atha pañcamo'dhyāyaḥ |
a̱gnesta̱nūra̍si̱ viṣṇa̍ve tvā̱ soma̍sya ta̱nūra̍si̱ viṣṇa̍ve̱ tvā| ati̍therāti̱thyama̍si̱ viṣṇa̍ve tvā śye̱nāya̍ tvā soma̱bhṛte̱
viṣṇa̍ve tvā̱gnaye̍ tvā rāyaspoṣa̱de viṣṇa̍ve tvā
||5.1||अ॒ग्नेस्त॒नूर॑सि॒ विष्ण॑वे त्वा॒ सोम॑स्य त॒नूर॑सि॒ विष्ण॑वे॒ त्वा। अति॑थेराति॒थ्यम॑सि॒ विष्ण॑वे त्वा श्ये॒नाय॑ त्वा सोम॒भृते॒
विष्ण॑वे त्वा॒ग्नये॑ त्वा रायस्पोष॒दे विष्ण॑वे त्वा
a̱gnerja̱nitra̍masi vṛṣa̍ṇau sthaḥ | u̱rvaśya̍syā̱yura̍si pu̍rū̱ravā̍ asi |
gā̱ya̱treṇa̍ tvā̱ chanda̍sā manthāmi̱ traiṣṭu̍bhena tvā̱ chanda̍sā manthāmi jāga̍tena tvā̱ chanda̍sā manthāmi
||5.2||अ॒ग्नेर्ज॒नित्र॑मसि वृष॑णौ स्थः । उ॒र्वश्य॑स्या॒युर॑सि पु॑रू॒रवा॑ असि ।
गा॒य॒त्रेण॑ त्वा॒ छन्द॑सा मन्थामि॒ त्रैष्टु॑भेन त्वा॒ छन्द॑सा मन्थामि जाग॑तेन त्वा॒ छन्द॑सा मन्थामि
bhava̍taṃ na̱ḥ sama̍nasau̱ sace̍tasāare̱pasau̍ |
mā ya̱jña hisiṣṭa̱ṃ mā ya̱jñapa̍tiṃ jātavedasau śi̱vau bha̍vatama̱dya na̍ḥ
||5.3||भव॑तं नः॒ सम॑नसौ॒ सचे॑तसाअरे॒पसौ॑ ।
मा य॒ज्ञ हिसिष्टं॒ मा य॒ज्ञप॑तिं जातवेदसौ शि॒वौ भ॑वतम॒द्य नः॑
a̱gnā a̱gniśca̍rati̱ pravi̍ṣṭa̱ ṛṣī̍ṇāṃ pu̱tro a̍bhiśasti̱pāvā̍ |
sa na̍ḥ syo̱naḥ su̱yajā̍ yaje̱ha de̱vebhyo̍ ha̱vya sada̱mapra̍yuccha̱ntsvāhā̍
||5.4||अ॒ग्ना अ॒ग्निश्च॑रति॒ प्रवि॑ष्ट॒ ऋषी॑णां पु॒त्रो अ॑भिशस्ति॒पावा॑ ।
स नः॑ स्यो॒नः सु॒यजा॑ यजे॒ह दे॒वेभ्यो॑ ह॒व्य सद॒मप्र॑युच्छ॒न्त्स्वाहा॑
āpa̍taye tvā gṛhṇāmi̱ pari̍pataye tvā gṛhṇāmi| tanū̱naptre̍ śākva̱rāya̱ śakmanoji̍ṣṭhāya
||5.5||आप॑तये त्वा गृह्णामि॒ परि॑पतये त्वा गृह्णामि। तनू॒नप्त्रे॑ शाक्व॒राय॒ शक्मनोजि॑ष्ठाय
anā̍dhṛṣṭamasyanādhṛ̱ṣyaṃ de̱vānā̱moja̍ḥ | ana̍bhiśastyabhiśasti̱pā a̍nabhiśaste̱nyam
||5.6||अना॑धृष्टमस्यनाधृ॒ष्यं दे॒वाना॒मोजः॑ । अन॑भिशस्त्यभिशस्ति॒पा अ॑नभिशस्ते॒न्यम्
añja̍sā sa̱tyamupa̍geṣa suvi̱te mā̍ dhāḥ | agne̍ vratapā̱stve vra̍tapāḥ
||5.7||अञ्ज॑सा स॒त्यमुप॑गेष सुवि॒ते मा॑ धाः । अग्ने॑ व्रतपा॒स्त्वे व्र॑तपाः
yā tava̍ ta̱nūri̱ya sā mayi̱ yā mama̍ ta̱nūre̱ṣā sā tvayi̍ |
sa̱ha nau̍ vratapate vra̱tānyanu̍ me dī̱kṣāṃ dī̱kṣāpa̍ti̱rmanya̍tā̱manu̱ tapa̱stapa̍spatiḥ
