Kṛṣṇayajuḥ Taittirīyasaṃhitā — Prathama kāṇḍa, prapāṭhaka 1 (14 anuvākāḥ)
Kṛṣṇayajuḥ Taittirīyasaṃhitā — Prathama kāṇḍa, prapāṭhaka 1
Section titled “Kṛṣṇayajuḥ Taittirīyasaṃhitā — Prathama kāṇḍa, prapāṭhaka 1”prathamakāṇḍe prathamaḥ praśnaḥ 1
Anuvākāḥ
Section titled “Anuvākāḥ”| Anuvāka | First Words |
|---|---|
| 1 | 1 iṣe |
| 2 | 2 yajñasya |
| 3 | 4 śudhadhva |
| 4 | 5 karmaṇe |
| 5 | 7 devo |
| 6 | 9 avadhūtṛ |
| 7 | 10 dhṛṣṭirasi |
| 8 | 12 savapāmi |
| 9 | 13 ādada |
| 10 | 16 pratyuṣṭṛ |
| 11 | 19 kṛṣṇo’syākhareṣṭho’gnaye |
| 12 | 21 bhuvanamasi |
| 13 | 22 vājasya |
| 14 | 25 ubhā |
1 i̱ṣe tvo̱rje tvā̍ vā̱yava̍ḥ sthopā̱yava̍sstha de̱vo va̍ssavi̱tā prārpa̍yatu̱ śreṣṭha̍tamāya̱ karma̍ṇa̱ ā pyā̍yadhvamaghniyā devabhā̱ga mūrja̍svatī̱ḥ paya̍svatīḥ pra̱jāva̍tīranamī̱vā a̍ya̱kṣmā mā va̍sste̱na ī̍śata̱ mā’ghaśṛ̍so ru̱drasya̍ he̱tiḥ pari̍ vo vṛṇaktu dhru̱vā a̱smingopa̍tau syāta ba̱hvīryaja̍mānasya pa̱śūnpā̍hi || i̱ṣe trica̍tvārṛśat ||1.1.1||
2 ya̱jñasya̍ gho̱ṣada̍si̱ pratyu̍ṣṭṛ̱ rakṣa̱ḥ pratyu̍ṣṭā̱ arā̍taya̱ḥ preyama̍gāddhi̱ṣaṇā̍ ba̱ṟhiraccha̱ manu̍nā kṛ̱tā sva̱dhayā̱ vita̍ṣṭā̱ ta āva̍hanti ka̱vaya̍ḥ pu̱rastā̎dde̱vebhyo̱ juṣṭa̍mi̱ha ba̱ṟhirā̱sade̍ de̱vānā̎ṃ pariṣū̱tama̍si va̱ṟṣavṛ̍ddhamasi̱ deva̍barhi̱rmā tvā̱’nvaṅmā ti̱ryakparva̍ te rādhyā samācche̱ttā te̱ mā ri̍ṣa̱ndeva̍barhiḥ śa̱tava̍lśa̱ṃ vi ro̍ha sa̱hasra̍valśā̱ 3 vi va̱yṛ ru̍hema pṛthi̱vyāḥ sa̱ṃpṛca̍ḥ pāhi susa̱ṃbhṛtā̎ tvā̱ sambha̍rā̱myadi̍tyai̱ rāsnā̍’sīndrā̱ṇyai sa̱nnaha̍naṃ pū̱ṣā te̎ gra̱nthiṅgra̍thnātu̱ sa te̱ mā”sthā̱dindra̍sya tvā bā̱hubhyā̱mudya̍cche̱ bṛha̱spate̎rmū̱rdhnā ha̍rāmyu̱rva̍ntari̍kṣa̱manvi̍hi devaṅga̱mama̍si || sa̱hasra̍valśā a̱ṣṭātrṛ̍śacca ||1.1.2||
