atha ṣaḍviṃśo'dhyāyaḥ |
aśva̍stūpa̱ro go̍mṛ̱gaste prā̍jāpa̱tyāḥ kṛ̱ṣṇagrī̍va āgne̱yo ra̱rāṭe̍ |
pu̱rastā̍tsārasva̱tī me̱ṣya̱dhastā̱ddhanvo̍ḥ
||26.1||अश्व॑स्तूप॒रो गो॑मृ॒गस्ते प्रा॑जाप॒त्याः कृ॒ष्णग्री॑व आग्ने॒यो र॒राटे॑ ।
पु॒रस्ता॑त्सारस्व॒ती मे॒ष्य॒धस्ता॒द्धन्वोः॑
rāśvi̱nāva̱dhorā̍mau bā̱hvoḥ sau̍māpau̱ṣṇaḥ śyā̱mo nābhyā̍ sauryayāmau |
śve̱taśca̍ kṛ̱ṣṇaśca̍ pā̱rśvayo̍ḥ
||26.2||राश्वि॒नाव॒धोरा॑मौ बा॒ह्वोः सौ॑मापौ॒ष्णः श्या॒मो नाभ्या॑ सौर्ययामौ ।
श्वे॒तश्च॑ कृ॒ष्णश्च॑ पा॒र्श्वयोः॑
tvā̱ṣṭrau lo̍ma̱śasa̍kthau sa̱kthyorvā̍ya̱vya̍ḥ śve̱taḥ puccha̱ indrā̍ya svapa̱syā̍ya ve̱hadvai̍ṣṇa̱vo vā̍ma̱naḥ |
rohi̍to dhū̱mraro̍hitaḥ ka̱rkandhu̍rohita̱ste sau̱myā ba̱bhrura̍ru̱ṇaba̍bhru̱ḥ śuka̍babhru̱ste vā̍ru̱ṇāḥ
||26.3||त्वा॒ष्ट्रौ लो॑म॒शस॑क्थौ स॒क्थ्योर्वा॑य॒व्यः॑ श्वे॒तः पुच्छ॒ इन्द्रा॑य स्वप॒स्या॑य वे॒हद्वै॑ष्ण॒वो वा॑म॒नः ।
रोहि॑तो धू॒म्ररो॑हितः क॒र्कन्धु॑रोहित॒स्ते सौ॒म्या ब॒भ्रुर॑रु॒णब॑भ्रुः॒ शुक॑बभ्रु॒स्ते वा॑रु॒णाः
śi̱ti̱randhro̱'nyata̍ḥ śitirandhraḥ sama̱ntaśi̍tirandhra̱ste sā̍vi̱trāḥ śi̍tibā̱huranyata̍ḥ
śitibāhuḥ sama̱ntaśi̍tibāhu̱ste bā̍rhaspa̱tyāḥ |
pṛṣa̍tī kṣu̱drapṛ̍ṣatī sthū̱lapṛ̍ṣatī̱ tā mai̍trāvaruṇya̍ḥ
||26.4||शि॒ति॒रन्ध्रो॒ऽन्यतः॑ शितिरन्ध्रः सम॒न्तशि॑तिरन्ध्र॒स्ते सा॑वि॒त्राः शि॑तिबा॒हुरन्यतः॑
शितिबाहुः सम॒न्तशि॑तिबाहु॒स्ते बा॑र्हस्प॒त्याः ।
पृष॑ती क्षु॒द्रपृ॑षती स्थू॒लपृ॑षती॒ ता मै॑त्रावरुण्यः॑
śu̱ddhavā̍laḥ sa̱rvaśu̍ddhavālo maṇi̱vāla̱sta ā̍śvi̱nāḥ |
śyeta̍ḥ śyetā̱kṣo̍'ru̱ṇaste ru̱drāya̍ paśu̱pata̍ye ka̱rṇāyā̱māḥ
||26.5||शु॒द्धवा॑लः स॒र्वशु॑द्धवालो मणि॒वाल॒स्त आ॑श्वि॒नाः ।
श्येतः॑ श्येता॒क्षो॑ऽरु॒णस्ते रु॒द्राय॑ पशु॒पत॑ये क॒र्णाया॒माः
