Vājasaneyi Kanva Saṃhitā — Chapter 31 (51 mantras)
Vājasaneyi Kanva Saṃhitā — Chapter 31
Section titled “Vājasaneyi Kanva Saṃhitā — Chapter 31”atha caturtho daśakaḥ|| athaikatriṃśo’dhyāyaḥ|
Mantras
Section titled “Mantras”Mantra 1 {#mantra-1}
Section titled “Mantra 1 {#mantra-1}”Adhyāya: 31 | Mantra: 1
sami̍ddho a̱ñjankṛda̍raṃ matī̱nāṃ ghṛ̱tama̍gne̱ madhu̍ma̱tpinva̍mānaḥ | vā̱jī vaha̍nvā̱jina̍ṃ jātavedo de̱vānā̍ṃ vakṣi pri̱yamā sa̱dhastha̍m
Mantra 2 {#mantra-2}
Section titled “Mantra 2 {#mantra-2}”Adhyāya: 31 | Mantra: 2
ghṛ̱tenā̱ñjantsaṃ pa̱tho de̍va̱yānā̍nprajā̱nanvā̱jyapye̍tu de̱vān | anu̍ tvā sapte pra̱diśa̍ḥ sacantā sva̱dhāmasmai̱ yaja̍mānāya dhehi
Mantra 3 {#mantra-3}
Section titled “Mantra 3 {#mantra-3}”Adhyāya: 31 | Mantra: 3
īḍya̱ścāsi̱ vandya̍śca vājinnā̱śuścāsi̱ medhya̍śca sapte | a̱gniṣṭvā̍ de̱vairvasu̍bhiḥ sa̱joṣā̍ḥ prī̱taṃ vahni̍ṃ vahatu jā̱tave̍dāḥ
Mantra 4 {#mantra-4}
Section titled “Mantra 4 {#mantra-4}”Adhyāya: 31 | Mantra: 4
stī̱rṇaṃ ba̱rhiḥ su̱ṣṭarī̍mā ju̱ṣāṇoru pṛ̱thu pratha̍mānaṃ pṛthi̱vyām | de̱vebhi̍ryu̱ktamadi̍tiḥ sa̱joṣā̍ḥ syo̱naṃ kṛ̍ṇvā̱nā su̍vi̱te da̍dhātu
Mantra 5 {#mantra-5}
Section titled “Mantra 5 {#mantra-5}”Adhyāya: 31 | Mantra: 5
e̱tā u̍ vaḥ su̱bhagā̍ vi̱śvarū̍pā̱ vi pakṣo̍bhi̱ḥ śraya̍māṇā̱ udātai̍ḥ | ṛ̱ṣvāḥ sa̱tīḥ ka̱vaṣa̱ḥ śumbha̍mānā̱ dvāro̍ de̱vīḥ su̍prāya̱ṇā bha̍vantu
Mantra 6 {#mantra-6}
Section titled “Mantra 6 {#mantra-6}”Adhyāya: 31 | Mantra: 6
a̱nta̱rā mi̱trāvaru̍ṇā̱ cara̍ntī̱ mukha̍ṃ ya̱jñānā̍ma̱bhi sa̍ṃvidā̱ne | u̱ṣāsā̍ vā suhira̱ṇye su̍śi̱lpe ṛ̱tasya̱ yonā̍ i̱ha sā̍dayāmi
Mantra 7 {#mantra-7}
Section titled “Mantra 7 {#mantra-7}”Adhyāya: 31 | Mantra: 7
pra̱tha̱mā vā̍ sara̱thinā̍ su̱varṇā̍ devau̱ paśya̍ntau̱ bhuva̍nāni̱ viśvā̍ | api̍praya̱ṃ coda̍nā vā̱ṃ mimā̍nā̱ hotā̍rā̱ jyoti̍ḥ pra̱diśā̍ di̱śantā̍
Mantra 8 {#mantra-8}
Section titled “Mantra 8 {#mantra-8}”Adhyāya: 31 | Mantra: 8
ā̱di̱tyairno̱ bhāra̍tī vaṣṭu ya̱jña sara̍svatī sa̱ha ru̱drairna̍ āvīt | il̤opa̍hūtā̱ vasu̍bhiḥ sa̱joṣā̍ ya̱jñaṃ no̍ devīra̱mṛte̍ṣu dhatta
Mantra 9 {#mantra-9}
