Vājasaneyi Kanva Saṃhitā — Chapter 39 (12 mantras)

Vājasaneyi Kanva Saṃhitā — Chapter 39

athaikonacatvāriṃśo’dhyāyaḥ|

---

Mantras

Mantra	First Words
1	svāhā prāṇebhya
2	vāce svāhā
3	manasa kāmamākūti
4	prajāpati sabhriyamāṇa
5	savitā prathame’hannagnirdvitīye
6	ugraśca bhīmaśca
7	agni hṛdayenāśani
8	ugra lohitena
9	lomabhya svāhā
10	āyāsāya svāhā
11	tapase svāhā
12	yamāya svāhāntakāya

---

Mantra 1 {#mantra-1}

Adhyāya: 39 | Mantra: 1

svāhā̍ prā̱ṇebhya̱ḥ sādhi̍patikebhyaḥ pṛthi̱vyai svāhā̱gnaye̱ svāhā̱ntari̍kṣāya̱ svāhā̍ vā̱yave̱ svāhā̍ di̱ve svāhā̱ sūryā̍ya̱ svāhā̍ | di̱gbhyaḥ svāhā̍ ca̱ndrāya̱ svāhā̱ nakṣa̍trebhya̱ḥ svāhā̱dbhyaḥ svāhā̱ varu̍ṇāya̱ svāhā̍ | nābhyai̱ svāhā̍ pū̱tāya̱ svāhā̍

---

Mantra 2 {#mantra-2}

Adhyāya: 39 | Mantra: 2

vā̱ce svāhā̍ prā̱ṇāya̱ svāhā̍ prā̱ṇāya̱ svāhā̍ | cakṣu̍ṣe̱ svāhā̱ cakṣu̍ṣe̱ svāhā̱ śrotrā̍ya̱ svāhā̱ śrotrā̍ya̱ svāhā̍

---

Mantra 3 {#mantra-3}

Adhyāya: 39 | Mantra: 3

mana̍sa̱ḥ kāma̱mākū̍tiṃ vā̱caḥ sa̱tyama̍śīya | pa̱śū̱nā rū̱pamanna̍sya̱ raso̱ yaśa̱ḥ śrīḥ śra̍yatā̱ṃ mayi̱ svāhā̍

---

Mantra 4 {#mantra-4}

Adhyāya: 39 | Mantra: 4

pra̱jāpa̍tiḥ saṃbhri̱yamā̍ṇaḥ sa̱mrāṭ saṃbhṛ̍to vaiśvade̱vaḥ sa̍ sa̱nno gha̱rmaḥ pravṛ̍kta̱steja̱ udya̍ta āśvi̱naḥ paya̍syānī̱yamā̍ne pū̱ṣā vi̍ṣya̱ndamā̍ne māru̱taḥ kvatha̍n | mai̱traḥ śara̍si saṃtā̱yyamā̍ne vāya̱vyo̍ hri̱yamā̍ṇa āgne̱yo hū̱yamā̍no̱ vāgghu̱taḥ

---

Mantra 5 {#mantra-5}

Adhyāya: 39 | Mantra: 5

sa̱vi̱tā pra̍tha̱me’ha̍nna̱gnirdvi̱tīye̍ vā̱yustṛ̱tīya̍ ādi̱tyaśca̍tu̱rthe ca̱ndramā̍ḥ pañca̱ma ṛ̱tuḥ ṣa̱ṣṭhe ma̱ruta̍ḥ sapta̱me bṛ̍ha̱spati̍raṣṭa̱me | mi̱tro na̍va̱me varu̍ṇo daśa̱ma indra̍ ekāda̱śe viśve̍ de̱vā dvā̍da̱śe

---

Mantra 6 {#mantra-6}

Adhyāya: 39 | Mantra: 6

u̱graśca̍ bhī̱maśca̱ dhvānta̍śca̱ dhuni̍śca | sā̱sa̱hvā ścā̍bhiyu̱gvā ca̍ vi̱kṣipa̱ḥ svāhā̍

---

Mantra 7 {#mantra-7}

Adhyāya: 39 | Mantra: 7

a̱gni hṛda̍yenā̱śani̍ hṛdayā̱greṇa̍ paśu̱pati̍ṃ kṛtsna̱hṛda̍yena bha̱vaṃ ya̱knā | śa̱rvaṃ mata̍snābhyā̱mīśā̍naṃ ma̱nyunā̍ mahāde̱vama̍ntaḥparśa̱vyeno̱graṃ de̱vaṃ va̍ni̱ṣṭhunā̍ vasiṣṭha̱hanu̱ḥ śiṅgī̍ni ko̱śyābhyā̍m

---

Mantra 8 {#mantra-8}

Adhyāya: 39 | Mantra: 8

u̱gram̐ lohi̍tena mi̱tra sau̍vratyena ru̱draṃ daurvra̍tye̱nendra̍ṃ prakrī̱l̤ena̍ ma̱ruto̱ bale̍na sā̱dhyānpra̱mudā̍ | bha̱vasya̱ kaṇṭhya̍ ru̱drasyā̍ntaḥpā̱rśvyaṃ ma̍hāde̱vasya̱ yakṛ̍ccha̱rvasya̍ vani̱ṣṭhuḥ pa̍śu̱pate̍ḥ purī̱tat

---

Mantra 9 {#mantra-9}

Adhyāya: 39 | Mantra: 9

loma̍bhya̱ḥ svāhā̱ loma̍bhya̱ḥ svāhā̍ tva̱ce svāhā̍ tva̱ce svāhā̱ lohi̍tāya̱ svāhā̱ lohi̍tāya̱ svāhā̱ meda̍se̱ svāhā̱ meda̍se̱ svāhā̍ | mā̱sebhya̱ḥ svāhā̍ mā̱sebhya̱ḥ svāhā̱ snāva̍bhya̱ḥ svāhā̱ snāva̍bhya̱ḥ svāhā̱sthabhya̱ḥ svāhā̱sthabhya̱ḥ svāhā̍ ma̱jjabhya̱ḥ svāhā̍ ma̱jjabhya̱ḥ svāhā̍ | reta̍se̱ svāhā̍ pā̱yave̱ svāhā̍

---

Mantra 10 {#mantra-10}

Adhyāya: 39 | Mantra: 10

ā̱yā̱sāya̱ svāhā̍ prāyā̱sāya̱ svāhā̍ saṃyā̱sāya̱ svāhā̍ viyā̱sāya̱ svāho̍dyā̱sāya̱ svāhā̍ | śu̱ce svāhā̱ śoca̍te̱ svāhā̱ śokā̍ya̱ svāhā̍

---

Mantra 11 {#mantra-11}

Adhyāya: 39 | Mantra: 11

tapa̍se̱ svāhā̱ tapya̍mānāya̱ svāhā̍ ta̱ptāya̱ svāhā̍ | niṣkṛ̍tyai̱ svāhā̱ prāya̍ścittyai̱ svāhā̍ bheṣa̱jāya̱ svāhā̍

---

Mantra 12 {#mantra-12}

Adhyāya: 39 | Mantra: 12

ya̱māya̱ svāhānta̍kāya̱ svāhā̍ mṛ̱tyave̱ svāhā̱ | bra̱hma̱ha̱tyāyai̱ svāhā̱ viśve̍bhyo de̱vebhya̱ḥ svāhā̱ dyāvā̍pṛthi̱vībhyā̱ svāhā̍

---