Vājasaneyi Kanva Saṃhitā — Chapter 21 (66 mantras)
Vājasaneyi Kanva Saṃhitā — Chapter 21
Section titled “Vājasaneyi Kanva Saṃhitā — Chapter 21”|| atha tṛtīyo daśakaḥ||3|| ekaviṃśodhyāyaḥ
Mantras
Section titled “Mantras”Mantra 1 {#mantra-1}
Section titled “Mantra 1 {#mantra-1}”Adhyāya: 21 | Mantra: 1
svā̱dvīṃ tvā̍ svā̱dunā̍ tī̱vrāṃ tī̱vreṇā̱mṛtā̍ma̱mṛte̍na | madhu̍matī̱ṃ madhu̍matā sṛ̱jāmi̱ sa some̍na | somo̍’sya̱śvibhyā̍ṃ pacyasva̱ sara̍svatyai pacya̱svendrā̍ya su̱trāmṇe̍ pacyasva
Mantra 2 {#mantra-2}
Section titled “Mantra 2 {#mantra-2}”Adhyāya: 21 | Mantra: 2
parī̱to ṣi̍ñca̱tā su̱ta somo̱ ya u̍tta̱ma ha̱viḥ | da̱dha̱nvā yo naryo̍ a̱psva̱ntarā su̱ṣāva̱ soma̱madri̍bhiḥ
Mantra 3 {#mantra-3}
Section titled “Mantra 3 {#mantra-3}”Adhyāya: 21 | Mantra: 3
vā̱yoḥ pū̱taḥ pa̱vitre̍ṇa̱ pra̱tyaṅksomo̱ ati̍drutaḥ | indra̍sya̱ yujya̱ḥ sakhā̍ | vā̱yoḥ pū̱taḥ pa̱vitre̍ṇa pra̱tyaṅksomo̱ ati̍drutaḥ | indra̍sya̱ yujya̱ḥ sakhā̍
Mantra 4 {#mantra-4}
Section titled “Mantra 4 {#mantra-4}”Adhyāya: 21 | Mantra: 4
pu̱nāti̍ te pari̱sruta̱ soma̱ sūrya̍sya duhi̱tā | vāre̍ṇa̱ śaśva̍tā̱ tanā̍
Mantra 5 {#mantra-5}
Section titled “Mantra 5 {#mantra-5}”Adhyāya: 21 | Mantra: 5
brahma̍ kṣa̱traṃ pa̍vate̱ teja̍ indri̱ya sura̍yā̱ soma̍ḥ su̱ta āsu̍to̱ madā̍ya | śu̱kreṇa̍ deva de̱vatā̍ḥ pipṛgdhi̱ rase̱nānna̱ṃ yaja̍mānāya dhehi | ku̱vida̱ṅga yava̍manto̱ yava̍ṃ ci̱dyathā̱ dāntya̍nupū̱rvaṃ vi̱yūya̍ | i̱hehai̍ṣāṃ kṛṇuhi̱ bhoja̍nāni̱ ye ba̱rhiṣo̱ nama̍ ukti̱ṃ na ja̱gmuḥ| u̱pa̱yā̱magṛ̍hīto’sya̱śvibhyā̍ṃ tvā̱ sara̍svatyai̱ tvendrā̍ya tvā su̱trāmṇe̍ | e̱ṣa te̱ yoni̱steja̍se tvā vī̱ryā̍ya tvā̱ balā̍ya tvā
Mantra 6 {#mantra-6}
Section titled “Mantra 6 {#mantra-6}”Adhyāya: 21 | Mantra: 6
nānā̱ hi vā̍ṃ de̱vahi̍ta̱ sada̍skṛ̱taṃ mā sa sṛ̍kṣāthāṃ para̱me vyo̍man | surā̱ tvama̍si śu̱ṣmiṇī̱ soma̍ e̱ṣa mā mā̍ hisī̱ḥ svāṃ yoni̍māvi̱śantī̍
Mantra 7 {#mantra-7}
Section titled “Mantra 7 {#mantra-7}”Adhyāya: 21 | Mantra: 7
u̱pa̱yā̱magṛ̍hīto̱’syāśvi̱naṃ teja̍ḥ sārasva̱taṃ vī̱rya̍mai̱ndraṃ bala̍m | e̱ṣa te̱ yoni̱rmodā̍ya tvāna̱ndāya̍ tvā̱ maha̍se tvā
