atha caturviṃśo'dhyāyaḥ |
tejo̍'si śu̱krama̱mṛta̍māyu̱ṣpā āyu̍rme pāhi |
de̱vasya̍ tvā savi̱tuḥ pra̍sa̱ve̱'śvino̍rbā̱hubhyā̍ṃ pū̱ṣṇo hastā̍bhyāma da̍de
||24.1||तेजो॑ऽसि शु॒क्रम॒मृत॑मायु॒ष्पा आयु॑र्मे पाहि ।
दे॒वस्य॑ त्वा सवि॒तुः प्र॑स॒वे॒ऽश्विनो॑र्बा॒हुभ्यां॑ पू॒ष्णो हस्ता॑भ्याम द॑दे
i̱māma̍gṛbhṇan raśa̱nāmṛ̱tasya̱ pūrva̱ āyu̍ṣi vi̱dathe̍ṣu ka̱vyā |
sā no̍ a̱smintsu̱ta ā ba̍bhūva ṛ̱tasya̱ sāma̍ntsa̱ramā̱rapa̍ntī
||24.2||इ॒माम॑गृभ्णन् रश॒नामृ॒तस्य॒ पूर्व॒ आयु॑षि वि॒दथे॑षु क॒व्या ।
सा नो॑ अ॒स्मिन्त्सु॒त आ ब॑भूव ऋ॒तस्य॒ साम॑न्त्स॒रमा॒रप॑न्ती
a̱bhi̱dhā a̍si̱ bhuva̍namasi ya̱ntāsi̍ dha̱rtā |
sa tvama̱gniṃ vai̍śvāna̱ra sapra̍thasaṃ gaccha̱ svāhā̍kṛtaḥ sva̱gā tvā̍ de̱vebhya̍ḥ
||24.3||अ॒भि॒धा अ॑सि॒ भुव॑नमसि य॒न्तासि॑ ध॒र्ता ।
स त्वम॒ग्निं वै॑श्वान॒र सप्र॑थसं गच्छ॒ स्वाहा॑कृतः स्व॒गा त्वा॑ दे॒वेभ्यः॑
pra̱jāpa̍taye̱ brahma̱nnaśva̍ṃ bha̱ntsyāmi̍ de̱vebhya̍ḥ pra̱jāpa̍taye̱ tena̍ rādhyāsam |
taṃ ba̍dhāna de̱vebhya̍ḥ pra̱jāpa̍taye̱ tena̍ rādhnuhi |
pra̱jāpa̍taye tvā̱ juṣṭa̱ṃ prokṣā̍mīndrā̱gnibhyā̍ṃ tvā̱ juṣṭa̱ṃ prokṣā̍mi vā̱yave̍ tvā̱ juṣṭa̱ṃ prokṣā̍mi̱
viśve̍bhyastvā de̱vebhyo̱ juṣṭa̱ṃ prokṣā̍mi sarve̍bhyastvā de̱vebhyo̱ juṣṭa̱ṃ prokṣā̍mi
||24.4||प्र॒जाप॑तये॒ ब्रह्म॒न्नश्वं॑ भ॒न्त्स्यामि॑ दे॒वेभ्यः॑ प्र॒जाप॑तये॒ तेन॑ राध्यासम् ।
तं ब॑धान दे॒वेभ्यः॑ प्र॒जाप॑तये॒ तेन॑ राध्नुहि ।
प्र॒जाप॑तये त्वा॒ जुष्टं॒ प्रोक्षा॑मीन्द्रा॒ग्निभ्यां॑ त्वा॒ जुष्टं॒ प्रोक्षा॑मि वा॒यवे॑ त्वा॒ जुष्टं॒ प्रोक्षा॑मि॒
विश्वे॑भ्यस्त्वा दे॒वेभ्यो॒ जुष्टं॒ प्रोक्षा॑मि सर्वे॑भ्यस्त्वा दे॒वेभ्यो॒ जुष्टं॒ प्रोक्षा॑मि
yo arva̍nta̱ṃ jighā̍sati̱ tama̱bhya̍mīti̱ varu̍ṇaḥ | pa̱ro marta̍ḥ pa̱raḥ śvā
||24.5||यो अर्व॑न्तं॒ जिघा॑सति॒ तम॒भ्य॑मीति॒ वरु॑णः । प॒रो मर्तः॑ प॒रः श्वा
a̱gnaye̱ svāhā̱ somā̍ya̱ svāhā̱pāṃ modā̍ya̱ svāhā̍ savi̱tre svāhā̍ vā̱yave̱ svāhā̱ viṣṇa̍ve̱ svāhā̍ |
indrā̍ya̱ svāhā̱ bṛha̱spata̍ye̱ svāhā̍ mi̱trāya̱ svāhā̱ varu̍ṇāya̱ svāhā̍
