Vājasaneyi Kanva Saṃhitā — Chapter 9 (46 mantras)
Vājasaneyi Kanva Saṃhitā — Chapter 9
Section titled “Vājasaneyi Kanva Saṃhitā — Chapter 9”atha navamo’dhyāyaḥ |
Mantras
Section titled “Mantras”Mantra 1 {#mantra-1}
Section titled “Mantra 1 {#mantra-1}”Adhyāya: 9 | Mantra: 1
prā̱ṇāya̍ me varco̱dā varca̍se pavasva vyā̱nāya̍ me varco̱dā varca̍se pavasva | u̱dā̱nāya̍ me varco̱dā varca̍se pavasva vā̱ce me̍ varco̱dā varca̍se pavasva
Mantra 2 {#mantra-2}
Section titled “Mantra 2 {#mantra-2}”Adhyāya: 9 | Mantra: 2
kratū̱dakṣā̍bhyāṃ me varco̱dā varca̍se pavasva̱ śrotrā̍ya me varco̱dā varca̍se pavasva | cakṣu̍rbhyāṃ me varco̱dasau̱ varca̍se pavethām
Mantra 3 {#mantra-3}
Section titled “Mantra 3 {#mantra-3}”Adhyāya: 9 | Mantra: 3
ā̱tmane̍ me varco̱dā varca̍se pava̱svauja̍se me varco̱dā varca̍se pava̱svāyu̍ṣe me varco̱dā varca̍se pavasva | viśvā̍bhyo me pra̱jābhyo̍ varco̱dasau̱ varca̍se pavethām
Mantra 4 {#mantra-4}
Section titled “Mantra 4 {#mantra-4}”Adhyāya: 9 | Mantra: 4
ko̍’si kata̱mo̍’si̱ kasyā̍si̱ ko nāmā̍si | yasya̍ te̱ nāmāmanma̍hi̱ yaṃ tvā̱ some̱nātī̍tṛpāma
Mantra 5 {#mantra-5}
Section titled “Mantra 5 {#mantra-5}”Adhyāya: 9 | Mantra: 5
bhūrbhuva̱ḥ sva̍ḥ supra̱jāḥ pra̱jayā̍ bhūyāsam | su̱vīro̍ vī̱raiḥ su̱poṣa̱ḥ poṣai̍ḥ
Mantra 6 {#mantra-6}
Section titled “Mantra 6 {#mantra-6}”Adhyāya: 9 | Mantra: 6
udu̱ tyaṃ jā̱tave̍dasaṃ de̱vaṃ va̍hanti ke̱tava̍ḥ | dṛ̱śe viśvā̍ya̱ sūrya̍m
Mantra 7 {#mantra-7}
Section titled “Mantra 7 {#mantra-7}”Adhyāya: 9 | Mantra: 7
ci̱traṃ de̱vānā̱muda̍gā̱danī̍ka̱ṃ cakṣu̍rmi̱trasya̱ varu̍ṇasyā̱gneḥ | ā prā̱ dyāvā̍pṛthi̱vī a̱ntari̍kṣa̱ sūrya̍ ā̱tmā jaga̍tasta̱sthuṣa̍śca
Mantra 8 {#mantra-8}
Section titled “Mantra 8 {#mantra-8}”Adhyāya: 9 | Mantra: 8
agne̱ naya̍ su̱pathā̍ rā̱ye a̱smān viśvā̍ni deva va̱yunā̍ni vi̱dvān | yu̱yo̱dhya̱smajju̍hurā̱ṇameno̱ bhūyi̍ṣṭhāṃ te̱ nama̍ uktiṃ vidhema
Mantra 9 {#mantra-9}
Section titled “Mantra 9 {#mantra-9}”Adhyāya: 9 | Mantra: 9
a̱yaṃ no̍ a̱gnirvari̍vaskṛṇotva̱yaṃ mṛdha̍ḥ pu̱ra e̍tu prabhi̱ndan | a̱yaṃ vājā̍ṃ jayatu̱ vāja̍sātā a̱ya śatrū̍ṃ jayatu̱ jarhṛ̍ṣāṇa̱ḥ svāhā̍
Mantra 10 {#mantra-10}
