Vājasaneyi Kanva Saṃhitā — Chapter 8 (32 mantras)

Vājasaneyi Kanva Saṃhitā — Chapter 8

athāṣṭamo’dhyāyaḥ |

---

Mantras

Mantra	First Words
1	kadā cana
2	kadā cana
3	yajño devānā
4	śradasmai naro
5	vāmamadya savitarvāmamu
6	upayāmagṛhīto’si sāvitro’si
7	upayāmagṛhīto’si suśarmāsi
8	upayāmagṛhīto’si bṛhaspatisutasya
9	aha parastādahamavastādyadantarikṣa
10	agne vākpatni
11	prajāpatirvṛṣāsi retodhā
12	upayāmagṛhīto’si harirasi
13	yaste deva
14	yukṣvā hi
15	ātiṣṭha vṛtrahan
16	indramiddharī vahato’pratidhṛṣṭaśavasam
17	yasmānna jāta
18	indraśca samrāḍ
19	agna āyūṣi
20	agne pavasva
21	uttiṣṭhannojasā saha
22	adṛśramasya ketavo
23	udu tya
24	citra devānāmudagādanīka
25	vi na
26	vācaspati viśvakarmāṇamūtaye
27	viśvakarmanhaviṣā vāvṛdhāna
28	viśvakarmanhaviṣā vardhanena
29	upayāmagṛhīto’syagnaye tvā
30	vreśīnā tvā
31	kakuha rūpa
32	uśik tva

---

Mantra 1 {#mantra-1}

Adhyāya: 8 | Mantra: 1

ka̱dā ca̱na sta̱rīra̍si̱ nendra̍ saścasi dā̱śuṣe̍ | upo̱pennu ma̍ghava̱nbhūya̱ innu te̱ dāna̍ṃ de̱vasya̍ pṛcyata ādi̱tyebhya̍stvā

---

Mantra 2 {#mantra-2}

Adhyāya: 8 | Mantra: 2

ka̱dā ca̱na prayu̍cchasyu̱bhe nipā̍si̱ janma̍nī | turī̍yāditya̱ sava̍naṃ ta indri̱yamāta̍sthā a̱mṛta̍ṃ di̱vyā̍di̱tyebhya̍stvā

---

Mantra 3 {#mantra-3}

Adhyāya: 8 | Mantra: 3

ya̱jño de̱vānā̱ṃ pratye̍ti su̱mnamādi̍tyāso̱ bhava̍tā mṛl̤a̱yanta̍ḥ | ā vo̱’rvācī̍ suma̱tirva̍vṛtyāda̱hości̱dyā va̍rivo̱vitta̱rāsa̍dādi̱tyebhya̍stvā | viva̍svām̐3 ādityai̱ṣa te̍ somapī̱thastasmi̍n matsva

---

Mantra 4 {#mantra-4}

Adhyāya: 8 | Mantra: 4

śrada̍smai naro̱ vaca̍se dadhātana̱ yadā̍śī̱rdā dampa̍tī vā̱mama̍śnutaḥ | pumā̍n pu̱tro jā̍yate vi̱ndate̱ vasvadhā̍ vi̱śvāhā̍ra̱pa e̍dhate gṛ̱he

---

Mantra 5 {#mantra-5}

Adhyāya: 8 | Mantra: 5

vā̱mama̱dya sa̍vitarvā̱mamu̱ śvo di̱vedi̍ve vā̱mama̱smabhya̍ sāvīḥ | vā̱masya̱ hi kṣaya̍sya deva̱ bhūre̍ra̱yā dhi̱yā vā̍ma̱bhāja̍ḥ syāma

---

Mantra 6 {#mantra-6}

Adhyāya: 8 | Mantra: 6

u̱pa̱yā̱magṛ̍hīto’si sāvi̱tro̍’si cano̱dhāścano̱ mayi̍ dhehi | jinva̍ ya̱jñaṃ jinva̍ ya̱jñapa̍ti̱ṃ bhagā̍ya savi̱tre tvā̍

---

Mantra 7 {#mantra-7}

Adhyāya: 8 | Mantra: 7

u̱pa̱yā̱magṛ̍hīto’si su̱śarmā̍si supratiṣṭhā̱no bṛ̱hadu̍kṣāya̱ nama̍ḥ | viśve̍bhyastvā de̱vebhya̍ e̱ṣa te̱ yoni̱rviśve̍bhyastvā de̱vebhya̍ḥ

