athātaḥ saṃpravakṣyāmi gāyatrīṃ ca sarasvatīm
śrīsūta uvāca
athātaḥ saṃpravakṣyāmi gāyatrīṃ ca sarasvatīm ||
lakṣyīkṛtya kathāmekāṃ pavitrāṃ dvijasattamāḥ
||1||अथातः संप्रवक्ष्यामि गायत्रीं च सरस्वतीम् ॥
लक्ष्यीकृत्य कथामेकां पवित्रां द्विजसत्तमाः
kaśyapākhyo dvijaḥ pūrvamasmiṃstīrthadvaye śubhe ||
snātvātimahataḥ pāpādvimukto narakapradāt
||2||कश्यपाख्यो द्विजः पूर्वमस्मिंस्तीर्थद्वये शुभे ॥
स्नात्वातिमहतः पापाद्विमुक्तो नरकप्रदात्
ṛṣaya ūcuḥ
mune kaśyapanāmāsāvakarotkiṃ hi pātakam ||
snātvā tīrthadvayepyatra yasmānmukto'bhavatkṣaṇāt
||3||मुने कश्यपनामासावकरोत्किं हि पातकम् ॥
स्नात्वा तीर्थद्वयेप्यत्र यस्मान्मुक्तोऽभवत्क्षणात्
etannaḥ śraddadhānānāṃ brūhi sūta kṛpābalāt ||
tvadvaco'mṛtatṛptānāṃ na pipāsāpi vidyate
||4||एतन्नः श्रद्दधानानां ब्रूहि सूत कृपाबलात् ॥
त्वद्वचोऽमृततृप्तानां न पिपासापि विद्यते
śrīsūta uvāca
gāyatryāśca sarasvatyā māhātmyapratipādakam ||
itihāsaṃ pravakṣyāmi śṛṇvatāṃ pāpanāśanam
||5||गायत्र्याश्च सरस्वत्या माहात्म्यप्रतिपादकम् ॥
इतिहासं प्रवक्ष्यामि शृण्वतां पापनाशनम्
abhimanyusuto rājā parīkṣinnāma nāmataḥ ||
adhyāste hāstinapuraṃ pālayandharmato mahīm
||6||अभिमन्युसुतो राजा परीक्षिन्नाम नामतः ॥
अध्यास्ते हास्तिनपुरं पालयन्धर्मतो महीम्
sa rājā jātu vipine cacāra mṛgayā rataḥ ||
ṣaṣṭivarṣavayā bhūpaḥ kṣuttṛṣṇāparipīḍitaḥ
||7||स राजा जातु विपिने चचार मृगया रतः ॥
षष्टिवर्षवया भूपः क्षुत्तृष्णापरिपीडितः
naṣṭamekaṃ sa vipine mārgayanmṛgamādarāt ||
dhyānārūḍhaṃ muniṃ dṛṣṭvā prāha taṃ cīravāsasam
||8||नष्टमेकं स विपिने मार्गयन्मृगमादरात् ॥
ध्यानारूढं मुनिं दृष्ट्वा प्राह तं चीरवाससम्
mayā bāṇena vipine mṛgo viddho'dhunā mune ||
dṛṣṭaḥ sa kiṃ tvayā vidvanvidruto bhayakātaraḥ
||9||मया बाणेन विपिने मृगो विद्धोऽधुना मुने ॥
दृष्टः स किं त्वया विद्वन्विद्रुतो भयकातरः
samādhiniṣṭho maunitvānna kiṃ cidapi so'bravīt ||
tato dhanuraṭanyā'sau skaṃdhe tasya mahāmuneḥ
||10||समाधिनिष्ठो मौनित्वान्न किं चिदपि सोऽब्रवीत् ॥
ततो धनुरटन्याऽसौ स्कंधे तस्य महामुनेः
nidhāya mṛtasarpaṃ tu kupitaḥ svapuraṃ yayau ||
munestasya sutaḥ kaścicchṛṃgīnāma babhūva vai
||11||निधाय मृतसर्पं तु कुपितः स्वपुरं ययौ ॥
मुनेस्तस्य सुतः कश्चिच्छृंगीनाम बभूव वै
sakhā tasya kṛśākhyo'bhūcchṛṃgiṇo dvijasattamāḥ ||
sakhāyaṃ śṛṅgiṇaṃ prāha kṛśākhyaḥ sa sakhā tataḥ
||12||सखा तस्य कृशाख्योऽभूच्छृंगिणो द्विजसत्तमाः ॥
सखायं शृङ्गिणं प्राह कृशाख्यः स सखा ततः
pitā tava mṛtaṃ sarpaṃ skaṃdhena vahate'dhunā ||
mā bhūddarpastava sakhe mā kṛthāstvaṃ madaṃ vṛthā
||13||पिता तव मृतं सर्पं स्कंधेन वहतेऽधुना ॥
मा भूद्दर्पस्तव सखे मा कृथास्त्वं मदं वृथा
so'vadatkupitaḥ śṛṃgī ditsuśśāpaṃ nṛpāya vai ||
mattāte śavasarpaṃ yo nyastavānmūḍhacetanaḥ
||14||सोऽवदत्कुपितः शृंगी दित्सुश्शापं नृपाय वै ॥
