athātaḥ saṃpravakṣyāmi rāmanāthasya śūlinaḥ
śrīsūta uvāca
athātaḥ saṃpravakṣyāmi rāmanāthasya śūlinaḥ ||
stotrādhyāyaṃ mahāpuṇyaṃ śṛṇuta śraddhayā dvijāḥ
||1||अथातः संप्रवक्ष्यामि रामनाथस्य शूलिनः ॥
स्तोत्राध्यायं महापुण्यं शृणुत श्रद्धया द्विजाः
rāmaḥ pratiṣṭhite liṃge tuṣṭāva parameśvaram ||
lakṣmaṇo jānakī sītā sugrīvādyāḥ kapīśvarāḥ
||2||रामः प्रतिष्ठिते लिंगे तुष्टाव परमेश्वरम् ॥
लक्ष्मणो जानकी सीता सुग्रीवाद्याः कपीश्वराः
brahmaprabhṛtayo devāḥ kumbhajādyā maharṣayaḥ ||
astuvanbhaktisaṃyuktāḥ pratyekaṃ rāghaveśvaram
||3||ब्रह्मप्रभृतयो देवाः कुम्भजाद्या महर्षयः ॥
अस्तुवन्भक्तिसंयुक्ताः प्रत्येकं राघवेश्वरम्
tadvakṣyāmyānupūrvyeṇa śṛṇutādarapūrvakam ||
etacchravaṇamātreṇa muktaḥ syā nmānavo dvijāḥ
||4||तद्वक्ष्याम्यानुपूर्व्येण शृणुतादरपूर्वकम् ॥
एतच्छ्रवणमात्रेण मुक्तः स्या न्मानवो द्विजाः
śrīrāma uvāca
namo mahātmane tubhyaṃ mahāmāyāya śūline ||
svapadāṃbujabhaktārtihāriṇe sarpa hāriṇe
||5||नमो महात्मने तुभ्यं महामायाय शूलिने ॥
स्वपदांबुजभक्तार्तिहारिणे सर्प हारिणे
namo devādhidevāya rāmanāthāya sākṣiṇe ||
namo vedāṃtavedyāya yogināṃ tattvadāyine
||6||नमो देवाधिदेवाय रामनाथाय साक्षिणे ॥
नमो वेदांतवेद्याय योगिनां तत्त्वदायिने
sarvadānaṃdapūrṇāya viśvanāthāya śaṃbhave ||
namo bhaktabhayacchedahetupādābjareṇave
||7||सर्वदानंदपूर्णाय विश्वनाथाय शंभवे ॥
नमो भक्तभयच्छेदहेतुपादाब्जरेणवे
namaste'khilanāthāya namaḥ sākṣātparātmane ||
namaste'dbhutavīryāya mahāpātakanāśine
||8||नमस्तेऽखिलनाथाय नमः साक्षात्परात्मने ॥
नमस्तेऽद्भुतवीर्याय महापातकनाशिने
kālakālāya kālāya kālātītāya te namaḥ ||
namo'vidyānihaṃtre te namaḥ pāpaharāya ca
||9||कालकालाय कालाय कालातीताय ते नमः ॥
नमोऽविद्यानिहंत्रे ते नमः पापहराय च
namaḥ saṃsārataptānāṃ tāpanāśaikahetave ||
namo madbrahmahatyāvināśine ca viṣāśine
||10||नमः संसारतप्तानां तापनाशैकहेतवे ॥
नमो मद्ब्रह्महत्याविनाशिने च विषाशिने
namaste pārvatīnātha kailāsanilayāvyaya ||
gaṃgādhara virūpākṣa māṃ rakṣa sakalāpadaḥ
||11||नमस्ते पार्वतीनाथ कैलासनिलयाव्यय ॥
गंगाधर विरूपाक्ष मां रक्ष सकलापदः
tubhyaṃ pinākahastāya namo madanahāriṇe ||
bhūyobhūyo namastubhyaṃ sarvāvasthāsu sarvadā
||12||तुभ्यं पिनाकहस्ताय नमो मदनहारिणे ॥
भूयोभूयो नमस्तुभ्यं सर्वावस्थासु सर्वदा
lakṣmaṇa uvāca
namaste rāmanāthāya tripuraghnāya śaṃbhave ||
pārvatījīviteśāya gaṇeśaskandasūnave
||13||नमस्ते रामनाथाय त्रिपुरघ्नाय शंभवे ॥
पार्वतीजीवितेशाय गणेशस्कन्दसूनवे
namaste sūryacadrāgnilocanāya kapardine ||
namaḥ śivāya somāya mārkaṃḍeya bhayacchide
