Vājasaneyi Kanva Saṃhitā — Chapter 18 (84 mantras)
Vājasaneyi Kanva Saṃhitā — Chapter 18
Section titled “Vājasaneyi Kanva Saṃhitā — Chapter 18”athāṣṭādaśo’dhyāyaḥ |
Mantras
Section titled “Mantras”Mantra 1 {#mantra-1}
Section titled “Mantra 1 {#mantra-1}”Adhyāya: 18 | Mantra: 1
aśma̱nnūrja̱ṃ parva̍te śiśriyā̱ṇāma̱dbhya oṣa̍dhībhyo̱ vana̱spati̍bhyo̱ adhi̱ saṃbhṛ̍ta̱ṃ paya̍ḥ | tāṃ na̱ iṣa̱mūrja̍ṃ dhatta marutaḥ sararā̱ṇā aśma̍ste̱ kṣunmayi̍ ta̱ ūryaṃ va dvi̱ṣmastaṃ te̱ śugṛ̍cchatu
Mantra 2 {#mantra-2}
Section titled “Mantra 2 {#mantra-2}”Adhyāya: 18 | Mantra: 2
i̱mā me̍ agna̱ iṣṭa̍kā dhe̱nava̍ḥ sa̱ntvekā̍ ca̱ daśa̍ ca̱ daśa̍ ca śa̱taṃ ca̍ śa̱taṃ ca̍ | sa̱hasra̍ṃ ca sa̱hasra̍ṃ cā̱yuta̍ṃ cā̱yuta̍ṃ ca ni̱yuta̍ṃ ca ni̱yuta̍ṃ ca
Mantra 3 {#mantra-3}
Section titled “Mantra 3 {#mantra-3}”Adhyāya: 18 | Mantra: 3
arbu̍daṃ ca̱ nya̍rbudaṃ samu̱draśca̱ madhya̱ṃ cānta̍śca parā̱rdhaśca̍ | e̱tā me̍ agna̱ iṣṭa̍kā dhe̱nava̍ḥ santva̱mutrā̱muṣmi̍m̐llo̱ke
Mantra 4 {#mantra-4}
Section titled “Mantra 4 {#mantra-4}”Adhyāya: 18 | Mantra: 4
ṛ̱tava̍ stha ṛtā̱vṛdha̍ ṛtu̱ṣṭhā stha̍ ṛtā̱vṛdha̍ḥ | ghṛ̱ta̱ścyuto̍ madhu̱ścyuto̍ vi̱rājo̱ nāma̍ kāma̱dughā̱ akṣī̍yamāṇāḥ
Mantra 5 {#mantra-5}
Section titled “Mantra 5 {#mantra-5}”Adhyāya: 18 | Mantra: 5
sa̱mu̱drasya̱ tvāva̍ka̱yāgne̱ pari̍vyayāmasi | pā̱va̱ko a̱smabhya̍ śi̱vo bha̍va
Mantra 6 {#mantra-6}
Section titled “Mantra 6 {#mantra-6}”Adhyāya: 18 | Mantra: 6
hi̱masya̍ tvā ja̱rāyu̱ṇāgne̱ pari̍vyayāmasi | pā̱va̱ko a̱smabhya̍ śi̱vo bha̍va
Mantra 7 {#mantra-7}
Section titled “Mantra 7 {#mantra-7}”Adhyāya: 18 | Mantra: 7
upa̱ jmannupa̍ veta̱se’va̍tara na̱dīṣvā | agne̍ pi̱ttama̱pāma̍si̱ maṇḍū̍ki̱ tābhi̱rāga̍hi̱ semaṃ no̍ ya̱jñaṃ pā̍va̱kava̍rṇa śivaṃ kṛ̍dhi
Mantra 8 {#mantra-8}
Section titled “Mantra 8 {#mantra-8}”Adhyāya: 18 | Mantra: 8
a̱pāmi̱daṃ nyaya̍na samu̱drasya̍ ni̱veśa̍nam | a̱nyāste̍ a̱smatta̍pantu he̱taya̍ḥ pāva̱ko a̱smabhya̍ śi̱vo bha̍va
Mantra 9 {#mantra-9}
Section titled “Mantra 9 {#mantra-9}”Adhyāya: 18 | Mantra: 9
agne̍ pāvaka ro̱ciṣā̍ ma̱ndrayā̍ deva ji̱hvayā̍ | ā de̱vānva̍kṣi̱ yakṣi̍ ca
Mantra 10 {#mantra-10}
Section titled “Mantra 10 {#mantra-10}”Adhyāya: 18 | Mantra: 10
sa na̍ḥ pāvaka dīdi̱vo’gne̍ de̱vām̐3 i̱hā va̍ha | upa̍ ya̱jña ha̱viśca̍ naḥ
Mantra 11 {#mantra-11}
Section titled “Mantra 11 {#mantra-11}”Adhyāya: 18 | Mantra: 11
