atha dvitīyo daśakaḥ
||11.1||अथ द्वितीयो दशकः
atha prathamo'dhyāyaḥ (athaikādaśo'dhyāyaḥ)
e̱ṣa te̍ nirṛte bhā̱gastaṃ ju̍ṣasva̱ svāhā̱'gnine̍trebhyo de̱vebhya̍ḥ pura̱ḥsadbhya̱ḥ svāhā̍
ya̱mane̍trebhyo de̱vebhyo̍ dakṣiṇa̱sadbhya̱ḥ svāhā̍ |
vi̱śvade̍vanetrebhyo de̱vebhya̍ḥ paścā̱tsadbhya̱ḥ svāhā̍ mi̱trāvaru̍ṇanetrebhyo
vā ma̱runne̍trebhyo vā de̱vebhya̍ uttara̱sadbhya̱ḥ svāhā̍ |
soma̍netrebhyo de̱vebhya̍ upari̱sadbhyo̱ duva̍svadbhya̱ḥ svāhā̍
||11.2||अथ प्रथमोऽध्यायः (अथैकादशोऽध्यायः)
ए॒ष ते॑ निरृते भा॒गस्तं जु॑षस्व॒ स्वाहा॒ऽग्निने॑त्रेभ्यो दे॒वेभ्यः॑ पुरः॒सद्भ्यः॒ स्वाहा॑
य॒मने॑त्रेभ्यो दे॒वेभ्यो॑ दक्षिण॒सद्भ्यः॒ स्वाहा॑ ।
वि॒श्वदे॑वनेत्रेभ्यो दे॒वेभ्यः॑ पश्चा॒त्सद्भ्यः॒ स्वाहा॑ मि॒त्रावरु॑णनेत्रेभ्यो
वा म॒रुन्ने॑त्रेभ्यो वा दे॒वेभ्य॑ उत्तर॒सद्भ्यः॒ स्वाहा॑ ।
सोम॑नेत्रेभ्यो दे॒वेभ्य॑ उपरि॒सद्भ्यो॒ दुव॑स्वद्भ्यः॒ स्वाहा॑
||
ye de̱vā a̱gnine̍trāḥ pura̱ḥsada̱stebhya̱ḥ svāhā̱ ye de̱vā ya̱mane̍trā dakṣiṇa̱sada̱stebhya̱ḥ svāhā̍ |
ye de̱vā vi̱śvade̍vanetrāḥ paścā̱tsada̱stebhya̱ḥ svāhā̍ ye de̱vā mi̱trāvaru̍ṇanetrā vā ma̱runne̍trā vottara̱sada̱stebhya̱ḥ svāhā̍ |
ye de̱vāḥ soma̍netrā upari̱sado̱ duva̍svanta̱stebhya̱ḥ svāhā̍
||11.3||॥
ये दे॒वा अ॒ग्निने॑त्राः पुरः॒सद॒स्तेभ्यः॒ स्वाहा॒ ये दे॒वा य॒मने॑त्रा दक्षिण॒सद॒स्तेभ्यः॒ स्वाहा॑ ।
ये दे॒वा वि॒श्वदे॑वनेत्राः पश्चा॒त्सद॒स्तेभ्यः॒ स्वाहा॑ ये दे॒वा मि॒त्रावरु॑णनेत्रा वा म॒रुन्ने॑त्रा वोत्तर॒सद॒स्तेभ्यः॒ स्वाहा॑ ।
ये दे॒वाः सोम॑नेत्रा उपरि॒सदो॒ दुव॑स्वन्त॒स्तेभ्यः॒ स्वाहा॑
agne̱ saha̍sva̱ pṛta̍nā a̱bhimā̍tī̱rapā̍sya | du̱ṣṭara̱stara̱nnarā̍tī̱rvarco̍ dhā ya̱jñavā̍hasi |
de̱vasya̍ tvā savi̱tuḥ pra̍sa̱ve̱'śvino̍rbā̱hubhyā̍ṃ pū̱ṣṇo hastā̍bhyām
||11.4||अग्ने॒ सह॑स्व॒ पृत॑ना अ॒भिमा॑ती॒रपा॑स्य । दु॒ष्टर॒स्तर॒न्नरा॑ती॒र्वर्चो॑ धा य॒ज्ञवा॑हसि ।
दे॒वस्य॑ त्वा सवि॒तुः प्र॑स॒वे॒ऽश्विनो॑र्बा॒हुभ्यां॑ पू॒ष्णो हस्ता॑भ्याम्
u̱pā̱śorvī̱rye̍ṇa juhomi ha̱ta rakṣa̱ḥ svāhā̍ | rakṣa̍sāṃ tvā va̱dhāyāva̍dhiṣma̱ rakṣo̱'muṣya̍ tvā va̱dhāyā̱muma̍vadhiṣma |
juṣāṇo'dhvājyasya vetu svāhā
||11.5||उ॒पा॒शोर्वी॒र्ये॑ण जुहोमि ह॒त रक्षः॒ स्वाहा॑ । रक्ष॑सां त्वा व॒धायाव॑धिष्म॒ रक्षो॒ऽमुष्य॑ त्वा व॒धाया॒मुम॑वधिष्म ।
