atha dvādaśo'dhyāyaḥ |
yu̱ñjā̱naḥ pra̍tha̱maṃ mana̍sta̱tvāya̍ savi̱tā dhiya̍ḥ | a̱gnerjyoti̍rni̱cāyya̍ pṛthi̱vyā adhyābha̍rat
||12.1||yu̱ktena̱ mana̍sā va̱yaṃ de̱vasya̍ savi̱tuḥ sa̱ve | sva̱rgeyā̍ya̱ śaktyā̍
||12.2||yu̱ktvāya̍ savi̱tā de̱vāntsva̍rya̱to dhi̱yā diva̍m |
bṛ̱hajjyoti̍ḥ kariṣya̱taḥ sa̍vi̱tā prasu̍vāti̱ tān
||12.3||yu̱ñjate̱ mana̍ u̱ta yu̍ñjate̱ dhiyo̱ viprā̱ vipra̍sya bṛha̱to vi̍pa̱ścita̍ḥ |
vi hotrā̍ dadhe vayunā̱ videka̱ inma̱hī de̱vasya̍ savi̱tuḥ pari̍ṣṭutiḥ
||12.4||yu̱je vā̱ṃ brahma̍ pū̱rvyaṃ namo̍bhi̱rvi śloka̍ etu pa̱thye̍va sū̱reḥ |
śṛ̱ṇvantu̱ viśve̍ a̱mṛta̍sya pu̱trā ā ye dhāmā̍ni di̱vyāni̍ ta̱sthuḥ
||12.5||yasya̍ pra̱yāṇa̱manva̱nya idya̱yurde̱vā de̱vasya̍ mahi̱māna̱moja̍sā |
yaḥ pārthi̍vāni vima̱me sa eta̍śo̱ rajā̍si de̱vaḥ sa̍vi̱tā ma̍hitva̱nā
||12.6||deva̍ savita̱ḥ prasu̍va ya̱jñaṃ prasu̍va ya̱jñapa̍ti̱ṃ bhagā̍ya |
di̱vyo ga̍ndha̱rvaḥ ke̍ta̱pūḥ keta̍ṃ naḥ punātu vā̱caspati̱rvāca̍ṃ naḥ svadatu
||12.7||i̱maṃ no̍ deva savitarya̱jñaṃ praṇa̍ya devā̱vya̍ sakhi̱vida̍ satrā̱jita̍ṃ dhana̱jita̍ sva̱rjita̍m |
ṛ̱cā stoma̱ sama̍rdhaya gāya̱treṇa̍ rathanta̱raṃ bṛ̱hadgā̍ya̱trava̍rtani̱ svāhā̍
||12.8||de̱vasya̍ tvā savi̱tuḥ pra̍sa̱ve̱'śvino̍rbā̱hubhyā̍ṃ pū̱ṣṇo hastā̍bhyām |
āda̍de gāya̱treṇa̱ chanda̍sāṅgira̱svat pṛthi̱vyāḥ sa̱dhasthā̍da̱gniṃ pu̍rī̱ṣya̍maṅgira̱svadābha̍ra | traiṣṭu̍bhena̱ chanda̍sāṅgira̱svat
||12.9||abhri̍rasi̱ nārya̍si̱ tvayā̍ va̱yama̱gni śa̍kema̱ khani̍tum | sa̱dhastha̱ ā jāga̍tena̱ chanda̍sāṅgira̱svat
||12.10||||
hasta̍ ā̱dhāya̍ savi̱tā bibhra̱dabhri̍ hira̱ṇyayī̍m |
a̱gnerjyoti̍rni̱cāyya̍ pṛthi̱vyā adhyābha̍ra̱dānu̍ṣṭubhena̱ chanda̍sāṅgira̱svat
||12.11||pratū̍rtaṃ vāji̱nnādra̍va̱ vari̍ṣṭhā̱manu̍ sa̱ṃvata̍m |
di̱vi te̱ janma̍ para̱mama̱ntari̍kṣe̱ tava̱ nābhi̍ḥ pṛthi̱vyāmadhi̱ yoni̱rit