pā̱va̱kayā̱ yaści̱taya̍ntyā kṛ̱pā kṣāma̍n ruru̱ca u̱ṣaso̱ na bhā̱nunā̍ | tūrva̱nna yāma̱nneta̍śasya̱ nū raṇa̱ ā yo ghṛ̱ṇe na ta̍tṛṣā̱ṇo a̱jara̍ḥ
Mantra 12 {#mantra-12}
Section titled “Mantra 12 {#mantra-12}”Adhyāya: 18 | Mantra: 12
nama̍ste̱ hara̍se śo̱ciṣe̱ nama̍ste astva̱rciṣe̍ | a̱nyāste̍ a̱smatta̍pantu he̱taya̍ḥ pāva̱ko a̱smabhya̍ śi̱vo bha̍va | nṛ̱ṣade̱ vel̤a̍psu̱ṣade̱ veḍ ba̍rhi̱ṣade̱ veḍ | va̍na̱sade̱ veṭ sva̱rvide̱ veṭ
Mantra 13 {#mantra-13}
Section titled “Mantra 13 {#mantra-13}”Adhyāya: 18 | Mantra: 13
ye de̱vā de̱vānā̍ṃ ya̱jñiyā̍ ya̱jñiyā̍nā saṃvatsa̱rīṇa̱mupa̍ bhā̱gamāsa̍te | a̱hu̱tādo̍ ha̱viṣo̍ ya̱jñe a̱smintsva̱yaṃ pi̍bantu̱ madhu̍no ghṛ̱tasya̍
Mantra 14 {#mantra-14}
Section titled “Mantra 14 {#mantra-14}”Adhyāya: 18 | Mantra: 14
ye de̱vā de̱veṣvadhi̍ deva̱tvamāya̱nye brahma̍ṇaḥ purae̱tāro̍ a̱sya | yebhyo̍ na ṛ̱te pava̍te̱ dhāma̱ kiñca̱na na te di̱vo na pṛ̍thi̱vyā adhi̱ snuṣu̍|| 14|| 14 prā̱ṇa̱dā a̍pāna̱dā vyā̍na̱dā va̍rco̱dā va̍rivo̱dāḥ | a̱nyāste̍ a̱smatta̍pantu he̱taya̍ḥ pāva̱ko a̱smabhya̍ śi̱vo bha̍va
Mantra 15 {#mantra-15}
Section titled “Mantra 15 {#mantra-15}”Adhyāya: 18 | Mantra: 15
a̱gnisti̱gmena̍ śo̱ciṣā̱ yāsa̱dviśva̱ṃ nya̱triṇa̍m | a̱gnirno̍ vanate ra̱yim
Mantra 16 {#mantra-16}
Section titled “Mantra 16 {#mantra-16}”Adhyāya: 18 | Mantra: 16
ya i̱mā viśvā̱ bhuva̍nāni̱ juhva̱dṛṣi̱rhotā̱ nyasī̍datpi̱tā na̍ḥ | sa ā̱śiṣā̱ dravi̍ṇami̱cchamā̍naḥ prathama̱cchadava̍rā̱m̐3 āvi̍veśa (2) 17 kisvi̍dāsīdadhi̱ṣṭhāna̍mā̱rambha̍ṇaṃ kata̱matsvi̍tka̱thāsī̍t | yato̱ bhūmi̍ṃ ja̱naya̍nvi̱śvaka̍rmā̱ vi dyāmaurṇo̍nmahi̱nā vi̱śvaca̍kṣāḥ
Mantra 17 {#mantra-17}
Section titled “Mantra 17 {#mantra-17}”Adhyāya: 18 | Mantra: 17
vi̱śvata̍ścakṣuru̱ta vi̱śvato̍mukho vi̱śvato̍bāhuru̱ta vi̱śvata̍spāt | saṃ bā̱hubhyā̱ṃ dhama̍ti̱ saṃ pata̍trai̱rdyāvā̱bhūmī̍ ja̱naya̍nde̱va eka̍ḥ
Mantra 18 {#mantra-18}
Section titled “Mantra 18 {#mantra-18}”Adhyāya: 18 | Mantra: 18
ki svi̱dvana̱ṃ ka u̱ sa vṛ̱kṣa ā̍sa̱ yato̱ dyāvā̍pṛthi̱vī ni̍ṣṭata̱kṣuḥ | manī̍ṣiṇo̱ mana̍sā pṛ̱cchatedu̱ tadyada̱dhyati̍ṣṭha̱dbhuva̍nāni dhā̱raya̍n
Mantra 19 {#mantra-19}
Section titled “Mantra 19 {#mantra-19}”Adhyāya: 18 | Mantra: 19
yā te̱ dhāmā̍ni para̱māṇi̱ yāva̱mā yā ma̍dhya̱mā vi̍śvakarmannu̱temā | śikṣā̱ sakhi̍bhyo ha̱viṣi̍ svadhāvaḥ sva̱yaṃ ya̍jasva ta̱nva̍ḥ vṛdhā̱naḥ
Mantra 20 {#mantra-20}