मत्ताते शवसर्पं यो न्यस्तवान्मूढचेतनः
sa saptarātrānmriyatāṃ saṃdaṣṭastakṣakāhinā ||
śaśāpaivaṃ munisutaḥ saubhadreyaṃ parīkṣitam
||15||स सप्तरात्रान्म्रियतां संदष्टस्तक्षकाहिना ॥
शशापैवं मुनिसुतः सौभद्रेयं परीक्षितम्
śamīkākhyaḥ pitā tasya śrutvā śaptaṃ sutena tam ||
nṛpaṃ provāca tanayaṃ śṛṃgiṇaṃ munipuṃgavaḥ
||16||शमीकाख्यः पिता तस्य श्रुत्वा शप्तं सुतेन तम् ॥
नृपं प्रोवाच तनयं शृंगिणं मुनिपुंगवः
rakṣakaṃ sarvalokānāṃ nṛpaṃ kiṃ śaptavānasi ||
arājake vayaṃ loke sthāsyāmaḥ kathamaṃjasā
||17||रक्षकं सर्वलोकानां नृपं किं शप्तवानसि ॥
अराजके वयं लोके स्थास्यामः कथमंजसा
krodhena pātakamabhūnna tvayā prāpyate sukham ||
yaḥ samutpāditaṃ kopaṃ kṣamayaiva nirasyati
||18||क्रोधेन पातकमभून्न त्वया प्राप्यते सुखम् ॥
यः समुत्पादितं कोपं क्षमयैव निरस्यति
iha loke paratrāsāvatyaṃtaṃ sukhamedhate ||
kṣamāyuktā hi puruṣā labhaṃte śreya uttamam
||19||इह लोके परत्रासावत्यंतं सुखमेधते ॥
क्षमायुक्ता हि पुरुषा लभंते श्रेय उत्तमम्
tataḥ śamīkaḥ svaṃ śiṣyaṃ prāha gauramukhābhidham ||
bho gau mukha gatvā tvaṃ vada bhūpaṃ parīkṣitam
||20||ततः शमीकः स्वं शिष्यं प्राह गौरमुखाभिधम् ॥
भो गौ मुख गत्वा त्वं वद भूपं परीक्षितम्
imaṃ śāpaṃ matsutoktaṃ takṣakāhividaṃśanam ||
punarāyāhi śīghraṃ tvaṃ matsamīpe mahāmate
||21||इमं शापं मत्सुतोक्तं तक्षकाहिविदंशनम् ॥
पुनरायाहि शीघ्रं त्वं मत्समीपे महामते
evamuktaḥ śamīkena yayau gauramukho nṛpam ||
sametya cābravīdbhūpaṃ saubhadreyaṃ parīkṣitam
||22||एवमुक्तः शमीकेन ययौ गौरमुखो नृपम् ॥
समेत्य चाब्रवीद्भूपं सौभद्रेयं परीक्षितम्
dṛṣṭvā sarpaṃ pituḥ skandhe tvayā vinihitaṃ mṛtam ||
śamīkasya sutaḥ śṛṃgī śaśāpa tvāṃ ruṣānvitaḥ
||23||दृष्ट्वा सर्पं पितुः स्कन्धे त्वया विनिहितं मृतम् ॥
शमीकस्य सुतः शृंगी शशाप त्वां रुषान्वितः
etaddinātsaptame'hni takṣakeṇa mahāhinā ||
daṣṭo viṣāgninā dagdho bhūyādāśvabhimanyujaḥ
||24||एतद्दिनात्सप्तमेऽह्नि तक्षकेण महाहिना ॥
दष्टो विषाग्निना दग्धो भूयादाश्वभिमन्युजः
evaṃ śaśāpa tvāṃ rājañchṛṃgī tasya muneḥ sutaḥ ||
etadvaktuṃ pitā tasya prāhiṇonmāṃ tvadaṃtikam
||25||एवं शशाप त्वां राजञ्छृंगी तस्य मुनेः सुतः ॥
एतद्वक्तुं पिता तस्य प्राहिणोन्मां त्वदंतिकम्
itīrayitvā taṃ bhūpamāśu gauramukho yayau ||
gate gauramukhe paścādrājā śokaparāyaṇaḥ
||26||इतीरयित्वा तं भूपमाशु गौरमुखो ययौ ॥
गते गौरमुखे पश्चाद्राजा शोकपरायणः
abhraṃlihamathottuṃgamekastaṃbhaṃ suvistṛtam ||
madhyegaṃgaṃ vyatanuta maṃḍapaṃ nṛpapuṃgavaḥ
||27||अभ्रंलिहमथोत्तुंगमेकस्तंभं सुविस्तृतम् ॥
मध्येगंगं व्यतनुत मंडपं नृपपुंगवः
mahāgāruḍamaṃtrajñairauṣadhajñaiścikitsakaiḥ ||
takṣakasya viṣaṃ haṃtuṃ yatnaṃ kurvansamāhitaḥ
||28||महागारुडमंत्रज्ञैरौषधज्ञैश्चिकित्सकैः ॥
तक्षकस्य विषं हंतुं यत्नं कुर्वन्समाहितः
anekadevabrahmarṣirājarṣipravarānvitaḥ ||
