10 vairūpo'ṣṭādaṃṣṭraḥ| indraḥ| triṣṭup|
manī̍ṣiṇa̱: pra bha̍radhvaṃ manī̱ṣāṃ yathā̍yathā ma̱taya̱: santi̍ nṛ̱ṇām |
indra̍ṃ sa̱tyairera̍yāmā kṛ̱tebhi̱: sa hi vī̱ro gi̍rvaṇa̱syurvidā̍naḥ
||1||ṛ̱tasya̱ hi sada̍so dhī̱tiradyau̱tsaṃ gā̍rṣṭe̱yo vṛ̍ṣa̱bho gobhi̍rānaṭ |
uda̍tiṣṭhattavi̱ṣeṇā̱ rave̍ṇa ma̱hānti̍ ci̱tsaṃ vi̍vyācā̱ rajā̍ṃsi
||2||indra̱: kila̱ śrutyā̍ a̱sya ve̍da̱ sa hi ji̱ṣṇuḥ pa̍thi̱kṛtsūryā̍ya |
ānmenā̍ṃ kṛ̱ṇvannacyu̍to̱ bhuva̱dgoḥ pati̍rdi̱vaḥ sa̍na̱jā apra̍tītaḥ
||3||indro̍ ma̱hnā ma̍ha̱to a̍rṇa̱vasya̍ vra̱tāmi̍nā̱daṅgi̍robhirgṛṇā̱naḥ |
pu̱rūṇi̍ ci̱nni ta̍tānā̱ rajā̍ṃsi dā̱dhāra̱ yo dha̱ruṇa̍ṃ sa̱tyatā̍tā
||4||indro̍ di̱vaḥ pra̍ti̱māna̍ṃ pṛthi̱vyā viśvā̍ veda̱ sava̍nā̱ hanti̱ śuṣṇa̍m |
ma̱hīṃ ci̱ddyāmāta̍no̱tsūrye̍ṇa cā̱skambha̍ ci̱tkambha̍nena̱ skabhī̍yān
||5||vajre̍ṇa̱ hi vṛ̍tra̱hā vṛ̱tramasta̱rade̍vasya̱ śūśu̍vānasya mā̱yāḥ |
vi dhṛ̍ṣṇo̱ atra̍ dhṛṣa̱tā ja̍gha̱nthā'thā̍bhavo maghavanbā̱hvo̍jāḥ
||6||saca̍nta̱ yadu̱ṣasa̱: sūrye̍ṇa ci̱trāma̍sya ke̱tavo̱ rāma̍vindan |
ā yannakṣa̍tra̱ṃ dadṛ̍śe di̱vo na puna̍rya̱to naki̍ra̱ddhā nu ve̍da
||7||dū̱raṃ kila̍ pratha̱mā ja̍gmurāsā̱mindra̍sya̱ yāḥ pra̍sa̱ve sa̱srurāpa̍: |
kva̍ svi̱dagra̱ṃ kva̍ bu̱dhna ā̍sā̱māpo̱ madhya̱ṃ kva̍ vo nū̱namanta̍:
||8||sṛ̱jaḥ sindhū̱m̐rahi̍nā jagrasā̱nām̐ ādide̱tāḥ pra vi̍vijre ja̱vena̍ |
mumu̍kṣamāṇā u̱ta yā mu̍mu̱cre'dhede̱tā na ra̍mante̱ niti̍ktāḥ
||9||sa̱dhrīcī̱: sindhu̍muśa̱tīri̍vāyantsa̱nājjā̱ra ā̍ri̱taḥ pū̱rbhidā̍sām |
asta̱mā te̱ pārthi̍vā̱ vasū̍nya̱sme ja̍gmuḥ sū̱nṛtā̍ indra pū̱rvīḥ
||10||