||12.12||yu̱ñjāthā̱ rāsa̍bhaṃ yu̱vama̱smin yāme̍ vṛṣaṇvasū | a̱gniṃ bhara̍ntamasma̱yum
||12.13||yoge̍yoge ta̱vasta̍ra̱ṃ vāje̍vāje havāmahe | sakhā̍ya̱ indra̍mū̱taye̍
||12.14||pra̱tūrva̱ṃ nehya̍va̱krāma̱nnaśa̍stī ru̱drasya̱ gāṇa̍patyaṃ mayo̱bhūrehi̍ |
u̱rva̱ntari̍kṣa̱ṃ vī̍hi sva̱stiga̍vyūti̱rabha̍yāni kṛ̱ṇvan pū̱ṣṇā sa̱yujā̍ sa̱ha
||12.15||pṛ̱thi̱vyāḥ sa̱dhasthā̍da̱gniṃ pu̍rī̱ṣya̍maṅgira̱svadābha̍ra |
a̱gniṃ pu̍rī̱ṣya̍maṅgira̱svadacche̍mo̱'gniṃ pu̍rī̱ṣya̍maṅgira̱svadbha̍riṣyāmaḥ
||12.16||anva̱gniru̱ṣasā̱magra̍makhya̱danvahā̍ni pratha̱mo jā̱tave̍dāḥ |
anu̱ sūrya̍sya puru̱trā ca̍ ra̱śmīnanu̱ dyāvā̍pṛthi̱vī āta̍tantha
||12.17||ā̱gatya̍ vā̱jyadhvā̍na̱ sarvā̱ mṛdho̱ vidhū̍nute | a̱gni sa̱dhasthe̍ maha̱ti cakṣu̍ṣā̱ nici̍kīṣate
||12.18||ā̱kramya̍ vājinpṛthi̱vīma̱gnimi̍ccha ru̱cā tvam | bhūme̍rvṛ̱tvāya̍ no brūhi̱ yata̱ḥ khane̍ma̱ taṃ va̱yam
||12.19||dyauste̍ pṛ̱ṣṭhaṃ pṛ̍thi̱vī sa̱dhastha̍mā̱tmāntari̍kṣa samu̱dro yoni̍ḥ |
vi̱khyāya̱ cakṣu̍ṣā̱ tvama̱bhi ti̍ṣṭha pṛtanya̱taḥ
||12.20||utkrā̍ma maha̱te saubha̍gāyā̱smādā̱sthānā̍d draviṇo̱dā vā̍jin |
va̱ya syā̍ma suma̱tau pṛ̍thi̱vyā a̱gniṃ khana̍nta u̱pasthe̍ asyāḥ
||12.21||uda̍kramīd draviṇo̱dā vā̱jya̱rvāka̱ḥ sulo̱ka sukṛ̍taṃ pṛthi̱vyām |
tata̍ḥ khanema su̱pratī̍kama̱gni svo̱ ruhā̍ṇā̱ adhi̱ nāka̍mutta̱mam
||12.22||ā tvā̍ jigharmi̱ mana̍sā ghṛ̱tena̍ pratikṣi̱yanta̱ṃ bhuva̍nāni̱ viśvā̍ |
pṛ̱thuṃ ti̍ra̱ścā vaya̍sā bṛ̱hanta̱ṃ vyaci̍ṣṭha̱mannai̍ rabha̱saṃ dṛśā̍nam
||12.23||ā vi̱śvata̍ḥ pra̱tyañca̍ṃ jigharmyara̱kṣasā̱ mana̍sā̱ tajju̍ṣeta |
marya̍śrīḥ spṛha̱yadva̍rṇo a̱gnirnābhi̱mṛśe̍ ta̱nvā̱ jarbhu̍rāṇaḥ
||12.24||pari̱ vāja̍patiḥ ka̱vira̱gnirha̱vyānya̍kramīt | dadha̱dratnā̍ni dā̱śuṣe̍
||12.25||pari̍ tvāgne̱ pura̍ṃ va̱yaṃ vipra̍ sahasya dhīmahi | dhṛ̱ṣadva̍rṇaṃ di̱vedi̍ve bhe̱ttāra̍ṃ bhaṅgu̱rāva̍tām