||24.6||अ॒ग्नये॒ स्वाहा॒ सोमा॑य॒ स्वाहा॒पां मोदा॑य॒ स्वाहा॑ सवि॒त्रे स्वाहा॑ वा॒यवे॒ स्वाहा॒ विष्ण॑वे॒ स्वाहा॑ ।
इन्द्रा॑य॒ स्वाहा॒ बृह॒स्पत॑ये॒ स्वाहा॑ मि॒त्राय॒ स्वाहा॒ वरु॑णाय॒ स्वाहा॑
hi̱ṅkā̱rāya̱ svāhā̱ hiṅkṛ̍tāya̱ svāhā̱ kranda̍te̱ svāhā̍vakra̱ndāya̱ svāhā̍ |
protha̍te̱ svāhā̍ prapro̱thāya̱ svāhā̍ ga̱ndhāya̱ svāhā̍ ghrā̱tāya̱ svāhā̍
||24.7||हि॒ङ्का॒राय॒ स्वाहा॒ हिङ्कृ॑ताय॒ स्वाहा॒ क्रन्द॑ते॒ स्वाहा॑वक्र॒न्दाय॒ स्वाहा॑ ।
प्रोथ॑ते॒ स्वाहा॑ प्रप्रो॒थाय॒ स्वाहा॑ ग॒न्धाय॒ स्वाहा॑ घ्रा॒ताय॒ स्वाहा॑
nivi̍ṣṭāya̱ svāhopa̍viya̱ svāhā̱ saṃdi̍tāya̱ svāhā̱ valga̍te̱ svāhā̍ |
āsī̍nāya̱ svāhā̱ śayā̍nāya̱ svāhā̱ svapa̍te̱ svāhā̱ jāgra̍te̱ svāhā̍
||24.8||निवि॑ष्टाय॒ स्वाहोप॑विय॒ स्वाहा॒ संदि॑ताय॒ स्वाहा॒ वल्ग॑ते॒ स्वाहा॑ ।
आसी॑नाय॒ स्वाहा॒ शया॑नाय॒ स्वाहा॒ स्वप॑ते॒ स्वाहा॒ जाग्र॑ते॒ स्वाहा॑
kūja̍te̱ svāhā̱ prabu̍ddhāya̱ svāhā̍ vi̱jṛmbha̍māṇāya̱ svāhā̱ vicṛ̍tāya̱ svāhā̍ |
sahā̍nāya̱ svāhopa̍sthitāya̱ svāhāya̍nāya̱ svāhā̱ prāya̍ṇāya̱ svāhā̍
||24.9||कूज॑ते॒ स्वाहा॒ प्रबु॑द्धाय॒ स्वाहा॑ वि॒जृम्भ॑माणाय॒ स्वाहा॒ विचृ॑ताय॒ स्वाहा॑ ।
सहा॑नाय॒ स्वाहोप॑स्थिताय॒ स्वाहाय॑नाय॒ स्वाहा॒ प्राय॑णाय॒ स्वाहा॑
ya̱te svāhā̱ dhāva̍te̱ svāho̍ddrā̱vāya̱ svāhoddru̍tāya̱ svāhā̍ |
śūkā̱rāya̱ svāhā̱ śūkṛ̍tāya̱ svāhā̱ niṣa̍ṇṇāya̱ svāhotthi̍tāya̱ svāhā̍
||24.10||य॒ते स्वाहा॒ धाव॑ते॒ स्वाहो॑द्द्रा॒वाय॒ स्वाहोद्द्रु॑ताय॒ स्वाहा॑ ।
शूका॒राय॒ स्वाहा॒ शूकृ॑ताय॒ स्वाहा॒ निष॑ण्णाय॒ स्वाहोत्थि॑ताय॒ स्वाहा॑
ja̱vāya̱ svāhā̱ balā̍ya̱ svāhā̍ vi̱varta̍mānāya̱ svāhā̱ vivṛ̍ttāya̱ svāhā̍ |
vi̱dhūnvā̱nāya̱ svāhā̱ vidhū̍tāya̱ svāhā̱ śuśrū̍ṣamāṇāya̱ svāhā̍ śṛṇva̱te svāhā̍
||24.11||ज॒वाय॒ स्वाहा॒ बला॑य॒ स्वाहा॑ वि॒वर्त॑मानाय॒ स्वाहा॒ विवृ॑त्ताय॒ स्वाहा॑ ।
वि॒धून्वा॒नाय॒ स्वाहा॒ विधू॑ताय॒ स्वाहा॒ शुश्रू॑षमाणाय॒ स्वाहा॑ शृण्व॒ते स्वाहा॑
īkṣa̍māṇāya̱ svāhe̍kṣi̱tāya̱ svāhā̱ vī̍kṣitāya̱ svāhā̍ nime̱ṣāya̱ svāhā̍ |
yadatti̱ tasmai̱ svāhā̱ yatpiba̍ti̱ tasmai̱ svāhā̱ yanmūtra̍ṃ ka̱roti̱ tasmai̱ svāhā̍
