athaikonaviṃśodhyāyaḥ
i̱ma stana̱mūrja̍svantaṃ dhayā̱pāṃ prapī̍namagne sari̱rasya̱ madhye̍ |
utsa̍ṃ juṣasva̱ śa̱tadhā̍ramarvantsamu̱driya̱ sada̍na̱māvi̍śasva
||19.1||ghṛ̱taṃ mi̍mikṣe ghṛ̱tama̍sya̱ yoni̍rghṛ̱te śri̱to ghṛ̱tamva̍sya̱ dhāma̍ |
a̱nuṣva̱dhamāva̍ha mā̱daya̍sva̱ svāhā̍kṛtaṃ vṛṣabha vakṣi ha̱vyam
||19.2||sa̱mu̱drādū̱rmirmadhu̍mā̱m̐3 udā̍ra̱dupā̱śunā̱ sama̍mṛta̱tvamā̍naṭ |
ghṛ̱tasya̱ nāma̱ guhya̱ṃ yadasti̍ ji̱hvā de̱vānā̍ma̱mṛta̍sya̱ nābhi̍ḥ
||19.3||va̱yaṃ nāma̱ prabra̍vāmā ghṛ̱tasyā̱smin ya̱jñe dhā̍rayāmā̱ namo̍bhiḥ |
upa̍ bra̱hmā śṛ̍ṇavaccha̱syamā̍na̱ṃ catu̍ḥ śṛṅgo̱'vamīdgau̱ra e̱tat
||19.4||ca̱tvāri̱ śṛṅgā̱ trayo̍ asya̱ pādā̱ dve śī̱rṣe sa̱pta hastā̍so asya |
tridhā̍ ba̱ddho vṛ̍ṣa̱bho ro̍ravīti ma̱ho de̱vo martyā̱m̐3 āvi̍veśa
||19.5||tridhā̍ hi̱taṃ pa̱ṇibhi̍rgu̱hyamā̍na̱ṃ gavi̍ de̱vāso̍ ghṛ̱tamanva̍vindan |
indra̱ eka̱ sūrya̱ eka̍ṃ jajāna ve̱nādeka̍ sva̱dhayā̱ niṣṭa̍takṣuḥ
||19.6||e̱tā a̍rṣanti̱ hṛdyā̍tsamu̱drāccha̱tavra̍jā ri̱puṇā̱ nāva̱cakṣe̍ |
ghṛ̱tasya̱ dhārā̍ a̱bhicā̍kaśīmi hira̱ṇyayo̍ veta̱so madhya̍ āsām |
sa̱myak sra̍vanti sa̱rito̱ na dhenā̍ a̱ntarhṛ̱dā mana̍sā pū̱yamā̍nāḥ |
e̱te a̍rṣantyū̱rmayo̍ ghṛ̱tasya̍ mṛ̱gā i̍va kṣipa̱ṇorīṣa̍māṇāḥ
||19.7||sindho̍riva prādhva̱ne śū̍gha̱nāso̱ vāta̍pramiyaḥ patayanti ya̱hvāḥ |
ghṛ̱tasya̱ dhārā̍ aru̱ṣo na vā̱jī kāṣṭhā̍ bhi̱ndannū̱rmibhi̱ḥ pinva̍mānaḥ
||19.8||a̱bhipra̍vanta̱ sama̍neva̱ yoṣā̍ḥ kalyā̱ṇya̱ḥ smaya̍mānāso a̱gnim |
ghṛ̱tasya̱ dhārā̍ḥ sa̱midho̍ nasanta̱ tā ju̍ṣā̱ṇo ha̍ryati jā̱tave̍dāḥ
||19.9||ka̱nyā̍ iva vaha̱tumeta̱vā u̍ a̱ñjya̍ñjā̱nā a̱bhicā̍kaśīmi |
yatra̱ soma̍ḥ sū̱yate̱ yatra̍ ya̱jño ghṛ̱tasya̱ dhārā̍ a̱bhi tatpa̍vante
||19.10||a̱bhya̍rṣata suṣṭu̱tiṃ gavya̍mā̱jima̱smāsu̍ bha̱drā dravi̍ṇāni dhatta |
i̱maṃ ya̱jñaṃ na̍yata de̱vatā̍ no ghṛ̱tasya̱ dhārā̱ madhu̍matpavante