||5.8||या तव॑ त॒नूरि॒य सा मयि॒ या मम॑ त॒नूरे॒षा सा त्वयि॑ ।
स॒ह नौ॑ व्रतपते व्र॒तान्यनु॑ मे दी॒क्षां दी॒क्षाप॑ति॒र्मन्य॑ता॒मनु॒ तप॒स्तप॑स्पतिः
a̱śura̍śuṣṭe deva so̱māpyā̍yatā̱mindrā̍yaikadhana̱vide̍ |
ā tubhya̱mindra̱ḥ pyāya̍tā̱mā tvamindrā̍ya pyāyasva
||5.9||अ॒शुर॑शुष्टे देव सो॒माप्या॑यता॒मिन्द्रा॑यैकधन॒विदे॑ ।
आ तुभ्य॒मिन्द्रः॒ प्याय॑ता॒मा त्वमिन्द्रा॑य प्यायस्व
āpyā̍yayā̱smān sakhī̍ntsa̱nyā me̱dhayā̍ | sva̱sti te̍ deva soma su̱tyāmu̱dṛca̍maśīya
||5.10||आप्या॑यया॒स्मान् सखी॑न्त्स॒न्या मे॒धया॑ । स्व॒स्ति ते॑ देव सोम सु॒त्यामु॒दृच॑मशीय
eṣṭā̱ rāya̱ḥ preṣe bhagā̍ya | ṛ̱tamṛ̍tavā̱dibhyo̱ namo̱ di̱ve nama̍ḥ pṛthi̱vyai
||5.11||एष्टा॒ रायः॒ प्रेषे भगा॑य । ऋ॒तमृ॑तवा॒दिभ्यो॒ नमो॒ दि॒वे नमः॑ पृथि॒व्यै
yā te̍ agne yaḥśa̱yā ta̱nūrvarṣi̍ṣṭhā gahvare̱ṣṭhā | u̱graṃ vaco̱ apā̍vadhīttve̱ṣaṃ vaco̱ apā̍vadhī̱t svāhā̍ |
yā te̍ agne rajaḥśa̱yā ta̱nūrvarṣi̍ṣṭhā gahvare̱ṣṭhā | u̱graṃ vaco̱ apā̍vadhīttve̱ṣaṃ vaco̱ apā̍vadhī̱t svāhā̍ |
yā te̍ agne hariśa̱yā ta̱nūrvarṣi̍ṣṭhā gahvare̱ṣṭhā | u̱graṃ vaco̱ apā̍vadhīttve̱ṣaṃ vaco̱ apā̍vadhī̱t svāhā̍
||5.12||या ते॑ अग्ने यःश॒या त॒नूर्वर्षि॑ष्ठा गह्वरे॒ष्ठा । उ॒ग्रं वचो॒ अपा॑वधीत्त्वे॒षं वचो॒ अपा॑वधी॒त् स्वाहा॑ ।
या ते॑ अग्ने रजःश॒या त॒नूर्वर्षि॑ष्ठा गह्वरे॒ष्ठा । उ॒ग्रं वचो॒ अपा॑वधीत्त्वे॒षं वचो॒ अपा॑वधी॒त् स्वाहा॑ ।
या ते॑ अग्ने हरिश॒या त॒नूर्वर्षि॑ष्ठा गह्वरे॒ष्ठा । उ॒ग्रं वचो॒ अपा॑वधीत्त्वे॒षं वचो॒ अपा॑वधी॒त् स्वाहा॑
ta̱ptāya̍nī me'si vi̱ttāya̍nī me'si | ava̍tānmā vyathi̱tamava̍tānmā nāthi̱tāt
||5.13||त॒प्ताय॑नी मेऽसि वि॒त्ताय॑नी मेऽसि । अव॑तान्मा व्यथि॒तमव॑तान्मा नाथि॒तात्
vi̱deda̱gnirna̱bho nāmāgne̍ aṅgira̱ āyu̍nā̱ nāmnehi̍ |
yo̱ syāṃ pṛ̍thi̱vyāmasi̱ yattenā̍dhṛṣṭa̱ṃ nāma̍ ya̱jñiya̱ṃ tena̱ tvā da̍dhe |
vi̱deda̱gnirna̱bho nāmāgne̍ aṅgira̱ āyu̍nā̱ nāmnehi̍ |
yo dvi̱tīya̍syāṃ pṛthi̱vyāmasi̱ yattenā̍dhṛṣṭa̱ṃ nāma̍ ya̱jñiya̱ṃ tena̱ tvā da̍dhe |
vi̱deda̱gnirna̱bho nāmāgne̍ aṅgira̱ āyu̍nā̱ nāmnehi̍ |
yastṛ̱tīya̍syāṃ pṛthi̱vyāmasi̱ yattenā̍dhṛṣṭa̱ṃ nāma̍ ya̱jñiya̱ṃ tena̱ tvā da̍dhe |