||14||नमस्ते सूर्यचद्राग्निलोचनाय कपर्दिने ॥
नमः शिवाय सोमाय मार्कंडेय भयच्छिदे
namaḥ sarvaprapaṃcasya sṛṣṭisthityaṃtahetave ||
nama ugrāya bhīmāya mahādevāya sākṣiṇe
||15||नमः सर्वप्रपंचस्य सृष्टिस्थित्यंतहेतवे ॥
नम उग्राय भीमाय महादेवाय साक्षिणे
sarvajñāya vareṇyāya varadāya varāya te ||
śrīkaṇṭhāya namastubhyaṃ paṃcapātakabhedine
||16||सर्वज्ञाय वरेण्याय वरदाय वराय ते ॥
श्रीकण्ठाय नमस्तुभ्यं पंचपातकभेदिने
namaste'stu parānaṃdasatyavijñānarūpiṇe ||
namaste bhavarogaghna snāyūnāṃ pataye namaḥ
||17||नमस्तेऽस्तु परानंदसत्यविज्ञानरूपिणे ॥
नमस्ते भवरोगघ्न स्नायूनां पतये नमः
pataye taskarāṇāṃ te vanānāṃ pataye namaḥ ||
gaṇānāṃ pataye tubhyaṃ viśvarūpāyasākṣiṇe
||18||पतये तस्कराणां ते वनानां पतये नमः ॥
गणानां पतये तुभ्यं विश्वरूपायसाक्षिणे
karmaṇā preritaḥ śambho janiṣye yatrayatra tu ||
tatratatra padadvaṃdve bhavato bhaktirastu me
||19||कर्मणा प्रेरितः शम्भो जनिष्ये यत्रयत्र तु ॥
तत्रतत्र पदद्वंद्वे भवतो भक्तिरस्तु मे
asanmārge ratirmā bhūdbhavataḥ kṛpayā mama ||
vaidikācāramārge ca ratiḥ syādbhavate namaḥ
||20||असन्मार्गे रतिर्मा भूद्भवतः कृपया मम ॥
वैदिकाचारमार्गे च रतिः स्याद्भवते नमः
sītovāca
paramakāraṇa śaṃkara dhūrjaṭe girisutāstanakuṃkumaśobhita ||
mama patau paridehi matiṃ sadā na viṣamāṃ parapūruṣagocarām
||21||परमकारण शंकर धूर्जटे गिरिसुतास्तनकुंकुमशोभित ॥
मम पतौ परिदेहि मतिं सदा न विषमां परपूरुषगोचराम्
gaṃgādhara virūpākṣa nīlalohita śaṃkara ||
rāmanātha namastubhyaṃ rakṣa mā karuṇākara
||22||गंगाधर विरूपाक्ष नीललोहित शंकर ॥
रामनाथ नमस्तुभ्यं रक्ष मा करुणाकर
namaste devadeveśa namaste karuṇālaya ||
namaste bhavabhītānāṃ bhavabhītivimardana
||23||नमस्ते देवदेवेश नमस्ते करुणालय ॥
नमस्ते भवभीतानां भवभीतिविमर्दन
nātha tvadīyacaraṇāṃbujaciṃtanena nirddhūya bhāskarasutādbhayamāśu śambho ||
nityatvamāśu gatavānsa mṛkaṃḍuputraḥ kiṃ vā na sidhyati tavāśrayaṇātpareśa
||24||नाथ त्वदीयचरणांबुजचिंतनेन निर्द्धूय भास्करसुताद्भयमाशु शम्भो ॥
नित्यत्वमाशु गतवान्स मृकंडुपुत्रः किं वा न सिध्यति तवाश्रयणात्परेश
pareśaparamānaṃda śaraṇāgatapālaka ||
pātivratyaṃ mama sadā dehi tubhyaṃ namonamaḥ
||25||परेशपरमानंद शरणागतपालक ॥
पातिव्रत्यं मम सदा देहि तुभ्यं नमोनमः
hanūmānuvāca
devadeva jagannātha rāmanātha kṛpānidhe ||
tvatpādāṃbhoruhagatā niścalā bhaktirastu me
||26||देवदेव जगन्नाथ रामनाथ कृपानिधे ॥
त्वत्पादांभोरुहगता निश्चला भक्तिरस्तु मे
yaṃ vinā na jagatsattā tadbhānamapi no bhavet ||
namaḥ sadbhānarūpāya rāmanāthāya śaṃbhave