Section titled “Mantra 9 {#mantra-9}”Adhyāya: 31 | Mantra: 9
tvaṣṭā̍ vī̱raṃ de̱vakā̍maṃ jajāna̱ tvaṣṭu̱rarvā̍ jāyata ā̱śuraśva̍ḥ | tvaṣṭe̱daṃ viśva̱ṃ bhuva̍naṃ jajāna ba̱hoḥ ka̱rtāra̍mi̱ha ya̍kṣi hotaḥ
Mantra 10 {#mantra-10}
Section titled “Mantra 10 {#mantra-10}”Adhyāya: 31 | Mantra: 10
aśvo̍ ghṛ̱tena̱ tmanyā̱ sama̍kta̱ upa̍ de̱vām̐2 ṛ̍tu̱śaḥ pātha̍ etu | vana̱spati̍rdevalo̱kaṃ pra̍jā̱nanna̱gninā̍ ha̱vyā sva̍di̱tāni̍ vakṣat
Mantra 11 {#mantra-11}
Section titled “Mantra 11 {#mantra-11}”Adhyāya: 31 | Mantra: 11
pra̱jāpa̍te̱stapa̍sā vāvṛdhā̱naḥ sa̱dyo jā̱to da̍dhiṣe ya̱jñama̍gne | svāhā̍kṛtena ha̱viṣā̍ purogā yā̱hi sā̱dhyā ha̱vira̍dantu de̱vāḥ
Mantra 12 {#mantra-12}
Section titled “Mantra 12 {#mantra-12}”Adhyāya: 31 | Mantra: 12
ke̱tuṃ kṛ̱ṇvanna̍ke̱tave̱ peśo̍ maryā ape̱śase̍ | samu̱ṣadbhi̍rajāyathāḥ
Mantra 13 {#mantra-13}
Section titled “Mantra 13 {#mantra-13}”Adhyāya: 31 | Mantra: 13
jī̱mūta̍syeva bhavati̱ pratī̍ka̱ṃ yadva̱rmī yāti̍ sa̱madā̍mu̱pasthe̍ | anā̍viddhayā ta̱nvā̍ jaya̱ tva sa tvā̱ varma̍ṇo mahi̱mā pi̍partu
Mantra 14 {#mantra-14}
Section titled “Mantra 14 {#mantra-14}”Adhyāya: 31 | Mantra: 14
dhanva̍nā̱ gā dhanva̍nā̱jiṃ ja̍yema̱ dhanva̍nā tī̱vrāḥ sa̱mado̍ jayema | dhanu̱ḥ śatro̍rapakā̱maṃ kṛ̍ṇoti̱ dhanva̍nā̱ sarvā̍ḥ pra̱diśo̍ jayema
Mantra 15 {#mantra-15}
Section titled “Mantra 15 {#mantra-15}”Adhyāya: 31 | Mantra: 15
te ā̱cara̍ntī̱ sama̍neva̱ yoṣā̍ mā̱teva̍ pu̱traṃ bi̍bhṛtāmu̱pasthe̍ | apa̱ śatrū̍nvidhyatā saṃvidā̱ne ārtnī̍ i̱me vi̍ṣaphu̱rantī̍ a̱mitrā̍n
Mantra 16 {#mantra-16}
Section titled “Mantra 16 {#mantra-16}”Adhyāya: 31 | Mantra: 16
va̱kṣyantī̱vedā ga̍nīganti̱ karṇa̍ṃ pri̱ya sakhā̍yaṃ pariṣasvajā̱nā | yoṣe̍va śiṅkte̱ vita̱tādhi̱ dhanva̱n jyā i̱ya sama̍ne pā̱raya̍ntī
Mantra 17 {#mantra-17}
Section titled “Mantra 17 {#mantra-17}”Adhyāya: 31 | Mantra: 17
ahi̍riva bhogai̱ḥ parye̍ti bā̱huṃ jyāyā̍ he̱tiṃ pa̍ri̱bādha̍mānaḥ | ha̱sta̱ghno viśvā̍ va̱yunā̍ni vi̱dvānpumā̱npumā̍sa̱ṃ pari̍ pātu vi̱śvata̍ḥ
Mantra 18 {#mantra-18}
Section titled “Mantra 18 {#mantra-18}”Adhyāya: 31 | Mantra: 18
