Vājasaneyi Kanva Saṃhitā — Chapter 38 (27 mantras)

Vājasaneyi Kanva Saṃhitā — Chapter 38

athāṣṭatriṃśo’dhyāyaḥ|

---

Mantras

Mantra	First Words
1	devasya tvā
2	il̤a ehyadita
3	adityai rāsnāsīndrāṇyā
4	aśvibhyā pinvasva
5	yaste stana
6	gāyatra chando’si
7	samudrāya tvā
8	indrāya tvā
9	yamāya tvāṅgirasvate
10	viśvā āśā
11	divi dhā
12	aśvinā gharma
13	apātāmaśvinā gharmamanu
14	iṣe pinvasvorje
15	svāhā pūṣṇe
16	svāhā rudrāya
17	abhīma mahimā
18	yā te
19	kṣatrasya tvā
20	catusraktirnābhirṛtasya saprathā
21	gharmaitatte purīṣa
22	acikradadvṛṣā harirmahānmitro
23	sumitriyā na
24	udvaya tamasaspari
25	yāvatī dyāvāpṛthivī
26	mayi tyadindriya
27	tviṣa savṛk

---

Mantra 1 {#mantra-1}

Adhyāya: 38 | Mantra: 1

de̱vasya̍ tvā savi̱tuḥ pra̍sa̱ve̱’śvino̍rbā̱hubhyā̍ṃ pū̱ṣṇo hastā̍bhyām | ā da̱de’di̍tyai̱ rāsnā̍si

---

Mantra 2 {#mantra-2}

Adhyāya: 38 | Mantra: 2

il̤a̱ ehyadi̍ta̱ ehi̱ sara̍sva̱ttyehi̍ | asā̱vehyasā̱vehyasā̱vehi̍

---

Mantra 3 {#mantra-3}

Adhyāya: 38 | Mantra: 3

adi̍tyai̱ rāsnā̍sīndrā̱ṇyā u̱ṣṇīṣa̍ḥ | pū̱ṣāsi̍ gha̱rmāya̍ dīṣva

---

Mantra 4 {#mantra-4}

Adhyāya: 38 | Mantra: 4

a̱śvibhyā̍ṃ pinvasva̱ sara̍svatyai pinva̱svendrā̍ya pinvasva | svāhendra̍vatsvāhendra̍va̱tsvāhendra̍vat

---

Mantra 5 {#mantra-5}

Adhyāya: 38 | Mantra: 5

yaste̱ stana̍ḥ śaśa̱yo yo ma̍yo̱bhūryo ra̍tna̱dhā va̍su̱vidyaḥ su̱datra̍ḥ | yena̱ viśvā̱ puṣya̍si̱ vāryā̍ṇi̱ sara̍svati̱ tami̱ha dhāta̍ve’kaḥ | u̱rva̱ntari̍kṣa̱manve̍mi

---

Mantra 6 {#mantra-6}

Adhyāya: 38 | Mantra: 6

gā̱ya̱traṃ chando̍’si̱ trai̍ṣṭubha̱ṃ chando̍’si dyāvā̍pṛthi̱vībhyā̍ṃ tvā̱ pari̍ gṛhṇāmya̱ntari̍kṣe̱ṇopa̍ yacchāmi | indrā̍śvinā̱ madhu̍naḥ sāra̱ghasya̍ gha̱rmaṃ pā̍ta̱ vasa̍vo̱ yaja̍ta̱ vāṭ | svāhā̱ sūrya̍sya ra̱śmaye̍ vṛṣṭi̱vana̍ye

---

Mantra 7 {#mantra-7}

Adhyāya: 38 | Mantra: 7

sa̱mu̱drāya̍ tvā̱ vātā̍ya̱ svāhā̍ sari̱rāya̍ tvā̱ vātā̍ya̱ svāhā̍ | a̱nā̱dhṛ̱ṣyāya̍ tvā̱ vātā̍ya̱ svāhā̍pratidhṛ̱ṣyāya̍ tvā̱ vātā̍ya̱ svāhā̍ || a̱va̱syave̍ tvā̱ vātā̍ya̱ svāhā̍śimi̱dāya̍ tvā̱ vātā̍ya̱ svāhā̍

