30	vājasya nu
31	viśve adya
32	vājo na
33	vājo no
34	vāja purastāduta
35	sa mā
36	paya pṛthivyā
37	devasya tvā
38	ṛtāṣāḍṛtadhāmā’gnirgandharvastasyauṣadhayo’psaraso mudo
39	sahito viśvasāmā
40	suṣumṇa sūryaraśmiścandramā
41	iṣiro viśvavyacā
42	1
43	prajāpatirviśvakarmā mano
44	sa no
45	samudro’si nabhasvānārdradānu
46	yāste agne
47	yā vo
48	ruca no
49	tattvā yāmi
50	svarṇa gharma
51	agni yunajmi
52	imau te
53	indurdakṣa śyena
54	divo mūrdhā’si
55	viśvasya mūrdhannadhi
56	iṣṭo yajño
57	iṣṭo agnirāhuta
58	yadākūtātsamasusroddhṛdo vā
59	eta sadhastha
60	eta jānātha
61	udbudhyasvāgne prati
62	yena vahasi
63	prastareṇa paridhinā
64	yaddatta yatparādāna
65	yatra dhārā
66	agnirasmi janmanā
67	ṛco nāmāsmi
68	vārtrahatyāya śavase
69	sahadānu puruhūta
70	vi na
71	mṛgo na
72	vaiśvānaro na
73	pṛṣṭo divi
74	aśyāma ta
75	vaya te
76	dhāmacchadagnirindro brahmā
77	tva yaviṣṭha

---

Mantra 1 {#mantra-1}

Adhyāya: 18 | Mantra: 1

vāja̍śca me prasa̱vaśca̍ me̱ praya̍tiśca me̱ prasi̍tiśca me dhī̱tiśca̍ me̱ kratu̍śca me̱ svara̍śca me̱ śloka̍śca me śra̱vaśca̍ me̱ śruti̍śca me̱ jyoti̍śca me̱ sva̱śca me ya̱jñena̍ kalpantām

---

Mantra 2 {#mantra-2}

Adhyāya: 18 | Mantra: 2

prā̱ṇaśca̍ me’pā̱naśca̍ me vyā̱naśca̱ me’su̍śca me ci̱ttaṃ ca̍ ma̱ ādhī̍taṃ ca me̱ vāk ca̍ me̱ mana̍śca me̱ cakṣu̍śca me̱ śrotra̍ṃ ca me̱ dakṣa̍śca me̱ bala̍ṃ ca me ya̱jñena̍ kalpantām

---

Mantra 3 {#mantra-3}

Adhyāya: 18 | Mantra: 3

oja̍śca me̱ saha̍śca ma ā̱tmā ca̍ me ta̱nūśca̍ me̱ śarma̍ ca me̱ varma̍ ca̱ me’ṅgā̍ni ca̱ me’sthī̍ni ca me̱ parūṣi ca me̱ śarī̍rāṇi ca ma̱ āyu̍śca me ja̱rā ca̍ me ya̱jñena̍ kalpantām

---

Mantra 4 {#mantra-4}

Adhyāya: 18 | Mantra: 4

jyai̍ṣṭhyaṃ ca me̱ ādhi̍patyaṃ ca me ma̱nyuśca̍ me̱ bhāma̍śca̱ me’ma̍śca̱ me’mbha̍śca me je̱mā ca̍ me mahi̱mā ca̍ me vari̱mā ca̍ me prathi̱mā ca̍ me varṣi̱mā ca̍ me drāghi̱mā ca̍ me vṛ̱ddhaṃ ca̍ me̱ vṛddhi̍śca me ya̱jñena̍ kalpantām

---

Mantra 5 {#mantra-5}

Adhyāya: 18 | Mantra: 5

sa̱tyaṃ ca̍ me śra̱ddhā ca̍ me̱ jaga̍cca me̱ dhana̍ṃ ca me̱ viśva̍ṃ ca me̱ maha̍śca me krī̱ḍā ca̍ me̱ moda̍śca me jā̱taṃ ca̍ me jani̱ṣyamā̍ṇaṃ ca me sū̱ktaṃ ca̍ me sukṛ̱taṃ ca̍ me ya̱jñena̍ kalpantām

---

Mantra 6 {#mantra-6}

Adhyāya: 18 | Mantra: 6

ṛ̱taṃ ca̍ me’mṛta̍ṃ ca me ‘ya̱kṣmaṃ ca̱ me ‘nā̍mayacca me jī̱vātu̍śca me dīrghāyu̱tvaṃ ca̍ me’nami̱traṃ ca̱ me ‘bha̍yaṃ ca me su̱khaṃ ca̍ me̱ śaya̍naṃ ca me sū̱ṣāśca̍ me su̱dina̍ṃ ca me ya̱jñena̍ kalpantām