āste tasminnṛpastuṃge maṃḍape viṣṇubhaktimān
||29||अनेकदेवब्रह्मर्षिराजर्षिप्रवरान्वितः ॥
आस्ते तस्मिन्नृपस्तुंगे मंडपे विष्णुभक्तिमान्
tasminnavasare vipraḥ kāśyapo māṃtrikottamaḥ ||
rājānaṃ rakṣituṃ prāyāttakṣakasya mahāviṣāt
||30||तस्मिन्नवसरे विप्रः काश्यपो मांत्रिकोत्तमः ॥
राजानं रक्षितुं प्रायात्तक्षकस्य महाविषात्
saptame'hani vipreṃdro daridro dhanakāmukaḥ ||
atrāṃtare takṣako'pi viprarūpī samāyayau
||31||सप्तमेऽहनि विप्रेंद्रो दरिद्रो धनकामुकः ॥
अत्रांतरे तक्षकोऽपि विप्ररूपी समाययौ
madhyemārgaṃ vilokyātha kaśyapaṃ pratyabhāṣata ||
brāhmaṇa tvaṃ kutra yāsi vada me'dya mahāmune
||32||मध्येमार्गं विलोक्याथ कश्यपं प्रत्यभाषत ॥
ब्राह्मण त्वं कुत्र यासि वद मेऽद्य महामुने
iti pṛṣṭastadāvādītkāśyapastakṣakaṃ dvijāḥ ||
parīkṣitaṃ mahārājaṃ takṣako'dya viṣāgninā
||33||इति पृष्टस्तदावादीत्काश्यपस्तक्षकं द्विजाः ॥
परीक्षितं महाराजं तक्षकोऽद्य विषाग्निना
dakṣyate taṃ śamayituṃ tatsamīpamupaimyaham ||
ityuktavaṃtaṃ taṃ vipraṃ takṣakaḥ punarabravīt
||34||दक्ष्यते तं शमयितुं तत्समीपमुपैम्यहम् ॥
इत्युक्तवंतं तं विप्रं तक्षकः पुनरब्रवीत्
takṣakohaṃ dvijaśreṣṭha mayā daṣṭaścikitsitum ||
na śakyo 'bdaśatenāpi mahāmaṃtrāyutairapi
||35||तक्षकोहं द्विजश्रेष्ठ मया दष्टश्चिकित्सितुम् ॥
न शक्यो ऽब्दशतेनापि महामंत्रायुतैरपि
cikitsituṃ cenmaddaṣṭaṃ śaktirasti tavādhunā ||
anekayojanocchrāyamimaṃ vaṭataruṃ tvaham
||36||चिकित्सितुं चेन्मद्दष्टं शक्तिरस्ति तवाधुना ॥
अनेकयोजनोच्छ्रायमिमं वटतरुं त्वहम्
daśāmyujjīvayainaṃ tvaṃ samartho'sti tato bhavān ||
itīrayitvā taṃ vṛkṣamadaśattakṣakastadā
||37||दशाम्युज्जीवयैनं त्वं समर्थोऽस्ति ततो भवान् ॥
इतीरयित्वा तं वृक्षमदशत्तक्षकस्तदा
abhavadbhasmasātso'pi vṛkṣo'tyaṃtaṃ samūrcchitaḥ ||
pūrvameva naraḥ kaścittaṃ vṛkṣamadhirūḍhavān
||38||अभवद्भस्मसात्सोऽपि वृक्षोऽत्यंतं समूर्च्छितः ॥
पूर्वमेव नरः कश्चित्तं वृक्षमधिरूढवान्
takṣakasya viṣolkābhiḥ so'pi dagdho'bhavattadā ||
taṃ naraṃ na vijijñāte tau ca kāśyapatakṣakau
||39||तक्षकस्य विषोल्काभिः सोऽपि दग्धोऽभवत्तदा ॥
तं नरं न विजिज्ञाते तौ च काश्यपतक्षकौ
kāśyapaḥ pratijajñe'tha takṣakasyāpi śṛṇvataḥ ||
tanmaṃtraśaktiṃ paśyaṃtu sarve viprā hi no'dhunā
||40||काश्यपः प्रतिजज्ञेऽथ तक्षकस्यापि शृण्वतः ॥
तन्मंत्रशक्तिं पश्यंतु सर्वे विप्रा हि नोऽधुना
itīrayitvā taṃ vṛkṣaṃ bhasmībhūtaṃ viṣāgninā ||
ajīvayanmantraśaktyā kāśyapo māṃtrikottamaḥ
||41||इतीरयित्वा तं वृक्षं भस्मीभूतं विषाग्निना ॥
अजीवयन्मन्त्रशक्त्या काश्यपो मांत्रिकोत्तमः
naro'pi tena vṛkṣeṇa sākamujjīvito'bhavat ||
athābravīttakṣakastaṃ kāśyapaṃ maṃtrakovidam
||42||नरोऽपि तेन वृक्षेण साकमुज्जीवितोऽभवत् ॥
अथाब्रवीत्तक्षकस्तं काश्यपं मंत्रकोविदम्
yathā na munivāṅmithyā bhavedevaṃ kuru dvija ||
yatte rājā dhanaṃ dadyāttatopi dviguṇaṃ dhanam
