ambāyajñavidhivarṇanam
rājovāca
vada yajñavidhiṃ samyagdevyāstasyāḥ samantataḥ |
śrutvā karomyahaṃ svāminyathāśakti hyatandritaḥ
||1||वद यज्ञविधिं सम्यग्देव्यास्तस्याः समन्ततः ।
श्रुत्वा करोम्यहं स्वामिन्यथाशक्ति ह्यतन्द्रितः
pūjāvidhiṃ ca mantrāṃśca homadravyamasaṃśayam |
brāhmaṇāḥ katisaṃkhyāśca dakṣiṇāścatathā punaḥ
||2||पूजाविधिं च मन्त्रांश्च होमद्रव्यमसंशयम् ।
ब्राह्मणाः कतिसंख्याश्च दक्षिणाश्चतथा पुनः
vyāsa uvāca
śṛṇu rājan pravakṣyāmi devyā yajñaṃ vidhānataḥ |
trividhaṃ tu sadā jñeyaṃ vidhidṛṣṭena karmaṇā
||3||शृणु राजन् प्रवक्ष्यामि देव्या यज्ञं विधानतः ।
त्रिविधं तु सदा ज्ञेयं विधिदृष्टेन कर्मणा
sāttvikaṃ rājasaṃ caiva tāmasaṃ ca tathāparam |
munīnāṃ sāttvikaṃ proktaṃ nṛpāṇāṃ rājasaṃ smṛtam
||4||सात्त्विकं राजसं चैव तामसं च तथापरम् ।
मुनीनां सात्त्विकं प्रोक्तं नृपाणां राजसं स्मृतम्
tāmasaṃ rākṣasānāṃ vai jñānināṃ tu guṇojjhitam |
vimuktānāṃ jñānamayaṃ vistarātprabravīmi te
||5||तामसं राक्षसानां वै ज्ञानिनां तु गुणोज्झितम् ।
विमुक्तानां ज्ञानमयं विस्तरात्प्रब्रवीमि ते
deśaḥ kālastathā dravyaṃ mantrāśca brāhmaṇāstathā |
śraddhā ca sātvakī yatra taṃ yajñaṃ sāttvikaṃ viduḥ
||6||देशः कालस्तथा द्रव्यं मन्त्राश्च ब्राह्मणास्तथा ।
श्रद्धा च सात्वकी यत्र तं यज्ञं सात्त्विकं विदुः
dravyaśuddhiḥ kriyāśuddhirmantraśuddhiśca bhūmipa |
bhavedyadi tadā pūrṇaṃ phalaṃ bhavati nānyathā
||7||द्रव्यशुद्धिः क्रियाशुद्धिर्मन्त्रशुद्धिश्च भूमिप ।
भवेद्यदि तदा पूर्णं फलं भवति नान्यथा
anyāyopārjitenaiva kartavyaṃ sukṛtaṃ kṛtam |
na kīrtiriha loke ca paraloke na tatphalam
||8||अन्यायोपार्जितेनैव कर्तव्यं सुकृतं कृतम् ।
न कीर्तिरिह लोके च परलोके न तत्फलम्
tasmānnyāyārjitenaiva kartavyaṃ sukṛtaṃ sadā |
yaśase paralokāya bhavatyeva sukhāya ca
||9||तस्मान्न्यायार्जितेनैव कर्तव्यं सुकृतं सदा ।
यशसे परलोकाय भवत्येव सुखाय च
pratyakṣaṃ tava rājendra pāṇḍavaistu makhaḥ kṛtaḥ |
rājasūyaḥ kratuvaraḥ samāptavaradakṣiṇaḥ
||10||प्रत्यक्षं तव राजेन्द्र पाण्डवैस्तु मखः कृतः ।
राजसूयः क्रतुवरः समाप्तवरदक्षिणः
yatra sākṣāddhariḥ kṛṣṇo yādavendro mahāmanāḥ |
brāhmaṇāḥ pūrṇavidyāśca bhāradvājādayastathā