---

Mantra 7 {#mantra-7}

Adhyāya: 18 | Mantra: 7

ya̱ntā ca̍ me dha̱rtā ca̍ me̱ kṣema̍śca me̱ dhṛti̍śca me̱ viśva̍ṃ ca me̱ maha̍śca me sa̱ṃvicca̍ me̱ jñātra̍ṃ ca me̱ sūśca̍ me pra̱sūśaca̱ me̱ sīra̍ṃ ca me̱ laya̍śca me ya̱jñena̍ kalpantām

---

Mantra 8 {#mantra-8}

Adhyāya: 18 | Mantra: 8

śaṃ ca̍ me̱ maya̍śca me pri̱yaṃ ca̍ me’nukā̱maśca̍ me̱ kāma̍śca me saumana̱saśca̍ me̱ bhaga̍śca me̱ dravi̍ṇaṃ ca me bha̱draṃ ca̍ me̱ śreya̍śca me̱ vasī̍yaśca me̱ yaśa̍śca me ya̱jñena̍ kalpantām

---

Mantra 9 {#mantra-9}

Adhyāya: 18 | Mantra: 9

ūrk ca̍ me sū̱nṛtā̍ ca me̱ paya̍śca me̱ rasa̍śca me ghṛ̱taṃ ca̍ me̱ madhu̍ ca me̱ sagdhi̍śca me̱ sapī̍tiśca me kṛ̱ṣiśca̍ me̱ vṛṣṭi̍śca me̱ jaitra̍ṃ ca ma̱ audbhi̍dyaṃ ca me ya̱jñena̍ kalpantām

---

Mantra 10 {#mantra-10}

Adhyāya: 18 | Mantra: 10

ra̱yiśca̍ me̱ rāya̍śca me pu̱ṣṭaṃ ca̍ me̱ puṣṭi̍śca me vi̱bhu ca̍ me pra̱bhu ca̍ me pū̱rṇaṃ ca̍ me pū̱rṇata̍raṃ ca me̱ kuya̍vaṃ ca̱ me’kṣi̍taṃ ca̱ me’nna̍ṃ ca̱ me’kṣu̍cca me ya̱jñena̍ kalpantām

---

Mantra 11 {#mantra-11}

Adhyāya: 18 | Mantra: 11

vi̱ttaṃ ca̍ me̱ vedya̍ṃ ca me bhū̱taṃ ca̍ me bhavi̱ṣyacca̍ me su̱gaṃ ca̍ me supa̱thya̱ṃ ca ma ṛ̱ddhaṃ ca̍ ma̱ ṛddhi̍śca me klṛ̱ptaṃ ca̍ me̱ klṛpti̍śca me ma̱tiśca̍ me suma̱tiśca̍ me ya̱jñena̍ kalpantām

---

Mantra 12 {#mantra-12}

Adhyāya: 18 | Mantra: 12

vrī̱haya̍śca me̱ yavā̍śca me̱ māṣā̍śca me̱ tilā̍śca me mu̱drāśca̍ me̱ khalvā̍śca me pri̱yaṅga̍vaśca̱ me’ṇa̍vaśca me śyā̱mākā̍śca me nī̱vārā̍śca me go̱dhūmā̍śca me ma̱sūrā̍śca me ya̱jñena̍ kalpantām

---

Mantra 13 {#mantra-13}

Adhyāya: 18 | Mantra: 13

aśmā̍ ca me̱ mṛtti̍kā ca me gi̱raya̍śca me̱ parva̍tāśca me̱ sika̍tāśca me̱ vana̱spata̍yaśca me̱ hira̍ṇyaṃ ca̱ me’ya̍śca me śyā̱maṃ ca̍ me lo̱haṃ ca̍ me̱ sīsa̍ṃ ca me̱ trapu̍ ca me ya̱jñena̍ kalpantām

---

Mantra 14 {#mantra-14}

Adhyāya: 18 | Mantra: 14

a̱gniśca̍ ma̱ āpa̍śca me vī̱rudha̍śca ma̱ oṣa̍dhayaśca me kṛṣṭapa̱cyāśca̍ me’kṛṣṭapa̱cyāśca̍ me grā̱myāśca̍ me pa̱śava̍ āra̱ṇyāśca̍ me vi̱ttaṃ ca̍ me̱ vitti̍śca me bhū̱taṃ ca̍ me̱ bhūti̍śca me ya̱jñena̍ kalpantām

---

Mantra 15 {#mantra-15}

Adhyāya: 18 | Mantra: 15

vasu̍ ca me vasa̱tiśca̍ me̱ karma̍ ca me̱ śakti̍śca̱ me ‘rtha̍śca ma̱ ema̍śca ma i̱tyā ca̍ me̱ gati̍śca me ya̱jñena̍ kalpantām