||12.26||tvama̍gne̱ dyubhi̱stvamā̍śuśu̱kṣaṇi̱stvama̱dbhyastvamaśma̍na̱spari̍ |
tvaṃ vane̍bhya̱stvamoṣa̍dhībhya̱stvaṃ nṛ̱ṇāṃ nṛ̍pate jāyase̱ śuci̍ḥ
||12.27||de̱vasya̍ tvā savi̱tuḥ pra̍sa̱ve̱'śvino̍rbā̱hubhyā̍ṃ pū̱ṣṇo hastā̍bhyām |
pṛ̱thi̱vyāḥ sa̱dhasthā̍da̱gniṃ pu̍rī̱ṣya̍maṅgira̱svat kha̍nāmi |
jyoti̍ṣmantaṃ tvāgne su̱pratī̍ka̱maja̍sreṇa bhā̱nunā̱ dīdya̍tam |
śi̱vaṃ pra̱jābhyo'hi̍santaṃ pṛthi̱vyā sa̱dhasthā̍da̱gniṃ pu̍rī̱ṣya̍maṅgira̱svatkha̍nāmaḥ
||12.28||a̱pāṃ pṛ̱ṣṭhama̍si̱ yoni̍ra̱gneḥ sa̍mu̱drama̱bhita̱ḥ pinva̍mānam |
vardha̍māno ma̱hām̐ ā ca̱ puṣka̍re di̱vo mātra̍yā vari̱mṇā pra̍thasva
||12.29||śarma̍ ca̱ stho varma̍ ca̱ stho'cchi̍dre bahu̱le u̱bhe | vyaca̍svatī̱ saṃva̍sāthāṃ bhṛ̱tama̱gniṃ pu̍rī̱ṣya̍m
||12.30||saṃva̍sāthā sva̱rvidā̍ sa̱mīcī̱ ura̍sā̱ tmanā̍ | a̱gnima̱ntarbha̍ri̱ṣyantī̱ jyoti̍ṣmanta̱maja̍sra̱mit |
pu̱rī̱ṣyo̍'si vi̱śvabha̍rā̱ atha̍rvā tvā pratha̱mo nira̍manthadagne
||12.31||tvāma̍gne̱ puṣka̍rā̱dadhyatha̍rvā̱ nira̍manthata | mū̱rdhnā viśva̍sya vā̱ghata̍ḥ
||12.32||tamu̍ tvā da̱dhyaṅ ṛṣi̍ḥ pu̱tra ī̍dhe̱ atha̍rvaṇaḥ | vṛ̱tra̱haṇa̍ṃ puraṃda̱ram
||12.33||tamu̍ tvā pā̱thyo vṛṣā̱ samī̍dhe dasyu̱hanta̍mam | dha̱na̱ñja̱ya raṇe̍raṇe
||12.34||sīda̍ hota̱ḥ sva u̍ lo̱ke ci̍ki̱tvāntsā̱dayā̍ ya̱jña su̍kṛ̱tasya̱ yonau̍ |
de̱vā̱vīrde̱vānha̱viṣā̍ yajā̱syagne̍ bṛ̱hadyaja̍māne̱ vayo̍ dhāḥ
||12.35||ni hotā̍ hotṛ̱ṣada̍ne̱ vidā̍nastve̱ṣo dī̍di̱vām̐ a̍sadatsu̱dakṣa̍ḥ |
ada̍bdhavratapramati̱rvasi̍ṣṭhaḥ sahasraṃ bha̱raḥ śuci̍jihvo a̱gniḥ
||12.36||sa sī̍dasva ma̱hām̐3 a̍si̱ śoca̍sva deva̱vīta̍maḥ |
vi dhū̱mama̍gne aru̱ṣaṃ mi̍yedhya sṛ̱ja pra̍śasta darśa̱tam
||12.37||a̱po de̱vīrupa̍sṛja̱ madhu̍matīraya̱kṣmāya̍ pra̱jābhya̍ḥ | tāsā̍mā̱sthānā̱dujji̍hatā̱moṣa̍dhayaḥ supippa̱lāḥ
||12.38||saṃ te̍ vā̱yurmā̍ta̱riśvā̍ dadhātūttā̱nāyā̱ hṛda̍ya̱ṃ yadvika̍stam |
