Vājasaneyi Kanva Saṃhitā — Chapter 25 (67 mantras)
Vājasaneyi Kanva Saṃhitā — Chapter 25
Section titled “Vājasaneyi Kanva Saṃhitā — Chapter 25”atha pañcaviṃśo’dhyāyaḥ |
Mantras
Section titled “Mantras”Mantra 1 {#mantra-1}
Section titled “Mantra 1 {#mantra-1}”Adhyāya: 25 | Mantra: 1
hi̱ra̱ṇya̱ga̱rbhaḥ sama̍varta̱tāgre̍ bhū̱tasya̍ jā̱taḥ pati̱reka̍ āsīt | sa dā̍dhāra pṛthi̱vīṃ dyāmu̱temāṃ kasmai̍ de̱vāya̍ ha̱viṣā̍ vidhema
Mantra 2 {#mantra-2}
Section titled “Mantra 2 {#mantra-2}”Adhyāya: 25 | Mantra: 2
u̱pa̱yā̱magṛ̍hīto’si pra̱jāpa̍taye tvā̱ juṣṭa̍ṃ gṛhṇāmye̱ṣa te̱ yoni̱ḥ sūrya̍ste mahi̱mā | yaste’ha̍ntsaṃvatsa̱re ma̍hi̱mā sa̍ṃba̱bhūva̱ yaste̍ vā̱yā a̱ntari̍kṣe mahi̱mā sa̍ṃba̱bhūva̍ | yaste̍ di̱vi sūrye̍ mahi̱mā sa̍ṃba̱bhūva̱ tasmai̍ te mahi̱mne pra̱jāpa̍taye̱ svāhā̍ de̱vebhya̍ḥ
Mantra 3 {#mantra-3}
Section titled “Mantra 3 {#mantra-3}”Adhyāya: 25 | Mantra: 3
yaḥ prā̍ṇa̱to ni̍miṣa̱to ma̍hitvaika̱ idrājā̱ jaga̍to ba̱bhūva̍ | ya īśe̍ a̱sya dvi̱pada̱ścatu̍ṣpada̱ḥ kasmai̍ de̱vāya̍ ha̱viṣā̍ vidhema
Mantra 4 {#mantra-4}
Section titled “Mantra 4 {#mantra-4}”Adhyāya: 25 | Mantra: 4
u̱pa̱yā̱magṛ̍hīto’si pra̱jāpa̍taye tvā̱ juṣṭa̍ṃ gṛhṇāmye̱ṣa te̱ yoni̍śca̱ndramāste̍ mahi̱mā | yaste̱ rātrau̍ saṃvatsa̱re ma̍hi̱mā sa̍ṃba̱bhūva̱ yaste̍ pṛthi̱vyāma̱gnau ma̍hi̱mā sa̍ṃba̱bhūva̍ | yaste̱ nakṣa̍treṣu ca̱ndrama̍si mahi̱mā sa̍ṃba̱bhūva̱ tasmai̍ te mahi̱mne pra̱jāpa̍taye de̱vebhya̱ḥ svāhā̍
Mantra 5 {#mantra-5}
Section titled “Mantra 5 {#mantra-5}”Adhyāya: 25 | Mantra: 5
yu̱ñjanti̍ bra̱dhnama̍ru̱ṣaṃ cara̍nta̱ṃ pari̍ ta̱sthuṣa̍ḥ | roca̍nte roca̱nā di̱vi
Mantra 6 {#mantra-6}
Section titled “Mantra 6 {#mantra-6}”Adhyāya: 25 | Mantra: 6
yu̱ñjantya̍sya̱ kāmyā̱ harī̱ vipa̍kṣasā̱ rathe̍ | śoṇā̍ dhṛ̱ṣṇū nṛ̱vāha̍sā
Mantra 7 {#mantra-7}
Section titled “Mantra 7 {#mantra-7}”Adhyāya: 25 | Mantra: 7
yadvāto̍ a̱po a̍ganīganpri̱yāmindra̍sya ta̱nva̍m | e̱ta sto̍tara̱nena̍ pa̱thā puna̱raśva̱māva̍rtayāsi naḥ
Mantra 8 {#mantra-8}
Section titled “Mantra 8 {#mantra-8}”Adhyāya: 25 | Mantra: 8