Mantra 8 {#mantra-8}
Section titled “Mantra 8 {#mantra-8}”Adhyāya: 21 | Mantra: 8
tejo̍’si̱ tejo̱ mayi̍ dhehi vī̱rya̍masi vī̱rya̱ṃ mayi̍ dhehi bala̍masi̱ bala̱ṃ mayi̍ dhe̱hyojo̱’syojo̱ mayi̍ dhehi | ma̱nyura̍si ma̱nyuṃ mayi̍ dhehi̱ saho̍’si̱ saho̱ mayi̍ dhehi
Mantra 9 {#mantra-9}
Section titled “Mantra 9 {#mantra-9}”Adhyāya: 21 | Mantra: 9
yā vyā̱ghraṃ viṣū̍ciko̱bhau vṛka̍ṃ ca̱ rakṣa̍ti | śye̱naṃ pa̍ta̱triṇa̍ si̱ha semaṃ pā̱tvaha̍saḥ
Mantra 10 {#mantra-10}
Section titled “Mantra 10 {#mantra-10}”Adhyāya: 21 | Mantra: 10
yadā̍pi̱peṣa̍ mā̱tara̍ṃ pu̱traḥ pramu̍dito̱ dhaya̍n | e̱tattada̍gne anṛ̱ṇo bha̍vā̱myaha̍tau pi̱tarau̱ mayā̍
Mantra 11 {#mantra-11}
Section titled “Mantra 11 {#mantra-11}”Adhyāya: 21 | Mantra: 11
sa̱mpṛca̍ stha̱ saṃ mā̍ bha̱dreṇa̍ pṛṅkta | vi̱pṛca̍ stha̱ vi mā̍ pā̱pmana̍ pṛṅkta
Mantra 12 {#mantra-12}
Section titled “Mantra 12 {#mantra-12}”Adhyāya: 21 | Mantra: 12
de̱vā ya̱jñama̍tanvata bheṣa̱jaṃ bhi̱ṣajā̱śvinā̍ | vā̱cā sara̍svatī bhi̱ṣagindrā̍yendri̱yāṇi̱ dadha̍taḥ
Mantra 13 {#mantra-13}
Section titled “Mantra 13 {#mantra-13}”Adhyāya: 21 | Mantra: 13
dī̱kṣāyai̍ rū̱pa śaṣpā̍ṇi prāya̱ṇīya̍sya̱ tokmā̍ni | kra̱yasya̍ rū̱pa soma̍sya lā̱jāḥ so̍mā̱śavo̱ madhu̍
Mantra 14 {#mantra-14}
Section titled “Mantra 14 {#mantra-14}”Adhyāya: 21 | Mantra: 14
ā̱ti̱thyarū̱paṃ māsa̍raṃ mahāvī̱rasya̍ na̱gnahu̍ḥ | rū̱pamu̍pa̱sadā̍me̱tatti̱sro rātrī̱ḥ surāsu̍tā
Mantra 15 {#mantra-15}
Section titled “Mantra 15 {#mantra-15}”Adhyāya: 21 | Mantra: 15
soma̍sya rū̱paṃ krī̱tasya̍ pari̱srutpari̍ ṣicyate | a̱śvibhyā̍ṃ du̱gdhaṃ bhe̍ṣa̱jamindrā̍yai̱ndra sara̍svatyā
Mantra 16 {#mantra-16}
Section titled “Mantra 16 {#mantra-16}”Adhyāya: 21 | Mantra: 16
ā̱sa̱ndī rū̱pa rā̍jāsa̱ndyai vedyai̍ ku̱mbhī su̍rā̱dhānī̍ | anta̍ra uttarave̱dyā rū̱paṃ kā̍rota̱ro bhi̱ṣak
Mantra 17 {#mantra-17}
Section titled “Mantra 17 {#mantra-17}”Adhyāya: 21 | Mantra: 17
vedyā̱ vedi̱ḥ samā̍pyate ba̱rhiṣā̍ ba̱rhiri̍ndri̱yam | yūpe̍na̱ yūpa̍ āpyate̱ praṇī̍to a̱gnira̱gninā̍