a̍vali̱ptā rau̱drā nabho̍rūpāḥ pārja̱nyāḥ | pṛśni̍stira̱ścīna̍pṛśnirū̱rdhvapṛ̍śni̱ste mā̍ru̱tāḥ
||26.6||अ॑वलि॒प्ता रौ॒द्रा नभो॑रूपाः पार्ज॒न्याः । पृश्नि॑स्तिर॒श्चीन॑पृश्निरू॒र्ध्वपृ॑श्नि॒स्ते मा॑रु॒ताः
pha̱lgūrlo̍hito̱rṇī pa̍la̱kṣī tāḥ sā̍rasva̱tya̍ḥ |
plīhā̱karṇa̍ḥ śuṇṭhā̱karṇo̍'ddhyāloha̱karṇa̱ste tvā̱ṣṭrāḥ
||26.7||फ॒ल्गूर्लो॑हितो॒र्णी प॑ल॒क्षी ताः सा॑रस्व॒त्यः॑ ।
प्लीहा॒कर्णः॑ शुण्ठा॒कर्णो॑ऽद्ध्यालोह॒कर्ण॒स्ते त्वा॒ष्ट्राः
kṛ̱ṣṇagrī̍vaḥ śiti̱kakṣo̍'ñjisa̱kthasta ai̍ndrā̱gnāḥ |
kṛ̱ṣṇāñji̱ralpā̍ñjirma̱hāñji̱sta u̍ṣa̱syā̍ḥ
||26.8||कृ॒ष्णग्री॑वः शिति॒कक्षो॑ऽञ्जिस॒क्थस्त ऐ॑न्द्रा॒ग्नाः ।
कृ॒ष्णाञ्जि॒रल्पा॑ञ्जिर्म॒हाञ्जि॒स्त उ॑ष॒स्याः॑
śi̱lpā vai̍śvade̱vyo̱ rohi̍ṇya̱stryava̍yo vā̱ce'vi̍jñātā̱ adi̍tyai |
sarū̍pā dhā̱tre va̍tsata̱ryo̍ de̱vānā̱ṃ patnī̍bhyaḥ
||26.9||शि॒ल्पा वै॑श्वदे॒व्यो॒ रोहि॑ण्य॒स्त्र्यव॑यो वा॒चेऽवि॑ज्ञाता॒ अदि॑त्यै ।
सरू॑पा धा॒त्रे व॑त्सत॒र्यो॑ दे॒वानां॒ पत्नी॑भ्यः
kṛ̱ṣṇagrī̍vā āgne̱yāḥ śi̍ti̱bhravo̱ vasū̍nā̱ rohi̍tā ru̱drāṇā̍m |
śve̱tā a̍varo̱kiṇa̍ ādi̱tyānā̱ṃ nabho̍rūpāḥ pārja̱nyāḥ
||26.10||कृ॒ष्णग्री॑वा आग्ने॒याः शि॑ति॒भ्रवो॒ वसू॑ना॒ रोहि॑ता रु॒द्राणा॑म् ।
श्वे॒ता अ॑वरो॒किण॑ आदि॒त्यानां॒ नभो॑रूपाः पार्ज॒न्याः
u̱nna̱ta ṛ̍ṣa̱bho vā̍ma̱nasta ai̍ndravaiṣṇa̱vā u̍nna̱taḥ śi̍tibā̱huḥ śi̍tipṛ̱ṣṭhasta ai̍ndrābārhaspa̱tyāḥ |
śuka̍rūpā vāji̱nāḥ ka̱lmāṣā̍ āgnimāru̱tāḥ śyā̱māḥ pau̱ṣṇāḥ
||26.11||उ॒न्न॒त ऋ॑ष॒भो वा॑म॒नस्त ऐ॑न्द्रवैष्ण॒वा उ॑न्न॒तः शि॑तिबा॒हुः शि॑तिपृ॒ष्ठस्त ऐ॑न्द्राबार्हस्प॒त्याः ।
शुक॑रूपा वाजि॒नाः क॒ल्माषा॑ आग्निमारु॒ताः श्या॒माः पौ॒ष्णाः
