atha daśamo'dhyāyaḥ |
deva̍ savita̱ḥ prasu̍va ya̱jñaṃ prasu̍ve̱maṃ bhagā̍ya |
di̱vyo ga̍ndha̱rvaḥ ke̍ta̱pāḥ keta̍ṃ naḥ punātu vā̱caspati̍rno a̱dya vāja̍ svadatu
||10.1||dhru̱va̱sada̍ṃ tvā nṛ̱ṣada̍ṃ mana̱ḥsada̍m |
u̱pa̱yā̱magṛ̍hīto̱'sīndrā̍ya tvā̱ juṣṭa̍ṃ gṛhṇāmye̱ṣa te̱ yoni̱rindrā̍ya tvā̱ juṣṭa̍tamam
||10.2||a̱psu̱ṣada̍ṃ tvā ghṛta̱sada̍ṃ vyoma̱sada̍m |
u̱pa̱yā̱magṛ̍hīto̱'sīndrā̍ya tvā̱ juṣṭa̍ṃ gṛhṇāmye̱ṣa te̱ yoni̱rindrā̍ya tvā̱ juṣṭa̍tamam |
pṛ̱thi̱vī̱sada̍ṃ tvā'ntarikṣa̱sada̍ṃ divi̱sada̍ṃ deva̱sada̍ṃ nāka̱sada̍m |
u̱pa̱yā̱magṛ̍hīto̱'sīndrā̍ya tvā̱ juṣṭa̍ṃ gṛhṇāmye̱ṣa te̱ yoni̱rindrā̍ya tvā̱ juṣṭa̍tamam
||10.3||a̱pā rasa̱mudva̍yasa̱ sūrye̱ santa̍ sa̱māhi̍tam | a̱pā rasa̍sya̱ yo rasa̱staṃ vo̍ gṛhṇāmyutta̱mam |
u̱pa̱yā̱magṛ̍hīto̱'sīndrā̍ya tvā̱ juṣṭa̍ṃ gṛhṇāmye̱ṣa te̱ yoni̱rindrā̍ya tvā̱ juṣṭa̍tamam
||10.4||grahā̍ ūrjāhutayo̱ vyanto̱ viprā̍ya ma̱tim | teṣā̱ṃ viśi̍priyāṇāṃ vo̱'hamiṣa̱mūrja̱ sama̍grabham |
u̱pa̱yā̱magṛ̍hīto̱'sīndrā̍ya tvā̱ juṣṭa̍ṃ gṛhṇāmye̱ṣa te̱ yoni̱rindrā̍ya tvā̱ juṣṭa̍tamam
||10.5||sa̱ṃpṛca̍ stha̱ saṃ mā̍ bha̱dreṇa̍ pṛṅkta | vi̱pṛca̍ stha̱ vi mā̍ pā̱pena̍ pṛṅkta
||10.6||indra̍sya̱ vajro̍'si vāja̱sāstvayā̱ yaṃ vāja̍ set |
vāja̍sya̱ nu pra̍sa̱ve mā̱tara̍ṃ ma̱hīmadi̍ti̱ṃ nāma̱ vaca̍sā karāmahe |
yasyā̍mi̱daṃ viśva̱ṃ bhuva̍namāvi̱veśa̱ tasyā̍ṃ no de̱vaḥ sa̍vi̱tā dharma̍ sāviṣak
||10.7||devī̍rāpo apāṃnapā̱dyo va̍ ū̱rmiḥ pratū̍rtiḥ| ka̱kunmā̍n vāja̱sāstenā̱yaṃ vāja̍set
||10.8||a̱psva̱ntara̱mṛta̍ma̱psu bhe̍ṣa̱jama̱pāmu̱ta praśa̍stibhiḥ | aśvā̱ bhava̍ta vā̱jina̍ḥ
||10.9||vāto̍ vā vo̱ mano̍ vā gandha̱rvāḥ sa̱ptavi̍śatiḥ | te agre'śva̍mayuñja̱ste a̍sminja̱vamāda̍dhuḥ
||10.10||vāta̍rahā bhava vājinyu̱jyamā̍na̱ indra̍syeva̱ dakṣi̍ṇaḥ śri̱yaidhi̍ |