ba̱hvī̱nāṃ pi̱tā ba̱hura̍sya pu̱traści̱ścā kṛ̍ṇoti̱ sama̍nāva̱gatya̍ | i̱ṣu̱dhiḥ saṅkā̱ḥ pṛta̍nāśca̱ sarvā̍ḥ pṛ̱ṣṭhe nina̍ddho jayati̱ prasū̍taḥ
Mantra 19 {#mantra-19}
Section titled “Mantra 19 {#mantra-19}”Adhyāya: 31 | Mantra: 19
su̱pa̱rṇaṃ va̍ste mṛ̱go a̍syā̱ danto̱ gobhi̱ḥ saṃna̍ddhā patati̱ prasū̍tā | yatrā̱ nara̱ḥ saṃ ca̱ vi ca̱ drava̍nti̱ tatrā̱smabhya̱miṣa̍va̱ḥ śarma̍ yasan
Mantra 20 {#mantra-20}
Section titled “Mantra 20 {#mantra-20}”Adhyāya: 31 | Mantra: 20
vana̍spate vī̱ḍva̍ṅgo̱ hi bhū̱yā a̱smatsa̍khā pra̱tara̍ṇaḥ su̱vīra̍ḥ | gobhi̱ḥ saṃna̍ddho asi vī̱l̤aya̍svāsthā̱tā te̍ jayatu̱ jetvā̍ni
Mantra 21 {#mantra-21}
Section titled “Mantra 21 {#mantra-21}”Adhyāya: 31 | Mantra: 21
rathe̱ tiṣṭha̍nnayati vā̱jina̍ḥ pu̱ro yatra̍yatra kā̱maya̍te suṣāra̱thiḥ | a̱bhīśū̍nāṃ mahi̱māna̍ṃ panāyata̱ mana̍ḥ pa̱ścādanu̍ yacchanti ra̱śmaya̍ḥ
Mantra 22 {#mantra-22}
Section titled “Mantra 22 {#mantra-22}”Adhyāya: 31 | Mantra: 22
ā ja̍ṅghanti̱ sānve̍ṣāṃ ja̱ghanā̱m̐2 upa̍ jighnate | aśvā̍jani̱ prace̍ta̱so’śvā̍ntsa̱matsu̍ codaya
Mantra 23 {#mantra-23}
Section titled “Mantra 23 {#mantra-23}”Adhyāya: 31 | Mantra: 23
upa̍ śvāsaya pṛthi̱vīmu̱ta dyāṃ pu̍ru̱trā te̍ manutā̱ṃ viṣṭhi̍ta̱ṃ jaga̍t | sa du̍ndubhe̱ sa̱jūrindre̍ṇa de̱vairdū̱rāddavī̍yo̱ apa̍ sedha̱ śatrū̍n
Mantra 24 {#mantra-24}
Section titled “Mantra 24 {#mantra-24}”Adhyāya: 31 | Mantra: 24
yadakra̍ndaḥ pratha̱maṃ jāya̍māna u̱dyantsa̍mu̱drādu̱ta vā̱ purī̍ṣāt | śye̱nasya̍ pa̱kṣā ha̍ri̱ṇasya̍ bā̱hū u̍pa̱stutya̱ṃ mahi̍ jā̱taṃ te̍ arvan
Mantra 25 {#mantra-25}
Section titled “Mantra 25 {#mantra-25}”Adhyāya: 31 | Mantra: 25
ya̱mena̍ da̱ttaṃ tri̱ta e̍namāyuna̱gindra̍ eṇaṃ pratha̱mo adhya̍tiṣṭhat | ga̱ndha̱rvo a̍sya raśa̱nāma̍gṛbhṇā̱tsūrā̱daśva̍ṃ vasavo̱ nira̍taṣṭa
Mantra 26 {#mantra-26}
Section titled “Mantra 26 {#mantra-26}”Adhyāya: 31 | Mantra: 26
asi̍ ya̱mo asyā̍di̱tyo a̍rva̱nnasi̍ tri̱to guhye̍na vra̱tena̍ | asi̱ some̍na sa̱mayā̱ vipṛ̍kta ā̱huste̱ trīṇi̍ di̱vi bandha̍nāni
Mantra 27 {#mantra-27}