||19.11||dhāma̍ṃ te̱ viśva̱ṃ bhuva̍na̱madhi̍ śri̱tama̱ntaḥ sa̍mu̱dre hṛ̱dya̱ntarāyu̍ṣi |
a̱pāmanī̍ke sami̱the ya ābhṛ̍ta̱stama̍śyāma̱ madhu̍mantaṃ ta ū̱rmim
||19.12||vāja̍śca me prasa̱vaśca̍ me̱ praya̍tiśca me̱ prasi̍tiśca me |
dhī̱tiśca̍ me̱ kratu̍śca me̱ svara̍śca me̱ śloka̍śca me |
śra̱vaśca̍ me̱ śruti̍śca me̱ jyoti̍śca me̱ sva̍śca me ya̱jñena̍ kalpantām
||19.13||prā̱ṇaśca̍ me'pā̱naśca̍ me vyā̱naśca̱ me'su̍ ca me |
ci̱ttaṃ ca̍ ma̱ ādhī̍taṃ ca me̱ vāk ca̍ me̱ mana̍śca me̱ |
cakṣu̍śca me̱ śrotra̍ṃ ca me̱ dakṣa̍śca me̱ bala̍ṃ ca me ya̱jñena̍ kalpantām
||19.14||oja̍śca me̱ saha̍śca ma ā̱tmā ca̍ me ta̱nūśca̍ me̱ | śarma̍ ca me̱ varma̍ ca̱ me'ṅgā̍ni ca̱ me'sthā̍ni ca me |
parū̍ṣi ca me̱ śarī̍rāṇi ca ma̱ āyu̍śca me ja̱rā ca̍ me ya̱jñena̍ kalpantām
||19.15||jyaiṣṭhya̍ṃ ca ma̱ ādhi̍patyaṃ ca me ma̱nyuśca̍ me̱ bhāma̍śca me |
ama̍śca̱ me'mbha̍śca me je̱mā ca̍ me mahi̱mā ca̍ me vari̱mā ca̍ me prathi̱mā ca̍ me varṣi̱mā ca̍ me drāghi̱mā ca̍ me |
vṛ̱ddhaṃ ca̍ me̱ vṛddhi̍śca me ya̱jñena̍ kalpantām
||19.16||sa̱tyaṃ ca̍ me śra̱ddhā ca̍ me̱ jaga̍cca me̱ dhana̍ṃ ca me | viśva̍ṃ ca me̱ maha̍śca me krī̱l̤ā ca̍ me̱ moda̍śca me |
jā̱taṃ ca̍ me jani̱ṣyamā̍ṇaṃ ca me sū̱ktaṃ ca̍ me sukṛ̱taṃ ca̍ me ya̱jñena̍ kalpantām
||19.17||vi̱ttaṃ ca̍ me̱ vedya̍ṃ ca me bhū̱taṃ ca̍ me bhavi̱ṣyacca̍ me | su̱gaṃ ca̍ me supa̱thya̍ṃ ca ma ṛ̱ddhaṃ ca̍ ma̱ ṛddhi̍śca me |
klṛ̱ptaṃ ca̍ me̱ klṛpti̍śca me ma̱tiśca̍ me suma̱tiśca̍ me ya̱jñena̍ kalpantām
||19.18||ya̱ntā ca̍ me dha̱rtā ca̍ me̱ kṣema̍śca me̱ dhṛti̍śca me | viśva̍ṃ ca me̱ maha̍śca me sa̱ṃvicca̍ me̱ jñātra̍ṃ ca me |
sīra̍ṃ ca me̱ laya̍śca me sūśca̍ me pra̱sūśca̍ me ya̱jñena̍ kalpantām
||19.19||śaṃ ca̍ me̱ maya̍śca me pri̱yaṃ ca̍ me'nukā̱maśca̍ me | kāma̍śca me saumana̱saśca̍ me̱ bhaga̍śca me̱ dravi̍ṇaṃ ca me |
bha̱draṃ ca̍ me̱ śreya̍śca me̱ vasī̍yaśca me̱ yaśa̍śca me ya̱jñena̍ kalpantām