---

Mantra 16 {#mantra-16}

Adhyāya: 18 | Mantra: 16

a̱gniśca̍ ma̱ indra̍śca me̱ soma̍śca ma̱ indra̍śca me savi̱tā ca̍ ma̱ indra̍śca me̱ sara̍svatī ca ma̱ indra̍śca me pū̱ṣā ca̍ ma̱ indra̍śca me̱ bṛha̱spati̍śca ma̱ indra̍śca me ya̱jñena̍ kalpantām

---

Mantra 17 {#mantra-17}

Adhyāya: 18 | Mantra: 17

mi̱traśca̍ ma̱ indra̍śca me̱ varu̍ṇaśca ma̱ indra̍śca me dhā̱tā ca̍ ma̱ indra̍śca me̱ tvaṣṭā̍ ca ma̱ indra̍śca me ma̱ruta̍śca ma̱ indra̍śca me̱ viśve̍ ca me de̱vā indra̍śca me ya̱jñena̍ kalpantām

---

Mantra 18 {#mantra-18}

Adhyāya: 18 | Mantra: 18

pṛ̱thi̱vī ca̍ ma̱ indra̍śca̱ me’ntari̍kṣaṃ ca ma̱ indra̍śca me̱ dyauśca̍ ma̱ indra̍śca me̱ samā̍śca ma̱ indra̍śca me̱ nakṣa̍trāṇi ca ma̱ indra̍śca me̱ diśa̍śca ma̱ indra̍śca me ya̱jñena̍ kalpantām

---

Mantra 19 {#mantra-19}

Adhyāya: 18 | Mantra: 19

aśuśca̍ me ra̱śmiśca̱ me’dā̍bhyaśca̱ me’dhi̍patiśca ma upāśuśca̍ me’ntaryā̱maśca̍ ma aindravāya̱vaśca̍ me maitrāvaru̱ṇaśca̍ ma āśvi̱naśca̍ me pratipra̱sthāna̍śca me śu̱kraśca̍ me ma̱nthī ca̍ me ya̱jñena̍ kalpantām

---

Mantra 20 {#mantra-20}

Adhyāya: 18 | Mantra: 20

ā̱gra̱yā̱ṇaśca̍ me vaiśvade̱vaśca̍ me dhru̱vaśca̍ me vaiśvāna̱raśca̍ ma aindrā̱gnaśca̍ me ma̱hāvai̍śvadeśca me marutva̱tīyā̍śca me̱ niṣke̍valyaśca me sāvi̱traśca̍ me sārasva̱taśca̍ me pātnīva̱taśca̍ me hāriyoja̱naśca̍ me ya̱jñena̍ kalpantām

---

Mantra 21 {#mantra-21}

Adhyāya: 18 | Mantra: 21

sruca̍śca me cama̱sāśca̍ me vāya̱vyā̱ni ca me droṇakala̱śaśca̍ me̱ grāvā̍ṇaśca me’dhi̱ṣava̍ṇe ca me pūta̱bhṛcca̍ ma ādhava̱nīya̍śca me̱ vedi̍śca me ba̱rhiśca̍ me’vabhṛ̱taśca̍ me svagākā̱raśca̍ me ya̱jñena̍ kalpantām

---

Mantra 22 {#mantra-22}

Adhyāya: 18 | Mantra: 22

a̱gniśca̍ me gha̱rmaśca̍ me̱’rkaśca̍ me̱ sūrya̍śca me prā̱ṇaśca̍ me’śvame̱dhaśca̍ me pṛthi̱vī ca̱ me’di̍tiśca me̱ diti̍śca me̱ dyauśca̍ me̱’ṅgula̍ya̱: śakva̍rayo̱ diśa̍śca me ya̱jñena̍ kalpantām

---

Mantra 23 {#mantra-23}

Adhyāya: 18 | Mantra: 23

vra̱taṃ ca̍ ma ṛ̱tava̍śca me̱ tapa̍śca me saṃvatsa̱raśca̍ me’horā̱tre ū̍rvaṣṭhī̱ve bṛ̍hadrathanta̱re ca̍ me ya̱jñena̍ kalpantām

---

Mantra 24 {#mantra-24}

Adhyāya: 18 | Mantra: 24

ekā̍ ca me ti̱sraśca̍ me ti̱sraśca̍ me̱ pañca̍ ca me̱ pañca̍ ca me sa̱pta ca̍ me sa̱pta ca̍ me̱ nava̍ ca me̱ nava̍ ca ma̱ ekā̍daśa ca ma̱ ekā̍daśa ca me̱ trayo̍daśa ca me̱ trayo̍daśa ca me̱ pañca̍daśa ca me̱ pañca̍daśa ca me sa̱ptada̍śa ca me sa̱ptada̍śa ca me̱ nava̍daśa ca me̱ nava̍daśa ca ma̱ eka̍viśatiśca ma̱ eka̍viśatiśca me̱ trayo̍viśatiśca me̱ trayo̍viśatiśca me̱ pañca̍viśatiśca me̱ pañca̍viśatiśca me sa̱ptaviśatiśca me sa̱ptaviśatiśca me̱ nava̍viśatiśca me̱ nava̍viśatiśca ma̱ eka̍triśacca ma̱ eka̍triśacca me̱ traya̍striśacca me ya̱jñena̍ kalpantām