Section titled “Mantra 27 {#mantra-27}”Adhyāya: 31 | Mantra: 27
trīṇi̍ ta āhurdi̱vi bandha̍nāni̱ trīṇya̱psu trīṇya̱ntaḥ sa̍mu̱dre | u̱teva̍ me̱ varu̍ṇaśchantsyarva̱nyatrā̍ ta ā̱huḥ pa̍ra̱maṃ ja̱nitra̍m
Mantra 28 {#mantra-28}
Section titled “Mantra 28 {#mantra-28}”Adhyāya: 31 | Mantra: 28
i̱mā te̍ vājinnava̱mārja̍nānī̱mā śa̱phānā̍ sani̱turni̱dhānā̍ | atrā̍ te bha̱drā ra̍śa̱nā a̍paśyamṛ̱tasya̱ yā a̍bhi̱rakṣa̍nti go̱pāḥ
Mantra 29 {#mantra-29}
Section titled “Mantra 29 {#mantra-29}”Adhyāya: 31 | Mantra: 29
ā̱tmāna̍ṃ te̱ mana̍sā̱rāda̍jānāma̱vo di̱vā pa̱taya̍ntaṃ pata̱ṅgam | śiro̍ apaśyaṃ pa̱thibhi̍ḥ su̱gebhi̍rare̱ṇubhi̱rjeha̍mānaṃ pata̱tri
Mantra 30 {#mantra-30}
Section titled “Mantra 30 {#mantra-30}”Adhyāya: 31 | Mantra: 30
atrā̍ te rū̱pamu̍tta̱mama̍paśya̱ṃ jigī̍ṣamāṇami̱ṣa ā pa̱de goḥ | ya̱dā te̱ marto̱ anu̱ bhoga̱māna̱l̤ādid grasi̍ṣṭha̱ oṣa̍dhīrajīgaḥ
Mantra 31 {#mantra-31}
Section titled “Mantra 31 {#mantra-31}”Adhyāya: 31 | Mantra: 31
anu̍ tvā̱ ratho̱ anu̱ maryo̍ arva̱nnanu̱ gāvo’nu̱ bhaga̍ḥ ka̱nīnā̍m | anu̱ vrātā̍sa̱stava̍ sa̱khyamī̍yu̱ranu̍ de̱vā ma̍mire vī̱rya̍ṃ te
Mantra 32 {#mantra-32}
Section titled “Mantra 32 {#mantra-32}”Adhyāya: 31 | Mantra: 32
hira̍ṇyaśṛ̱ṅgo’yo̍ asya̱ pādā̱ mano̍javā̱ ava̍ra̱ indra̍ āsīt | de̱vā ida̍sya havi̱radya̍māya̱nyo arva̍ntaṃ pratha̱mo a̱dhyati̍ṣṭhat
Mantra 33 {#mantra-33}
Section titled “Mantra 33 {#mantra-33}”Adhyāya: 31 | Mantra: 33
ī̱rmāntā̍sa̱ḥ sili̍kamadhyamāsa̱ḥ sa śūra̍ṇāso di̱vyāso̱ atyā̍ḥ | ha̱sā i̍va śreṇi̱śo ya̍tante̱ yadākṣi̍ṣurdi̱vyamajma̱maśvā̍ḥ
Mantra 34 {#mantra-34}
Section titled “Mantra 34 {#mantra-34}”Adhyāya: 31 | Mantra: 34
tava̱ śarī̍raṃ patayi̱ṣṇva̍rva̱ntava̍ ci̱ttaṃ vāta̍ iva̱ dhrajī̍mān | tava̱ śṛṅgā̍ṇi̱ viṣṭhi̍tā puru̱trāra̍ṇyeṣu̱ jarbhu̍rāṇā caranti
Mantra 35 {#mantra-35}
Section titled “Mantra 35 {#mantra-35}”Adhyāya: 31 | Mantra: 35
upa̱ prāgā̱cchasa̍naṃ vā̱jyarvā̍ deva̱drīcā̱ mana̍sā̱ dīdhyā̍naḥ | a̱jaḥ pu̱ro nī̍yate̱ nābhi̍ra̱syānu̍ pa̱ścātka̱vayo̍ yanti re̱bhāḥ
Mantra 36 {#mantra-36}
Section titled “Mantra 36 {#mantra-36}”Adhyāya: 31 | Mantra: 36
