atha saptamo'dhyāyaḥ |
vā̱caspata̍ye pavasva̱ vṛṣṇo̍ a̱śubhyā̱ṃ gabha̍stipūtaḥ |
de̱vo de̱vebhya̍ḥ pavasva̱ yeṣā̍ṃ bhā̱go'si̱ madhu̍matīrna̱ iṣa̍skṛdhi
||7.1||वा॒चस्पत॑ये पवस्व॒ वृष्णो॑ अ॒शुभ्यां॒ गभ॑स्तिपूतः ।
दे॒वो दे॒वेभ्यः॑ पवस्व॒ येषां॑ भा॒गोऽसि॒ मधु॑मतीर्न॒ इष॑स्कृधि
yatte̍ so̱mādā̍bhya̱ṃ nāma̱ jāgṛ̍vi̱ tasmai̍ te soma̱ somā̍ya̱ svāhā̍ |
svāho̱rva̱ntari̍kṣa̱manve̍mi̱ svāṅkṛ̍to'si̱ viśve̍bhya indri̱yebhyo̍ di̱vyebhya̱ḥ pārthi̍vebhyaḥ
||7.2||यत्ते॑ सो॒मादा॑भ्यं॒ नाम॒ जागृ॑वि॒ तस्मै॑ ते सोम॒ सोमा॑य॒ स्वाहा॑ ।
स्वाहो॒र्व॒न्तरि॑क्ष॒मन्वे॑मि॒ स्वाङ्कृ॑तोऽसि॒ विश्वे॑भ्य इन्द्रि॒येभ्यो॑ दि॒व्येभ्यः॒ पार्थि॑वेभ्यः
mana̍stvāṣṭu̱ svāhā̍ tvā svabhava̱ḥ sūryā̍ya | de̱vebhya̍stvā marīci̱pebhyo̱ devā̍śo̱ yasmai̱ tvel̤e̍ ||
tatsa̱tyamu̍pari̱plutā̍ bha̱ṅgena̍ ha̱to̱sau phaṭ | prā̱ṇāya̍ tvā vyā̱nāya̍ tvā
||7.3||मन॑स्त्वाष्टु॒ स्वाहा॑ त्वा स्वभवः॒ सूर्या॑य । दे॒वेभ्य॑स्त्वा मरीचि॒पेभ्यो॒ देवा॑शो॒ यस्मै॒ त्वेळे॑ ॥
तत्स॒त्यमु॑परि॒प्लुता॑ भ॒ङ्गेन॑ ह॒तो॒सौ फट् । प्रा॒णाय॑ त्वा व्या॒नाय॑ त्वा
u̱pa̱yā̱magṛ̍hīto̍'sya̱ntarya̍ccha maghavan pā̱hi soma̍m | u̱ru̱ṣya rāyoveṣo̍ yajasva
||7.4||उ॒प॒या॒मगृ॑हीतो॑ऽस्य॒न्तर्य॑च्छ मघवन् पा॒हि सोम॑म् । उ॒रु॒ष्य रायोवेषो॑ यजस्व
a̱ntaste̱ dyāvā̍pṛthi̱vī da̍dhāmya̱ntarda̍dhāmyu̱rva̱ntari̍kṣam |
sa̱jūrde̱vebhi̱rava̍rai̱ḥ parai̍ścāntaryā̱me ma̍ghavan mādayasva |
svāho̱rva̱ntari̍kṣa̱manve̍mi̱ svāṅkṛ̍to'si̱ viśve̍bhya indri̱yebhyo̍ di̱vyebhya̱ḥ pārthi̍vebhyaḥ |
mana̍stvāṣṭu̱ svāhā̍ tvā svabhava̱ḥ sūryā̍ya | de̱vebhya̍stvā marīci̱pebhya̍ udā̱nāya̍ tvā
||7.5||अ॒न्तस्ते॒ द्यावा॑पृथि॒वी द॑धाम्य॒न्तर्द॑धाम्यु॒र्व॒न्तरि॑क्षम् ।
स॒जूर्दे॒वेभि॒रव॑रैः॒ परै॑श्चान्तर्या॒मे म॑घवन् मादयस्व ।
स्वाहो॒र्व॒न्तरि॑क्ष॒मन्वे॑मि॒ स्वाङ्कृ॑तोऽसि॒ विश्वे॑भ्य इन्द्रि॒येभ्यो॑ दि॒व्येभ्यः॒ पार्थि॑वेभ्यः ।
मन॑स्त्वाष्टु॒ स्वाहा॑ त्वा स्वभवः॒ सूर्या॑य । दे॒वेभ्य॑स्त्वा मरीचि॒पेभ्य॑ उदा॒नाय॑ त्वा