Section titled “Mantra 10 {#mantra-10}”Adhyāya: 9 | Mantra: 10
rū̱peṇa̍ vo rū̱pama̱bhyāgā̍ṃ tu̱tho vo̍ vi̱śvave̍dā̱ vibha̍jatu | ṛ̱tasya̍ pa̱thā preta̍ ca̱ndrada̍kṣiṇāḥ
Mantra 11 {#mantra-11}
Section titled “Mantra 11 {#mantra-11}”Adhyāya: 9 | Mantra: 11
vi sva̱ḥ paśya̱vya̱ntari̍kṣa̱ṃ yata̍sva sada̱syai̍ḥ |brā̱hma̱ṇama̱dya vi̍deya pitṛ̱manta̍ṃ paitṛma̱tyamṛṣi̍mārṣe̱ya su̱dhātu̍dakṣiṇam
Mantra 12 {#mantra-12}
Section titled “Mantra 12 {#mantra-12}”Adhyāya: 9 | Mantra: 12
a̱smadrā̍tā deva̱trā ga̍ccha pradā̱tāra̱māvi̍śa | a̱gnaye̍ tvā̱ mahya̱ṃ varu̍ṇo dadātu̱ so̍’mṛta̱tvama̍śyāt
Mantra 13 {#mantra-13}
Section titled “Mantra 13 {#mantra-13}”Adhyāya: 9 | Mantra: 13
āyu̍rdā̱tra e̍dhi̱ mayo̱ mahya̍ṃ pratigrahī̱tre | ru̱drāya̍ tvā̱ mahya̱ṃ varu̍ṇo dadātu̱ so̍’mṛta̱tvama̍śyāt | prā̱ṇo dā̱tra e̍dhi̱ mayo̱ mahya̍ṃ pratigrahī̱tre| bṛha̱spata̍ye tvā̱ mahya̱ṃ varu̍ṇo dadātu̱ so̍’mṛta̱tvama̍śyāt | tvagdā̱tra e̍dhi̱ mayo̱ mahya̍ṃ pratigrahī̱tre | ya̱māya̍ tvā̱ mahya̱ṃ varu̍ṇo dadātu̱ so̍’mṛta̱tvama̍śyāt | vayo̍ dā̱tra e̍dhi̱ mayo̱ mahya̍ṃ pratigrahī̱tre
Mantra 14 {#mantra-14}
Section titled “Mantra 14 {#mantra-14}”Adhyāya: 9 | Mantra: 14
ko̍’dā̱tkasmā̍ adā̱tkāmo̍’dā̱tkāmā̍yādāt | kāmo̍ dā̱tā kāma̍ḥ pratigrahī̱tā kāmai̱tatte̱ tava̍ kāma sa̱tā bhu̍najāmahai
Mantra 15 {#mantra-15}
Section titled “Mantra 15 {#mantra-15}”Adhyāya: 9 | Mantra: 15
sami̍ndra ṇo̱ mana̍sā neṣi̱ gobhi̱ḥ sa sū̱ribhi̍rmaghava̱ntsasva̱styā | saṃ brahma̍ṇā de̱vakṛ̍ta̱ṃ yadasti̱ saṃ de̱vānā̍ suma̱tau ya̱jñiyā̍nām
Mantra 16 {#mantra-16}
Section titled “Mantra 16 {#mantra-16}”Adhyāya: 9 | Mantra: 16
saṃ varca̍sā̱ paya̍sā̱ saṃ ta̱nūbhi̱raga̍nmahi̱ mana̍sā̱ sa śi̱vena̍ | tvaṣṭā̍ su̱datro̱ vida̍dhātu̱ rāyo’nu̍mārṣṭu ta̱nvo̱ yadvili̍ṣṭam
Mantra 17 {#mantra-17}
Section titled “Mantra 17 {#mantra-17}”Adhyāya: 9 | Mantra: 17
dhā̱tā rā̱tiḥ sa̍vi̱tedaṃ ju̍ṣantāṃ pra̱jāpa̍tirnidhi̱pā de̱vo a̱gniḥ | tvaṣṭā̱ viṣṇu̍ḥ pra̱jayā̍ sararā̱ṇo yaja̍mānāya̱ dravi̍ṇaṃ dadhātu
Mantra 18 {#mantra-18}
Section titled “Mantra 18 {#mantra-18}”Adhyāya: 9 | Mantra: 18
su̱gā vo̍ devā̱ḥ sada̍nā akarma̱ ya ā̍ja̱gmeda sava̍naṃ juṣā̱ṇāḥ | bhara̍māṇā̱ vaha̍mānā ha̱vīṣya̱sme dha̍tta vasavo̱ vasū̍ni
