10 madhucchandā vaiśvāmitraḥ| indraḥ| gāyatrī|
indra̱midgā̱thino̍ bṛ̱hadindra̍ma̱rkebhi̍ra̱rkiṇa̍:| indra̱ṃ vāṇī̍ranūṣata
||1||indra̱ iddharyo̱: sacā̱ saṃmi̍śla̱ ā va̍co̱yujā̍| indro̍ va̱jrī hi̍ra̱ṇyaya̍:
||2||indro̍ dī̱rghāya̱ cakṣa̍sa̱ ā sūrya̍ṃ rohayad di̱vi| vi gobhi̱radri̍mairayat
||3||indra̱ vāje̍ṣu no'va sa̱hasra̍pradhaneṣu ca| u̱gra u̱grābhi̍rū̱tibhi̍:
||4||indra̍ṃ va̱yaṃ ma̍hādha̱na indra̱marbhe̍ havāmahe| yuja̍ṃ vṛ̱treṣu̍ va̱jriṇa̍m
||5||sa no̍ vṛṣanna̱muṃ ca̱ruṃ satrā̍dāva̱nnapā̍ vṛdhi| a̱smabhya̱mapra̍tiṣkutaḥ
||6||tu̱ñjetu̍ñje̱ ya utta̍re̱ stomā̱ indra̍sya va̱jriṇa̍:| na vi̍ndhe asya suṣṭu̱tim
||7||vṛṣā̍ yū̱theva̱ vaṃsa̍gaḥ kṛ̱ṣṭīri̍ya̱rtyoja̍sā| īśā̍no̱ apra̍tiṣkutaḥ
||8||ya eka̍ścarṣaṇī̱nāṃ vasū̍nāmira̱jyati̍| indra̱: pañca̍ kṣitī̱nām
||9||indra̍ṃ vo vi̱śvata̱spari̱ havā̍mahe̱ jane̍bhyaḥ| a̱smāka̍mastu̱ keva̍laḥ
||10||