ā vā̍yo bhūṣa śucipā̱ upa̍ naḥ sa̱hasra̍ṃ te ni̱yuto̍ viśvavāra |
upo̍ te̱ andho̱ madya̍mayāmi̱ yasya̍ deva dadhi̱ṣe pū̍rva̱peya̍ṃ vā̱yave̍ tvā
||7.6||आ वा॑यो भूष शुचिपा॒ उप॑ नः स॒हस्रं॑ ते नि॒युतो॑ विश्ववार ।
उपो॑ ते॒ अन्धो॒ मद्य॑मयामि॒ यस्य॑ देव दधि॒षे पू॑र्व॒पेयं॑ वा॒यवे॑ त्वा
indra̍vāyū i̱me su̱tā upa̱ prayo̍bhi̱rāga̍tam | inda̍vo vāmu̱śanti̱ hi |
u̱pa̱yā̱magṛ̍hīto'si vā̱yava̍ indravā̱yubhyā̍ṃ tvai̱ṣa te̱ yoni̍ḥ sa̱joṣo̍bhyāṃ tvā
||7.7||इन्द्र॑वायू इ॒मे सु॒ता उप॒ प्रयो॑भि॒राग॑तम् । इन्द॑वो वामु॒शन्ति॒ हि ।
उ॒प॒या॒मगृ॑हीतोऽसि वा॒यव॑ इन्द्रवा॒युभ्यां॑ त्वै॒ष ते॒ योनिः॑ स॒जोषो॑भ्यां त्वा
a̱yaṃ vā̍ṃ mitrāvaruṇā su̱taḥ soma̍ ṛtāvṛdhā | mamedi̱ha śru̍ta̱ hava̍m |
u̱pa̱yā̱magṛ̍hīto'si mi̱trāvaru̍ṇābhyāṃ tvā
||7.8||अ॒यं वां॑ मित्रावरुणा सु॒तः सोम॑ ऋतावृधा । ममेदि॒ह श्रु॑त॒ हव॑म् ।
उ॒प॒या॒मगृ॑हीतोऽसि मि॒त्रावरु॑णाभ्यां त्वा
rā̱yā va̱ya sa̍sa̱vāso̍ madema ha̱vyena̍ de̱vā yava̍sena̱ gāva̍ḥ |
tāṃ dhe̱nuṃ mi̍trāvaruṇā yu̱vaṃ no̍ vi̱śvāhā̍ dhatta̱mana̍pasphurantīm | e̱ṣa te̱ yoni̍rṛtā̱yubhyā̍ṃ tvā
||7.9||रा॒या व॒य स॑स॒वासो॑ मदेम ह॒व्येन॑ दे॒वा यव॑सेन॒ गावः॑ ।
तां धे॒नुं मि॑त्रावरुणा यु॒वं नो॑ वि॒श्वाहा॑ धत्त॒मन॑पस्फुरन्तीम् । ए॒ष ते॒ योनि॑रृता॒युभ्यां॑ त्वा
yā vā̱ṃ kaśā̱ madhu̍ma̱tyāśvi̍nā sū̱nṛtā̍vatī |
tayā̍ ya̱jñaṃ mi̍mikṣatam |
u̱pa̱yā̱magṛ̍hīto'sya̱śvibhyā̍ṃ tvai̱ṣa te̱ yoni̱rmādhvī̍bhyāṃ tvā
||7.10||या वां॒ कशा॒ मधु॑म॒त्याश्वि॑ना सू॒नृता॑वती ।
तया॑ य॒ज्ञं मि॑मिक्षतम् ।
उ॒प॒या॒मगृ॑हीतोऽस्य॒श्विभ्यां॑ त्वै॒ष ते॒ योनि॒र्माध्वी॑भ्यां त्वा
taṃ pra̱tnathā̍ pū̱rvathā̍ vi̱śvathe̱mathā̍ jye̱ṣṭhatā̍tiṃ barhi̱ṣada̍ sva̱rvida̍m |
pra̱tī̱cī̱naṃ vṛ̱jana̍ṃ dohase̱ dhuni̍mā̱śuṃ jaya̍nta̱manu̱ yāsu̱ vardha̍se | u̱pa̱yā̱magṛ̍hīto'si̱ śaṇḍā̍ya tvā
||7.11||तं प्र॒त्नथा॑ पू॒र्वथा॑ वि॒श्वथे॒मथा॑ ज्ये॒ष्ठता॑तिं बर्हि॒षद॑ स्व॒र्विद॑म् ।
