10 vairūpaḥ śataprabhedanaḥ| indraḥ| jagatī, 10 triṣṭup|
tama̍sya̱ dyāvā̍pṛthi̱vī sace̍tasā̱ viśve̍bhirde̱vairanu̱ śuṣma̍māvatām |
yadaitkṛ̍ṇvā̱no ma̍hi̱māna̍mindri̱yaṃ pī̱tvī soma̍sya̱ kratu̍mām̐ avardhata
||1||tama̍sya̱ viṣṇu̍rmahi̱māna̱moja̍sā̱ṃ'śuṃ da̍dha̱nvānmadhu̍no̱ vi ra̍pśate |
de̱vebhi̱rindro̍ ma̱ghavā̍ sa̱yāva̍bhirvṛ̱traṃ ja̍gha̱nvām̐ a̍bhava̱dvare̍ṇyaḥ
||2||vṛ̱treṇa̱ yadahi̍nā̱ bibhra̱dāyu̍dhā sa̱masthi̍thā yu̱dhaye̱ śaṃsa̍mā̱vide̍ |
viśve̍ te̱ atra̍ ma̱ruta̍: sa̱ha tmanā'va̍rdhannugra mahi̱māna̍mindri̱yam
||3||ja̱jñā̱na e̱va vya̍bādhata̱ spṛdha̱: prāpa̍śyadvī̱ro a̱bhi pauṃsya̱ṃ raṇa̍m |
avṛ̍śca̱dadri̱mava̍ sa̱syada̍: sṛja̱dasta̍bhnā̱nnāka̍ṃ svapa̱syayā̍ pṛ̱thum
||4||ādindra̍: sa̱trā tavi̍ṣīrapatyata̱ varī̍yo̱ dyāvā̍pṛthi̱vī a̍bādhata |
avā̍bharaddhṛṣi̱to vajra̍māya̱saṃ śeva̍ṃ mi̱trāya̱ varu̍ṇāya dā̱śuṣe̍
||5||indra̱syātra̱ tavi̍ṣībhyo vira̱pśina̍ ṛghāya̱to a̍raṃhayanta ma̱nyave̍ |
vṛ̱traṃ yadu̱gro vyavṛ̍śca̱doja̍sā̱'po bibhra̍ta̱ṃ tama̍sā̱ parī̍vṛtam
||6||yā vī̱ryā̍ṇi pratha̱māni̱ kartvā̍ mahi̱tvebhi̱ryata̍mānau samī̱yatu̍: |
dhvā̱ntaṃ tamo'va̍ dadhvase ha̱ta indro̍ ma̱hnā pū̱rvahū̍tāvapatyata
||7||viśve̍ de̱vāso̱ adha̱ vṛṣṇyā̍ni̱ te'va̍rdhaya̱ntsoma̍vatyā vaca̱syayā̍ |
ra̱ddhaṃ vṛ̱tramahi̱mindra̍sya̱ hanma̍nā̱'gnirna jambhai̍stṛ̱ṣvanna̍māvayat
||8||bhūri̱ dakṣe̍bhirvaca̱nebhi̱ṝkva̍bhiḥ sa̱khyebhi̍: sa̱khyāni̱ pra vo̍cata |
indro̱ dhuni̍ṃ ca̱ cumu̍riṃ ca da̱mbhaya̍ñchraddhāmana̱syā śṛ̍ṇute da̱bhīta̍ye
||9||tvaṃ pu̱rūṇyā bha̍rā̱ svaśvyā̱ yebhi̱rmaṃsai̍ ni̱vaca̍nāni̱ śaṃsa̍n |
su̱gebhi̱rviśvā̍ duri̱tā ta̍rema vi̱do ṣu ṇa̍ urvi̱yā gā̱dhama̱dya
||10||