upa̱ prāgā̍tpara̱maṃ yatsa̱dhastha̱marvā̱m̐2 acchā̍ pi̱tara̍ṃ mā̱tara̍ṃ ca | a̱dyā de̱vānjuṣṭa̍tamo̱ hi ga̱myā athā śā̍ste dā̱śuṣe̱ vāryā̍ṇi
Mantra 37 {#mantra-37}
Section titled “Mantra 37 {#mantra-37}”Adhyāya: 31 | Mantra: 37
sami̍ddho a̱dya manu̍ṣo duro̱ṇe de̱vo de̱vānya̍jasi jātavedaḥ | ā ca̱ vaha̍ mitramahaściki̱tvāntvaṃ dū̱taḥ ka̱vira̍si̱ prace̍tāḥ
Mantra 38 {#mantra-38}
Section titled “Mantra 38 {#mantra-38}”Adhyāya: 31 | Mantra: 38
tanū̍napātpa̱tha ṛ̱tasya̱ yānā̱nmadhvā̍ sama̱ñjantsva̍dayā sujihva | manmā̍ni dhī̱bhiru̱ta ya̱jñamṛ̱ndhande̍va̱trā ca̍ kṛṇuhyadhva̱raṃ na̍ḥ
Mantra 39 {#mantra-39}
Section titled “Mantra 39 {#mantra-39}”Adhyāya: 31 | Mantra: 39
narā̱śasa̍sya mahi̱māna̍meṣā̱mupa̍ stoṣāma yaja̱tasya̍ ya̱jñaiḥ | ye su̱krata̍va̱ḥ śuca̍yo dhiya̱ṃdhāḥ svada̍nti de̱vā u̱bhayā̍ni ha̱vyā
Mantra 40 {#mantra-40}
Section titled “Mantra 40 {#mantra-40}”Adhyāya: 31 | Mantra: 40
ā̱juhvā̍na̱ īḍyo̱ vandya̱ścā yā̍hyagne̱ vasu̍bhiḥ sa̱joṣā̍ḥ | tvaṃ de̱vānā̍masi yahva̱ hotā̱ sa e̍nānyakṣīṣi̱to yajī̍yān
Mantra 41 {#mantra-41}
Section titled “Mantra 41 {#mantra-41}”Adhyāya: 31 | Mantra: 41
prā̱cīna̍ṃ ba̱rhiḥ pra̱diśā̍ pṛthi̱vyā vasto̍ra̱syā vṛ̍jyate̱ agre̱ ahnā̍m | vyu̍ prathate vita̱raṃ varī̍yo de̱vebhyo̱ adi̍taye syo̱nam
Mantra 42 {#mantra-42}
Section titled “Mantra 42 {#mantra-42}”Adhyāya: 31 | Mantra: 42
vyaca̍svatīrurvi̱yā vi śra̍yantā̱ṃ pati̍bhyo̱ na jana̍ya̱ḥ śumbha̍mānāḥ | devī̍rdvāro bṛhatīrviśvaminvā de̱vebhyo̍ bhavata suprāya̱ṇāḥ
Mantra 43 {#mantra-43}
Section titled “Mantra 43 {#mantra-43}”Adhyāya: 31 | Mantra: 43
ā su̱ṣvaya̍ntī yaja̱te upā̍ke u̱ṣāsā̱naktā̍ sadatā̱ṃ ni yonau̍ | di̱vye yoṣa̍ṇe bṛha̱tī su̍ru̱kme adhi̱ śriya̍ śukra̱piśa̱ṃ dadhā̍ne
Mantra 44 {#mantra-44}
Section titled “Mantra 44 {#mantra-44}”Adhyāya: 31 | Mantra: 44
daivyā̱ hotā̍rā pratha̱mā su̱vācā̱ mimā̍nā ya̱jñaṃ manu̍ṣo̱ yaja̍dhyai | pra̱co̱daya̍ntā vi̱dathe̍ṣu kā̱rū prā̱cīna̱ṃ jyoti̍ḥ pra̱diśā̍ di̱śantā̍
Mantra 45 {#mantra-45}
Section titled “Mantra 45 {#mantra-45}”Adhyāya: 31 | Mantra: 45