Mantra 18 {#mantra-18}
Section titled “Mantra 18 {#mantra-18}”Adhyāya: 21 | Mantra: 18
ha̱vi̱rdhāna̱ṃ yada̱śvināgnī̍dhra̱ṃ yatsara̍svatī | indrā̍yai̱ndra sada̍skṛ̱taṃ pa̍tnī̱śāla̱ṃ gārha̍patyaḥ
Mantra 19 {#mantra-19}
Section titled “Mantra 19 {#mantra-19}”Adhyāya: 21 | Mantra: 19
prai̱ṣebhi̍ḥ prai̱ṣānā̍pnotyā̱prībhi̍rā̱prīrya̱jñasya̍ | pra̱yā̱jebhi̍ranuyā̱jānva̍ṣaṭkā̱rebhi̱rāhu̍tīḥ
Mantra 20 {#mantra-20}
Section titled “Mantra 20 {#mantra-20}”Adhyāya: 21 | Mantra: 20
pa̱śubhi̍ḥ pa̱śūnā̍pnoti puro̱l̤āśai̍rha̱vīṣyā | chando̍bhiḥ sāmidhe̱nīryā̱jyā̍bhirvaṣaṭkā̱rān
Mantra 21 {#mantra-21}
Section titled “Mantra 21 {#mantra-21}”Adhyāya: 21 | Mantra: 21
dhā̱nāḥ ka̍ra̱mbhaḥ sakta̍vaḥ parīvā̱paḥ payo̱ dadhi̍ | soma̍sya rū̱pa ha̱viṣa̍ ā̱mikṣā̱ vāji̍na̱ṃ madhu̍
Mantra 22 {#mantra-22}
Section titled “Mantra 22 {#mantra-22}”Adhyāya: 21 | Mantra: 22
dhā̱nānā̍ rū̱paṃ kuva̍laṃ parīvā̱pasya̍ go̱dhūmā̍ḥ | saktū̍nā rū̱paṃ bada̍ramupa̱vākā̍ḥ kara̱mbhasya̍
Mantra 23 {#mantra-23}
Section titled “Mantra 23 {#mantra-23}”Adhyāya: 21 | Mantra: 23
paya̍so rū̱paṃ yadyavā̍ da̱dhno rū̱paṃ ka̱rkandhū̍ni | soma̍sya rū̱paṃ vāji̍na sau̱myasya̍ rū̱pamā̱mikṣā̍
Mantra 24 {#mantra-24}
Section titled “Mantra 24 {#mantra-24}”Adhyāya: 21 | Mantra: 24
āśrā̍va̱yeti̍ sto̱triyā̍ḥ pratyāśrā̱vo anu̍rūpaḥ | yajeti̍ dhayyārū̱paṃ pra̍gā̱thā ye̍yajāma̱hāḥ
Mantra 25 {#mantra-25}
Section titled “Mantra 25 {#mantra-25}”Adhyāya: 21 | Mantra: 25
a̱rdha̱ ṛ̱cairu̱kthānā̍ rū̱paṃ pa̱dairā̍pnoti ni̱vida̍ḥ | pra̱ṇa̱vaiḥ śa̱strāṇā̍ rū̱paṃ paya̍sā̱ soma̍ āpyate
Mantra 26 {#mantra-26}
Section titled “Mantra 26 {#mantra-26}”Adhyāya: 21 | Mantra: 26
a̱śvibhyā̍ṃ prātaḥsava̱namindre̍ṇai̱ndraṃ mādhya̍ndinam | vai̱śva̱de̱va sara̍svatyā tṛ̱tīya̍mā̱pta sava̍nam
Mantra 27 {#mantra-27}
Section titled “Mantra 27 {#mantra-27}”Adhyāya: 21 | Mantra: 27
vā̱ya̱vyai̍rvāya̱vyā̍nyāpnoti̱ sate̍na droṇakala̱śam | ku̱mbhībhyā̍mambhṛ̱ṇau su̱te sthā̱lībhi̍ḥ sthā̱līrā̍pnoti
Mantra 28 {#mantra-28}
Section titled “Mantra 28 {#mantra-28}”Adhyāya: 21 | Mantra: 28