जुषाणोऽध्वाज्यस्य वेतु स्वाहा
a̱po de̱vā madhu̍matīragṛbhṇa̱nnūrja̍svatī rāja̱sva̱ścitā̍nāḥ |
yābhi̍rmi̱trāvaru̍ṇā a̱bhyaṣi̍ñca̱nyābhi̱rindra̱mana̍ya̱nnatyarā̍tīḥ
||11.6||अ॒पो दे॒वा मधु॑मतीरगृभ्ण॒न्नूर्ज॑स्वती राज॒स्व॒श्चिता॑नाः ।
याभि॑र्मि॒त्रावरु॑णा अ॒भ्यषि॑ञ्च॒न्याभि॒रिन्द्र॒मन॑य॒न्नत्यरा॑तीः
vṛṣṇa̍ ū̱rmira̍si rāṣṭra̱dā rā̱ṣṭraṃ me̍ dehi̱ svāhā̱ vṛṣṇa̍ ū̱rmira̍si rāṣṭra̱dā rā̱ṣṭrama̱muṣmai̍ dehi |
vṛ̱ṣa̱se̱no̍'si rāṣṭra̱dā rā̱ṣṭraṃ me̍ dehi̱ svāhā̍ vṛṣase̱no̍'si rāṣṭra̱dā rā̱ṣṭrama̱muṣmai̍ dehi
||11.7||वृष्ण॑ ऊ॒र्मिर॑सि राष्ट्र॒दा रा॒ष्ट्रं मे॑ देहि॒ स्वाहा॒ वृष्ण॑ ऊ॒र्मिर॑सि राष्ट्र॒दा रा॒ष्ट्रम॒मुष्मै॑ देहि ।
वृ॒ष॒से॒नो॑ऽसि राष्ट्र॒दा रा॒ष्ट्रं मे॑ देहि॒ स्वाहा॑ वृषसे॒नो॑ऽसि राष्ट्र॒दा रा॒ष्ट्रम॒मुष्मै॑ देहि
a̱rtheta̍ stha rāṣṭra̱dā rā̱ṣṭraṃ me̍ datta̱ svāhā̱rtheta̍ stha rāṣṭra̱dā rā̱ṣṭrama̱muṣmai̍ datta |
oja̍svatī stha rāṣṭra̱dā rā̱ṣṭraṃ me̍ datta̱ svāhauja̍svatī stha rāṣṭra̱dā rā̱ṣṭrama̱muṣmai̍ datta |
āpa̍ḥ parivā̱hiṇī̍ stha rāṣṭra̱dā rā̱ṣṭraṃ me̍ datta̱ svāhāpa̍ḥ parivā̱hiṇī̍ stha rāṣṭra̱dā rā̱ṣṭrama̱muṣmai̍ datta |
a̱pāṃ pati̍rasi rāṣṭra̱dā rā̱ṣṭraṃ me̍ dehi̱ svāhā̱pāṃ pati̍rasi rāṣṭra̱dā rā̱ṣṭrama̱muṣmai̍ dehi |
a̱pāṃ garbho̍'si rāṣṭra̱dā rā̱ṣṭraṃ me̍ dehi̱ svāhā̱pāṃ garbho̍'si rāṣṭra̱dā rā̱ṣṭrama̱muṣmai̍ dehi |
sūrya̍varcasa stha rāṣṭra̱dā rā̱ṣṭraṃ me̍ datta̱ svāhā̱ sūrya̍varcasa stha rāṣṭra̱dā rā̱ṣṭrama̱muṣmai̍ datta |
sūrya̍tvaca stha rāṣṭra̱dā rā̱ṣṭraṃ me̍ datta̱ svāhā̱ sūrya̍tvaca stha rāṣṭra̱dā rā̱ṣṭrama̱muṣmai̍ datta |
vra̱ja̱kṣita̍ stha rāṣṭra̱dā rā̱ṣṭraṃ me̍ datta̱ svāhā̍ vraja̱kṣita̍ stha rāṣṭra̱dā rā̱ṣṭrama̱muṣmai̍ datta |
vāśā̍ stha rāṣṭra̱dā rā̱ṣṭraṃ me̍ datta̱ svāhā̱ vāśā̍ stha rāṣṭra̱dā rā̱ṣṭrama̱muṣmai̍ datta |
māṃdā̍ stha rāṣṭra̱dā rā̱ṣṭraṃ me̍ datta̱ svāhā̱ māṃdā̍ stha rāṣṭra̱dā rā̱ṣṭrama̱muṣmai̍ datta |
śakva̍rī stha rāṣṭra̱dā rā̱ṣṭraṃ me̍ datta̱ svāhā̱ śakva̍rī stha rāṣṭra̱dā rā̱ṣṭrama̱muṣmai̍ datta |
ja̱na̱bhṛta̍ stha rāṣṭra̱dā rā̱ṣṭraṃ me̍ datta̱ svāhā̍ jana̱bhṛta̍ stha rāṣṭra̱dā rā̱ṣṭrama̱muṣmai̍ datta |
vi̱śva̱bhṛta̍ stha rāṣṭra̱dā rā̱ṣṭraṃ me̍ datta̱ svāhā̍ viśva̱bhṛta̍ stha rāṣṭra̱dā rā̱ṣṭrama̱muṣmai̍ datta |