---

Mantra 25 {#mantra-25}

Adhyāya: 18 | Mantra: 25

cata̍sraśca me̱’ṣṭau ca̍ me̱’ṣṭau ca̍ me̱ dvāda̍śa ca me̱ dvāda̍śa ca me̱ ṣoḍa̍śa ca me̱ ṣoḍa̍śa ca me viśa̱tiśca̍ me viśatiśca̍ me̱ catu̍rviśatiśca me̱ catu̍rviśa̱tiśca̍ me̱’ṣṭāviśatiśca me̱’ṣṭāviśatiśca me̱ dvātriśacca me̱ dvātriśacca me̱ ṣaṭtriśacca me̱ ṣaṭtriśacca me catvāriśacca̍ me catvāriśacca̍ me̱ catu̍ścatvāriśacca me̱ catu̍ścatvāriśacca me̱’ṣṭāca̍tvāriśacca me ya̱jñena̍ kalpantām

---

Mantra 26 {#mantra-26}

Adhyāya: 18 | Mantra: 26

tryavi̍śca me trya̱vī ca̍ me ditya̱vāṭ ca̍ me dityau̱hī ca̍ me pañcā̱viśca̍ me pañcā̱vī ca̍ me triva̱tsaśca̍ me triva̱tsā ca̍ me turya̱vāṭ ca̍ me turyau̱hī ca̍ me ya̱jñena̍ kalpantām

---

Mantra 27 {#mantra-27}

Adhyāya: 18 | Mantra: 27

pa̱ṣṭha̱vāṭ ca̍ me paṣṭhau̱hī ca̍ ma u̱kṣā ca̍ me va̱śā ca̍ ma ṛṣa̱bhaśca̍ me ve̱hacca̍ me’na̱ḍvām̐śca̍ me dhe̱nuśca̍ me ya̱jñena̍ kalpantām

---

Mantra 28 {#mantra-28}

Adhyāya: 18 | Mantra: 28

vājā̍ya̱ svāhā̍ prasa̱vāya̱ svāhā̍’pi̱jāya̱ svāhā̱ krata̍ve̱ svāhā̱ vasa̍ve̱ svāhā̍’ha̱rpata̍ye̱ svāhā’hne̍ mu̱gdhāya̱ svāhā̍ mu̱gdhāya̍ vainaśi̱nāya̱ svāhā̍ vinaśina̍ āntyāya̱nāya̱ svāhā”ntyā̍ya bhauva̱nāya̱ svāhā̱ bhuva̍nasya̱ pata̍ye̱ svāhā’dhi̍pataye̱ svāhā̍ pra̱jāpa̍taye̱ svāhā̍ | i̱yaṃ te̱ rāṇmi̱trāya̍ ya̱ntā’si̱ yama̍na ū̱rje tvā̱ vṛṣṭyai̍ tvā pra̱jānā̱ṃ tvā”dhi̍patyāya

---

Mantra 29 {#mantra-29}

Adhyāya: 18 | Mantra: 29

āyu̍rya̱jñena̍ kalpatāṃ prā̱ṇo ya̱jñena̍ kalpatā̱ṃ cakṣu̍rya̱jñena̍ kalpatā śrotra̍ṃ ya̱jñena̍ kalpatā̱ṃ vāgya̱jñena̍ kalpatā̱ṃ mano̍ ya̱jñena̍ kalpatāmā̱tmā ya̱jñena̍ kalpatāṃ bra̱hmā ya̱jñena̍ kalpatā̱ṃ jyoti̍rya̱jñena̍ kalpatā sva̱rya̱jñena̍ kalpatāṃ pṛ̱ṣṭhaṃ ya̱jñena̍ kalpatāṃ ya̱jño ya̱jñena̍ kalpatām | stoma̍śca yaju̍śca̱ ṛk ca̱ sāma̍ ca bṛ̱hacca̍ rathanta̱raṃ ca̍ | sva̍rdevā aganmā̱mṛtā̍ abhūma pra̱jāpa̍teḥ pra̱jā a̍bhūma̱ veṭ svāhā̍

---

Mantra 30 {#mantra-30}

Adhyāya: 18 | Mantra: 30

vāja̍sya̱ nu pra̍sa̱ve mā̱tara̍ṃ ma̱hīmadi̍ti̱ṃ nāma̱ vaca̍sā karāmahe | yasyā̍mi̱daṃ viśva̱ṃ bhuva̍namāvi̱veśa̱ tasyā̍ṃ no de̱vaḥ sa̍vi̱tā dharma̍ sāviṣat