anu̍ tvā de̱vavī̍taye si̱hya̍si sapatnasā̱hī de̱vebhya̍ḥ kalpasva si̱m̐hya̍si sapatnasā̱hī de̱vebhya̍ḥ śundhasva
si̱hya̍si sapatnasā̱hī de̱vebhya̍ḥ śumbhasva
||5.14||वि॒देद॒ग्निर्न॒भो नामाग्ने॑ अङ्गिर॒ आयु॑ना॒ नाम्नेहि॑ ।
यो॒ स्यां पृ॑थि॒व्यामसि॒ यत्तेना॑धृष्टं॒ नाम॑ य॒ज्ञियं॒ तेन॒ त्वा द॑धे ।
वि॒देद॒ग्निर्न॒भो नामाग्ने॑ अङ्गिर॒ आयु॑ना॒ नाम्नेहि॑ ।
यो द्वि॒तीय॑स्यां पृथि॒व्यामसि॒ यत्तेना॑धृष्टं॒ नाम॑ य॒ज्ञियं॒ तेन॒ त्वा द॑धे ।
वि॒देद॒ग्निर्न॒भो नामाग्ने॑ अङ्गिर॒ आयु॑ना॒ नाम्नेहि॑ ।
यस्तृ॒तीय॑स्यां पृथि॒व्यामसि॒ यत्तेना॑धृष्टं॒ नाम॑ य॒ज्ञियं॒ तेन॒ त्वा द॑धे ।
अनु॑ त्वा दे॒ववी॑तये सि॒ह्य॑सि सपत्नसा॒ही दे॒वेभ्यः॑ कल्पस्व सिँ॒ह्य॑सि सपत्नसा॒ही दे॒वेभ्यः॑ शुन्धस्व
सि॒ह्य॑सि सपत्नसा॒ही दे॒वेभ्यः॑ शुम्भस्व
i̱ndra̱gho̱ṣastvā̱ vasu̍bhiḥ pu̱rastā̍tpātu prace̍tāstvā rudraiḥ pa̱ścātpā̍tu |
mano̍javāstvā pi̱tṛbhi̍rdakṣiṇa̱taḥ pā̍tu vi̱śvaka̍rmā tvādi̱tyairu̍ttara̱taḥ pā̍tu
||5.15||इ॒न्द्र॒घो॒षस्त्वा॒ वसु॑भिः पु॒रस्ता॑त्पातु प्रचे॑तास्त्वा रुद्रैः प॒श्चात्पा॑तु ।
मनो॑जवास्त्वा पि॒तृभि॑र्दक्षिण॒तः पा॑तु वि॒श्वक॑र्मा त्वादि॒त्यैरु॑त्तर॒तः पा॑तु
i̱dama̱haṃ ta̱ptaṃ vārba̍hi̱rdhā ya̱jñānniḥ sṛ̍jāmi |
si̱hya̍si̱ svāhā̍ si̱hya̍syāditya̱vani̱ḥ svāhā̍
||5.16||इ॒दम॒हं त॒प्तं वार्ब॑हि॒र्धा य॒ज्ञान्निः सृ॑जामि ।
सि॒ह्य॑सि॒ स्वाहा॑ सि॒ह्य॑स्यादित्य॒वनिः॒ स्वाहा॑
si̱hya̍si brahma̱vani̍ḥ kṣatra̱vani̱ḥ svāhā̍ si̱hya̍si suprajā̱vanī̍ rāyaspoṣa̱vani̱ḥ svāhā̍ |
si̱hya̱syāva̍ha de̱vānyaja̍mānāya̱ svāhā̍ bhū̱tebhya̍stvā
||5.17||सि॒ह्य॑सि ब्रह्म॒वनिः॑ क्षत्र॒वनिः॒ स्वाहा॑ सि॒ह्य॑सि सुप्रजा॒वनी॑ रायस्पोष॒वनिः॒ स्वाहा॑ ।
सि॒ह्य॒स्याव॑ह दे॒वान्यज॑मानाय॒ स्वाहा॑ भू॒तेभ्य॑स्त्वा
dhru̱vo̍'si pṛthi̱vīṃ dṛ̍ha dhruva̱kṣida̍sya̱ntari̍kṣaṃ dṛha |
a̱cyu̱ta̱kṣida̍si̱ diva̍ṃ dṛhā̱gnerbhasmā̍sya̱gneḥ purī̍ṣamasi
||5.18||ध्रु॒वो॑ऽसि पृथि॒वीं दृ॑ह ध्रुव॒क्षिद॑स्य॒न्तरि॑क्षं दृह ।
अ॒च्यु॒त॒क्षिद॑सि॒ दिवं॑ दृहा॒ग्नेर्भस्मा॑स्य॒ग्नेः पुरी॑षमसि
yu̱ñjate̱ mana̍ u̱ta yu̍ñjate̱ dhiyo̱ viprā̱ vipra̍sya bṛha̱to vi̍pa̱ścita̍ḥ |
vi hotrā̍ dadhe vayunā̱videka̱ inma̱hī de̱vasya̍ savi̱tuḥ pari̍ṣṭuti̱ḥ