||11||यत्र साक्षाद्धरिः कृष्णो यादवेन्द्रो महामनाः ।
ब्राह्मणाः पूर्णविद्याश्च भारद्वाजादयस्तथा
kṛtvā yajñaṃ susampūrṇaṃ māsamātreṇa pāṇḍavaiḥ |
prāptaṃ mahattaraṃ kaṣṭaṃ vanavāsaśca dāruṇaḥ
||12||कृत्वा यज्ञं सुसम्पूर्णं मासमात्रेण पाण्डवैः ।
प्राप्तं महत्तरं कष्टं वनवासश्च दारुणः
pīḍanañcaiva pāñcālyāstathā dyūte parājayaḥ |
vanavāso mahatkaṣṭaṃ kva gataṃ makhajaṃ phalam
||13||पीडनञ्चैव पाञ्चाल्यास्तथा द्यूते पराजयः ।
वनवासो महत्कष्टं क्व गतं मखजं फलम्
dāsatvañca virāṭasya kṛtaṃ sarvamahātmabhiḥ |
kīcakena parikliṣṭā draupadī ca pramadvarā
||14||दासत्वञ्च विराटस्य कृतं सर्वमहात्मभिः ।
कीचकेन परिक्लिष्टा द्रौपदी च प्रमद्वरा
āśīrvādā dvijātīnāṃ kva gatāḥ śuddhacetasām |
bhaktirvā vāsudevasya kva gatā tatra saṃkaṭe
||15||आशीर्वादा द्विजातीनां क्व गताः शुद्धचेतसाम् ।
भक्तिर्वा वासुदेवस्य क्व गता तत्र संकटे
na rakṣitā tadā bālā kenāpi drupadātmajā |
prāptakeśagrahā kāle sādhvī ca varavarṇinī
||16||न रक्षिता तदा बाला केनापि द्रुपदात्मजा ।
प्राप्तकेशग्रहा काले साध्वी च वरवर्णिनी
kimatra cintanīyaṃ vai dharmavaiguṇyakāraṇam |
keśave sati deveśe dharmaputre yudhiṣṭhire
||17||किमत्र चिन्तनीयं वै धर्मवैगुण्यकारणम् ।
केशवे सति देवेशे धर्मपुत्रे युधिष्ठिरे
bhavitavyamiti prokte niṣphalaḥ syāttadāgamaḥ |
vedamantrāstathānye ca vitathāḥ syurasaṃśayam
||18||भवितव्यमिति प्रोक्ते निष्फलः स्यात्तदागमः ।
वेदमन्त्रास्तथान्ये च वितथाः स्युरसंशयम्
sādhanaṃ niṣphalaṃ sarvamupāyaśca nirarthakaḥ |
bhavitavyaṃ bhavatyeva vacane pratipādake
||19||साधनं निष्फलं सर्वमुपायश्च निरर्थकः ।
भवितव्यं भवत्येव वचने प्रतिपादके
āgamo'pyarthavādaḥ syātkriyāḥ sarvā nirarthakāḥ |
svargārthañca tapo vyarthaṃ varṇadharmaśca vai tathā
||20||आगमोऽप्यर्थवादः स्यात्क्रियाः सर्वा निरर्थकाः ।
स्वर्गार्थञ्च तपो व्यर्थं वर्णधर्मश्च वै तथा
sarvaṃ pramāṇaṃ vyarthaṃ syādbhavitavye kṛte hṛdi |
ubhayañcāpi mantavyaṃ daivaṃ copāya eva ca
||21||सर्वं प्रमाणं व्यर्थं स्याद्भवितव्ये कृते हृदि ।
उभयञ्चापि मन्तव्यं दैवं चोपाय एव च
kṛte karmaṇi cetsiddhirviparitā yadā bhavet |
vaiguṇyaṃ kalpanīyaṃ syātprājñaiḥ paṇḍitamaulibhiḥ