||43||यथा न मुनिवाङ्मिथ्या भवेदेवं कुरु द्विज ॥
यत्ते राजा धनं दद्यात्ततोपि द्विगुणं धनम्
dadāmyahaṃ nivartasva śīghrameva dvijottama ||
ityuktvānarghyaratnāni tasmai dattvā sa takṣakaḥ
||44||ददाम्यहं निवर्तस्व शीघ्रमेव द्विजोत्तम ॥
इत्युक्त्वानर्घ्यरत्नानि तस्मै दत्त्वा स तक्षकः
nyavartayatkāśyapaṃ taṃ brāhmaṇaṃ maṃtrako vidam ||
alpāyuṣaṃ nṛpaṃ matvā jñānadṛṣṭyā sa kāśyapaḥ
||45||न्यवर्तयत्काश्यपं तं ब्राह्मणं मंत्रको विदम् ॥
अल्पायुषं नृपं मत्वा ज्ञानदृष्ट्या स काश्यपः
svāśramaṃ prayayau tūṣṇīṃ labdharatnaśca takṣakāt ||
so'bravīttakṣakaḥ sarvānsarpānāhūya tatkṣaṇe
||46||स्वाश्रमं प्रययौ तूष्णीं लब्धरत्नश्च तक्षकात् ॥
सोऽब्रवीत्तक्षकः सर्वान्सर्पानाहूय तत्क्षणे
yūyaṃ taṃ nṛpatiṃ prāpya munīnāṃ veṣadhāriṇaḥ ||
upahāraphalānyāśu prayacchata parīkṣite
||47||यूयं तं नृपतिं प्राप्य मुनीनां वेषधारिणः ॥
उपहारफलान्याशु प्रयच्छत परीक्षिते
tathetyuktvā sarvasarpā dadū rājñe phalānyamī ||
takṣakopi tadā tatra kasmiṃścidbadarīphale
||48||तथेत्युक्त्वा सर्वसर्पा ददू राज्ञे फलान्यमी ॥
तक्षकोपि तदा तत्र कस्मिंश्चिद्बदरीफले
kṛmiveṣadharo bhūtvā vyatiṣṭhaddaṃśituṃ nṛpam ||
atha rājā pradattāni sarpairbrāhmaṇarūpakaiḥ
||49||कृमिवेषधरो भूत्वा व्यतिष्ठद्दंशितुं नृपम् ॥
अथ राजा प्रदत्तानि सर्पैर्ब्राह्मणरूपकैः
parīkṣinmaṃtravṛddhebhyo dattvā sarvaphalānyapi ||
kautūhalena jagrāha sthūlamekaṃ phalaṃ kare
||50||परीक्षिन्मंत्रवृद्धेभ्यो दत्त्वा सर्वफलान्यपि ॥
कौतूहलेन जग्राह स्थूलमेकं फलं करे
asminnavasare sūryo'pyastācalamagāhata ||
mithyā ṛṣivaco mā bhūditi tatratyamānavāḥ
||51||अस्मिन्नवसरे सूर्योऽप्यस्ताचलमगाहत ॥
मिथ्या ऋषिवचो मा भूदिति तत्रत्यमानवाः
anyoyamavadantsarve brāhmaṇāśca nṛpāstathā ||
evaṃ vadatsu sarveṣu phale tasminnadṛśyata
||52||अन्योयमवदन्त्सर्वे ब्राह्मणाश्च नृपास्तथा ॥
एवं वदत्सु सर्वेषु फले तस्मिन्नदृश्यत
phale raktakṛmiḥ sarve rājñā cāpi parīkṣitā ||
ayaṃ kiṃ māṃ daśedadya kṛmirityuktavā nnṛpaḥ
||53||फले रक्तकृमिः सर्वे राज्ञा चापि परीक्षिता ॥
अयं किं मां दशेदद्य कृमिरित्युक्तवा न्नृपः
nidadhe tatphalaṃ karṇe sakṛmi dvijasattamāḥ ||
takṣako'sminsthitaḥ pūrvaṃ kṛmirūpī phale tadā
||54||निदधे तत्फलं कर्णे सकृमि द्विजसत्तमाः ॥
तक्षकोऽस्मिन्स्थितः पूर्वं कृमिरूपी फले तदा
nirgatya tatphalādāśu nṛpade hamaveṣṭayat ||
takṣakāveṣṭite bhūpe pārśvasthā dudruvurbhayāt
||55||निर्गत्य तत्फलादाशु नृपदे हमवेष्टयत् ॥
तक्षकावेष्टिते भूपे पार्श्वस्था दुद्रुवुर्भयात्
anaṃtaraṃ nṛpo viprāstakṣakasya viṣāgninā ||
dagdho'bhūdbhasmasādāśu saprāsādo balīyasā
||56||अनंतरं नृपो विप्रास्तक्षकस्य विषाग्निना ॥
दग्धोऽभूद्भस्मसादाशु सप्रासादो बलीयसा
kṛtvordhvadaihikaṃ tasya nṛpasya sapurohitāḥ ||
maṃtriṇastatsutaṃ rājye janamejayanāmakam
||57||कृत्वोर्ध्वदैहिकं तस्य नृपस्य सपुरोहिताः ॥
