Vājasaneyi Kanva Saṃhitā — Chapter 28 (14 mantras)

Vājasaneyi Kanva Saṃhitā — Chapter 28

athāṣṭāviṃśo’dhyāyaḥ |

---

Mantras

Mantra	First Words
1	agniśca pṛthivī
2	sakāmā2 adhvanaskuru
3	brahmarājanyābhyā śūdrāya
4	bṛhaspate ati
5	indra gomannihā
6	ṛtāvāna vaiśvānaramṛtasya
7	vaiśvānara havāmaha
8	vaiśvānaro na
9	vaiśvānarasya sumatau
10	marutvā2 indra
11	mahā2 indro
12	agnirṛṣi pavamāna
13	anu vīrairanu
14	ā no

---

Mantra 1 {#mantra-1}

Adhyāya: 28 | Mantra: 1

a̱gniśca̍ pṛthi̱vī ca̱ saṃna̍te̱ te me̱ saṃ na̍matāma̱do vā̱yuścā̱’ntari̍kṣaṃ ca̱ saṃna̍te̱ te me̱ saṃ na̍matāma̱da ā̍di̱tyaśca̱ dyau̍śca̱ saṃna̍te̱ te me̱ saṃ na̍matāma̱da āpa̍śca̱ varu̍ṇaśca̱ saṃna̍te̱ te me̱ saṃ na̍matāma̱daḥ | sa̱pta sa̱sado̍ aṣṭa̱mī bhū̍ta̱sādha̍nī

---

Mantra 2 {#mantra-2}

Adhyāya: 28 | Mantra: 2

sakā̍mā̱m̐2 adhva̍naskuru sa̱ṃjñāna̍mastu me̱’munā̍ | yathe̱māṃ vāca̍ṃ kalyā̱ṇīmā̱vadā̍ni̱ jane̍bhyaḥ

---

Mantra 3 {#mantra-3}

Adhyāya: 28 | Mantra: 3

bra̱hma̱rā̱ja̱nyā̍bhyā śū̱drāya̱ cāryā̍ya ca̱ svāya̱ cāra̍ṇāya ca | pri̱yo de̱vānā̱ṃ dakṣi̍ṇāyai dā̱turi̱ha bhū̍yāsama̱yaṃ me̱ kāma̱ḥ samṛ̍dhyatā̱mupa̍ mā̱do na̍matu

---

Mantra 4 {#mantra-4}

Adhyāya: 28 | Mantra: 4

bṛha̍spate̱ ati̱ yada̱ryo arhā̍d dyu̱madvi̱bhāti̱ kratu̍ma̱jjane̍ṣu | yaddī̱daya̱cchava̍sa ṛtaprajāta̱ tada̱smāsu̱ dravi̍ṇaṃ dhehi ci̱tram | u̱pa̱yā̱magṛ̍hīto’si̱ bṛha̱spata̍ye tvai̱ṣa te̱ yoni̱rbṛha̱spata̍ye tvā

---

Mantra 5 {#mantra-5}

Adhyāya: 28 | Mantra: 5

indra̱ goma̍nni̱hā yā̍hi̱ pibā̱ soma̍ śatakrato | vi̱dyadbhi̱rgrāva̍bhiḥ su̱tam | u̱pa̱yā̱magṛ̍hīto̱’sīndrā̍ya tvā̱ goma̍ta e̱ṣa te̱ yoni̱rindrā̍ya tvā̱ goma̍te

---

Mantra 6 {#mantra-6}

Adhyāya: 28 | Mantra: 6

ṛ̱tāvā̍naṃ vaiśvāna̱ramṛ̱tasya̱ jyoti̍ṣa̱spati̍m | aja̍sraṃ gha̱rmamī̍mahe | u̱pa̱yā̱magṛ̍hīto’si vaiśvāna̱rāya̍ tvai̱ṣa te̱ yoni̍rvaiśvāna̱rāya̍ tvā

