Study
- Anukramaṇī
- Source
10 kaṇvo ghauraḥ| pūṣā| gāyatrī|
saṃ pū̍ṣa̱nnadhva̍nastira̱ vyaṃho̍ vimuco napāt | sakṣvā̍ deva̱ pra ṇa̍spu̱raḥ
||1||सं पू॑ष॒न्नध्व॑नस्तिर॒ व्यंहो॑ विमुचो नपात् । सक्ष्वा॑ देव॒ प्र ण॑स्पु॒रः
yo na̍: pūṣanna̱gho vṛko̍ du̱:śeva̍ ā̱dide̍śati | apa̍ sma̱ taṃ pa̱tho ja̍hi
||2||यो न॑: पूषन्न॒घो वृको॑ दु॒:शेव॑ आ॒दिदे॑शति । अप॑ स्म॒ तं प॒थो ज॑हि
apa̱ tyaṃ pa̍ripa̱nthina̍ṃ muṣī̱vāṇa̍ṃ hura̱ścita̍m | dū̱ramadhi̍ sru̱tera̍ja
||3||अप॒ त्यं प॑रिप॒न्थिनं॑ मुषी॒वाणं॑ हुर॒श्चित॑म् । दू॒रमधि॑ स्रु॒तेर॑ज
tvaṃ tasya̍ dvayā̱vino̱ 'ghaśa̍ṃsasya̱ kasya̍ cit | pa̱dābhi ti̍ṣṭha̱ tapu̍ṣim
||4||त्वं तस्य॑ द्वया॒विनो॒ ऽघशं॑सस्य॒ कस्य॑ चित् । प॒दाभि ति॑ष्ठ॒ तपु॑षिम्
ā tatte̍ dasra mantuma̱: pūṣa̱nnavo̍ vṛṇīmahe | yena̍ pi̱tṝnaco̍dayaḥ
||5||आ तत्ते॑ दस्र मन्तुम॒: पूष॒न्नवो॑ वृणीमहे । येन॑ पि॒तॄनचो॑दयः
adhā̍ no viśvasaubhaga̱ hira̍ṇyavāśīmattama | dhanā̍ni su̱ṣaṇā̍ kṛdhi
||6||अधा॑ नो विश्वसौभग॒ हिर॑ण्यवाशीमत्तम । धना॑नि सु॒षणा॑ कृधि
ati̍ naḥ sa̱ścato̍ naya su̱gā na̍: su̱pathā̍ kṛṇu | pūṣa̍nni̱ha kratu̍ṃ vidaḥ
||7||अति॑ नः स॒श्चतो॑ नय सु॒गा न॑: सु॒पथा॑ कृणु । पूष॑न्नि॒ह क्रतुं॑ विदः
a̱bhi sū̱yava̍saṃ naya̱ na na̍vajvā̱ro adhva̍ne | pūṣa̍nni̱ha kratu̍ṃ vidaḥ
||8||अ॒भि सू॒यव॑सं नय॒ न न॑वज्वा॒रो अध्व॑ने । पूष॑न्नि॒ह क्रतुं॑ विदः
śa̱gdhi pū̱rdhi pra ya̍ṃsi ca śiśī̱hi prāsyu̱dara̍m | pūṣa̍nni̱ha kratu̍ṃ vidaḥ
||9||श॒ग्धि पू॒र्धि प्र यं॑सि च शिशी॒हि प्रास्यु॒दर॑म् । पूष॑न्नि॒ह क्रतुं॑ विदः
na pū̱ṣaṇa̍ṃ methāmasi sū̱ktaira̱bhi gṛ̍ṇīmasi | vasū̍ni da̱smamī̍mahe
||10||न पू॒षणं॑ मेथामसि सू॒क्तैर॒भि गृ॑णीमसि । वसू॑नि द॒स्ममी॑महे