---

Mantra 8 {#mantra-8}

Adhyāya: 8 | Mantra: 8

u̱pa̱yā̱magṛ̍hīto’si̱ bṛha̱spati̍sutasya te deva soma| inda̍ indri̱yāva̍ta̱ḥ patnī̍vato̱ grahā̍m̐3 ṛdhyāsam

---

Mantra 9 {#mantra-9}

Adhyāya: 8 | Mantra: 9

a̱haṃ pa̱rastā̍da̱hama̱vastā̱dyada̱ntari̍kṣa̱ṃ tadu̍ me pi̱tāsa̍ | a̱ha sūrya̍mubha̱yato̍ dadarśā̱haṃ de̱vānā̍ṃ para̱maṃ guhā̱ yat

---

Mantra 10 {#mantra-10}

Adhyāya: 8 | Mantra: 10

agne̱ vākpatni̍ sajūrde̱vena̱ tvaṣṭrā̍ |soma̍ṃ piba̱ svāhā̍

---

Mantra 11 {#mantra-11}

Adhyāya: 8 | Mantra: 11

pra̱jāpa̍ti̱rvṛṣā̍si reto̱dhā reto̱ mayi̍ dhehi | pra̱jāpa̍teste̱ vṛṣṇo̍ reto̱dhaso̍ reto̱dhāma̍śīya

---

Mantra 12 {#mantra-12}

Adhyāya: 8 | Mantra: 12

u̱pa̱yā̱magṛ̍hīto’si̱ hari̍rasi hāriyoja̱no hari̍bhyāṃ tvā | haryo̍rdhā̱nā stha̍ sa̱haso̍ mā̱ indrā̍ya

---

Mantra 13 {#mantra-13}

Adhyāya: 8 | Mantra: 13

yaste̍ deva somaśva̱sani̍rbha̱kṣo yo go̱sani̍ḥ | tasya̍ ta i̱ṣṭaya̍juṣa stu̱tasto̍masya śa̱stoktha̱syopa̍hūta̱ upa̍hūtasya bhakṣayāmi

---

Mantra 14 {#mantra-14}

Adhyāya: 8 | Mantra: 14

yu̱kṣvā hi ke̱śinā̱ harī̱ vṛṣa̍ṇā kakṣya̱prā | athā̍ na indra somapā gi̱rāmupa̍śrutiṃ cara | u̱pa̱yā̱magṛ̍hīto̱’sīndrā̍ya tvā ṣol̤a̱śina̍ | e̱ṣa te̱ yoni̱rindrā̍ya tvā ṣol̤a̱śine̍

---

Mantra 15 {#mantra-15}

Adhyāya: 8 | Mantra: 15

āti̍ṣṭha vṛtraha̱n ratha̍ṃ yu̱ktā te̱ brahma̍ṇā̱ harī̍ | a̱rvā̱cīna̱ su te̱ mano̱grāvā̍ kṛṇotu va̱gnunā̍ | u̱pa̱yā̱magṛ̍hīto̱’sīndrā̍ya tvā ṣol̤a̱śina̍ e̱ṣa te̱ yoni̱rindrā̍ya tvā ṣol̤a̱śine̍

---

Mantra 16 {#mantra-16}

Adhyāya: 8 | Mantra: 16

indra̱middharī̍ vaha̱to’pra̍tidhṛṣṭaśavasam | ṛṣī̍ṇāṃ ca stu̱tīrupa̍ ya̱jñaṃ ca̱ mānu̍ṣāṇām | u̱pa̱yā̱magṛ̍hīto̱’sīndrā̍ya tvā ṣol̤a̱śina̍ e̱ṣa te̱ yoni̱rindrā̍ya tvā ṣol̤a̱śine̍

---

Mantra 17 {#mantra-17}

Adhyāya: 8 | Mantra: 17

yasmā̱nna jā̱taḥ paro̍ a̱nyo asti̱ ya ā̍vi̱veśa̱ bhuva̍nāni̱ viśvā̍ | pra̱jāpa̍tiḥ pra̱jayā̍ sararā̱ṇastrīṇi̱ jyotī̍ṣi sacate̱ sa ṣo̍l̤a̱śī

---

Mantra 18 {#mantra-18}

Adhyāya: 8 | Mantra: 18

indra̍śca sa̱mrāḍ varu̍ṇaśca̱ rājā̱ tau te̍ bha̱kṣaṃ ca̍kratu̱ragra̍ e̱tam | tayo̍ra̱hamanu̍ bha̱kṣaṃ bha̍kṣayāmi̱ vāgde̱vī ju̍ṣā̱ṇā soma̍sya tṛpyatu sa̱ha prā̱ṇena̱ svāhā̍