प्र॒ती॒ची॒नं वृ॒जनं॑ दोहसे॒ धुनि॑मा॒शुं जय॑न्त॒मनु॒ यासु॒ वर्ध॑से । उ॒प॒या॒मगृ॑हीतोऽसि॒ शण्डा॑य त्वा
e̱ṣa te̱ yoni̍rvī̱ratā̍ṃ pā̱hyapa̍mṛṣṭa̱ḥ śaṇḍo̍ de̱vāstvā̍ śukra̱pāḥ praṇa̍ya̱ntvanā̍dhṛṣṭāsi |
su̱vīro̍ vī̱rān pra̍ja̱naya̱n parī̍hya̱bhi rā̱yaspoṣe̍ṇa̱ yaja̍mānam |
sa̱ṃ ja̱gmā̱no di̱vā pṛ̍thi̱vyā śu̱kraḥ śu̱kraśo̍ciṣā̱ nira̍sta̱ḥ śaṇḍa̍ḥ śu̱krasyā̍dhi̱ṣṭhāna̍masi
||7.12||ए॒ष ते॒ योनि॑र्वी॒रतां॑ पा॒ह्यप॑मृष्टः॒ शण्डो॑ दे॒वास्त्वा॑ शुक्र॒पाः प्रण॑य॒न्त्वना॑धृष्टासि ।
सु॒वीरो॑ वी॒रान् प्र॑ज॒नय॒न् परी॑ह्य॒भि रा॒यस्पोषे॑ण॒ यज॑मानम् ।
सं॒ ज॒ग्मा॒नो दि॒वा पृ॑थि॒व्या शु॒क्रः शु॒क्रशो॑चिषा॒ निर॑स्तः॒ शण्डः॑ शु॒क्रस्या॑धि॒ष्ठान॑मसि
acchi̍nnasya te deva soma su̱vīrya̍sya rā̱yaspoṣa̍sya dadi̱tāra̍ḥ syāma |
sā pra̍tha̱mā saskṛ̍tirvi̱śvavā̍rā̱ sa pra̍tha̱mo varu̍ṇo mi̱tro a̱gniḥ
||7.13||अच्छि॑न्नस्य ते देव सोम सु॒वीर्य॑स्य रा॒यस्पोष॑स्य ददि॒तारः॑ स्याम ।
सा प्र॑थ॒मा सस्कृ॑तिर्वि॒श्ववा॑रा॒ स प्र॑थ॒मो वरु॑णो मि॒त्रो अ॒ग्निः
sa pra̍tha̱mo bṛha̱spati̍ściki̱tvāstasmā̱ indrā̍ya su̱tamā ju̍hota̱ svāhā̍ |
tṛ̱mpantu̱ hotrā̱ madho̱ryatsvi̍ṣṭa̱m̐ yatsubhṛ̍ta̱ṃ yatsvāhā̍
||7.14||स प्र॑थ॒मो बृह॒स्पति॑श्चिकि॒त्वास्तस्मा॒ इन्द्रा॑य सु॒तमा जु॑होत॒ स्वाहा॑ ।
तृ॒म्पन्तु॒ होत्रा॒ मधो॒र्यत्स्वि॑ष्टँ॒ यत्सुभृ॑तं॒ यत्स्वाहा॑
a̱yaṃ ve̱naśco̍daya̱tpṛśni̍garbhā̱ jyoti̍rjarāyū̱ raja̍so vi̱māne̍ |
i̱mama̱pā sa̍ṃga̱me sūrya̍sya̱ śiśu̱ṃ na viprā̍ ma̱tibhī̍ rihanti |
u̱pa̱yā̱magṛ̍hīto'si̱ markā̍ya tvā
||7.15||अ॒यं वे॒नश्चो॑दय॒त्पृश्नि॑गर्भा॒ ज्योति॑र्जरायू॒ रज॑सो वि॒माने॑ ।
इ॒मम॒पा सं॑ग॒मे सूर्य॑स्य॒ शिशुं॒ न विप्रा॑ म॒तिभी॑ रिहन्ति ।
उ॒प॒या॒मगृ॑हीतोऽसि॒ मर्का॑य त्वा
mano̱ na yeṣu̱ hava̍neṣu ti̱gmaṃ vipa̱ḥ śacyā̍ vanu̱tho drava̍ntā |
ā yaḥ śaryā̍bhistuvinṛ̱mṇo a̱syā śrī̍ṇītā̱diśa̱ṃ gabha̍stau
||7.16||मनो॒ न येषु॒ हव॑नेषु ति॒ग्मं विपः॒ शच्या॑ वनु॒थो द्रव॑न्ता ।
आ यः शर्या॑भिस्तुविनृ॒म्णो अ॒स्या श्री॑णीता॒दिशं॒ गभ॑स्तौ