vasa̍vastvāñjantu gāya̱treṇa̱ chanda̍sā ru̱drāstvā̍ñjantu̱ traiṣṭu̍bhena̱ chanda̍sā | ā̱di̱tyāstvā̍ñjantu̱ jāga̍tena̱ chanda̍sā
Mantra 9 {#mantra-9}
Section titled “Mantra 9 {#mantra-9}”Adhyāya: 25 | Mantra: 9
bhūrbhuva̱ḥ sva̱rlājī3ñchā̱cī3nyavye̱ gavye̍ | e̱tadanna̍matta devā e̱tadanna̍maddhi prajāpate
Mantra 10 {#mantra-10}
Section titled “Mantra 10 {#mantra-10}”Adhyāya: 25 | Mantra: 10
kaḥ svi̍dekā̱kī ca̍rati̱ ka u̍ svijjāyate̱ puna̍ḥ | ki svi̍ddhi̱masya̍ bheṣa̱jaṃ kimvā̱vapa̍naṃ ma̱hat
Mantra 11 {#mantra-11}
Section titled “Mantra 11 {#mantra-11}”Adhyāya: 25 | Mantra: 11
sūrya̍ ekā̱kī ca̍rati ca̱ndramā̍ jāyate̱ puna̍ḥ | a̱gnirhi̱masya̍ bheṣa̱jaṃ bhūmi̍rā̱vapa̍naṃ ma̱hat
Mantra 12 {#mantra-12}
Section titled “Mantra 12 {#mantra-12}”Adhyāya: 25 | Mantra: 12
kā svi̍dāsītpū̱rvaci̍tti̱ḥ ki svi̍dāsīd bṛ̱hadvaya̍ḥ | kā svi̍dāsītpilippi̱lā kā svi̍dāsītpiśaṅgi̱lā
Mantra 13 {#mantra-13}
Section titled “Mantra 13 {#mantra-13}”Adhyāya: 25 | Mantra: 13
dyau̍rāsītpū̱rvaci̍tti̱raśva̍ āsīd bṛ̱hadvaya̍ḥ | avi̍rāsītpilippi̱lā rātri̍rāsītpiśaṅgi̱lā
Mantra 14 {#mantra-14}
Section titled “Mantra 14 {#mantra-14}”Adhyāya: 25 | Mantra: 14
vā̱yuṣṭvā̍ paca̱taira̍va̱tvasi̍tagrīva̱śchāgai̍ḥ | nya̱grodha̍ścama̱saiḥ śa̍lma̱lirvṛddhyā̍
Mantra 15 {#mantra-15}
Section titled “Mantra 15 {#mantra-15}”Adhyāya: 25 | Mantra: 15
e̱ṣa sya rā̱thyo vṛṣā̍ pa̱ḍbhiśca̱turbhi̱reda̍gan | bra̱hmā kṛ̍ṣṇaśca no’vatu̱ | namo̱’gnaye̍
Mantra 16 {#mantra-16}
Section titled “Mantra 16 {#mantra-16}”Adhyāya: 25 | Mantra: 16
saśi̍to ra̱śminā̱ ratha̱ḥ saśi̍to ra̱śminā̱ haya̍ḥ | saśi̍to a̱psva̍psu̱jā bra̱hmā soma̍purogavaḥ
Mantra 17 {#mantra-17}
Section titled “Mantra 17 {#mantra-17}”Adhyāya: 25 | Mantra: 17
sva̱yaṃ vā̍jista̱nva̍ṃ kalpayasva sva̱yaṃ ya̍jasva sva̱yaṃ ju̍ṣasva | ma̱hi̱mā te̱’nyena̱ na sa̱ṃnaśe̍
Mantra 18 {#mantra-18}
Section titled “Mantra 18 {#mantra-18}”Adhyāya: 25 | Mantra: 18
na vā u̍ e̱tanmri̍yase̱ na ri̍ṣyasi de̱vām̐2 ide̍ṣi pa̱thibhi̍ḥ su̱gebhi̍ḥ | yatrāsa̍te su̱kṛto̱ yatra̱ te ya̱yustatra̍ tvā de̱vaḥ sa̍vi̱tā da̍dhātu
Mantra 19 {#mantra-19}