---

Mantra 8 {#mantra-8}

Adhyāya: 38 | Mantra: 8

indrā̍ya tvā̱ vasu̍mate ru̱drava̍te̱ svāhendrā̍ya tvādi̱tyava̍te̱ svāhā̍ | indrā̍ya tvābhimāti̱ghne svāhā̍ savi̱tre tva̍ ṛbhu̱mate̍ vibhu̱mate̱ vāja̍vate̱ svāhā̱ bṛha̱spata̍ye tvā vi̱śvade̍vyāvate̱ svāhā̍

---

Mantra 9 {#mantra-9}

Adhyāya: 38 | Mantra: 9

ya̱māya̱ tvāṅgi̍rasvate pitṛ̱mate̱ svāhā̍ | svāhā̍ gha̱rmāya̱ svāhā̍ gha̱rmaḥ pi̱tre

---

Mantra 10 {#mantra-10}

Adhyāya: 38 | Mantra: 10

viśvā̱ āśā̍ dakṣiṇa̱satsarvā̍nde̱vāna̍yāl̤i̱ha | svāhā̍kṛtasya gha̱rmasya̱ madho̍ḥ pibatamaśvinā

---

Mantra 11 {#mantra-11}

Adhyāya: 38 | Mantra: 11

di̱vi dhā̍ i̱maṃ ya̱jñami̱maṃ ya̱jñaṃ di̱vi dhā̍ḥ | svāhā̱gnaye̍ ya̱jñiyā̍ya̱ śaṃ yaju̍rbhyaḥ

---

Mantra 12 {#mantra-12}

Adhyāya: 38 | Mantra: 12

aśvi̍nā gha̱rmaṃ pā̍ta̱ hārdvā̍na̱maha̍rdi̱vābhi̍rū̱tibhi̍ḥ | ta̱ntrā̱yiṇe̱ namo̱ dyāvā̍pṛthi̱vībhyā̍m

---

Mantra 13 {#mantra-13}

Adhyāya: 38 | Mantra: 13

apā̍tāma̱śvinā̍ gha̱rmamanu̱ dyāvā̍pṛthi̱vī a̍masātām | ihai̱va rā̱taya̍ḥ santu

---

Mantra 14 {#mantra-14}

Adhyāya: 38 | Mantra: 14

i̱ṣe pi̍nvasvo̱rje pi̍nvasva̱ brahma̍ṇe pinvasva kṣa̱trāya̍ pinvasva̱ dyāvā̍pṛthi̱vībhyā̍ṃ pinvasva | dharmā̍si su̱dharmāme̍nya̱sme nṛ̱mṇāni̍ dhāraya̱ brahma̍ dhāraya kṣa̱traṃ dhāraya̱ viśa̍ṃ dhāraya

---

Mantra 15 {#mantra-15}

Adhyāya: 38 | Mantra: 15

svāhā̍ pū̱ṣṇe śara̍se̱ svāhā̱ grāva̍bhyaḥ svāhā̍ pratira̱vebhya̍ḥ | svāhā̍ pi̱tṛbhya̍ ū̱rdhvaba̍rhirbhyo gharma̱pāva̍bhyaḥ svāhā̱ dyāvā̍pṛthi̱vībhyā̱ svāhā̱ viśve̍bhyo de̱vebhya̍ḥ

---

Mantra 16 {#mantra-16}

Adhyāya: 38 | Mantra: 16

svāhā̍ ru̱drāya̍ ru̱drahū̍taye̱ svāhā̱ saṃ jyoti̍ṣā̱ jyoti̍ḥ | aha̍ḥ ke̱tunā̍ juṣatā su̱jyoti̱rjyoti̍ṣā̱ svāhā̱ rātri̍ḥ ke̱tunā̍ juṣatā su̱jyoti̱rjyoti̍ṣā̱ svāhā̍ | madhu̍ hu̱tamindra̍tame a̱gnā a̱śyāma̍ te deva gharma̱ nama̍ste astu̱ mā mā̍ hi sīḥ

---

Mantra 17 {#mantra-17}

Adhyāya: 38 | Mantra: 17

a̱bhī̱maṃ ma̍hi̱mā diva̱ṃ vipro̍ babhūva sa̱prathā̍ḥ | u̱ta śrava̍sā pṛthi̱vī sa sī̍dasva ma̱hām̐2 a̍si̱ roca̍sva deva̱vīta̍maḥ | vi dhū̱mama̍gne aru̱ṣaṃ mi̍yedhya sṛ̱ja pra̍śasta darśa̱tam