---

Mantra 19 {#mantra-19}

Adhyāya: 8 | Mantra: 19

agna̱ āyū̍ṣi pavasa̱ āsu̱vorja̱miṣa̍ṃ ca naḥ| ā̱re bā̍dhasva du̱cchunā̍m| u̱pa̱yā̱magṛ̍hīto’sya̱gnaye̍ tvā̱ varca̍sa e̱ṣa te̱ yoni̍ra̱gnaye̍ tvā̱ varca̍se| agne̍ varcasva̱nvarca̍svā̱stvaṃ de̱veṣvasi̍| varca̍svāna̱haṃ ma̍nu̱ṣye̍ṣu bhūyāsam

---

Mantra 20 {#mantra-20}

Adhyāya: 8 | Mantra: 20

agne̱ pava̍sva̱ svapā̍ a̱sme varca̍ḥ su̱vīrya̍m | dadha̍dra̱yiṃ mayi̱ poṣa̍m | u̱pa̱yā̱magṛ̍hīto’sya̱gnaye̍ tvā̱ varca̍sa e̱ṣa te̱ yoni̍ra̱gnaye̍ tvā̱ varca̍se | agne̍ varcasva̱nvarca̍svā̱stvaṃ de̱veṣvasi̍ | varca̍svāna̱haṃ ma̍nu̱ṣye̍ṣu bhūyāsam

---

Mantra 21 {#mantra-21}

Adhyāya: 8 | Mantra: 21

u̱ttiṣṭha̱nnoja̍sā sa̱ha pī̱tvī śipre̍ avepayaḥ | soma̍mindra ca̱mū su̱tam | u̱pa̱yā̱magṛ̍hīto̱’sīndrā̍ya̱ tvauja̍sa e̱ṣa te̱ yoni̱rindrā̍ya̱ tvauja̍se | indrau̍jasva̱nnoja̍svā̱stvaṃ de̱veṣvasi̍| oja̍svāna̱haṃ ma̍nu̱ṣye̍ṣu bhūyāsam

---

Mantra 22 {#mantra-22}

Adhyāya: 8 | Mantra: 22

adṛ̍śramasya ke̱tavo̱ vi ra̱śmayo̱ janā̱m̐3 anu̍ | bhrāja̍nto a̱gnayo̍ yathā | u̱pa̱yā̱magṛ̍hīto’si̱ sūryā̍ya tvā bhrā̱ja e̱ṣa te̱ yoni̱ḥ sūryā̍ya tvā bhrā̱je | sūrya̍ bhrājasva̱nbhrāja̍svā̱stvaṃ de̱veṣvasi̍ | bhrāja̍svāna̱haṃ ma̍nu̱ṣye̍ṣu bhūyāsam

---

Mantra 23 {#mantra-23}

Adhyāya: 8 | Mantra: 23

udu̱ tyaṃ jā̱tave̍dasaṃ de̱vaṃ va̍hanti ke̱tava̍ḥ | dṛ̱śe viśvā̍ya̱ sūrya̍m | u̱pa̱yā̱magṛ̍hīto’si̱ sūryā̍ya tvā bhrā̱ja e̱ṣa te̱ yoni̱ḥ sūryā̍ya tvā bhrā̱je | sūrya̍ bhrājasva̱nbhrāja̍svā̱stvaṃ de̱veṣvasi̍ | bhrāja̍svāna̱haṃ ma̍nu̱ṣye̍ṣu bhūyāsam

---

Mantra 24 {#mantra-24}

Adhyāya: 8 | Mantra: 24

ci̱traṃ de̱vānā̱muda̍gā̱danī̍ka̱ṃ cakṣu̍rmi̱trasya̱ varu̍ṇasyā̱gneḥ | ā prā̱ dyāvā̍pṛthi̱vī a̱ntari̍kṣa̱ sūrya̍ ā̱tmā jaga̍tasta̱sthuṣa̍śca| u̱pa̱yā̱magṛ̍hīto’si̱ sūryā̍ya tvā bhrā̱ja e̱ṣa te̱ yoni̱ḥ sūryā̍ya tvā bhrā̱je | sūrya̍ bhrājasva̱nbhrāja̍svā̱stvaṃ de̱veṣvasi̍ | bhrāja̍svāna̱haṃ ma̍nu̱ṣye̍ṣu bhūyāsam