kurva̱te svāhā̍ kṛ̱tāya̱ svāhā̍
||24.12||ईक्ष॑माणाय॒ स्वाहे॑क्षि॒ताय॒ स्वाहा॒ वी॑क्षिताय॒ स्वाहा॑ निमे॒षाय॒ स्वाहा॑ ।
यदत्ति॒ तस्मै॒ स्वाहा॒ यत्पिब॑ति॒ तस्मै॒ स्वाहा॒ यन्मूत्रं॑ क॒रोति॒ तस्मै॒ स्वाहा॑
कुर्व॒ते स्वाहा॑ कृ॒ताय॒ स्वाहा॑
tatsa̍vi̱turvare̍ṇya̱ṃ bhargo̍ de̱vasya̍ dhīmahi | dhiyo̱ yo na̍ḥ praco̱dayā̍t
||24.13||तत्स॑वि॒तुर्वरे॑ण्यं॒ भर्गो॑ दे॒वस्य॑ धीमहि । धियो॒ यो नः॑ प्रचो॒दया॑त्
hira̍ṇyapāṇimū̱taye̍ savi̱tāra̱mupa̍ hvaye | sa cettā̍ de̱vatā̍ pa̱dam
||24.14||हिर॑ण्यपाणिमू॒तये॑ सवि॒तार॒मुप॑ ह्वये । स चेत्ता॑ दे॒वता॑ प॒दम्
de̱vasya̱ ceta̍to ma̱hīṃ pra sa̍vi̱turha̍vāmahe | su̱ma̱ti sa̱tyarā̍dhasam
||24.15||दे॒वस्य॒ चेत॑तो म॒हीं प्र स॑वि॒तुर्ह॑वामहे । सु॒म॒ति स॒त्यरा॑धसम्
su̱ṣṭu̱ti su̍matī̱vṛdho̍ rā̱ti sa̍vi̱turī̍mahe | pra de̱vāya̍ matī̱vide̍
||24.16||सु॒ष्टु॒ति सु॑मती॒वृधो॑ रा॒ति स॑वि॒तुरी॑महे । प्र दे॒वाय॑ मती॒विदे॑
rā̱ti satpa̍tiṃ ma̱he sa̍vi̱tāra̱mupa̍ hvaye | ā̱sa̱vaṃ de̱vavī̍taye
||24.17||रा॒ति सत्प॑तिं म॒हे स॑वि॒तार॒मुप॑ ह्वये । आ॒स॒वं दे॒ववी॑तये
de̱vasya̍ savi̱turma̱timā̍sa̱vaṃ vi̱śvade̍vyam | dhi̱yā bhaga̍ṃ manāmahe
||24.18||दे॒वस्य॑ सवि॒तुर्म॒तिमा॑स॒वं वि॒श्वदे॑व्यम् । धि॒या भगं॑ मनामहे
a̱gni stome̍na bodhaya samidhā̱no ama̍rtyam | ha̱vyā de̱veṣu̍ no dadhat
||24.19||अ॒ग्नि स्तोमे॑न बोधय समिधा॒नो अम॑र्त्यम् । ह॒व्या दे॒वेषु॑ नो दधत्
sa ha̍vya̱vāl̤ama̍rtya u̱śigdū̱taścano̍hitaḥ | a̱gnirdhi̱yā samṛ̍ṇvati
||24.20||स ह॑व्य॒वाळम॑र्त्य उ॒शिग्दू॒तश्चनो॑हितः । अ॒ग्निर्धि॒या समृ॑ण्वति
taṃ tvā̍ ghṛtasna īmahe̱ citra̍bhāno sva̱rvida̍m | devām̐2 ā vī̱taye̍ vahe
||24.21||तं त्वा॑ घृतस्न ईमहे॒ चित्र॑भानो स्व॒र्विद॑म् । देवाँ२ आ वी॒तये॑ वहे
a̱gniṃ dū̱taṃ pu̱ro da̍dhe havya̱vāha̱mupa̍ bruve | de̱vām̐2 ā sā̍dayādi̱ha
||24.22||अ॒ग्निं दू॒तं पु॒रो द॑धे हव्य॒वाह॒मुप॑ ब्रुवे । दे॒वाँ२ आ सा॑दयादि॒ह
ajī̍jano̱ hi pa̍vamāna̱ sūrya̍ṃ vi̱dhāre̱ śakma̍nā̱ paya̍ḥ | gojī̍rayā̱ raha̍māṇa̱ḥ pura̍ndhyā