||22||कृते कर्मणि चेत्सिद्धिर्विपरिता यदा भवेत् ।
वैगुण्यं कल्पनीयं स्यात्प्राज्ञैः पण्डितमौलिभिः
tatkarma bahudhā proktaṃ vidvadbhiḥ karmakāribhiḥ |
kartṛbhedānmantrabhedāddravyabhedāttathā punaḥ
||23||तत्कर्म बहुधा प्रोक्तं विद्वद्भिः कर्मकारिभिः ।
कर्तृभेदान्मन्त्रभेदाद्द्रव्यभेदात्तथा पुनः
yathā maghavatā pūrvaṃ viśvarūpo vṛto guruḥ |
viparītaṃ kṛtaṃ tena karma mātṛhitāya vai
||24||यथा मघवता पूर्वं विश्वरूपो वृतो गुरुः ।
विपरीतं कृतं तेन कर्म मातृहिताय वै
devebhyo dānavebhyastu svastītyuktvā punaḥ punaḥ |
asurā mātṛpakṣīyāḥ kṛtaṃ teṣāñca rakṣaṇam
||25||देवेभ्यो दानवेभ्यस्तु स्वस्तीत्युक्त्वा पुनः पुनः ।
असुरा मातृपक्षीयाः कृतं तेषाञ्च रक्षणम्
daityān dṛṣṭvātisampuṣṭāṃścukopa maghavā tadā |
śirāṃsi tasya vajreṇa ciccheda tarasā hariḥ
||26||दैत्यान् दृष्ट्वातिसम्पुष्टांश्चुकोप मघवा तदा ।
शिरांसि तस्य वज्रेण चिच्छेद तरसा हरिः
kriyāvaiguṇyamatraiva kartṛbhedādasaṃśayam |
nocetpañcālarājena roṣeṇāpi kṛtā kriyā
||27||क्रियावैगुण्यमत्रैव कर्तृभेदादसंशयम् ।
नोचेत्पञ्चालराजेन रोषेणापि कृता क्रिया
bhāradvājavināśāya putrasyotpādanāya ca |
dhṛṣṭadyumnaḥ samutpanno vedimadhyācca draupadī
||28||भारद्वाजविनाशाय पुत्रस्योत्पादनाय च ।
धृष्टद्युम्नः समुत्पन्नो वेदिमध्याच्च द्रौपदी
purā daśarathenāpi putreṣṭistu kṛtā yadā |
aputrasya sutāstasya catvāraḥ samprajajñire
||29||पुरा दशरथेनापि पुत्रेष्टिस्तु कृता यदा ।
अपुत्रस्य सुतास्तस्य चत्वारः सम्प्रजज्ञिरे
ataḥ kriyā kṛtā yuktyā siddhidā sarvathā bhavet |
ayuktyā viparitā syātsarvathā nṛpasattama
||30||अतः क्रिया कृता युक्त्या सिद्धिदा सर्वथा भवेत् ।
अयुक्त्या विपरिता स्यात्सर्वथा नृपसत्तम
pāṇḍavānāṃ yathā yajñe kiñcidvaiguṇyayogataḥ |
viparītaṃ phalaṃ prāptaṃ nirjitāste durodare
||31||पाण्डवानां यथा यज्ञे किञ्चिद्वैगुण्ययोगतः ।
विपरीतं फलं प्राप्तं निर्जितास्ते दुरोदरे
satyavādī tathā rājan dharmaputro yudhiṣṭhiraḥ |
draupadī ca tathā sādhvī tathānyepyanujāḥ śubhāḥ
||32||सत्यवादी तथा राजन् धर्मपुत्रो युधिष्ठिरः ।
द्रौपदी च तथा साध्वी तथान्येप्यनुजाः शुभाः
kudravyayogādvaiguṇyaṃ samutpannaṃ makhe'thavā |
sābhimānaiḥ kṛtādvāpi dūṣaṇaṃ samupasthitam