etā̍ aindrā̱gnā dvi̍rū̱pā a̍gnīṣo̱mīyā̍ vāma̱nā a̍na̱ḍvāha̍ āgnāvaiṣṇa̱vāḥ |
va̱śā mai̍trāvaru̱ṇyo̱'nyata̍ enyo mai̱trya̍ḥ
||26.12||एता॑ ऐन्द्रा॒ग्ना द्वि॑रू॒पा अ॑ग्नीषो॒मीया॑ वाम॒ना अ॑न॒ड्वाह॑ आग्नावैष्ण॒वाः ।
व॒शा मै॑त्रावरु॒ण्यो॒ऽन्यत॑ एन्यो मै॒त्र्यः॑
kṛ̱ṣṇagrī̍vā āgne̱yā ba̱bhrava̍ḥ sau̱myāḥ śve̱tā vā̍ya̱vyā̱ avi̍jñātā̱ adi̍tyai |
sarū̍pā dhā̱tre va̍tsata̱ryo̍ de̱vānā̱ṃ patnī̍bhyaḥ
||26.13||कृ॒ष्णग्री॑वा आग्ने॒या ब॒भ्रवः॑ सौ॒म्याः श्वे॒ता वा॑य॒व्या॒ अवि॑ज्ञाता॒ अदि॑त्यै ।
सरू॑पा धा॒त्रे व॑त्सत॒र्यो॑ दे॒वानां॒ पत्नी॑भ्यः
kṛ̱ṣṇā bhau̱mā dhū̱mrā ā̍ntari̱kṣā bṛ̱hanto̍ di̱vyāḥ |
śa̱balā̍ vaidyu̱tāḥ si̱dhmāstā̍ra̱kāḥ
||26.14||कृ॒ष्णा भौ॒मा धू॒म्रा आ॑न्तरि॒क्षा बृ॒हन्तो॑ दि॒व्याः ।
श॒बला॑ वैद्यु॒ताः सि॒ध्मास्ता॑र॒काः
dhū̱mrānva̍sa̱ntāyā la̍bhate śve̱tāngrī̱ṣmāya̍ kṛ̱ṣṇānva̱rṣābhyo̍'ru̱ṇāñcha̱rade̍ |
pṛṣa̍to hema̱ntāya̍ pi̱śaṅgā̱ñchiśi̍rāya
||26.15||धू॒म्रान्व॑स॒न्ताया ल॑भते श्वे॒तान्ग्री॒ष्माय॑ कृ॒ष्णान्व॒र्षाभ्यो॑ऽरु॒णाञ्छ॒रदे॑ ।
पृष॑तो हेम॒न्ताय॑ पि॒शङ्गा॒ञ्छिशि॑राय
tryava̍yo gāyatryai̱ pañcā̍vayastri̱ṣṭubhe̍ ditya̱vāho̱ jaga̍tyai |
tri̱va̱tsā a̍nu̱ṣṭubhe̍ turya̱vāha̍ u̱ṣṇihe̍
||26.16||त्र्यव॑यो गायत्र्यै॒ पञ्चा॑वयस्त्रि॒ष्टुभे॑ दित्य॒वाहो॒ जग॑त्यै ।
त्रि॒व॒त्सा अ॑नु॒ष्टुभे॑ तुर्य॒वाह॑ उ॒ष्णिहे॑
pa̱ṣṭha̱vāho̍ vi̱rāja̍ u̱kṣaṇo̍ bṛha̱tyā ṛ̍ṣa̱bhāḥ ka̱kubhe̍ |
a̱na̱ḍvāha̍ḥ pa̱ṅktyai dhe̱navo'ti̍cchandase
||26.17||प॒ष्ठ॒वाहो॑ वि॒राज॑ उ॒क्षणो॑ बृह॒त्या ऋ॑ष॒भाः क॒कुभे॑ ।
अ॒न॒ड्वाहः॑ प॒ङ्क्त्यै धे॒नवोऽति॑च्छन्दसे
kṛ̱ṣṇagrī̍vā āgne̱yā ba̱bhrava̍ḥ sau̱myā u̍padhva̱stāḥ sā̍vi̱trā va̍tsata̱rya̍ḥ sārasva̱tya̍ḥ śyā̱māḥ pau̱ṣṇāḥ |
pṛśna̍yo māru̱tā ba̍hurū̱pā vai̍śvade̱vā va̱śā dyā̍vāpṛthi̱vīyā̍ḥ
||26.18||कृ॒ष्णग्री॑वा आग्ने॒या ब॒भ्रवः॑ सौ॒म्या उ॑पध्व॒स्ताः सा॑वि॒त्रा व॑त्सत॒र्यः॑ सारस्व॒त्यः॑ श्या॒माः पौ॒ष्णाः ।
पृश्न॑यो मारु॒ता ब॑हुरू॒पा वै॑श्वदे॒वा व॒शा द्या॑वापृथि॒वीयाः॑
u̱ktāḥ sa̍ṃca̱rā etā̍ aindrā̱gnāḥ |
kṛ̱ṣṇāḥ vā̍ru̱ṇāḥ pṛśna̍yo māru̱tāḥ kā̱yāstū̍pa̱rāḥ
||26.19||उ॒क्ताः सं॑च॒रा एता॑ ऐन्द्रा॒ग्नाः ।
कृ॒ष्णाः वा॑रु॒णाः पृश्न॑यो मारु॒ताः का॒यास्तू॑प॒राः
a̱gnaye'nī̍kavate prathama̱jānāla̍bhate ma̱rudbhya̍ḥ sāṃtapa̱nebhya̍ḥ savā̱tyānma̱rudbhyo̍ gṛhame̱dhibhyo̱ baṣki̍hān |
ma̱rudbhya̍ḥ krī̱l̤ibhya̍ḥ sasṛ̱ṣṭānma̱rudbhya̱ḥ svata̍vadbhyo'nusṛ̱ṣṭān
||26.20||अ॒ग्नयेऽनी॑कवते प्रथम॒जानाल॑भते म॒रुद्भ्यः॑ सांतप॒नेभ्यः॑ सवा॒त्यान्म॒रुद्भ्यो॑ गृहमे॒धिभ्यो॒ बष्कि॑हान् ।
म॒रुद्भ्यः॑ क्री॒ळिभ्यः॑ ससृ॒ष्टान्म॒रुद्भ्यः॒ स्वत॑वद्भ्योऽनुसृ॒ष्टान्
u̱ktāḥ sa̍ṃca̱rā etā̍ aindrā̱gnāḥ | prā̍śṛ̱ṅgā mā̍he̱ndrā ba̍hurū̱pā vai̍śvakarma̱ṇāḥ
||26.21||उ॒क्ताः सं॑च॒रा एता॑ ऐन्द्रा॒ग्नाः । प्रा॑शृ॒ङ्गा मा॑हे॒न्द्रा ब॑हुरू॒पा वै॑श्वकर्म॒णाः
dhū̱mrā ba̱bhrunī̍kāśāḥ pitṝ̱ṇā soma̍vatāṃ ba̱bhravo̍ dhū̱mranī̍kāśāḥ pitṝ̱ṇāṃ ba̍rhi̱ṣadā̍m |
kṛ̱ṣṇā ba̱bhrunī̍kāśāḥ pitṝ̱ṇāma̍gniṣvā̱ttānā̍ṃ kṛ̱ṣṇāḥ pṛṣa̍ntastraiyamba̱kāḥ
||26.22||धू॒म्रा ब॒भ्रुनी॑काशाः पितॄ॒णा सोम॑वतां ब॒भ्रवो॑ धू॒म्रनी॑काशाः पितॄ॒णां ब॑र्हि॒षदा॑म् ।
कृ॒ष्णा ब॒भ्रुनी॑काशाः पितॄ॒णाम॑ग्निष्वा॒त्तानां॑ कृ॒ष्णाः पृष॑न्तस्त्रैयम्ब॒काः
u̱ktāḥ sa̍ṃca̱rā etā̍ḥ śunāsī̱rīyā̍ḥ | śve̱tā vā̍ya̱vyāḥ śve̱tāḥ sau̱ryāḥ
||26.23||उ॒क्ताः सं॑च॒रा एताः॑ शुनासी॒रीयाः॑ । श्वे॒ता वा॑य॒व्याः श्वे॒ताः सौ॒र्याः
va̱sa̱ntāya̍ ka̱piñja̍lā̱nāla̍bhate grī̱ṣmāya̍ kala̱viṅkā̍nva̱rṣābhya̍sti̱ttirī̍ñcha̱rade̱ varti̍kāḥ |