||24.23||अजी॑जनो॒ हि प॑वमान॒ सूर्यं॑ वि॒धारे॒ शक्म॑ना॒ पयः॑ । गोजी॑रया॒ रह॑माणः॒ पुर॑न्ध्या
vi̱bhūrmā̱trā pra̱bhūḥ pi̱trāśvo̍'si̱ hayo̱'syatyo̍'si̱ mayo̱'syarvā̍si̱ sapti̍rasi vā̱jya̍si̱ vṛṣā̍si nṛ̱maṇā̍ asi |
yayu̱rnāmā̍si̱ śiśu̱rnāmā̍syādi̱tyānā̱ṃ patvānvi̍hi
||24.24||वि॒भूर्मा॒त्रा प्र॒भूः पि॒त्राश्वो॑ऽसि॒ हयो॒ऽस्यत्यो॑ऽसि॒ मयो॒ऽस्यर्वा॑सि॒ सप्ति॑रसि वा॒ज्य॑सि॒ वृषा॑सि नृ॒मणा॑ असि ।
ययु॒र्नामा॑सि॒ शिशु॒र्नामा॑स्यादि॒त्यानां॒ पत्वान्वि॑हि
devā̍ āśāpālā e̱taṃ de̱vebhyo'śva̱ṃ medhā̍ya̱ prokṣi̍ta rakṣat |
i̱ha ranti̍ri̱ha ra̍matāmi̱ha dhṛti̍ri̱ha svadhṛ̍ti̱ḥ svāhā̍
||24.25||देवा॑ आशापाला ए॒तं दे॒वेभ्योऽश्वं॒ मेधा॑य॒ प्रोक्षि॑त रक्षत् ।
इ॒ह रन्ति॑रि॒ह र॑मतामि॒ह धृति॑रि॒ह स्वधृ॑तिः॒ स्वाहा॑
kāya̱ svāhā̱ kasmai̱ svāhā̍ kata̱masmai̱ svāhā̍ |
svāhā̱dhimādhī̍tāya̱ svāhā̱ mana̍ḥ pra̱jāpa̍taye̱ svāhā̍ ci̱ttaṃ vijñā̍tāya
||24.26||काय॒ स्वाहा॒ कस्मै॒ स्वाहा॑ कत॒मस्मै॒ स्वाहा॑ ।
स्वाहा॒धिमाधी॑ताय॒ स्वाहा॒ मनः॑ प्र॒जाप॑तये॒ स्वाहा॑ चि॒त्तं विज्ञा॑ताय
adi̍tyai̱ svāhādi̍tyai ma̱hyai svāhādi̍tyai sumṛl̤ī̱kāyai̱ svāhā̍ |
sara̍svatyai̱ svāhā̱ sara̍svatyai pāva̱kāyai̱ svāhā̱ sara̍svatyai bṛhatyai̱ svāhā̍
||24.27||अदि॑त्यै॒ स्वाहादि॑त्यै म॒ह्यै स्वाहादि॑त्यै सुमृळी॒कायै॒ स्वाहा॑ ।
सर॑स्वत्यै॒ स्वाहा॒ सर॑स्वत्यै पाव॒कायै॒ स्वाहा॒ सर॑स्वत्यै बृहत्यै॒ स्वाहा॑
pū̱ṣṇe svāhā̍ pū̱ṣṇe pra̍pa̱thyā̍ya̱ svāhā̍ pū̱ṣṇe na̱randhi̍ṣāya̱ svāhā̍ |
tvaṣṭre̱ svāhā̱ tvaṣṭre̍ tu̱rīpā̍ya̱ svāhā̱ tvaṣṭre̍ puru̱rūpā̍ya̱ svāhā̍ |
viṣṇa̍ve̱ svāhā̱ viṣṇa̍ve nibhūya̱pāya̱ svāhā̱ viṣṇa̍ve śipivi̱ṣṭāya̱ svāhā̍
||24.28||पू॒ष्णे स्वाहा॑ पू॒ष्णे प्र॑प॒थ्या॑य॒ स्वाहा॑ पू॒ष्णे न॒रन्धि॑षाय॒ स्वाहा॑ ।
त्वष्ट्रे॒ स्वाहा॒ त्वष्ट्रे॑ तु॒रीपा॑य॒ स्वाहा॒ त्वष्ट्रे॑ पुरु॒रूपा॑य॒ स्वाहा॑ ।
विष्ण॑वे॒ स्वाहा॒ विष्ण॑वे निभूय॒पाय॒ स्वाहा॒ विष्ण॑वे शिपिवि॒ष्टाय॒ स्वाहा॑
viśvo̍ de̱vasya̍ ne̱turmarto̍ vurīta sa̱khyam |
viśvo̍ rā̱ya i̍ṣudhyati dyu̱mnaṃ vṛ̍ṇīta pu̱ṣyase̱ svāhā̍
||24.29||विश्वो॑ दे॒वस्य॑ ने॒तुर्मर्तो॑ वुरीत स॒ख्यम् ।