ā no̍ ya̱jñaṃ bhāra̍tī̱ tūya̍me̱tvil̤ā̍ manu̱ṣvadi̱ha ce̱taya̍ntī | ti̱sro de̱vīrba̱rhireda syo̱na sara̍svatī̱ svapa̍saḥ sadantu
Mantra 46 {#mantra-46}
Section titled “Mantra 46 {#mantra-46}”Adhyāya: 31 | Mantra: 46
ya i̱me dyāvā̍pṛthi̱vī jani̍trī rūpai̱rapi̍śa̱dbhuva̍nāni̱ viśvā̍ | tama̱dya ho̍tariṣi̱to yajī̍yānde̱vaṃ tvaṣṭā̍rami̱ha ya̍kṣi vi̱dvān
Mantra 47 {#mantra-47}
Section titled “Mantra 47 {#mantra-47}”Adhyāya: 31 | Mantra: 47
u̱pāva̍sṛja̱ tmanyā̍ sama̱ñjande̱vānā̱ṃ pātha̍ ṛtu̱thā ha̱vīṣi̍ | vana̱spati̍ḥ śami̱tā de̱vo a̱gniḥ svada̍ntu ha̱vyaṃ madhu̍nā ghṛ̱tena̍
Mantra 48 {#mantra-48}
Section titled “Mantra 48 {#mantra-48}”Adhyāya: 31 | Mantra: 48
sa̱dyo jā̱to vya̍mimīta ya̱jñama̱gnirde̱vānā̍mabhavatpuro̱gāḥ | a̱sya hotu̍ḥ pra̱diśyṛ̱tasya̍ vā̱ci svāhā̍kṛta ha̱vira̍dantu de̱vāḥ
Mantra 49 {#mantra-49}
Section titled “Mantra 49 {#mantra-49}”Adhyāya: 31 | Mantra: 49
a̱gnaye̍ gāya̱trāya̍ tri̱vṛte̱ rātha̍ntarāyā̱ṣṭāka̍pāla̱ indrā̍ya̱ traiṣṭu̍bhāya pañcada̱śāya̱ barha̍tā̱yaikā̍daśakapālo̱ viśve̍bhyo de̱vebhyo̱ jāga̍tebhyaḥ saptada̱śebhyo̍ vairū̱pebhyo̱ dvāda̍śakapālo mi̱trāvaru̍ṇābhyā̱mānu̍ṣṭubhābhyāmekavi̱śābhyā̍ṃ vairā̱jābhyā̍m | pa̱ya̱syā̱ bṛha̱spata̍ye̱ pāṅktā̍ya triṇa̱vāya̍ śākva̱rāya̍ ca̱ruḥ sa̍vi̱tra au̍ṣṇihāya trayastri̱śāya̍ raiva̱tāya̱ dvāda̍śakapālaḥ prājāpa̱tyaśca̱ruradi̍tyai̱ viṣṇu̍patnyai ca̱rura̱gnaye̍ vaiśvāna̱rāya̱ dvāda̍śakapā̱lo’nu̍matyā a̱ṣṭāka̍pālaḥ
Mantra 50 {#mantra-50}
Section titled “Mantra 50 {#mantra-50}”Adhyāya: 31 | Mantra: 50
ā̱gne̱yaḥ kṛ̱ṣṇagrī̍vaḥ sārasva̱tī me̱ṣī ba̱bhruḥ sau̱myaḥ pau̱ṣṇaḥ śyā̱maḥ śi̍tipṛ̱ṣṭho bā̍rhaspa̱tyaḥ śi̱lpo vai̍śvade̱vaḥ | ai̱ndro̍’ru̱ṇo mā̍ru̱taḥ ka̱lmāṣa̍ aindrā̱gnaḥ sa̍hi̱to̱’dhorā̍maḥ sāvi̱tro vā̍ru̱ṇaḥ kṛ̱ṣṇa eka̍śitipā̱tpetva̍ḥ
Mantra 51 {#mantra-51}
Section titled “Mantra 51 {#mantra-51}”Adhyāya: 31 | Mantra: 51
a̱gnaye’nī̍kavate̱ rohi̍tāñjirana̱ḍvāna̱dhorā̍mau sāvi̱trau pau̱ṣṇau ra̍ja̱tanā̍bhī vaiśvade̱vau pi̱śaṅgau̍ tūpa̱rau | mā̱ru̱taḥ ka̱lmāṣa̍ āgne̱yaḥ kṛ̱ṣṇo̱’jaḥ sā̍rasva̱tī me̱ṣī vā̍ru̱ṇaḥ petva̍ḥ