4 śuṃdha̍dhva̱ṃ daivyā̍ya̱ karma̍ṇe devaya̱jyāyai̍ māta̱riśva̍no gha̱rmo̍’si̱ dyaura̍si pṛthi̱vya̍si vi̱śvadhā̍yā asi para̱meṇa̱ dhāmnā̱ dṛha̍sva̱ mā hvā̱rvasū̍nāmpa̱vitra̍masi śa̱tadhā̍ra̱ṃ vasū̍nāṃ pa̱vitra̍masi sa̱hasra̍dhārṛ hu̱taḥ sto̱ko hu̱to dra̱phso̎’gnaye̍ bṛha̱te nākā̍ya̱ svāhā̱ dyāvā̍pṛthi̱vībhyṛ̱ sā vi̱śvāyu̱ḥ sā vi̱śvavya̍cā̱ḥ sā vi̱śvaka̍rmā̱ sampṛ̍cyadhvamṛtāvarīrū̱rmiṇī̱rmadhu̍mattamā ma̱ndrā dhana̍sya sā̱taye̱ some̍na̱ tvā”ta̍na̱cmīndrā̍ya̱ dadhi̱ viṣṇo̍ ha̱vyṛ ra̍kṣasva || some̍nā̱ṣṭau ca̍ ||1.1.3||
5 karma̍ṇe vānde̱vebhya̍ḥ śakeya̱ṃ veṣā̍ya tvā̱ pratyu̍ṣṭṛ̱ rakṣa̱ḥ pratyu̍ṣṭā̱ arā̍tayo̱ dhūra̍si̱ dhūrva̱ dhūrva̍nta̱ndhūrva̱ taṃ yo̎’smāndhūrva̍ti̱ tandhū̎rva̱yaṃ va̱yaṃ dhūrvā̍ma̱stvaṃ de̱vānā̍masi̱ sasni̍tama̱ṃ papri̍tama̱ñjuṣṭa̍tama̱ṃ vahni̍tamaṃ deva̱hūta̍ma̱mahru̍tamasi havi̱rdhāna̱ṃ dṛha̍sva̱ mā hvā̎rmi̱trasya̍ tvā̱ cakṣu̍ṣā̱ prekṣe̱ mā bhermā saṃvi̍kthā̱ mā tvā̍ 6 hṛsiṣamu̱ru vātā̍ya de̱vasya̍ tvā savi̱tuḥ pra̍sa̱ve̎’śvino̎rbā̱hubhyā̎ṃ pū̱ṣṇo hastā̎bhyāma̱gnaye̱ juṣṭa̱nnirva̍pāmya̱gnīṣomā̎bhyāmi̱daṃ de̱vānā̍mi̱damu̍naḥ sa̱ha sphā̱tyai tvā̱ nārā̎tyai̱ suva̍ra̱bhi vikhye̍ṣaṃ vaiśvāna̱raṃ jyoti̱rdṛha̍ntā̱nduryā̱ dyāvā̍pṛthi̱vyoru̱rva̍ntari̍kṣa̱manvi̱hyadi̍tyāstvo̱pasthe̍ sādayā̱myagne̍ ha̱vyṛ ra̍kṣasva || mātvā̱ ṣaṭca̍tvārṛśacca | ||1.1.4||
7 de̱vo va̍ssavi̱totpu̍nā̱tvacchi̍dreṇa pa̱vitre̍ṇa̱ vaso̱ḥ sūrya̍sya ra̱śmibhi̱rāpo̍ devīragrepuvo agre gu̱vo’gra̍ i̱maṃ ya̱jñaṃ na̍ya̱tāgre̍ ya̱jñapa̍tindhatta yu̱ṣmānindro̍’vṛṇīta vṛtra̱tūrye̍ yū̱yamindra̍mavṛṇīdhvaṃ vṛtra̱tūrye̱ prokṣi̍tāḥ sthā̱gnaye̍ vo̱ juṣṭa̱ṃ prokṣā̎mya̱gnīṣomā̎bhyṛ̱ śundha̍dhva̱ndaivyā̍ya̱ karma̍ṇe devaya̱jyāyā̱ ava̍dhūtṛ̱ rakṣo’va̍dhūtā̱ arā̍ta̱yo’di̍tyā̱stvaga̍si̱ prati̍ tvā 8 pṛthi̱vī ve̎ttvadhi̱ṣava̍ṇamasi vānaspa̱tyaṃ prati̱ tvā’di̍tyā̱stvagve̎ttva̱gnesta̱nūra̍si vā̱co vi̱sarja̍nande̱vavī̍taye tvā gṛhṇā̱myadri̍rasi vānaspa̱tyaḥ sa i̱daṃ de̱vebhyo̍ ha̱vyṛ su̱śami̍ śami̱ṣveṣa̱mā va̱dorja̱mā va̍da dyu̱madva̍data va̱yṛ sa̍ṃghā̱tañje̎ṣma va̱ṟṣavṛ̍ddhamasi̱ prati̍ tvā va̱ṟṣavṛ̍ddhaṃvettu̱ parā̍pūtṛ̱ rakṣa̱ḥ parā̍pūtā̱ arā̍tayo̱ rakṣa̍sāṃ bhā̱go̍’si vā̱yurvo̱ vivi̍naktu de̱vo va̍ḥ savi̱tā hira̍ṇyapāṇi̱ḥ prati̍ gṛhṇātu || tvā̱ bhā̱ga ekā̍daśa ca | ||1.1.5||
9 ava̍dhūtṛ̱ rakṣo’va̍dhūtā̱ arā̍ta̱yo’di̍tyā̱stvaga̍si̱ prati̍tvā pṛthi̱vī ve̎ttu di̱vasska̍mbha̱nira̍si̱ prati̱ tvā’di̍tyā̱stvagve̎ttu dhi̱ṣaṇā̍’si parva̱tyā prati̍ tvā di̱vasska̍mbha̱nirve̎ttu dhi̱ṣaṇā̍’si pārvate̱yī prati̍ tvā parva̱tirve̎ttu de̱vasya̍ tvā savi̱tuḥ pra̍sa̱ve̎’śvino̎rbā̱hubhyā̎ṃ pū̱ṣṇo hastā̎bhyā̱madhi̍vapāmi dhā̱nya̍masi dhinu̱hi de̱vānprā̱ṇāya̍ tvā’pā̱nāya̍ tvā vyā̱nāya̍ tvā dī̱rghāmanu̱ prasi̍ti̱māyu̍ṣe dhānde̱vo va̍ssavi̱tā hira̍ṇyapāṇi̱ḥ prati̍gṛhṇātu || prā̱ṇāya̍tvā̱ pañca̍daśa ca | ||1.1.6||
10 dhṛṣṭi̍rasi̱ brahma̍ ya̱cchāpā̎’gne̱’gnimā̱māda̍ñjahi̱ niṣkra̱vyādṛ̍ se̱dhā de̍va̱yaja̍ṃ vaha̱ nirda̍gdhṛ̱ rakṣo̱ nirda̍gdhā̱ arā̍tayo dhru̱vama̍si pṛthi̱vīndṛ̱hāyu̍rdṛha pra̱jāndṛ̍ha sajā̱tāna̱smai yaja̍mānāya̱ paryū̍ha dha̱rtrama̍sya̱ntari̍kṣaṃ dṛha prā̱ṇaṃ dṛ̍hāpā̱naṃ dṛ̍ha sajā̱tāna̱smai yaja̍mānāya̱ paryū̍ha dha̱ruṇa̍masi̱ diva̍ṃ dṛha̱ cakṣu̍r 11 dṛha̱ śrotra̍ṃ dṛha sajā̱tāna̱smai yaja̍mānāya̱ paryū̍ha̱ dharmā̍’si̱ diśo̍ dṛha̱ yoni̍ṃ dṛha pra̱jāṃ dṛ̍ha sajā̱tāna̱smai yaja̍mānāya̱ paryū̍ha̱ cita̍sstha pra̱jāma̱smai ra̱yima̱smai sa̍jā̱tāna̱smai yaja̍mānāya̱ paryū̍ha̱ bhṛgū̍ṇā̱maṃgi̍rasā̱ṃ tapa̍sā tapyadhva̱ṃ yāni̍ gha̱rme ka̱pālā̎nyupa ci̱nvanti̍ ve̱dhasa̍ḥ || pū̱ṣṇastānyapi̍ vra̱ta i̍ndravā̱yū vi mu̍ñcatām || cakṣu̍ra̱ṣṭāca̍tvārṛśacca ||1.1.7||
12 saṃva̍pāmi̱ samāpo̍ a̱dbhira̍gmata̱ samoṣa̍dhayo̱ rase̍na̱ sṛ re̱vatī̱rjaga̍tībhi̱rmadhu̍matī̱rmadhu̍matībhiḥ sṛjyadhvama̱dbhyaḥ pari̱ prajā̍tā sstha̱ sama̱dbhiḥ pṛ̍cyadhva̱ṃ jana̍yatyai tvā̱ saṃyau̎mya̱gnaye̎ tvā̱’gnīṣomā̎bhyāṃ ma̱khasya̱ śiro̍’si gha̱rmo̍’si vi̱śvāyu̍ru̱ru pra̍thasvo̱ru te̍ ya̱jñapa̍tiḥ prathatā̱ntvaca̍ṅgṛhṇīṣvā̱’ntari̍tṛ̱ rakṣo̱’ntari̍tā̱ arā̍tayo de̱vastvā̍ savi̱tā śra̍payatu̱ varṣi̍ṣṭhe̱ adhi̱ nāke̱’gniste̍ ta̱nuva̱ṃ mā’ti̍ dhā̱gagne̍ ha̱vyṛ ra̍kṣasva̱ sambrahma̍ṇā pṛcyasvaika̱tāya̱ svāhā̎ dvi̱tāya̱ svāhā̎ tri̱tāya̱ svāhā̎ || sa̱vi̱tā dvāvṛ̍śatiśca ||1.1.8||
13 āda̍da̱ indra̍sya bā̱hura̍si̱ dakṣi̍ṇaḥ sa̱hasra̍bhṛṣṭiḥ śa̱tate̍jā vā̱yura̍si ti̱gmate̍jā̱ḥ pṛthi̍vi devayaja̱nyoṣa̍dhyāste̱ mūla̱ṃ mā hṛ̍siṣa̱mapa̍hato̱’raru̍ḥ pṛthi̱vyai vra̱jaṃ ga̍ccha go̱sthāna̱ṃ varṣa̍tu te̱ dyaurba̍dhā̱na de̍va savitaḥ para̱masyā̎ṃ parā̱vati̍ śa̱tena̱ pāśai̱ṟyo̎’smāndveṣṭi̱ yañca̍ va̱yaṃ dvi̱ṣmastamato̱ mā mau̱gapa̍hato̱’raru̍ḥ pṛthi̱vyai de̍va̱yaja̍nyai vra̱jaṃ 14 ga̍ccha go̱sthāna̱ṃ varṣa̍tu te̱ dyaurba̍dhā̱na de̍va savitaḥ para̱masyā̎ṃ parā̱vati̍ śa̱tena̱ pāśai̱ṟyo̎’smāndveṣṭi̱ yañca̍ va̱yaṃ dvi̱ṣmastamato̱ mā mau̱gapa̍hato̱’raru̍ḥ pṛthi̱vyā ade̍vayajano vra̱jaṃ ga̍ccha go̱sthāna̱ṃ varṣa̍tu te̱ dyaurba̍dhā̱na de̍va savitaḥ para̱masyā̎ṃ parā̱vati̍ śa̱tena̱ pāśai̱ṟyo̎’smāndveṣṭi̱ yañca̍ va̱yaṃ dvi̱ṣmastamato̱ mā 15 mau̍ga̱raru̍ste̱ diva̱ṃ mā skā̱ṉ vasa̍vastvā̱ pari̍gṛhṇantu gāya̱treṇa̱ chanda̍sā ru̱drāstvā̱ pari̍gṛhṇantu̱ traiṣṭu̍bhena̱ chanda̍sā”di̱tyāstvā̱ pari̍gṛhṇantu̱ jāga̍tena̱ chanda̍sā de̱vasya̍ savi̱tuḥ sa̱ve karma̍ kṛṇvanti ve̱dhasa̍ ṛ̱tama̍syṛta̱ sada̍namasyṛta̱ śrīra̍si̱ dhā a̍si sva̱dhā a̍syu̱rvī cāsi̱ vasvī̍ cāsi pu̱rā krū̱rasya̍ vi̱sṛpo̍ viraphśinnudā̱dāya̍ pṛthi̱vīṃ jī̱radā̍nu̱ryāmaira̍yañca̱ndrama̍si sva̱dhābhi̱stāndhīrā̍so anu̱dṛśya̍ yajante || de̱va̱yaja̍nyaivra̱jaṃ tamato̱mā vi̍rapśi̱nnekā̍daśa ca ||1.1.9||
16 pratyu̍ṣṭṛ̱ rakṣa̱ḥ pratyu̍ṣṭā̱ arā̍tayo̱’gnerva̱steji̍ṣṭhena̱ teja̍sā̱ niṣṭa̍pāmi go̱ṣṭhammā nirmṛ̍kṣaṃ vā̱jina̍ntvā sapatnasā̱hṛ sammā̎rjmi̱ vāca̍ṃ prā̱ṇaṃ cakṣu̱ḥ śrotra̍ṃ pra̱jāṃ yoni̱ṃ mā nirmṛ̍kṣaṃ vā̱jinī̎ntvā sapatnasā̱hṛ sammā̎rjmyā̱śāsā̍nā saumana̱saṃ pra̱jṛ saubhā̎gyanta̱nūm || a̱gneranu̍vratā bhū̱tvā sanna̍hye sukṛ̱tāya̱ kam || su̱pra̱jasa̍stvā va̱yṛ su̱patnī̱rupa̍ 17 sedima || agne̍ sapatna̱dambha̍na̱mada̍bdhāso̱ adā̎bhyam || i̱maṃ viṣyā̍mi̱ varu̍ṇasya̱ pāśa̱ṃ yamaba̍dhnīta savi̱tā su̱śeva̍ḥ || dhā̱tuśca̱ yonau̍ sukṛ̱tasya̍ lo̱ke syo̱naṃ me̍ sa̱ha patyā̍ kṛṇomi || samāyu̍ṣā̱ sampra̱jayā̱ sama̍gne̱ varca̍sā̱ puna̍ḥ || sampatnī̱ patyā̱’haṅga̍cche̱ samā̱tmā ta̱nuvā̱ mama̍ || ma̱hī̱nāṃ payo̱’syoṣa̍dhīnṛ̱ rasa̱stasya̱ te’kṣī̍yamāṇasya̱ ni 18 rva̍pāmi mahī̱nāṃ payo̱’syoṣa̍dhīnṛ̱ raso’da̍bdhena tvā̱ cakṣu̱ṣā’ve̎kṣe suprajā̱stvāya̱ tejo̍’si̱ tejo’nu̱ prehya̱gniste̱ tejo̱ mā vi nai̍da̱gnerji̱hvā’si̍ su̱bhūrde̱vānā̱ṃ dhāmne̍ dhāmne de̱vebhyo̱ yaju̍ṣeyajuṣe bhava śu̱krama̍si̱ jyoti̍rasi̱ tejo̍’si de̱vo va̍ssavi̱totpu̍nā̱tvacchi̍dreṇa pa̱vitre̍ṇa̱ vaso̱ḥ sūrya̍sya ra̱śmibhi̍ḥ śu̱krantvā̍ śu̱krāyā̱ndhāmne̍dhāmne de̱vebhyo̱ yaju̍ṣeyajuṣe gṛhṇāmi̱ jyoti̍stvā̱ jyoti̍ṣya̱rcistvā̱’rciṣi̱ dhāmne̍dhāmne de̱vebhyo̱ yaju̍ṣeyajuṣe gṛhṇāmi || upa̱nīra̱śmibhi̍ḥ śu̱krṛ ṣoḍa̍śa ca ||1.1.10||
19 kṛṣṇo̎’syākhare̱ṣṭho̎’gnaye̎ tvā̱ svāhā̱ vedi̍rasi ba̱ṟhiṣe̎ tvā̱ svāhā̍ ba̱ṟhira̍si sru̱gbhyastvā̱ svāhā̍ di̱ve tvā̱’ntari̍kṣāya tvā pṛthi̱vyai tvā̎ sva̱dhā pi̱tṛbhya̱ ūrgbha̍va barhi̱ṣadbhya̍ ū̱rjā pṛ̍thi̱vīṃ ga̍cchata̱ viṣṇo̱ḥ stūpo̱’syūrṇā̎mradasantvā stṛṇāmi svāsa̱sthande̱vebhyo̍ gandha̱rvo̍’si vi̱śvāva̍su̱rviśva̍smā̱dīṣa̍to̱ yaja̍mānasya pari̱dhiri̱ḍa ī̍ḍi̱ta indra̍sya bā̱hura̍si̱ 20 dakṣi̍ṇo̱ yaja̍mānasya pari̱dhiri̱ḍa ī̍ḍi̱to mi̱trā varu̍ṇau tvottara̱taḥ pari̍dhattāndhru̱veṇa̱ dharma̍ṇā̱ yaja̍mānasya pari̱dhiri̱ḍa ī̍ḍi̱taḥ sūrya̍stvā pu̱rastā̎tpātu̱ kasyā̎ścida̱bhiśa̍styā vī̱tiho̎trantvā kave dyu̱mantṛ̱ sami̍dhīma̱hyagne̍ bṛ̱hanta̍madhva̱re vi̱śo ya̱ntre stho̱ vasū̍nṛ ru̱drāṇā̍mādi̱tyānṛ̱ sada̍si sīda ju̱hūru̍pa̱bhṛddhru̱vā’si̍ ghṛ̱tācī̱ nāmnā̎ pri̱yeṇa̱ nāmnā̎ pri̱ye sada̍si sīdai̱tā a̍sadanthsukṛ̱tasya̍ lo̱ke tā vi̍ṣṇo pāhi pā̱hi ya̱jñaṃ pā̱hi ya̱jñapa̍tiṃ pā̱hi māṃ ya̍jña̱niya̎m || bā̱hura̍si pri̱ye sada̍si̱ pañca̍daśa ca ||1.1.11||
21 bhuva̍namasi̱ vi pra̍tha̱svāgne̱ yaṣṭa̍ri̱dannama̍ḥ || juhvehya̱gnistvā̎ hvayati devaya̱jyāyā̱ upa̍bhṛ̱dehi̍ de̱vastvā̍ savi̱tā hva̍yati devaya̱jyāyā̱ agnā̍viṣṇū̱ mā vā̱mava̍ kramiṣa̱ṃ vi ji̍hāthā̱ṃ mā mā̱ santā̎ptaṃ lo̱kamme̍ lokakṛtau kṛṇuta̱ṃ viṣṇo̱ḥ sthāna̍masī̱ta indro̍ akṛṇodvī̱ryā̍ṇi samā̱rabhyo̱rdhvo a̍dhva̱ro di̍vi̱spṛśa̱mahru̍to ya̱jño ya̱jñapa̍te̱rindrā̍vā̱nthsvāhā̍ bṛ̱hadbhāḥ pā̱hi mā̎gne̱ duśca̍ritā̱dā mā̱ suca̍rite bhaja ma̱khasya̱ śiro̍’si̱ sañjyoti̍ṣā̱ jyoti̍raṅktām || ahru̍ta̱ eka̍vṛśatiśca ||1.1.12||