||27||यं विना न जगत्सत्ता तद्भानमपि नो भवेत् ॥
नमः सद्भानरूपाय रामनाथाय शंभवे
aṃgada uvāca
yasya bhāsā jagadbhānaṃ yatprakāśaṃ vinā jagat ||
na bhāsate namastasmai rāmanāthāya śaṃbhave
||28||यस्य भासा जगद्भानं यत्प्रकाशं विना जगत् ॥
न भासते नमस्तस्मै रामनाथाय शंभवे
jāṃbuvānuvāca
sarvānaṃdo yadānaṃdo bhāsate paramārthataḥ ||
namo rāmeśvarāyāsmai paramānaṃdarūpiṇe
||29||सर्वानंदो यदानंदो भासते परमार्थतः ॥
नमो रामेश्वरायास्मै परमानंदरूपिणे
nīla uvāca
yaddeśakāladigbhedairabhinnaṃ sarvadā dvayam ||
tasmai rāmeśvarāyāsmai namo'bhinnasva rūpiṇe
||30||यद्देशकालदिग्भेदैरभिन्नं सर्वदा द्वयम् ॥
तस्मै रामेश्वरायास्मै नमोऽभिन्नस्व रूपिणे
nala uvāca
brahmaviṣṇumaheśānā yadavidyāvijṛṃbhitāḥ ||
namo'vidyāvihīnāya tasmai rāmeśvarāya te
||31||ब्रह्मविष्णुमहेशाना यदविद्याविजृंभिताः ॥
नमोऽविद्याविहीनाय तस्मै रामेश्वराय ते
kumuda uvāca
yastvarūpāparijñānātpradhānaṃ kāraṇatvataḥ ||
kalpitaṃ kāraṇāyāsmai rāmanāthāya śaṃbhave
||32||यस्त्वरूपापरिज्ञानात्प्रधानं कारणत्वतः ॥
कल्पितं कारणायास्मै रामनाथाय शंभवे
panasa uvāca
jāgratsvapnasuṣuptyādiyadavidyāvijṛṃbhitam ||
jāgradādivihīnāya namo'smai jñānarūpiṇe
||33||जाग्रत्स्वप्नसुषुप्त्यादियदविद्याविजृंभितम् ॥
जाग्रदादिविहीनाय नमोऽस्मै ज्ञानरूपिणे
gaja uvāca
yatsvarūpāparijñānātkāryāṇāṃ paramā ṇavaḥ ||
kalpitāḥ kāraṇatvena tārkikāpasadairvṛthā
||34||यत्स्वरूपापरिज्ञानात्कार्याणां परमा णवः ॥
कल्पिताः कारणत्वेन तार्किकापसदैर्वृथा
tamahaṃ paramānaṃdaṃ rāmanāthaṃ maheśvaram ||
ātmarūpatayā nityamupāse sarvasākṣiṇam
||35||तमहं परमानंदं रामनाथं महेश्वरम् ॥
आत्मरूपतया नित्यमुपासे सर्वसाक्षिणम्
gavākṣa uvāca
ajñānapāśabaddhānāṃ paśūnāṃ pāśamocakam ||
rāmeśvaraṃ śivaṃ śāṃtamupaimi śaraṇaṃ sadā
||36||अज्ञानपाशबद्धानां पशूनां पाशमोचकम् ॥
रामेश्वरं शिवं शांतमुपैमि शरणं सदा
gavaya uvāca
sādhvastajagadādhāraṃ caṃdracūḍamumāpatim ||
rāmanāthaṃ śivaṃ vande saṃsārāmayabheṣajam
||37||साध्वस्तजगदाधारं चंद्रचूडमुमापतिम् ॥
रामनाथं शिवं वन्दे संसारामयभेषजम्
śarabha uvāca
aṃtaḥkaraṇamātmeti yadajñānādvimohitaiḥ ||
bhaṇyate rāmanāthaṃ tamātmānaṃ praṇamāmyaham
||38||अंतःकरणमात्मेति यदज्ञानाद्विमोहितैः ॥
भण्यते रामनाथं तमात्मानं प्रणमाम्यहम्
gandhamādana uvāca
rāmanāthamumānāthaṃ gaṇanāthaṃ ca tryaṃbakam ||
sarvapātakaśuddhyarthamupāse jagadīśvaram
||39||रामनाथमुमानाथं गणनाथं च त्र्यंबकम् ॥
सर्वपातकशुद्ध्यर्थमुपासे जगदीश्वरम्
sugrīva uvāca
saṃsārāṃbhodhi madhye māṃ janmamṛtyujale bhaye ||
putradāradhanakṣetravīcimālāsamākule