Section titled “Mantra 20 {#mantra-20}”Adhyāya: 18 | Mantra: 20
vā̱caspati̍ṃ vi̱śvaka̍rmāṇamū̱taye̍ mano̱juva̱ṃ vāje̍ a̱dyā hu̍vema | sa no̱ viśvā̍ni̱ hava̍nāni joṣadvi̱śvaśa̍mbhū̱rava̍se sā̱dhuka̍rmā
Mantra 21 {#mantra-21}
Section titled “Mantra 21 {#mantra-21}”Adhyāya: 18 | Mantra: 21
viśva̍karman ha̱viṣā̍ vāvṛdhā̱naḥ sva̱yaṃ ya̍jasva pṛthi̱vīmu̱ta dyām | muhya̍ntva̱nye a̱bhita̍ḥ sa̱patnā̍ i̱hāsmāka̍ṃ ma̱ghavā̍ sū̱rira̍stu
Mantra 22 {#mantra-22}
Section titled “Mantra 22 {#mantra-22}”Adhyāya: 18 | Mantra: 22
viśva̍karman ha̱viṣā̱ vardha̍nena trā̱tāra̱mindra̍makṛṇorava̱dhyam | tasmai̱ viśa̱ḥ sama̍namanta pū̱rvīra̱yamu̱gro vi̱havyo̱ yathāsa̍t
Mantra 23 {#mantra-23}
Section titled “Mantra 23 {#mantra-23}”Adhyāya: 18 | Mantra: 23
cakṣu̍ṣaḥ pi̱tā mana̍sā̱ hi dhīro̍ ghṛ̱tame̍ne ajana̱nnamna̍māne | ya̱dedantā̱ ada̍dṛhanta̱ pūrva̱ ādiddyāvā̍pṛthi̱vī a̍prathetām
Mantra 24 {#mantra-24}
Section titled “Mantra 24 {#mantra-24}”Adhyāya: 18 | Mantra: 24
vi̱śvaka̍rmā̱ vima̍nā̱ ādvihā̍yā dhā̱tā vi̍dhā̱tā pa̍ra̱mota sa̱ṃdṛk | teṣā̍mi̱ṣṭāni̱ sami̱ṣā ma̍danti̱ yatrā̍ sapta ṛ̱ṣīnpa̱ra eka̍mā̱huḥ
Mantra 25 {#mantra-25}
Section titled “Mantra 25 {#mantra-25}”Adhyāya: 18 | Mantra: 25
yo na̍ḥ pi̱tā ja̍ni̱tā yo vi̍dhā̱tā dhāmā̍ni̱ veda̱ bhuva̍nāni̱ viśvā̍ | yo de̱vānā̍ṃ nāma̱dhā eka̍ e̱va ta sa̍ṃpra̱śnaṃ bhuva̍nā yantya̱nyā
Mantra 26 {#mantra-26}
Section titled “Mantra 26 {#mantra-26}”Adhyāya: 18 | Mantra: 26
ta āya̍janta̱ dravi̍ṇa̱ sama̍smā̱ ṛṣa̍ya̱ḥ pūrve̍ jari̱tāro̱ na bhū̱nā | a̱sūrte̱ sūrte̱ raja̍si niṣa̱tte ye bhū̱tāni̍ sa̱makṛ̍ṇvanni̱māni̍
Mantra 27 {#mantra-27}
Section titled “Mantra 27 {#mantra-27}”Adhyāya: 18 | Mantra: 27
pa̱ro di̱vā pa̱ra e̱nā pṛ̍thi̱vyā pa̱ro de̱vebhi̱rasu̍rai̱ryadasti̍ | kasvi̱d garbha̍ṃ pratha̱maṃ da̍dhra̱ āpo̱ yatra̍ de̱vāḥ sa̱mapa̍śyanta̱ pūrve̍
Mantra 28 {#mantra-28}
Section titled “Mantra 28 {#mantra-28}”Adhyāya: 18 | Mantra: 28
tamidgarbha̍ṃ pratha̱maṃ da̍dhra̱ āpo̱ yatra̍ de̱vāḥ sa̱maga̍cchanta̱ viśve̍ | a̱jasya̱ nābhā̱ adhyeka̱marpi̍ta̱ṃ yasmi̱n viśvā̍ni̱ bhuva̍nāni ta̱sthuḥ
Mantra 29 {#mantra-29}
Section titled “Mantra 29 {#mantra-29}”Adhyāya: 18 | Mantra: 29
na taṃ vi̍dātha̱ ya i̱mā ja̱jānā̱nyadyu̱ṣmāka̱manta̍raṃ babhūva | nī̱hā̱reṇa̱ prāvṛ̍tā̱ jalpyā̍ cāsu̱tṛpa̍ uktha̱śāsa̍ścaranti
Mantra 30 {#mantra-30}
Section titled “Mantra 30 {#mantra-30}”Adhyāya: 18 | Mantra: 30