मंत्रिणस्तत्सुतं राज्ये जनमेजयनामकम्
rājānamabhyaṣiṃcanvai gajadrakṣa ṇavāṃchayā ||
takṣakādrakṣituṃ bhūpamāyātaḥ kāśyapābhidhaḥ
||58||राजानमभ्यषिंचन्वै गजद्रक्ष णवांछया ॥
तक्षकाद्रक्षितुं भूपमायातः काश्यपाभिधः
yo brāhmaṇo muniśreṣṭhāḥ sa sarvairniṃdito janaiḥ ||
babhrāma sakalāndeśāñchiṣṭaiḥ sarvaiśca dūṣitaḥ
||59||यो ब्राह्मणो मुनिश्रेष्ठाः स सर्वैर्निंदितो जनैः ॥
बभ्राम सकलान्देशाञ्छिष्टैः सर्वैश्च दूषितः
avasthānaṃ na lebhe'sau grāme vāpyāśrame'pi vā ||
yānyāndeśānasau yātastatratatramahājanaiḥ
||60||अवस्थानं न लेभेऽसौ ग्रामे वाप्याश्रमेऽपि वा ॥
यान्यान्देशानसौ यातस्तत्रतत्रमहाजनैः
tattaddeśānnirastaḥ sa śākalyaṃ śaraṇaṃ yayau ||
praṇamya śākalyamuniṃ kāśyapo nindito janaiḥ ||
idaṃ vijñāpayāmāsa śākalyāya mahātmane
||61||तत्तद्देशान्निरस्तः स शाकल्यं शरणं ययौ ॥
प्रणम्य शाकल्यमुनिं काश्यपो निन्दितो जनैः ॥
इदं विज्ञापयामास शाकल्याय महात्मने
kāśyapa uvāca
bhagavansarvadharmajña śākalya harivallabha
||62||भगवन्सर्वधर्मज्ञ शाकल्य हरिवल्लभ
munayo brāhmaṇāścānye māṃ niṃdaṃti suhṛjjanāḥ ||
nāsyāhaṃ kāraṇaṃ jāne kiṃ māṃ niṃdaṃti mānavāḥ
||63||मुनयो ब्राह्मणाश्चान्ये मां निंदंति सुहृज्जनाः ॥
नास्याहं कारणं जाने किं मां निंदंति मानवाः
brahmahatyā surāpānaṃ gurustrīgamanaṃ tathā ||
steyaṃ saṃsargadoṣo vā mayā nācaritaḥ kvacit
||64||ब्रह्महत्या सुरापानं गुरुस्त्रीगमनं तथा ॥
स्तेयं संसर्गदोषो वा मया नाचरितः क्वचित्
anyānyapi hi pāpāni na kṛtāni mayā mune ||
tathāpi niṃdaṃti janā vṛthā māṃ bāṃdhavādayaḥ
||65||अन्यान्यपि हि पापानि न कृतानि मया मुने ॥
तथापि निंदंति जना वृथा मां बांधवादयः
jānāsi cettvaṃ śākalya mayā doṣaṃ kṛtaṃ vada ||
ukto'tha kāśyapenaivaṃ śākalyākhyo mahāmuniḥ ||
kṣaṇaṃ dhyātvā babhāṣe taṃ kāśyapaṃ dvijasattamāḥ
||66||जानासि चेत्त्वं शाकल्य मया दोषं कृतं वद ॥
उक्तोऽथ काश्यपेनैवं शाकल्याख्यो महामुनिः ॥
क्षणं ध्यात्वा बभाषे तं काश्यपं द्विजसत्तमाः
śākalya uvāca
parīkṣitaṃ mahārājaṃ takṣakādrakṣituṃ bhavān
||67||परीक्षितं महाराजं तक्षकाद्रक्षितुं भवान्
ayāsīdardhamārge tu takṣakeṇa nivāritaḥ ||
cikitsituṃ samartho'pi viṣarogādipīḍitam
||68||अयासीदर्धमार्गे तु तक्षकेण निवारितः ॥
चिकित्सितुं समर्थोऽपि विषरोगादिपीडितम्
yo na rakṣati lobhena tamāhurbrahmaghātakam ||
krodhātkāmādbhayāllobhānmātsaryānmohato'pi vā
||69||यो न रक्षति लोभेन तमाहुर्ब्रह्मघातकम् ॥
क्रोधात्कामाद्भयाल्लोभान्मात्सर्यान्मोहतोऽपि वा
yo na rakṣati vipreṃdra viṣarogāturaṃ naram ||
brahmahā sa surāpī ca steyī ca gurutalpagaḥ
||70||यो न रक्षति विप्रेंद्र विषरोगातुरं नरम् ॥
ब्रह्महा स सुरापी च स्तेयी च गुरुतल्पगः
saṃsargadoṣaduṣṭaśca nāpi tasya hi niṣkṛtiḥ ||
kanyāvikrayiṇaścāpi hayavikrayiṇastathā
||71||संसर्गदोषदुष्टश्च नापि तस्य हि निष्कृतिः ॥
कन्याविक्रयिणश्चापि हयविक्रयिणस्तथा