विश्वो॑ रा॒य इ॑षुध्यति द्यु॒म्नं वृ॑णीत पु॒ष्यसे॒ स्वाहा॑
ā brahma̍n brāhma̱ṇo bra̍hmavarca̱sī jā̍yatā̱mā rā̱ṣṭre rā̍ja̱nya̍ḥ |
śūra̍ iṣa̱vyo̍'tivyā̱dhī ma̍hāra̱tho jā̍yatām
||24.30||आ ब्रह्म॑न् ब्राह्म॒णो ब्र॑ह्मवर्च॒सी जा॑यता॒मा रा॒ष्ट्रे रा॑ज॒न्यः॑ ।
शूर॑ इष॒व्यो॑ऽतिव्या॒धी म॑हार॒थो जा॑यताम्
dogdhrī̍ dhe̱nurvol̤ahā̍na̱ḍvānā̱śuḥ sapti̱ḥ pura̍ṃdhi̱ryoṣā̍ |
ji̱ṣṇū ra̍the̱ṣṭhāḥ sa̱bheyo̱ yuvāsya yaja̍mānasya vī̱ro jā̍yatām
||24.31||दोग्ध्री॑ धे॒नुर्वोळहा॑न॒ड्वाना॒शुः सप्तिः॒ पुरं॑धि॒र्योषा॑ ।
जि॒ष्णू र॑थे॒ष्ठाः स॒भेयो॒ युवास्य यज॑मानस्य वी॒रो जा॑यताम्
ni̱kā̱meni̍kāme naḥ pa̱rjanyo̍ varṣatu̱ pala̍vatyo na̱ oṣa̍dhayaḥ pacyantām |
yo̱ga̱kṣe̱mo na̍ḥ kalpatām
||24.32||नि॒का॒मेनि॑कामे नः प॒र्जन्यो॑ वर्षतु॒ पल॑वत्यो न॒ ओष॑धयः पच्यन्ताम् ।
यो॒ग॒क्षे॒मो नः॑ कल्पताम्
prā̱ṇāya̱ svāhā̍pā̱nāya̱ svāhā̍ vyā̱nāya̱ svāhā̍ |
cakṣu̍ṣe̱ svāhā̱ śrotrā̍ya̱ svāhā̍ vā̱ce svāhā̱ mana̍se̱ svāhā̍
||24.33||प्रा॒णाय॒ स्वाहा॑पा॒नाय॒ स्वाहा॑ व्या॒नाय॒ स्वाहा॑ ।
चक्षु॑षे॒ स्वाहा॒ श्रोत्रा॑य॒ स्वाहा॑ वा॒चे स्वाहा॒ मन॑से॒ स्वाहा॑
prācyai̍ di̱śe svāhā̱rvācyai̍ di̱śe svāhā̱ dakṣi̍ṇāyai di̱śe svāhā̱rvācyai̍ di̱śe svāhā̍ |
pra̱tīcyai̍ di̱śe svāhā̱rvācyai̍ di̱śe svāhodī̍cyai di̱śe svāhā̱rvācyai̍ di̱śe svāhā̍ |
ū̱rdhvāyai̍ di̱śe svāhā̱rvācyai̍ di̱śe svāhāvā̍cyai di̱śe svāhā̱rvācyai̍ di̱śe svāhā̍
||24.34||प्राच्यै॑ दि॒शे स्वाहा॒र्वाच्यै॑ दि॒शे स्वाहा॒ दक्षि॑णायै दि॒शे स्वाहा॒र्वाच्यै॑ दि॒शे स्वाहा॑ ।
प्र॒तीच्यै॑ दि॒शे स्वाहा॒र्वाच्यै॑ दि॒शे स्वाहोदी॑च्यै दि॒शे स्वाहा॒र्वाच्यै॑ दि॒शे स्वाहा॑ ।
ऊ॒र्ध्वायै॑ दि॒शे स्वाहा॒र्वाच्यै॑ दि॒शे स्वाहावा॑च्यै दि॒शे स्वाहा॒र्वाच्यै॑ दि॒शे स्वाहा॑
a̱dbhyaḥ svāhā̍ vā̱rbhyaḥ svāho̍da̱kāya̱ svāhā̱ tiṣṭha̍ntībhya̱ḥ svāhā̱
srava̍ntībhya̱ḥ svāhā̱ syanda̍mānābhya̱ḥ svāhā̍|
kūpyā̍bhya̱ḥ svāhā̱ sūdyā̍bhya̱ḥ svāhā̱ dhāryā̍bhya̱ḥ
svāhā̍rṇa̱vāya̱ svāhā̍ samu̱drāya̱ svāhā̍ sari̱rāya̱ svāhā̍