yaju̍rbhirāpyante̱ grahā̱ grahai̱ stomā̍śca̱ viṣṭu̍tīḥ | chando̍bhirukthāśa̱strāṇi̱ sāmnā̍vabhṛ̱tha ā̍pyate
Mantra 29 {#mantra-29}
Section titled “Mantra 29 {#mantra-29}”Adhyāya: 21 | Mantra: 29
il̤ā̍bhirbha̱kṣānā̍pnoti sūktavā̱kenā̱śiṣa̍ḥ | śa̱ṃyunā̍ patnīsaṃyā̱jāntsa̍miṣṭaya̱juṣā̍ sa̱sthām
Mantra 30 {#mantra-30}
Section titled “Mantra 30 {#mantra-30}”Adhyāya: 21 | Mantra: 30
vra̱tena̍ dī̱kṣāmā̍pnoti dī̱kṣayā̍pnoti̱ dakṣi̍ṇām | dakṣi̍ṇā śra̱ddhāmā̍pnoti śra̱ddhayā̍ sa̱tyamā̍pyate
Mantra 31 {#mantra-31}
Section titled “Mantra 31 {#mantra-31}”Adhyāya: 21 | Mantra: 31
|| e̱tāva̍drū̱paṃ ya̱jñasya̱ yadde̱vairbrahma̍ṇā kṛ̱tam | tade̱tatsarva̍māpnoti ya̱jñe sau̍trāma̱ṇī su̱te
Mantra 32 {#mantra-32}
Section titled “Mantra 32 {#mantra-32}”Adhyāya: 21 | Mantra: 32
surā̍vantaṃ barhi̱ṣada̍ su̱vīra̍ṃ ya̱jña hi̍nvanti mahi̱ṣā namo̍bhiḥ | dadhā̍nā̱ḥ soma̍ṃ di̱vi de̱vatā̍su̱ made̱mendra̱ṃ yaja̍mānāḥ sva̱rkāḥ
Mantra 33 {#mantra-33}
Section titled “Mantra 33 {#mantra-33}”Adhyāya: 21 | Mantra: 33
yaste̱ rasa̱ḥ saṃbhṛ̍ta̱ oṣa̍dhīṣu̱ soma̍sya̱ śuṣma̱ḥ sura̍yā su̱tasya̍ | tena̍ jinva̱ yaja̍māna̱ṃ made̍na̱ sara̍svatīma̱śvinā̱ indra̍ma̱gnim
Mantra 34 {#mantra-34}
Section titled “Mantra 34 {#mantra-34}”Adhyāya: 21 | Mantra: 34
yama̱śvinā̱ namu̍cerāsu̱rādadhi̱ sara̍sva̱tyasu̍nodindri̱yāya̍ | i̱maṃ ta śu̱kraṃ madhu̍manta̱mindu̱ soma̱ rājā̍nami̱ha bha̍kṣayāmi
Mantra 35 {#mantra-35}
Section titled “Mantra 35 {#mantra-35}”Adhyāya: 21 | Mantra: 35
yadatra̍ ri̱pta ra̱sina̍ḥ su̱tasya̱ yadindro̱ api̍ba̱cchacī̍bhiḥ | a̱haṃ tada̍sya̱ mana̍sā śi̱vena̱ soma̱ rājā̍nami̱ha bha̍kṣayāmi
Mantra 36 {#mantra-36}
Section titled “Mantra 36 {#mantra-36}”Adhyāya: 21 | Mantra: 36
pi̱tṛbhya̍ḥ svadhā̱yibhya̍ḥ sva̱dhā nama̍ḥ pi̍tāma̱hebhya̍ḥ svadhā̱yibhya̍ḥ sva̱dhā nama̍ḥ | prapi̍tāmahebhyaḥ svadhā̱yibhya̍ḥ sva̱dhā nama̍ḥ
Mantra 37 {#mantra-37}
Section titled “Mantra 37 {#mantra-37}”Adhyāya: 21 | Mantra: 37
akṣa̍n pitaro’mī̍madanta pi̱taro’tī̍tṛpanta pi̱tara̍ḥ | pita̍ra̱ḥ śundhadhvam
Mantra 38 {#mantra-38}