śaiṣṭhā̍ stha rāṣṭra̱dā rā̱ṣṭraṃ me̍ datta̱ svāhā̱ śaiṣṭhā̍ stha rāṣṭra̱dā rā̱ṣṭrama̱muṣmai̍ datta |
āpa̱ḥ svārā̍jñī stha rāṣṭra̱dā rā̱ṣṭrama̱muṣmai̍ datta
||11.8||अ॒र्थेत॑ स्थ राष्ट्र॒दा रा॒ष्ट्रं मे॑ दत्त॒ स्वाहा॒र्थेत॑ स्थ राष्ट्र॒दा रा॒ष्ट्रम॒मुष्मै॑ दत्त ।
ओज॑स्वती स्थ राष्ट्र॒दा रा॒ष्ट्रं मे॑ दत्त॒ स्वाहौज॑स्वती स्थ राष्ट्र॒दा रा॒ष्ट्रम॒मुष्मै॑ दत्त ।
आपः॑ परिवा॒हिणी॑ स्थ राष्ट्र॒दा रा॒ष्ट्रं मे॑ दत्त॒ स्वाहापः॑ परिवा॒हिणी॑ स्थ राष्ट्र॒दा रा॒ष्ट्रम॒मुष्मै॑ दत्त ।
अ॒पां पति॑रसि राष्ट्र॒दा रा॒ष्ट्रं मे॑ देहि॒ स्वाहा॒पां पति॑रसि राष्ट्र॒दा रा॒ष्ट्रम॒मुष्मै॑ देहि ।
अ॒पां गर्भो॑ऽसि राष्ट्र॒दा रा॒ष्ट्रं मे॑ देहि॒ स्वाहा॒पां गर्भो॑ऽसि राष्ट्र॒दा रा॒ष्ट्रम॒मुष्मै॑ देहि ।
सूर्य॑वर्चस स्थ राष्ट्र॒दा रा॒ष्ट्रं मे॑ दत्त॒ स्वाहा॒ सूर्य॑वर्चस स्थ राष्ट्र॒दा रा॒ष्ट्रम॒मुष्मै॑ दत्त ।
सूर्य॑त्वच स्थ राष्ट्र॒दा रा॒ष्ट्रं मे॑ दत्त॒ स्वाहा॒ सूर्य॑त्वच स्थ राष्ट्र॒दा रा॒ष्ट्रम॒मुष्मै॑ दत्त ।
व्र॒ज॒क्षित॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ व्रज॒क्षित॑ स्थ राष्ट्र॒दा रा॒ष्ट्रम॒मुष्मै॑ दत्त ।
वाशा॑ स्थ राष्ट्र॒दा रा॒ष्ट्रं मे॑ दत्त॒ स्वाहा॒ वाशा॑ स्थ राष्ट्र॒दा रा॒ष्ट्रम॒मुष्मै॑ दत्त ।
मांदा॑ स्थ राष्ट्र॒दा रा॒ष्ट्रं मे॑ दत्त॒ स्वाहा॒ मांदा॑ स्थ राष्ट्र॒दा रा॒ष्ट्रम॒मुष्मै॑ दत्त ।
शक्व॑री स्थ राष्ट्र॒दा रा॒ष्ट्रं मे॑ दत्त॒ स्वाहा॒ शक्व॑री स्थ राष्ट्र॒दा रा॒ष्ट्रम॒मुष्मै॑ दत्त ।
ज॒न॒भृत॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ जन॒भृत॑ स्थ राष्ट्र॒दा रा॒ष्ट्रम॒मुष्मै॑ दत्त ।
वि॒श्व॒भृत॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ विश्व॒भृत॑ स्थ राष्ट्र॒दा रा॒ष्ट्रम॒मुष्मै॑ दत्त ।
शैष्ठा॑ स्थ राष्ट्र॒दा रा॒ष्ट्रं मे॑ दत्त॒ स्वाहा॒ शैष्ठा॑ स्थ राष्ट्र॒दा रा॒ष्ट्रम॒मुष्मै॑ दत्त ।
आपः॒ स्वारा॑ज्ञी स्थ राष्ट्र॒दा रा॒ष्ट्रम॒मुष्मै॑ दत्त
saṃ madhu̍matī̱rmadhu̍matībhiḥ pṛcyaṃtā̱ṃ mahi̍ kṣa̱traṃ kṣa̱triyā̍ya vanvā̱nāḥ |
anā̍dhṛṣṭāḥ sīdata sa̱hauja̍sā̱ mahi̍ kṣa̱traṃ kṣa̱triyā̍ya̱ dadha̍tīḥ
||11.9||सं मधु॑मती॒र्मधु॑मतीभिः पृच्यंतां॒ महि॑ क्ष॒त्रं क्ष॒त्रिया॑य वन्वा॒नाः ।
अना॑धृष्टाः सीदत स॒हौज॑सा॒ महि॑ क्ष॒त्रं क्ष॒त्रिया॑य॒ दध॑तीः