||33||कुद्रव्ययोगाद्वैगुण्यं समुत्पन्नं मखेऽथवा ।
साभिमानैः कृताद्वापि दूषणं समुपस्थितम्
sāttvikastu mahārāja durlabho vai makhaḥ smṛtaḥ |
vaikhānasamunīnāṃ hi vihito'sau mahāmakhaḥ
||34||सात्त्विकस्तु महाराज दुर्लभो वै मखः स्मृतः ।
वैखानसमुनीनां हि विहितोऽसौ महामखः
sāttvikaṃ bhojanaṃ ye vai nityaṃ kurvanti tāpasāḥ |
nyāyārjitañca vanyañca tathā ṛṣyaṃ susaṃskṛtam
||35||सात्त्विकं भोजनं ये वै नित्यं कुर्वन्ति तापसाः ।
न्यायार्जितञ्च वन्यञ्च तथा ऋष्यं सुसंस्कृतम्
puroḍāśaparā nityaṃ viyūpā mantrapūrvakāḥ |
śraddhādhikā makhā rājan sāttvikāḥ paramāḥ smṛtāḥ
||36||पुरोडाशपरा नित्यं वियूपा मन्त्रपूर्वकाः ।
श्रद्धाधिका मखा राजन् सात्त्विकाः परमाः स्मृताः
rājasā dravyabahulāḥ sayūpāśca susaṃskṛtāḥ |
kṣatriyāṇāṃ viśāñcaiva sābhimānāśca vai makhāḥ
||37||राजसा द्रव्यबहुलाः सयूपाश्च सुसंस्कृताः ।
क्षत्रियाणां विशाञ्चैव साभिमानाश्च वै मखाः
tāmasā dānavānāṃ vai sakrodhā madavardhakāḥ |
sāmarṣāḥ saṃskṛtāḥ krūrā makhāḥ proktā mahātmabhiḥ
||38||तामसा दानवानां वै सक्रोधा मदवर्धकाः ।
सामर्षाः संस्कृताः क्रूरा मखाः प्रोक्ता महात्मभिः
munīnāṃ mokṣakāmānāṃ viraktānāṃ mahātmanām |
mānasastu smṛto yāgaḥ sarvasādhanasaṃyutaḥ
||39||मुनीनां मोक्षकामानां विरक्तानां महात्मनाम् ।
मानसस्तु स्मृतो यागः सर्वसाधनसंयुतः
anyeṣu sarvayajñeṣu kiñcinnyūnaṃ bhavedapi |
dravyeṇa śraddhayā vā'pi kriyayā brāhmaṇaistathā
||40||अन्येषु सर्वयज्ञेषु किञ्चिन्न्यूनं भवेदपि ।
द्रव्येण श्रद्धया वाऽपि क्रियया ब्राह्मणैस्तथा
deśakālapṛthagdravyasādhanaiḥ sakalaistathā |
nānyo bhavati pūrṇe vai tathā bhavati mānasaḥ
||41||देशकालपृथग्द्रव्यसाधनैः सकलैस्तथा ।
नान्यो भवति पूर्णे वै तथा भवति मानसः
prathamaṃ tu manaḥ śodhyaṃ kartavyaṃ guṇavarjitam |
śuddhe manasi deho vai śuddha eva na saṃśayaḥ
||42||प्रथमं तु मनः शोध्यं कर्तव्यं गुणवर्जितम् ।
शुद्धे मनसि देहो वै शुद्ध एव न संशयः
indriyārthaparityaktaṃ yadā jātaṃ manaḥ śuci |
tadā tasya makhasyāsau prabhavedadhikāravān
||43||इन्द्रियार्थपरित्यक्तं यदा जातं मनः शुचि ।
तदा तस्य मखस्यासौ प्रभवेदधिकारवान्
tadā'sau maṇḍapaṃ kṛtvā bahuyojanavistṛtam |