||5.19||यु॒ञ्जते॒ मन॑ उ॒त यु॑ञ्जते॒ धियो॒ विप्रा॒ विप्र॑स्य बृह॒तो वि॑प॒श्चितः॑ ।
वि होत्रा॑ दधे वयुना॒विदेक॒ इन्म॒ही दे॒वस्य॑ सवि॒तुः परि॑ष्टुतिः॒
i̱daṃ viṣṇu̱rvica̍krame tre̱dhā ni da̍dhe pa̱dam | samū̍l̤ahamasya pāsu̱re svāhā̍
||5.20||इ॒दं विष्णु॒र्विच॑क्रमे त्रे॒धा नि द॑धे प॒दम् । समू॑ळहमस्य पासु॒रे स्वाहा॑
irā̍vatī dhenu̱matī̱ hi bhū̱ta sū̍yava̱sinī̱ mana̍ve daśa̱syā |
vya̍skabhnā̱ roda̍sī viṣṇa e̱te dā̱dhartha̍ pṛthi̱vīma̱bhito̍ ma̱yūkhai̱ḥ svāhā̍
||5.21||इरा॑वती धेनु॒मती॒ हि भू॒त सू॑यव॒सिनी॒ मन॑वे दश॒स्या ।
व्य॑स्कभ्ना॒ रोद॑सी विष्ण ए॒ते दा॒धर्थ॑ पृथि॒वीम॒भितो॑ म॒यूखैः॒ स्वाहा॑
de̱va̱śrutau̍ de̱veṣvāgho̍ṣatam | prācī̱ preta̍madhva̱raṃ ka̱lpaya̍ntī ū̱rdhvaṃ ya̱jñaṃ na̍yata̱ṃ mā ji̍hvaratam
||5.22||दे॒व॒श्रुतौ॑ दे॒वेष्वाघो॑षतम् । प्राची॒ प्रेत॑मध्व॒रं क॒ल्पय॑न्ती ऊ॒र्ध्वं य॒ज्ञं न॑यतं॒ मा जि॑ह्वरतम्
svaṃ go̱ṣṭhamāva̍dataṃ devī durye̱ āyu̱rmā nirvā̍diṣṭaṃ pra̱jāṃ mā nirvā̍diṣṭam |
atra̍ ramethā̱ṃ varṣma̍n pṛthi̱vyāḥ
||5.23||स्वं गो॒ष्ठमाव॑दतं देवी दुर्ये॒ आयु॒र्मा निर्वा॑दिष्टं प्र॒जां मा निर्वा॑दिष्टम् ।
अत्र॑ रमेथां॒ वर्ष्म॑न् पृथि॒व्याः
viṣṇo̱rnuka̍ṃ vī̱ryā̍ṇi̱ pravo̍ca̱ṃ yaḥ pārthi̍vāni vima̱me rajā̍si |
yo aska̍bhāya̱dutta̍ra sa̱dhastha̍ṃ vicakramā̱ṇastre̱dhoru̍gā̱yo viṣṇa̍ve tvā
||5.24||विष्णो॒र्नुकं॑ वी॒र्या॑णि॒ प्रवो॑चं॒ यः पार्थि॑वानि विम॒मे रजा॑सि ।
यो अस्क॑भाय॒दुत्त॑र स॒धस्थं॑ विचक्रमा॒णस्त्रे॒धोरु॑गा॒यो विष्ण॑वे त्वा
di̱vo vā̍ viṣṇa u̱ta vā̍ pṛthi̱vyā ma̱ho vā̍ viṣṇa u̱rora̱ntari̍kṣāt |
u̱bhā hi hastā̱ vasu̍nā pṛ̱ṇasvā praya̍ccha̱ dakṣi̍ṇā̱dota sa̱vyādviṣṇa̍ve tvā
||5.25||दि॒वो वा॑ विष्ण उ॒त वा॑ पृथि॒व्या म॒हो वा॑ विष्ण उ॒रोर॒न्तरि॑क्षात् ।
उ॒भा हि हस्ता॒ वसु॑ना पृ॒णस्वा प्रय॑च्छ॒ दक्षि॑णा॒दोत स॒व्याद्विष्ण॑वे त्वा
pra tadviṣṇu̍ stavate vī̱rye̍ṇa mṛ̱go na bhī̱maḥ ku̍ca̱ro gi̍ri̱ṣṭhāḥ |
yasyo̱ruṣu̍ tri̱ṣu vi̱krama̍ṇeṣvadhikṣi̱yanti̱ bhuva̍nāni̱ viśvā̍
||5.26||प्र तद्विष्णु॑ स्तवते वी॒र्ये॑ण मृ॒गो न भी॒मः कु॑च॒रो गि॑रि॒ष्ठाः ।
यस्यो॒रुषु॑ त्रि॒षु वि॒क्रम॑णेष्वधिक्षि॒यन्ति॒ भुव॑नानि॒ विश्वा॑