yo de̱vānā̱ṃ cara̍si prā̱ṇathe̍na̱ kasmai̍ deva̱ vaṣa̍l̤astu̱ tubhya̍m
||12.39||sujā̍to̱ jyoti̍ṣā sa̱ha śarma̱ varū̍tha̱māsa̍da̱tsva̍ḥ | vāso̍ agne vi̱śvarū̍pa̱ saṃvya̍yasva vibhāvaso
||12.40||udu̍ tiṣṭha svadhva̱rāvā̍ no de̱vyā dhi̱yā |
dṛ̱śe ca̍ bhā̱sā bṛ̍ha̱tā śu̍śu̱kvani̱rāgne̍ yāhi suśa̱stibhi̍ḥ
||12.41||ū̱rdhva ū̱ ṣu ṇa̍ ū̱taye̱ tiṣṭhā̍ de̱vo na sa̍vi̱tā |
ū̱rdhvo vāja̍sya̱ sani̍tā̱ yada̱ñjibhi̍rvā̱ghadbhi̍rvi̱hvayā̍mahe
||12.42||sa jā̱to garbho̍ asi̱ roda̍syo̱ragne̱ cāru̱rvibhṛ̍ta̱ oṣa̍dhīṣu |
ci̱traḥ śiśu̱ḥ pari̱ tamā̍ sya̱ktūnpra mā̱tṛbhyo̱ adhi̱ kani̍kradadgāḥ
||12.43||sthi̱ro bha̍va vī̱ḍva̍ṅga ā̱śurbha̍va vā̱jya̍rvan | pṛ̱thurbha̍va su̱ṣada̱stvama̱gneḥ pu̍rīṣa̱vāha̍ṇaḥ
||12.44||śi̱vo bha̍va pra̱jābhyo̱ mānu̍ṣībhya̱stvama̍ṅgiraḥ |
mā dyāvā̍pṛthi̱vī a̱bhi śo̍cī̱rmāntari̍kṣa̱ṃ mā vana̱spatī̍n
||12.45||prai̍tu vā̱jī kani̍krada̱nnāna̍da̱drāsa̍bha̱spatvā̍ | bhara̍nna̱gniṃ pu̍rī̱ṣya̱ṃ mā pā̱dyāyu̍ṣaḥ pu̱rā
||12.46||vṛṣā̱gniṃ vṛṣa̍ṇa̱ṃ bhara̍nna̱pāṃ garbha̍ samu̱driya̍m | agna̱ āyā̍hi vī̱taye̍ |
ṛ̱ta sa̱tyamṛ̱ta sa̱tyamagniṃ pu̍rī̱ṣya̍maṅgira̱svadbha̍rāmaḥ
||12.47||oṣa̍dhaya̱ḥ prati̍modadhvama̱gnime̱ta śi̱vamā̱yanta̍ma̱bhyatra̍ yu̱ṣmāḥ |
vyasya̱n viśvā̱ ani̍rā̱ amī̍vā ni̱ṣīda̍nno̱ apa̍ durma̱tiṃ ja̍hi
||12.48||oṣa̍dhaya̱ḥ prati̍gṛbhṇīta̱ puṣpa̍vatīḥ supippa̱lāḥ |
a̱yaṃ vo̱ garbha̍ ṛ̱tviya̍ḥ pra̱tna sa̱dhastha̱māsa̍dat
||12.49||vi pāja̍sā pṛ̱thunā̱ śośu̍cāno̱ bādha̍sva dvi̱ṣo ra̱kṣaso̱ amī̍vāḥ |
su̱śarma̍ṇo bṛha̱taḥ śarma̍ṇi syāmagnera̱ha su̱hava̍sya̱ praṇī̍tau
||12.50||āpo̱ hi ṣṭhā ma̍yo̱bhuva̱stā na̍ ū̱rje da̍dhātana | ma̱he raṇā̍ya̱ cakṣa̍se
||12.51||yo va̍ḥ śi̱vata̍mo̱ rasa̱stasya̍ bhājayate̱ha na̍ḥ | u̱śa̱tīri̍va mā̱tara̍ḥ
||12.52||tasmā̱ ara̍ṃ gamāma vo̱ yasya̱ kṣayā̍ya̱ jinva̍tha | āpo̍ ja̱naya̍thā ca naḥ