vi̱śvaka̍rmā̱ hyaja̍niṣṭa de̱va ādidga̍ndha̱rvo a̍bhavad dvi̱tīya̍ḥ | tṛ̱tīya̍ḥ pi̱tā ja̍ni̱tauṣa̍dhīnāma̱pāṃ garbha̱ṃ vya̍dadhātpuru̱trā
Mantra 31 {#mantra-31}
Section titled “Mantra 31 {#mantra-31}”Adhyāya: 18 | Mantra: 31
ā̱śuḥ śiśā̍no vṛṣa̱bho na bhī̱mo gha̍nāgha̱naḥ kṣobha̍ṇaścarṣaṇī̱nām | sa̱ṃkranda̍no’nimi̱ṣa e̍kavī̱raḥ śa̱ta senā̍ ajayatsā̱kamindra̍ḥ
Mantra 32 {#mantra-32}
Section titled “Mantra 32 {#mantra-32}”Adhyāya: 18 | Mantra: 32
sa̱ṃkranda̍nenānimi̱ṣeṇa̍ ji̱ṣṇunā̍ yutkā̱reṇa̍ duścyava̱nena̍ dhṛ̱ṣṇunā̍ | tadindre̍ṇa jayata̱ tatsa̍hadhva̱ṃ yudho̍ nara̱ iṣu̍hastena̱ vṛṣṇā̍
Mantra 33 {#mantra-33}
Section titled “Mantra 33 {#mantra-33}”Adhyāya: 18 | Mantra: 33
sa iṣu̍hastai̱ḥ sa ni̍ṣa̱ṅgibhi̍rva̱śī sasra̍ṣṭā̱ sa yudha̱ indro̍ ga̱ṇena̍ | sa̱sṛ̱ṣṭa̱jitso̍ma̱pā bā̍huśa̱rdhyu̱gradha̍nvā̱ prati̍hitābhi̱rastā̍
Mantra 34 {#mantra-34}
Section titled “Mantra 34 {#mantra-34}”Adhyāya: 18 | Mantra: 34
bṛha̍spate̱ pari̍dīyā̱ rathe̍na rakṣo̱hāmitrā̍m̐3 apa̱bādha̍mānaḥ | pra̱bha̱ñjantsenā̍ḥ pramṛ̱ṇo yu̱dhā jaya̍nna̱smāka̍medhyavi̱tā rathā̍nām
Mantra 35 {#mantra-35}
Section titled “Mantra 35 {#mantra-35}”Adhyāya: 18 | Mantra: 35
ba̱la̱vi̱jñā̱ya sthavi̍ra̱ḥ pravī̍ra̱ḥ saha̍svān vā̱jī saha̍māna u̱graḥ | a̱bhivī̍ro a̱bhisa̍tvā saho̱jā jai̍tramindra̱ ratha̱māti̍ṣṭha go̱vit
Mantra 36 {#mantra-36}
Section titled “Mantra 36 {#mantra-36}”Adhyāya: 18 | Mantra: 36
go̱tra̱bhida̍ṃ go̱vida̱ṃ vajra̍bāhu̱ṃ jaya̍nta̱majma̍ pramṛ̱ṇanta̱moja̍sā | i̱ma sa̍jātā̱ anu̍ vīrayadhva̱mindra̍ sakhāyo̱ anu̱ sam̐ra̍bhadhvam
Mantra 37 {#mantra-37}
Section titled “Mantra 37 {#mantra-37}”Adhyāya: 18 | Mantra: 37
a̱bhi go̱trāṇi̱ saha̍sā̱ gāha̍māno’da̱yo vī̱raḥ śa̱tama̍nyu̱rindra̍ḥ | du̱ścya̱va̱naḥ pṛ̍tanā̱ṣāl̤a̍yu̱dhyo̱’smāka̱ senā̍ avatu̱ pra yu̱tsu
Mantra 38 {#mantra-38}
Section titled “Mantra 38 {#mantra-38}”Adhyāya: 18 | Mantra: 38
indra̍ āsāṃ ne̱tā bṛha̱spati̱rdakṣi̍ṇā ya̱jñaḥ pu̱ra e̍tu̱ soma̍ḥ | de̱va̱se̱nānā̍mabhibhañjatī̱nāṃ jaya̍ntīnāṃ ma̱ruto̍ ya̱ntvagra̍m
Mantra 39 {#mantra-39}
Section titled “Mantra 39 {#mantra-39}”Adhyāya: 18 | Mantra: 39
indra̍sya̱ vṛṣṇo̱ varu̍ṇasya̱ rājña̍ ādi̱tyānā̍ṃ ma̱rutā̱ śardha̍ u̱gram | ma̱hāma̍nasāṃ bhuvanacya̱vānā̱ṃ ghoṣo̍ de̱vānā̱ṃ jaya̍tā̱muda̍sthāt
Mantra 40 {#mantra-40}
Section titled “Mantra 40 {#mantra-40}”Adhyāya: 18 | Mantra: 40