Section titled “Mantra 38 {#mantra-38}”Adhyāya: 21 | Mantra: 38
pu̱nantu̍ mā pi̱tara̍ḥ so̱myāsa̍ḥ pu̱nantu̍ mā pitāma̱hāḥ pu̱nantu̱ prapi̍tāmahāḥ | pa̱vitre̍ṇa śa̱tāyu̍ṣā
Mantra 39 {#mantra-39}
Section titled “Mantra 39 {#mantra-39}”Adhyāya: 21 | Mantra: 39
pu̱nantu̍ mā pitāma̱hāḥ pu̱nantu̱ prapi̍tāmahāḥ | pa̱vitre̍ṇa śa̱tāyu̍ṣā̱ viśva̱māyu̱rvya̍śnavai
Mantra 40 {#mantra-40}
Section titled “Mantra 40 {#mantra-40}”Adhyāya: 21 | Mantra: 40
agna̱ āyū̍ṣi pavasva̱ ā su̱vorja̱miṣa̍ṃ ca naḥ | ā̱re bā̍dhasva du̱cchunā̍m
Mantra 41 {#mantra-41}
Section titled “Mantra 41 {#mantra-41}”Adhyāya: 21 | Mantra: 41
pu̱nantu̍ mā deva̱janāḥ pu̱nantu̱ mana̍sā̱ dhiya̍ḥ | pu̱nantu̱ viśvā̍ bhū̱tāni̱ jāta̍vedaḥ punī̱hi mā̍
Mantra 42 {#mantra-42}
Section titled “Mantra 42 {#mantra-42}”Adhyāya: 21 | Mantra: 42
pa̱vitre̍ṇa punīhi mā śu̱kreṇa̍ deva̱ dīdya̍t | agne̱ kratvā̱ kratū̱ranu̍
Mantra 43 {#mantra-43}
Section titled “Mantra 43 {#mantra-43}”Adhyāya: 21 | Mantra: 43
yatte̍ pa̱vitra̍ma̱rciṣyagne̱ vita̍tamanta̱rā | brahma̱ tena̍ punātu mā
Mantra 44 {#mantra-44}
Section titled “Mantra 44 {#mantra-44}”Adhyāya: 21 | Mantra: 44
pava̍māna̱ḥ so a̱dya na̍ḥ pa̱vitre̍ṇa̱ vica̍rṣaṇiḥ | yaḥ potā̱ sa pu̍nātu mā
Mantra 45 {#mantra-45}
Section titled “Mantra 45 {#mantra-45}”Adhyāya: 21 | Mantra: 45
u̱bhābhyā̍ṃ deva savitaḥ pa̱vitre̍ṇa sa̱vena̍ ca | māṃ pu̍nīhi vi̱śvata̍ḥ
Mantra 46 {#mantra-46}
Section titled “Mantra 46 {#mantra-46}”Adhyāya: 21 | Mantra: 46
vai̱śva̱de̱vī pu̍na̱tī de̱vyāgā̱dyasyā̍mi̱mā ba̱hvya̍sta̱nvo̍ vī̱tapṛ̍ṣṭhāḥ | tayā̱ mada̍ntaḥ sadha̱māde̍ṣu va̱ya syā̍ma̱ pata̍yo rayī̱ṇām
Mantra 47 {#mantra-47}
Section titled “Mantra 47 {#mantra-47}”Adhyāya: 21 | Mantra: 47
ye sa̍mā̱nāḥ sama̍nasaḥ pi̱taro̍ yama̱rājye̍ | teṣā̍ṃ llo̱kaḥ sva̱dhā namo̍ ya̱jño de̱veṣu̍ kalpatām
Mantra 48 {#mantra-48}
Section titled “Mantra 48 {#mantra-48}”Adhyāya: 21 | Mantra: 48
ye sa̍mā̱nāḥ sama̍naso jī̱vā jī̱veṣu̍ māma̱kāḥ | teṣā̱ śrīrmayi̍ kalpatāma̱smim̐llo̱ke śata samā̍ḥ
Mantra 49 {#mantra-49}