||24.35||अ॒द्भ्यः स्वाहा॑ वा॒र्भ्यः स्वाहो॑द॒काय॒ स्वाहा॒ तिष्ठ॑न्तीभ्यः॒ स्वाहा॒
स्रव॑न्तीभ्यः॒ स्वाहा॒ स्यन्द॑मानाभ्यः॒ स्वाहा॑।
कूप्या॑भ्यः॒ स्वाहा॒ सूद्या॑भ्यः॒ स्वाहा॒ धार्या॑भ्यः॒
स्वाहा॑र्ण॒वाय॒ स्वाहा॑ समु॒द्राय॒ स्वाहा॑ सरि॒राय॒ स्वाहा॑
vātā̍ya̱ svāhā̍ dhū̱māya̱ svāhā̱bhrāya̱ svāhā̍ me̱ghāya̱ svāhā̍ vi̱dyota̍mānāya̱ svāhā̍ sta̱naya̍te̱ svāhā̍ |
a̱va̱sphūrja̍te̱ svāhā̱ varṣa̍te̱ svāhā̍va̱varṣa̍te̱ svāho̱graṃ varṣa̍te̱ svāhā̍
śī̱ghraṃ varṣa̍te̱ svāho̍dgṛhṇa̱te svāhodgṛ̍hītāya̱ svāhā̍ | pra̱śna̱te svāhā̍ śīkāya̱te svāhā̱ pruṣvā̍bhya̱ḥ svāhā̍
hrā̱dunī̍bhya̱ḥ svāhā̍ nīhā̱rāya̱ svāhā̍
||24.36||वाता॑य॒ स्वाहा॑ धू॒माय॒ स्वाहा॒भ्राय॒ स्वाहा॑ मे॒घाय॒ स्वाहा॑ वि॒द्योत॑मानाय॒ स्वाहा॑ स्त॒नय॑ते॒ स्वाहा॑ ।
अ॒व॒स्फूर्ज॑ते॒ स्वाहा॒ वर्ष॑ते॒ स्वाहा॑व॒वर्ष॑ते॒ स्वाहो॒ग्रं वर्ष॑ते॒ स्वाहा॑
शी॒घ्रं वर्ष॑ते॒ स्वाहो॑द्गृह्ण॒ते स्वाहोद्गृ॑हीताय॒ स्वाहा॑ । प्र॒श्न॒ते स्वाहा॑ शीकाय॒ते स्वाहा॒ प्रुष्वा॑भ्यः॒ स्वाहा॑
ह्रा॒दुनी॑भ्यः॒ स्वाहा॑ नीहा॒राय॒ स्वाहा॑
a̱gnaye̱ svāhā̱ somā̍ya̱ svāhendrā̍ya̱ svāhā̍ pṛthi̱vyai svāhā̱ntari̍kṣāya̱ svāhā̍ |
di̱ve svāhā̍ di̱gbhyaḥ svāhāśā̍bhya̱ḥ svāho̱rvyai̍ di̱śe svāhā̱rvācyai̍ di̱śe svāhā̍
||24.37||अ॒ग्नये॒ स्वाहा॒ सोमा॑य॒ स्वाहेन्द्रा॑य॒ स्वाहा॑ पृथि॒व्यै स्वाहा॒न्तरि॑क्षाय॒ स्वाहा॑ ।
दि॒वे स्वाहा॑ दि॒ग्भ्यः स्वाहाशा॑भ्यः॒ स्वाहो॒र्व्यै॑ दि॒शे स्वाहा॒र्वाच्यै॑ दि॒शे स्वाहा॑
nakṣa̍trebhya̱ḥ svāhā̍ nakṣa̱triye̍bhya̱ḥ svāhā̍horā̱trebhya̱ḥ svāhā̍rdhamā̱sebhya̱ḥ svāhā̍ |
māse̍bhya̱ḥ svāhā̍ ṛ̱tubhya̱ḥ svāhā̍rta̱vebhya̱ḥ svāhā̍
saṃvatsa̱rāya̱ svāhā̱ dyāvā̍pṛthi̱vībhyā̱ svāhā̍
||24.38||नक्ष॑त्रेभ्यः॒ स्वाहा॑ नक्ष॒त्रिये॑भ्यः॒ स्वाहा॑होरा॒त्रेभ्यः॒ स्वाहा॑र्धमा॒सेभ्यः॒ स्वाहा॑ ।
मासे॑भ्यः॒ स्वाहा॑ ऋ॒तुभ्यः॒ स्वाहा॑र्त॒वेभ्यः॒ स्वाहा॑
संवत्स॒राय॒ स्वाहा॒ द्यावा॑पृथि॒वीभ्या॒ स्वाहा॑
ca̱ndrāya̱ svāhā̱ sūryā̍ya̱ svāhā̍ ra̱śmibhya̱ḥ svāhā̱ vasu̍bhya̱ḥ svāhā̍ |
ru̱drebhya̱ḥ svāhā̍di̱tyebhya̱ḥ svāhā̍ ma̱rudbhya̱ḥ svāhā̱ viśve̍bhyo de̱vebhya̱ḥ svāhā̍
