13 dīrghatamā aucathyaḥ| (āprīsūktaṃ)-1 idhmaḥ samiddho'gnirvā, 2 tanūna pāt, 3 narāśaṃsaḥ, 4 il̤aḥ, 5 barhiḥ, 6 devīḥ dvāraḥ, 7 uṣāsānaktā 8 daivyo hotārau pracetasau, 9 tisro devyaḥ sarasvatīl̤ā bhāratyaḥ, 10 tvaṣṭā, 11 vanaspatiḥ, 12 svāhā kṛtayaḥ, 13 indraḥ| anuṣṭup|
sami̍ddho agna̱ ā va̍ha de̱vām̐ a̱dya ya̱tasru̍ce | tantu̍ṃ tanuṣva pū̱rvyaṃ su̱taso̍māya dā̱śuṣe̍
||1||ghṛ̱tava̍nta̱mupa̍ māsi̱ madhu̍mantaṃ tanūnapāt | ya̱jñaṃ vipra̍sya̱ māva̍taḥ śaśamā̱nasya̍ dā̱śuṣa̍:
||2||śuci̍: pāva̱ko adbhu̍to̱ madhvā̍ ya̱jñaṃ mi̍mikṣati | narā̱śaṃsa̱strirā di̱vo de̱vo de̱veṣu̍ ya̱jñiya̍:
||3||ī̱l̤i̱to a̍gna̱ ā va̱hendra̍ṃ ci̱trami̱ha pri̱yam | i̱yaṃ hi tvā̍ ma̱tirmamācchā̍ sujihva va̱cyate̍
||4||stṛ̱ṇā̱nāso̍ ya̱tasru̍co ba̱rhirya̱jñe sva̍dhva̱re | vṛ̱ñje de̱vavya̍castama̱mindrā̍ya̱ śarma̍ sa̱pratha̍:
||5||vi śra̍yantāmṛtā̱vṛdha̍: pra̱yai de̱vebhyo̍ ma̱hīḥ | pā̱va̱kāsa̍: puru̱spṛho̱ dvāro̍ de̱vīra̍sa̱ścata̍:
||6||ā bhanda̍māne̱ upā̍ke̱ nakto̱ṣāsā̍ su̱peśa̍sā | ya̱hvī ṛ̱tasya̍ mā̱tarā̱ sīda̍tāṃ ba̱rhirā su̱mat
||7||ma̱ndraji̍hvā jugu̱rvaṇī̱ hotā̍rā̱ daivyā̍ ka̱vī | ya̱jñaṃ no̍ yakṣatāmi̱maṃ si̱dhrama̱dya di̍vi̱spṛśa̍m
||8||śuci̍rde̱veṣvarpi̍tā̱ hotrā̍ ma̱rutsu̱ bhāra̍tī | il̤ā̱ sara̍svatī ma̱hī ba̱rhiḥ sī̍dantu ya̱jñiyā̍:
||9||tanna̍stu̱rīpa̱madbhu̍taṃ pu̱ru vāra̍ṃ pu̱ru tmanā̍ | tvaṣṭā̱ poṣā̍ya̱ vi ṣya̍tu rā̱ye nābhā̍ no asma̱yuḥ
||10||a̱va̱sṛ̱jannupa̱ tmanā̍ de̱vān ya̍kṣi vanaspate | a̱gnirha̱vyā su̍ṣūdati de̱vo de̱veṣu̱ medhi̍raḥ
||11||pū̱ṣa̱ṇvate̍ ma̱rutva̍te vi̱śvade̍vāya vā̱yave̍ | svāhā̍ gāya̱trave̍pase ha̱vyamindrā̍ya kartana
||12||svāhā̍kṛtā̱nyā ga̱hyupa̍ ha̱vyāni̍ vī̱taye̍ | indrā ga̍hi śru̱dhī hava̱ṃ tvāṃ ha̍vante adhva̱re
||13||