Mantra 19 {#mantra-19}
Section titled “Mantra 19 {#mantra-19}”Adhyāya: 9 | Mantra: 19
yām̐3 āva̍ha uśa̱to de̍va de̱vāstānprera̍ya̱ sve a̍gne sa̱dhasthe̍ | ja̱kṣi̱vāsa̍ḥ papi̱vāsa̍śca̱ viśve’su̍ṃ gha̱rma sva̱rāti̍ṣṭha̱tānu̍
Mantra 20 {#mantra-20}
Section titled “Mantra 20 {#mantra-20}”Adhyāya: 9 | Mantra: 20
va̱ya hi tvā̍ praya̱ti ya̱jñe a̱sminnagne̱ hotā̍ra̱mavṛ̍ṇīmahī̱ha | ṛdha̍gayā̱ ṛdha̍gu̱tāśa̍miṣṭhāḥ prajā̱nanya̱jñamupa̍yāhi vi̱dvān
Mantra 21 {#mantra-21}
Section titled “Mantra 21 {#mantra-21}”Adhyāya: 9 | Mantra: 21
devā̍ gātuvido gā̱tumi̱ttvā gā̱tumi̍ta | mana̍saspata i̱maṃ de̍va ya̱jña svāhā̱ vāte̍ dhāḥ
Mantra 22 {#mantra-22}
Section titled “Mantra 22 {#mantra-22}”Adhyāya: 9 | Mantra: 22
yajña̍ ya̱jñaṃ ga̍ccha ya̱jñapa̍tiṃ gaccha̱ svāṃ yoni̍ṃ gaccha̱ svāhā̍ | e̱ṣa te̍ ya̱jño ya̍jñapate sa̱hasū̍ktavāka̱ḥ sarva̍vīra̱staṃ ju̍ṣasva̱ svāhā̍
Mantra 23 {#mantra-23}
Section titled “Mantra 23 {#mantra-23}”Adhyāya: 9 | Mantra: 23
māhi̍rbhū̱rmā pṛdā̍kuḥ | u̱ru hi rājā̱ varu̍ṇaśca̱kāra̱ sūryā̍ya̱ panthā̱manve̍ta̱vā u̍ | a̱pade̱ pādā̱ prati̍dhātave’karu̱tāpa̍va̱ktā hṛ̍dayā̱vidha̍ścit | namo̱ varu̍ṇāyā̱bhiṣṭhi̍to̱ varu̍ṇasya̱ pāśa̍ḥ
Mantra 24 {#mantra-24}
Section titled “Mantra 24 {#mantra-24}”Adhyāya: 9 | Mantra: 24
a̱gneranī̍kama̱pa āvi̍veśā̱pāṃ napā̍t prati̱rakṣa̍nnasu̱rya̍m | dame̍dame sa̱midha̍ṃ yakṣyagne̱ prati̍ te ji̱hvā ghṛ̱tamucca̍raṇya̱t svāhā̍
Mantra 25 {#mantra-25}
Section titled “Mantra 25 {#mantra-25}”Adhyāya: 9 | Mantra: 25
sa̱mu̱dre te̱ hṛda̍yama̱psva̱ntaḥ saṃ tvā̍ viśa̱ntvoṣa̍dhīru̱tāpa̍ḥ | ya̱jñasya̍ tvā yajñapate sū̱ktoktau̍ namovā̱ke vi̍dhema̱ yat svāhā̍
Mantra 26 {#mantra-26}
Section titled “Mantra 26 {#mantra-26}”Adhyāya: 9 | Mantra: 26
devī̍rāpa e̱ṣa vo̱ garbha̱sta suprī̍ta̱ subhṛ̍taṃ bibhṛta | deva̍ somai̱ṣa te̍ lo̱kaḥ pari̍ ca̱ vakṣi̱ śaṃ ca̍ vakṣi | ava̍bhṛtha nicumpuṇa nice̱rura̍si nicumpuṇa | ava̍ de̱vairde̱vakṛ̍ta̱meno̍’yāsiṣa̱mava̱ martyai̱rmartya̍kṛtaṃ puru̱rāvṇo̍ deva ri̱ṣaspā̍hi | de̱vānā̍ sa̱mida̍si
Mantra 27 {#mantra-27}
Section titled “Mantra 27 {#mantra-27}”Adhyāya: 9 | Mantra: 27