sa̱vi̱tā tvā̍ prasa̱vānā̍ suvatāma̱gnirgṛ̱hapa̍tīnā̱ somo̱ vana̱spatī̍nām |
bṛha̱spati̍rvā̱ca indro̱ jyaiṣṭhyā̍ya ru̱draḥ pa̍śū̱nāṃ mi̱traḥ sa̱tyāya̱ varu̍ṇo̱ dharma̍patīnām
||11.10||स॒वि॒ता त्वा॑ प्रस॒वाना॑ सुवताम॒ग्निर्गृ॒हप॑तीना॒ सोमो॒ वन॒स्पती॑नाम् ।
बृह॒स्पति॑र्वा॒च इन्द्रो॒ ज्यैष्ठ्या॑य रु॒द्रः प॑शू॒नां मि॒त्रः स॒त्याय॒ वरु॑णो॒ धर्म॑पतीनाम्
i̱maṃ de̍vā asapa̱tna su̍vadhvaṃ maha̱te kṣa̱trāya̍ maha̱te jyai̍ṣṭhyāya|
i̱mama̱muma̱muṣya̍ pu̱trama̱muṣyā̍ḥ pu̱trama̱syai vi̱śe
||11.11||इ॒मं दे॑वा असप॒त्न सु॑वध्वं मह॒ते क्ष॒त्राय॑ मह॒ते ज्यै॑ष्ठ्याय।
इ॒मम॒मुम॒मुष्य॑ पु॒त्रम॒मुष्याः॑ पु॒त्रम॒स्यै वि॒शे
e̱ṣa va̍ḥ kuravo̱ rājai̱ṣa va̍ḥ pañcālā̱ rājā̍ | somo̱'smāka̍ṃ brāhma̱ṇānā̱ rājā̍
||11.12||ए॒ष वः॑ कुरवो॒ राजै॒ष वः॑ पञ्चाला॒ राजा॑ । सोमो॒ऽस्माकं॑ ब्राह्म॒णाना॒ राजा॑
soma̍sya̱ tviṣi̍rasya̱gnaye̱ svāhā̱ somā̍ya̱ svāhā̍ savi̱tre svāhā̱ sara̍svatyai̱ svāhā̍ |
pū̱ṣṇe svāhā̱ bṛha̱spata̍ye̱ svāhā̍
||11.13||सोम॑स्य॒ त्विषि॑रस्य॒ग्नये॒ स्वाहा॒ सोमा॑य॒ स्वाहा॑ सवि॒त्रे स्वाहा॒ सर॑स्वत्यै॒ स्वाहा॑ ।
पू॒ष्णे स्वाहा॒ बृह॒स्पत॑ये॒ स्वाहा॑
iṃdrā̍ya̱ svāhāśā̍ya̱ svāhā̱ ślokā̍ya̱ svāhā̱ ghoṣā̍ya̱ svāhā̱ bhagā̍ya̱ svāhā̍rya̱mṇe svāhā̍ |
sa̱vi̱turva̍ḥ prasa̱va utpu̍nā̱myacchi̍dreṇa pa̱vitre̍ṇa̱ sūrya̍sya ra̱śmibhi̍ḥ |
ani̍bhṛṣṭamasi vā̱co bandhu̍stapo̱jāḥ soma̍sya dā̱trama̍si̱ svāhā̍ rāja̱sva̍ḥ
||11.14||इंद्रा॑य॒ स्वाहाशा॑य॒ स्वाहा॒ श्लोका॑य॒ स्वाहा॒ घोषा॑य॒ स्वाहा॒ भगा॑य॒ स्वाहा॑र्य॒म्णे स्वाहा॑ ।
स॒वि॒तुर्वः॑ प्रस॒व उत्पु॑ना॒म्यच्छि॑द्रेण प॒वित्रे॑ण॒ सूर्य॑स्य र॒श्मिभिः॑ ।
अनि॑भृष्टमसि वा॒चो बन्धु॑स्तपो॒जाः सोम॑स्य दा॒त्रम॑सि॒ स्वाहा॑ राज॒स्वः॑
sa̱dha̱mādo̍ dyu̱mninī̱rāpa̍ e̱tā anā̍dhṛṣṭā apa̱syo̱ vasā̍nāḥ |
pa̱styā̍su cakre̱ varu̍ṇaḥ sa̱dhastha̍ma̱pā śiśu̍rmā̱tṛta̍māsva̱ṃtaḥ
||11.15||स॒ध॒मादो॑ द्यु॒म्निनी॒राप॑ ए॒ता अना॑धृष्टा अप॒स्यो॒ वसा॑नाः ।
प॒स्त्या॑सु चक्रे॒ वरु॑णः स॒धस्थ॑म॒पा शिशु॑र्मा॒तृत॑मास्वं॒तः
kṣa̱trasyolva̍masi kṣa̱trasya̍ ja̱rāyva̍si kṣa̱trasya̱ nābhi̍rasi kṣa̱trasya̱ yoni̍rasi |
indra̍sya̱ vātra̍ghnamasi̱ tvayā̱yaṃ vṛ̱traṃ va̍dhyānmi̱trasyā̍si̱ varu̍ṇasyāsi
||11.16||क्ष॒त्रस्योल्व॑मसि क्ष॒त्रस्य॑ ज॒राय्व॑सि क्ष॒त्रस्य॒ नाभि॑रसि क्ष॒त्रस्य॒ योनि॑रसि ।