viṣṇo̍ ra̱rāṭa̍masi viṣṇo̱ḥ śnaptre̍ stho̱ viṣṇo̱ḥ syūra̍si viṣṇo̍rdhru̱vo̍'si |
vaiṣṇa̱vama̍si̱ viṣṇa̍ve tvā
||5.27||विष्णो॑ र॒राट॑मसि विष्णोः॒ श्नप्त्रे॑ स्थो॒ विष्णोः॒ स्यूर॑सि विष्णो॑र्ध्रु॒वो॑ऽसि ।
वैष्ण॒वम॑सि॒ विष्ण॑वे त्वा
de̱vasya̍ tvā savi̱tuḥ pra̍sa̱ve̱'śvino̍rbā̱hubhyā̍ṃ pū̱ṣṇo hastā̍bhyām |
āda̍de̱ nārya̍sī̱dama̱ha rakṣa̍so grī̱vā api̍kṛntāmi |
bṛ̱hanna̍si bṛ̱hadra̍vā bṛha̱tīmindrā̍ya̱ vāca̍ṃ vada |rakṣo̱haṇa̍ṃ valaga̱hana̍ṃ vaiṣṇa̱vīm
||5.28||दे॒वस्य॑ त्वा सवि॒तुः प्र॑स॒वे॒ऽश्विनो॑र्बा॒हुभ्यां॑ पू॒ष्णो हस्ता॑भ्याम् ।
आद॑दे॒ नार्य॑सी॒दम॒ह रक्ष॑सो ग्री॒वा अपि॑कृन्तामि ।
बृ॒हन्न॑सि बृ॒हद्र॑वा बृह॒तीमिन्द्रा॑य॒ वाचं॑ वद ।रक्षो॒हणं॑ वलग॒हनं॑ वैष्ण॒वीम्
i̱dama̱haṃ taṃ va̍la̱gamudva̍pāmi̱ yanno̱ niṣṭyo̱ yama̱mātyo̍ nica̱khāna̍ |
i̱dama̱haṃ taṃ va̍la̱gamudva̍pāmi̱ yaṃ na̍ḥ samā̱no yamasa̍māno nica̱khāna̍ |
i̱dama̱haṃ taṃ va̍la̱gamudva̍pāmi̱ yaṃ na̱ḥ saba̍ndhu̱ryamasa̍bandhurnica̱khāna̍ |
i̱dama̱haṃ taṃ va̍la̱gamudva̍pāmi̱ yaṃ na̍ḥ sajā̱to yamasa̍jāto nica̱khānotkṛtyāṃ ki̍rāmi
||5.29||इ॒दम॒हं तं व॑ल॒गमुद्व॑पामि॒ यन्नो॒ निष्ट्यो॒ यम॒मात्यो॑ निच॒खान॑ ।
इ॒दम॒हं तं व॑ल॒गमुद्व॑पामि॒ यं नः॑ समा॒नो यमस॑मानो निच॒खान॑ ।
इ॒दम॒हं तं व॑ल॒गमुद्व॑पामि॒ यं नः॒ सब॑न्धु॒र्यमस॑बन्धुर्निच॒खान॑ ।
इ॒दम॒हं तं व॑ल॒गमुद्व॑पामि॒ यं नः॑ सजा॒तो यमस॑जातो निच॒खानोत्कृत्यां कि॑रामि
sva̱rāl̤a̍si sapatna̱hā sa̍tra̱rāl̤a̍syabhimāti̱hā | ja̱na̱rāl̤a̍si rakṣo̱hā sa̍rva̱rāl̤a̍syamitra̱hā
||5.30||स्व॒राळ॑सि सपत्न॒हा स॑त्र॒राळ॑स्यभिमाति॒हा । ज॒न॒राळ॑सि रक्षो॒हा स॑र्व॒राळ॑स्यमित्र॒हा
ra̍kṣo̱haṇo̍ valaga̱hana̱ḥ prokṣā̍mi vaiṣṇa̱vānra̍kṣo̱haṇo̍ valaga̱hano'va̍nayāmi vaiṣṇa̱vān |
ra̍kṣo̱haṇo̍ valaga̱hano'va̍stṛṇāmi vaiṣṇa̱vān
||5.31||र॑क्षो॒हणो॑ वलग॒हनः॒ प्रोक्षा॑मि वैष्ण॒वान्र॑क्षो॒हणो॑ वलग॒हनोऽव॑नयामि वैष्ण॒वान् ।
र॑क्षो॒हणो॑ वलग॒हनोऽव॑स्तृणामि वैष्ण॒वान्
ra̱kṣo̱haṇau̍ valaga̱hanā̱ upa̍dadhāmi vaiṣṇa̱vī ra̍kṣo̱haṇau̍ valaga̱hanau̱ paryū̍hāmi vaiṣṇa̱vī |
vai̱ṣṇa̱vama̍si vaiṣṇa̱vā stha̍
