10 madhucchandā vaiśvāmitraḥ| indraḥ| gāyatrī|
indrehi̱ matsyandha̍so̱ viśve̍bhiḥ soma̱parva̍bhiḥ| ma̱hām̐ a̍bhi̱ṣṭiroja̍sā
||1||eme̍naṃ sṛjatā su̱te ma̱ndimindrā̍ya ma̱ndine̍| cakri̱ṃ viśvā̍ni̱ cakra̍ye
||2||matsvā̍ suśipra ma̱ndibhi̱: stome̍bhirviśvacarṣaṇe| sacai̱ṣu sava̍ne̱ṣvā
||3||asṛ̍gramindra te̱ gira̱: prati̱ tvāmuda̍hāsata| ajo̍ṣā vṛṣa̱bhaṃ pati̍m
||4||saṃ co̍daya ci̱trama̱rvāg rādha̍ indra̱ vare̍ṇyam| asa̱dit te̍ vi̱bhu pra̱bhu
||5||a̱smāntsu tatra̍ coda̱yendra̍ rā̱ye rabha̍svataḥ| tuvi̍dyumna̱ yaśa̍svataḥ
||6||saṃ goma̍dindra̱ vāja̍vada̱sme pṛ̱thu śravo̍ bṛ̱hat| vi̱śvāyu̍rdhe̱hyakṣi̍tam
||7||a̱sme dhe̍hi̱ śravo̍ bṛ̱had dyu̱mnaṃ sa̍hasra̱sāta̍mam| indra̱ tā ra̱thinī̱riṣa̍:
||8||vaso̱rindra̱ṃ vasu̍patiṃ gī̱rbhirgṛ̱ṇanta̍ ṛ̱gmiya̍m| homa̱ gantā̍ramū̱taye̍
||9||su̱te su̍te̱ nyo̍kase bṛ̱had bṛ̍ha̱ta eda̱riḥ| indrā̍ya śū̱ṣama̍rcati
||10||