eja̍tu̱ daśa̍māsyo̱ garbho̍ ja̱rāyu̍ṇā sa̱ha | yathā̱yaṃ vā̱yureja̍ti̱ yathā̍ samu̱dra eja̍tye̱vāyaṃ daśa̍māsyo̱ asra̍jja̱rāyu̍ṇā sa̱ha
Mantra 28 {#mantra-28}
Section titled “Mantra 28 {#mantra-28}”Adhyāya: 9 | Mantra: 28
yasyā̍ste ya̱jñiyo̱ garbho̱ yasyā̱ yoni̍rhira̱ṇyayī̍ | aṅgā̱nyahru̍tā̱ yasya̱ taṃ mā̱trā sama̍jīgama̱ svāhā̍
Mantra 29 {#mantra-29}
Section titled “Mantra 29 {#mantra-29}”Adhyāya: 9 | Mantra: 29
pu̱ru̱da̱smo viṣu̍rūpa̱ indu̍ra̱ntarma̍hi̱māna̍mānañja̱ dhīra̍ḥ | eka̍padīṃ dvi̱padī̍ṃ tri̱padī̱ṃ catu̍ṣpadīma̱ṣṭāpa̍dī̱ṃ bhuva̱nānu̍ prathantā̱ svāhā̍
Mantra 30 {#mantra-30}
Section titled “Mantra 30 {#mantra-30}”Adhyāya: 9 | Mantra: 30
maru̍to̱ yasya̱ hi kṣaye̍ pā̱thā di̱vo vi̍mahasaḥ | sa su̍go̱pāta̍mo̱ jana̍ḥ
Mantra 31 {#mantra-31}
Section titled “Mantra 31 {#mantra-31}”Adhyāya: 9 | Mantra: 31
ma̱hī dyau̍ḥ pṛ̍thi̱vī ca̍ na i̱maṃ ya̱jñaṃ mi̍mikṣatām | pi̱pṛ̱tāṃ no̱ bharī̍mabhiḥ
Mantra 32 {#mantra-32}
Section titled “Mantra 32 {#mantra-32}”Adhyāya: 9 | Mantra: 32
āji̍ghra ka̱laśa̍ṃ ma̱hyā tvā̍ viśa̱ntvinda̍vaḥ| puna̍rū̱rjā niva̍rtasva̱ sā na̍ḥ sa̱hasra̍ṃ dhukṣvo̱rudhā̍rā̱ paya̍svatī̱ puna̱rmāvi̍śatādra̱yiḥ
Mantra 33 {#mantra-33}
Section titled “Mantra 33 {#mantra-33}”Adhyāya: 9 | Mantra: 33
havye̱ kāmya̱ il̤e̱ rante̱ candre̱ jyote’di̍te̱ sara̍svati̱ mahi̱ viśru̍ti | e̱tā te̍ aghnye̱ nāmā̍ni de̱veṣu̍ mā su̱kṛta̍ṃ brūtāt
Mantra 34 {#mantra-34}
Section titled “Mantra 34 {#mantra-34}”Adhyāya: 9 | Mantra: 34
i̱ha rati̍ri̱ha ra̍madhvami̱ha dhṛti̍ri̱ha svadhṛ̍ti̱ḥ svāhā̍ | u̱pa̱sṛ̱jaṃ dha̱ruṇa̍ṃ mā̱tre dha̱ruṇo̍ mā̱tara̱ṃ dhaya̍nrā̱yaspoṣa̍ma̱smāsu̍ dīdhara̱t svāhā̍
Mantra 35 {#mantra-35}
Section titled “Mantra 35 {#mantra-35}”Adhyāya: 9 | Mantra: 35
aga̍nma̱ jyoti̍ra̱mṛtā̍ abhūma̱ diva̍ṃ pṛthi̱vyā adhyāru̍hām | avi̍dāma de̱vāntsva̱rjyoti̍ḥ
Mantra 36 {#mantra-36}
Section titled “Mantra 36 {#mantra-36}”Adhyāya: 9 | Mantra: 36
yu̱vaṃ tami̍ndrāparvatā puro̱yudhā̱ yo na̍ḥ pṛta̱nyādapa̱ taṃta̱middha̍ta̱ṃ vajre̍ṇa̱ taṃta̱middha̍tam | dū̱re ca̱ttāya̍ chantsa̱dgaha̍na̱ṃ yadina̍kṣada̱smāka̱ śatrū̱n pari̍ śūra vi̱śvato̍ da̱rmā da̍rśīṣṭa vi̱śvata̍ḥ
Mantra 37 {#mantra-37}