stambhaiśca vipulaiḥ ślakṣṇairyajñiyadrumasambhavaiḥ
||44||तदाऽसौ मण्डपं कृत्वा बहुयोजनविस्तृतम् ।
स्तम्भैश्च विपुलैः श्लक्ष्णैर्यज्ञियद्रुमसम्भवैः
vedīṃ ca viśadāṃ tatra manasā parikalpayet |
agnayo'pi tathā sthāpyā vidhivanmanasā kila
||45||वेदीं च विशदां तत्र मनसा परिकल्पयेत् ।
अग्नयोऽपि तथा स्थाप्या विधिवन्मनसा किल
brāhmaṇānāñca varaṇaṃ tathaiva pratipādya ca |
brahmādhvaryustathā hotā prastotā vidhipūrvakam
||46||ब्राह्मणानाञ्च वरणं तथैव प्रतिपाद्य च ।
ब्रह्माध्वर्युस्तथा होता प्रस्तोता विधिपूर्वकम्
udgātā pratihartā ca sabhyāścānye yathāvidhi |
pūjanīyāḥ prayatnena manasaiva dvijottamāḥ
||47||उद्गाता प्रतिहर्ता च सभ्याश्चान्ये यथाविधि ।
पूजनीयाः प्रयत्नेन मनसैव द्विजोत्तमाः
prāṇo'pānastathā vyānaḥ samānodāna eva ca |
pāvakāḥ pañca evaite sthāpyā vedyāṃ vidhānataḥ
||48||प्राणोऽपानस्तथा व्यानः समानोदान एव च ।
पावकाः पञ्च एवैते स्थाप्या वेद्यां विधानतः
gārhapatyastadā prāṇo'pānaścāhavanīyakaḥ |
dakṣiṇāgnistathā vyānaḥ samānaścāvasathyakaḥ
||49||गार्हपत्यस्तदा प्राणोऽपानश्चाहवनीयकः ।
दक्षिणाग्निस्तथा व्यानः समानश्चावसथ्यकः
sabhyodānaḥ smṛtā hyete pāvakāḥ paramotkaṭāḥ |
dravyañca manasā bhāvyaṃ nirguṇaṃ paramaṃ śuci
||50||सभ्योदानः स्मृता ह्येते पावकाः परमोत्कटाः ।
द्रव्यञ्च मनसा भाव्यं निर्गुणं परमं शुचि
mana eva tadā hotā yajamānastathaiva tat |
yajñādhidevatā brahma nirguṇaṃ ca sanātanam
||51||मन एव तदा होता यजमानस्तथैव तत् ।
यज्ञाधिदेवता ब्रह्म निर्गुणं च सनातनम्
phaladā nirguṇā śaktiḥ sadā nirvedadā śivā |
brahmavidyākhilādhārā vyāpya sarvatra saṃsthitā
||52||फलदा निर्गुणा शक्तिः सदा निर्वेददा शिवा ।
ब्रह्मविद्याखिलाधारा व्याप्य सर्वत्र संस्थिता
taduddeśena taddravyaṃ hunetprāṇāgniṣu dvijaḥ |
paścāccittaṃ nirālambaṃ kṛtvā prāṇānapi prabho
||53||तदुद्देशेन तद्द्रव्यं हुनेत्प्राणाग्निषु द्विजः ।
पश्चाच्चित्तं निरालम्बं कृत्वा प्राणानपि प्रभो
kuṇḍalīmukhamārgeṇa hunedbrahmaṇi śāśvate |
svānubhūtyā svayaṃ sākṣātsvātmabhūtāṃ maheśvarīm
||54||कुण्डलीमुखमार्गेण हुनेद्ब्रह्मणि शाश्वते ।
स्वानुभूत्या स्वयं साक्षात्स्वात्मभूतां महेश्वरीम्
samādhinaiva yogena dhyāyeccetasyanākulaḥ |