22 vāja̍sya mā prasa̱veno̎dgrā̱bheṇoda̍grabhīt || athā̍ sa̱patnṛ̱ indro̍ me nigrā̱bheṇādha̍rṛ akaḥ || u̱dgrā̱bhaṃ ca̍ nigrā̱bhaṃ ca̱ brahma̍ de̱vā a̍vīvṛdhan || athā̍ sa̱patnā̍nindrā̱gnī me̍ viṣū̱cīnā̱n vya̍syatām || vasu̍bhyastvā ru̱drebhya̍stvā”di̱tyebhya̍stvā̱ktṛ rihā̍ṇā vi̱yantu̱ vaya̍ḥ || pra̱jāṃ yoni̱ṃ mā nirmṛ̍kṣa̱mā pyā̍yantā̱māpa̱ oṣa̍dhayo ma̱rutā̱ṃ pṛṣa̍tayasstha̱ diva̍ṃ 23 gaccha̱ tato̍ no̱ vṛṣṭi̱mera̍ya || ā̱yu̱ṣpā a̍gne̱’syāyu̍rme pāhi cakṣu̱ṣpā a̍gne’si̱ cakṣu̍rme pāhi dhru̱vā’si̱ yaṃ pa̍ri̱dhiṃ pa̱ryadha̍tthā̱ agne̍ deva pa̱ṇibhi̍rvī̱yamā̍ṇaḥ || tanta̍ e̱tamanu̱ joṣa̍ṃ bharāmi̱ nede̱ṣa tvada̍pace̱tayā̍tai ya̱jñasya̱ pātha̱ upa̱ sami̍tṛ sa2ṛsrā̱vabhā̍gāḥ sthe̱ṣā bṛ̱hanta̍ḥ prastare̱ṣṭhā ba̍rhi̱ṣada̍śca 24 de̱vā i̱māṃ vāca̍ma̱bhi viśve̍ gṛ̱ṇanta̍ ā̱sadyā̱smin ba̱ṟhiṣi̍ mādayadhvama̱gnervā̱mapa̍nnagṛhasya̱ sada̍si sādayāmi su̱mnāya̍ sumninī su̱mne mā̍ dhattandhu̱ri dhu̱ryau̍ pāta̱magne̍’dabdhāyo’śītatano pā̱hi mā̱’dya di̱vaḥ pā̱hi prasi̍tyai pā̱hi duri̍ṣṭyai pā̱hi du̍radma̱nyai pā̱hi duśca̍ritā̱davi̍ṣannaḥ pi̱tuṅkṛ̍ṇu su̱ṣadā̱ yoni̱gg̱ svāhā̱ devā̍ gātuvido gā̱tuṃ vi̱tvā gā̱tumi̍ta̱ mana̍sa spata i̱manno̍ deva de̱veṣu̍ ya̱jña2ṛ svāhā̍ vā̱ci svāhā̱ vāte̍ dhāḥ || diva̍ñca vi̱tvā gā̱tuṃ trayo̍daśa ca ||1.1.13||