||12.53||mi̱traḥ sa̱sṛjya̍ pṛthi̱vīṃ bhūmi̍ṃ ca̱ jyoti̍ṣā sa̱ha |
sujā̍taṃ jā̱tave̍dasamaya̱kṣmāya̍ tvā̱ sasṛ̍jāmi pra̱jābhya̍ḥ
||12.54||ru̱drāḥ sa̱sṛjya̍ pṛthi̱vīṃ bṛ̱hajjyoti̱ḥ samī̍dhire | teṣā̍ṃ bhā̱nuraja̍sra̱ icchu̱kro de̱veṣu̍ rocate
||12.55||sasṛ̍ṣṭā̱ṃ vasu̍bhī rudrai̱rdhīrai̍ḥ karma̱ṇyā̱ṃ mṛda̍m |
hastā̍bhyāṃ mṛ̱dvīṃ kṛ̱tvā si̍nīvā̱lī kṛ̍ṇotu̱ tām
||12.56||si̱nī̱vā̱lī su̍kapa̱rdā su̍kurī̱rā svau̍pa̱śā | sā tubhya̍madite ma̱hyokhāṃ da̍dhātu̱ hasta̍yoḥ
||12.57||u̱khāṃ kṛ̍ṇotu̱ śaktyā̍ bā̱hubhyā̱madi̍tirdhi̱yā |
mā̱tā pu̱traṃ yatho̱pasthe̱ sāgniṃ bi̍bhartu̱ garbha̱ ā
||12.58||ma̱khasya̱ śiro̍'si̱ vasa̍vastvā kṛṇvantu gāya̱treṇa̱ chanda̍sāṅgira̱svad dhru̱vāsi̍ pṛthi̱vya̍si |
dhā̱rayā̱ mayi̍ pra̱jā rā̱yaspoṣa̍ṃ gaupa̱tya su̱vīrya̍ sajā̱tānyaja̍mānāya |
ru̱drāstvā̍ kṛṇvantu̱ traiṣṭu̍bhena̱ chanda̍sāṅgira̱svad dhru̱vāsya̱ntari̍kṣamasi |
dhā̱rayā̱ mayi̍ pra̱jā rā̱yaspoṣa̍ṃ gaupa̱tya su̱vīrya̍ sajā̱tānyaja̍mānāya |
ā̱di̱tyāstvā̍ kṛṇvantu̱ jāga̍tena̱ chanda̍sāṅgira̱svad dhru̱vāsi̱ dyaura̍si |
dhā̱rayā̱ mayi̍ pra̱jā rā̱yaspoṣa̍ṃ gaupa̱tya su̱vīrya̍ sajā̱tānyaja̍mānāya |
viśve̍ tvā de̱vā vai̍śvāna̱rāḥ kṛ̍ṇva̱ntvānu̍ṣṭubhena̱ chanda̍sāṅgira̱svad dhru̱vāsi̱ diśo̍'si |
dhā̱rayā̱ mayi̍ pra̱jā rā̱yaspoṣa̍ṃ gaupa̱tya su̱vīrya̍ sajā̱tānyaja̍mānāya |
adi̍tyai̱ rāsnā̱syadi̍tiṣṭe̱ bila̍ṃ gṛbhṇātu
||12.59||kṛ̱tvāya̱ sā ma̱hīmu̱khāṃ mṛ̱nmayī̱ṃ yoni̍ma̱gnaye̍ | pu̱trebhya̱ḥ prāya̍ccha̱dadi̍tiḥ śra̱payā̱niti̍
||12.60||vasa̍vastvā dhūpayantu gāya̱treṇa̱ chanda̍sāṅgira̱svadru̱drāstvā̍ dhūpayantu̱ traiṣṭu̍bhena̱ chanda̍sāṅgira̱svat |
ā̱di̱tyāstvā̍ dhūpayantu̱ jāga̍tena̱ chanda̍sāṅgira̱svadviśve̍ tvā de̱vā vai̍śvāna̱rā
dhū̍paya̱ntvānu̍ṣṭubhena̱ chanda̍sāṅgira̱svat |
indra̍stvā dhūpayatu̱ varu̍ṇastvā dhūpayatu̱ viṣṇu̍stvā dhūpayatu