yu̱ñjantu̍ tvā ma̱ruto̍ vi̱śvaveda̍sa̱ ā te̱ tvaṣṭā̍ pa̱tsu ja̱vaṃ da̍dhātu
||10.11||ja̱vo yaste̍ vāji̱nnihi̍to̱ guhā̱ yaḥ śye̱ne parī̍tto̱ aca̍racca̱ vāte̍ |
tena̍ no vāji̱n bala̍vā̱n bale̍na vāja̱jiccai̱dhi sama̍ne ca pārayi̱ṣṇuḥ
||10.12||vāji̍no vājajito̱ vāja̍ sari̱ṣyanta̍ḥ | bṛha̱spate̍rbhā̱gamava̍jighrata
||10.13||de̱vasya̍ va̱ya sa̍vi̱tuḥ sa̱ve sa̱tyasa̍vasaḥ | bṛha̱spate̍rutta̱maṃ nāka̍ ruhe̱mendra̍syotta̱maṃ nāka̍ ruhema |
de̱vasya̍ va̱ya sa̍vi̱tuḥ sa̱ve sa̱tyasa̍vasaḥ | bṛha̱spate̍rutta̱maṃ nāka̍maruhā̱mendra̍syotta̱maṃ nāka̍maruhāma
||10.14||bṛha̍spate̱ vāja̍ṃ jaya̱ bṛha̱spata̍ye̱ vāca̍ṃ vadata | bṛha̱spati̱ṃ vāja̍ṃ jāpayata
||10.15||indra̱ vāja̍ṃ ja̱yendrā̍ya̱ vāca̍ṃ vadata | indra̱ṃ vāja̍ṃ jāpayata
||10.16||e̱ṣā va̱ḥ sā sa̱tyā sa̱ṃvāga̍bhū̱dyayā̱ bṛha̱spati̱ṃ vāja̱majī̍japata |
ājī̍japata̱ bṛha̱spati̱ṃ vāca̱ṃ vana̍spatayo̱ vimu̍cyadhvam
||10.17||de̱vasya̍ va̱ya sa̍vi̱tuḥ sa̱ve sa̱tyasa̍vasaḥ | bṛha̱spate̍rvāja̱jito̱ vāja̍ṃ jeṣam
||10.18||vāji̍no̱ vāja̍ṃ jaya̱tādhva̍na ska̱bhnanta̍ḥ | yoja̍nā̱ mimā̍nā̱ḥ kāṣṭhā̍ṃ gacchata
||10.19||e̱ṣa sya vā̱jī kṣi̍pa̱ṇiṃ tu̍raṇyati grī̱vāyā̍ṃ ba̱ddho a̍pika̱kṣa ā̱sani̍ |
kratu̍ṃ dadhi̱krā anu̍ sa̱ntavī̍tvatpa̱thāmaṅkā̱syanvā̱panī̍phaṇat
||10.20||u̱ta smā̍sya̱ drava̍tasturaṇaya̱taḥ pa̱rṇaṃ na veranu̍vāti praga̱rdhina̍ḥ |
śye̱nasye̍va̱ dhraja̍to aṅka̱saṃ pari̍ dadhi̱krāvṇa̍ḥ sa̱horjā tari̍trataḥ
||10.21||śaṃ no̍ bhavantu vā̱jino̱ have̍ṣu de̱vatā̍tā mi̱tadra̍vaḥ sva̱rkāḥ |
ja̱mbhaya̱nto'hi̱ṃ vṛka̱ rakṣā̍si̱ sane̍mya̱smadyu̍yava̱nnamī̍vāḥ
||10.22||te no̱ arva̍nto havana̱śruto̱ hava̱ṃ viśve̍ śṛṇvantu vā̱jino̍ mi̱tadra̍vaḥ |