||40||संसारांभोधि मध्ये मां जन्ममृत्युजले भये ॥
पुत्रदारधनक्षेत्रवीचिमालासमाकुले
majjadbrahmāṃḍakhaṃḍe ca patitaṃ nāptapārakam ||
krośaṃtamavaśaṃ dīnaṃ viṣayavyā lakātaram
||41||मज्जद्ब्रह्मांडखंडे च पतितं नाप्तपारकम् ॥
क्रोशंतमवशं दीनं विषयव्या लकातरम्
vyādhinakrasamudvignaṃ tāpatrayajhaṣārtidam ||
māṃ rakṣa girijānātha rāmanātha namo'stu te
||42||व्याधिनक्रसमुद्विग्नं तापत्रयझषार्तिदम् ॥
मां रक्ष गिरिजानाथ रामनाथ नमोऽस्तु ते
vibhīṣaṇa uvāca
saṃsāravanamadhye māṃ vinaṣṭanijamārgake ||
vyādhicaure krodhasiṃhe janmavyāghre layorage
||43||संसारवनमध्ये मां विनष्टनिजमार्गके ॥
व्याधिचौरे क्रोधसिंहे जन्मव्याघ्रे लयोरगे
bālyayauvanavārdhakyamahābhīmāṃdhakūpake ||
krodherṣyā lobhavahnau ca viṣayakrūraparvate
||44||बाल्ययौवनवार्धक्यमहाभीमांधकूपके ॥
क्रोधेर्ष्या लोभवह्नौ च विषयक्रूरपर्वते
trāsabhūkaṃṭakāḍhye ca sīdaṃtamadhunāṃdhakam ||
śobhanāṃ padavīṃ śaṃbho naya rāmeśvarādhunā
||45||त्रासभूकंटकाढ्ये च सीदंतमधुनांधकम् ॥
शोभनां पदवीं शंभो नय रामेश्वराधुना
sarve vānarā ūcuḥ
niṃdyāniṃdyeṣu sarvatra janitvā yoniṣu prabho ||
kuṃbhīpākādinarake patitvā ca punastathā
||46||निंद्यानिंद्येषु सर्वत्र जनित्वा योनिषु प्रभो ॥
कुंभीपाकादिनरके पतित्वा च पुनस्तथा
janitvā ca punaryonau karmaśeṣeṇa kutsite ||
saṃsāre patitānasmānrāmanātha dayānidhe
||47||जनित्वा च पुनर्योनौ कर्मशेषेण कुत्सिते ॥
संसारे पतितानस्मान्रामनाथ दयानिधे
anāthānvivaśāndīnānkrośataḥ pāhi śaṃkara ||
namastestu dayāsiṃdho rāmanātha maheśvara
||48||अनाथान्विवशान्दीनान्क्रोशतः पाहि शंकर ॥
नमस्तेस्तु दयासिंधो रामनाथ महेश्वर
brahmovāca
namaste lokanāthāya rāmanāthāya śaṃbhave ||
prasīda mama sarveśa madavidyāṃ vināśaya
||49||नमस्ते लोकनाथाय रामनाथाय शंभवे ॥
प्रसीद मम सर्वेश मदविद्यां विनाशय
iṃdra uvāca
yasya śaktirumā devī jaganmātā trayīmayī ||
tamahaṃ śaṃkaraṃ vaṃde rāmanāthamumāpatim
||50||यस्य शक्तिरुमा देवी जगन्माता त्रयीमयी ॥
तमहं शंकरं वंदे रामनाथमुमापतिम्
yama uvāca
putrau gaṇeśvaraskaṃdau vṛṣo yasya ca vāhanam ||
taṃ vai rāmeśvaraṃ seve sarvājñānanivṛttaye
||51||पुत्रौ गणेश्वरस्कंदौ वृषो यस्य च वाहनम् ॥
तं वै रामेश्वरं सेवे सर्वाज्ञाननिवृत्तये
varuṇa uvāca
yasya pūjāprabhāvena jita mṛtyurmṛkaṃḍujaḥ ||
mṛtyuṃjayamupāse'haṃ rāmanāthaṃ hṛdā tu tam
||52||यस्य पूजाप्रभावेन जित मृत्युर्मृकंडुजः ॥
मृत्युंजयमुपासेऽहं रामनाथं हृदा तु तम्
kubera uvāca
īśvarāya lasatkarṇakuṃḍalābharaṇāya te ||
lākṣāruṇaśarīrāya namo rāmeśvarāya vai
||53||ईश्वराय लसत्कर्णकुंडलाभरणाय ते ॥
लाक्षारुणशरीराय नमो रामेश्वराय वै