||24.39||च॒न्द्राय॒ स्वाहा॒ सूर्या॑य॒ स्वाहा॑ र॒श्मिभ्यः॒ स्वाहा॒ वसु॑भ्यः॒ स्वाहा॑ ।
रु॒द्रेभ्यः॒ स्वाहा॑दि॒त्येभ्यः॒ स्वाहा॑ म॒रुद्भ्यः॒ स्वाहा॒ विश्वे॑भ्यो दे॒वेभ्यः॒ स्वाहा॑
mūle̍bhya̱ḥ svāhā̱ śākhā̍bhya̱ḥ svāhā̱ vana̱spati̍bhya̱ḥ svāhā̍ |
puṣpe̍bhya̱ḥ svāhā̱ phale̍bhya̱ḥ svāhauṣa̍dhībhya̱ḥ svāhā̍
||24.40||मूले॑भ्यः॒ स्वाहा॒ शाखा॑भ्यः॒ स्वाहा॒ वन॒स्पति॑भ्यः॒ स्वाहा॑ ।
पुष्पे॑भ्यः॒ स्वाहा॒ फले॑भ्यः॒ स्वाहौष॑धीभ्यः॒ स्वाहा॑
pṛ̱thi̱vyai svāhā̱ntari̍kṣāya̱ svāhā̍ di̱ve svāhā̱ sūryā̍ya̱ svāhā̍ |
ca̱ndrāya̱ svāhā̱ nakṣa̍trebhya̱ḥ svāhā̱dbhyaḥ svāhau̍ṣadhībhya̱ḥ svāhā̍ |
vana̱spati̍bhya̱ḥ svāhā̍ paripla̱vebhya̱ḥ svāhā̍ carāca̱rebhya̱ḥ svāhā̍ sarīsṛ̱pebhya̱ḥ svāhā̍
||24.41||पृ॒थि॒व्यै स्वाहा॒न्तरि॑क्षाय॒ स्वाहा॑ दि॒वे स्वाहा॒ सूर्या॑य॒ स्वाहा॑ ।
च॒न्द्राय॒ स्वाहा॒ नक्ष॑त्रेभ्यः॒ स्वाहा॒द्भ्यः स्वाहौ॑षधीभ्यः॒ स्वाहा॑ ।
वन॒स्पति॑भ्यः॒ स्वाहा॑ परिप्ल॒वेभ्यः॒ स्वाहा॑ चराच॒रेभ्यः॒ स्वाहा॑ सरीसृ॒पेभ्यः॒ स्वाहा॑
asa̍ve̱ svāhā̱ vasa̍ve̱ svāhā̍ vi̱bhuve̱ svāhā̱ viva̍svate̱ svāhā̍ |
ga̱ṇa̱śriye̱ svāhā̍ ga̱ṇapa̍taye̱ svāhā̍bhi̱bhuve̱ svāhādhi̍pataye̱ svāhā̍
||24.42||अस॑वे॒ स्वाहा॒ वस॑वे॒ स्वाहा॑ वि॒भुवे॒ स्वाहा॒ विव॑स्वते॒ स्वाहा॑ ।
ग॒ण॒श्रिये॒ स्वाहा॑ ग॒णप॑तये॒ स्वाहा॑भि॒भुवे॒ स्वाहाधि॑पतये॒ स्वाहा॑
śū̱ṣāya̱ svāhā̍ sasa̱rpāya̱ svāhā̍ ca̱ndrāya̱ svāhā̱ jyoti̍ṣe̱ svāhā̍ |
ma̱li̱mlu̱cāya̱ svāhā̱ divā̍ pa̱taya̍te̱ svāhā̍
||24.43||शू॒षाय॒ स्वाहा॑ सस॒र्पाय॒ स्वाहा॑ च॒न्द्राय॒ स्वाहा॒ ज्योति॑षे॒ स्वाहा॑ ।
म॒लि॒म्लु॒चाय॒ स्वाहा॒ दिवा॑ प॒तय॑ते॒ स्वाहा॑
madha̍ve̱ svāhā̱ mādha̍vāya̱ svāhā̍ śu̱krāya̱ svāhā̱ śuca̍ye̱ svāhā̍ |
nabha̍se̱ svāhā̍ nabha̱syā̍ya̱ svāhe̱ṣāya̱ svāho̱rjāya̱ svāhā̍ |
saha̍se̱ svāhā̍ saha̱syā̍ya̱ svāhā̱ tapa̍se̱ svāhā̍ tapa̱syā̍ya̱ svāhā̍hasaspa̱taye̱ svāhā̍
||24.44||मध॑वे॒ स्वाहा॒ माध॑वाय॒ स्वाहा॑ शु॒क्राय॒ स्वाहा॒ शुच॑ये॒ स्वाहा॑ ।
नभ॑से॒ स्वाहा॑ नभ॒स्या॑य॒ स्वाहे॒षाय॒ स्वाहो॒र्जाय॒ स्वाहा॑ ।