he̱ma̱ntāya̱ kaka̍rā̱ñchiśi̍rāya̱ vika̍karān
||26.24||व॒स॒न्ताय॑ क॒पिञ्ज॑ला॒नाल॑भते ग्री॒ष्माय॑ कल॒विङ्का॑न्व॒र्षाभ्य॑स्ति॒त्तिरी॑ञ्छ॒रदे॒ वर्ति॑काः ।
हे॒म॒न्ताय॒ कक॑रा॒ञ्छिशि॑राय॒ विक॑करान्
sa̱mu̱drāya̍ śiśu̱mārā̱nāla̍bhate pa̱rjanyā̍ya ma̱ṇḍūkā̍na̱dbhyo matsyā̍n |
mi̱trāya̍ kulī̱payā̱nvaru̍ṇāya nā̱krān
||26.25||स॒मु॒द्राय॑ शिशु॒मारा॒नाल॑भते प॒र्जन्या॑य म॒ण्डूका॑न॒द्भ्यो मत्स्या॑न् ।
मि॒त्राय॑ कुली॒पया॒न्वरु॑णाय ना॒क्रान्
somā̍ya ha̱sānāla̍bhate vā̱yave̍ ba̱lākā̍ indrā̱gnibhyā̱ṃ kruñcā̍n |
mi̱trāya̍ ma̱dgūnvaru̍ṇāya cakravā̱kān
||26.26||सोमा॑य ह॒सानाल॑भते वा॒यवे॑ ब॒लाका॑ इन्द्रा॒ग्निभ्यां॒ क्रुञ्चा॑न् ।
मि॒त्राय॑ म॒द्गून्वरु॑णाय चक्रवा॒कान्
a̱gnaye̍ ku̱ṭarū̱nāla̍bhate̱ vana̱spati̍bhya̱ ulū̍kāna̱gnīṣomā̍bhyā̱ṃ cāṣā̍n |
a̱śvibhyā̍ṃ ma̱yūrā̍nmi̱trāvaru̍ṇābhyāṃ ka̱potā̍n
||26.27||अ॒ग्नये॑ कु॒टरू॒नाल॑भते॒ वन॒स्पति॑भ्य॒ उलू॑कान॒ग्नीषोमा॑भ्यां॒ चाषा॑न् ।
अ॒श्विभ्यां॑ म॒यूरा॑न्मि॒त्रावरु॑णाभ्यां क॒पोता॑न्
somā̍ya la̱bānāla̍bhate̱ tvaṣṭre̍ kaulī̱kāngo̍ṣā̱dīrde̱vānā̱ṃ patnī̍bhyaḥ |
ku̱līkā̍ devajā̱mibhyo̱'gnaye̍ gṛ̱hapa̍taye pāru̱ṣṇān
||26.28||सोमा॑य ल॒बानाल॑भते॒ त्वष्ट्रे॑ कौली॒कान्गो॑षा॒दीर्दे॒वानां॒ पत्नी॑भ्यः ।
कु॒लीका॑ देवजा॒मिभ्यो॒ऽग्नये॑ गृ॒हप॑तये पारु॒ष्णान्
ahne̍ pā̱rāva̍tā̱nāla̍bhate̱ rātryai̍ sīcā̱pūra̍horā̱trayo̍ḥ sa̱ṃdhibhyo̍ ja̱tūḥ |
māse̍bhyo dātyau̱hāntsa̍ṃvatsa̱rāya̍ maha̱taḥ su̍pa̱rṇān
||26.29||अह्ने॑ पा॒राव॑ता॒नाल॑भते॒ रात्र्यै॑ सीचा॒पूर॑होरा॒त्रयोः॑ सं॒धिभ्यो॑ ज॒तूः ।
मासे॑भ्यो दात्यौ॒हान्त्सं॑वत्स॒राय॑ मह॒तः सु॑प॒र्णान्
bhūmyā̍ ā̱khūnāla̍bhate̱'ntari̍kṣāya pā̱ṅktrāndi̱ve kaśā̍n |