---

Mantra 31 {#mantra-31}

Adhyāya: 18 | Mantra: 31

viśve̍ a̱dya ma̱ruto̱ viśva̍ ū̱tī viśve̍ bhavantva̱gnaya̱: sami̍ddhāḥ | viśve̍ no de̱vā ava̱sā”ga̍mantu̱ viśva̍mastu̱ dravi̍ṇa̱ṃ vājo̍ a̱sme

---

Mantra 32 {#mantra-32}

Adhyāya: 18 | Mantra: 32

vājo̍ naḥ sa̱pta pra̱diśa̱ścata̍sro vā parā̱vata̍: | vājo̍ no̱ viśvai̍rde̱vairdhana̍sātāvi̱hāva̍tu

---

Mantra 33 {#mantra-33}

Adhyāya: 18 | Mantra: 33

vājo̍ no a̱dya pra su̍vāti̱ dāna̱ṃ vājo̍ de̱vām̐2 ṛ̱tubhi̍: kalpayāti | vājo̱ hi mā̱ sarva̍vīraṃ ja̱jāna̱ viśvā̱ āśā̱ vāja̍patirjayeyam

---

Mantra 34 {#mantra-34}

Adhyāya: 18 | Mantra: 34

vāja̍: pu̱rastā̍du̱ta ma̍dhya̱to no̱ vājo̍ de̱vān ha̱viṣā̍ vardhayāti | vājo̱ hi mā̱ sarva̍vīraṃ ca̱kāra̱ sarvā̱ āśā̱ vāja̍patirbhaveyam

---

Mantra 35 {#mantra-35}

Adhyāya: 18 | Mantra: 35

saṃ mā̍ sṛjāmi̱ paya̍sā pṛthi̱vyāḥ saṃ mā̍ sṛjāmya̱dbhiroṣa̍dhībhiḥ | so̱’haṃ vāja saneyamagne

---

Mantra 36 {#mantra-36}

Adhyāya: 18 | Mantra: 36

paya̍: pṛthi̱vyāṃ paya̱ oṣa̍dhīṣu̱ payo̍ di̱vyantari̍kṣe̱ payo̍ dhāḥ | paya̍svatīḥ pra̱diśa̍: santu̱ mahya̍m

---

Mantra 37 {#mantra-37}

Adhyāya: 18 | Mantra: 37

de̱vasya̍ tvā savi̱tuḥ pra̍sa̱ve’śvino̍rbā̱hubhyā̍ṃ pū̱ṣṇo hastā̍bhyām | sara̍svatyai vā̱co ya̱nturya̱ntreṇā̱gneḥ sāmrā̍jyenā̱bhiṣi̍ñcāmi

---

Mantra 38 {#mantra-38}

Adhyāya: 18 | Mantra: 38

ṛ̱tā̱ṣāḍṛ̱tadhā̍mā̱’gnirga̍ndha̱rvastasyau̍ṣadhayo’psa̱raso̱ mudo̱ nāma̍ | sa na̍ i̱daṃ brahma̍ kṣa̱traṃ pā̍tu̱ tasmai̱ svāhā̱ vāṭ tābhya̱: svāhā̍

---

Mantra 39 {#mantra-39}

Adhyāya: 18 | Mantra: 39

sahi̱to vi̱śvasā̍mā̱ sūryo̍ gandha̱rvastasya̱ marī̍cayo’psa̱rasa̍ ā̱yuvo̱ nāma̍ | sa na̍ i̱daṃ brahma̍ kṣa̱traṃ pā̍tu̱ tasmai̱ svāhā̱ vāṭ tābhya̱: svāhā̍

---

Mantra 40 {#mantra-40}

Adhyāya: 18 | Mantra: 40

su̱ṣu̱mṇaḥ sūrya̍raśmiśca̱ndramā̍ gandha̱rvastasya̱ nakṣa̍trāṇyapsa̱raso̍ bhe̱kura̍yo̱ nāma̍ | sa na̍ i̱daṃ brahma̍ kṣa̱traṃ pā̍tu̱ tasmai̱ svāhā̱ vāṭ tābhya̱: svāhā̍

---

Mantra 41 {#mantra-41}

Adhyāya: 18 | Mantra: 41

i̱ṣi̱ro vi̱śvavya̍cā̱ vāto̍ gandha̱rvastasyāpo̍ apsa̱rasa̱ ūrjo̱ nāma̍ | sa na̍ i̱daṃ brahma̍ kṣa̱traṃ pā̍tu̱ tasmai̱ svāhā̱ vāṭ tābhya̱: svāhā̍