āditya uvāca
namaste'stu mahādeva rāmanātha triyaṃbaka ||
dakṣādhvaravināśāya namaste pāhi māṃ śiva
||54||नमस्तेऽस्तु महादेव रामनाथ त्रियंबक ॥
दक्षाध्वरविनाशाय नमस्ते पाहि मां शिव
soma uvāca
namaste bhasmadigdhāya śūline sarpamāline ||
rāmanātha dayāṃbhodhe smaśānanilayāya te
||55||नमस्ते भस्मदिग्धाय शूलिने सर्पमालिने ॥
रामनाथ दयांभोधे स्मशाननिलयाय ते
agniruvāca
indrādyakhiladikpālasaṃsevitapadāṃbuja ||
rāmanāthāya śuddhāya namo digvāsase sadā
||56||इन्द्राद्यखिलदिक्पालसंसेवितपदांबुज ॥
रामनाथाय शुद्धाय नमो दिग्वाससे सदा
vāyuruvāca
harāya harirūpāya vyāghracarmāṃbarāya ca ||
rāmanātha namastubhyaṃ mamābhīṣṭaprado bhava
||57||हराय हरिरूपाय व्याघ्रचर्मांबराय च ॥
रामनाथ नमस्तुभ्यं ममाभीष्टप्रदो भव
bṛhaspatiruvāca
ahaṃtāsākṣiṇe nityaṃ pratyagadvayavastune ||
rāmanātha mamājñānamāśu nāśaya te namaḥ
||58||अहंतासाक्षिणे नित्यं प्रत्यगद्वयवस्तुने ॥
रामनाथ ममाज्ञानमाशु नाशय ते नमः
śukra uvāca
vaṃcakānāmalabhyāya mahāmaṃtrārtharūpiṇe ||
namo dvaitavihīnāya rāmanāthāya śaṃbhave
||59||वंचकानामलभ्याय महामंत्रार्थरूपिणे ॥
नमो द्वैतविहीनाय रामनाथाय शंभवे
aśvināvūcatuḥ
ātmarūpatayā nityaṃ yogināṃ bhāsate hṛdi ||
ananya bhānavedyāya namaste rāghaveśvara
||60||आत्मरूपतया नित्यं योगिनां भासते हृदि ॥
अनन्य भानवेद्याय नमस्ते राघवेश्वर
agastya uvāca
ādideva mahādeva viśveśvara śivāvyaya ||
rāmanāthāṃbikānātha prasīda vṛṣa bhadhvaja
||61||आदिदेव महादेव विश्वेश्वर शिवाव्यय ॥
रामनाथांबिकानाथ प्रसीद वृष भध्वज
aparādhasahasraṃ me kṣamasva vidhuśekhara ||
mamāhamiti putrādāvahaṃtāṃ mama mocaya
||62||अपराधसहस्रं मे क्षमस्व विधुशेखर ॥
ममाहमिति पुत्रादावहंतां मम मोचय
sutīkṣṇa uvāca
kṣetrāṇi ratnāni dhanāni dārā mitrāṇi vastrāṇi gavāśvaputrāḥ ||
naivopakārāya hi rāmanātha mahyaṃ prayaccha tvamato viraktim
||63||क्षेत्राणि रत्नानि धनानि दारा मित्राणि वस्त्राणि गवाश्वपुत्राः ॥
नैवोपकाराय हि रामनाथ मह्यं प्रयच्छ त्वमतो विरक्तिम्
viśvāmitra uvāca
śrutāni śāstrāṇyapi niṣphalāni trayyapyadhītā viphalaiva nūnam ||
tvayīśvare cenna bhaveddhi bhaktiḥ śrīrāmanāthe śiva mānuṣasya
||64||श्रुतानि शास्त्राण्यपि निष्फलानि त्रय्यप्यधीता विफलैव नूनम् ॥
त्वयीश्वरे चेन्न भवेद्धि भक्तिः श्रीरामनाथे शिव मानुषस्य
gālava uvāca
dānāni yajñā niyamāstapāṃsi gaṃgāditīrtheṣu nimajjanāni ||
rāmeśvaraṃ tvāṃ na namaṃti ye tu vyarthāni teṣāmiti niścayo'tra
||65||दानानि यज्ञा नियमास्तपांसि गंगादितीर्थेषु निमज्जनानि ॥
रामेश्वरं त्वां न नमंति ये तु व्यर्थानि तेषामिति निश्चयोऽत्र