Section titled “Mantra 19 {#mantra-19}”Adhyāya: 25 | Mantra: 19
a̱gniḥ pa̱śurā̍sī̱ttenā̍yajanta̱ sa e̱tam̐ lo̱kama̍jaya̱dyasmi̍nna̱gniḥ | sa te̍ lo̱ko bha̍viṣyati̱ taṃ je̍ṣyasi̱ pibai̱tā a̱paḥ | vā̱yuḥ pa̱śurā̍sī̱ttenā̍yajanta̱ sa e̱tam̐ lo̱kama̍jaya̱dyasmi̍nvā̱yuḥ | sa te̍ lo̱ko bha̍viṣyati̱ taṃ je̍ṣyasi̱ pibai̱tā a̱paḥ | sūrya̍ḥ pa̱śurā̍sī̱ttenā̍yajanta̱ sa e̱tam̐ lo̱kama̍jaya̱dyasmi̱ntsūrya̍ḥ | sa te̍ lo̱ko bha̍viṣyati̱ taṃ je̍ṣyasi̱ pibai̱tā a̱paḥ
Mantra 20 {#mantra-20}
Section titled “Mantra 20 {#mantra-20}”Adhyāya: 25 | Mantra: 20
prā̱ṇāya̱ svāhā̍pā̱nāya̱ svāhā̍ vyā̱nāya̱ svāhā̍ | ambe̱ ambi̱ke’mbā̍like̱ na mā̍ nayati̱ kaśca̱na | sasa̍styaśva̱kaḥ subha̍drikāṃ kāmpīlavā̱sinī̍m
Mantra 21 {#mantra-21}
Section titled “Mantra 21 {#mantra-21}”Adhyāya: 25 | Mantra: 21
ga̱ṇānā̍ṃ tvā ga̱ṇapa̍ti havāmahe pri̱yāṇā̍ṃ tvā pri̱yapa̍ti havāmahe | ni̱dhīnā̍ṃ tvā nidhi̱pati havāmahe vaso mama
Mantra 22 {#mantra-22}
Section titled “Mantra 22 {#mantra-22}”Adhyāya: 25 | Mantra: 22
āhama̍jāni garbha̱dhamā tvama̍jāsi garbha̱dham | tā ubhau ca̱tura̍ḥ pa̱daḥ sa̱mprasā̍rayāva | sva̱rge lo̱ke prorṇvā̍thā̱m̐ vṛṣā̍ vā̱jī re̍to̱dhā reto̍ dadhātu
Mantra 23 {#mantra-23}
Section titled “Mantra 23 {#mantra-23}”Adhyāya: 25 | Mantra: 23
utsa̍kthyā̱ ava̍ gu̱daṃ dhe̍hi̱ sama̱ñjiṃ cā̍rayā vṛṣan | ya strī̱ṇāṃ jī̍va̱bhoja̍naḥ
Mantra 24 {#mantra-24}
Section titled “Mantra 24 {#mantra-24}”Adhyāya: 25 | Mantra: 24
ya̱kāsa̱kau śa̍kunti̱kāhala̱giti̱ vañca̍ti | āha̍nti ga̱bhe paso̱ niga̍lgalīti̱ dhāra̍kā
Mantra 25 {#mantra-25}
Section titled “Mantra 25 {#mantra-25}”Adhyāya: 25 | Mantra: 25
ya̱ko’sa̱kau śa̍kunta̱ka ā̱hala̱giti̱ vañca̍ti | viva̍kṣata iva te̱ mukha̱madhva̍ryo̱ mā na̱stvama̱bhi bhā̍ṣathāḥ
Mantra 26 {#mantra-26}
Section titled “Mantra 26 {#mantra-26}”Adhyāya: 25 | Mantra: 26
mā̱tā ca̍ te pi̱tā ca̱ te’gra̍ṃ vṛ̱kṣasya̍ rohataḥ | prati̍lā̱mīti̍ te pi̱tā ga̱bhe mu̱ṣṭima̍tasayat
Mantra 27 {#mantra-27}
Section titled “Mantra 27 {#mantra-27}”Adhyāya: 25 | Mantra: 27