||5.32||र॒क्षो॒हणौ॑ वलग॒हना॒ उप॑दधामि वैष्ण॒वी र॑क्षो॒हणौ॑ वलग॒हनौ॒ पर्यू॑हामि वैष्ण॒वी ।
वै॒ष्ण॒वम॑सि वैष्ण॒वा स्थ॑
de̱vasya̍ tvā savi̱tuḥ pra̍sa̱ve̱'śvino̍rbā̱hubhyā̍ṃ pū̱ṣṇo hastā̍bhyām |
āda̍de̱ nārya̍sī̱dama̱ha rakṣa̍so grī̱vā api̍kṛntāmi | yavo̍'si ya̱vayā̱smad dveṣo̍ ya̱vayārā̍tīḥ |
di̱ve tvā̱ntari̍kṣāya tvā pṛthi̱vyai tvā̍
||5.33||दे॒वस्य॑ त्वा सवि॒तुः प्र॑स॒वे॒ऽश्विनो॑र्बा॒हुभ्यां॑ पू॒ष्णो हस्ता॑भ्याम् ।
आद॑दे॒ नार्य॑सी॒दम॒ह रक्ष॑सो ग्री॒वा अपि॑कृन्तामि । यवो॑ऽसि य॒वया॒स्मद् द्वेषो॑ य॒वयारा॑तीः ।
दि॒वे त्वा॒न्तरि॑क्षाय त्वा पृथि॒व्यै त्वा॑
śundha̍ntām̐llo̱kāḥ pi̍tṛ̱ṣada̍nāḥ pitṛ̱ṣada̍namasi |
uddiva̍stabhā̱nāntari̍kṣaṃ pṛṇa̱ dṛha̍sva pṛthi̱vyām
||5.34||शुन्ध॑न्ताँल्लो॒काः पि॑तृ॒षद॑नाः पितृ॒षद॑नमसि ।
उद्दिव॑स्तभा॒नान्तरि॑क्षं पृण॒ दृह॑स्व पृथि॒व्याम्
dyu̱tā̱nastvā̍ māru̱to mi̍notu mi̱trāvaru̍ṇau dhru̱veṇa̱ dharma̍ṇā |
bra̱hma̱vani̍ tvā kṣatra̱vani̍ rāyaspoṣa̱vani̱ paryū̍hāmi
||5.35||द्यु॒ता॒नस्त्वा॑ मारु॒तो मि॑नोतु मि॒त्रावरु॑णौ ध्रु॒वेण॒ धर्म॑णा ।
ब्र॒ह्म॒वनि॑ त्वा क्षत्र॒वनि॑ रायस्पोष॒वनि॒ पर्यू॑हामि
brahma̍ dṛ ha kṣa̱traṃ dṛhāyu̍rdṛha pra̱jāṃ dṛ̍ha | dhru̱vāsi̍ dhru̱vo̱'sminyaja̍māna ā̱yata̍ne bhūyāt |
ghṛ̱tena̍ dyāvāpṛthivī̱ pūryethā̱mindra̍sya cha̱dira̍si viśvaja̱nasya̍ chāyā̍
||5.36||ब्रह्म॑ दृ ह क्ष॒त्रं दृहायु॑र्दृह प्र॒जां दृ॑ह । ध्रु॒वासि॑ ध्रु॒वो॒ऽस्मिन्यज॑मान आ॒यत॑ने भूयात् ।
घृ॒तेन॑ द्यावापृथिवी॒ पूर्येथा॒मिन्द्र॑स्य छ॒दिर॑सि विश्वज॒नस्य॑ छाया॑
pari̍ tvā girvaṇo̱ gira̍ i̱mā bha̍vantu vi̱śvata̍ḥ | vṛ̱ddhāyu̱manu̱ vṛddha̍yo̱ juṣṭā̍ bhavantu̱ juṣṭa̍yaḥ
||5.37||परि॑ त्वा गिर्वणो॒ गिर॑ इ॒मा भ॑वन्तु वि॒श्वतः॑ । वृ॒द्धायु॒मनु॒ वृद्ध॑यो॒ जुष्टा॑ भवन्तु॒ जुष्ट॑यः
indra̍sya̱ syūra̱sīndra̍sya dhru̱vo̍'si | ai̱ndrama̍si vaiśvade̱vama̍si
||5.38||इन्द्र॑स्य॒ स्यूर॒सीन्द्र॑स्य ध्रु॒वो॑ऽसि । ऐ॒न्द्रम॑सि वैश्वदे॒वम॑सि
vi̱bhūra̍si pra̱vāha̍ṇo̱ vahni̍rasi havya̱vāha̍naḥ | śvā̱tro̍'si̱ prace̍tāstu̱tho̍'si vi̱śvave̍dāḥ
||5.39||वि॒भूर॑सि प्र॒वाह॑णो॒ वह्नि॑रसि हव्य॒वाह॑नः । श्वा॒त्रो॑ऽसि॒ प्रचे॑तास्तु॒थो॑ऽसि वि॒श्ववे॑दाः