---

Mantra 25 {#mantra-25}

Adhyāya: 8 | Mantra: 25

vi na̍ indra̱ mṛdho̍ jahi nī̱cā ya̍ccha pṛtanya̱taḥ | yo a̱smām̐3 a̍bhi̱dāsa̱tyadha̍raṃ gamayā̱ tama̍ḥ | u̱pa̱yā̱magṛ̍hīto̱’sīndrā̍ya tvā vi̱mṛdha̍ e̱ṣa te̱ yoni̱rindrā̍ya tvā vi̱mṛdhe̍

---

Mantra 26 {#mantra-26}

Adhyāya: 8 | Mantra: 26

vā̱caspati̍ṃ vi̱śvaka̍rmāṇamū̱taye̍ mano̱juva̱ṃ vāje̍ a̱dyā hu̍vema | sa no̱ viśvā̍ni̱ hava̍nāni joṣadvi̱śvaśa̍mbhū̱rava̍se sā̱dhuka̍rmā | u̱pa̱yā̱magṛ̍hīto̱’sīndrā̍ya tvā vi̱śvaka̍rmaṇa e̱ṣa te̱ yoni̱rindrā̍ya tvā vi̱śvaka̍rmaṇe

---

Mantra 27 {#mantra-27}

Adhyāya: 8 | Mantra: 27

viśva̍karmanha̱viṣā̍ vāvṛdhā̱naḥ sva̱yaṃ ya̍jasva pṛthi̱vīmu̱ta dyām | muhya̍ntva̱nye a̱bhita̍ḥ sa̱patnā̍ i̱hāsmāka̍ṃ ma̱ghavā̍ surira̍stu | u̱pa̱yā̱magṛ̍hīto̱’sīndrā̍ya tvā vi̱śvaka̍rmaṇa e̱ṣa te̱ yoni̱rindrā̍ya tvā vi̱śvaka̍rmaṇe

---

Mantra 28 {#mantra-28}

Adhyāya: 8 | Mantra: 28

viśva̍karmanha̱viṣā̱ vardha̍nena trā̱tāra̱mindra̍makṛṇorayu̱dhyam| tasmai̱ viśa̱ḥ sama̍namanta pū̱rvīra̱yamu̱gro vi̱havyo̱ yathāsa̍t | u̱pa̱yā̱magṛ̍hīto̱’sīndrā̍ya tvā vi̱śvaka̍rmaṇa e̱ṣa te̱ yoni̱rindrā̍ya tvā vi̱śvaka̍rmaṇe

---

Mantra 29 {#mantra-29}

Adhyāya: 8 | Mantra: 29

u̱pa̱yā̱magṛ̍hīto’sya̱gnaye̍ tvā gāya̱traccha̍ndasaṃ gṛhṇā̱mīndrā̍ya tvā tri̱ṣṭupcha̍ndasaṃ gṛhṇāmi | viśve̍bhyastvā de̱vebhyo̱ jaga̍cchandasaṃ gṛhṇāmyanu̱ṣṭupte̍’bhiga̱raḥ

---

Mantra 30 {#mantra-30}

Adhyāya: 8 | Mantra: 30

vreśī̍nāṃ tvā̱ patma̱nnādhū̍nomi kukū̱nanā̍nāṃ tvā̱ patma̱nnādhū̍nomi bha̱ndanā̍nāṃ tvā̱ patma̱nnādhū̍nomi̱ madhva̍ntamānāṃ tvā̱ patma̱nnādhū̍nomi | śu̱kraṃ tvā̍ śu̱kra ādhū̍no̱myahno̍ rū̱pe sūrya̍sya ra̱śmiṣu̍

---

Mantra 31 {#mantra-31}

Adhyāya: 8 | Mantra: 31

ka̱ku̱ha rū̱paṃ vṛ̍ṣa̱bhasya̍ rocate bṛ̱hatsoma̱ḥ soma̍sya puro̱gāḥ śu̱kraḥ śu̱krasya̍ puro̱gāḥ | yatte̍ so̱mādā̍bhya̱ṃ nāma̱ jāgṛvi̱ tasmai̍ tvā gṛhṇāmi̱ tasmai̍ te soma̱ somā̍ya̱ svāhā̍

---

Mantra 32 {#mantra-32}

Adhyāya: 8 | Mantra: 32

u̱śik tvaṃ de̍va somā̱gneḥ pri̱yaṃ pātho’pī̍hi va̱śī tvaṃ de̍va so̱mendra̍sya pri̱yaṃ pātho’pī̍hi | a̱smatsa̍khā̱ tvaṃ de̍va soma̱ viśve̍ṣāṃ de̱vānā̍ṃ pri̱yaṃ pātho’pī̍hi

---