vasiṣṭha uvāca
kṛtvāpi pāpānyakhilāni lokastvāmetya rāmeśvara bhaktiyuktaḥ ||
nameta cettāni layaṃ vrajeyuryathāṃdhakāro ravitejasā'ddhā
||66||कृत्वापि पापान्यखिलानि लोकस्त्वामेत्य रामेश्वर भक्तियुक्तः ॥
नमेत चेत्तानि लयं व्रजेयुर्यथांधकारो रवितेजसाऽद्धा
atriruvāca
dṛṣṭvā tu rāmeśvaramekadāpi spṛṣṭvā namaskṛtya bhavaṃtamīśam ||
punarna garbhaṃ sa naraḥ prayāyātkiṃ tvadvayaṃ te labhataṃ svarūpam
||67||दृष्ट्वा तु रामेश्वरमेकदापि स्पृष्ट्वा नमस्कृत्य भवंतमीशम् ॥
पुनर्न गर्भं स नरः प्रयायात्किं त्वद्वयं ते लभतं स्वरूपम्
aṃgirā uvāca
yo rāmanāthaṃ manujo bhavaṃtamupetya baṃdhūnpraṇamansmareta ||
saṃtārayettānapi sarvapāpātkima dbhutaṃ tasya kṛtārthatāyām
||68||यो रामनाथं मनुजो भवंतमुपेत्य बंधून्प्रणमन्स्मरेत ॥
संतारयेत्तानपि सर्वपापात्किम द्भुतं तस्य कृतार्थतायाम्
gautama uvāca
śrīrāmanātheśvara gūḍhamettadrahasyabhūtaṃ paramaṃ viśokam ||
tvatpādamūlaṃ bhajatāṃ nṛṇāṃ ye sevāṃ prakurvaṃti hi te'pi dhanyāḥ
||69||श्रीरामनाथेश्वर गूढमेत्तद्रहस्यभूतं परमं विशोकम् ॥
त्वत्पादमूलं भजतां नृणां ये सेवां प्रकुर्वंति हि तेऽपि धन्याः
śatānaṃda uvāca
vedāṃtavijñānarahasyavidbhirvijñeyametaddhi mumukṣubhistu ||
śāstrāṇi sarvāṇi vihāya deva tvatsevanaṃ yadraghuvīranātha
||70||वेदांतविज्ञानरहस्यविद्भिर्विज्ञेयमेतद्धि मुमुक्षुभिस्तु ॥
शास्त्राणि सर्वाणि विहाय देव त्वत्सेवनं यद्रघुवीरनाथ
bhṛguruvāca
rāmanātha tava pādapaṃkajaṃ dvaṃdvaciṃtanavidhūtakalmaṣaḥ ||
nirbhayaṃ vrajati satsukhādvayaṃ suprabhaṃ tvatha amoghaciddhanam
||71||रामनाथ तव पादपंकजं द्वंद्वचिंतनविधूतकल्मषः ॥
निर्भयं व्रजति सत्सुखाद्वयं सुप्रभं त्वथ अमोघचिद्धनम्
kutsa uvāca
rāmanātha tava pādasevanaṃ bhogamokṣavaradaṃ nṛṇāṃ sadā ||
rauravādinarakapraṇāśanaṃ kaḥ pumānna bhajate rasagrahaḥ
||72||रामनाथ तव पादसेवनं भोगमोक्षवरदं नृणां सदा ॥
रौरवादिनरकप्रणाशनं कः पुमान्न भजते रसग्रहः
kāśyapa uvāca
rāmanātha tava pādasevināṃ kiṃ vratairuta tapobhiradhvaraiḥ ||
vedaśāstra japacintayā ca kiṃ svargasindhupayasāpi kiṃ phalam
||73||रामनाथ तव पादसेविनां किं व्रतैरुत तपोभिरध्वरैः ॥
वेदशास्त्र जपचिन्तया च किं स्वर्गसिन्धुपयसापि किं फलम्
śrīrāmanātha tvamāgatya śīghraṃ mamotkrāṃtikāle bhavānyā ca sākam ||
māṃ prāpaya svātmapādāravindaṃ viśokaṃ vimohaṃ sukhaṃ citsvarūpam
||74||श्रीरामनाथ त्वमागत्य शीघ्रं ममोत्क्रांतिकाले भवान्या च साकम् ॥
मां प्रापय स्वात्मपादारविन्दं विशोकं विमोहं सुखं चित्स्वरूपम्
gandharvā ūcuḥ
rāmanātha tvamasmākaṃ bhajatāṃ bhavasāgare ||
apāre duḥkhakallole na tvattonyā gatirhi naḥ