||19.20||ūrkca̍ me sū̱nṛtā̍ ca me̱ paya̍śca me̱ rasa̍śca me | ghṛ̱taṃ ca̍ me̱ madhu̍ ca me̱ sagdhi̍śca me̱ sapī̍tiśca me |
kṛ̱ṣiśca̍ me̱ vṛṣṭi̍śca me̱ jaitra̍ṃ ca ma̱ audbhi̍dyaṃ ca me ya̱jñena̍ kalpantām
||19.21||ṛ̱taṃ ca̍ me̱'mṛta̍ṃ ca me'ya̱kṣmaṃ ca̱ me'nā̍mayacca me |
jī̱vātu̍śca me dīrghāyu̱tvaṃ ca̍ me'nami̱traṃ ca̱ me'bha̍yaṃ ca me |
su̱gaṃ ca̍ me̱ śaya̍naṃ ca me sū̱ṣāśca̍ me su̱dina̍ṃ ca me ya̱jñena̍ kalpantām
||19.22||ra̱yiśca̍ me̱ rāya̍śca me pu̱ṣṭaṃ ca̍ me̱ puṣṭi̍śca me | vi̱bhu ca̍ me pra̱bhu ca̍ me pū̱rṇaṃ ca̍ me pū̱rṇata̍raṃ ca me |
kuya̍vaṃ ca̱ me'kṣi̍taṃ ca̱ me'nna̍ṃ ca̱ me'kṣu̍cca me ya̱jñena̍ kalpantām
||19.23||vrī̱haya̍śca me̱ yavā̍śca me̱ māṣā̍śca me̱ tilā̍śca me | mu̱dgāśca̍ me̱ khalvā̍śca me pri̱yaṅga̍vaśca̱ me'ṇa̍vaśca me |
śyā̱mākā̍śca me nī̱vārā̍śca me go̱dhūmā̍śca me ma̱sūrā̍śca me ya̱jñena̍ kalpantām
||19.24||aśmā̍ ca me̱ mṛtti̍kā ca me gi̱raya̍śca me̱ parva̍tāśca me |
sika̍tāśca me̱ vana̱spata̍yaśca me̱ hira̍ṇyaṃ ca̱ me'ya̍śca me |
sīsa̍ṃ ca me̱ trapu̍ ca me śyā̱maṃ ca̍ me lo̱haṃ ca̍ me ya̱jñena̍ kalpantām
||19.25||a̱gniśca̍ ma̱ āpa̍śca me vī̱rudha̍śca ma̱ oṣa̍dhayaśca me |
kṛ̱ṣṭa̱pa̱cyāśca̍ me'kṛṣṭapa̱cyāśca̍ me grā̱myāśca̍ me pa̱śava̍ āra̱ṇyāśca̍ me |
vi̱ttaṃ ca̍ me̱ vitti̍śca me bhū̱taṃ ca̍ me̱ bhūti̍śca me ya̱jñena̍ kalpantām
||19.26||vasu̍ ca me vasa̱tiśca̍ me̱ karma̍ ca me̱ śakti̍śca me |
artha̍śca me̱ yāma̍śca ma i̱tyā ca̍ me̱ gati̍śca me ya̱jñena̍ kalpantām
||19.27||a̱gniśca̍ ma̱ indra̍śca me̱ soma̍śca ma̱ indra̍śca me |
sa̱vi̱tā ca̍ ma̱ indra̍śca me̱ sara̍svatī ca ma̱ indra̍śca me |
pū̱ṣā ca̍ ma̱ indra̍śca me̱ bṛha̱spati̍śca ma̱ indra̍śca me ya̱jñena̍ kalpantām
||19.28||mi̱traśca̍ ma̱ indra̍śca me̱ varu̍ṇaśca ma̱ indra̍śca me | dhā̱tā ca̍ ma̱ indra̍śca me̱ tvaṣṭā̍ ca ma̱ indra̍śca me |