sa̱ha̱sra̱sā me̱dhasā̍tā iva̱ tmanā̍ ma̱ho ye dhana̍ sami̱theṣu̍ jabhri̱re
||10.23||vāje̍vāje'vata vājino no̱ dhane̍ṣu viprā amṛtā ṛtajñāḥ |
a̱sya madhva̍ḥ pibata mā̱daya̍dhvaṃ tṛ̱ptā yā̍ta pa̱thibhi̍rdeva̱yānai̍ḥ
||10.24||ā mā̱ vāja̍sya prasa̱vo ja̍gamyā̱deme dyāvā̍pṛthi̱vī vi̱śvarū̍pe |
ā mā̍ gaṃtaṃ pitarā mātarā yu̱vamā mā̱ somo̍ amṛta̱tvāya̍ gamyāt
||10.25||vāji̍no vājajito̱ vāja̍ sasṛ̱vāsa̍ḥ| bṛha̱spate̍rbhā̱gamava̍jighrata nimṛjā̱nāḥ
||10.26||ā̱paye̱ svāhā̍ svā̱paye̱ svāhā̍'pi̱jāya̱ svāhā̱ krata̍ve̱ svāhā̍ | vasa̍ve̱ svāhā̍ha̱rpata̍ye̱ svāhā̍ |
ahne̍ mu̱gdhāya̱ svāhā̍ mu̱gdhāya̍ vainaśi̱nāya̱ svāhā̍ vina̱śina̍ āntyāya̱nāya̱ svāhāntyā̍ya
bhauva̱nāya̱ svāhā̱ bhuva̍nasya̱ pata̍ye̱ svāhādhi̍pataye̱ svāhā̍
||10.27||āyu̍rya̱jñena̍ kalpatāṃ prā̱ṇo ya̱jñena̍ kalpatā̱ṃ cakṣu̍rya̱jñena̍ kalpatā̱ śrotra̍ṃ ya̱jñena̍ kalpatām |
pṛ̱ṣṭhaṃ ya̱jñena̍ kalpatāṃ ya̱jño ya̱jñena̍ kalpatām
||10.28||jāya̱ ehi̱ svo̱ rohā̍va | pra̱jāpa̍teḥ pra̱jā a̍bhūma̱ sva̍rdevā aganmā̱mṛtā̍ abhūma
||10.29||a̱sme vo̍ astvindri̱yama̱sme nṛ̱mṇamu̱ta kratu̍ḥ | a̱sme varcā̍si santu vaḥ
||10.30||namo̍ mā̱tre pṛ̍thi̱vyā i̱yaṃ te̱ rāḍya̱ntāsi̱ yama̍naḥ |
dhru̱vo̍'si dha̱ruṇa̍ḥ kṛ̱ṣyai kṣemā̍ya ra̱yyai poṣā̍ya
||10.31||vāja̍sye̱maṃ pra̍sa̱vaḥ su̍ṣu̱ve'gre̱ soma̱ rājā̍na̱moṣa̍dhīṣva̱psu |
tā a̱smabhya̱ṃ madhu̍matīrbhavantu va̱ya rā̱ṣṭre jā̍gṛyāma pu̱rohi̍tāḥ
||10.32||vāja̍sye̱daṃ pra̍sa̱va āba̍bhūve̱mā ca̱ viśvā̱ bhuva̍nāni sa̱rvata̍ḥ |
sane̍mi̱ rājā̱ pari̍yāti vi̱dvān ra̱yiṃ puṣṭi̍ṃ va̱rdhaya̍māno a̱sme
||10.33||vāja̍sye̱māṃ pra̍sa̱vaḥ śi̍śriye̱ diva̍mi̱mā ca̱ viśvā̱ bhuva̍nāni sa̱mrāṭ |
ādi̍tsantaṃ dāpayati prajā̱ntsa no̍ ra̱yi sarva̍vīra̱ṃ niya̍cchatu̱