sarvabhūtasthamātmānaṃ sarvabhūtāni cātmani
||55||समाधिनैव योगेन ध्यायेच्चेतस्यनाकुलः ।
सर्वभूतस्थमात्मानं सर्वभूतानि चात्मनि
yadā paśyati bhūtātmā tadā paśyati tāṃ śivām |
dṛṣṭvā tāṃ brahmavidbhūyātsaccidānandarūpiṇīm
||56||यदा पश्यति भूतात्मा तदा पश्यति तां शिवाम् ।
दृष्ट्वा तां ब्रह्मविद्भूयात्सच्चिदानन्दरूपिणीम्
tadā māyādikaṃ sarvaṃ dagdhaṃ bhavati bhūmipa |
prārabdhaṃ karmamātraṃ tu yāvaddehaṃ ca tiṣṭhati
||57||तदा मायादिकं सर्वं दग्धं भवति भूमिप ।
प्रारब्धं कर्ममात्रं तु यावद्देहं च तिष्ठति
jīvanmuktastadā jāto mṛto mokṣamavāpnuyāt |
kṛtakṛtyo bhavettāta yo bhajejjagadambikām
||58||जीवन्मुक्तस्तदा जातो मृतो मोक्षमवाप्नुयात् ।
कृतकृत्यो भवेत्तात यो भजेज्जगदम्बिकाम्
tasmātsarvaprayatnena dhyeyā śrībhuvaneśvarī |
śrotavyā caiva mantavyā guruvākyānusārataḥ
||59||तस्मात्सर्वप्रयत्नेन ध्येया श्रीभुवनेश्वरी ।
श्रोतव्या चैव मन्तव्या गुरुवाक्यानुसारतः
rājannevaṃ kṛto yajño mokṣado nātra saṃśayaḥ |
anye yajñāḥ sakāmāstu prabhavanti kṣayonmukhāḥ
||60||राजन्नेवं कृतो यज्ञो मोक्षदो नात्र संशयः ।
अन्ये यज्ञाः सकामास्तु प्रभवन्ति क्षयोन्मुखाः
agniṣṭomena vidhivatsvargakāmo yajediti |
vedānuśāsanaṃ caitatpravadanti manīṣiṇaḥ
||61||अग्निष्टोमेन विधिवत्स्वर्गकामो यजेदिति ।
वेदानुशासनं चैतत्प्रवदन्ति मनीषिणः
kṣīṇe puṇye mṛtyulokaṃ viśanti ca yathāmati |
tasmāttu mānasaḥ śreṣṭho yajño'pyakṣaya eva saḥ
||62||क्षीणे पुण्ये मृत्युलोकं विशन्ति च यथामति ।
तस्मात्तु मानसः श्रेष्ठो यज्ञोऽप्यक्षय एव सः
na rājñā sādhituṃ yogyo makho'sau jayamicchatā |
tāmasastu kṛtaḥ pūrvaṃ sarpayajñastvayādhunā
||63||न राज्ञा साधितुं योग्यो मखोऽसौ जयमिच्छता ।
तामसस्तु कृतः पूर्वं सर्पयज्ञस्त्वयाधुना
vairaṃ nirvāhitaṃ rājaṃstakṣakasya durātmanaḥ |
yatkṛte nihatāḥ sarpāstvayā'gnau koṭiśaḥ pare
||64||वैरं निर्वाहितं राजंस्तक्षकस्य दुरात्मनः ।
यत्कृते निहताः सर्पास्त्वयाऽग्नौ कोटिशः परे
devīyajñaṃ kuruṣvādya vitataṃ vidhipūrvakam |
viṣṇunā yaḥ kṛtaḥ pūrvaṃ sṛṣṭyādau nṛpasattama
||65||देवीयज्ञं कुरुष्वाद्य विततं विधिपूर्वकम् ।
विष्णुना यः कृतः पूर्वं सृष्ट्यादौ नृपसत्तम
tathā tvaṃ kuru rājendra vidhiṃ te prabravīmyaham |