uddha̍rṣaya maghava̱nnāyu̍dhā̱nyutsatva̍nāṃ māma̱kānā̱ṃ manā̍si | udvṛ̍trahan vā̱jinā̱ṃ vāji̍nā̱nyudrathā̍nā̱ṃ jaya̍tāṃ yantu̱ ghoṣā̍ḥ
Mantra 41 {#mantra-41}
Section titled “Mantra 41 {#mantra-41}”Adhyāya: 18 | Mantra: 41
a̱smāka̱mindra̱ḥ samṛ̍teṣu dhva̱jeṣva̱smāka̱ṃ yā iṣa̍va̱stā ja̍yantu | a̱smāka̍ṃ vī̱rā utta̍re bhavantva̱smām̐3 u̍ devā avatā̱ have̍ṣu
Mantra 42 {#mantra-42}
Section titled “Mantra 42 {#mantra-42}”Adhyāya: 18 | Mantra: 42
a̱mīṣā̍ṃ ci̱ttaṃ pra̍tilo̱bhaya̍ntī gṛhā̱ṇāṅgā̍nyapve̱ pare̍hi | a̱bhi prehi̱ nirda̍ha hṛ̱tsu śokai̍ra̱ndhenā̱mitrā̱stama̍sā sacantām
Mantra 43 {#mantra-43}
Section titled “Mantra 43 {#mantra-43}”Adhyāya: 18 | Mantra: 43
ava̍sṛṣṭā̱ parā̍ pata̱ śara̍vye̱ brahma̍saśite | gacchā̱mitrā̱nprapa̍dyasva̱ māmīṣā̱ṃ kañca̱nocchi̍ṣaḥ
Mantra 44 {#mantra-44}
Section titled “Mantra 44 {#mantra-44}”Adhyāya: 18 | Mantra: 44
pretā̱ jaya̍tā nara̱ indro̍ va̱ḥ śarma̍ yacchatu | u̱grā va̍ḥ santu bā̱havo̍’nādhṛ̱ṣyā yathāsa̍tha
Mantra 45 {#mantra-45}
Section titled “Mantra 45 {#mantra-45}”Adhyāya: 18 | Mantra: 45
asau̱ yā senā̍ maruta̱ḥ pare̍ṣāmabhyaiti̍ na̱ oja̍sā̱ spardha̍mānā | tāṃ gū̍hata̱ tama̱sāpa̍vratena̱ yathā̱mī a̱nyo a̱nyaṃ na jā̱nan
Mantra 46 {#mantra-46}
Section titled “Mantra 46 {#mantra-46}”Adhyāya: 18 | Mantra: 46
yatra̍ bā̱ṇāḥ sa̱mpata̍nti kumā̱rā vi̍śi̱khā i̍va | tatra̱ indro̱ bṛha̱spati̱radi̍ti̱ḥ śarma̍ yacchatu vi̱śvāhā̱ śarma̍ yacchatu
Mantra 47 {#mantra-47}
Section titled “Mantra 47 {#mantra-47}”Adhyāya: 18 | Mantra: 47
marmā̍ṇi te̱ varma̍ṇā chādayāmi̱ soma̍stvā̱ rājā̱mṛte̱nānu̍vastām | u̱rorvarī̍yo̱ varu̍ṇaste kṛṇotu̱ jaya̍nta̱ṃ tvānu̍ de̱vā ma̍dantu
Mantra 48 {#mantra-48}
Section titled “Mantra 48 {#mantra-48}”Adhyāya: 18 | Mantra: 48
ude̍namutta̱rāṃ na̱yāgne̍ ghṛtenāhuta | rā̱yaspoṣe̍ṇa̱ sasṛ̍ja pra̱jayā̍ ca ba̱huṃ kṛ̍dhi
Mantra 49 {#mantra-49}
Section titled “Mantra 49 {#mantra-49}”Adhyāya: 18 | Mantra: 49
indre̱maṃ pra̍ta̱rāṃ na̍ya sajā̱tānā̍masadva̱śī | same̍na̱ṃ varca̍sā sṛja de̱vānā̍ṃ bhāga̱dā a̍sat
Mantra 50 {#mantra-50}
Section titled “Mantra 50 {#mantra-50}”Adhyāya: 18 | Mantra: 50
yasya̍ ku̱rmo gṛ̱he ha̱vistama̍gne vardhayā̱ tvam | tasmai̍ de̱vā adhi̍bravanna̱yaṃ ca̱ brahma̍ṇa̱spati̍ḥ
Mantra 51 {#mantra-51}
Section titled “Mantra 51 {#mantra-51}”Adhyāya: 18 | Mantra: 51
udu̍ tvā̱ viśve̍ de̱vā agne̱ bhara̍ntu̱ citti̍bhiḥ | sa no̍ bhava śi̱vastva su̱pratī̍ko vi̱bhāva̍suḥ
