4 dīrghatamā aucathyaḥ| mitrāvaruṇau| triṣṭup|
yajā̍mahe vāṃ ma̱haḥ sa̱joṣā̍ ha̱vyebhi̍rmitrāvaruṇā̱ namo̍bhiḥ |
ghṛ̱tairghṛ̍tasnū̱ adha̱ yad vā̍ma̱sme a̍dhva̱ryavo̱ na dhī̱tibhi̱rbhara̍nti
||1||prastu̍tirvā̱ṃ dhāma̱ na prayu̍kti̱rayā̍mi mitrāvaruṇā suvṛ̱ktiḥ |
a̱nakti̱ yad vā̍ṃ vi̱dathe̍ṣu̱ hotā̍ su̱mnaṃ vā̍ṃ sū̱rirvṛ̍ṣaṇā̱viya̍kṣan
||2||pī̱pāya̍ dhe̱nuradi̍tirṛ̱tāya̱ janā̍ya mitrāvaruṇā havi̱rde |
hi̱noti̱ yad vā̍ṃ vi̱dathe̍ sapa̱ryan tsa rā̱taha̍vyo̱ mānu̍ṣo̱ na hotā̍
||3||u̱ta vā̍ṃ vi̱kṣu madyā̱svandho̱ gāva̱ āpa̍śca pīpayanta de̱vīḥ |
u̱to no̍ a̱sya pū̱rvyaḥ pati̱rdan vī̱taṃ pā̱taṃ paya̍sa u̱sriyā̍yāḥ
||4||