||12.61||adi̍tiṣṭvā de̱vī vi̱śvade̍vyāvatī | pṛthi̱vyāḥ sa̱dhasthe̍ aṅgira̱svat kha̍natvavaṭ
||12.62||de̱vānā̍ṃ tvā̱ patnī̍rde̱vīrvi̱śvade̍vyāvatīḥ | pṛthi̱vyāḥ sa̱dhasthe̍ aṅgira̱svadda̍dhatūkhe |
dhi̱ṣaṇā̍stvā de̱vīrvi̱śvade̍vyāvatīḥ | pṛthi̱vyāḥ sa̱dhasthe̍ aṅgira̱svada̱bhī̍ndhatāmukhe |
varū̍trīṣṭvā de̱vīrvi̱śvade̍vyāvatīḥ | pṛthi̱vyāḥ sa̱dhasthe̍ aṅgira̱svacchra̍payantūkhe |
gnāstvā̍ de̱vīrvi̱śvade̍vyāvatīḥ | pṛthi̱vyāḥ sa̱dhasthe̍ aṅgira̱svatpa̍cantūkhe |
jana̍ya̱stvācchi̍nnapatrā de̱vīrvi̱śvade̍vyāvatīḥ | pṛthi̱vyāḥ sa̱dhasthe̍ aṅgira̱svatpa̍cantūkhe
||12.63||mi̱trasya̍ carṣaṇī̱dhṛto'vo̍ de̱vasya̍ sāna̱si | dyu̱mnaṃ ci̱traśra̍vastamam
||12.64||de̱vastvā̍ savi̱todva̍patu supā̱ṇiḥ sva̍ṅgu̱riḥ su̍bā̱huru̱ta śaktyā̍ |
avya̍thamānā pṛthi̱vyāmāśā̱ diśa̱ āpṛ̍ṇa
||12.65||u̱tthāya̍ bṛha̱tī bha̱vodu̍ tiṣṭha dhru̱vā tvam | mitrai̱tāṃ ta̍ u̱khāṃ pari̍dadā̱myabhi̍tyā e̱ṣā mā bhe̍di |
vasa̍va̱stvāchṛ̍ndantu gāya̱treṇa̱ chanda̍sāṅgira̱svadru̱drāstvāchṛ̍ndantu̱ traiṣṭu̍bhena̱ chanda̍sāṅgira̱svat |
ā̱di̱tyāstvāchṛ̍ndantu̱ jāga̍tena̱ chanda̍sāṅgira̱svadviśve̍ tvā de̱vā vai̍śvāna̱rā āchṛ̍nda̱ntvānu̍ṣṭubhena̱ chanda̍sāṅgira̱svat
||12.66||ākū̍tima̱gniṃ pra̱yuja̱ svāhā̱ mano̍ me̱dhāma̱gniṃ pra̱yuja̱ svāhā̍ |
ci̱ttaṃ vijñā̍tama̱gniṃ pra̱yuja̱ svāhā̍ vā̱co vidhṛ̍tima̱gniṃ pra̱yuja̱ svāhā̍ |
pra̱jāpa̍taye̱ mana̍ve̱ svāhā̱gnaye̍ vaiśvāna̱rāya̱ svāhā̍
||12.67||viśvo̍ de̱vasya̍ ne̱turmarto̍ vurīta sa̱khyam | viśvo̍ rā̱ya i̍ṣudhyati dyu̱mnaṃ vṛ̍ṇīta pu̱ṣyase̱ svāhā̍ |
||12.68||mā su bhi̍tthā̱ mā su ri̱ṣo'mba̍ dhṛ̱ṣṇu vī̱raya̍sva̱ su | a̱gniśce̱daṃ ka̍riṣyathaḥ
||12.69||dṛha̍sva devi pṛthivi sva̱staya̍ āsu̱rī mā̱yā sva̱dhayā̍ kṛ̱tāsi̍ |
juṣṭa̍ṃ de̱vebhya̍ i̱dama̍stu ha̱vyamari̍ṣṭā̱ tvamudi̍hi ya̱jñe a̱smin