kṛtaghna syāpi śāstreṣu prāyaścittaṃ hi vidyate ||
viṣarogāturaṃ yastu samarthopi na rakṣati
||72||कृतघ्न स्यापि शास्त्रेषु प्रायश्चित्तं हि विद्यते ॥
विषरोगातुरं यस्तु समर्थोपि न रक्षति
na tasya niṣkṛtiḥ proktā prāyaścittāyutairapi ||
na tena saha paṃktau ca bhuṃjīta sukṛtī janaḥ
||73||न तस्य निष्कृतिः प्रोक्ता प्रायश्चित्तायुतैरपि ॥
न तेन सह पंक्तौ च भुंजीत सुकृती जनः
na tena saha bhāṣeta na paśyettaṃ naraṃ kvacit ||
tatsaṃbhāṣaṇamātreṇa mahāpātakabhāgbhavet
||74||न तेन सह भाषेत न पश्येत्तं नरं क्वचित् ॥
तत्संभाषणमात्रेण महापातकभाग्भवेत्
parīkṣitsa mahārājaḥ puṇyaślokaśca dhārmikaḥ ||
viṣṇubhakto mahāyogī cāturvarṇyasya rakṣitā
||75||परीक्षित्स महाराजः पुण्यश्लोकश्च धार्मिकः ॥
विष्णुभक्तो महायोगी चातुर्वर्ण्यस्य रक्षिता
vyāsaputrāddharikathāṃ śrutavānbhaktipūrvakam ||
arakṣitvā nṛpaṃ taṃ tvaṃ vacasā takṣakasya yat
||76||व्यासपुत्राद्धरिकथां श्रुतवान्भक्तिपूर्वकम् ॥
अरक्षित्वा नृपं तं त्वं वचसा तक्षकस्य यत्
nivṛttastena vipreṃdrairbāṃdhavairapi dūṣyase ||
sa parīkṣinmahārājo yadyapi kṣa ṇajīvitaḥ
||77||निवृत्तस्तेन विप्रेंद्रैर्बांधवैरपि दूष्यसे ॥
स परीक्षिन्महाराजो यद्यपि क्ष णजीवितः
tathāpi yāvanmaraṇaṃ budhaiḥ kāryaṃ cikitsanam ||
yāvatkaṇṭhagatāḥ prāṇā mumūrṣormānavasya hi
||78||तथापि यावन्मरणं बुधैः कार्यं चिकित्सनम् ॥
यावत्कण्ठगताः प्राणा मुमूर्षोर्मानवस्य हि
tāvaccikitsā kartavyā kālasya kuṭilā gatiḥ ||
iti prāhuḥ purā ślokaṃ bhiṣagvaidyābdhipāragāḥ
||79||तावच्चिकित्सा कर्तव्या कालस्य कुटिला गतिः ॥
इति प्राहुः पुरा श्लोकं भिषग्वैद्याब्धिपारगाः
ataścikitsāśakto'pi yasmādakṛtabheṣajaḥ ||
ardhamārge nivṛttastvaṃ tena taṃ hatavānasi ||
śākalyenaivamuditaḥ kāśyapaḥ pratyabhāṣata
||80||अतश्चिकित्साशक्तोऽपि यस्मादकृतभेषजः ॥
अर्धमार्गे निवृत्तस्त्वं तेन तं हतवानसि ॥
शाकल्येनैवमुदितः काश्यपः प्रत्यभाषत
kāśyapa uvāca
mamaitaddoṣaśāṃtyarthamupāyaṃ vada suvrata
||81||ममैतद्दोषशांत्यर्थमुपायं वद सुव्रत
yena māṃ pratigṛhṇīyurbāṃdhavāḥ sasuhṛjjanāḥ
||82||येन मां प्रतिगृह्णीयुर्बांधवाः ससुहृज्जनाः
kṛpāṃ mayi kuruṣva tvaṃ śākalya harivallabha ||
kāśyapenaivamuktastu śākalyopi munīśvaraḥ ||
kṣaṇaṃ dhyātvā jagādaivaṃ kāśyapaṃ kṛpayā tadā
||83||कृपां मयि कुरुष्व त्वं शाकल्य हरिवल्लभ ॥
काश्यपेनैवमुक्तस्तु शाकल्योपि मुनीश्वरः ॥
क्षणं ध्यात्वा जगादैवं काश्यपं कृपया तदा
śākalya uvāca
asya pāpasya śātyarthamupāyaṃ pravadāmi te
||84||अस्य पापस्य शात्यर्थमुपायं प्रवदामि ते
tatkarttavyaṃ tvayā śīghraṃ vilaṃbaṃ mā kṛthā dvija ||
dakṣiṇāṃbunidhau setau gaṃdhamādanaparvate
||85||तत्कर्त्तव्यं त्वया शीघ्रं विलंबं मा कृथा द्विज ॥
दक्षिणांबुनिधौ सेतौ गंधमादनपर्वते
asti tīrthadvayaṃ viprā gāyatrī ca sarasvatī ||
tatra tvaṃ snānamātreṇa śuddho bhūyāśca tatkṣaṇe