Mantra 52 {#mantra-52}
Section titled “Mantra 52 {#mantra-52}”Adhyāya: 18 | Mantra: 52
pañca̱ diśo̱ daivī̍rya̱jñama̍vantu de̱vīrapāma̍ti̱ṃ durma̱tiṃ bādha̍mānāḥ | rā̱yaspoṣe̍ ya̱jñapa̍timā̱bhaja̍ntī rā̱yaspoṣe̱ adhi̍ ya̱jño a̍sthāt
Mantra 53 {#mantra-53}
Section titled “Mantra 53 {#mantra-53}”Adhyāya: 18 | Mantra: 53
sami̍ddhe a̱gnā adhi̍ māmahā̱na u̱kthapa̍tra̱ īḍyo̍ gṛbhī̱taḥ | ta̱ptaṃ gha̱rmaṃ pa̍ri̱gṛhyā̍yajanto̱rjā yadya̱jñamaya̍janta de̱vāḥ
Mantra 54 {#mantra-54}
Section titled “Mantra 54 {#mantra-54}”Adhyāya: 18 | Mantra: 54
daivyā̍ya dha̱rtre joṣṭre̍ deva̱śrīḥ śrīma̍nāḥ śa̱tapa̍yāḥ | pa̱ri̱gṛhya̍ de̱vā ya̱jñamā̍yan de̱vā de̱vebhyo̍ adhva̱ryanto̍ asthuḥ
Mantra 55 {#mantra-55}
Section titled “Mantra 55 {#mantra-55}”Adhyāya: 18 | Mantra: 55
vī̱ta ha̱viḥ śa̍mi̱ta śa̍mi̱tā ya̱jadhyai̍ tu̱rīyo̍ ya̱jño yatra̍ ha̱vyameti̍ | tato̍ vā̱kā ā̱śiṣo̍ no juṣantām
Mantra 56 {#mantra-56}
Section titled “Mantra 56 {#mantra-56}”Adhyāya: 18 | Mantra: 56
sūrya̍raśmi̱rhari̍keśaḥ pu̱rastā̍tsavi̱tā jyoti̱ruda̍yā̱m̐3 aja̍sram | tasya̍ pū̱ṣā pra̍sa̱ve yā̍ti vi̱dvāntsa̱ṃpaśya̱nviśvā̱ bhuva̍nāni go̱pāḥ
Mantra 57 {#mantra-57}
Section titled “Mantra 57 {#mantra-57}”Adhyāya: 18 | Mantra: 57
vi̱māna̍ e̱ṣa di̱vo madhya̍ āsta āpapri̱vānroda̍sī a̱ntari̍kṣam | sa vi̱śvācī̍ra̱bhica̍ṣṭe ghṛ̱tācī̍ranta̱rā pūrva̱mapa̍raṃ ca ke̱tum
Mantra 58 {#mantra-58}
Section titled “Mantra 58 {#mantra-58}”Adhyāya: 18 | Mantra: 58
u̱kṣā sa̍mu̱dro a̍ru̱ṇaḥ su̍pa̱rṇaḥ pūrva̍sya̱ yoni̍ṃ pi̱turāvi̍veśa | madhye̍ di̱vo nihi̍ta̱ḥ pṛśni̱raśmā̱ vica̍krame̱ raja̍saspā̱tyantau̍
Mantra 59 {#mantra-59}
Section titled “Mantra 59 {#mantra-59}”Adhyāya: 18 | Mantra: 59
indra̱ṃ viśvā̍ avīvṛdhantsamu̱dravya̍casa̱ṃ gira̍ḥ | ra̱thīta̍ma ra̱thīnā̱ṃ vājā̍nā̱ satpa̍ti̱ṃ pati̍m
Mantra 60 {#mantra-60}
Section titled “Mantra 60 {#mantra-60}”Adhyāya: 18 | Mantra: 60
de̱va̱hūrya̱jña ā ca̍ vakṣatsumna̱hūrya̱jña ā ca̍ vakṣat | yakṣa̍da̱gnirde̱vo de̱vām̐3 ā ca̍ vakṣat
Mantra 61 {#mantra-61}
Section titled “Mantra 61 {#mantra-61}”Adhyāya: 18 | Mantra: 61
vaja̍sya mā prasa̱va u̍dgrā̱bheṇoda̍grabhīt | adhā̍ sa̱patnā̱nindro̍ me nigrā̱bheṇādha̍rām̐3 a̱kaḥ
Mantra 62 {#mantra-62}
Section titled “Mantra 62 {#mantra-62}”Adhyāya: 18 | Mantra: 62
u̱dgrā̱bhaṃ ca̍ nigrā̱bhaṃ ca̱ brahma̍ de̱vā a̍vīvṛdhan | adhā̍ sa̱patnā̍nindrā̱gnī me̍ viṣū̱cīnā̱nvya̍syatām