u̱śiga̍si ka̱viraṅghā̍rirasi̱ bambhā̍riḥ | a̱va̱syūra̍si̱ duva̍svāñchu̱ndhyūra̍si mārjā̱līya̍ḥ
||5.40||उ॒शिग॑सि क॒विरङ्घा॑रिरसि॒ बम्भा॑रिः । अ॒व॒स्यूर॑सि॒ दुव॑स्वाञ्छु॒न्ध्यूर॑सि मार्जा॒लीयः॑
ṛ̱tadhā̍māsi̱ sva̍rjyotiḥ samu̱dro̍'si vi̱śvavya̍cāḥ | a̱jo̱'syeka̍pā̱dahi̍rasi bu̱dhnya̍ḥ
||5.41||ऋ॒तधा॑मासि॒ स्व॑र्ज्योतिः समु॒द्रो॑ऽसि वि॒श्वव्य॑चाः । अ॒जो॒ऽस्येक॑पा॒दहि॑रसि बु॒ध्न्यः॑
sa̱mrāl̤a̍si kṛ̱śānu̍ḥ pari̱ṣadyo̍'si̱ pava̍mānaḥ | nabho̍'si pra̱takvā̍ mṛ̱ṣṭo̍'si havya̱sūda̍naḥ
||5.42||स॒म्राळ॑सि कृ॒शानुः॑ परि॒षद्यो॑ऽसि॒ पव॑मानः । नभो॑ऽसि प्र॒तक्वा॑ मृ॒ष्टो॑ऽसि हव्य॒सूद॑नः
sa̱mū̱hyo̍'si vi̱śvave̍dā ūnātiri̱ktasya̍ prati̱ṣṭhā|
agna̍yaḥ sagarā̱ḥ saga̍rā stha̱ saga̍reṇa̱ nāmnā raudre̱ṇānī̍kena|
pā̱ta mā̍gnayaḥ pipṛ̱tamā̍gnayo̱ namo̍ vo'stu̱ mā mā̍ hisiṣṭa
||5.43||स॒मू॒ह्यो॑ऽसि वि॒श्ववे॑दा ऊनातिरि॒क्तस्य॑ प्रति॒ष्ठा।
अग्न॑यः सगराः॒ सग॑रा स्थ॒ सग॑रेण॒ नाम्ना रौद्रे॒णानी॑केन।
पा॒त मा॑ग्नयः पिपृ॒तमा॑ग्नयो॒ नमो॑ वोऽस्तु॒ मा मा॑ हिसिष्ट
jyoti̍rasi vi̱śvarū̍pa̱ṃ viśve̍ṣāṃ de̱vānā̍ sa̱mit | tva so̍ma tanū̱kṛdbhyo̱ dveṣo̍bhyo̱'nyakṛ̍tebhyaḥ |
u̱ru ya̱ntāsi̱ varū̍tha̱svāhā̍ | ju̱ṣā̱ṇo a̱pturājya̍sya vetu̱ svāhā̍
||5.44||ज्योति॑रसि वि॒श्वरू॑पं॒ विश्वे॑षां दे॒वाना॑ स॒मित् । त्व सो॑म तनू॒कृद्भ्यो॒ द्वेषो॑भ्यो॒ऽन्यकृ॑तेभ्यः ।
उ॒रु य॒न्तासि॒ वरू॑थ॒स्वाहा॑ । जु॒षा॒णो अ॒प्तुराज्य॑स्य वेतु॒ स्वाहा॑
agne̱ naya̍ su̱pathā̍ rā̱ye a̱smānviśvā̍ni deva va̱yunā̍ni vi̱dvān |
yu̱yo̱dhya̱smajju̍hurā̱ṇameno̱ bhūyi̍ṣṭhāṃ te̱ nama̍uktiṃ vidhema
||5.45||अग्ने॒ नय॑ सु॒पथा॑ रा॒ये अ॒स्मान्विश्वा॑नि देव व॒युना॑नि वि॒द्वान् ।
यु॒यो॒ध्य॒स्मज्जु॑हुरा॒णमेनो॒ भूयि॑ष्ठां ते॒ नम॑उक्तिं विधेम
a̱yaṃ no̍ a̱gnirvari̍vaskṛṇotva̱yaṃ mṛdha̍ḥ pu̱ra e̍tu prabhi̱ndan |
a̱yaṃ vājā̍ñjayatu̱ vāja̍sātā a̱yaśatrū̍ñjayatu̱ jarhṛ̍ṣāṇa̱ḥ svāhā̍
||5.46||अ॒यं नो॑ अ॒ग्निर्वरि॑वस्कृणोत्व॒यं मृधः॑ पु॒र ए॑तु प्रभि॒न्दन् ।
अ॒यं वाजा॑ञ्जयतु॒ वाज॑साता अ॒यशत्रू॑ञ्जयतु॒ जर्हृ॑षाणः॒ स्वाहा॑
u̱ru vi̍ṣṇo̱ vikra̍masvo̱ru kṣayā̍ya naskṛdhi | ghṛ̱taṃ ghṛ̍tayone piba̱ prapra̍ ya̱jñapa̍tiṃ tira̱ svāhā̍