---

Mantra 18 {#mantra-18}

Adhyāya: 38 | Mantra: 18

yā te̍ gharma di̱vyā śugyā gā̍ya̱tryā ha̍vi̱rdhāne̍ | sā ta̱ ā pyā̍yatā̱ṃ niṣṭyā̍yatā̱ṃ tasyai̍ te̱ svāhā̍ | yā te̍ gharmā̱ntari̍kṣe̱ śugyā tri̱ṣṭubhyāgnī̍dhre | sā ta̱ ā pyā̍yatā̱ṃ niṣṭyā̍yatā̱ṃ tasyai̍ te̱ svāhā̍ | yā te̍ gharma pṛthi̱vyā śugyā jaga̍tyā sada̱syā̍ | sā ta̱ ā pyā̍yatā̱ṃ niṣṭyā̍yatā̱ṃ tasyai̍ te̱ svāhā̍

---

Mantra 19 {#mantra-19}

Adhyāya: 38 | Mantra: 19

kṣa̱trasya̍ tvā pa̱raspāya̱ brahma̍ṇasta̱nva̍ṃ pāhi | viśa̍stvā̱ dharma̍ṇā va̱yamanu̍ krāmāma suvi̱tāya̱ navya̍se

---

Mantra 20 {#mantra-20}

Adhyāya: 38 | Mantra: 20

catu̍ḥsrakti̱rnābhi̍rṛ̱tasya̍ sa̱prathā̱ḥ sa no̍ vi̱śvāyu̍ḥ sa̱prathā̱ḥ sa na̍ḥ sa̱rvāyu̍ḥ sa̱prathā̍ḥ | apa̱ dveṣo̱ apa̱ hvaro̱nyavra̍tasya saścima

---

Mantra 21 {#mantra-21}

Adhyāya: 38 | Mantra: 21

gharmai̱tatte̱ purī̍ṣa̱ṃ tena̱ vardha̍sva̱ cā ca̍ pyāyasva | va̱rdhi̱ṣī̱mahi̍ ca va̱yamā ca̍ pyāsiṣīmahi

---

Mantra 22 {#mantra-22}

Adhyāya: 38 | Mantra: 22

aci̍krada̱dvṛṣā̱ hari̍rma̱hānmi̱tro na da̍rśa̱taḥ | sa sūrye̍ṇa didyutaduda̱dhirni̱dhiḥ

---

Mantra 23 {#mantra-23}

Adhyāya: 38 | Mantra: 23

su̱mi̱tri̱yā na̱ āpa̱ oṣa̍dhayaḥ santu durmitri̱yāstasmai̍ santu̱ | yo̱’smāndve̍ṣṭi̱ yaṃ ca̍ va̱yaṃ dvi̱ṣmaḥ

---

Mantra 24 {#mantra-24}

Adhyāya: 38 | Mantra: 24

udva̱yaṃ tama̍sa̱spari̱ sva̱ḥ paśya̍nta̱ utta̍ram | de̱vaṃ de̍va̱trā sūrya̱maga̍nma̱ jyoti̍rutta̱mam | edho̍’syedhiṣī̱mahi̍ sa̱mida̍si̱ tejo̍’si̱ tejo̱ mayi̍ dhehi

---

Mantra 25 {#mantra-25}

Adhyāya: 38 | Mantra: 25

yāva̍tī̱ dyāvā̍pṛthi̱vī yāva̍cca sa̱pta sindha̍vo vitasthi̱re | tava̍ntamindra te̱ graha̍mū̱rjā gṛ̍hṇā̱myakṣi̍ta̱ṃ mayi̍ gṛhṇā̱myakṣi̍tam

---

Mantra 26 {#mantra-26}

Adhyāya: 38 | Mantra: 26

mayi̱ tyadi̍ndri̱yaṃ bṛ̱hanmayi̱ dakṣo̱ mayi̱ kratu̍ḥ | gha̱rmastri̱śugvi rā̍jati vi̱rājā̱ jyoti̍ṣā sa̱ha brahma̍ṇā̱ teja̍sā sa̱ha || paya̍so̱ reta̱ ābhṛ̍ta̱ṃ tasya̱ doha̍maśīma̱hyutta̍rāmuttarā̱ samā̍m

---

Mantra 27 {#mantra-27}

Adhyāya: 38 | Mantra: 27

tviṣa̍ḥ sa̱ṃvṛk kratve̱ dakṣa̍sya te suṣu̱mṇasya̍ te suṣumṇāgnihu̱taḥ | indra̍pītasya pra̱jāpa̍tibhakṣitasya̱ madhu̍mata̱ upa̍hūta̱ upa̍hūtasya bhakṣayāmi

---