||75||रामनाथ त्वमस्माकं भजतां भवसागरे ॥
अपारे दुःखकल्लोले न त्वत्तोन्या गतिर्हि नः
kinnarā ūcuḥ
rāmanātha bhavāraṇye vyādhivyāghrabhayānake ||
tvāmaṃtareṇa nāsmākaṃ padavīdarśako bhavet
||76||रामनाथ भवारण्ये व्याधिव्याघ्रभयानके ॥
त्वामंतरेण नास्माकं पदवीदर्शको भवेत्
yakṣā ūcuḥ
rāmanātheṃdriyārātibādhā no duḥsahā sadā ||
tānvijetuṃ sahāyastvamasmākaṃ bhava dhūrjaṭe
||77||रामनाथेंद्रियारातिबाधा नो दुःसहा सदा ॥
तान्विजेतुं सहायस्त्वमस्माकं भव धूर्जटे
nāgā ūcuḥ
acintyamahimānaṃ tvā rāmanātha vayaṃ katham ||
stotumalpadhiyaḥ śaktā bhaviṣyāmoṃ'bikāpate
||78||अचिन्त्यमहिमानं त्वा रामनाथ वयं कथम् ॥
स्तोतुमल्पधियः शक्ता भविष्यामोंऽबिकापते
kiṃpuruṣā ūcuḥ
nānāyonau ca jananaṃ maraṇaṃ cāpyanekaśaḥ ||
vināśaya tathā'jñānaṃ rāmanātha namo'stu te
||79||नानायोनौ च जननं मरणं चाप्यनेकशः ॥
विनाशय तथाऽज्ञानं रामनाथ नमोऽस्तु ते
vidyādharā ūcuḥ
aṃbikāpataye tubhyamasaṃgāya mahātmane ||
namaste rāmanāthāya prasīda vṛṣabhadhvaja
||80||अंबिकापतये तुभ्यमसंगाय महात्मने ॥
नमस्ते रामनाथाय प्रसीद वृषभध्वज
vasava ūcuḥ
rāmanāthagaṇeśāya gaṇavṛṃdārcitāṃghraye ||
gaṃgādharāya guhyāya namaste pāhi naḥ sadā
||81||रामनाथगणेशाय गणवृंदार्चितांघ्रये ॥
गंगाधराय गुह्याय नमस्ते पाहि नः सदा
viśvedevā ūcuḥ
jñaptimātraikaniṣṭhānāṃ muktidāya suyoginām ||
rāmanāthāya sāṃbāya namo'smānrakṣa śaṃkara
||82||ज्ञप्तिमात्रैकनिष्ठानां मुक्तिदाय सुयोगिनाम् ॥
रामनाथाय सांबाय नमोऽस्मान्रक्ष शंकर
maruta ūcuḥ
paratattvāya tattvānāṃ tattvabhūtāya vastutaḥ ||
namaste rāmanāthāya svayaṃbhānāya śaṃbhave
||83||परतत्त्वाय तत्त्वानां तत्त्वभूताय वस्तुतः ॥
नमस्ते रामनाथाय स्वयंभानाय शंभवे
sādhyā ūcuḥ
svātiriktavihīnāya jagatsattāpradāyine ||
rāmeśvarāya devāya namo'vidyā vibhedine
||84||स्वातिरिक्तविहीनाय जगत्सत्ताप्रदायिने ॥
रामेश्वराय देवाय नमोऽविद्या विभेदिने
sarve devā ūcuḥ
saccidānaṃdasaṃpūrṇaṃ dvaitavastuvivarjitam ||
brahmātmānaṃ svayaṃbhānamādimadhyāṃtavarjitam
||85||सच्चिदानंदसंपूर्णं द्वैतवस्तुविवर्जितम् ॥
ब्रह्मात्मानं स्वयंभानमादिमध्यांतवर्जितम्
avikriyamasaṃgaṃ ca pariśuddhaṃ sanātanam ||
ākāśādiprapaṃcānāṃ sākṣibhūtaṃ parāmṛtam
||86||अविक्रियमसंगं च परिशुद्धं सनातनम् ॥
आकाशादिप्रपंचानां साक्षिभूतं परामृतम्
pramātītaṃ pramāṇānāmapi bodhapradāyinam ||
āvirbhāvatirobhāva saṃkocarahitaṃ sadā
||87||प्रमातीतं प्रमाणानामपि बोधप्रदायिनम् ॥
आविर्भावतिरोभाव संकोचरहितं सदा
svasminnadhyastarūpasya prapaṃcasyāsya sākṣiṇam ||
nirlepaṃ paramānaṃdaṃ nirastasakalakriyam
||88||स्वस्मिन्नध्यस्तरूपस्य प्रपंचस्यास्य साक्षिणम् ॥