||86||अस्ति तीर्थद्वयं विप्रा गायत्री च सरस्वती ॥
तत्र त्वं स्नानमात्रेण शुद्धो भूयाश्च तत्क्षणे
gāyatryā ca sarasvatyā jalavāta spṛśo naraḥ ||
vidhūya sarvapāpāni svargaṃ yāsyaṃti nirmalāḥ
||87||गायत्र्या च सरस्वत्या जलवात स्पृशो नरः ॥
विधूय सर्वपापानि स्वर्गं यास्यंति निर्मलाः
tadyāhi śīghra vipra tvaṃ gāyatrīṃ ca sarasvatīm ||
ityuktaḥ kāśyapastena śākalyena dvijottamāḥ
||88||तद्याहि शीघ्र विप्र त्वं गायत्रीं च सरस्वतीम् ॥
इत्युक्तः काश्यपस्तेन शाकल्येन द्विजोत्तमाः
natvā muniṃ ca śākalyaṃ tamāpṛcchya munīśvaram ||
tena caivābhyanujñātaḥ prayayau gandhamādanam
||89||नत्वा मुनिं च शाकल्यं तमापृच्छ्य मुनीश्वरम् ॥
तेन चैवाभ्यनुज्ञातः प्रययौ गन्धमादनम्
tatra gatvā ca gāyatrīsarasvatyau ca kāśyapaḥ ||
natvā tīrthadvayaṃ bhaktyā daṇḍapāṇiṃ ca bhairavam
||90||तत्र गत्वा च गायत्रीसरस्वत्यौ च काश्यपः ॥
नत्वा तीर्थद्वयं भक्त्या दण्डपाणिं च भैरवम्
saṃkalpapūrvaṃ tattīrthe sasnau niyamasaṃyutaḥ ||
tīrthadvaye snānamātrānmuktapāpo'tha kāśyapaḥ
||91||संकल्पपूर्वं तत्तीर्थे सस्नौ नियमसंयुतः ॥
तीर्थद्वये स्नानमात्रान्मुक्तपापोऽथ काश्यपः
tīrthadvayasya tīre'sau kiṃcitkālaṃ tu tasthivān ||
tasminkāle ca gāyatrīsarasvatyau munīśvarāḥ
||92||तीर्थद्वयस्य तीरेऽसौ किंचित्कालं तु तस्थिवान् ॥
तस्मिन्काले च गायत्रीसरस्वत्यौ मुनीश्वराः
prādurbabhūvaturmūrte sarvābharaṇabhūṣite ||
devyau te sa namaskṛtya kāśyapo bhaktipūrvakam
||93||प्रादुर्बभूवतुर्मूर्ते सर्वाभरणभूषिते ॥
देव्यौ ते स नमस्कृत्य काश्यपो भक्तिपूर्वकम्
ke yuvāṃ rūpasaṃpanne sarvālaṃkārasaṃyute ||
iti papraccha dṛṣṭvā te kāśyapo hṛṣṭamānasaḥ ||
tena pṛṣṭe ca gāyatrīsarasvatyau tamūcatuḥ
||94||के युवां रूपसंपन्ने सर्वालंकारसंयुते ॥
इति पप्रच्छ दृष्ट्वा ते काश्यपो हृष्टमानसः ॥
तेन पृष्टे च गायत्रीसरस्वत्यौ तमूचतुः
gāyatrīsarasvatyāvūcatuḥ
kāśyapāvāṃ hi gāyatrīsarasvatyau vidhipriye
||95||काश्यपावां हि गायत्रीसरस्वत्यौ विधिप्रिये
etattīrthasvarūpeṇa nityaṃ vartāvahe tvataḥ ||
atra tīrthadvaye snānādāvāṃ tuṣṭe tavādhunā
||96||एतत्तीर्थस्वरूपेण नित्यं वर्तावहे त्वतः ॥
अत्र तीर्थद्वये स्नानादावां तुष्टे तवाधुना
varaṃ matto vṛṇīṣva tvaṃ yadiṣṭaṃ kāśyapa dvija ||
snāṃti tīrthadvaye ye'tra dāsyāvastadabhīpsitam
||97||वरं मत्तो वृणीष्व त्वं यदिष्टं काश्यप द्विज ॥
स्नांति तीर्थद्वये येऽत्र दास्यावस्तदभीप्सितम्
śrutvā vacastadgāyatrīsarasvatyoḥ sa kāśyapaḥ ||
tuṣṭāva vāgbhiragryābhiste devyau vedhasaḥ priye
||98||श्रुत्वा वचस्तद्गायत्रीसरस्वत्योः स काश्यपः ॥
तुष्टाव वाग्भिरग्र्याभिस्ते देव्यौ वेधसः प्रिये
kāśyapa uvāca
caturānanagehinyau jagaddhātryau namāmyaham ||
vidyāsvarūpe gāyatrī sarasvatyau śubhe ubhe
||99||चतुराननगेहिन्यौ जगद्धात्र्यौ नमाम्यहम् ॥
विद्यास्वरूपे गायत्री सरस्वत्यौ शुभे उभे
sṛṣṭisthityaṃtakāriṇyau jagato vedamātarau ||