इन्द्र॑स्य॒ वात्र॑घ्नमसि॒ त्वया॒यं वृ॒त्रं व॑ध्यान्मि॒त्रस्या॑सि॒ वरु॑णस्यासि
ru̱jāsi̍ dru̱vāsi̍ kṣu̱pāsi̍ | pā̱taina̱ṃ prāñca̍ṃ pā̱taina̍ṃ pra̱tyañca̍ṃ pā̱taina̍ṃ ti̱ryañca̍ṃ di̱gbhyaḥ pā̍ta
||11.17||रु॒जासि॑ द्रु॒वासि॑ क्षु॒पासि॑ । पा॒तैनं॒ प्राञ्चं॑ पा॒तैनं॑ प्र॒त्यञ्चं॑ पा॒तैनं॑ ति॒र्यञ्चं॑ दि॒ग्भ्यः पा॑त
ā̱virma̍ryā̱ āvi̍tto a̱gnirgṛ̱hapa̍ti̱rāvi̍tta̱ indro̍ vṛ̱ddhaśra̍vā̱ āvi̍ttaḥ pū̱ṣā vi̱śvave̍dā̱ āvi̍ttau mi̱trāvaru̍ṇau dhṛ̱tavra̍tau |
āvi̍tte̱ dyāvā̍pṛthi̱vī vi̱śvaśa̍ṃbhū̱ āvi̱ttādi̍tiru̱ruśa̍rmā
||11.18||आ॒विर्म॑र्या॒ आवि॑त्तो अ॒ग्निर्गृ॒हप॑ति॒रावि॑त्त॒ इन्द्रो॑ वृ॒द्धश्र॑वा॒ आवि॑त्तः पू॒षा वि॒श्ववे॑दा॒ आवि॑त्तौ मि॒त्रावरु॑णौ धृ॒तव्र॑तौ ।
आवि॑त्ते॒ द्यावा॑पृथि॒वी वि॒श्वशं॑भू॒ आवि॒त्तादि॑तिरु॒रुश॑र्मा
ave̍ṣṭā danda̱śūkā̱ḥ prācī̱māro̍ha gāya̱trī tvā̍vatu | ra̱tha̱nta̱ra sāma̍ tri̱vṛtstomo̍ vasa̱ntaṛ̱turbrahma̱ dravi̍ṇam
||11.19||अवे॑ष्टा दन्द॒शूकाः॒ प्राची॒मारो॑ह गाय॒त्री त्वा॑वतु । र॒थ॒न्त॒र साम॑ त्रि॒वृत्स्तोमो॑ वस॒न्तऋ॒तुर्ब्रह्म॒ द्रवि॑णम्
dakṣi̍ṇā̱māro̍ha tri̱ṣṭup tvā̍vatu | bṛ̱hatsāma̍ pañcada̱śa stomo̍ grī̱ṣmaṛ̱tuḥ kṣa̱traṃ dravi̍ṇam
||11.20||दक्षि॑णा॒मारो॑ह त्रि॒ष्टुप् त्वा॑वतु । बृ॒हत्साम॑ पञ्चद॒श स्तोमो॑ ग्री॒ष्मऋ॒तुः क्ष॒त्रं द्रवि॑णम्
pra̱tīcī̱māro̍ha̱ jaga̍tī tvāvatu | vai̱rū̱pa sāma̍ saptada̱śa stomo̍ va̱rṣā ṛ̱turviḍ dravi̍ṇam
||11.21||प्र॒तीची॒मारो॑ह॒ जग॑ती त्वावतु । वै॒रू॒प साम॑ सप्तद॒श स्तोमो॑ व॒र्षा ऋ॒तुर्विड् द्रवि॑णम्
udī̍cī̱māro̍hānu̱ṣṭup tvā̍vatu | vai̱rā̱ja sāmai̍kavi̱śa stoma̍ḥ śa̱radṛ̱tuḥ phala̱ṃ dravi̍ṇam
||11.22||उदी॑ची॒मारो॑हानु॒ष्टुप् त्वा॑वतु । वै॒रा॒ज सामै॑कवि॒श स्तोमः॑ श॒रदृ॒तुः फलं॒ द्रवि॑णम्
ū̱rdhvāmāro̍ha pa̱ṅktistvā̍vatu | śā̱kva̱ra̱rai̱va̱te sāma̍nī triṇavatrayastri̱śau stomau̍ hemantaśiśi̱rā ṛ̱tū varco̱ dravi̍ṇam |
pratya̍sta̱ṃ namu̍ce̱ḥ śira̍ḥ
||11.23||ऊ॒र्ध्वामारो॑ह प॒ङ्क्तिस्त्वा॑वतु । शा॒क्व॒र॒रै॒व॒ते साम॑नी त्रिणवत्रयस्त्रि॒शौ स्तोमौ॑ हेमन्तशिशि॒रा ऋ॒तू वर्चो॒ द्रवि॑णम् ।
प्रत्य॑स्तं॒ नमु॑चेः॒ शिरः॑
soma̍sya̱ tviṣi̍rasi̱ tave̍va me̱ tviṣi̍rbhūyāt | mṛ̱tyoḥ pā̱hyojo̍'si̱ saho̍'sya̱mṛta̍masi
||11.24||सोम॑स्य॒ त्विषि॑रसि॒ तवे॑व मे॒ त्विषि॑र्भूयात् । मृ॒त्योः पा॒ह्योजो॑ऽसि॒ सहो॑ऽस्य॒मृत॑मसि