Section titled “Mantra 37 {#mantra-37}”Adhyāya: 9 | Mantra: 37
bhūrbhuva̱ḥ sva̍ḥ supra̱jāḥ pra̱jayā̍ bhūyāsam | su̱vīro̍ vī̱raiḥ su̱poṣa̱ḥ poṣai̍ḥ
Mantra 38 {#mantra-38}
Section titled “Mantra 38 {#mantra-38}”Adhyāya: 9 | Mantra: 38
pa̱ra̱me̱ṣṭhya̱bhidhī̍taḥ pra̱jāpa̍tirvā̱ci vyāhṛ̍tāyā̱mandho̱ acche̍taḥ savi̱tā sa̱nyām | vi̱śvaka̍rmā dī̱kṣāyā̍ṃ pū̱ṣā so̍ma̱kraya̍ṇyām
Mantra 39 {#mantra-39}
Section titled “Mantra 39 {#mantra-39}”Adhyāya: 9 | Mantra: 39
indra̍śca ma̱ruta̍śca kra̱yāyo̱potthi̍taḥ | asu̍raḥ pa̱ṇyamā̍no mi̱traḥ krī̱taḥ
Mantra 40 {#mantra-40}
Section titled “Mantra 40 {#mantra-40}”Adhyāya: 9 | Mantra: 40
viṣṇu̍ḥ śipivi̱ṣṭa ū̱rā āsa̍n no̱ viṣṇu̍rna̱randhi̍ṣaḥ pro̱hyamā̍ṇaḥ | soma̱ āga̍to̱ varu̍ṇa āsa̱ndyāmāsa̍nnaḥ
Mantra 41 {#mantra-41}
Section titled “Mantra 41 {#mantra-41}”Adhyāya: 9 | Mantra: 41
a̱gnirāgnī̍dhra̱ indro̍ havi̱rdhāne̍ | atha̍rvopāvahri̱yamā̍ṇo̱ viśve̍ de̱vā a̱śuṣu̍ nyu̱pyamā̍neṣu
Mantra 42 {#mantra-42}
Section titled “Mantra 42 {#mantra-42}”Adhyāya: 9 | Mantra: 42
viṣṇu̍rāprīta̱pā ā̍pyā̱yyamā̍no ya̱maḥ sū̱yamā̍no̱ viṣṇu̍ḥ saṃbhri̱yamā̍ṇaḥ | vā̱yuḥ pū̱yamā̍naḥ śu̱kraḥ pū̱taḥ
Mantra 43 {#mantra-43}
Section titled “Mantra 43 {#mantra-43}”Adhyāya: 9 | Mantra: 43
śu̱kraḥ kṣī̍ra̱śrīrma̱nthī sa̍ktu̱śrīḥ | viśve̍ de̱vāśca̍ma̱seṣū̍nnī̱to’su̱rhomā̱yodya̍taḥ
Mantra 44 {#mantra-44}
Section titled “Mantra 44 {#mantra-44}”Adhyāya: 9 | Mantra: 44
ru̱dro hū̱yamā̍no̱ vāto̱’bhyāvṛ̍tto nṛ̱cakṣā̱ḥ prati̍khyāto bha̱kṣaḥ pī̱taḥ pi̱taro̍ nārāśa̱ sāḥ sā̱dyamā̍naḥ | sindhu̍ravabhṛ̱thāyodya̍taḥ samu̱dro̍’bhyavahri̱yamā̍ṇaḥ | sa̍li̱laḥ praplu̍taḥ
Mantra 45 {#mantra-45}
Section titled “Mantra 45 {#mantra-45}”Adhyāya: 9 | Mantra: 45
yayo̱roja̍sā skabhi̱tā rajā̍si vī̱rye̍bhirvī̱rata̍mā̱ śavi̍ṣṭhā | yā patye̍te̱ apra̍tītā̱ saho̍bhi̱rviṣṇū̍ aga̱nvaru̍ṇā pū̱rvahū̍tau
Mantra 46 {#mantra-46}
Section titled “Mantra 46 {#mantra-46}”Adhyāya: 9 | Mantra: 46
de̱vān diva̍maganya̱jñastato̍ mā̱ dravi̍ṇamaṣṭu manu̱ṣyā̍na̱ntari̍kṣamaganya̱jñastato̍ mā̱ dravi̍ṇamaṣṭu | pi̱tṝn pṛ̍thi̱vīma̍ganya̱jñaḥ tato̍ mā̱ dravi̍ṇamaṣṭu̱ yaṃ kaṃ ca̍ lo̱kamaga̍nya̱jñastato̍ me bha̱drama̍bhūt