ma̱ruta̍śca ma̱ indra̍śca me̱ viśve̍ ca me de̱vā indra̍śca me ya̱jñena̍ kalpantām
||19.29||pṛ̱thi̱vī ca̍ ma̱ indra̍śca me̱'ntari̍kṣaṃ ca ma̱ indra̍śca me | dyauśca̍ ma̱ indra̍śca me̱ samā̍śca ma̱ indra̍śca me |
nakṣa̍trāṇi ca ma̱ indra̍śca me̱ diśa̍śca ma̱ indra̍śca me ya̱jñena̍ kalpantām
||19.30||a̱śuśca̍ me ra̱śmiśca̱ me'dā̍bhyaśca̱ me'dhi̍patiśca me |
u̱pā̱śuśca̍ me'ntaryā̱maśca̍ ma aindravāya̱vaśca̍ me maitrāvaru̱ṇaśca̍ me |
ā̱śvi̱naśca̍ me pratipra̱sthāna̍śca me śu̱kraśca̍ me ma̱nthī ca̍ me ya̱jñena̍ kalpantām
||19.31||ā̱grayā̱ṇaśca̍ me vaiśvade̱vaśca̍ me dhru̱vaśca̍ me vaiśvāna̱raśca̍ me |
ai̱ndrā̱gnaśca̍ me ma̱hāvai̍śvadevaśca me marutva̱tīyā̍śca me̱ niṣke̍valyaśca me |
sā̱vi̱traśca̍ me sārasva̱taśca̍ me patnīva̱taśca̍ me hāriyoja̱naśca̍ me ya̱jñena̍ kalpantām
||19.32||sruca̍śca me cama̱sāśca̍ me vāya̱vyā̍ni ca me droṇakala̱śaśca̍ me |
grāvā̍ṇaśca me'dhi̱ṣava̍ṇe ca me pūta̱bhṛcca̍ ma ādhava̱nīya̍śca me |
vedi̍śca me ba̱rhiśca̍ me svagākā̱raśca̍ me'vabhṛ̱thaśca̍ me ya̱jñena̍ kalpantām
||19.33||a̱gniśca̍ me gha̱rmaśca̍ me̱'rkaśca̍ me̱ sūrya̍śca me | prā̱ṇaśca̍ me'śvame̱dhaśca̍ me pṛthi̱vī ca̱ me'di̍tiśca me |
diti̍śca me̱ dyauśca̍ me̱'ṅgula̍ya̱ḥ śakva̍rayo̱ diśa̍śca me ya̱jñena̍ kalpantām
||19.34||vra̱taṃ ca̍ ma ṛ̱tava̍śca me saṃvatsa̱raśca̍ me tapa̍śca me |
a̱ho̱rā̱tre ū̍rvaṣṭhī̱ve bṛ̍hadrathanta̱re ca̍ me ya̱jñena̍ kalpantām
||19.35||ekā̍ ca me ti̱sraśca̍ me ti̱sraśca̍ me̱ pañca̍ ca me̱ pañca̍ ca me sa̱pta ca̍ me sa̱pta ca̍ me̱ nava̍ ca me̱
nava̍ ca ma̱ ekā̍daśa ca ma̱ ekā̍daśa ca me̱ trayo̍daśa ca me̱ trayo̍daśa ca me |
pañca̍daśa ca me̱ pañca̍daśa ca me sa̱ptada̍śa ca me sa̱ptada̍śa ca me̱ nava̍daśa ca me̱ nava̍daśa ca ma̱
eka̍viśatiśca ma̱ eka̍viśatiśca me̱ trayo̍viśatiśca me̱ trayo̍viśatiśca me |
