12 gotamo rāhūgaṇaḥ| marutaḥ| jagatī, 5, 12 triṣṭup|
pra ye śumbha̍nte̱ jana̍yo̱ na sapta̍yo̱ yāma̍n ru̱drasya̍ sū̱nava̍: su̱daṃsa̍saḥ |
roda̍sī̱ hi ma̱ruta̍ścakri̱re vṛ̱dhe mada̍nti vī̱rā vi̱dathe̍ṣu̱ ghṛṣva̍yaḥ
||1||ta u̍kṣi̱tāso̍ mahi̱māna̍māśata di̱vi ru̱drāso̱ adhi̍ cakrire̱ sada̍: |
arca̍nto a̱rkaṃ ja̱naya̍nta indri̱yamadhi̱ śriyo̍ dadhire̱ pṛśni̍mātaraḥ
||2||gomā̍taro̱ yacchu̱bhaya̍nte a̱ñjibhi̍sta̱nūṣu̍ śu̱bhrā da̍dhire vi̱rukma̍taḥ |
bādha̍nte̱ viśva̍mabhimā̱tina̱mapa̱ vartmā̍nyeṣā̱manu̍ rīyate ghṛ̱tam
||3||vi ye bhrāja̍nte̱ suma̍khāsa ṛ̱ṣṭibhi̍: pracyā̱vaya̍nto̱ acyu̍tā ci̱doja̍sā |
ma̱no̱juvo̱ yanma̍ruto̱ rathe̱ṣvā vṛṣa̍vrātāsa̱: pṛṣa̍tī̱rayu̍gdhvam
||4||pra yad rathe̍ṣu̱ pṛṣa̍tī̱rayu̍gdhva̱ṃ vāje̱ adri̍ṃ maruto ra̱ṃhaya̍ntaḥ |
u̱tāru̱ṣasya̱ vi ṣya̍nti̱ dhārā̱ścarme̍vo̱dabhi̱rvyu̍ndanti̱ bhūma̍
||5||ā vo̍ vahantu̱ sapta̍yo raghu̱ṣyado̍ raghu̱patvā̍na̱: pra ji̍gāta bā̱hubhi̍: |
sīda̱tā ba̱rhiru̱ru va̱: sada̍skṛ̱taṃ mā̱daya̍dhvaṃ maruto̱ madhvo̱ andha̍saḥ
||6||te̍'vardhanta̱ svata̍vaso mahitva̱nā nāka̍ṃ ta̱sthuru̱ru ca̍krire̱ sada̍: |
viṣṇu̱ryaddhāva̱dvṛṣa̍ṇaṃ mada̱cyuta̱ṃ vayo̱ na sī̍da̱nnadhi̍ ba̱rhiṣi̍ pri̱ye
||7||śūrā̍ i̱vedyu yuyu̍dhayo̱ na jagma̍yaḥ śrava̱syavo̱ na pṛta̍nāsu yetire |
bhaya̍nte̱ viśvā̱ bhuva̍nā ma̱rudbhyo̱ rājā̍na iva tve̱ṣasa̍ṃdṛśo̱ nara̍:
||8||tvaṣṭā̱ yad vajra̱ṃ sukṛ̍taṃ hira̱ṇyaya̍ṃ sa̱hasra̍bhṛṣṭi̱ṃ svapā̱ ava̍rtayat |
dha̱tta indro̱ naryapā̍ṃsi̱ karta̱ve 'ha̍n vṛ̱traṃ nira̱pāmau̍bjadarṇa̱vam
||9||ū̱rdhvaṃ nu̍nudre'va̱taṃ ta oja̍sā dādṛhā̱ṇaṃ ci̍d bibhidu̱rvi parva̍tam |
dhama̍nto vā̱ṇaṃ ma̱ruta̍: su̱dāna̍vo̱ made̱ soma̍sya̱ raṇyā̍ni cakrire
||10||ji̱hmaṃ nu̍nudre'va̱taṃ tayā̍ di̱śāsi̍ñca̱nnutsa̱ṃ gota̍māya tṛ̱ṣṇaje̍ |
ā ga̍cchantī̱mava̍sā ci̱trabhā̍nava̱: kāma̱ṃ vipra̍sya tarpayanta̱ dhāma̍bhiḥ
||11||yā va̱: śarma̍ śaśamā̱nāya̱ santi̍ tri̱dhātū̍ni dā̱śuṣe̍ yaccha̱tādhi̍ |
a̱smabhya̱ṃ tāni̍ maruto̱ vi ya̍nta ra̱yiṃ no̍ dhatta vṛṣaṇaḥ su̱vīra̍m
||12||