hira̍ṇyarūpā u̱ṣaso̍ viro̱ka u̱bhā indrā̱ udi̍ta̱ḥ sūrya̍śca |
āro̍hataṃ varuṇa mitra̱ garta̱ṃ tata̍ścakṣāthā̱madi̍ti̱ṃ diti̍ṃ ca | mi̱tro̍'si̱ varu̍ṇo'si
||11.25||हिर॑ण्यरूपा उ॒षसो॑ विरो॒क उ॒भा इन्द्रा॒ उदि॑तः॒ सूर्य॑श्च ।
आरो॑हतं वरुण मित्र॒ गर्तं॒ तत॑श्चक्षाथा॒मदि॑तिं॒ दितिं॑ च । मि॒त्रो॑ऽसि॒ वरु॑णोऽसि
soma̍sya tvā dyu̱mnenā̱bhiṣi̍ñcāmya̱gnerbhrāja̍sā̱ sūrya̍sya̱ varca̍sā | indra̍syeṃdri̱yeṇa̍ ma̱rutā̱moja̍sā kṣa̱trāṇā̍ṃ kṣa̱trapa̍tire̱dhyati̍ di̱dyūnpā̍hi
||11.26||सोम॑स्य त्वा द्यु॒म्नेना॒भिषि॑ञ्चाम्य॒ग्नेर्भ्राज॑सा॒ सूर्य॑स्य॒ वर्च॑सा । इन्द्र॑स्येंद्रि॒येण॑ म॒रुता॒मोज॑सा क्ष॒त्राणां॑ क्ष॒त्रप॑तिरे॒ध्यति॑ दि॒द्यून्पा॑हि
i̱maṃ de̍vā asapa̱tna su̍vadhvaṃ maha̱te kṣa̱trāya̍ maha̱te jyaiṣṭhyā̍ya maha̱te jāna̍rājyāya |
i̱mama̱muma̱muṣya̍ pu̱trama̱muṣyā̍ḥ pu̱tramasyai vi̱śe
||11.27||इ॒मं दे॑वा असप॒त्न सु॑वध्वं मह॒ते क्ष॒त्राय॑ मह॒ते ज्यैष्ठ्या॑य मह॒ते जान॑राज्याय ।
इ॒मम॒मुम॒मुष्य॑ पु॒त्रम॒मुष्याः॑ पु॒त्रमस्यै वि॒शे
e̱ṣa va̍ḥ kuravo̱ rājai̱ṣa va̍ḥ pañcālā̱ rājā̱ | somo̱'smāka̍ṃ brāhma̱ṇānā̱ rājā̍
||11.28||ए॒ष वः॑ कुरवो॒ राजै॒ष वः॑ पञ्चाला॒ राजा॒ । सोमो॒ऽस्माकं॑ ब्राह्म॒णाना॒ राजा॑
pra parva̍tasya vṛṣa̱bhasya̍ pṛ̱ṣṭhānnāva̍ścaranti sva̱sica̍ iyā̱nāḥ| tā āva̍vṛtrannadha̱rāguda̱ktā ahi̍ṃ bu̱dhnya̱manu̱ rīya̍māṇāḥ |
viṣṇo̍rvi̱krama̍ṇamasi̱ viṣṇo̱rvikrā̍ntamasi̱ viṣṇo̍ḥ krā̱ntama̍si
||11.29||प्र पर्व॑तस्य वृष॒भस्य॑ पृ॒ष्ठान्नाव॑श्चरन्ति स्व॒सिच॑ इया॒नाः। ता आव॑वृत्रन्नध॒रागुद॒क्ता अहिं॑ बु॒ध्न्य॒मनु॒ रीय॑माणाः ।
विष्णो॑र्वि॒क्रम॑णमसि॒ विष्णो॒र्विक्रा॑न्तमसि॒ विष्णोः॑ क्रा॒न्तम॑सि
prajā̍pate̱ na tvade̱tānya̱nyo viśvā̍ rū̱pāṇi̱ pari̱ tā ba̍bhūva |
yatkā̍māste juhu̱mastanno̍ astu va̱ya syā̍ma̱ pata̍yo rayī̱ṇām
||11.30||प्रजा॑पते॒ न त्वदे॒तान्य॒न्यो विश्वा॑ रू॒पाणि॒ परि॒ ता ब॑भूव ।
यत्का॑मास्ते जुहु॒मस्तन्नो॑ अस्तु व॒य स्या॑म॒ पत॑यो रयी॒णाम्
rudra̱ yatte̱ kravi̱ para̱ṃ nāma̱ | tasmai̍ hu̱tama̍syame̱ṣṭama̍si̱ svāhā̍
||11.31||रुद्र॒ यत्ते॒ क्रवि॒ परं॒ नाम॒ । तस्मै॑ हु॒तम॑स्यमे॒ष्टम॑सि॒ स्वाहा॑
indra̍sya̱ vajro̍'si mi̱trāvaru̍ṇayostvā praśā̱stroḥ pra̱śiṣā̍ yunajmi |