pañca̍viśatiśca me̱ pañca̍viśatiśca me sa̱ptavi̍śatiśca me sa̱ptavi̍śatiśca me̱ nava̍viśatiśca me̱
nava̍viśatiśca ma̱ eka̍triśacca ma̱ eka̍triśacca me̱ traya̍striśacca me ya̱jñena̍ kalpantām
||19.36||cata̍sraśca me̱'ṣṭau ca̍ me̱'ṣṭau ca̍ me̱ dvāda̍śa ca me̱ dvāda̍śa ca me̱ ṣol̤a̍śa ca me̱ ṣol̤a̍śa ca me viśa̱tiśca̍ me
viśa̱tiśca̍ me̱ catu̍rviśatiśca me̱ catu̍rviśatiśca me̱'ṣṭāvi̍śatiśca me̱'ṣṭāvi̍śatiśca me |
dvātri̍śacca me̱ dvātri̍śacca me̱ ṣaṭtri̍śacca me̱ ṣaṭtri̍śacca me catvāriśacca̍ me catvāri̱śacca̍ me̱
catu̍ścatvāriśacca me̱ catu̍ścatvāriśacca me̱'ṣṭāca̍tvāriśacca me ya̱jñena̍ kalpantām
||19.37||tryavi̍śca me trya̱vī ca̍ me ditya̱vāṭ ca̍ me dityau̱hī ca̍ me |
pañcā̍viśca me pañcā̱vī ca̍ me triva̱tsaśca̍ me triva̱tsā ca̍ me |
tu̱rya̱vāṭ ca̍ me turyau̱hī ca̍ me ya̱jñena̍ kalpantām
||19.38||pa̱ṣṭha̱vāṭ ca̍ me paṣṭhau̱hī ca̍ ma u̱kṣā ca̍ me va̱śā ca̍ me |
ṛ̱ṣa̱bhaśca̍ me ve̱hacca̍ me'na̱ḍvāśca̍ me dhe̱nuśca̍ me ya̱jñena̍ kalpantām
||19.39||vājā̍ya̱ svāhā̍ prasa̱vāya̱ svāhā̍pi̱jāya̱ svāhā̱ krata̍ve̱ svāhā̱ | vasa̍ve̱ svāhā̍ha̱rpata̍ye̱ svāhā |
ahne̍ mu̱gdhāya̱ svāhā̍ mu̱gdhāya̍ vainaśi̱nāya̱ svāhā̍ vina̱śina̍ āntyāya̱nāya̱ svāhāntyā̍ya
bhauva̱nāya̱ svāhā̱ bhuva̍nasya̱ pata̍ye̱ svāhādhi̍pataye̱ svāhā̍ pra̱jāpa̍taye̱ svāhā̍
||19.40||i̱yaṃ te̱ rāṇmi̱trāya̍ ya̱ntāsi̱ yama̍naḥ | ū̱rje tvā̱ vṛṣṭyai̍ tvā pra̱jānā̱ṃ tvādhi̍patyāya
||19.41||āyu̍rya̱jñena̍ kalpatāṃ prā̱ṇo ya̱jñena̍ kalpatā̱ṃ cakṣu̍rya̱jñena̍ kalpatā̱ śrotra̍ṃ ya̱jñena̍ kalpatām |
vāgya̱jñena̍ kalpatā̱ṃ mano̍ ya̱jñena̍ kalpatāmā̱tmā ya̱jñena̍ kalpatāṃ pṛ̱ṣṭhaṃ ya̱jñena̍ kalpatām |
brahma̍ ya̱jñena̍ kalpatāṃ ya̱jño ya̱jñena̍ kalpatāṃ jyoti̍rya̱jñena̍ kalpatā̱ sva̍rya̱jñena̍ kalpatām
||19.42||stoma̍śca̱ yaju̍śca̱ ṛk ca̱ sāma̍ ca bṛ̱hacca̍ rathanta̱raṃ ca̍ |
sva̍rdevā aganmā̱mṛtā̍ abhūma pra̱jāpa̍teḥ pra̱jā a̍bhūma̱ veṭ svāhā̍
||19.43||