Section titled “Mantra 49 {#mantra-49}”Adhyāya: 21 | Mantra: 49
dve sṛ̱tī a̍śṛṇavaṃ pitṝ̱ṇāma̱haṃ de̱vānā̍mu̱ta martyā̍nām | tābhyā̍mi̱daṃ viśva̱meja̱tsame̍ti̱ yada̍nta̱rā pi̱tara̍ṃ mā̱tara̍ṃ ca
Mantra 50 {#mantra-50}
Section titled “Mantra 50 {#mantra-50}”Adhyāya: 21 | Mantra: 50
i̱da ha̱viḥ pra̱jana̍naṃ me astu̱ daśa̍vīra̱ sarva̍gaṇa sva̱staye̍ | ā̱tma̱sani̍ prajā̱sani̍ paśu̱sani̍ loka̱sanya̍bhaya̱sani̍ | a̱gniḥ pra̱jāṃ ba̍hu̱lāṃ me̍ karo̱tvanna̱ṃ payo̱ reto̍ a̱smāsu̍ dhatta
Mantra 51 {#mantra-51}
Section titled “Mantra 51 {#mantra-51}”Adhyāya: 21 | Mantra: 51
udī̍ratā̱mava̍ra̱ utparā̍sa̱ unma̍dhya̱māḥ pi̱tara̍ḥ so̱myāsa̍ḥ | asu̱ṃ ya ī̱yura̍vṛ̱kā ṛ̍ta̱jñāste no̍’vantu pi̱taro̱ have̍ṣu
Mantra 52 {#mantra-52}
Section titled “Mantra 52 {#mantra-52}”Adhyāya: 21 | Mantra: 52
tva so̍ma̱ praci̍kito manī̱ṣā tva raji̍ṣṭha̱manu̍ neṣi̱ panthā̍m | tava̱ praṇī̍tī pi̱taro̍ na indo de̱veṣu̱ ratna̍mabhajanta̱ dhīrā̍ḥ
Mantra 53 {#mantra-53}
Section titled “Mantra 53 {#mantra-53}”Adhyāya: 21 | Mantra: 53
tvayā̱ hi na̍ḥ pi̱tara̍ḥ soma̱ pūrve̱ karmā̍ṇi ca̱kruḥ pa̍vamāna̱ dhīrā̍ḥ | va̱nvannavā̍taḥ pari̱dhīrapo̍rṇu vī̱rebhi̱raśvai̍rma̱ghavā̍ bhavā naḥ
Mantra 54 {#mantra-54}
Section titled “Mantra 54 {#mantra-54}”Adhyāya: 21 | Mantra: 54
tva so̍ma pi̱tṛbhi̍ḥ saṃvidā̱no’nu̱ dyāvā̍pṛthi̱vī ā ta̍tantha | tasmai̍ ta indo ha̱viṣā̍ vidhema va̱ya syā̍ma̱ pata̍yo rayī̱ṇām
Mantra 55 {#mantra-55}
Section titled “Mantra 55 {#mantra-55}”Adhyāya: 21 | Mantra: 55
barhi̍ṣadaḥ pitara ū̱tya̱rvāgi̱mā vo̍ ha̱vyā ca̍kṛmā ju̱ṣadhva̍m | ta ā ga̱tāva̍sā̱ śanta̍me̱nāthā̍ na̱ḥ śaṃ yora̍ra̱po da̍dhāta
Mantra 56 {#mantra-56}
Section titled “Mantra 56 {#mantra-56}”Adhyāya: 21 | Mantra: 56
upa̍hūtāḥ pi̱tara̍ḥ so̱myāso̍ barhi̱ṣye̍ṣu ni̱dhiṣu̍ pri̱yeṣu̍ | ta ā ga̍mantu̱ ta i̱ha śru̍va̱ntvadhi̍ bruvantu̱ te̍’vantva̱smān
Mantra 57 {#mantra-57}
Section titled “Mantra 57 {#mantra-57}”Adhyāya: 21 | Mantra: 57
āhaṃ pi̱tṝntsu̍vi̱datrā̍m̐2 avitsi̱ napā̍taṃ ca vi̱krama̍ṇaṃ ca̱ viṣṇo̍ḥ | ba̱rhi̱ṣado̱ ye sva̱dhayā̍ su̱tasya̱ bhaja̍nta pi̱tvasta i̱hāga̍miṣṭhāḥ
