9 gāthino viśvāmitraḥ| indraḥ| gāyatrī|
ā tū na̍ indra ma̱drya̍gghuvā̱naḥ soma̍pītaye | hari̍bhyāṃ yāhyadrivaḥ
||1||sa̱tto hotā̍ na ṛ̱tviya̍stisti̱re ba̱rhirā̍nu̱ṣak | ayu̍jranprā̱taradra̍yaḥ
||2||i̱mā brahma̍ brahmavāhaḥ kri̱yanta̱ ā ba̱rhiḥ sī̍da | vī̱hi śū̍ra puro̱l̤āśa̍m
||3||rā̱ra̱ndhi sava̍neṣu ṇa e̱ṣu stome̍ṣu vṛtrahan | u̱ktheṣvi̍ndra girvaṇaḥ
||4||ma̱taya̍: soma̱pāmu̱ruṃ ri̱hanti̱ śava̍sa̱spati̍m | indra̍ṃ va̱tsaṃ na mā̱tara̍:
||5||sa ma̍ndasvā̱ hyandha̍so̱ rādha̍se ta̱nvā̍ ma̱he | na sto̱tāra̍ṃ ni̱de ka̍raḥ
||6||va̱yami̍ndra tvā̱yavo̍ ha̱viṣma̍nto jarāmahe | u̱ta tvama̍sma̱yurva̍so
||7||māre a̱smad vi mu̍muco̱ hari̍priyā̱rvāṅ yā̍hi | indra̍ svadhāvo̱ matsve̱ha
||8||a̱rvāñca̍ṃ tvā su̱khe rathe̱ vaha̍tāmindra ke̱śinā̍ | ghṛ̱tasnū̍ ba̱rhirā̱sade̍
||9||