---

Mantra 42 {#mantra-42}

Adhyāya: 18 | Mantra: 42

1 || bhu̱jyuḥ su̍pa̱rṇo ya̱jño ga̍ndha̱rvatasya̱ dakṣi̍ṇā apsa̱rasa̍ stā̱vā nāma̍ | sa na̍ i̱daṃ brahma̍ kṣa̱traṃ pā̍tu̱ tasmai̱ svāhā̱ vāṭ tābhya̱: svāhā̍

---

Mantra 43 {#mantra-43}

Adhyāya: 18 | Mantra: 43

pra̱jāpa̍tirvi̱śvaka̍rmā̱ mano̍ gandha̱rvastasya̍ ṛksā̱mānya̍psa̱rasa̱ eṣṭa̍yo̱ nāma̍ | sa na̍ i̱daṃ brahma̍ kṣa̱traṃ pā̍tu̱ tasmai̱ svāhā̱ vāṭ tābhya̱: svāhā̍

---

Mantra 44 {#mantra-44}

Adhyāya: 18 | Mantra: 44

sa no̍ bhuvanasya pate prajāpate̱ yasya̍ ta u̱pari̍ gṛ̱hā yasya̍ ve̱ha | asmai̱ brahma̍ṇe’smai kṣa̱trāya̱ mahi̱ śarma̍ yaccha̱ svāhā̍

---

Mantra 45 {#mantra-45}

Adhyāya: 18 | Mantra: 45

sa̱mu̱dro̱’si̱ nabha̍svānā̱rdradā̍nuḥ śa̱mbhūrma̍yo̱bhūra̱bhi mā̍ vāhi̱ svāhā̍ | māru̱to̱’si ma̱rutā̍ṃ ga̱ṇaḥ śa̱mbhūrma̍yo̱bhūra̱bhi mā̍ vāhi̱ svāhā̍’va̱syūra̍si̱ duva̍svāñcha̱mbhūrma̍yo̱bhūra̱bhi mā̍ vāhi̱ svāhā̍

---

Mantra 46 {#mantra-46}

Adhyāya: 18 | Mantra: 46

yāste̍ agne̱ sūrye̱ ruco̱ diva̍māta̱nvanti̍ ra̱śmibhi̍: | tābhi̍rno a̱dya sarvā̍bhī ru̱ce janā̍ya naskṛdhi

---

Mantra 47 {#mantra-47}

Adhyāya: 18 | Mantra: 47

yā vo̍ de̱vāḥ sūrye̱ ruco̱ goṣvaśve̍ṣu̱ yā ruca̍: | indrā̍gnī̱ tābhi̱: sarvā̍bhī̱ ruca̍ṃ no dhatta bṛhaspate

---

Mantra 48 {#mantra-48}

Adhyāya: 18 | Mantra: 48

ruca̍ṃ no dhehi brāhma̱ṇeṣu̱ ruca rāja̍su naskṛdhi | ruca̱ṃ viśye̍ṣu śū̱dreṣu̱ mayi̍ dhehi ru̱cā ruca̍m

---

Mantra 49 {#mantra-49}

Adhyāya: 18 | Mantra: 49

tattvā̍ yāmi̱ brahma̍ṇā̱ vanda̍māna̱stadā śā̍ste̱ yaja̍māno ha̱virbhi̍: | ahe̍ḍamāno varuṇe̱ha bo̱dhyuru̍śasa̱ mā na̱ āyu̱: pra mo̍ṣīḥ

---

Mantra 50 {#mantra-50}

Adhyāya: 18 | Mantra: 50

sva̱rṇa gha̱rmaḥ svāhā̍ svarṇārkaḥ svāhā̍ svarṇa śu̱kraḥ svāhā svarṇa jyoti̱: svāhā̱ svarṇa sūrya̱: svāhā̍

---

Mantra 51 {#mantra-51}

Adhyāya: 18 | Mantra: 51

a̱gniṃ yu̍najmi̱ śava̍sā ghṛ̱tena̍ di̱vya su̍pa̱rṇaṃ vaya̍sā bṛ̱hanta̍m | tena̍ va̱yaṃ ga̍mema bra̱dhnasya̍ vi̱ṣṭapa svo ruhā̍ṇā̱ adhi̱ nāka̍mutta̱mam

---

Mantra 52 {#mantra-52}

Adhyāya: 18 | Mantra: 52

i̱mau te̍ pa̱kṣāva̱jarau̍ pata̱triṇau̱ yābhyā rakṣāsyapa̱hasya̍gne | tābhyā̍ṃ patema su̱kṛtā̍mu lo̱kaṃ yatra̱ ṛṣa̍yo ja̱gmuḥ pra̍thama̱jāḥ pu̍rā̱ṇāḥ