mā̱tā ca̍ te pi̱tā ca̱ te’gre̍ vṛ̱kṣasya̍ krīl̤ataḥ | viva̍kṣata iva te̱ mukha̱ṃ brahma̱nmā tvaṃ va̍do ba̱hu
Mantra 28 {#mantra-28}
Section titled “Mantra 28 {#mantra-28}”Adhyāya: 25 | Mantra: 28
ū̱rdhvame̍nā̱mucchrā̍paya gi̱rau bhā̱ra hara̍nniva | athā̍syai̱ madhya̍medhatā śī̱te vāte̍ pu̱nanni̍va
Mantra 29 {#mantra-29}
Section titled “Mantra 29 {#mantra-29}”Adhyāya: 25 | Mantra: 29
ū̱rdhvame̍na̱mucchra̍yādgi̱rau bhā̱ra hara̍nniva | athā̍sya̱ madhya̍mejatu śī̱te vāte̍ pu̱nanni̍va
Mantra 30 {#mantra-30}
Section titled “Mantra 30 {#mantra-30}”Adhyāya: 25 | Mantra: 30
yada̍syā a̱hu̱bhedyā̍ḥ kṛ̱dhu sthū̱lamu̱pāta̍sat | mu̱ṣkā ida̍syā ejato gośa̱phe śa̍ku̱lā i̍va
Mantra 31 {#mantra-31}
Section titled “Mantra 31 {#mantra-31}”Adhyāya: 25 | Mantra: 31
yadde̱vāso̍ la̱lāma̍gu̱ṃ pra vi̍ṣṭī̱mina̱māvi̍ṣuḥ | sa̱kthnā de̍diśyate̱ nārī̍ sa̱tyasyā̍kṣi̱bhuvo̍ yathā
Mantra 32 {#mantra-32}
Section titled “Mantra 32 {#mantra-32}”Adhyāya: 25 | Mantra: 32
yaddha̍ri̱ṇo yava̱matti̱ na pu̱ṣṭaṃ pa̱śu manya̍te | śū̱drā yadarya̍jārā̱ na poṣā̍ya dhanāyati
Mantra 33 {#mantra-33}
Section titled “Mantra 33 {#mantra-33}”Adhyāya: 25 | Mantra: 33
yaddha̍ri̱ṇo yava̱matti̱ na pu̱ṣṭaṃ ba̱hu manya̍te | śū̱dro yadaryā̍yai jā̱ro na poṣa̱manu̍ manyate
Mantra 34 {#mantra-34}
Section titled “Mantra 34 {#mantra-34}”Adhyāya: 25 | Mantra: 34
da̱dhi̱krāvṇo̍ akāriṣaṃ ji̱ṣṇoraśva̍sya vā̱jina̍ḥ | su̱ra̱bhi no̱ mukhā̍ kara̱tpra ṇa̱ āyū̍ṣi tāriṣat
Mantra 35 {#mantra-35}
Section titled “Mantra 35 {#mantra-35}”Adhyāya: 25 | Mantra: 35
gā̱ya̱trī tri̱ṣṭubjaga̍tyanu̱ṣṭuppa̱ṅktyā sa̱ha | bṛ̱ha̱tyu̱ṣṇihā̍ ka̱kupsū̱cībhi̍ḥ śamyantu tvā
Mantra 36 {#mantra-36}
Section titled “Mantra 36 {#mantra-36}”Adhyāya: 25 | Mantra: 36
dvipa̍dā̱ yāścatu̍ṣpadāstri̱padā̱ yāśca̱ ṣaṭpa̍dāḥ | viccha̍ndā̱ yāśca̱ saccha̍ndāḥ sū̱cībhi̍ḥ śamyantu tvā
Mantra 37 {#mantra-37}
Section titled “Mantra 37 {#mantra-37}”Adhyāya: 25 | Mantra: 37
ma̱hānā̍mnyo re̱vatyo̱ viśvā̱ āśā̍ḥ pra̱bhūva̍rīḥ | mai̍ghīrvi̱dyuto̱ vāca̍ḥ sū̱cībhi̍ḥ śamyantu tvā
Mantra 38 {#mantra-38}
Section titled “Mantra 38 {#mantra-38}”Adhyāya: 25 | Mantra: 38