havyakavyasvarūpe ca caṃdrādityavilocane
||100||सृष्टिस्थित्यंतकारिण्यौ जगतो वेदमातरौ ॥
हव्यकव्यस्वरूपे च चंद्रादित्यविलोचने
sarvadevādhipe vāṇī gāyatryau satataṃ bhaje ||
girijā kamalā cāpi yuvāmeva jagaddhite
||1||सर्वदेवाधिपे वाणी गायत्र्यौ सततं भजे ॥
गिरिजा कमला चापि युवामेव जगद्धिते
yuṣmaddarśanamātreṇa jagatsṛṣṭyādikalpanam ||
yuṣmannimeṣātsatataṃ jagatāṃ pralayo bhavet
||2||युष्मद्दर्शनमात्रेण जगत्सृष्ट्यादिकल्पनम् ॥
युष्मन्निमेषात्सततं जगतां प्रलयो भवेत्
unmeṣātsṛṣṭirabhavadbhogāyatri sarasvati ||
yuvayordarśanādadya kṛtārtho'bhavamāśu vai
||3||उन्मेषात्सृष्टिरभवद्भोगायत्रि सरस्वति ॥
युवयोर्दर्शनादद्य कृतार्थोऽभवमाशु वै
māmadya pātakānmuktaṃ snānāttīrtha dvaye'tra tu ||
svīkurvaṃtu muniśreṣṭhā brāhmaṇā bāṃdhavāstathā
||4||मामद्य पातकान्मुक्तं स्नानात्तीर्थ द्वयेऽत्र तु ॥
स्वीकुर्वंतु मुनिश्रेष्ठा ब्राह्मणा बांधवास्तथा
itaḥ paraṃ pāpakṛtye mā me buddhiḥ pravartatām ||
dharme pravartatāṃ nityamayameva varo mama
||5||इतः परं पापकृत्ये मा मे बुद्धिः प्रवर्तताम् ॥
धर्मे प्रवर्ततां नित्यमयमेव वरो मम
dīyatāṃ bho mahādevyau nānyamicchāmyahaṃ varam ||
iti te prārthite tena kāśyapena dvijottamāḥ
||6||दीयतां भो महादेव्यौ नान्यमिच्छाम्यहं वरम् ॥
इति ते प्रार्थिते तेन काश्यपेन द्विजोत्तमाः
sarasvatī ca gāyatrī dve devyau brahmaṇaḥ priye ||
kāśyapaṃ procatuḥ prīte jananyau jagatāṃ sadā
||7||सरस्वती च गायत्री द्वे देव्यौ ब्रह्मणः प्रिये ॥
काश्यपं प्रोचतुः प्रीते जनन्यौ जगतां सदा
kāśyapaitadvaraṃ sarvaṃ prārthitaṃ yattvayā'dhunā ||
anugrahādāvayostadacireṇa tavāstu hi
||8||काश्यपैतद्वरं सर्वं प्रार्थितं यत्त्वयाऽधुना ॥
अनुग्रहादावयोस्तदचिरेण तवास्तु हि
ityuktvā taṃ tu gāyatrīsarasvatyau kṣaṇena vai ||
tirodhānaṃ gate viprāstasmiṃstīrthadvaye tadā
||9||इत्युक्त्वा तं तु गायत्रीसरस्वत्यौ क्षणेन वै ॥
तिरोधानं गते विप्रास्तस्मिंस्तीर्थद्वये तदा
kāśyapo'pi kṛtārthaḥ sansva deśaṃ prati niryayau ||
bāṃdhavā brāhmaṇāḥ sarve kāśyapaṃ gatakilbiṣam
||110||काश्यपोऽपि कृतार्थः सन्स्व देशं प्रति निर्ययौ ॥
बांधवा ब्राह्मणाः सर्वे काश्यपं गतकिल्बिषम्
pratyagṛhṇaṃśca gāyatrīsarasvatyornimajjanāt ||
evaṃ vaḥ kathitaṃ viprā kāśyapasya vimokṣaṇam
||11||प्रत्यगृह्णंश्च गायत्रीसरस्वत्योर्निमज्जनात् ॥
एवं वः कथितं विप्रा काश्यपस्य विमोक्षणम्
pātakebhyo hi gāyatrīsarastyornimajanāt ||
paṭhate tvimamadhyāyaṃ śṛṇute vā samāhitaḥ
||12||पातकेभ्यो हि गायत्रीसरस्त्योर्निमजनात् ॥
पठते त्विममध्यायं शृणुते वा समाहितः
yo gāyatryāṃ sarasvatyāṃ sa snātaphalamaśnute
||113||यो गायत्र्यां सरस्वत्यां स स्नातफलमश्नुते
iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe setumāhātmye gāyatrīsarasvatītīrthapraśaṃsāyāṃ kāśyapapāpaśāṃtivarṇanaṃnāmaikacatvāriṃśo'dhyāyaḥ || 41 ||