||10.34||agne̱ acchā̍vade̱ha na̱ḥ prati̍ naḥ su̱manā̍ bhava | pra no̍ yaccha sahasraji̱ttvahi dha̍na̱dā asi̍
||10.35||soma̱ rājā̍na̱mava̍se̱'gnima̱nvāra̍bhāmahe | ā̱di̱tyān viṣṇu̱ sūrya̍ṃ bra̱hmāṇa̍ṃ ca̱ bṛha̱spati̍m
||10.36||pra no̍ yacchatvarya̱mā pra pū̱ṣā pra sara̍svatī | pra vāgde̱vī da̍dātu naḥ
||10.37||a̱rya̱maṇa̱ṃ bṛha̱spati̱mindra̱ṃ dānā̍ya codaya | vāca̱ṃ viṣṇu̱ sara̍svatī savi̱tāra̍ṃ ca vā̱jina̍m
||10.38||de̱vasya̍ tvā savi̱tuḥ pra̍sa̱ve̱'śvino̍rbā̱hubhyā̍ṃ pū̱ṣṇo hastā̍bhyām |
sara̍svatyai vā̱co yanturye̱ dadhāmi | bṛha̱spate̍ṣṭvā̱ sāmrā̍jyenā̱bhiṣi̍ñcā̱mīndra̍sya tvā sāmrā̍jyenā̱bhiṣi̍ñcāmi
||10.39||a̱gnirekā̍kṣareṇa prā̱ṇamuda̍jaya̱t tamujje̍ṣama̱śvinau̱ dvya̍kṣareṇa dvi̱pado̍ manu̱ṣyā̱nuda̍jayatā̱ṃ tānujje̍ṣam |
viṣṇu̱strya̍kṣareṇa̱ trīni̱mām̐llo̱kānuda̍jaya̱ttānujje̍ṣa̱ soma̱ścatu̍rakṣareṇa̱ catu̍ṣpadaḥ pa̱śūnuda̍jaya̱ttānujje̍ṣam
||10.40||pū̱ṣā pañcā̍kṣareṇa̱ pañca̍ ṛ̱tūnuda̍jaya̱ttānujje̍ṣa savi̱tā ṣal̤a̍kṣareṇa̱ ṣal̤ṛ̱tūnuda̍jaya̱ttānujje̍ṣam ||
ma̱ruta̍ḥ sa̱ptākṣa̍reṇa sa̱pta grā̱myān paśū̱nuda̍jaya̱stānujje̍ṣa̱ṃ bṛha̱spati̍ra̱ṣṭākṣa̍reṇa gāya̱trīmuda̍jaya̱ttāmujje̍ṣam
||10.41||mi̱tro navā̍kṣareṇa tri̱vṛta̱ stoma̱muda̍jaya̱t tamujje̍ṣaṃ varu̍ṇo̱ daśā̍kṣareṇa vi̱rāja̱muda̍jaya̱ttāmujje̍ṣam |
indra̱ ekāda̍śākṣareṇa tri̱ṣṭubha̱muda̍jaya̱ttāmujje̍ṣa̱ṃ viśve̍ de̱vā dvāda̍śākṣareṇa̱ jaga̍tī̱muda̍jaya̱stāmujje̍ṣam
||10.42||vasa̍va̱strayo̍daśākṣareṇa trayoda̱śa stoma̱muda̍jaya̱stamujje̍ṣa ru̱drāścatu̍rdaśākṣareṇa caturda̱śa stoma̱muda̍jaya̱stamujje̍ṣam |
ā̱di̱tyāḥ pañca̍daśākṣareṇa pañcada̱śa stoma̱muda̍jaya̱stamujje̍ṣa̱madi̍ti̱ḥ ṣol̤a̍śākṣareṇa ṣol̤a̱śa stoma̱muda̍jaya̱ttamujje̍ṣam |
pra̱jāpa̍tiḥ sa̱ptada̍śākṣareṇa sa̱ptada̱śa stoma̱muda̍jaya̱ttamujje̍ṣam
||10.43||