avya̍thāyai tvā sva̱dhāyai̱ tvāri̍ṣṭa̱ḥ phalgu̍naḥ | ma̱rutā̍ṃ prasa̱vena̍ ja̱yāpā̍ma̱ mana̍sā̱ sami̍ndri̱yeṇa̍
||11.32||इन्द्र॑स्य॒ वज्रो॑ऽसि मि॒त्रावरु॑णयोस्त्वा प्रशा॒स्त्रोः प्र॒शिषा॑ युनज्मि ।
अव्य॑थायै त्वा स्व॒धायै॒ त्वारि॑ष्टः॒ फल्गु॑नः । म॒रुतां॑ प्रस॒वेन॑ ज॒यापा॑म॒ मन॑सा॒ समि॑न्द्रि॒येण॑
mā ta̍ iṃdra te va̱yaṃ tu̍rāṣā̱l̤ayu̍ktāso abra̱hmatā̱ vida̍sāma |
tiṣṭhā̱ ratha̱madhi̱ yadva̍jraha̱stā ra̱śmīnde̍va yuvase̱ svaśvā̍n
||11.33||मा त॑ इंद्र ते व॒यं तु॑राषा॒ळयु॑क्तासो अब्र॒ह्मता॒ विद॑साम ।
तिष्ठा॒ रथ॒मधि॒ यद्व॑ज्रह॒स्ता र॒श्मीन्दे॑व युवसे॒ स्वश्वा॑न्
a̱gnaye̍ gṛ̱hapa̍taye̱ svāhā̱ somā̍ya̱ vana̱spata̍ye̱ svāhā̍ | indra̍syendri̱yāya̱ svāhā̍ ma̱rutā̱moja̍se̱ svāhā̍ |
pṛthi̍vi māta̱rmā mā̍ hisī̱rmo a̱haṃ tvām
||11.34||अ॒ग्नये॑ गृ॒हप॑तये॒ स्वाहा॒ सोमा॑य॒ वन॒स्पत॑ये॒ स्वाहा॑ । इन्द्र॑स्येन्द्रि॒याय॒ स्वाहा॑ म॒रुता॒मोज॑से॒ स्वाहा॑ ।
पृथि॑वि मात॒र्मा मा॑ हिसी॒र्मो अ॒हं त्वाम्
ha̱saḥ śu̍ci̱ṣadvasu̍rantarikṣa̱saddhotā̍ vedi̱ṣadati̍thirduroṇa̱sat |
nṛ̱ṣadva̍ra̱sadṛ̍ta̱sadvyo̍ma̱sada̱bjā go̱jā ṛ̍ta̱jā a̍dri̱jā ṛ̱taṃ bṛ̱hat
||11.35||ह॒सः शु॑चि॒षद्वसु॑रन्तरिक्ष॒सद्धोता॑ वेदि॒षदति॑थिर्दुरोण॒सत् ।
नृ॒षद्व॑र॒सदृ॑त॒सद्व्यो॑म॒सद॒ब्जा गो॒जा ऋ॑त॒जा अ॑द्रि॒जा ऋ॒तं बृ॒हत्
iya̍da̱syāyu̍ra̱syāyu̍rme dehi̱ yuṅṅa̍si̱ varco̍'si̱ varco̍ me dehi |
ūrga̱syūrja̱ṃ mayi̍ dhe̱hīndra̍sya vāṃ bā̱hū vī̍rya̱kṛtā̍ u̱pāva̍harāmi
||11.36||इय॑द॒स्यायु॑र॒स्यायु॑र्मे देहि॒ युङ्ङ॑सि॒ वर्चो॑ऽसि॒ वर्चो॑ मे देहि ।
ऊर्ग॒स्यूर्जं॒ मयि॑ धे॒हीन्द्र॑स्य वां बा॒हू वी॑र्य॒कृता॑ उ॒पाव॑हरामि
syo̱nāsi̍ su̱ṣadā̍si kṣa̱trasya̱ yoni̍rasi |
syo̱nāmāsī̍da su̱ṣadā̱māsī̍da kṣa̱trasya̱ yoni̱māsī̍da
||11.37||स्यो॒नासि॑ सु॒षदा॑सि क्ष॒त्रस्य॒ योनि॑रसि ।
स्यो॒नामासी॑द सु॒षदा॒मासी॑द क्ष॒त्रस्य॒ योनि॒मासी॑द
niṣa̍sāda dhṛ̱tavra̍to̱ varu̍ṇaḥ pa̱styā̱svā | sāmrā̍jyāya su̱kratu̍ḥ
||11.38||निष॑साद धृ॒तव्र॑तो॒ वरु॑णः प॒स्त्या॒स्वा । साम्रा॑ज्याय सु॒क्रतुः॑
a̱bhi̱bhūra̱syayā̍nāme̱tāste̱ pañca̱ diśa̍ḥ kalpantām | brahma̱stvaṃ brahmā̍si
||11.39||अ॒भि॒भूर॒स्यया॑नामे॒तास्ते॒ पञ्च॒ दिशः॑ कल्पन्ताम् । ब्रह्म॒स्त्वं ब्रह्मा॑सि
sa̱vi̱tāsi̍ sa̱tyapra̍savo̱ varu̍ṇo'si sa̱tyaujā̍ḥ | indro̍'si̱ viśau̍jā ru̱dro̍'si su̱śeva̍ḥ