e̱ṣa te̱ yoni̍ḥ pra̱jāḥ pā̱hyapa̍mṛṣṭo̱ marko̍ de̱vāstvā̍ manthi̱pāḥ praṇa̍ya̱ntvanā̍dhṛṣṭāsi |
su̱pra̱jāḥ pra̱jāḥ pra̍ja̱naya̱n parī̍hya̱bhi rā̱yaspoṣe̍ṇa̱ yaja̍mānam |
sa̱ṃja̱gmā̱no di̱vā pṛ̍thi̱vyā ma̱nthī ma̱thiśo̍ciṣā̱ nira̍sto̱ marko̍ ma̱nthino̍'dhi̱ṣṭhāna̍masi
||7.17||ए॒ष ते॒ योनिः॑ प्र॒जाः पा॒ह्यप॑मृष्टो॒ मर्को॑ दे॒वास्त्वा॑ मन्थि॒पाः प्रण॑य॒न्त्वना॑धृष्टासि ।
सु॒प्र॒जाः प्र॒जाः प्र॑ज॒नय॒न् परी॑ह्य॒भि रा॒यस्पोषे॑ण॒ यज॑मानम् ।
सं॒ज॒ग्मा॒नो दि॒वा पृ॑थि॒व्या म॒न्थी म॒थिशो॑चिषा॒ निर॑स्तो॒ मर्को॑ म॒न्थिनो॑ऽधि॒ष्ठान॑मसि
acchi̍nnasya te deva soma su̱vīrya̍sya dadi̱tāra̍ḥ syāma|
sā pra̍tha̱mā saskṛ̍tirvi̱śvavā̍rā̱ sa pra̍tha̱mo varu̍ṇo mi̱tro a̱gniḥ
||7.18||अच्छि॑न्नस्य ते देव सोम सु॒वीर्य॑स्य ददि॒तारः॑ स्याम।
सा प्र॑थ॒मा सस्कृ॑तिर्वि॒श्ववा॑रा॒ स प्र॑थ॒मो वरु॑णो मि॒त्रो अ॒ग्निः
sa pra̍tha̱mo bṛha̱spati̍ścikistasmā̱ indrā̍ya su̱tamā ju̍hota̱ svāhā̍|
tṛ̱mpantu̱ hotrā̱ bhadho̱ryatsvi̍ṣṭa̱ṃ yatsubhṛ̍ta̱ṃ yatsvāhā̍
||7.19||स प्र॑थ॒मो बृह॒स्पति॑श्चिकिस्तस्मा॒ इन्द्रा॑य सु॒तमा जु॑होत॒ स्वाहा॑।
तृ॒म्पन्तु॒ होत्रा॒ भधो॒र्यत्स्वि॑ष्टं॒ यत्सुभृ॑तं॒ यत्स्वाहा॑
ye de̍vāso di̱vyekā̍daśa̱ stha pṛ̍thi̱vyāmadhyekā̍daśa̱ stha |
a̱psu̱kṣito̍ mahi̱naikā̍daśa̱ stha te de̍vāso ya̱jñami̱maṃ ju̍ṣadhvam
||7.20||ये दे॑वासो दि॒व्येका॑दश॒ स्थ पृ॑थि॒व्यामध्येका॑दश॒ स्थ ।
अ॒प्सु॒क्षितो॑ महि॒नैका॑दश॒ स्थ ते दे॑वासो य॒ज्ञमि॒मं जु॑षध्वम्
u̱pa̱yā̱magṛ̍hīto'syāgraya̱ṇo̍'si̱ svā̍grayaṇaḥ | pā̱hi ya̱jñaṃ pā̱hi ya̱jñapa̍tim
||7.21||उ॒प॒या॒मगृ॑हीतोऽस्याग्रय॒णो॑ऽसि॒ स्वा॑ग्रयणः । पा॒हि य॒ज्ञं पा॒हि य॒ज्ञप॑तिम्
viṣṇu̱stvāmi̍ndri̱yeṇa̍ pātu̱ viṣṇu̱ṃ tvaṃ pā̍hya̱bhi sava̍nāni pāhi |
soma̍ḥ pavate̱ soma̍ḥ pavate̱ somaḥ pavate
||7.22||विष्णु॒स्त्वामि॑न्द्रि॒येण॑ पातु॒ विष्णुं॒ त्वं पा॑ह्य॒भि सव॑नानि पाहि ।
सोमः॑ पवते॒ सोमः॑ पवते॒ सोमः पवते
a̱smai brahma̍ṇe pavate̱'smai kṣa̱trāya̍ pavate̱'smai su̍nva̱te yaja̍mānāya pavate |