di̱gbhyo na̍ku̱lānbabhru̍kānavāntaradi̱śābhya̍ḥ
||26.30||भूम्या॑ आ॒खूनाल॑भते॒ऽन्तरि॑क्षाय पा॒ङ्क्त्रान्दि॒वे कशा॑न् ।
दि॒ग्भ्यो न॑कु॒लान्बभ्रु॑कानवान्तरदि॒शाभ्यः॑
vasu̍bhya̱ ṛśyā̱nāla̍bhate ru̱drebhyo̱ rurū̍nādi̱tyebhyo̱ nyaṅkū̍n |
viśve̍bhyo de̱vebhya̍ḥ pṛṣa̱tāntsā̱dhyebhya̍ḥ kulu̱ṅgān
||26.31||वसु॑भ्य॒ ऋश्या॒नाल॑भते रु॒द्रेभ्यो॒ रुरू॑नादि॒त्येभ्यो॒ न्यङ्कू॑न् ।
विश्वे॑भ्यो दे॒वेभ्यः॑ पृष॒तान्त्सा॒ध्येभ्यः॑ कुलु॒ङ्गान्
īśā̍nāya̱ para̍svata̱ āla̍bhate mi̱trāya̍ gau̱rānvaru̍ṇāya mahi̱ṣān |
bṛha̱spata̍ye gava̱yāstvaṣṭra̱ uṣṭrā̍n
||26.32||ईशा॑नाय॒ पर॑स्वत॒ आल॑भते मि॒त्राय॑ गौ॒रान्वरु॑णाय महि॒षान् ।
बृह॒स्पत॑ये गव॒यास्त्वष्ट्र॒ उष्ट्रा॑न्
pra̱jāpa̍taye̱ puru̍ṣān ha̱stina̱ āla̍bhate vā̱ce pluṣīn |
cakṣu̍ṣe ma̱śakā̱ñchrotrā̍ya̱ bhṛṅgā̍ḥ
||26.33||प्र॒जाप॑तये॒ पुरु॑षान् ह॒स्तिन॒ आल॑भते वा॒चे प्लुषीन् ।
चक्षु॑षे म॒शका॒ञ्छ्रोत्रा॑य॒ भृङ्गाः॑
pra̱jāpa̍taye ca vā̱yave̍ ca gomṛ̱go varu̍ṇāyāra̱ṇyo me̱ṣo ya̱māya̱ kṛṣṇo̍ manuṣyarā̱jāya̍ ma̱rkaṭa̍ḥ |
śā̱rdū̱lāya̍ ro̱hidṛ̍ṣa̱bhāya̍ gava̱yī kṣi̍praśye̱nāya̱ varti̍kā̱ nīla̍ṅgo̱ḥ krimi̍ḥ samu̱drāya̍ śiśu̱māro̍ hi̱mava̍te ha̱stī
||26.34||प्र॒जाप॑तये च वा॒यवे॑ च गोमृ॒गो वरु॑णायार॒ण्यो मे॒षो य॒माय॒ कृष्णो॑ मनुष्यरा॒जाय॑ म॒र्कटः॑ ।
शा॒र्दू॒लाय॑ रो॒हिदृ॑ष॒भाय॑ गव॒यी क्षि॑प्रश्ये॒नाय॒ वर्ति॑का॒ नील॑ङ्गोः॒ क्रिमिः॑ समु॒द्राय॑ शिशु॒मारो॑ हि॒मव॑ते ह॒स्ती
ma̱yuḥ prā̍jāpa̱tya u̱lo ha̱likṣṇo̍ vṛṣada̱śaste dhā̱tre di̱śāṃ ka̱ṅko dhuṅkṣā̍gne̱yī |
ka̱la̱viṅko̍ lohitā̱hiḥ pu̍ṣkarasā̱daste tvā̱ṣṭrā vā̱ce kruñca̍ḥ
||26.35||म॒युः प्रा॑जाप॒त्य उ॒लो ह॒लिक्ष्णो॑ वृषद॒शस्ते धा॒त्रे दि॒शां क॒ङ्को धुङ्क्षा॑ग्ने॒यी ।