---

Mantra 53 {#mantra-53}

Adhyāya: 18 | Mantra: 53

indu̱rdakṣa̍: śye̱na ṛ̱tāvā̱ hira̍ṇyapakṣaḥ śaku̱no bhu̍ra̱ṇyuḥ | ma̱hāntsa̱dhasthe̍ dhru̱va ā niṣa̍tto̱ nama̍ste astu̱ mā mā̍ hisīḥ

---

Mantra 54 {#mantra-54}

Adhyāya: 18 | Mantra: 54

di̱vo mū̱rdhā’si̍ pṛthi̱vyā nābhi̱rūrga̱pāmoṣa̍dhīnām | vi̱śvāyu̱: śarma̍ sa̱prathā̱ nama̍spa̱the

---

Mantra 55 {#mantra-55}

Adhyāya: 18 | Mantra: 55

viśva̍sya mū̱rdhannadhi̍ tiṣṭhasi śri̱taḥ sa̍mu̱dre te̱ hṛda̍yama̱psvāyu̍ra̱po da̍ttoda̱dhiṃ bhi̍nta | di̱vaspa̱rjanyā̍da̱ntari̍kṣātpṛthi̱vyāstato̍ no̱ vṛṣṭyā̍va

---

Mantra 56 {#mantra-56}

Adhyāya: 18 | Mantra: 56

i̱ṣṭo ya̱jño bhṛgu̍bhirāśī̱rdā vasu̍bhiḥ | tasya̍ na i̱ṣṭasya̍ prī̱tasya̱ dravi̍ṇe̱hā ga̍meḥ

---

Mantra 57 {#mantra-57}

Adhyāya: 18 | Mantra: 57

i̱ṣṭo a̱gnirāhu̍taḥ pipartu na i̱ṣṭa ha̱viḥ | sva̱gedaṃ de̱vebhyo̱ nama̍:

---

Mantra 58 {#mantra-58}

Adhyāya: 18 | Mantra: 58

yadākū̍tātsa̱masu̍sroddhṛ̱do vā̱ mana̍so vā̱ sambhṛ̍ta̱ṃ cakṣu̍ṣo vā | tadanu̱ preta̍ su̱kṛtā̍mu lo̱kaṃ yatra̱ ṛṣa̍yo ja̱gmuḥ pra̍thama̱jāḥ pu̍rā̱ṇāḥ

---

Mantra 59 {#mantra-59}

Adhyāya: 18 | Mantra: 59

e̱ta sa̍dhastha̱ pari̍ te dadāmi̱ yamā̱vahā̍ccheva̱dhiṃ jā̱tave̍dāḥ | a̱nvā̱ga̱ntā ya̱jñapa̍tirvo̱ atra̱ ta sma̍ jānīta para̱me vyo̍man

---

Mantra 60 {#mantra-60}

Adhyāya: 18 | Mantra: 60

e̱taṃ jā̍nātha para̱me vyo̍ma̱n devā̍: sadhasthā vi̱da rū̱pama̍sya | yadā̱gacchā̍tpa̱thibhi̍rdeva̱yānai̍riṣṭāpū̱rte kṛ̍ṇavāthā̱vira̍smai

---

Mantra 61 {#mantra-61}

Adhyāya: 18 | Mantra: 61

udbu̍dhyasvāgne̱ prati̍ jāgṛhi̱ tvami̍ṣṭāpū̱rte sa sṛ̍jethāma̱yaṃ ca̍ | a̱smintsa̱dhasthe̱ adhyutta̍rasmi̱nviśve̍ devā̱ yaja̍mānāśca sīdata

---

Mantra 62 {#mantra-62}

Adhyāya: 18 | Mantra: 62

yena̱ vaha̍si sa̱hasra̱ṃ yenā̍gne sarvaveda̱sam | tene̱maṃ ya̱jñaṃ no̍ naya̱ sva̱rde̱veṣu̱ ganta̍ve

---

Mantra 63 {#mantra-63}

Adhyāya: 18 | Mantra: 63

pra̱sta̱reṇa̍ pari̱dhinā̍ sru̱cā vedyā̍ ca ba̱rhiṣā̍ | ṛ̱cemaṃ ya̱jñaṃ no̍ naya̱ sva̱rde̱veṣu̱ ganta̍ve

---

Mantra 64 {#mantra-64}

Adhyāya: 18 | Mantra: 64

yadda̱ttaṃ yatpa̍rā̱dāna̱ṃ yatpū̱rtaṃ yāśca̱ dakṣi̍ṇāḥ | tada̱gnirvai̍śvakarma̱ṇaḥ sva̍rde̱veṣu̍ no dadhat

---

Mantra 65 {#mantra-65}

Adhyāya: 18 | Mantra: 65

yatra̱ dhārā̱ ana̍petā̱ madho̍rghṛ̱tasya̍ ca̱ yāḥ | tada̱gnirvai̍śvakarma̱ṇaḥ sva̍de̱rveṣu̍ no dadhat