nārya̍ste̱ patnyo̱ loma̱ vici̍nvantu manī̱ṣayā̍ | de̱vānā̱ṃ patnyo̱ diśa̍ḥ sū̱cībhi̍ḥ śamyantu tvā
Mantra 39 {#mantra-39}
Section titled “Mantra 39 {#mantra-39}”Adhyāya: 25 | Mantra: 39
ra̱ja̱tā hari̍ṇī̱ḥ sīsā̱ yujo̍ yujyante̱ karma̍bhiḥ | aśva̍sya vā̱jina̍stva̱ci simā̍ḥ śamyantu̱ śamya̍ntīḥ
Mantra 40 {#mantra-40}
Section titled “Mantra 40 {#mantra-40}”Adhyāya: 25 | Mantra: 40
ku̱vida̱ṅga yava̍manto va̱yañci̱dyathā̱ dāntya̍nupū̱rvaṃ vi̱yūya̍ | i̱hehai̍ṣāṃ kṛṇuhi̱ bhoja̍nāni̱ ye ba̱rhiṣo̱ nama̍ ukti̱ṃ na ja̱gmuḥ
Mantra 41 {#mantra-41}
Section titled “Mantra 41 {#mantra-41}”Adhyāya: 25 | Mantra: 41
kastvā chya̍ti̱ kastvā̱ viśā̍sti̱ kaste̱ gātrā̍ṇi śamyati | ka u̍ te śami̱tā ka̱viḥ
Mantra 42 {#mantra-42}
Section titled “Mantra 42 {#mantra-42}”Adhyāya: 25 | Mantra: 42
ṛ̱tava̍sta ṛtu̱thā parva̍ śami̱tāro̱ vi śā̍satu | sa̱ṃva̱tsa̱rasya̱ teja̍sā śa̱mībhi̍ḥ śamyantu tvā
Mantra 43 {#mantra-43}
Section titled “Mantra 43 {#mantra-43}”Adhyāya: 25 | Mantra: 43
a̱rdha̱mā̱sāḥ parū̍ṣi te̱ māsā̱ ā chya̍ntu śamya̍ntaḥ | a̱ho̱rā̱trāṇi̍ ma̱ruto̱ vili̍ṣṭa sūdayantu te
Mantra 44 {#mantra-44}
Section titled “Mantra 44 {#mantra-44}”Adhyāya: 25 | Mantra: 44
daivyā̍ adhva̱ryava̱stvā chya̍ntu̱ vi ca̍ śāsatu | gātrā̍ṇi parva̱śaste̱ simā̍ḥ kṛṇvantu̱ śamya̍ntīḥ
Mantra 45 {#mantra-45}
Section titled “Mantra 45 {#mantra-45}”Adhyāya: 25 | Mantra: 45
dyauste̍ pṛthi̱vya̱ntari̍kṣaṃ vā̱yuśchi̱draṃ pṛ̍ṇātu te | sūya̍ste̱ nakṣa̍traiḥ sa̱ha lo̱kaṃ kṛ̍ṇotu sādhu̱yā
Mantra 46 {#mantra-46}
Section titled “Mantra 46 {#mantra-46}”Adhyāya: 25 | Mantra: 46
śaṃ te̱ pare̍bhyo̱ gātre̍bhya̱ḥ śama̱stvava̍rebhyaḥ | śama̱sthabhyo̍ ma̱jjabhya̱ḥ śamva̍stu ta̱nvai̱ tava̍
Mantra 47 {#mantra-47}
Section titled “Mantra 47 {#mantra-47}”Adhyāya: 25 | Mantra: 47
kaḥ svi̍dekā̱kī ca̍rati̱ ka u̍ svijjāyate̱ puna̍ḥ | ki svi̍ddhi̱masya̍ bheṣa̱jaṃ kimvā̱vapa̍naṃ ma̱hat
Mantra 48 {#mantra-48}
Section titled “Mantra 48 {#mantra-48}”Adhyāya: 25 | Mantra: 48
sūrya̍ ekā̱kī ca̍rati ca̱ndramā̍ jāyate̱ puna̍ḥ | a̱gnirhi̱masya̍ bheṣa̱jaṃ bhūmi̍rā̱vapa̍naṃ ma̱hat