सह॑से॒ स्वाहा॑ सह॒स्या॑य॒ स्वाहा॒ तप॑से॒ स्वाहा॑ तप॒स्या॑य॒ स्वाहा॑हसस्प॒तये॒ स्वाहा॑
vājā̍ya̱ svāhā̍ prasa̱vāya̱ svāhā̍pi̱jāya̱ svāhā̱ krata̍ve̱ svāhā̍ |
sva̱ḥ svāhā̍ mū̱rdhne svāhā̍ vyaśnu̱vine̱ svāhā̍ |
antyā̍ya̱ svāhāntyā̍ya̱nāya̱ svāhā̍ bhauva̱nāya̱ svāhā̱
bhuva̍nasya̱ pata̍ye̱ svāhādhi̍pataye̱ svāhā̍ pra̱jāpa̍taye̱ svāhā̍
||24.45||वाजा॑य॒ स्वाहा॑ प्रस॒वाय॒ स्वाहा॑पि॒जाय॒ स्वाहा॒ क्रत॑वे॒ स्वाहा॑ ।
स्वः॒ स्वाहा॑ मू॒र्ध्ने स्वाहा॑ व्यश्नु॒विने॒ स्वाहा॑ ।
अन्त्या॑य॒ स्वाहान्त्या॑य॒नाय॒ स्वाहा॑ भौव॒नाय॒ स्वाहा॒
भुव॑नस्य॒ पत॑ये॒ स्वाहाधि॑पतये॒ स्वाहा॑ प्र॒जाप॑तये॒ स्वाहा॑
āyu̍rya̱jñena̍ kalpatā̱ svāhā̍ prā̱ṇo ya̱jñena̍ kalpatā̱ svāhā̍pā̱no ya̱jñena̍ kalpatā̱ svāhā̍
vyā̱no ya̱jñena̍ kalpatā̱ svāhā̍ |
u̱dā̱no ya̱jñena̍ kalpatā̱ svāhā̍ samā̱no ya̱jñena̍ kalpatā̱ svāhā̱ cakṣu̍rya̱jñena̍ kalpatā̱ svāhā̱
śrotra̍ṃ ya̱jñena̍ kalpatā̱ svāhā̍ |
vāgya̱jñena̍ kalpatā̱ svāhā̱ mano̍ ya̱jñena̍ kalpatā̱ svāhā̱tmā ya̱jñena̍ kalpatā̱ svāhā̍
pṛ̱ṣṭhaṃ ya̱jñena̍ kalpatā̱ svāhā̍ |
brahma̍ ya̱jñena̍ kalpatā̱ svāhā̍ ya̱jño ya̱jñena̍ kalpatā̱ svāhā̱ jyoti̍rya̱jñena̍ kalpatā̱ svāhā̱
sva̍rya̱jñena̍ kalpatā̱ svāhā̍
||24.46||आयु॑र्य॒ज्ञेन॑ कल्पता॒ स्वाहा॑ प्रा॒णो य॒ज्ञेन॑ कल्पता॒ स्वाहा॑पा॒नो य॒ज्ञेन॑ कल्पता॒ स्वाहा॑
व्या॒नो य॒ज्ञेन॑ कल्पता॒ स्वाहा॑ ।
उ॒दा॒नो य॒ज्ञेन॑ कल्पता॒ स्वाहा॑ समा॒नो य॒ज्ञेन॑ कल्पता॒ स्वाहा॒ चक्षु॑र्य॒ज्ञेन॑ कल्पता॒ स्वाहा॒
श्रोत्रं॑ य॒ज्ञेन॑ कल्पता॒ स्वाहा॑ ।
वाग्य॒ज्ञेन॑ कल्पता॒ स्वाहा॒ मनो॑ य॒ज्ञेन॑ कल्पता॒ स्वाहा॒त्मा य॒ज्ञेन॑ कल्पता॒ स्वाहा॑
पृ॒ष्ठं य॒ज्ञेन॑ कल्पता॒ स्वाहा॑ ।
ब्रह्म॑ य॒ज्ञेन॑ कल्पता॒ स्वाहा॑ य॒ज्ञो य॒ज्ञेन॑ कल्पता॒ स्वाहा॒ ज्योति॑र्य॒ज्ञेन॑ कल्पता॒ स्वाहा॒
स्व॑र्य॒ज्ञेन॑ कल्पता॒ स्वाहा॑
eka̍smai̱ svāhā̱ dvābhyā̱ svāhā̍ śa̱tāya̱ svāhai̍kaśatāya̱ svāhā̍ |
vyu̍ṣṭyai̱ svāhā̍ sva̱rgāya̱ svāhā̍
||24.47||एक॑स्मै॒ स्वाहा॒ द्वाभ्या॒ स्वाहा॑ श॒ताय॒ स्वाहै॑कशताय॒ स्वाहा॑ ।
व्यु॑ष्ट्यै॒ स्वाहा॑ स्व॒र्गाय॒ स्वाहा॑