i̱ṣa ū̱rje pa̍vate̱'dbhya oṣa̍dhībhyaḥ pavate̱ dyāvā̍pṛthi̱vībhyā̍ṃ pavate subhū̱tāya̍ pavate brahmavarca̱sāya̍ pavate|
viśve̍bhyastvā de̱vebhya̍ḥ e̱ṣa te̱ yoni̱rviśve̍bhyastvā de̱vebhya̍ḥ
||7.23||अ॒स्मै ब्रह्म॑णे पवते॒ऽस्मै क्ष॒त्राय॑ पवते॒ऽस्मै सु॑न्व॒ते यज॑मानाय पवते ।
इ॒ष ऊ॒र्जे प॑वते॒ऽद्भ्य ओष॑धीभ्यः पवते॒ द्यावा॑पृथि॒वीभ्यां॑ पवते सुभू॒ताय॑ पवते ब्रह्मवर्च॒साय॑ पवते।
विश्वे॑भ्यस्त्वा दे॒वेभ्यः॑ ए॒ष ते॒ योनि॒र्विश्वे॑भ्यस्त्वा दे॒वेभ्यः॑
u̱pa̱yā̱magṛ̍hīto̱'sīndrā̍ya tvā bṛ̱hadva̍te̱ vaya̍svata ukthā̱yuva̍ṃ gṛhṇāmi |
yatta̍ indra bṛ̱hadva̍ya̱stasmai̍ tvā̱ viṣṇa̍ve tvai̱ṣate̱ yoni̍ru̱kthebhya̍stvā
||7.24||उ॒प॒या॒मगृ॑हीतो॒ऽसीन्द्रा॑य त्वा बृ॒हद्व॑ते॒ वय॑स्वत उक्था॒युवं॑ गृह्णामि ।
यत्त॑ इन्द्र बृ॒हद्व॑य॒स्तस्मै॑ त्वा॒ विष्ण॑वे त्वै॒षते॒ योनि॑रु॒क्थेभ्य॑स्त्वा
de̱vebhya̍stvā devā̱yuva̍ṃ gṛhṇāmi ya̱jñasyāyu̍ṣe mi̱trāvaru̍ṇābhyāṃ tvā devā̱yuva̍ṃ gṛhṇāmi ya̱jñasyāyu̍ṣe |
indrā̍ya tvā devā̱yuva̍ṃ gṛhṇāmi ya̱jñasyāyu̍ṣa indrā̱gnibhyā̍ṃ tvā devā̱yuva̍ṃ gṛhṇāmi ya̱jñasyāyu̍ṣe |
indrā̍ya tvā devāyuva̍ṃ gṛhṇāmi ya̱jñasyāyu̍ṣa̱ indrā̱varu̍ṇābhyāṃ tvā devā̱yuva̍ṃ gṛhṇāmi ya̱jñasyāyu̍ṣe |
indrā̱bṛha̱spati̍bhyāṃ tvā devā̱yuva̍ṃ gṛhṇāmi ya̱jñasyāyu̍ṣa̱ indrā̱viṣṇu̍bhyāṃ tvā devā̱yuva̍ṃ gṛhṇāmi ya̱jñasyāyu̍ṣe
||7.25||दे॒वेभ्य॑स्त्वा देवा॒युवं॑ गृह्णामि य॒ज्ञस्यायु॑षे मि॒त्रावरु॑णाभ्यां त्वा देवा॒युवं॑ गृह्णामि य॒ज्ञस्यायु॑षे ।
इन्द्रा॑य त्वा देवा॒युवं॑ गृह्णामि य॒ज्ञस्यायु॑ष इन्द्रा॒ग्निभ्यां॑ त्वा देवा॒युवं॑ गृह्णामि य॒ज्ञस्यायु॑षे ।
इन्द्रा॑य त्वा देवायुवं॑ गृह्णामि य॒ज्ञस्यायु॑ष॒ इन्द्रा॒वरु॑णाभ्यां त्वा देवा॒युवं॑ गृह्णामि य॒ज्ञस्यायु॑षे ।
इन्द्रा॒बृह॒स्पति॑भ्यां त्वा देवा॒युवं॑ गृह्णामि य॒ज्ञस्यायु॑ष॒ इन्द्रा॒विष्णु॑भ्यां त्वा देवा॒युवं॑ गृह्णामि य॒ज्ञस्यायु॑षे
mū̱rdhāna̍ṃ di̱vo a̍ra̱tiṃ pṛ̍thi̱vyā vai̍śvāna̱ramṛ̱ta ā jā̱tama̱gnim |