||5.47||उ॒रु वि॑ष्णो॒ विक्र॑मस्वो॒रु क्षया॑य नस्कृधि । घृ॒तं घृ॑तयोने पिब॒ प्रप्र॑ य॒ज्ञप॑तिं तिर॒ स्वाहा॑
deva̍ savitare̱ṣa te̱ soma̱sta ra̍kṣasva̱ mā tvā̍ dabhan |
e̱tattvaṃ de̍va soma de̱vo de̱vām̐ upā̍gāḥ
||5.48||देव॑ सवितरे॒ष ते॒ सोम॒स्त र॑क्षस्व॒ मा त्वा॑ दभन् ।
ए॒तत्त्वं दे॑व सोम दे॒वो दे॒वाँ उपा॑गाः
i̱dama̱haṃ ma̍nu̱ṣyā̍ntsa̱ha rā̱yaspoṣe̍ṇa̱ svāhā̱ nirvaru̍ṇasya̱ pāśā̍nmucye | agne̍ vratapā̱stve vra̍tapāḥ
||5.49||इ॒दम॒हं म॑नु॒ष्या॑न्त्स॒ह रा॒यस्पोषे॑ण॒ स्वाहा॒ निर्वरु॑णस्य॒ पाशा॑न्मुच्ये । अग्ने॑ व्रतपा॒स्त्वे व्र॑तपाः
yā tava̍ ta̱nūrmayyabhū̍de̱ṣā sā tvayi̱ yā mama̍ ta̱nūstvayyabhū̍diya̱ sā mayi̍ |
ya̱thā̱ya̱thaṃ nau̍ vratapate vra̱tānyanu̍ me dī̱kṣāṃ dī̱kṣāpa̍ti̱rama̱stānu̱ tapa̱stapa̍spatiḥ
||5.50||या तव॑ त॒नूर्मय्यभू॑दे॒षा सा त्वयि॒ या मम॑ त॒नूस्त्वय्यभू॑दिय॒ सा मयि॑ ।
य॒था॒य॒थं नौ॑ व्रतपते व्र॒तान्यनु॑ मे दी॒क्षां दी॒क्षाप॑ति॒रम॒स्तानु॒ तप॒स्तप॑स्पतिः
u̱ru vi̍ṣṇo̱ vikra̍masvo̱ru kṣayā̍ya naskṛdhi | ghṛ̱taṃ ghṛ̍tayone piba̱ prapra̍ ya̱jñapa̍tiṃ tira̱ svāhā̍
||5.51||उ॒रु वि॑ष्णो॒ विक्र॑मस्वो॒रु क्षया॑य नस्कृधि । घृ॒तं घृ॑तयोने पिब॒ प्रप्र॑ य॒ज्ञप॑तिं तिर॒ स्वाहा॑
atya̱nyām̐3 agā̱ṃ nānyām̐3 upā̍gām | a̱rvāktvā̱ pare̍bhyaḥ pa̱ro'va̍rebhyaḥ
||5.52||अत्य॒न्याँ३ अगां॒ नान्याँ३ उपा॑गाम् । अ॒र्वाक्त्वा॒ परे॑भ्यः प॒रोऽव॑रेभ्यः
taṃ tvā̍ juṣāmahe deva vanaspate devaya̱jyāyai̍ | de̱vāstvā̍ devaya̱jyāyai̍ juṣantā̱ṃ viṣṇa̍ve tvā
||5.53||तं त्वा॑ जुषामहे देव वनस्पते देवय॒ज्यायै॑ । दे॒वास्त्वा॑ देवय॒ज्यायै॑ जुषन्तां॒ विष्ण॑वे त्वा
oṣa̍dhe̱ trāya̍sva̱ svadhi̍te̱ maina̍ hisīḥ | diva̱ṃ mā le̍khīra̱ntari̍kṣa̱ṃ mā hi̍sīḥ pṛthi̱vyā saṃbha̍va
||5.54||ओष॑धे॒ त्राय॑स्व॒ स्वधि॑ते॒ मैन॑ हिसीः । दिवं॒ मा ले॑खीर॒न्तरि॑क्षं॒ मा हि॑सीः पृथि॒व्या संभ॑व
a̱ya hi tvā̱ svadhi̍ti̱steti̍jānaḥ praṇi̱nāya̍ maha̱te saubha̍gāya |
ata̱stvaṃ de̍va vanaspate śa̱tava̍lśo̱ viro̍ha sa̱hasra̍valśā̱ vi va̱ya ru̍hema
||5.55||अ॒य हि त्वा॒ स्वधि॑ति॒स्तेति॑जानः प्रणि॒नाय॑ मह॒ते सौभ॑गाय ।
अत॒स्त्वं दे॑व वनस्पते श॒तव॑ल्शो॒ विरो॑ह स॒हस्र॑वल्शा॒ वि व॒य रु॑हेम