निर्लेपं परमानंदं निरस्तसकलक्रियम्
bhūmānaṃdaṃ mahātmānaṃ cidrūpaṃ bhogavarjitam ||
rāmanāthaṃ vayaṃ sarve svapātakaviśuddhaye
||89||भूमानंदं महात्मानं चिद्रूपं भोगवर्जितम् ॥
रामनाथं वयं सर्वे स्वपातकविशुद्धये
cintayāmaḥ sadā citte svātmānaṃdabubhutsavaḥ ||
rakṣāsmānkaruṇāsindho rāma nātha namo'stu te
||9||चिन्तयामः सदा चित्ते स्वात्मानंदबुभुत्सवः ॥
रक्षास्मान्करुणासिन्धो राम नाथ नमोऽस्तु ते
rāmanāthāya rudrāya namaḥ saṃsārahāriṇe ||
brahmaviṣṇvādirūpeṇa vibhinnāya svamāyayā
||91||रामनाथाय रुद्राय नमः संसारहारिणे ॥
ब्रह्मविष्ण्वादिरूपेण विभिन्नाय स्वमायया
vibhīṣaṇasacivā ūcuḥ
varadāya vareṇyāya trinetrāya triśūline ||
yogidhyeyāya nityāya rāmanāthāya te namaḥ
||92||वरदाय वरेण्याय त्रिनेत्राय त्रिशूलिने ॥
योगिध्येयाय नित्याय रामनाथाय ते नमः
sūta uvāca
iti rāmādibhiḥ sarvaiḥ stuto rāmeśvaraḥ śivaḥ ||
prāha sarvānsamāhūya rāmādīndvijasattamāḥ
||93||इति रामादिभिः सर्वैः स्तुतो रामेश्वरः शिवः ॥
प्राह सर्वान्समाहूय रामादीन्द्विजसत्तमाः
rāmarāma mahābhāga jānakīramaṇa prabho ||
saumitre jānaki śubhe he sugrīva mukhāstathā
||94||रामराम महाभाग जानकीरमण प्रभो ॥
सौमित्रे जानकि शुभे हे सुग्रीव मुखास्तथा
anye brahmamukhā yūyaṃ śṛṇudhvaṃ susamāsthitāḥ ||
stotrādhyāyamimaṃ puṇyaṃ yuṣmābhiḥ kṛtamādarāt
||95||अन्ये ब्रह्ममुखा यूयं शृणुध्वं सुसमास्थिताः ॥
स्तोत्राध्यायमिमं पुण्यं युष्माभिः कृतमादरात्
ye paṭhaṃti ca śṛṇvaṃti śrāvayaṃti ca mānavāḥ ||
madarcanaphalaṃ teṣāṃ bhaviṣyati na saṃśayaḥ
||96||ये पठंति च शृण्वंति श्रावयंति च मानवाः ॥
मदर्चनफलं तेषां भविष्यति न संशयः
rāmacaṃdradhanuṣkoṭisnānapuṇyaṃ ca vai bhavet ||
varṣamekaṃ rāmasetau vāsapuṇyaṃ bhaviṣyati
||97||रामचंद्रधनुष्कोटिस्नानपुण्यं च वै भवेत् ॥
वर्षमेकं रामसेतौ वासपुण्यं भविष्यति
gandhamādanamadhyasthasarvartīrthābhimajjanāt ||
yatpuṇyaṃ tadbhavettena nātra saṃśayakāraṇam
||98||गन्धमादनमध्यस्थसर्वर्तीर्थाभिमज्जनात् ॥
यत्पुण्यं तद्भवेत्तेन नात्र संशयकारणम्
uktvaivaṃ rāmanātho'pi svātmaliṃge tirodadhe ||
stotrādhyāyamimaṃ puṇyaṃ nityaṃ saṃkīrtayannaraḥ
||99||उक्त्वैवं रामनाथोऽपि स्वात्मलिंगे तिरोदधे ॥
स्तोत्राध्यायमिमं पुण्यं नित्यं संकीर्तयन्नरः
jarāmaraṇanirmukto janmaduḥkhavivarjitaḥ ||
rāmanāthasya sāyujyamuktiṃ prāpnotyasaṃśayaḥ
||100||जरामरणनिर्मुक्तो जन्मदुःखविवर्जितः ॥
रामनाथस्य सायुज्यमुक्तिं प्राप्नोत्यसंशयः
iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe setumāhātmye rāmādibhī rāmanāthastotrakathanaṃnāmaikonapaṃcāśattamo'dhyāyaḥ || 49 ||