ka̱vi sa̱mrāja̱mati̍thi̱ṃ janā̍nāmā̱sannā pātra̍ṃ janayanta de̱vāḥ
||7.26||मू॒र्धानं॑ दि॒वो अ॑र॒तिं पृ॑थि॒व्या वै॑श्वान॒रमृ॒त आ जा॒तम॒ग्निम् ।
क॒वि स॒म्राज॒मति॑थिं॒ जना॑नामा॒सन्ना पात्रं॑ जनयन्त दे॒वाः
u̱pa̱yā̱magṛ̍hīto'si dhru̱vo̍'si dhru̱vakṣi̍tirdhru̱vāṇā̍ṃ dhru̱vata̱mo'cyu̍tānāmacyuta̱kṣitta̍maḥ |
e̱ṣa te̱ yoni̍rvaiśvāna̱rāya̍ tvā
||7.27||उ॒प॒या॒मगृ॑हीतोऽसि ध्रु॒वो॑ऽसि ध्रु॒वक्षि॑तिर्ध्रु॒वाणां॑ ध्रु॒वत॒मोऽच्यु॑तानामच्युत॒क्षित्त॑मः ।
ए॒ष ते॒ योनि॑र्वैश्वान॒राय॑ त्वा
dhru̱vaṃ dhru̱veṇa̱ mana̍sā vā̱cā soma̱mava̍nayāmi | athā̍ na̱ indra̱ idviśo̍ sapa̱tnāḥ sama̍nasa̱skara̍t
||7.28||ध्रु॒वं ध्रु॒वेण॒ मन॑सा वा॒चा सोम॒मव॑नयामि । अथा॑ न॒ इन्द्र॒ इद्विशो॑ सप॒त्नाः सम॑नस॒स्कर॑त्
yaste̍ dra̱psa skanda̍ti̱ yaste̍ a̱śurgrāva̍cyuto dhi̱ṣaṇa̍yoru̱pasthā̍t |
a̱dhva̱ryorvā̱ pari̍ vā̱ yaḥ pa̱vitrā̱ttaṃ te̍ juhomi̱ mana̍sā̱ vaṣa̍ṭkṛta̱ svāhā̍ de̱vānā̍mu̱tkrama̍ṇamasi
||7.29||यस्ते॑ द्र॒प्स स्कन्द॑ति॒ यस्ते॑ अ॒शुर्ग्राव॑च्युतो धि॒षण॑योरु॒पस्था॑त् ।
अ॒ध्व॒र्योर्वा॒ परि॑ वा॒ यः प॒वित्रा॒त्तं ते॑ जुहोमि॒ मन॑सा॒ वष॑ट्कृत॒ स्वाहा॑ दे॒वाना॑मु॒त्क्रम॑णमसि
u̱pa̱yā̱magṛ̍hīto'si̱ madha̍ve tvopayā̱magṛ̍hīto'si̱ mādha̍vāya tvā |
u̱pa̱yā̱magṛ̍hīto'si śu̱krāya̍ tvopayā̱magṛ̍hīto'si̱ śuca̍ye tvā |
u̱pa̱yā̱magṛ̍hīto'si̱ nabha̍se tvopayā̱magṛ̍hīto'si̱ nabha̱syā̍ya tvā |
u̱pa̱yā̱magṛ̍hīto'sī̱ṣe tvo̍payā̱magṛ̍hīto syū̱rje tvā̍ |
u̱pa̱yā̱magṛ̍hīto'si̱ saha̍se tvopayā̱magṛ̍hīto'si saha̱syā̍ya tvā |
u̱pa̱yā̱magṛ̍hīto'si̱ tapa̍se tvopayā̱magṛ̍hīto'si tapa̱syā̍ya tvā |
u̱pa̱yā̱magṛ̍hīto'sya hasaspa̱taye̍ tvā
||7.30||उ॒प॒या॒मगृ॑हीतोऽसि॒ मध॑वे त्वोपया॒मगृ॑हीतोऽसि॒ माध॑वाय त्वा ।
उ॒प॒या॒मगृ॑हीतोऽसि शु॒क्राय॑ त्वोपया॒मगृ॑हीतोऽसि॒ शुच॑ये त्वा ।
उ॒प॒या॒मगृ॑हीतोऽसि॒ नभ॑से त्वोपया॒मगृ॑हीतोऽसि॒ नभ॒स्या॑य त्वा ।
उ॒प॒या॒मगृ॑हीतोऽसी॒षे त्वो॑पया॒मगृ॑हीतो स्यू॒र्जे त्वा॑ ।