||12.70||drva̍nnaḥ sa̱rpirā̍sutiḥ pra̱tno hotā̱ vare̍ṇyaḥ | saha̍saspu̱tro adbhu̍taḥ
||12.71||para̍syā̱ adhi̍ sa̱ṃvato'va̍rām̐3 a̱bhyāta̍ra | yatrā̱hamasmi̱ tā3 a̍va
||12.72||pa̱ra̱masyā̍ḥ parā̱vato̍ ro̱hida̍śva i̱hāga̍hi | purī̱ṣya̍ḥ purupri̱yo'gne̱ tvaṃ ta̍rā̱ mṛdha̍ḥ
||12.73||yada̍gne̱ kāni̱kāni̍ ci̱dā te̱ dārū̍ṇi da̱dhmasi̍ | sarva̱ṃ tada̍stu te ghṛ̱taṃ tajju̍ṣasva yaviṣṭhya
||12.74||yadattyu̍pa̱jihvi̍kā̱ yadva̱mro a̍ti̱sarpa̍ti | sarva̱ṃ tada̍stu te ghṛ̱taṃ tajju̍ṣasva yaviṣṭhya
||12.75||aha̍raha̱rapra̍yāva̱ṃ bhara̱nto'śvā̍yeva̱ tiṣṭha̍te ghā̱sama̍smai |
rā̱yaspoṣe̍ṇa̱ sami̱ṣā mada̱nto'gne̱ mā te̱ prati̍veśā riṣāma
||12.76||nābhā̍ pṛthi̱vyāḥ sa̍midhā̱ne a̱gnau rā̱yaspoṣā̍ya bṛha̱te ha̍vāmahe |
i̱ramma̱daṃ bṛ̱hadu̍kthya̱ṃ yaja̍tra̱ṃ jetā̍rama̱gniṃ pṛta̍nāsu sāsa̱him
||12.77||yāḥ senā̍ a̱bhītva̍rīrāvyā̱dhinī̱ruga̍ṇā u̱ta |
ye ste̱nā ye ca̱ taska̍rā̱stāste̍ a̱gne'pi̍dadhāmyā̱sye̍
||12.78||daṣṭrā̍bhyāṃ ma̱limlū̱ñjambhyai̱staska̍rām̐3 u̱ta |
hanu̍bhyā ste̱nān bha̍gava̱stā stvaṃ khā̍da̱ sukhā̍ditān
||12.79||ye jane̍ṣu ma̱limla̍va ste̱nāsa̱staska̍rā̱ vane̍ | ye kakṣe̍ṣvaghā̱yava̱stāste̍ dadhāmi̱ jambha̍yoḥ
||12.80||yo a̱smabhya̍marātī̱yādyaśca̍ no̱ dveṣa̍te̱ jana̍ḥ | nindā̱dyo a̱smāndhipsā̍cca̱ sarva̱ṃ taṃ ma̍sma̱sā ku̍ru
||12.81||saśi̍taṃ me̱ brahma̱ saśi̍taṃ vī̱rya̱ṃ bala̍m | saśi̍taṃ kṣa̱traṃ ji̱ṣṇu yasyā̱hamasmi̍ pu̱rohi̍taḥ
||12.82||ude̍ṣāṃ bā̱hū a̍tira̱mudvarco̱ atho̱ bala̍m | kṣi̱ṇomi̱ brahma̍ṇā̱mitrā̱nunna̍yāmi̱ svām̐3 a̱ham
||12.83||anna̍pa̱te'nna̍sya no dehyanamī̱vasya̍ śu̱ṣmiṇa̍ḥ |
pra pra̍ dā̱tāra̍ṃ tāriṣa̱ ūrja̍ṃ no dhehi dvi̱pade̱ catu̍ṣpade | vi̱śvaka̍rmaṇe̱ svāhā̍
||12.84||puna̍stvādi̱tyā ru̱drā vasa̍va̱ḥ sami̍ndhatā̱ṃ puna̍rbra̱hmāṇo̍ vasunītha ya̱jñaiḥ |
ghṛ̱tena̱ tvaṃ ta̱nva̍ṃ vardhayasva sa̱tyāḥ sa̍ntu̱ yaja̍mānasya̱ kāmā̱ḥ svāhā̍
||12.85||