अध्ययनम्
- अनुक्रमणिका
- मूलम्
१३ आजीगर्तिः शुनःशेप स कृत्रिमो वैश्वामित्रो देवरातः। १-१२अग्निः, १३देवाः।।१-१२ गायत्री, १३ त्रिष्टुप्।
अश्वं॒ न त्वा॒ वार॑वन्तं व॒न्दध्या॑ अ॒ग्निं नमो॑भिः । स॒म्राज॑न्तमध्व॒राणा॑म्
॥१॥aśva̱ṃ na tvā̱ vāra̍vantaṃ va̱ndadhyā̍ a̱gniṃ namo̍bhiḥ | sa̱mrāja̍ntamadhva̱rāṇā̍m
स घा॑ नः सू॒नुः शव॑सा पृ॒थुप्र॑गामा सु॒शेव॑: । मी॒ढ्वाँ अ॒स्माकं॑ बभूयात्
॥२॥sa ghā̍ naḥ sū̱nuḥ śava̍sā pṛ̱thupra̍gāmā su̱śeva̍: | mī̱ḍhvām̐ a̱smāka̍ṃ babhūyāt
स नो॑ दू॒राच्चा॒साच्च॒ नि मर्त्या॑दघा॒योः । पा॒हि सद॒मिद् वि॒श्वायु॑:
॥३॥sa no̍ dū̱rāccā̱sācca̱ ni martyā̍daghā̱yoḥ | pā̱hi sada̱mid vi̱śvāyu̍:
इ॒ममू॒ षु त्वम॒स्माकं॑ स॒निं गा॑य॒त्रं नव्यां॑सम् । अग्ने॑ दे॒वेषु॒ प्र वो॑चः
॥४॥i̱mamū̱ ṣu tvama̱smāka̍ṃ sa̱niṃ gā̍ya̱traṃ navyā̍ṃsam | agne̍ de̱veṣu̱ pra vo̍caḥ
आ नो॑ भज पर॒मेष्वा वाजे॑षु मध्य॒मेषु॑ । शिक्षा॒ वस्वो॒ अन्त॑मस्य
॥५॥ā no̍ bhaja para̱meṣvā vāje̍ṣu madhya̱meṣu̍ | śikṣā̱ vasvo̱ anta̍masya
वि॒भ॒क्तासि॑ चित्रभानो॒ सिन्धो॑रू॒र्मा उ॑पा॒क आ । स॒द्यो दा॒शुषे॑ क्षरसि
॥६॥vi̱bha̱ktāsi̍ citrabhāno̱ sindho̍rū̱rmā u̍pā̱ka ā | sa̱dyo dā̱śuṣe̍ kṣarasi
यम॑ग्ने पृ॒त्सु मर्त्य॒मवा॒ वाजे॑षु॒ यं जु॒नाः । स यन्ता॒ शश्व॑ती॒रिष॑:
॥७॥yama̍gne pṛ̱tsu martya̱mavā̱ vāje̍ṣu̱ yaṃ ju̱nāḥ | sa yantā̱ śaśva̍tī̱riṣa̍:
नकि॑रस्य सहन्त्य पर्ये॒ता कय॑स्य चित् । वाजो॑ अस्ति श्र॒वाय्य॑:
॥८॥naki̍rasya sahantya parye̱tā kaya̍sya cit | vājo̍ asti śra̱vāyya̍:
स वाजं॑ वि॒श्वच॑र्षणि॒रर्व॑द्भिरस्तु॒ तरु॑ता । विप्रे॑भिरस्तु॒ सनि॑ता
॥९॥sa vāja̍ṃ vi̱śvaca̍rṣaṇi̱rarva̍dbhirastu̱ taru̍tā | vipre̍bhirastu̱ sani̍tā
जरा॑बोध॒ तद् वि॑विड्ढि वि॒शेवि॑शे य॒ज्ञिया॑य । स्तोमं॑ रु॒द्राय॒ दृशी॑कम्
॥१०॥jarā̍bodha̱ tad vi̍viḍḍhi vi̱śevi̍śe ya̱jñiyā̍ya | stoma̍ṃ ru̱drāya̱ dṛśī̍kam
स नो॑ म॒हाँ अ॑निमा॒नो धू॒मके॑तुः पुरुश्च॒न्द्रः । धि॒ये वाजा॑य हिन्वतु
॥११॥sa no̍ ma̱hām̐ a̍nimā̱no dhū̱make̍tuḥ puruśca̱ndraḥ | dhi̱ye vājā̍ya hinvatu
स रे॒वाँ इ॑व वि॒श्पति॒र्दैव्य॑: के॒तुः शृ॑णोतु नः । उ॒क्थैर॒ग्निर्बृ॒हद्भा॑नुः
॥१२॥sa re̱vām̐ i̍va vi̱śpati̱rdaivya̍: ke̱tuḥ śṛ̍ṇotu naḥ | u̱kthaira̱gnirbṛ̱hadbhā̍nuḥ
नमो॑ म॒हद्भ्यो॒ नमो॑ अर्भ॒केभ्यो॒ नमो॒ युव॑भ्यो॒ नम॑ आशि॒नेभ्य॑: ।
यजा॑म दे॒वान्यदि॑ श॒क्नवा॑म॒ मा ज्याय॑स॒: शंस॒मा वृ॑क्षि देवाः
॥१३॥namo̍ ma̱hadbhyo̱ namo̍ arbha̱kebhyo̱ namo̱ yuva̍bhyo̱ nama̍ āśi̱nebhya̍: |
yajā̍ma de̱vānyadi̍ śa̱knavā̍ma̱ mā jyāya̍sa̱: śaṃsa̱mā vṛ̍kṣi devāḥ