उ॒प॒या॒मगृ॑हीतोऽसि॒ सह॑से त्वोपया॒मगृ॑हीतोऽसि सह॒स्या॑य त्वा ।
उ॒प॒या॒मगृ॑हीतोऽसि॒ तप॑से त्वोपया॒मगृ॑हीतोऽसि तप॒स्या॑य त्वा ।
उ॒प॒या॒मगृ॑हीतोऽस्य हसस्प॒तये॑ त्वा
indrā̍gnī̱ āga̍ta su̱taṃ gī̱rbhirnamo̱ vare̍ṇyam | a̱sya pā̍taṃ dhi̱yeṣi̱tā |
u̱pa̱yā̱magṛ̍hīto'sīndrā̱gnibhyā̍ṃ tvai̱ṣa te̱ yoni̍rindrā̱gnibhyā̍ṃ tvā
||7.31||इन्द्रा॑ग्नी॒ आग॑त सु॒तं गी॒र्भिर्नमो॒ वरे॑ण्यम् । अ॒स्य पा॑तं धि॒येषि॒ता ।
उ॒प॒या॒मगृ॑हीतोऽसीन्द्रा॒ग्निभ्यां॑ त्वै॒ष ते॒ योनि॑रिन्द्रा॒ग्निभ्यां॑ त्वा
ā ghā̱ ye a̱gnimi̍ndha̱te stṛ̱ṇanti̍ ba̱rhirā̍nu̱ṣak | yeṣā̱mindro̱ yuvā̱ sakhā̍ |
u̱pa̱yā̱magṛ̍hīto'syagnī̱ndrābhyā̍ṃ tvai̱ṣa te̱ yoni̍ragnī̱ndrābhyā̍ṃ tvā
||7.32||आ घा॒ ये अ॒ग्निमि॑न्ध॒ते स्तृ॒णन्ति॑ ब॒र्हिरा॑नु॒षक् । येषा॒मिन्द्रो॒ युवा॒ सखा॑ ।
उ॒प॒या॒मगृ॑हीतोऽस्यग्नी॒न्द्राभ्यां॑ त्वै॒ष ते॒ योनि॑रग्नी॒न्द्राभ्यां॑ त्वा
omā̍saścarṣaṇīdhṛto̱ viśve̍ devāsa̱ ā ga̍ta | dā̱śvāso̍ dā̱śuṣa̍ḥ su̱tam |
u̱payā̱magṛ̍hīto'si̱ viśve̍bhyastvā de̱vebhya̍ḥ e̱ṣa te̱ yoni̱rviśve̍bhyastvā de̱vebhya̍ḥ
||7.33||ओमा॑सश्चर्षणीधृतो॒ विश्वे॑ देवास॒ आ ग॑त । दा॒श्वासो॑ दा॒शुषः॑ सु॒तम् ।
उ॒पया॒मगृ॑हीतोऽसि॒ विश्वे॑भ्यस्त्वा दे॒वेभ्यः॑ ए॒ष ते॒ योनि॒र्विश्वे॑भ्यस्त्वा दे॒वेभ्यः॑
viśve̍ devāsa̱ āga̍ta śṛṇu̱tā ma̍ i̱ma hava̍m | edaṃ ba̱rhirniṣī̍data |
u̱pa̱yā̱magṛ̍hīto'si̱ viśve̍bhyastvā de̱vebhya̍ḥ e̱ṣa te̱ yoni̱rviśve̍bhyastvā de̱vebhya̍ḥ
||7.34||विश्वे॑ देवास॒ आग॑त शृणु॒ता म॑ इ॒म हव॑म् । एदं ब॒र्हिर्निषी॑दत ।
उ॒प॒या॒मगृ॑हीतोऽसि॒ विश्वे॑भ्यस्त्वा दे॒वेभ्यः॑ ए॒ष ते॒ योनि॒र्विश्वे॑भ्यस्त्वा दे॒वेभ्यः॑
indra̍ marutva i̱ha pā̍hi̱ soma̱ṃ yathā̍ śāryā̱te api̍baṃ su̱tasya̍ |
tava̱ praṇī̍tī̱ tava̍ śūra̱ śarma̱nnāvi̍vāsanti ka̱vaya̍ḥ suya̱jñāḥ |
u̱pa̱yā̱magṛ̍hīto̱'sīndrā̍ya tvā ma̱rutva̍ta e̱ṣa te̱ yoni̱rindrā̍ya tvā ma̱rutva̍te
||7.35||इन्द्र॑ मरुत्व इ॒ह पा॑हि॒ सोमं॒ यथा॑ शार्या॒ते अपि॑बं सु॒तस्य॑ ।
तव॒ प्रणी॑ती॒ तव॑ शूर॒ शर्म॒न्नावि॑वासन्ति क॒वयः॑ सुय॒ज्ञाः ।