brāhmaṇāḥ santi rājendra vidhijñā vedavittamāḥ
||66||तथा त्वं कुरु राजेन्द्र विधिं ते प्रब्रवीम्यहम् ।
ब्राह्मणाः सन्ति राजेन्द्र विधिज्ञा वेदवित्तमाः
devībījavidhānajñā mantramārgavicakṣaṇāḥ |
yājakāste bhaviṣyanti yajamānastvameva hi
||67||देवीबीजविधानज्ञा मन्त्रमार्गविचक्षणाः ।
याजकास्ते भविष्यन्ति यजमानस्त्वमेव हि
kṛtvā yajñaṃ vidhānena dattvā puṇẏaṃ makhārjitam |
samuddhara mahārāja pitaraṃ durgatiṅgatam
||68||कृत्वा यज्ञं विधानेन दत्त्वा पुण्य़ं मखार्जितम् ।
समुद्धर महाराज पितरं दुर्गतिङ्गतम्
viprāvamānajaṃ pāpaṃ durghaṭaṃ narakapradam |
tathaiva śāpajo doṣaḥ prāptaḥ pitrā tavānagha
||69||विप्रावमानजं पापं दुर्घटं नरकप्रदम् ।
तथैव शापजो दोषः प्राप्तः पित्रा तवानघ
tathā durmaraṇaṃ prāptaṃ sarpadaṃśena bhūbhujā |
antarāle tathā mṛtyūrna bhūmau kuśasaṃstare
||70||तथा दुर्मरणं प्राप्तं सर्पदंशेन भूभुजा ।
अन्तराले तथा मृत्यूर्न भूमौ कुशसंस्तरे
na saṅgrāme na gaṅgāyāṃ snānadānādivarjitam |
maraṇaṃ te pitustatra saudhe jātaṃ kurūdvaha
||71||न सङ्ग्रामे न गङ्गायां स्नानदानादिवर्जितम् ।
मरणं ते पितुस्तत्र सौधे जातं कुरूद्वह
kṛpaṇāni ca sarvāṇi narakasya nṛpottama |
tatraikaṃ kāraṇaṃ tasya na jātaṃ cātidurlabham
||72||कृपणानि च सर्वाणि नरकस्य नृपोत्तम ।
तत्रैकं कारणं तस्य न जातं चातिदुर्लभम्
yatra yatra sthitaḥprāṇo jñātvā kālaṃ samāgatam |
sādhanānāmabhāve'pi hyavaśaścātisaṅkaṭe
||73||यत्र यत्र स्थितःप्राणो ज्ञात्वा कालं समागतम् ।
साधनानामभावेऽपि ह्यवशश्चातिसङ्कटे
yadā nirvedamāyāti manasā nirmalena vai |
pañcabhūtātmako deho mama kiñcātra duḥkhadam
||74||यदा निर्वेदमायाति मनसा निर्मलेन वै ।
पञ्चभूतात्मको देहो मम किञ्चात्र दुःखदम्
patatvadya yathākāmaṃ mukto'haṃ nirguṇo'vyayaḥ |
nāśātmakāni tattvāni tatra kā paridevanā
||75||पतत्वद्य यथाकामं मुक्तोऽहं निर्गुणोऽव्ययः ।
नाशात्मकानि तत्त्वानि तत्र का परिदेवना
brahmaivāhaṃ na saṃsārī sadā muktaḥ sanātanaḥ |
dehena mama sambandhaḥ karmaṇā pratipāditaḥ
||76||ब्रह्मैवाहं न संसारी सदा मुक्तः सनातनः ।
देहेन मम सम्बन्धः कर्मणा प्रतिपादितः
tāni sarvāṇi muktāni śubhāni cetarāṇi ca |
manuṣyadehayogena sukhaduḥkhānusādhanāt
