12 medhātithiḥ kāṇvaḥ|(āprīsūktaṃ, agnirūpā devatā devatāḥ) 1 idhmaḥ samiddho'gnirvā, 2 tanūnapāt, 3 narāśaṃsaḥ, 4 ilaḥ, 5 barhiḥ, 6 devīrdvāraḥ, 7 uṣāsānaktā, 8 daivyo hotārau pracetasau, 9 tisro devyaḥ sarasvatīl̤ābhāratyaḥ, 10 tvaṣṭā, 11 vanaspatiḥ, 12 svāhā kṛtayaḥ | gāyatrī|
susa̍middho na̱ ā va̍ha de̱vām̐ a̍gne ha̱viṣma̍te | hota̍: pāvaka̱ yakṣi̍ ca
||1||madhu̍mantaṃ tanūnapād ya̱jñaṃ de̱veṣu̍ naḥ kave | a̱dyā kṛ̍ṇuhi vī̱taye̍
||2||narā̱śaṃsa̍mi̱ha pri̱yama̱smin ya̱jña upa̍ hvaye | madhu̍jihvaṃ havi̱ṣkṛta̍m
||3||agne̍ su̱khata̍me̱ rathe̍ de̱vām̐ ī̍l̤i̱ta ā va̍ha | asi̱ hotā̱ manu̍rhitaḥ
||4||stṛ̱ṇī̱ta ba̱rhirā̍nu̱ṣag ghṛ̱tapṛ̍ṣṭhaṃ manīṣiṇaḥ | yatrā̱mṛta̍sya̱ cakṣa̍ṇam
||5||vi śra̍yantāmṛtā̱vṛdho̱ dvāro̍ de̱vīra̍sa̱ścata̍: | a̱dyā nū̱naṃ ca̱ yaṣṭa̍ve
||6||nakto̱ṣāsā̍ su̱peśa̍sā̱ 'smin ya̱jña upa̍ hvaye | i̱daṃ no̍ ba̱rhirā̱sade̍
||7||tā su̍ji̱hvā upa̍ hvaye̱ hotā̍rā̱ daivyā̍ ka̱vī | ya̱jñaṃ no̍ yakṣatāmi̱mam
||8||il̤ā̱ sara̍svatī ma̱hī ti̱sro de̱vīrma̍yo̱bhuva̍: | ba̱rhiḥ sī̍dantva̱sridha̍:
||9||i̱ha tvaṣṭā̍ramagri̱yaṃ vi̱śvarū̍pa̱mupa̍ hvaye | a̱smāka̍mastu̱ keva̍laḥ
||10||ava̍ sṛjā vanaspate̱ deva̍ de̱vebhyo̍ ha̱viḥ | pra dā̱tura̍stu̱ ceta̍nam
||11||svāhā̍ ya̱jñaṃ kṛ̍ṇota̱nendrā̍ya̱ yajva̍no gṛ̱he | tatra̍ de̱vām̐ upa̍ hvaye
||12||