8 mathito yāmāyanaḥ bhṛgurvāruṇirvā, bhārgavaścyavano vā| āpaḥ gāvo vā, 1 uttarārdharcasya agnīṣomau| anuṣṭup, 6 gāyatrī |
ni va̍rtadhva̱ṃ mānu̍ gātā̱'smāntsi̍ṣakta revatīḥ | agnī̍ṣomā punarvasū a̱sme dhā̍rayataṃ ra̱yim
||1||puna̍renā̱ ni va̍rtaya̱ puna̍renā̱ nyā ku̍ru | indra̍ eṇā̱ ni ya̍cchatva̱gnire̍nā u̱pāja̍tu
||2||puna̍re̱tā ni va̍rtantāma̱sminpu̍ṣyantu̱ gopa̍tau | i̱haivāgne̱ ni dhā̍raye̱ha ti̍ṣṭhatu̱ yā ra̱yiḥ
||3||yanni̱yāna̱ṃ nyaya̍naṃ sa̱ṃjñāna̱ṃ yatpa̱rāya̍ṇam | ā̱varta̍naṃ ni̱varta̍na̱ṃ yo go̱pā api̱ taṃ hu̍ve
||4||ya u̱dāna̱ḍvyaya̍na̱ṃ ya u̱dāna̍ṭ pa̱rāya̍ṇam | ā̱varta̍naṃ ni̱varta̍na̱mapi̍ go̱pā ni va̍rtatām
||5||ā ni̍varta̱ ni va̍rtaya̱ puna̍rna indra̱ gā de̍hi | jī̱vābhi̍rbhunajāmahai
||6||pari̍ vo vi̱śvato̍ dadha ū̱rjā ghṛ̱tena̱ paya̍sā | ye de̱vāḥ ke ca̍ ya̱jñiyā̱ste ra̱yyā saṃ sṛ̍jantu naḥ
||7||ā ni̍vartana vartaya̱ ni ni̍vartana vartaya | bhūmyā̱ścata̍sraḥ pra̱diśa̱stābhya̍ enā̱ ni va̍rtaya
||8||