उ॒प॒या॒मगृ॑हीतो॒ऽसीन्द्रा॑य त्वा म॒रुत्व॑त ए॒ष ते॒ योनि॒रिन्द्रा॑य त्वा म॒रुत्व॑ते
ma̱rutva̍ntaṃ vṛṣa̱bhaṃ vā̍vṛdhā̱namaka̍vāriṃ di̱vya śā̱samindra̍m |
vi̱śvā̱sāha̱mava̍se̱ nūta̍nāyo̱gra sa̍ho̱dāmi̱ha ta hu̍vema |
u̱payā̱magṛ̍hīto̱'sīndrā̍ya tvā ma̱rutva̍ta e̱ṣa te̱ yoni̱rindrā̍ya tvā ma̱rutva̍te
||7.36||म॒रुत्व॑न्तं वृष॒भं वा॑वृधा॒नमक॑वारिं दि॒व्य शा॒समिन्द्र॑म् ।
वि॒श्वा॒साह॒मव॑से॒ नूत॑नायो॒ग्र स॑हो॒दामि॒ह त हु॑वेम ।
उ॒पया॒मगृ॑हीतो॒ऽसीन्द्रा॑य त्वा म॒रुत्व॑त ए॒ष ते॒ योनि॒रिन्द्रा॑य त्वा म॒रुत्व॑ते
u̱pa̱yā̱magṛ̍hīto'si ma̱rutāṃ oja̍se tvā
||7.37||उ॒प॒या॒मगृ॑हीतोऽसि म॒रुतां ओज॑से त्वा
sa̱joṣā̍ indra̱ saga̍ṇo ma̱rudbhi̱ḥ soma̍ṃ piba vṛtra̱hā śū̍ra vi̱dvān |
ja̱hi śatrū̱ rapa̱ mṛdho̍ nuda̱svāthābha̍yaṃ kṛṇuhi vi̱śvato̍ naḥ |
u̱pa̱yā̱magṛ̍hīto̱'sīndrā̍ya tvā ma̱rutva̍ta e̱ṣa te̱ yoni̱rindrā̍ya tvā ma̱rutva̍te
||7.38||स॒जोषा॑ इन्द्र॒ सग॑णो म॒रुद्भिः॒ सोमं॑ पिब वृत्र॒हा शू॑र वि॒द्वान् ।
ज॒हि शत्रू॒ रप॒ मृधो॑ नुद॒स्वाथाभ॑यं कृणुहि वि॒श्वतो॑ नः ।
उ॒प॒या॒मगृ॑हीतो॒ऽसीन्द्रा॑य त्वा म॒रुत्व॑त ए॒ष ते॒ योनि॒रिन्द्रा॑य त्वा म॒रुत्व॑ते
ma̱hām̐3 indro̍ nṛ̱vadā ca̍rṣaṇi̱prā u̱ta dvi̱barhā̍ ami̱naḥ saho̍bhiḥ |
a̱sma̱drya̍gvāvṛdhe vī̱ryā̍yo̱ruḥ pṛ̱thuḥ sukṛ̍taḥ ka̱rtṛbhi̍rbhūt |
u̱pa̱yā̱magṛ̍hīto'si mahe̱ndrāya̍ tvai̱ṣa te̱ yoni̍rmahe̱ndrāya̍ tvā
||7.39||म॒हाँ३ इन्द्रो॑ नृ॒वदा च॑र्षणि॒प्रा उ॒त द्वि॒बर्हा॑ अमि॒नः सहो॑भिः ।
अ॒स्म॒द्र्य॑ग्वावृधे वी॒र्या॑यो॒रुः पृ॒थुः सुकृ॑तः क॒र्तृभि॑र्भूत् ।
उ॒प॒या॒मगृ॑हीतोऽसि महे॒न्द्राय॑ त्वै॒ष ते॒ योनि॑र्महे॒न्द्राय॑ त्वा
ma̱hām̐3 indro̱ ya oja̍sā pa̱rjanyo̱ vṛṣṭi̱mām̐3 i̍va stomai̍rva̱tsasya̍ vāvṛdhe |
u̱pa̱yā̱magṛ̍hīto'si mahe̱ndrāya̍ tvai̱ṣa te̱ yoni̍rmahe̱ndrāya̍ tvā
||7.40||म॒हाँ३ इन्द्रो॒ य ओज॑सा प॒र्जन्यो॒ वृष्टि॒माँ३ इ॑व स्तोमै॑र्व॒त्सस्य॑ वावृधे ।
उ॒प॒या॒मगृ॑हीतोऽसि महे॒न्द्राय॑ त्वै॒ष ते॒ योनि॑र्महे॒न्द्राय॑ त्वा