क॒ल॒विङ्को॑ लोहिता॒हिः पु॑ष्करसा॒दस्ते त्वा॒ष्ट्रा वा॒चे क्रुञ्चः॑
somā̍ya kulu̱ṅga ā̍ra̱ṇyo̱'jo na̍ku̱laḥ śakā̱ te pau̱ṣṇāḥ kro̱ṣṭā mā̱yorindra̍sya gauramṛ̱gaḥ |
pi̱dvo nyaṅku̍ḥ kakka̱ṭaste'nu̍matyai prati̱śrutkā̍yai cakravā̱kaḥ
||26.36||सोमा॑य कुलु॒ङ्ग आ॑र॒ण्यो॒ऽजो न॑कु॒लः शका॒ ते पौ॒ष्णाः क्रो॒ष्टा मा॒योरिन्द्र॑स्य गौरमृ॒गः ।
पि॒द्वो न्यङ्कुः॑ कक्क॒टस्तेऽनु॑मत्यै प्रति॒श्रुत्का॑यै चक्रवा॒कः
sau̱rī ba̱lākā̍ śā̱rgaḥ sṛ̍ja̱yaḥ śa̱yāṇḍa̍ka̱ste mai̱trāḥ sara̍svatyai̱ śāri̍ḥ puruṣa̱vāk śvā̱vidbhau̱mī |
śā̍rdū̱lo vṛka̱ḥ pṛdā̍ku̱ste ma̱nyave̱ sara̍svate̱ śuka̍ḥ puruṣa̱vāk
||26.37||सौ॒री ब॒लाका॑ शा॒र्गः सृ॑ज॒यः श॒याण्ड॑क॒स्ते मै॒त्राः सर॑स्वत्यै॒ शारिः॑ पुरुष॒वाक् श्वा॒विद्भौ॒मी ।
शा॑र्दू॒लो वृकः॒ पृदा॑कु॒स्ते म॒न्यवे॒ सर॑स्वते॒ शुकः॑ पुरुष॒वाक्
su̱pa̱rṇaḥ pā̍rja̱nya ā̱tirvā̍ha̱so darvi̍dā̱ te vā̱yave̱ bṛha̱spata̍ye vā̱caspata̍ye paiṅgarā̱jo̍'la̱ja ā̍ntari̱kṣaḥ |
pla̱vo ma̱dgurmatsya̱ste na̍dī̱pata̍ye dyāvāpṛthi̱vīya̍ḥ kū̱rmaḥ
||26.38||सु॒प॒र्णः पा॑र्ज॒न्य आ॒तिर्वा॑ह॒सो दर्वि॑दा॒ ते वा॒यवे॒ बृह॒स्पत॑ये वा॒चस्पत॑ये पैङ्गरा॒जो॑ऽल॒ज आ॑न्तरि॒क्षः ।
प्ल॒वो म॒द्गुर्मत्स्य॒स्ते न॑दी॒पत॑ये द्यावापृथि॒वीयः॑ कू॒र्मः
pu̱ru̱ṣa̱mṛ̱gaśca̱ndrama̍so go̱dhā kāla̍kā dārvāghā̱ṭaste vana̱spatī̍nāṃ kṛka̱vāku̍ḥ sāvi̱tro ha̱so vāta̍sya |
nā̱kro maka̍raḥ kulī̱paya̱ste'kū̍pārasya hri̱yai śalya̍kaḥ
||26.39||पु॒रु॒ष॒मृ॒गश्च॒न्द्रम॑सो गो॒धा काल॑का दार्वाघा॒टस्ते वन॒स्पती॑नां कृक॒वाकुः॑ सावि॒त्रो ह॒सो वात॑स्य ।
ना॒क्रो मक॑रः कुली॒पय॒स्तेऽकू॑पारस्य ह्रि॒यै शल्य॑कः
e̱ṇyahno̍ ma̱ṇḍūko̱ mūṣi̍kā ti̱ttiri̱ste sa̱rpāṇā̍m̐ lopā̱śa ā̍śvi̱naḥ kṛṣṇo̱ rātryai̍ |