Mantra 63 {#mantra-63}
Section titled “Mantra 63 {#mantra-63}”Adhyāya: 18 | Mantra: 63
krama̍dhvama̱gninā̱ nāka̱mukhya̱ haste̍ṣu̱ bibhra̍taḥ | di̱vaspṛ̱ṣṭha sva̍rga̱tvā mi̱śrā de̱vebhi̍rādhvam
Mantra 64 {#mantra-64}
Section titled “Mantra 64 {#mantra-64}”Adhyāya: 18 | Mantra: 64
prācī̱manu̍ pra̱diśa̱ṃ prehi̍ vi̱dvāna̱gnera̍gne pu̱ro a̍gnirbhave̱ha | viśvā̱ āśā̱ dīdyā̍no̱ vibhā̱hyūrja̍ṃ no dhehi dvi̱pade̱ catu̍ṣpade
Mantra 65 {#mantra-65}
Section titled “Mantra 65 {#mantra-65}”Adhyāya: 18 | Mantra: 65
pṛ̱thi̱vyā a̱hamuda̱ntari̍kṣa̱māru̍hama̱ntari̍kṣā̱ddiva̱māru̍ham | di̱vo nāka̍sya pṛ̱ṣṭhāt sva̱rjyoti̍ragāma̱ham
Mantra 66 {#mantra-66}
Section titled “Mantra 66 {#mantra-66}”Adhyāya: 18 | Mantra: 66
sva̱ryanto̱ nāpe̍kṣanta̱ ā dyā ro̍hanti̱ roda̍sī | ya̱jñaṃ ye vi̱śvato̍dhāra suvi̍dvāso viteni̱re
Mantra 67 {#mantra-67}
Section titled “Mantra 67 {#mantra-67}”Adhyāya: 18 | Mantra: 67
agne̱ prehi̍ pratha̱mo de̍vaya̱tāṃ cakṣu̍rde̱vānā̍mu̱ta martyā̍nām | iya̍kṣamāṇā̱ bhṛgu̍bhiḥ sa̱joṣā̱ḥ sva̍ryantu̱ yaja̍mānāḥ sva̱sti
Mantra 68 {#mantra-68}
Section titled “Mantra 68 {#mantra-68}”Adhyāya: 18 | Mantra: 68
nakto̱ṣāsā̱ sama̍nasā̱ virū̍pe dhā̱paye̍te̱ śiśu̱meka̍ samī̱cī | dyāvā̱kṣāmā̍ ru̱kmo a̱ntarvibhā̍ti de̱vā a̱gniṃ dhā̍rayan draviṇo̱dāḥ
Mantra 69 {#mantra-69}
Section titled “Mantra 69 {#mantra-69}”Adhyāya: 18 | Mantra: 69
agne̍ sahasrākṣa śatamūrdhañcha̱taṃ te̍ prā̱ṇāḥ sa̱hasra̍ṃ vyā̱nāḥ | tva sā̍ha̱srasya̍ rā̱ya ī̍śiṣe̱ tasmai̍ te vidhema̱ vājā̍ya̱ svāhā̍
Mantra 70 {#mantra-70}
Section titled “Mantra 70 {#mantra-70}”Adhyāya: 18 | Mantra: 70
su̱pa̱rṇo̍’si ga̱rutmā̍n pṛ̱ṣṭhe pṛ̍thi̱vyāḥ sī̍da | bhā̱sāntari̍kṣa̱māpṛ̍ṇa̱ jyoti̍ṣā̱ diva̱mutta̍bhāna̱ teja̍sā̱ diśa̱ uddṛ̍ha
Mantra 71 {#mantra-71}
Section titled “Mantra 71 {#mantra-71}”Adhyāya: 18 | Mantra: 71
ā̱juhvā̍naḥ su̱pratī̍kaḥ pu̱rastā̱dagne̱ svaṃ yoni̱māsī̍da sādhu̱yā | a̱smintsa̱dhasthe̱ adhyutta̍rasmi̱nviśve̍ devā̱ yaja̍mānaśca sīdata
Mantra 72 {#mantra-72}
Section titled “Mantra 72 {#mantra-72}”Adhyāya: 18 | Mantra: 72
tā sa̍vi̱turvare̍ṇyasya ci̱trāmāhaṃ vṛ̍ṇe suma̱tiṃ vi̱śvaja̍nyām | yāma̍sya̱ kaṇvo̱ adu̍ha̱tprapī̍nā sa̱hasra̍dhārā̱ṃ paya̍sā ma̱hīṃ gām
Mantra 73 {#mantra-73}
Section titled “Mantra 73 {#mantra-73}”Adhyāya: 18 | Mantra: 73