||11.40||स॒वि॒तासि॑ स॒त्यप्र॑सवो॒ वरु॑णोऽसि स॒त्यौजाः॑ । इन्द्रो॑ऽसि॒ विशौ॑जा रु॒द्रो॑ऽसि सु॒शेवः॑
priya̍ṃkara̱ śreya̍skara̱ bhūya̍skara | indra̍sya̱ vajro̍'si̱ tena̍ me radhya
||11.41||प्रियं॑कर॒ श्रेय॑स्कर॒ भूय॑स्कर । इन्द्र॑स्य॒ वज्रो॑ऽसि॒ तेन॑ मे रध्य
a̱gniḥ pṛ̱thurdharma̍ṇa̱spati̍rjuṣā̱ṇo a̱gniḥ pṛ̱thurdharma̍ṇa̱spati̍ḥ | ājya̍sya ha̱viṣo̍ vetu̱ svāhā̍ |
svāhā̍kṛtā̱ḥ sūrya̍sya ra̱śmibhi̍ryatadhva sajā̱tānā̍ṃ madhya̱meṣṭhyā̍ya
||11.42||अ॒ग्निः पृ॒थुर्धर्म॑ण॒स्पति॑र्जुषा॒णो अ॒ग्निः पृ॒थुर्धर्म॑ण॒स्पतिः॑ । आज्य॑स्य ह॒विषो॑ वेतु॒ स्वाहा॑ ।
स्वाहा॑कृताः॒ सूर्य॑स्य र॒श्मिभि॑र्यतध्व सजा॒तानां॑ मध्य॒मेष्ठ्या॑य
sa̱vi̱trāpra̍savi̱trā sara̍svatyāvā̱cā || tvaṣṭrā̍ rū̱paiḥ pū̱ṣṇā pa̱śubhi̱rindre̍ṇā̱smai
||11.43||स॒वि॒त्राप्र॑सवि॒त्रा सर॑स्वत्यावा॒चा ॥ त्वष्ट्रा॑ रू॒पैः पू॒ष्णा प॒शुभि॒रिन्द्रे॑णा॒स्मै
bṛha̱spati̍nā̱ brahma̍ṇā̱ varu̍ṇe̱nauja̍sā̱gninā̱ teja̍sā̱ some̍na̱ rājñā̍ | viṣṇu̍nā de̱vata̍yā daśa̱myema̍ṃ ya̱jñaṃ viṣṇu̍māpnavāni
||11.44||बृह॒स्पति॑ना॒ ब्रह्म॑णा॒ वरु॑णे॒नौज॑सा॒ग्निना॒ तेज॑सा॒ सोमे॑न॒ राज्ञा॑ । विष्णु॑ना दे॒वत॑या दश॒म्येमं॑ य॒ज्ञं विष्णु॑माप्नवानि
a̱śvibhyā̍ṃ pacyasva̱ sara̍svatyai pacya̱svendrā̍ya su̱trāmṇe̍ pacyasva |
vā̱yoḥ pū̱taḥ pa̱vitre̍ṇa pra̱tyaṅ somo̱ ati̍srutaḥ | indra̍sya̱ yujya̱ḥ sakhā̍
||11.45||अ॒श्विभ्यां॑ पच्यस्व॒ सर॑स्वत्यै पच्य॒स्वेन्द्रा॑य सु॒त्राम्णे॑ पच्यस्व ।
वा॒योः पू॒तः प॒वित्रे॑ण प्र॒त्यङ् सोमो॒ अति॑स्रुतः । इन्द्र॑स्य॒ युज्यः॒ सखा॑
ku̱vida̱ṅga yava̍manto̱ yava̍ṃ ci̱dyathā̱ dāntya̍nupū̱rvaṃ vi̱yūya̍ |
i̱hehai̍ṣāṃ kṛṇuhi̱ bhoja̍nāni̱ ye ba̱rhiṣo̱ nama̍ukti̱ṃ na ja̱gmuḥ |
u̱pa̱yā̱magṛ̍hīto'sya̱śvibhyā̍ṃ tvā̱ sara̍svatyai̱ tvendrā̍ya tvā su̱trāmṇe̍
||11.46||कु॒विद॒ङ्ग यव॑मन्तो॒ यवं॑ चि॒द्यथा॒ दान्त्य॑नुपू॒र्वं वि॒यूय॑ ।
इ॒हेहै॑षां कृणुहि॒ भोज॑नानि॒ ये ब॒र्हिषो॒ नम॑उक्तिं॒ न ज॒ग्मुः ।
उ॒प॒या॒मगृ॑हीतोऽस्य॒श्विभ्यां॑ त्वा॒ सर॑स्वत्यै॒ त्वेन्द्रा॑य त्वा सु॒त्राम्णे॑
yu̱va su̱rāma̍maśvinā̱ namu̍cā āsu̱re sacā̍ | vi̱pi̱pā̱nā śu̍bhaspatī̱ indra̱ṃ karma̍svāvatam
||11.47||यु॒व सु॒राम॑मश्विना॒ नमु॑चा आसु॒रे सचा॑ । वि॒पि॒पा॒ना शु॑भस्पती॒ इन्द्रं॒ कर्म॑स्वावतम्