ṛkṣo̍ ja̱tūḥ su̍ṣi̱līkā̱ ta i̍taraja̱nānā̱ṃ jaha̍kā vaiṣṇa̱vī
||26.40||ए॒ण्यह्नो॑ म॒ण्डूको॒ मूषि॑का ति॒त्तिरि॒स्ते स॒र्पाणाँ॑ लोपा॒श आ॑श्वि॒नः कृष्णो॒ रात्र्यै॑ ।
ऋक्षो॑ ज॒तूः सु॑षि॒लीका॒ त इ॑तरज॒नानां॒ जह॑का वैष्ण॒वी
a̱nya̱vā̱po̍'rdhamā̱sānā̱mṛśyo̍ ma̱yūra̍ḥ supa̱rṇaste ga̍ndha̱rvāṇā̍ma̱pāmu̱dro mā̱sāṃ ka̱śyapa̍ḥ |
ro̱hitku̍ṇḍṛ̱ṇācī̍ go̱latti̍kā̱ te̍'psa̱rasā̍ṃ mṛ̱tyave̍'si̱taḥ
||26.41||अ॒न्य॒वा॒पो॑ऽर्धमा॒साना॒मृश्यो॑ म॒यूरः॑ सुप॒र्णस्ते ग॑न्ध॒र्वाणा॑म॒पामु॒द्रो मा॒सां क॒श्यपः॑ ।
रो॒हित्कु॑ण्डृ॒णाची॑ गो॒लत्ति॑का॒ ते॑ऽप्स॒रसां॑ मृ॒त्यवे॑ऽसि॒तः
va̱rṣā̱hūrṛ̍tū̱nāmā̱khuḥ kaśo̍ mānthā̱laste pi̍tṝ̱ṇāṃ balā̍yājaga̱ro vasū̍nāṃ ka̱piñja̍laḥ |
ka̱pota̱ ulū̍kaḥ śa̱śaste nirṛ̍tyai̱ varu̍ṇāyāra̱ṇyo me̱ṣaḥ
||26.42||व॒र्षा॒हूरृ॑तू॒नामा॒खुः कशो॑ मान्था॒लस्ते पि॑तॄ॒णां बला॑याजग॒रो वसू॑नां क॒पिञ्ज॑लः ।
क॒पोत॒ उलू॑कः श॒शस्ते निरृ॑त्यै॒ वरु॑णायार॒ण्यो मे॒षः
śvi̱tra ā̍di̱tyānā̱muṣṭro̱ ghṛṇī̍vānvārdhrīna̱saste ma̱tyā ara̍ṇyāya sṛma̱ro rurū̍ rau̱draḥ |
kva̱yi̍ḥ ku̱ṭaru̍rdātyau̱haste vā̱jinā̱ṃ kāmā̍ya pi̱kaḥ
||26.43||श्वि॒त्र आ॑दि॒त्याना॒मुष्ट्रो॒ घृणी॑वान्वार्ध्रीन॒सस्ते म॒त्या अर॑ण्याय सृम॒रो रुरू॑ रौ॒द्रः ।
क्व॒यिः॑ कु॒टरु॑र्दात्यौ॒हस्ते वा॒जिनां॒ कामा॑य पि॒कः
kha̱ṅgo vai̍śvade̱vaḥ śvā kṛ̱ṣṇaḥ ka̱rṇo ga̍rda̱bhasta̱rakṣu̱ste rakṣa̍sā̱mindrā̍ya sūka̱raḥ|
si̱ho mā̍ru̱taḥ kṛ̍kalā̱saḥ pippa̍kā śa̱kuni̱ste śa̍ra̱vyā̍yai̱ viśve̍ṣāṃ de̱vānā̍ṃ pṛṣa̱taḥ
||26.44||ख॒ङ्गो वै॑श्वदे॒वः श्वा कृ॒ष्णः क॒र्णो ग॑र्द॒भस्त॒रक्षु॒स्ते रक्ष॑सा॒मिन्द्रा॑य सूक॒रः।
सि॒हो मा॑रु॒तः कृ॑कला॒सः पिप्प॑का श॒कुनि॒स्ते श॑र॒व्या॑यै॒ विश्वे॑षां दे॒वानां॑ पृष॒तः