vi̱dhema̍ te para̱me janma̍nnagne vi̱dhema̱ stomai̱rava̍re sa̱dhasthe̍ | yasmā̱dyone̍ru̱dāri̍thā̱ yaje̱ taṃ pra tve ha̱vīṣi̍ juhure̱ sami̍ddhe
Mantra 74 {#mantra-74}
Section titled “Mantra 74 {#mantra-74}”Adhyāya: 18 | Mantra: 74
preddho̍ agne dīdihi pu̱ro no’ja̍srayā sū̱rmyā̍ yaviṣṭha | tvā śaśva̍nta̱ upa̍yanti̱ vājā̍ḥ
Mantra 75 {#mantra-75}
Section titled “Mantra 75 {#mantra-75}”Adhyāya: 18 | Mantra: 75
agne̱ tama̱dyāśva̱ṃ na stomai̱ḥ kratu̱ṃ na bha̱dra hṛ̍di̱spṛśa̍m | ṛ̱dhyāmā̍ ta̱ ohai̍ḥ
Mantra 76 {#mantra-76}
Section titled “Mantra 76 {#mantra-76}”Adhyāya: 18 | Mantra: 76
citti̍ṃ juhomi̱ mana̍sā ghṛ̱tena̱ yathā̍ de̱vā i̱hāgama̍nvī̱tiho̍trā ṛtā̱vṛdha̍ḥ | patye̱ viśva̍sya̱ bhūma̍no ju̱homi̍ vi̱śvaka̍rmaṇe vi̱śvāhādā̍bhya ha̱vi
Mantra 77 {#mantra-77}
Section titled “Mantra 77 {#mantra-77}”Adhyāya: 18 | Mantra: 77
sa̱pta te̍ agne sa̱midha̍ḥ sa̱pta ji̱hvāḥ sa̱pta ṛṣa̍yaḥ sa̱pta dhāma̍ pri̱yāṇi̍ | sa̱pta hotrā̍ḥ sapta̱dhā tvā̍ yajanti sa̱pta yonī̱rāpṛ̍ṇasva ghṛ̱tena̱ svāhā̍
Mantra 78 {#mantra-78}
Section titled “Mantra 78 {#mantra-78}”Adhyāya: 18 | Mantra: 78
śu̱krajyo̍tiśca ci̱trajyo̍tiśca sa̱tyajyo̍tiśca̱ jyoti̍ṣmāśca | śu̱kraśca̍ ṛta̱pāścātya̍hāḥ
Mantra 79 {#mantra-79}
Section titled “Mantra 79 {#mantra-79}”Adhyāya: 18 | Mantra: 79
ī̱dṛṅ cā̍nya̱dṛṅ ca̍ sa̱dṛṅ ca̱ prati̍sadṛṅ ca | mi̱taśca̱ saṃmi̍taśca̱ sabha̍rāḥ
Mantra 80 {#mantra-80}
Section titled “Mantra 80 {#mantra-80}”Adhyāya: 18 | Mantra: 80
ṛ̱ta̱jicca̍ satya̱jicca̍ sena̱jicca̍ su̱ṣeṇa̍śca | anti̍mitraśca dū̱re a̍mitraśca ga̱ṇaḥ
Mantra 81 {#mantra-81}
Section titled “Mantra 81 {#mantra-81}”Adhyāya: 18 | Mantra: 81
ṛ̱taśca̍ sa̱tyaśca̍ dhru̱vaśca̍ dha̱ruṇa̍śca | dha̱rtā ca̍ vidha̱rtā ca̍ vidhāra̱yaḥ
Mantra 82 {#mantra-82}
Section titled “Mantra 82 {#mantra-82}”Adhyāya: 18 | Mantra: 82
ī̱dṛkṣā̍sa etā̱dṛkṣā̍sa ū̱ ṣu ṇa̍ḥ sa̱dṛkṣā̍sa̱ḥ prati̍sadṛkṣāsa̱ eta̍na | mi̱tāsa̍śca̱ saṃmi̍tāso no a̱dya sabha̍raso maruto ya̱jñe a̱smin
Mantra 83 {#mantra-83}
Section titled “Mantra 83 {#mantra-83}”Adhyāya: 18 | Mantra: 83
svata̍vāśca praghā̱sī ca̍ sāntapa̱naśca̍ gṛhame̱dhī ca̍ | krī̱l̤ī ca̍ śā̱kī co̍jje̱ṣī
Mantra 84 {#mantra-84}
Section titled “Mantra 84 {#mantra-84}”Adhyāya: 18 | Mantra: 84
indraṃ daivī̱rviśo̍ ma̱ruto’nu̍vartmāno’bhava̱nyathendraṃ daivī̱rviśo̍ ma̱ruto’nu̍vartmā̱no’bha̍van | e̱vami̱maṃ yaja̍mānaṃ daivīśca̱ viśo̍ mānu̱ṣīścānu̍vartmāno bhavantu