||77||तानि सर्वाणि मुक्तानि शुभानि चेतराणि च ।
मनुष्यदेहयोगेन सुखदुःखानुसाधनात्
vimukto'tibhayādghorādasmātsaṃsārasaṅkaṭāt |
ityevaṃ cintyamānastu snānadānavivarjitaḥ
||78||विमुक्तोऽतिभयाद्घोरादस्मात्संसारसङ्कटात् ।
इत्येवं चिन्त्यमानस्तु स्नानदानविवर्जितः
maraṇaṃ cedavāpnoti sa muccyejjanmaduḥkhataḥ |
eṣā kāṣṭhā parā proktā yogināmapi durlabhā
||79||मरणं चेदवाप्नोति स मुच्च्येज्जन्मदुःखतः ।
एषा काष्ठा परा प्रोक्ता योगिनामपि दुर्लभा
pitā te nṛpaśārdūla śrutvā śāpaṃ dvijoditam |
dehe mamatvaṃ kṛtavānna nirvedamavāptavān
||80||पिता ते नृपशार्दूल श्रुत्वा शापं द्विजोदितम् ।
देहे ममत्वं कृतवान्न निर्वेदमवाप्तवान्
nīrogo mama deho'yaṃ rājyaṃ nihatakaṇṭakam |
kathaṃ jīvāmyahaṃ kāmaṃ mantrajñānānayantu vai
||81||नीरोगो मम देहोऽयं राज्यं निहतकण्टकम् ।
कथं जीवाम्यहं कामं मन्त्रज्ञानानयन्तु वै
auṣadhaṃ maṇimantraṃ ca yantraṃ paramakaṃ tathā |
ārohaṇaṃ tathā saudhe kṛtavānnṛpatistadā
||82||औषधं मणिमन्त्रं च यन्त्रं परमकं तथा ।
आरोहणं तथा सौधे कृतवान्नृपतिस्तदा
na snānaṃ na kṛtaṃ dānaṃ na devyāḥ smaraṇaṃ kṛtam |
na bhūmau śayanaṃ caiva daivaṃ matvā paraṃ tathā
||83||न स्नानं न कृतं दानं न देव्याः स्मरणं कृतम् ।
न भूमौ शयनं चैव दैवं मत्वा परं तथा
magno mohārṇave ghore mṛtaḥ saudhe'hinā hataḥ |
kṛtvā pāpaṃ kaleryogāttāpasasyāvamānajam
||84||मग्नो मोहार्णवे घोरे मृतः सौधेऽहिना हतः ।
कृत्वा पापं कलेर्योगात्तापसस्यावमानजम्
avaśyameva narakaṃ etairācaraṇairbhavet |
tasmāttaṃ pitaraṃ pāpātsamuddhara nṛpottama
||85||अवश्यमेव नरकं एतैराचरणैर्भवेत् ।
तस्मात्तं पितरं पापात्समुद्धर नृपोत्तम
sūta uvāca
iti śrutvā vacastasya vyāsasyāmitatejasaḥ |
sāśrukaṇṭho'tiduḥkhārto babhūva janamejayaḥ
||86||इति श्रुत्वा वचस्तस्य व्यासस्यामिततेजसः ।
साश्रुकण्ठोऽतिदुःखार्तो बभूव जनमेजयः
dhigidaṃ jīvitaṃ me'dya pitā me narake sthitaḥ |
tatkaromi yathaivādya svargaṃ yātyuttarāsutaḥ
||87||धिगिदं जीवितं मेऽद्य पिता मे नरके स्थितः ।
तत्करोमि यथैवाद्य स्वर्गं यात्युत्तरासुतः
iti śrīdevībhāgavate mahāpurāṇe'ṣṭādaśasāhasryāṃ saṃhitāyāṃ tṛtīyaskandhe ambāyajñavidhivarṇanaṃ nāma dvādaśo'dhyāyaḥ || 12 ||