9 nodhā gautamaḥ| agniḥ| jagatī, 6-9 triṣṭup|
nū ci̍t saho̱jā a̱mṛto̱ ni tu̍ndate̱ hotā̱ yad dū̱to abha̍vad vi̱vasva̍taḥ |
vi sādhi̍ṣṭhebhiḥ pa̱thibhī̱ rajo̍ mama̱ ā de̱vatā̍tā ha̱viṣā̍ vivāsati
||1||ā svamadma̍ yu̱vamā̍no a̱jara̍stṛ̱ṣva̍vi̱ṣyanna̍ta̱seṣu̍ tiṣṭhati |
atyo̱ na pṛ̱ṣṭhaṃ pru̍ṣi̱tasya̍ rocate di̱vo na sānu̍ sta̱naya̍nnacikradat
||2||krā̱ṇā ru̱drebhi̱rvasu̍bhiḥ pu̱rohi̍to̱ hotā̱ niṣa̍tto rayi̱ṣāl̤ama̍rtyaḥ |
ratho̱ na vi̱kṣvṛ̍ñjasā̱na ā̱yuṣu̱ vyā̍nu̱ṣagvāryā̍ de̱va ṛ̍ṇvati
||3||vi vāta̍jūto ata̱seṣu̍ tiṣṭhate̱ vṛthā̍ ju̱hūbhi̱: sṛṇyā̍ tuvi̱ṣvaṇi̍: |
tṛ̱ṣu yada̍gne va̱nino̍ vṛṣā̱yase̍ kṛ̱ṣṇaṃ ta̱ ema̱ ruśa̍dūrme ajara
||4||tapu̍rjambho̱ vana̱ ā vāta̍codito yū̱the na sā̱hvām̐ ava̍ vāti̱ vaṃsa̍gaḥ |
a̱bhi̱vraja̱nnakṣi̍ta̱ṃ pāja̍sā̱ raja̍: sthā̱tuśca̱ratha̍ṃ bhayate pata̱triṇa̍:
||5||da̱dhuṣṭvā̱ bhṛga̍vo̱ mānu̍ṣe̱ṣvā ra̱yiṃ na cāru̍ṃ su̱hava̱ṃ jane̍bhyaḥ |
hotā̍ramagne̱ ati̍thi̱ṃ vare̍ṇyaṃ mi̱traṃ na śeva̍ṃ di̱vyāya̱ janma̍ne
||6||hotā̍raṃ sa̱pta ju̱hvo̱ 3 yaji̍ṣṭha̱ṃ yaṃ vā̱ghato̍ vṛ̱ṇate̍ adhva̱reṣu̍ |
a̱gniṃ viśve̍ṣāmara̱tiṃ vasū̍nāṃ sapa̱ryāmi̱ praya̍sā̱ yāmi̱ ratna̍m
||7||acchi̍drā sūno sahaso no a̱dya sto̱tṛbhyo̍ mitramaha̱: śarma̍ yaccha |
agne̍ gṛ̱ṇanta̱maṃha̍sa uru̱ṣyorjo̍ napāt pū̱rbhirāya̍sībhiḥ
||8||bhavā̱ varū̍thaṃ gṛṇa̱te vi̍bhāvo̱ bhavā̍ maghavan ma̱ghava̍dbhya̱: śarma̍ |
u̱ru̱ṣyāgne̱ aṃha̍so gṛ̱ṇanta̍ṃ prā̱tarma̱kṣū dhi̱yāva̍surjagamyāt
||9||