11 bhūtāṃśaḥ kāśyapaḥ| aśvinau| triṣṭup|
u̱bhā u̍ nū̱naṃ tadida̍rthayethe̱ vi ta̍nvāthe̱ dhiyo̱ vastrā̱pase̍va |
sa̱dhrī̱cī̱nā yāta̍ve̱ prema̍jīgaḥ su̱dine̍va̱ pṛkṣa̱ ā ta̍ṃsayethe
||1||u̱ṣṭāre̍va̱ pharva̍reṣu śrayethe prāyo̱geva̱ śvātryā̱ śāsu̱retha̍: |
dū̱teva̱ hi ṣṭho ya̱śasā̱ jane̍ṣu̱ māpa̍ sthātaṃ mahi̱ṣevā̍va̱pānā̍t
||2||sā̱ka̱ṃyujā̍ śaku̱nasye̍va pa̱kṣā pa̱śveva̍ ci̱trā yaju̱rā ga̍miṣṭam |
a̱gniri̍va deva̱yordī̍di̱vāṃsā̱ pari̍jmāneva yajathaḥ puru̱trā
||3||ā̱pī vo̍ a̱sme pi̱tare̍va pu̱trogreva̍ ru̱cā nṛ̱patī̍va tu̱ryai |
irye̍va pu̱ṣṭyai ki̱raṇe̍va bhu̱jyai śru̍ṣṭī̱vāne̍va̱ hava̱mā ga̍miṣṭam
||4||vaṃsa̍geva pūṣa̱ryā̍ śi̱mbātā̍ mi̱treva̍ ṛ̱tā śa̱tarā̱ śāta̍pantā |
vāje̍vo̱ccā vaya̍sā gharmye̱ṣṭhā meṣe̍ve̱ṣā sa̍pa̱ryā̱3 purī̍ṣā
||5||sṛ̱ṇye̍va ja̱rbharī̍ tu̱rpharī̍tū naito̱śeva̍ tu̱rpharī̍ parpha̱rīkā̍ |
u̱da̱nya̱jeva̱ jema̍nā made̱rū tā me̍ ja̱rāyva̱jara̍ṃ ma̱rāyu̍
||6||pa̱jreva̱ carca̍ra̱ṃ jāra̍ṃ ma̱rāyu̱ kṣadme̱vārthe̍ṣu tartarītha ugrā |
ṛ̱bhū nāpa̍tkharama̱jrā kha̱rajru̍rvā̱yurna pa̍rpharatkṣayadrayī̱ṇām
||7||gha̱rmeva̱ madhu̍ ja̱ṭhare̍ sa̱nerū̱ bhage̍vitā tu̱rpharī̱ phāri̱vāra̍m |
pa̱ta̱reva̍ caca̱rā ca̱ndrani̍rṇi̱ṅmana̍ṛṅgā mana̱nyā̱3 na jagmī̍
||8||bṛ̱hante̍va ga̱mbhare̍ṣu prati̱ṣṭhāṃ pāde̍va gā̱dhaṃ tara̍te vidāthaḥ |
karṇe̍va̱ śāsu̱ranu̱ hi smarā̱thoṃ'śe̍va no bhajataṃ ci̱tramapna̍:
||9||ā̱ra̱ṅga̱reva̱ madhvera̍yethe sāra̱gheva̱ gavi̍ nī̱cīna̍bāre |
kī̱nāre̍va̱ sveda̍māsiṣvidā̱nā kṣāme̍vo̱rjā sū̍yava̱sātsa̍cethe
||10||ṛ̱dhyāma̱ stoma̍ṃ sanu̱yāma̱ vāja̱mā no̱ mantra̍ṃ sa̱rathe̱hopa̍ yātam |
yaśo̱ na pa̱kvaṃ madhu̱ goṣva̱ntarā bhū̱tāṃśo̍ a̱śvino̱: kāma̍maprāḥ
||11||