Mantra 58 {#mantra-58}
Section titled “Mantra 58 {#mantra-58}”Adhyāya: 21 | Mantra: 58
agni̍ṣvāttāḥ pitara̱ eha ga̍cchata̱ sada̍ḥ sadaḥ sadata supraṇītayaḥ | a̱ttā ha̱vīṣi̱ praya̍tāni ba̱rhiṣyathā̍ ra̱yi sarva̍vīraṃ dadhātana
Mantra 59 {#mantra-59}
Section titled “Mantra 59 {#mantra-59}”Adhyāya: 21 | Mantra: 59
ā ya̍ntu naḥ pi̱tara̍ḥ so̱myāso̍’gniṣvā̱ttāḥ pa̱thibhi̍rdeva̱yānai̍ḥ | a̱smin ya̱jñe sva̱dhayā̱ mada̱nto’dhi̍ bruvantu̱ te̍’vantva̱smān
Mantra 60 {#mantra-60}
Section titled “Mantra 60 {#mantra-60}”Adhyāya: 21 | Mantra: 60
ye a̍gniṣvā̱ttā ye ana̍gniṣvāttā̱ madhye̍ di̱vaḥ sva̱dhayā̍ mā̱daya̍nte | tebhya̍ḥ sva̱rāl̤asu̍nītime̱tāṃ ya̍thāva̱śaṃ ta̱nva̍ṃ kalpayāti
Mantra 61 {#mantra-61}
Section titled “Mantra 61 {#mantra-61}”Adhyāya: 21 | Mantra: 61
a̱gni̱ṣvā̱ttānṛ̍tu̱mato̍ havāmahe nārāśa̱se so̍mapī̱thaṃ ya ā̱śuḥ | te no̱ viprā̍saḥ su̱havā̍ bhavantu va̱ya syā̍ma̱ pata̍yo rayī̱ṇām
Mantra 62 {#mantra-62}
Section titled “Mantra 62 {#mantra-62}”Adhyāya: 21 | Mantra: 62
ācyā̱ jānu̍ dakṣiṇa̱to ni̱ṣadye̱maṃ ya̱jñama̱bhi gṛ̍ṇīta̱ viśve̍ | mā hi̍siṣṭa pitara̱ḥ kena̍ cinno̱ yadva̱ āga̍ḥ puru̱ṣatā̱ karā̍ma
Mantra 63 {#mantra-63}
Section titled “Mantra 63 {#mantra-63}”Adhyāya: 21 | Mantra: 63
āsī̍nāso aru̱ṇīnā̍mu̱pasthe̍ ra̱yiṃ dha̍tta dā̱śuṣe̱ martyā̍ya | pu̱trebhya̍ḥ pitara̱stasya̱ vasva̱ḥ pra ya̍cchata̱ ta i̱horja̍ṃ dadhāta
Mantra 64 {#mantra-64}
Section titled “Mantra 64 {#mantra-64}”Adhyāya: 21 | Mantra: 64
yama̍gne kavyavāhana̱ tvaṃ ci̱nmanya̍se ra̱yim | tanno̍ gī̱rbhiḥ śra̱vāyya̍ṃ deva̱trā pa̍nayā̱ yuja̍m
Mantra 65 {#mantra-65}
Section titled “Mantra 65 {#mantra-65}”Adhyāya: 21 | Mantra: 65
yo a̱gniḥ ka̍vya̱vāha̍naḥ pi̱tṝnyakṣa̍dṛtā̱vṛdha̍ḥ | predu̍ ha̱vyāni̍ vocati de̱vebhya̍śca pi̱tṛbhya̱ ā
Mantra 66 {#mantra-66}
Section titled “Mantra 66 {#mantra-66}”Adhyāya: 21 | Mantra: 66
tvama̍gna īl̤i̱taḥ jā̍tave̱do vā̍ḍḍha̱vyāni̍ sura̱bhīṇi̍ kṛ̱tvī | prādā̍ḥ pi̱tṛbhya̍ḥ sva̱dhayā̱ te a̍kṣanna̱ddhi tvaṃ de̍va̱ praya̍tā ha̱vīṣi̍