---

Mantra 66 {#mantra-66}

Adhyāya: 18 | Mantra: 66

a̱gnira̍smi̱ janma̍nā jā̱tave̍dā ghṛ̱taṃ me̱ cakṣu̍ra̱mṛta̍ṃ ma ā̱san | a̱rkastri̱dhātū̱ raja̍so vi̱māno’ja̍sro gha̱rmo ha̱vira̍smi̱ nāma̍

---

Mantra 67 {#mantra-67}

Adhyāya: 18 | Mantra: 67

ṛco̱ nāmā̍smi̱ yajū̍ ṣi̱ nāmā̍smi̱ sāmā̍ni̱ nāmā̍smi | ye a̱gnaya̱: pāñca̍janyā a̱syāṃ pṛ̍thi̱vyāmadhi̍ | teṣā̍masi̱ tvamu̍tta̱maḥ pra no̍ jī̱vāta̍ve suva

---

Mantra 68 {#mantra-68}

Adhyāya: 18 | Mantra: 68

vārtra̍hatyāya̱ śava̍se pṛtanā̱ṣāhyā̍ya ca | indra̱ tvā”va̍rtayāmasi

---

Mantra 69 {#mantra-69}

Adhyāya: 18 | Mantra: 69

sa̱hadā̍nuṃ puruhūta kṣi̱yanta̍maha̱stami̍ndra̱ saṃ pi̍ṇa̱k kuṇā̍rum | a̱bhi vṛ̱traṃ vardha̍māna̱ṃ piyā̍ruma̱pāda̍mindra ta̱vasā̍ jaghantha

---

Mantra 70 {#mantra-70}

Adhyāya: 18 | Mantra: 70

vi na̍ indra̱ mṛdho̍ jahi nī̱cā ya̍ccha pṛtanya̱taḥ | yo a̱smām̐2 a̍bhi̱dāsa̱tyadha̍raṃ gamayā̱ tama̍:

---

Mantra 71 {#mantra-71}

Adhyāya: 18 | Mantra: 71

mṛ̱go na bhī̱maḥ ku̍ca̱ro gi̍ri̱ṣṭhāḥ pa̍rā̱vata̱ ā ja̍ganthā̱ para̍syāḥ | sṛ̱ka saśāya̍ pa̱vimi̍ndra ti̱gmaṃ vi śatrū̍n tāḍhi̱ vi mṛdho̍ nudasva

---

Mantra 72 {#mantra-72}

Adhyāya: 18 | Mantra: 72

vai̱śvā̱na̱ro na̍ ū̱taya̱ ā pra yā̍tu parā̱vata̍: | a̱gnirna̍: suṣṭu̱tīrupa̍

---

Mantra 73 {#mantra-73}

Adhyāya: 18 | Mantra: 73

pṛ̱ṣṭo di̱vi pṛ̱ṣṭo a̱gniḥ pṛ̍thi̱vyāṃ pṛ̱ṣṭo viśvā̱ oṣa̍dhī̱rā vi̍veśa | vai̱śvā̱na̱raḥ saha̍sā pṛ̱ṣṭo a̱gniḥ sa no̱ divā̱ sa ri̱ṣaspā̍tu̱ nakta̍m

---

Mantra 74 {#mantra-74}

Adhyāya: 18 | Mantra: 74

a̱śyāma̱ taṃ kāma̍magne̱ tavo̱tī a̱śyāma̍ ra̱yi ra̍yivaḥ su̱vīra̍m | a̱śyāma̱ vāja̍ma̱bhi vā̱jaya̍nto̱’śyāma̍ dyu̱mnama̍jarā̱jara̍ṃ te

---

Mantra 75 {#mantra-75}

Adhyāya: 18 | Mantra: 75

va̱yaṃ te̍ a̱dya ra̍ri̱mā hi kāma̍muttā̱naha̍stā̱ nama̍sopa̱sadya̍ | yaji̍ṣṭhena̱ mana̍sā yakṣi de̱vānasre̍dhatā̱ manma̍nā̱ vipro̍ agne

---

Mantra 76 {#mantra-76}

Adhyāya: 18 | Mantra: 76

dhā̱ma̱cchada̱gnirindro̍ bra̱hmā de̱vo bṛha̱spati̍: | sace̍taso̱ viśve̍ de̱vā ya̱jñaṃ prāva̍ntu naḥ śu̱bhe

---

Mantra 77 {#mantra-77}

Adhyāya: 18 | Mantra: 77

tvaṃ ya̍viṣṭha dā̱śuṣo̱ nṝm̐: pā̍hi śṛṇu̱dhī gira̍: | rakṣā̍ to̱kamu̱ta tmanā̍

---