25 u̱bhā vā̍mindrāgnī āhu̱vadhyā̍ u̱bhā rādha̍saḥ sa̱ha mā̍da̱yadhyai̎ || u̱bhā dā̱tārā̍vi̱ṣṛ ra̍yī̱ṇāmu̱bhā vāja̍sya sā̱taye̍ huve vām || aśra̍vṛ̱ hi bhū̍ri̱dāva̍ttarā vā̱ṃ vijā̍māturu̱ta vā̍ ghā syā̱lāt || athā̱ soma̍sya̱ praya̍tī yu̱vabhyā̱mindrā̎gnī̱ stoma̍ṃ janayāmi̱ navya̎m || indrā̎gnī nava̱tiṃ puro̍ dā̱sapa̍tnī radhūnutam || sā̱kameke̍na̱ karma̍ṇā || śuci̱nnu stoma̱nnava̍jāta ma̱dyendrā̎gnī vṛtrahaṇā ju̱ṣethā̎m || 26 u̱bhā hi vṛ̍ su̱havā̱ joha̍vīmi̱ tā vājṛ̍ sa̱dya u̍śa̱te dheṣṭhā̎ || va̱yamu̍ tvā pathaspate̱ ratha̱nna vāja̍sātaye || dhi̱ye pū̍ṣannayujmahi || pa̱thaspa̍tha̱ḥ pari̍patiṃ vaca̱syā kāme̍na kṛ̱to a̱bhyā̍naḍa̱rkam || sa no̍ rāsacchu̱rudha̍śca̱ndrāgrā̱ dhiya̍ndhiyṛ sīṣadhāti̱ pra pū̱ṣā || kṣetra̍sya̱ pati̍nā va̱yṛ hi̱tene̍va jayāmasi || gāmaśva̍ṃ poṣayi̱tnvā sa no̍ 27 mṛḍātī̱dṛśe̎ || kṣetra̍sya pate̱ madhu̍mantamū̱rmiṃ dhe̱nuri̍va̱ payo̍ a̱smāsu̍ dhukṣva || ma̱dhu̱ścuta̍ṅghṛ̱tami̍va̱ supū̍tamṛ̱tasya̍ na̱ḥ pata̍yo mṛḍayantu || agne̱ naya̍ su̱pathā̍ rā̱ye a̱smān, viśvā̍ni deva va̱yunā̍ni vi̱dvān || yu̱yo̱dhya̍smajju̍hurā̱ṇameno̱ bhūyi̍ṣṭhānte̱ nama̍ uktiṃ vidhema || ā de̱vānā̱mapi̱ panthā̍maganma̱ yaccha̱knavā̍ma̱ tadanu̱ pravo̍ḍhum || a̱gnirvi̱dvānthsa ya̍jā̱ 28 thsedu̱ hotā̱ so a̍dhva̱rānthsa ṛ̱tūnka̍lpayāti || yadvāhi̍ṣṭha̱ntada̱gnaye̍ bṛ̱hada̍rca vibhāvaso || mahi̍ṣīva̱ tvadra̱yistvadvājā̱ udī̍rate || agne̱ tvaṃ pā̍rayā̱ navyo̍ a̱smānthsva̱stibhi̱rati̍ du̱rgāṇi̱ viśvā̎ || pūśca̍ pṛ̱thvī ba̍hu̱lā na̍ u̱rvī bhavā̍ to̱kāya̱ tana̍yāya̱ śaṃyoḥ || tvama̍gne vrata̱pā a̍si de̱va ā martye̱ṣvā || tvaṃ ya̱jñeṣvīḍya̍ḥ || yadvo̍ va̱yaṃ pra̍mi̱nāma̍ vra̱tāni̍ vi̱duṣā̎ndevā̱ avi̍duṣṭarāsaḥ || a̱gniṣṭadviśva̱mā pṛ̍ṇāti vi̱dvān, yebhi̍rde̱vṛ ṛ̱tubhi̍ḥ ka̱lpayā̍ti || ju̱ṣethā̱mā sa no̍ yajā̱dā trayo̍vṛśatiśca ||1.1.14||