---

Mantra 7 {#mantra-7}

Adhyāya: 28 | Mantra: 7

vai̱śvā̱na̱ra ha̍vāmaha ṛ̱tasya̱ jyoti̍ṣa̱spati̍m | aja̍sraṃ gha̱rmamī̍mahe | u̱pa̱yā̱magṛ̍hīto’si vaiśvāna̱rāya̍ tvai̱ṣa te̱ yoni̍rvaiśvāna̱rāya̍ tvā

---

Mantra 8 {#mantra-8}

Adhyāya: 28 | Mantra: 8

vai̱śvā̱na̱ro na̍ ū̱taya̱ ā pra yā̍tu parā̱vata̍ḥ | a̱gniru̱kthena̱ vāha̍sā | u̱pa̱yā̱magṛ̍hīto’si vaiśvāna̱rāya̍ tvai̱ṣa te̱ yoni̍rvaiśvāna̱rāya̍ tvā

---

Mantra 9 {#mantra-9}

Adhyāya: 28 | Mantra: 9

vai̱śvā̱na̱rasya̍ suma̱tau syā̍ma̱ rājā̱ hi ka̱ṃ bhuva̍nānāmabhi̱śrīḥ | i̱to jā̱to viśva̍mi̱daṃ vi ca̍ṣṭe vaiśvana̱ro ya̍tate̱ sūrye̍ṇa| u̱pa̱yā̱magṛ̍hīto’si vaiśvāna̱rāya̍ tvai̱ṣa te̱ yoni̍rvaiśvāna̱rāya̍ tvā

---

Mantra 10 {#mantra-10}

Adhyāya: 28 | Mantra: 10

ma̱rutvā̍m̐2 indra vṛṣa̱bho raṇā̍ya̱ pibā̱ soma̍manuṣva̱dhaṃ madā̍ya | āsi̍ñcasva ja̱ṭhare̱ madhva̍ ū̱rmiṃ tva rājā̍si̱ prati̍patsu̱tānā̍m | u̱pa̱yā̱magṛ̍hīto̱’sīndrā̍ya tvā ma̱rutva̍ta e̱ṣa te̱ yoni̱rindrā̍ya tvā ma̱rutva̍te

---

Mantra 11 {#mantra-11}

Adhyāya: 28 | Mantra: 11

ma̱hām̐2 indro̱ vajra̍hastaḥ ṣol̤a̱śī śarma̍ yacchatu | hantu̍ pā̱pmāna̱ṃ yo̱’smāndveṣṭi̍ | u̱pa̱yā̱magṛ̍hīto̱’sīndrā̍ya tvā ṣol̤a̱śina̍ e̱ṣa te̱ yoni̱rindrā̍ya tvā ṣol̤a̱śine̍

---

Mantra 12 {#mantra-12}

Adhyāya: 28 | Mantra: 12

a̱gnirṛṣi̱ḥ pava̍māna̱ḥ pāñca̍janyaḥ pu̱rohi̍taḥ | tamī̍mahe mahāga̱yam

---

Mantra 13 {#mantra-13}

Adhyāya: 28 | Mantra: 13

anu̍ vī̱rairanu̍ puṣyāsma̱ gobhi̱ranvaśvai̱ranu̱ sarve̍ṇa pu̱ṣṭaiḥ | anu̱ dvipa̱dānu̱ catu̍ṣpadā va̱yaṃ de̱vā no̍ ya̱jñamṛ̍tu̱thā na̍yantu

---

Mantra 14 {#mantra-14}

Adhyāya: 28 | Mantra: 14

ā no̍ go̱trā da̍rdṛhi gopate̱ gāḥ sama̱smabhya̍ sa̱nayo̍ yantu̱ vājā̍ḥ | di̱vakṣā̍ asi vṛṣabha sa̱tyaśu̍ṣmo̱’smabhya̱ suma̍ghavan bodhi go̱dāḥ

---