Mantra 49 {#mantra-49}
Section titled “Mantra 49 {#mantra-49}”Adhyāya: 25 | Mantra: 49
ki svi̱tsūrya̍sama̱ṃ jyoti̱ḥ ki sa̍mu̱drasa̍ma̱ sara̍ḥ | ki svi̍tpṛthivyai̱ varṣī̍yaḥ kasya̱ mātrā̱ na vi̍dyate
Mantra 50 {#mantra-50}
Section titled “Mantra 50 {#mantra-50}”Adhyāya: 25 | Mantra: 50
brahma̱ sūrya̍sama̱ṃ jyoti̱rdyauḥ sa̍mu̱drasa̍ma̱ sara̍ḥ | indra̍ḥ pṛthivyai̱ varṣī̍yā̱n gostu mātrā̱ na vi̍dyate
Mantra 51 {#mantra-51}
Section titled “Mantra 51 {#mantra-51}”Adhyāya: 25 | Mantra: 51
pṛ̱cchāmi̍ tvā ci̱taye̍ devasakha̱ yadi̱ tvamatra̱ mana̍sā ja̱gantha̍ | yeṣu̱ viṣṇu̍stri̱ṣu pa̱deṣveṣṭa̱steṣu̱ viśva̱ṃ bhuva̍na̱mā vi̍veśā3
Mantra 52 {#mantra-52}
Section titled “Mantra 52 {#mantra-52}”Adhyāya: 25 | Mantra: 52
api̱ teṣu̍ tri̱ṣu pa̱deṣva̍smi̱ yeṣu̱ viśva̱ṃ bhuva̍namā vi̱veśa̍ | sa̱dyaḥ parye̍mi pṛthi̱vīmu̱ta dyāmeke̱nāṅge̍na di̱vo a̱sya pṛ̱ṣṭham
Mantra 53 {#mantra-53}
Section titled “Mantra 53 {#mantra-53}”Adhyāya: 25 | Mantra: 53
keṣva̱ntaḥ puru̍ṣa̱ ā vi̍veśa̱ kānya̱ntaḥ puru̍ṣe̱ arpi̍tāni | e̱tad bra̍hma̱nnupa̍ valhāmasi tvā̱ ki svi̍nna̱ḥ prati̍ vocā̱syatra̍
Mantra 54 {#mantra-54}
Section titled “Mantra 54 {#mantra-54}”Adhyāya: 25 | Mantra: 54
pa̱ñcasva̱ntaḥ puru̍ṣa̱ ā vi̍veśa̱ tānya̱ntaḥ puru̍ṣe̱ arpi̍tāni | e̱tattvātra̍ pratimanvā̱no a̍smi̱ na mā̱yayā̍ bhava̱syutta̍ro̱ mat
Mantra 55 {#mantra-55}
Section titled “Mantra 55 {#mantra-55}”Adhyāya: 25 | Mantra: 55
kā svi̍dāsītpū̱rvaci̍tti̱ḥ ki svi̍dāsīd bṛ̱hadvaya̍ḥ | kā svi̍dāsītpilippi̱lā kā svi̍dāsītpiśaṅgi̱lā
Mantra 56 {#mantra-56}
Section titled “Mantra 56 {#mantra-56}”Adhyāya: 25 | Mantra: 56
dyau̍rāsītpū̱rvaci̍tti̱raśva̍ āsīd bṛ̱hadvaya̍ḥ | avi̍rāsītpilippi̱lā rātri̍rāsītpiśaṅgi̱lā
Mantra 57 {#mantra-57}
Section titled “Mantra 57 {#mantra-57}”Adhyāya: 25 | Mantra: 57
ka ī̍mare piśaṅgi̱lā ka ī̍ṃ kuru piśaṅgi̱lā | ka ī̍mā̱ skanda̍marṣati̱ ka ī̱ṃ panthā̱ṃ vi sa̍rpati
Mantra 58 {#mantra-58}
Section titled “Mantra 58 {#mantra-58}”Adhyāya: 25 | Mantra: 58
a̱jāre̍ piśaṅgi̱lā śvā̱vitku̍ru piśaṅgi̱lā | śa̱śa ā̱skanda̍marṣa̱tyahi̱ḥ panthā̱ṃ vi sa̍rpati
Mantra 59 {#mantra-59}
Section titled “Mantra 59 {#mantra-59}”Adhyāya: 25 | Mantra: 59
katya̍sya vi̱ṣṭhāḥ katya̱kṣarā̍ṇi̱ kati̱ homā̍saḥ kati̱dhā sami̍ddhaḥ | ya̱jñasya̍ tvā vi̱dathā̍ pṛccha̱matra̱ kati̱ hotā̍ra ṛtu̱śo ya̍janti
Mantra 60 {#mantra-60}
Section titled “Mantra 60 {#mantra-60}”Adhyāya: 25 | Mantra: 60
ṣal̤a̍sya vi̱ṣṭhāḥ śa̱tama̱kṣarā̍ṇyaśī̱tirhomā̍ḥ sa̱midho̍ ha ti̱sraḥ | ya̱jñasya̍ te vi̱dathā̱ pra bra̍vīmi sa̱pta hotā̍ra ṛtu̱śo ya̍janti
Mantra 61 {#mantra-61}
Section titled “Mantra 61 {#mantra-61}”Adhyāya: 25 | Mantra: 61
ko a̱sya ve̍da̱ bhuva̍nasya̱ nābhi̱ṃ ko dyāvā̍pṛthi̱vī a̱ntari̍kṣam | kaḥ sūrya̍sya veda bṛha̱to ja̱nitra̱ṃ ko ve̍da ca̱ndrama̍saṃ yato̱jāḥ
Mantra 62 {#mantra-62}
Section titled “Mantra 62 {#mantra-62}”Adhyāya: 25 | Mantra: 62
vedā̱hama̱sya bhuva̍nasya̱ nābhi̱ṃ veda̱ dyāvā̍pṛthi̱vī a̱ntari̍kṣam | veda̱ sūrya̍sya bṛha̱to ja̱nitra̱matho̍ veda ca̱ndrama̍saṃ yato̱jāḥ
Mantra 63 {#mantra-63}
Section titled “Mantra 63 {#mantra-63}”Adhyāya: 25 | Mantra: 63
pṛ̱cchāmi̍ tvā̱ para̱manta̍ṃ pṛthi̱vyāḥ pṛ̱cchāmi̱ yatra̱ bhuva̍nasya̱ nābhi̍ḥ | pṛ̱cchāmi̍ tvā̱ vṛṣṇo̱ aśva̍sya̱ reta̍ḥ pṛ̱cchāmi̍ vā̱caḥ pa̍ra̱maṃ vyo̍ma
Mantra 64 {#mantra-64}
Section titled “Mantra 64 {#mantra-64}”Adhyāya: 25 | Mantra: 64
i̱yaṃ vedi̱ḥ paro̱ anta̍ḥ pṛthi̱vyā a̱yaṃ ya̱jño bhuva̍nasya̱ nābhi̍ḥ | a̱ya somo̱ vṛṣṇo̱ aśva̍sya̱ reto̍ bra̱hmāyaṃ vā̱caḥ pa̍ra̱maṃ vyo̍ma
Mantra 65 {#mantra-65}
Section titled “Mantra 65 {#mantra-65}”Adhyāya: 25 | Mantra: 65
su̱bhūḥ sva̍ya̱mbhūḥ pra̍tha̱mo̱’ntarma̍ha̱tya̍rṇa̱ve | da̱dhe ha̱ garbha̍mṛ̱tviya̱ṃ yato̍ jā̱taḥ pra̱jāpa̍tiḥ
Mantra 66 {#mantra-66}
Section titled “Mantra 66 {#mantra-66}”Adhyāya: 25 | Mantra: 66
hotā̍ yakṣatpra̱jāpa̍ti̱ soma̍sya mahi̱mnaḥ | ju̱ṣatā̱ṃ piba̍tu̱ soma̱ hota̱ryaja̍
Mantra 67 {#mantra-67}
Section titled “Mantra 67 {#mantra-67}”Adhyāya: 25 | Mantra: 67
prajā̍pate̱ na tvade̱tānya̱nyo viśvā̍ rū̱pāṇi̱ pari̱ tā ba̍bhūva | yatkā̍māste juhu̱mastanno̍ astu va̱ya syā̍ma̱ pata̍yo rayī̱ṇām